ORANJESTAD - Manera ta conoci, W.E.B. Aruba N.V. ta calcula na final di tur luna e prijs averahe di e “fuel oil” durante e luna en cuestion y ta adapta, si ta necesario e tarifa di brandstofclausule cu e ta cobra N.V. ELMAR pa e luna siguiente. Over e luna December 2007 e prijs averahe tawata $69 pa cada barril di “fuel oil”, y esaki tawata tin como resultado cu e tarifa cu N.V. ELMAR a cobra su consumidornan over luna di Januari 2008 tawata 28 cent pa cada kWh.
E prijs averahe di “fuel oil” over di luna di Januari 2008 no a conoce cambio, locual ta nifica cu pa luna di Februari, N.V. ELMAR ta mantene e mesun tarifa di brandstofclausule, esta di 28 cent pa cada kWh.
Aunke e brandstofclausule no a aumenta pa luna di Februari, N.V. ELMAR ta continua pone enfasis na su consumidornan, ariba uso di energia conciente y segun bo propio presupuesto.
ADAPTACION DEPOSITO 2008
Deposito di cada consumidor mester ta igual na cobranza di un luna di consumo.
E cobransa mensual, ta depende di diferente factor variabel, manera e consumo (kWh), e brandstofclausule y e adaptacion di e deposito.
Manera conoci, desde September 2007, Gerencia di N.V. ELMAR a tuma e decision pa no adapta e deposito ariba e cobransa mensual, y a congela (“freeze”) tur adaptacion automatico pa consumidornan domestico. E efecto di un adaptacion automatico, huntu cu e efecto di un aumento di brandstofclausule, combina tambe cu e efecto di lunanan mas calor, tawata tin un resultado relativamente substancial pa e cobransa di e consumidor.

ORANJESTAD– Tin un dicho na Papiamento cu ta bisa cu ‘aunke con grandi e mentira ta, e verdad semper ta alcans’e na caminda’. Hecho ta cu e dicho aki ta 100 % aplicabel riba nos opositornan politico cu constantemente ta ataca Gabinete Oduber riba e asunto di criminalidad cu supuestamente a azota nos comunidad durante e ultimo añanan y insinuando cu Aruba ta birando un pais hopi insigur. Cu esaki nos opositornan cu nan mente diabolico ta trata di spanta tanto e comunidad local como e turistanan riba un supuesto aumento di criminalidad den e pais aki.
Sinembargo recientemente a wordo publica e relato anual 2006 di Ministerio Publico den cual un bista real ta wordo duna di e cantidad di delitonan cometi durante aña 2006 y un comparacion ta wordo haci cu e añanan anterior 2004 y 2005.

Claramente tur hende por mira con na 2006 e cantidad di delitonan a BAHA substancialmente y esaki compara cu e añanan 2004 y 2005. Segun e rapport di Ministerio Publico, bao di e delitonan cometi den 2006 ta resalta: Ladronicia (312), Delito di droga/hard drugs (162), Coremento bao influencia (140), Menaza (103), Coremento sin rijbewijs (89), Destruccion (70), Maltrato cu arma (53), Violencia publico (51), Maltrato simpel (48) y Delito di droga/soft drugs (47).
Tambe den e rapport ta indica cu e cantidad di infraccionnan na 2006 tabata 6610 y si compara esaki cu 2005 (6599), esaki a aumenta levemente cu solamente 11.
Otro datonan oficial di 2006 cu ta aparece den e relato anual di Ministerio Publico ta:
o Na 2006 Ministerio Publico a registra 7812 sospechoso, cual ta 95 MENOS cu na 2005 (7907); pa gran parti esaki ta concerni sospechosonan di infraccionnan leve;
o Na 2006 e cantidad di sospechosonan di delitonan cometi tabata 1202 y esaki ta 8% MENOS cu na 2005 (1308);
o Na 2006 a registra 7 kitamento di bida, mientras cu na 2005 esaki tabata 6, pues un aumento hopi chikito;
o Na 2006 e cantidad di sospechosonan di delitonan di droga a BAHA atrobe; esaki siguramente ta danki na e esfuersonan di Minister di Husticia cu a percura pa e radarnan, helicopter, Cuerpo Policial cu mas personal y material, Warda Nos Costa, cachonan anti-droga, scanner etc.;
o Na 2006 e cantidad di sospechosonan di ladronicia a conoce un REDUCCION leve;
o Na 2006 e cantidad di violacionnan den trafico a conoce un REDUCCION leve.
Asina pues nos tur por mira cu ta danki na e maneho dinamico di nos Minister di Husticia sr. Rudy Croes nos por bisa cu Aruba ta un di e paisnan di mas sigur den e region aki. Y esaki teniendo na cuenta cu nos poblacion a crece bastante durante e ultimo añanan y nos a conoce tambe mas turista cu ta bishitando nos isla.
Ta pesey partido MEP ta manda un palabra di felicitacion na Cuerpo Policial y otro institutonan hudicial, Gabinete Oduber y su Minister di Husticia pa e bunita trabao desplega y ta spera cu den e proximo relato anual (2007) lo nos por bolbe mira reduccionnan substancial den e cifranan di criminalidad.

