ORANJESTAD- Naci na Aruba, biba den Dakota, Casá cu tres yui. Yui di un familia humilde pero bon conoci den e mundo di Deporte, Rey di futbol cu yama Chas. Ken no conocé y é tabata tambe e motor cu a guiami for di tempran pa mi a bira loke mi ta awe hunto cu mi mama.
Lanta for di famia di tata y mama di un familia di 7 yui, cria hopi streng, semper deporte tabata é prioridad. Di tempran caba mi tabata hunga tur sorto di deporte riba caya, manera p.e. Softball, Tennis, Kiniki, Volley, Baseball, Voetbal, etc etc. Mi tabata forma teamnan di Dakota pariba, centro y pabao pa hunga contra otro.
Esey a yudami hopi den mi desaroyo y cu edad joven mi a cuminsa train cu e equipo di hoofdklasse di RCA.
Mi Tata tabata jugador di RCA pues mi a hayami bibando den Dakota y bai hunga pa RCA. Den RCA mi tabata train cu jugadornan di Nomber manera Edwin Dirksz, Cai Helder, Juchi Jansen, etc. etc.
Na aña 1964 pa motibonan personal, defunto mi Tata a saca nos di RCA y ami y mi dos ruman nan Nelo y Melvin a bai hunga pa Dakota y nunca mas mi a sali di Dakota te awe.
Den Dakota mi a hunga cu tur e leyendanan manera Juancho Pablo, Jubi y Jimmy Richardson, Danny Pablo, Tirso y Nulfo Steba y hopi mas te na (mi) retiro na 1986.
Den Dakota mi a bin desaroya mi talento y ya cu 15 aña mi a hunga mi promer wega den hoofdklasse contra Estrella. Un diadomingo atardi den stadion tur mi amigonan y fanatico di Dakota a bin wega pa mirami debuta. Algo hopi grandioso y Unico.
Despues di esey mi a wordo yama pa seleccion y asina mi a bira conoci como un talento joven. Na aña 1966 Aruba a clasifica pa é weganan di reino cual a tuma lugar na Suriname, na 1967 na Antillas y na 1968 na Hulanda. Mescos den añanan siguiente mi a keda estelar den Dakota jugando of links of rechtsachter. Posicion caminda mi a destacá hopi paso mi tabata gusté.

ORANJESTAD– Relaciona cu e bishita oficial di Minister President di Hulanda mr. dr. Peter Balkenende y e Secretario di Estado di Relacion di Reino Hulandes drs. Ank Bijleveld-Schouten na Aruba, un bishita tambe a wordo haci serca Promer Ministro di Aruba sr. Nelson Oduber. Tabata presente tambe Minister di Husticia sr. Rudy Croes y Minister di Finanzas sr. Nilo Swaen.
Durante e encuentro aki a delibera ampliamente riba e relacion existente den Reino Hulandes, en especial riba structura estatal y e cooperacion riba diferente tereno cu ta existi entre e dos partnernan aki.
Minister President Oduber a duna un splicacion amplio riba tur e rapportnan cu ta trata e desaroyo economico positivo di Aruba, entre otro di IMF y di Fitch Ratings. A papia riba e ultimo desaroyonan relaciona cu e asunto di Natalee Holloway cu ultimamente ta afectando tambe Madre patria Hulanda.
Na e ocasion aki Minister President Oduber a haci entrega di e Kalender Cultural 2008 na tanto sr. Balkenende como sra. Ank Bijleveld-Schouten.
En general e encuentro a bay den bon ambiente caminda un biaha mas a resalta e amistad y respet cu ta existi entre Hulanda y Aruba

ORANJESTAD- “Liberalizacion di mercado di notariado no ta conduci na degradacion di maneho di etica di profeshon di dicho grupo di profeshon.” “Na nivel di oficina a haña contesta pa problema cu ta aparenta insolvabel na nivel macro.” Sinembargo, efectivamente por spera menasa: un actitud basico etico ta encera mas cu un splicashon di regla instrumental; mester bandona e cultura di no-intervenshon pa inclui e retaguardia invisible - den mayoria di caso e personanan cu ta maneha y dirgi un negoshi nan so – y mester revisa e regulashon di control den e profeshon menshona.
Esakinan ta algun conclushon di e tesis pa doctorado di Zayènne van Heesen-Laclé, cual tesis ela defende recientemente na Universidad di Leiden, Hulanda. E tesis ta trata e estudio y investigashon di e consecuencianan di e implementashon di e leynan di competencia (mededingingsrecht) di Union Europeo den profeshonnan liberal. Pa e profeshon di notariado na Hulanda e ley cu a introduci funcion di mercado intensiva a drenta na vigor na 1999.
Aunke segun Laclé no por papia ainda i degradacion etico di profeshon como consecuencia di funcion di mercado, ta existi un falta di reflexion suficiente pa e nucleo di e sistema di balorashon colectivo. Di e forma ei e encuesta haci pa Zayènne ta proba cu no ta ser duna un explicashon uniforme na reglanan importante manera e “Belehrungspflicht” notarial. Tambe Zayènne ta adverto cu e Organizashon di Profeshon Notarial Real, no mester keda ciega pa dogmanan di secrecia y di no-intervenshon intercolegial.” Un organizashon di profeshon cu no por indica garantia di calidad y integridad ta para relativamente debil den e discurso di mercado. Experiencianan na paisnan Anglo-Sahon y Scandinavio ta siña cu hasta notariado por ta superfluho y mas barata cu e sitema di notariado publico. Tambe na nivel-micro e mocion mester crece, cu e cultura di no-intervenshon ta obsoleto, segun Laclé.

ORANJESTAD- Durante di e reunion di e presupuesto di Asuntonan General mi a entrega un mocion cu mi ta kere a tarda pa yega.
Pero despues di hopi discusion den nos comunidad y despues di a mira y tende 54 calypso den nos Carnavalnan di Aruba ta masha poco persona por ta contra e mocion aki.
E mocion ta uno cu mi mester a trece durante di e reunion di presupuesto di e minister di Cultura y Deporte pero mi no a haya e oportunidad ya cu mi a enfoca mas riba deporte e dia ey. Pero na Hulandes ta bisa: Wat in het vat zit verzuurt niet"
Mi a trece durante di e reunion cu Minister Presidente ya cu Sr. Oduber ta cabezante di e Conseho di Minister. E ta lider di e partido cu ta goberna.
E mocion ta papia pa su mes. Ta tempo cu nos reconose cu e musica di Calypso ta un parti integro di e cultura Arubano. No no por pensa di carnaval sin pensa di e musica Calypso.
Y esnan cu a warda tur e calypsonan durante e 54 anja di nos Carnaval, e evento mas grandi di anja, sa e poder historico di e cancionan aki. Scuchando e musica di Calypso, specialmente e calypsonan ganador bo por sigui e historia politico y social di nos pais.
Cada calypso riba su mes ta un parti di nos historia.
Y pesey mi ta kere cu gobierno mes mester bin cu un Archivo Special pa e musica di Calypso. Esaki por cai bou di nos museonan.
Pero e mester keda accesibel pa un y tur riba nos pais.
Mi ta papiando di un Audio Archivo. Esaki mester cai bou di minister di Cultura y mester presupuesta e fondonan pa esaki.
Mi ta kere cu e dictum di e mocion ta papia pa su mes.

Ministerio Publico a sigui sorprende tur hende ; Pa motibo di a “surpasa” presupuesto?????

ORANJESTAD- Un tiki mas y tur hende lo kere cu ta sea Minister di Husticia Rudy Croes of Minister Presidente Nel Oduber, ta actuando como Fiscal den e caso di Fondo di Desaroyo di San Nicolas.
Ayera a toca turno ex Minister Presidente di pais Aruba, mr Henny Eman, pa presenta dilanti di Huez pa scucha e acusacionnan cu lo tin contra di su persona den e caso menciona.
Realmente increibel con e caso aki di Fondo di Desaroyo aki, a haya un cara completamente diferente, cu lo por ser compara como un mini Parlamento, cu por interpela un mandatario.
Fiscal ayera merdia a exigi un castigo di prison di cuater luna condicional pa ex Premier Eman, y a hinca aden 120 ora di trabou obligatorio pa comunidad, cu tempo di prueba di dos anja.
Segun Fiscal, Henny Eman lo a presiona su hendenan den gobierno, pa paga algun contratista prome cu otronan, ya cu ta tempo di eleccion y pa un motibo of otro mester a cumpli cu e ordo aki di Premier.
Tambe Fiscal a bin ayera mainta y a cuestiona e hecho cu ex Premier lo a viola ley di presupuesto cu su gobierno mes a introduci, mustrando cu a hinca placa den proyectonan cu no tabata presupuesta of a surpasa nan presupuesto.
Realmente increibel con un caso cu a inicia seis anja pasa como caso di corupcion di miyones den e caso di Fondo di Desaroyo di San Nicolas, awor ta bin termina den un acusacion cu en realidad no ta hustificacion di e caso cu a tuma lugar pa seis anja y cu a costa e pueblo aki, miyones di florin.