ORANJESTAD - Ministro di di Finansas y Asunto Economico ta informa cu debi na desaroyonan na nivel mundial relaciona cu prijs di productonan petrolero, na Aruba tambe ta surgi un cambio den e prijsnan entrante 13 februari 2008.
E cambio ta conta pa e benta cu comercio por menor (kleinhandelsprijzen).
Gasolin unleaded-premium: 213,1 cent pa liter (+ 2,2 cent)
Gasoil LS (Valero): 191,6 cent pa liter (- 1,1 cent)
Kerosin: 187,3 cent pa liter (- 0,3 cent)
E reduccion ariba tarifanan di accijns pa absorba e aumento di prijs over di periodo di mei 2007, ta keda manteni.

ORANJESTAD – Departamento di Obra Publico ta trece na conocemento di pueblo, particularmente bario di Koyari y Gasparito, cu diahuebs 14 di februari 2008 lo cuminsa cu construccion di caminda.
E caminda di santo na Koyari, for di Koyari #38 te cu #37, y Gasparito, for di Gasparito #10 te cu Gasparito #8, lo ta bou construccion riba e fecha menciona pa un periodo di 6 siman. E caminda lo ta cera pa trafico den ambos direccion for di 07.00 mainta te cu 04.00 atardi. Lo tin borchi y heki di trafico pa indica esaki.
D.O.W. ta pidi tur manehado di auto pa no haci uso di e caretera sino ta pa yega bo cas, alaves ta pidi comprencion y disculpa pa cualkier inconveniencia cu esaki por ocasiona.

ORANJESTAD- E aña aki ta aña di Cultura y den su luna cultural na maart proximo, Aruba ta celebra su Himno y Bandera riba 18 di maart proximo. Tur aña Aruba henter ta celebra en grandi e dia aki cu un variedad di actividad. Durante e ultimo añanan nos bandera di Aruba a resalta tur caminda durante di e dianan na caminda pa e celebracion nacional aki.
Minister di Cultura, sr. Ramon Lee cu e fin pa fortifica e identidad y orguyo nacional, e aña aki atrobe ta desea di promove e simbolonan nacional y comparti e celebracion aki cu henter pueblo. Pa esaki ta preparando un programa pa motiva un participacion masal pa asina tur Arubiano haya un oportunidad di expresa nan amor patrio.
Cu e solo meta pa inculcra e celebracion aki cerca comunidad, di awor caba, ta pidi tur hende pa prepara nan bandera, nan flanel y demas articulonan relaciona cu himno y bandera. Den aña di cultura un reto ta bay na e creatividad di nos hendenan, esta artista y comerciantenan, pa trece producto patriotico riba mercado na un prijs rasonabel pa asina tur hende expresa nan patriotismo.
Manera ta birando e bon custumber, ciudadanonan di Aruba orguyosamente ta hisa bandera di Aruba na cas, club of negoshi, core cu banderin na auto y bisti flanel cu tema di Himno y Bandera.
Feria patriotico, e evento exitoso cu pa di 6 aña consecutivo cu ta yuda anticipa e celebracion di Himno y Bandera na maart lo tin atrobe un mercado publico na cual lo bende tur e productonan patriotico na un solo lugar y den un ambiente excepcional.
E aña aki esaki lo tuma lugar dilanti di Aruba Entertainment Center na Dakota y lo ta mas dia largo, esta di 6 te cu 9 di maart. Ta spera atrobe un gran surtido di productonan pa e celebracion y esnan interesa por cuminsa prepara di awor caba.