ORANJESTAD- Polisnan diahuebs anochi a wordo dirigi cu urgencia pa Ban Ban Café na Madiki, pa un caso di atraco.
Na e sitio polisnan ta papia cu e doño, kende ta declara na polisnan cu e tres homber a drenta den e luga na momento cu nan ta serando e lugar di cual un di nan tabatin arma di candela.
E dos otro antisocialnan tabatin tubo man y nan a cuminza grita y pidi pa placa, y tur esaki net na momento cu e señora tabata sera e luga.
E cu tabata cana arma, a dicidi di pone e arma di candela na cabes di e señora exigiendo placa.
E senjora a spanta y a cuminsa grita manera alma malo pa ayudo y su casa di 50 aña hunto cu su dos yiunan di 20 y 25 aña, a reacciona mesora y a core drenta den e lugar, arma cu palo di basora y nan no a perde pa gana y a cuminza ataca e atracadornan cu palo di basora.
E antisocialnan sorprendi pa esaki, a cuminza bringa cu e victimanan y golpi a cai di tur dos banda.
E famia a logra saca e tres atracadornan pafo sin cu nan a los un tiro, lantando e sospecho cu probablemente e tiponan aki tabatin un revolver di hunga pa comete e atraco. Un di e tiponan a laga su t-shirt y un pechi preto atras mientras cu e Chines a bisa polisnan cu el a reconoce un di e atracadornan cu a drenta den e lugar.

BUENOS AIRES – Meimei di un yobida di viktorianan lokal, esun mas sorprendente tabata den man di Universidat di San martin riba River Plate, e ekiponan bishitante apénas por a saka dos empate ku stèmpel brasileño den salida di e fase di grupo di Kopa Libertadores.
Ku solamente kuater aña di bida i debutante den e kompetensia aki, San martin di Perú a derotá un koloso manera River di Argentina, kampion di 1986 i 1996, den un dje ocho weganan durante un siman den kua a registrá seis viktoria lokal i dos empate.
San Martin ku segun e korant El Comercio di Lima, “a dal historia un bòftá”, a kue su promé tres punto i River a keda na sero den Grupo 5, kaminda América di Mexico i Universidad Católica di Chile lo hasi nan presentashon djarason den stadion Azteca.
Esnan ku a salba nan peyeho riba tereno aheno tabata e brazileronan Flamengo i santos, ku a empatá ku Bolognesi di Perú i Cúcuta Deportivo d Colombia, tur dos ku 0-0.
Flamengo i Bolognesi a kue un punto den Grupo 4, ku tin e lider Cienciano di Perú danki na su triunfo di 2-1 riba Nacional di Uruguay. Djamars Bolognesi ta risibí Nacional.
Santos i Cúcuta tambe tin un punto den Grupo 6, kaminda Chivas di Mexico i San Jose di Bolivia lo tin nan presentashon djamars na Guadalajara.
Ademas di San Martin i Cienciano, tambe a gana Caracas di Venezuela, Cruzeiro di Brazil, Lanús di Argentina i Deportivo Cuenca di Ecuador.
Caracas a derotá San Lorenzo 2-0 i Cruzeiro a likidá real Potosí di Bolivia 3-0, den tur dos kaso pa grupo 1 ku nan a pasa pa komandá ku 3 punto.