ORANJESTAD- Awe lo trata e ultimo presupuesto di 2008 esta esun cu ta regarda tur asunto esta e Presupuesto di Asuntonan General. Pa cu esaki lo tin presencia di Ministro Presidente den sala di Parlamento.
Por bisa cu e biaha aki e presupuestonan di ana 2008 a keda entrega na tempo na Parlamento segun nos Constitucion, esta promer cu 1 di september.
Dia 3 di december a inicia cu tratamento di e presupuestonan y awe of mayan lo finaliza cu e tratamento. Presidente di Parlamento, drs. Mevin Ras ta spera cu e presupuestonan di ana 2009 tambe lo keda entrega promer cu dia 1 di september di e ana aki.
E comunicado di prensa aki ta demostra si un tiki hypocrecia di Presidente di Parlamento, esta drs Mervin Ras.
Den e cuater pa cinco añanan cu su Gobierno no a presenta presupuesto na ora segun Constitucion, su persona mester tabata e prome pa eleva su mes riba su interesnan politico, y yama su Gobierno na ordo.
Nunca el a haci esaki y awor cu porfin su gobierno ta entrega un presupuesto na tempo despues di a faya asina hopi, Presidente Ras ta sinti su mes yama pa promove e “stunt” politico aki, como sifuera cu e ta drecha e imagen troci di e maneho financiero di e actual Gobierno.
Un falta di madurez pero mas cu tur cos, un falta di seriedad di parti di e Presidente di Parlamento, ya cu e por a exigi den pasado, mescos cu e ta trata di ser cortez e biaha aki pa recorda Gobierno pa entrega presupuesto 2009 pa dia prome di september venidero.

ORANJESTAD- Un biaha mas Aruba lo organisa un conferencia regional riba “Tourism Secrity”. E ta e di Dos “Caribbean Tourism Security Conference” organisa pa Aruba Hospitality & Security Foundation (AH&SF), AHATA y ATA.
E conferencia lo tuma lugar na Renaissance Conference Center, for di 4 – 7 Juni 2008.
E prome conferencia di “Tourism Security” a tuma lugar dos anja pasa na Aruba y tabata un exito.
Despues di e reunion aki, nos a keda haya pregunta ki dia e proximo lo tuma lugar. Pa nos “Foundation”, e interes grandi no ta un sorpresa, mirando cu mas y mas gerente general di hotelnan na Aruba, den region y rond mundo ta considera siguridad como e factor mas importante di nan operacion. Mesun cos ta conta pa e industria crucero y e “airlines”.
E Conferencia International cu oradonan y expertonan ta sirbi pa cada un di nos amplia nos conocemento riba e tereno aki.
Un biaha mas e experto international riba Tourism Security Dr. Peter Tarlow ta duna un man na AH&SF pa organisa e evento, y e ta e persona encarga pa trece e diferente oradonan pa dirigi e topiconan,cu lo ta entre otro:
Gangs, how to deal with them
Terrorism and Tourism
Cruise and Airport Security
Casino Security
Food Safety
In-house Theft
Festivals Security
Customs
E aspecto di sinja conoce experencia do otro ta uno importante di e Conferencia aki.
AH&SF di su banda a duna na diferente pais den region nan presentacion di e Visibility Team.