LAS VEGAS – Ya promé ku Kelly Pavlik a gòlpi’é te lag’é drumi kontra kabuya kuater aña i mei pasá, Jermain Taylor a pèrdè for di bista tur loke a hibé na bira kampion invikto di peso mediano.
Awor ku e ta enfrentá e motibunan fundamental di su úniko derota ku honestidat, Taylor ta konfesá ku el a pèrdè e pashon pa bòkseo durante su dos aña di reinado. Ora ku finalmente e tabatin tur loke e tabata ke, el a komprondé ku el a lubidá kon el a logr’é.
Den e deporte aki bo no por laga nada na un banda”, Taylor a trese dilanti, “i mi ta kere ku mi a hasié durante un tempu”.
Mi no tabata trein ku e mesun dedikashon manera mi tabata hasi den tempu di amatùr, mi tabata yega lat pa korementu mainta i mi tabata evitá e detayenan ei ku ta krusial den e deporte aki. Mi tabata fasiná ku e bon bida pafó di rin; den su boto, ku su famia i den kayanan di Little Rock, kaminda e tabata un héroe ku no por a faya.
Pero talbes e gòlpinan di e man drechi di Pavlik ku ta hasi daño, a klara e ideanan un poko.
E hòmber kende a kansa di e transferensia a bida ku el a bini bèk pa e revancha ku Pavlik awe nochi den MGM Grand Garden, un stadion den kua lo mester rekordá ku e ta den wega den un pelea krusial pa su karera. Na yüli 2005, Taylor a gana kuater título di kategoria mediano den MGM ku un viktoria pa desishon dividí riba Bernard Hopkins.

SAN JUAN – E portorikeño Miguel Cotto lo riska su invikto i su faha di peso wèlter di Asosiashon Mundial dia 12 di aprel kontra e mèksikano Alfonso Gomez, asina e presidente di e empresa Top Rank, Bob Arum, a konfirmá.
Cotto ku 31-0 i 25 nòkout lo bringa den Boardwalk Hall di Atlantic City, kaminda el a gana e korona na dezèmber 2006.
Gomez ku 18-3-2 i 8 nòkout, konosí pa su partisipashon den e programa di televishon “The Contender”, ta regresá Atlantic City pa promé bia for di dia ku el a nòkout e ídolo lokal Arturo Gatti na yüli.
“Semper ta algu spesial ora Miguel Cotto subi rin”, Aruma a bisa den un komunikado. ”Miguel ta un tremendo bòksdó. Ta ekstraordinario kon e ta ataká su rivalnan na kurpa. Mi ta spera un pelea di hopi guera, ya ku Gomez a demostrá kontra Gatti di ta un fuerte pegadó ku no solamente a nòkout’e, sino ku tambe a mand’é retirá”, e promotor a agregá.

WASHINGTON – Presidente George W. Bush a bisa djabièrnè ku e pais ta den un peliger mas grandi pa falta di Kongreso, ku no a rèk e programa di spionahe (tapmentu) di telefòn i di e-mail.

Bush i e visepresidente Dick Cheney a reuní ku e lidernan republikano di Kongreso den e Ofisina Oval di Kas Blanku pa analisá e situashon di e inisiativa di Kámara Baja, kontrolá pa oposishon demokrat.

E presidente a bisa ku e legisladornan a drenta un reseso di 12 dia promé ku aprobá e ekstenshon di lei, ku ta vense awe mei anochi.El a trese dilanti ku Kongreso lo mester aprobá e medida asina ku e legisladornan bini b.

E pleitunan pa reglamentu di e agensianan di inteligensia tin implikashonnan importante pa tur dos partido den e aña elektoral aki.

E kalkulashon di aprobashon di e intenshon di Bush den e votadónan a kai na nivelnan hopi abou den e último lunanan debí na e situashon ekonómiko delikado i un guera largu i impopular na Irak.