WASHINGTON – Roger Clemens a bisa su kompañero di Yankees Andy Pettitte kasi 10 aña pasá ku el a usa HGH, Human Groth Hormone, asina Pettitte a bisa den su kòmbersashon bou di huramentashon ku el a hasi den Kongreso, asina The Associated Press, por a haña sa ayera.
E persona ku a bisa AP tabata kier keda anónimo, ya ku e dokumento no a keda hasí públiko. E deklarashon aki a keda firmá djabièrnè siman pasá anochi.
Pettitte a bisa den su deklarashon ku na 2005, el a puntra Clemens kiko e lo hasi si nan puntr’é tokante di supstansianan prohibí, ya ku den pasado el a atmití esaki. Di akuerdo ku loke ta pará den e deklarashon AP por a komprondé ku Clemens a kontestá bisando Pettitte ku el a mal komprondé su palabranan anteriormente na 1999 òf ta 2000. De fakto Clemens a atmití tambe di papia di uso di HGH dor di su kasá den e kombersashon original.
“Nos no sa kiko Andy a bisa”, asina e abogado prinsipal di Clemens, Rusty Hardin a bisa den un komunikado ku el a manda pa e-mail pa AP. “Nos ta spera di tende esaki mañan”.
E notisia aki a bini nèt riba e anochi promé ku Clemens mester presentá pa testiguá den Kongreso.
Un otro testigu ku tambe mester presentá awe ta e entrenadó personal di Clemens, Brian McNamee. McNamee a bisa George Mitchell ku el a inyektá Clemens por lo ménos na 16 okashon ku HGH for di 1998 pa 2001.

FORT MEYERS, FLA – Clay Buchholz ku a tira un “no-hitter” den su di dos salida den Liga Grandi i Jon Lester ku a gana e último wega di Seri Mundial lo ta e posibel remplasantenan di Curt Schilling den rotashon.
Curt Schilling kisas lo no picha mas.
E dos pichernan hóben aki ku kisas tabata falta un aña promé ku nan drenta rotashon awor lo mester hasi e trabou e aña aki.
Ku Schilling rehabilitando te por lo ménos pa All-Star Game, ta pone ku Lester i Buchholz lo drenta den rotashon habridó di RSox kisas komo di tres i di kuater picher.
Josh Beckett i Daisuke Matsuzaka tin e dos promé puestonan. Tim Wakefield por bira number 3 si e ta rekuperá di e inflamashon na su skouder drechi ku a tené for di Seri Mundial.
Lester di 24 aña na komienso di temporada pasá mester a pasa den basta kos ya ku e tabatin kanser i mester a risibí tratamentu di kemoterapia. El a hunga den tres tim di Liga Menor.
Buchhol ku tin 23 aña a habri solamente kuater wega den Liga Grandi. E no tabata riba roster di RSox pa Seri Mundial pa motibu ku el a yega su límite di iningnan ku RSox a pone pe.
Hasta ku un rekòrt di 3-1 ku un era di 1.59 ku un “no-hitter” kontra di Baltimore, no a kambia nan di idea.
“Realmente nan tabata protehémi. Pues mi no ta bai konta di nan pa kitami for di riba roster, pero lo tabata “great” si mi por tabata parti di dje”.

MINNEAPOLIS – Minnesota Twins a agregá un veterano na nan rotashon sin eksperensia.
E picher derecho Livan Hernandez ayera a yega na un akuerdo na un kontrakt di un aña pa 5 mion dollar, kaminda e por gana adishonalmente 2 mion dollar den bononan pa aktuashon.
Twins a pèrdè tres picher habridó, ku Johan Santana den kambio pa Mets, Carlos Silva ku a firma komo agente liber ku Seattle Mariner i Matt Garza ku a keda kambiá ku Tampa Bay.
Aña pasá Livan Hernandez a gana 7 mion dollar i tabatin rekòrt di 11-11 ku un era di 4.93 den 33 salida ku Arizona.
Hernandez, un nativo di Cuba, i tin 10 aña den Liga Grandi i tin un promedio di por lo ménos 199 ining tirá for di 1998. El a sali Nobato di Aña na 1997 i a gana un Seri Mundial ku Florida Marlins.
Durante di e pasado ocho añanan, kaminda nunka e no a tira den Liga Amerikana, a enkabesá Liga Grandi ku mas di 1837 ining i 32 wega kompleto tirá. Den 350 wega ku ela habri den su karera e tin rekòrt di 134-128 ku un era di 4.25.


-0-0-



David Ortiz ta prepará pa mas promedio i ménos honron


SANTO DOMMINGO – E pelotero dominikano David Ortiz ta prepará pa temporada 2008 i a bisa di ta preferá un promedio di bateo haltu na lugá di konektá honron.
“E kos aki tabata mortifikámi, kuantu hit nan a kita for di mi entre primera i segunda, e manera ku e defensa tabata hunga kontra di mi”, asina Ortiz a bisa ayera na e korant Listín Diario.

WILLEMSTAD – E siman aki tin otro aktividat den Sala Niels Liberia, den stadion Doe Willems na Suffisant.
Pa e motibu ei NO por tin treining djarason 13 di febrüari ni djaweps 14 di febrüari.
Ta pidi tur miembro pa tene kuenta ku esaki.
Próksimo treining lo ta djaluna 18 di febrüari.

WILLEMSTAD – Den Kategoria Femenino Superior, Hurricane i Sithoc ku a pèrdè nan promé wega den semi finalnan a topa otro pa wak ken ta bai konosé nan promé viktoria den semi final.
Hurricane e biaha aki si no a hasi e mesun fout ku nan a hasi den nan partido anterior kontra di Stakamahakchi.
Hurricane a bin por la goma i a pone Sithoc den un posishon ku nan mester gana den nan próksimo wega.
Hurricane a logra triunfo di 3-1 riba Sithoc, ku sètnan di 25-19, 26-28, 25-20 i 25-11.
Den e promé wega di Promoshon i Degradashon, Xaferinane femenino ta pika dilanti 1-0, dor di gana di e kampionnan di Klase A, Watakeli ku skor di 3-0. E sètnan tabata 25-14, 25-20 i 25-7.
Ku un viktoria mas awe djarason Xaverianen a keda den Klase Superior den próksimo kampionato.
Weganan pa awe djarason 13 di febrüari na SDK.
Pa 20:00:
Promoshon i Degradashon:
Xaverianen-Watakeli
Pa 20:00:
Kategoria maskulino Superior:
Stakamahakchi-Warwarú.

WILLEMSTAD – Ku e viktoria di ayera nochi e ekipo di VESTA ta pasa un pasá bai na e di dos lugá riba e tabla di posishon, tras di Hubentud Fortuna ku tin 20 punto.
Den un partido ku den e di dos mitar na kabamentu di e wega a bira un bataya kampal.
E wega tabata basta bon den e promé mitar ku VESTA dilanti 1-0 despues di un bon tiru liber kobrá pa Gerson Sambo.
Ku e skor aki tambe e wega a bai sosegá.
Den e di dos mitar ku e mesun skor aki, Tayrone Maria tambe ta kobra un tiru liber ku éksito pa asina pone e skor 2-0.
Despues di esaki e wega a bira sumamente brutu entre e dos ekiponan.
Esaki a pone ku rèfri mester a saka tres karchi kòrá entre e dos ekiponan.
Dos pa Sithoc i unu pa VESTA.
VESTA ta akumulá 18 punto i Sithoc ta keda ku su 13 puntonan.
Centro Barber ku awe nochi mester enfrentá Undeba ta na di tres lugá ku 16 punto.
Kos ta birando pèrtá na kabamentu di promé buèlta aki.
Esaki ta pone ku e di dos buèlta lo bira sumamente interesante.