BEVERLY HILLS, California – Ku e wèlga di e guionistanan di Hollywood finalisá a laga kaminda habri pa e seremonia di entrega di Oscar bria ku presensia di e máksimo streanan di sine i e glamur ku a karakterisá esaki.
“E wèlga, e mal notisianan, ta kosnan di pasado”, asina Sid Ganis a bisa djamars, presidente di Akademia di Arte i Siensia Sinematográfiko.
E di 80 entrega anual lo tuma lugá 24 di febrüari den teatro Kodak i e lista di presentadónan ta enkabesá pa aktornan di promé kategoria, kuminsando ku e resiente ganadónan di e estatua chikitu di oro Forest Whitaker, Hellen Mirren i Jennifer Hudson.
Tambe lo tin e spañó Penelope Cruz, george Clooney, Nicole Kidman, Denzel Washington, Marti Scorsese, Cate Blanchett, Cameron Diaz, Harrison Ford, Tom Hanks i e strea hubenil Miley Cyrus.
Si e wèlga no a kaba, E Akademia lo a prepará un plan “B” sin e brio di e aktornan nominá, ya ku mayoria a duna di konosé u nan lo no por krusa e liña di protesta.
“The B Show” tabatin planiá diferente presentashon musikal i lo tabatin hopi energia danki na esei”, e produktor di e seremonia Gil Cates a bisa AP Televishon.
“Pero lo a basa spesialmente den shòrtnan di e pelíkulanan, prinsipalmente den e ekstraktonan di pelíkulanan históriko pasobra ta e di 80 aniversario di e Oscar”, el a agregá.
Di otro banda e show “A” lo tin bibu e e interpretashonnan di e sinku temanan nominá. E strea di “Enchanted” Amy Adamas, lo konta “Happy Working Song”, un di e tres kansionnan di e mesun pelíkula ku a yega na e trio final.

FORT WORTH, Texas – Un pader bieu akusá di a abusá seksualmente di muchanan na dos estado ta infektá ku e viro di AIDS, asina funshonarionan di e iglesia a bisa.
Siman pasá, e lider di e diósesis di Fort Worth a skucha un hende bisa ku e pader Philip A. Magaldi tin HIV, asina e bosero Pat Svacina a bisa. E lider di e diósesis e ora ei a haña e konfirmashon verbal di Magald meskos tambe un karta di su dòkter ku a detektá e viro serka e pader na 2003.
E diósesis e ora ei a spièrta e supuesto víktimanan – sigur sinku menor na dos estado – i e parokianan den kua Magaldi a traha durante kasi kuater desenio, Svacina a bisa.
Magaldi di 71 aña, ta biba den un sentro di retiro i funshonarionan di e diósesis a ninga di revelá na unda. E pader, a bisa promé ku e ta inosente di e akusashonnan di abusu seksual, di kua e no a keda akusá formalmente.
Magaldi a keda suspendé komo pader na 1999 meimei di akusashonnan di abusu seksual na Providence, Rhode Island, kaminda el a traha for di 1960 pa 1990, i den e aria di Fort Worth, kaminda el a traha di 1990 pa 1992 i di 1993 pa 1999.
E tabata sin ministerio, miéntras e tabata kumpli un kastigu di prizòn pa malversashon di 200.000 dollar di su parokia na Rhode Island, asina funshonarionan a bisa.

ARIES: Lo spiritual ta enfatisá den bo di un manera spesial. Analisá bon bo pensamentunan promé di palabrá. Un eksperensia ta lagábu mira un gran bèrdat. 20.

TAURO: Trabou i profeshon ta enfatisá, pero bo no ta permití ku nan ta preshonábu i pone hopi responsabilidatnan riba bo. 20,07,44.

GEMINIS: Skucha loke bo kurason ta bisabu. Aktivá bo mente. Bo ta rekuperá den bo salú físiko komo emoshonal. Lo spiritual ta hunga papel importante den bo bida. 21.

KANSER: Tribi di aserká e persona ku tantu ta interesábu i ekspresá sin miedu bo sentimentunan insigur i e timides ta e responsabel awor. 35,09,17.

LEO: Kuminsá edifiká bo futuro riba basenan sólido. Meditá, skucha e bos interior ku ta loke eksaktamente ta dirigí bo energia. 41,07,38.

VIRGO: Union, amigu i relashonnan ta enfatisá pa bo awe. Bo bida sosial ta risibí e chispa di energia pa biaha i a ponébu den kontakto ku personanan konosí. 26,15,10.

LIBRA: Bo ta konsentrá awor pa haña kontesta riba e pakiko di bo akshonnan. Bo ta en buska di satisfakshon personal, pero bo ta deseá di ta sigur di bai den bon kaminda. 21.