CARACAS, Venezuela, - Gobièrnu di Presidente di Venezuela, Hugo Chávez, a anunsiá su desishon di suspendé relashonnan komersial i suministro di krudo i produktonan pa ExxonMobil Corp., e empresa petrolero mas grandi di Merka.
Empresa estatal Petróleos de Venezuela (PDVSA) a bisa den un komunikado ku a suspendé e relashonnan komersial ku e empresa petrolero i refinador ExxonMobil komo medida di revershon.
Den e sentido aki, PDVSA a paralisá bentanan di krudo ku ExxonMobil.
“Nos ta kla!”, Minister di Energia i Petroli, Rafael Ramírez, a afirmá den entrevista ku korant caraqueño Ultimas Noticias a publiká, i ounke el a rekonosé ku e medida lo bai tin impakto den ekonomia venezolano, “lo bai ta mas kompliká pa ekonomia di Merka”, el a bisa.
Djadumingu último, Presidente Chávez a ripití un menasa ku ya el a ekspresá na vários oportunidat, bisando ku por interumpí suministronan pa Merka. Chávez a sigurá ku e desishon hudisial ta parti di un “kampaña di Imperio”, manera generalmente e ta referí Gobièrnu di Merka, ku ta buskando pa desestabilis’é, i el a menasá ku “konsekuensianan serio”.
Di otro banda, e medidanan koutelar pidí pa ExxonMobil no ta korespondé ku solides ekonómiko i finansiero di PDVSA, empresa ku ta mantené akshonnan pa mas ku 109 mil miónes di dollar, ni ku historial di pago di e empresa estatal venezolano, i hopi ménos ku balor di e akshonnan di empresa ExxonMobil na Venezuela.

Skina di Sorti, awe djarason 13 di febrüari di 2008, ta kuminsá ku deseá tur hende un bon dia. Un di e faktornan kritiko pa realisá gobernashon efektivo ta un relashon kordial entre e partnernan sosial. E partnernan sosial no tin mester ta di akuerdo ku otro i mi ke bisa te hasta no por tin e mesun pensamentu (un akuerdo ta un ponementu di awa den e biña) pa e interesnan distinto ku nan tin di sirbi. Interes general no ta igual ku sòm di tur interes partikular òf promedio di esakinan.
****
Partnernan sosial i gobièrnu irespekto di nan diferensia di pensamentu mester mantené un klima den kual nan por papia ku otro riba tur lokual ta na órden. Deskonfiansa i falta di kredibilidat no ta sirbi pa krea un klima adekuado. Si banda di esei nos mira kon deterioro sosio kultural ta redunda den komunikashon di nivel kuestionabel, ta lógiko ku medionan di komunikashon sosial ta bira e plataforma pa e partnernan sosial i gobièrnu basha bala riba otro.
****
E opservashonnan krítiko di parti di VBC den direkshon di un dje gobernantenan, por sierto un di esnan ku mas mihó resepshon den mundu komersial, esta diputado Eugène Rhuggenaath di PAR, mester ta motibu pa no Bestuurscollege so, pero un delegashon di tantu gabinete de Jongh-Elhage komo Bestuurscollege sinta mesa ku VBC i “clear the air”. Pa logra esei, gobièrnu mester kuminsá ku wak su mes komo instituto (pues no komo konstelashon di turno) duru den kara.
****
Si personifiká e relashon, i kada ken sinti ku eventual remarkenan ta konstituí un atake riba su imágen, no tin sentido pa konvoká ningun reunion. Di parti di VBC i Kámara di Komersio un aseptashon ku e tono den nan komunikashon a desviá for djesun rekerí entre partnernan sosial, tambe ta un kondishon pa krea e klima adekuado pa por “clear the air”. Pa lokual ta esensia di e krítika di empresario/komersio e echonan ta sostené e sektor di empresario/komersio.

WILLEMSTAD- Fundashon Sedreko ta informá tur mayor i tur hóben di entre 6 pa 19 aña ku tin hopi posibilidat pa práktika deporte práktikamente henter siman den Sentro Rekreo Marie Pampoen.
Fundashon Sedreko ta hasiendo tramitenan pa por agregá e deporte di “Kick-Boxing” tambe. Ta dunando kaba: Pin Pon, Dam i Ahedres.
E kalendario ta di siguiente manera:
Djaluna 3’or-5’or Pin Pon: ku sr. Frederick Clarette.
Djarason 4.30-6.30 pm Dam: ku sr. Franklyn Maduro.
Djaweps 3’or-5’or Ahedres: ku sr. Alvin Smith.
Djabièrnè 3’or pa 5’or Pin Pon: ku sr. Frederick Clarette.
E aktividatnan di deporte aki ta kompletamente grátis.
Únikamente Fundashon Sedreko ta pidi bon komportashon di e muchanan.
Un sugerensia na mayornan pa manda e muchanan Sentro Rekreo Marie Pampoen pa praktiká deporte.