SKORPION: Bo ta hopi kouteloso pa no kometé erornan. No pone tantu preshon, ya ku e no ta afektá spesialmente bo salú. 11,03,44..

SAGITARIO; Bo ta algu agresivo, dominante, independiente i atrevido.. Ehersé kòntròl riba tur kos awe. Kòrda ku atakenan di ira i pelea no ta kondusí na nada. 22,29.

WILLEMSTAD - Diputado Zita Jesus-Leito por keda sinta komo diputado. Un moshon di deskonfiansa ku partidonan di oposishon a presentá kontra dje ayera, no a haña mayoria i komo tal a keda rechasá.
E votashon aki tabata loke por a spera, ounke ku tabata sirkulá vershonnan insistente e dianan ku a pasa ku koalishon lo no logra akumulá e mayoria di 11. Un motibu pa esaki tabata e hecho e miembro di frakshon di Frente Obrero Renfred Rojer, ku tabata malu na kas pa algun tempu kaba, a presentá ayera den sala di reunion.
“Hopi bolo den fòrnu, lo djumba sigur awe,” asina Rojer a komentá.
E moshon kontra diputado Jesus-Leito tabata konosí pa basta dia kaba.
Partido MAN a anunsiá e moshon aki despues ku e partido a konstatá vários kos ku no a kana korekto den maneho di último tempu di e mandatario.
E desaroyonan rondó di diputado Jesus-Leito tabata motibu di hopi komentario den e dianan ku a pasa.
Motibu direkto pa esaki tabata e hecho, ku el a firma un dokumento importante durante deliberashonnan riba struktura estatal na St. Maarten, sin ku e tabatin e apoderashon nesesario di gezaghèber di Kòrsou, ku ta esun ku den forma legítimo ta representá teritorio insular di Kòrsou. E punto ferfelu den e asuntu aki ta ku e dokumento ku el a firma mes ta referí na e apoderashon, komo si fuera ku esei ta eksistente.
Esei mes a pone ku ni maske kuantu e diputado a splika ku hurídikamente e apoderashon no tabata nesesario, hopi a keda kuestioná e asuntu aki. Ni e 3 konsehonan ku el a manda pidi pa konfirmá e ponensia aki – di gobièrnu di Kòrsou, di Gobièrnu Sentral i un konseho di un ofisina di abogado privá – no a konvensé sigur partidonan di oposishon ku e diputado no a violá regla den e kaso aki.

WILLEMSTAD - Partido Forsa Kòrsou ta kere ku tin vários instrumènt ku gobièrnu por hasi uso di dje pa tòg redusí preis di energia riba nos isla. Ta un eskoho gobièrnu mester hasi, asina Gregory Damoen, miembro di Forsa Kòrsou den Konseho Insular a bisa.
Resientemente, gobièrnu di Kòrsou a bolbe anunsiá oumento di gasolin i disel, por sierto ku un porsentahe supstansial.
Diputado enkargá ku asuntu di energia Humphrey Davelaar a anunsiá ku preis di gasolin lo subi ku 20 sèn i preis di disel ku 40 sèn.
Pa purba suavisá e impakto un poko, a disidí ku ta introdusí e oumento den fase. Gasolin ta subi entrante djaluna awor dia 11 di febrüari ku 10 sèn i dia 11 di mart, e ta bolbe subi ku 10 sèn. Preis di disel ta subi ku 10 sèn entrante djaluna awor i lo sigui subi ku 10 sèn dia 11 di e próksimo 3 lunanan.
Segun Gregory Damoen, ta un hecho ku preis di krudo a bin ta subi sistemátikamente riba merkado mundial. Riba esei en bèrdat nos pais no por ehersé niun tipo di influensia, segun Damoen/ Di otro banda, asina el a bisa, tin algun forma ku gobièrnu por suavisá e impakto di e oumento aki pa komunidat, partikularmente esnan di ménos rekurso.
Pero no ta esei so ta hungando un papel aki, ela bisa.
Si bo analisá bon, preis di kombustibel a subi, hende ta bai gasta ménos, negoshinan ta haña ménos entrada i konsekuentemente nan ta paga tambe ménos impuesto riba benta – OB – loke naturalmente ta un pèrdida di entrada pa gobièrnu mes, Damoen a bisa.

WILLEMSTAD - E redukshon di komishon ku agensianan di biahe ta risibí pa nan trabou di benta di pasashi pa kompanianan di aviashon, por tin konsekuensia tambe pa sektor di turismo.
Nos a logra pone kontaktonan balioso ku nos tin gana di konserva, asina William Mau A Sam, presidente di Curacao Travel Agent Association – CTAA – a bisa, relashoná ku desaroyonan den e sektor aki.
Tal manera nos a relatá kaba den un otro artíkulo ekstensamente, CTAA ta preokupá pa e hecho ku poulatinamente e komishon ku agensianan di biahe a bin ta risibí, ta bahando.
T’asina ku e agensia di biahe ta risibí riba kada pasashi ku e bende pa e kompania di aviashon, un sierto porsentahe ku ta su entrada pa e trabou aki.
E porsentahe aki ta varia di kompania pa kompania. E komishon aki pa hopi aña largu tabata 9 porshentu serka práktikamente tur kompania, ku eksepshon di e kompanianan venezolano ku asta tabata mantené 10 porshentu, pasobra ta esei nan tabata usa pa agensianan di biahe venezolano. Último tempu e agensianan di biahe ta haña nan konfrontá ku e situashon ku literalmente di un dia pa otro, un kompania di aviashon ta anunsiá ku e ta redusí e komishon aki òf pió ainda: nan ta anunsiá ku nan ta eliminá e komishon, asina William Mau A Sam di Mau A Sam Travel a informá Staten.
E presidente di CTAA a bisa ku hopi hende no sa kiko ta nifikashon di agensianan di biahe den nos pais.
“Nos ta kontribuí na nos ekonomia, spesífikamente turismo. Último nos a tende ku turismo a generá 720 mion florin den 2007. Mi ke riska bisa humildemente ku nos tambe tin un aporte den esaki,” segun Mau A Sam.
El a bisa, ku turismo ta konosiendo un desaroyo hopi faborabel awor aki. Agensianan di biahe, atraves di añanan a sa di konstruí un ret di kontakto importante ku hendenan den turismo riba nivel internashonal ku ta yuda pone Kòrsou den un lus positivo.
E desaroyo aki ta menasa di bai pèrdí, si nos sigui pèrdè merkado di e manera aki, William Mau A Sam a agregá.

WILLEMSTAD - Nos no ta dispuesto pa bira siudadano di segundo rango. Si nos weta kiko tin riba mesa, ta den e direkshon ei Ulanda ke hiba nos, asina lider di Forsa Kòrsou, alabes miembro di parlamentu mr. Nelson Navarro a bisa, relashoná ku e diskushon rondó di e areglo ku Ulanda ke introdusí pa ekspulsá hóbennan antiano for di suela ulandes.
Tal manera LA PRENSA a informá ekstensamente kaba, Staten di Antia a ripití su posishon djaweps último ku e ta keda kontra pa manda hóbennan antiano ku bin den kontakto ku hustisia bek nan isla natal. Staten a aseptá un moshon den forma unánime ku ta ratifiká e posishon aki.
Manera ta konosí, algun anda pasá parlamentu antiano ya kaba a aseptá un moshon – e tempu ei tambe “wall to wall” – den kua e ta rechasá e idea di ekspulsá hóbennan antiano for di suela ulandes.
Ulanda, ke krea e posibilidat pa deklará hóbennan antiano kriminal komo persona no deseá na Ulanda, kreando asina e posibilidat pa ekspulsá nan for di e pais. Minister di Hustisia Ernst Hirsch Ballin ta trahando riba un proyekto di lei den e direkshon aki. Ta trata di spesífikamente hóbennan ku kada biaha di nobo, ta haña nan mes den problema ku hustisia pa aktonan kontra lei.
Pa por deklará hóbennan antiano ku ta forma problema komo persona no deseá, Ulanda mester yega na un akuerdo si promé ku e islanan antiano. Si esei logra, e islanan tambe ta haña e derechi di deklará personanan di nashonalidat ulandes komo persona no deseá.