PHILIPSBURG –Apesar ku su altesa Prens heredero di Qatar Tamim Bin Hamad Al Thani tabatin un pasport diplomátiko, e i su grupo a wòrdu ningá entrada na Prinses Juliana International Airport na St. Maarten ayera, pasobra e no tin un visa pa drenta Antia.
Despues di a warda kasi tres ora den avion, e piloto a disidí pa lanta buelo bèk pa Merka. Henter e delegashon tabatin visa di Union Europeo. Esaki a keda konfirmá pa Roland van Grieken di Caribbean Exotica.com
Van Grieken a trata di drenta den kontakto ku vários ofisial pa wak ki eksepshon por a wòrdu hasí pa e Prens i su grupo. Sinembargo su esfuersonan no a duna resultado. El a añadí, ku ora hendenan di e kaliber aki ke bishitá e isla, mester por hasi un esfuerso pa fasilitá e bishita royal. “Turismo ta nos negoshi i ora un VIP manera esaki bin nos isla, nos mester hasi algu pa wak kiko por hasi pa nan. Unabes ku nan bai, nan no ta bin bèk mas.”
Segun un ofisial di e aeropuerto na St. Maarten, regla ta, ku personanan di Qatar mester di visa i si nan no tin un, nada no por wòrdu hasí pa nan.
E parti iróniko di henter a desaroyo aki ta, ku si e avion di e Prens lo a baha na parti franses di St. Maarten, e lo no tabatin ningun problema pasobra su visa di Union Europeo lo tabata bálido.
Pa trata suavisá henter e situashon, van Grieken a trata na regla un alternativo pa e prens, pero Hamad Al Thani a regresá bèk Rode Island.
Hamad Al Thani i su grupo di ocho persona lo mester a keda na The Westin St. Maarten. Durante su estadia na St. Maarten e prens tabatin sita pa bai mira vários propiedat ku intenshon pa kumpra esaki nan.

No por drecha Kuerpo Polisial di Antia mas pues konstruí un nobo pa Kòrsou i St. Maarten

WILLEMSTAD - A lanta basta komentario rondó di e diskurso ku promé minister di Ulanda, Jan Peter Balkenende a tene na St. Maarten ayera. Pa minister di Asuntunan Konstitushonal, Roland Duncan esaki no ta nada nobo, pero si ku mester tuma e palabranan aki komo último atvertensia.
E mensahe ku promé minister di Ulanda, Jan Peter Balkenende a pronunsiá ayera no tabata un sorpresa pa minister Duncan.
“Masha dia por a kapta señalnan, pero awor ta e hefe di gobièrnu di Reino a bisa esaki. Awor por a tende for di e horse’s mouth,” asina Roland Duncan a duna di konosé na prensa.
E mensahe ku Duncan ta referí na dje, ta básikamente ku sin kambio fundamental, no tin status aparte pa Sint Maarten.
E minister ta kere tambe, ku tur hende mester komprondé, ku mas desishon serio i doloroso mester keda tumá.
“Sekretario di Estado Bijleveld masha dia ta den publisidat i tabata bisa meskos. Kier men loke Balkenende a bisa ta konfirmá esaki.”
Segun minister Duncan, e Promé Minister no a bisa nada nobo. “Un kos el a enfatisá, ku na St. Maarten nan no ta komprondé. Masha dia mi ta bisa den medionan, ku St. Maarten no mester sigui drei rònt di tuma desishon di entre otro Ministerio Públiko i Kuerpo Polisial.”
“Ta sali un rapòrt devastador, tur hende ta rabia pero no ta refutá e kontenido i asina e rapòrt sigui biba su bida i bira bèrdat.”