WILLEMSTAD/ BREDA - Fiskal mr. J. van Aken a pidi ayera den korte na Breda un kastigu di 10 aña di prizòn, kombiná ku tratamentu sikiátriko obligatorio kontra e antiano Geoffrey J. kende nan ta akusá di a violá un mucha muhé di apénas 9 aña di edat den su mes kamber.
E kaso lo mester a tuma lugá dia 10 di sèptèmber 2006.
E sospechoso mes ta ninga terminantemente ku e tabatin algu di aber ku e kaso aki, pero e víktima a hasi un deklarashon ekstenso i detayá di loke a sosodé. Ademas, outoridatnan a haña spèrma riba flur di e kamber ku despues di investigashon, a resultá di ta pertenesé na e sospechoso.
Ta bon pa menshoná, ku a yega di kondena J. na diferente okashon kaba pa delitonan kontra moral.
Por a detené J. komo ku durante un notisia di búskeda ku a pasa na televishon, a mustra un pòtrèt di dje tambe.
Esaki a pone ku polis a haña algun tep hopi balioso, ku finalmente a kondusí na detenshon di J. dia 6 di òktober 2006.
Segun fiskal, e hòmber di 55 aña aki probablemente a drenta kas di e víktima atraves di e porta dilanti, ku no tabata bon será. No tabatin indikashon ku a forsa porta pa drenta.
E sospechoso tabata konosí den añanan nobenta komo “De Woenselse steentjesgooier”, pasobra den e siudat ku e mesun nòmber aki ku ta keda na Eindhoven, e tabatin e kustumber di tira piedra kontra bentana di kamber di muchanan muhé pa asina haña nan atenshon.

WILLEMSTAD - Tumando e desishon pa no detené Joran van der Sloot, hustisia de fakto a premiá e hóben aki pa e hecho ku el a sabotiá e investigashon den kaso di Natalee Holloway.
Esei ta reakshon di e reportero pa asuntunan kriminal, Peter R. de Vries, riba e desishon di korte di apelashon.
Korte di apelashon a disidí, ku Joran van der Sloot no tin nodi di bai será atrobe. Ounke ketu bai e ta keda sospechoso den e kaso di desaparishon di Natalee Holloway, no tin sufisiente prueba pa detené atrobe.
Motibu direkto pa e desishon di korte di apelashon pa no duna pèrmit pa detené Van der Sloot, ta e hecho ku el a hasi diferente deklarashon kontradiktorio, ku despues a resultá tambe di no ta bèrdat.
Esaki a krea duda den su palabranan, asina su abogado Bert de Rooij a duna di konosé.
Ademas, segun, De Rooij, Van der Sloot a indiká, ku tin motibu di kon su deklarashon no ta basa riba realidat. Ounke e abogado no a bisa esei ku mes tantu palabra, ta opvio ku e tabata referí aki na e deklarashon ku reportadamente Van der Sloot tabata bou di influensia di supstansha prohibí, ora el a hasi e deklarashonnan na e infiltrante Patrick van der Eem.
Manera ta konosí, siman pasá outoridatnan a tende Joran van der Sloot i aki tambe el a ripití ku su deklarashon no ta basa riba realidat i ku e no ta kuadra ku e hechonan. Un elemento di esaki ta por ehèmpel e asuntu ku un amigu lo a yud’é benta e kurpa di Holloway den laman.

WILLEMSTAD - Despues di e siman di selebrashon di Karnaval a inisiá un kurso di kòmpiuter pa koleganan ku ta kai bou di Hustisia. Manera ta konosí den Kuadro di e proyekto ‘Plan Veiligheid Nederlandse Antillen’, departamentunan di Gobièrnu ku ta kai bou di Hustisia a risibí kòmpiuter nobo. E koleganan ariba menshoná lo risibí lès den Window XP, Microsoft Office 2007, Words, Excel i Power Point na Landelijk Politie Opleidinginstituut (LPO) . E siman aki koleganan di Directie Justitiële Zaken i Ofisina pa Bienestar di Mucha (Voogdijraad) a tuma lès serka LPO. E lèsnan a start na yanüari último lo sigui te ku luna di aprel 2008. Grupo di koleganan di Directie Justitiële Zaken i Ofisina pa Bienestar di Mucha (Voogdijraad) durante lès na Landelijk Politie Opleidingsinstituut djarason dia 13 di febrüari 2008 den lokal Lionel Capriles.