WILLEMSTAD- Pa apertura di Academy Hotel, Fundashon i Direktiva di e Hotel a nombra un mènedjer pa e hotèl. Den e próksimo lunanan sra. Tirza Garmes-Daal lo prepará apertura i lo bai manehá Academy Hotel despues di esei. Tirza Garmes-Daal tabata unu di e vários kandidatonan ku a reakshoná riba e anunsio di reklutamentu na 2007.
Tirza Garmes-Daal a hasi Skol Hotelero Sekundario i tin un Bsc. den International Hospitality Management di Skol Superior Kristian Noord Nederland na Leeuwarden. Tirza a traha na Marriott Amsterdam, Hilton Rotterdam i na Marriott Curaçao. Ku e eksperensia nesesario den Rooms Division Management, Human Resource Management, Sales i Food & Beverage, e ta bai habri e proyekto Academy Hotel Curaçao ku hopi entusiasmo.
E yu di Kòrsou di 30 aña tin tur konfiansa ku nos studiantenan lokal pa medio di e proyekto aki lo hasi un bon preparashon pa haña un trabou den e sektor kresiente di turismo. Fundashon di Entrenamentu den Hospitalidat di Kòrsou (Curaçao Hospitality Training Foundation, divishon di e organisashon hotelero CHATA) i Direktiva di Fundashon Aacademy Hotel ta orguyoso di yama e talentoso i entusiasmo Tirza Garmes bonbiní den e tim.
Danki na un aporte finansiero di USONA i Banko MCB e proyekto ta kasi kompletamente kla finansieramente i por start ku rekonstrukshon i ekipamentu di edifisio.
Segun presidente Paul Kok, si tur kos bai manera planeá, por yama e promé wéspetnan i studiantenan bon biní den Academy Hotel den segundo mitar di 2008.

WILLEMSTAD – E biaha aki Selikor lo no koperá i hasi limpiesa grátis, manera sa ta kustumber pa limpia koroto ku otronan a bai laga atras despues di temporada di karnaval. E biaha aki Selikor lo hasi limpi i lo manda e kuenta pa Tim Prekario ku na su turno mester kobra esnan ku tabata na e diferente sitionan i a laga nan sushi atras.
Manera nos a informá, e aña aki mas ku nunka esnan ku a traha konstrukshon riba e ruta di karnaval, a laga un kantidat di sushi atras. Bastante palèt, rama di koko i otro sobrá di palu, etc. ta “dòrna” kayanan kaminda e marcha di karnaval a pasa. Esaki a hasi ku e Tim Prekario a mustra, ku tur doñonan aki lo pèrdè nan derechi di por haña e sitio aki entrante 2009.
LA PRENSA a tuma nota ku Selikor a kuminsá ku limpiamentu, apesar ku nan mashin di fòrki mes ta dañá i ku nan a disidí di hasi uso di un katapila pa kue e sushinan ku a keda atras. E grupo di personal aki a keda dirigí pa hasi e trabou di limpiesa ku otronan a laga atras. E trabounan e dianan aki ta hopi i ta un di e kosnan ku Selikor no a pensa ku lo presentá riba nan.
Ta konosí, ku despues di marcha di karnaval empleadonan di Selikor ta subi kaya pa limpia i esaki ta hasi ku ta bastante plaka ta bai na oranan èkstra di trabou. Por tuma nota ku empleadonan di Selikor ta ehersé e trabou di limpiesa den kayanan pa mas di 10 ora, ya ku te siguiente mainta ainda nan ta limpia kaya.
E loke nan ta hasiendo e dianan aki no ta kai bou di nan enkargo, pero si e trahadónan di Selikor no hasi e parti aki, ta nifiká, ku e área lo keda sushi pa despues kousa problemanan higiéniko. Rick Martina di Tim Prekario a konfirmá, ku Selikor a kuminsá ku e trabounan di limpiesa. Loke ainda no ta konosí, ta kuantu e trabou di limpiesa aki lo bai kosta, ya ku ta te despues ku e trabou tèrminá, Selikor ta manda e kuenta pa Tim Prekario. E Tim Prekario lo kobra esnan ku a laga e sushinan atras, asina e la bisa.