ORANJESTAD- Campeonato Fedeveta Balashi 50 Plus diasabra ultimo riba tereno di San Luis a completa e prome 15 weganan di e 45 weganan programa.
E prome encuentro a bai entre e actual campeon di Aruba, esta Dakota Roma y SC Bubali, caminda Roma a sali vencedor cu anotacion di 2-0 cu golnan di Amado Rosina y
“legendario” Niles Oduber, kendenan a anota e unico dos golnan di wega.
Den e di dos partido Phoenix Santos a enfrenta e ekipo di Solito, Inter, y aki ningun di dos ekipo por a yega na un gol, cu Inter ainda buscando su forma den e actual campeonato.
Den di tres partido e naranhadanan di Santa Cruz, Estrella mester a midi forza cu
SCA di Paradera, y aki e score final a bira 6-1 pa SCA.
Esnan cu a anota pa SCA tabata Dechi Bislip, Joy Fingal, Dito Koolman, Jossy Koolman, Foyen Lacle y Franklin Fingal.
Pa Estrella tabata Jani Filiciana kende ta score e unico gol pa su eguipo.
E wega entre Teachers Ubnited y Deportivo Nacional a termina 2-1 pa e ekipo di Noord caminda Tello Sevillano a anota e golnan di victoria pa Nacional. Eddy Vrolijk a score un bunita gol den nobenta pa e unico gol di Teachers United.
E ultimo wega di e anoche a bai entre e hobennan di Atletico ta acumula 3
punto importante ora nan supera e ekipo di Barcelona cu anotacion di 2-0 camnida Ruben Stamper y Cady Zievinger a anota e golnan di Atletico, cu ta sigui invicto den tres wega hunga.
E refereenan cu a coopera e anochi aki tabata Carlos Rubio, Erwin Helder, Ernst Mohamed y Pierre Croes.
E siman aki e weganan ta continua riba tereno di Estrella caminda Lorens Maldonado lo ta e oficial di tereno.

Aruba ta bon posiciona pa logra certificacion internacional di Blue Flag

ORANJESAD- Diahuebs siman pasa 28 di februari 2008, dilanti un sala yen na Universidad di Aruba a repasa avansenan riba tereno ambiental y Aruba su aspiracion pa e certificacion di Blue Flag pa nos beachnan. Publico presente, consistiendo di un segmento amplio y diverso di nos comunidad a presencia tur e adelantonan riba tereno ambiental. Entre esakinan por menciona: ampliacion di e planta di purificacion na Bubali, construccion di 2 planta di purificacion nobo, esta 1 na Parkietenbos y otro na San Nicolas/Zeewijk, programa di monitor awa y Coastal Zone Management.
Sr. Henny Kromhout, Miembro di e hunta ehecutivo di Foundation for Environmental Education (FEE) cual organisacion ta responsabel pa e certificacion di Blue Flag a amplia riba e programa di Blue Flag, su beneficionan como tambe su observacionnan durante un bishita di trabou na Aruba. Sr. Kromhout a recori diferente beach cual Aruba tin proyecta pa ta e promenan pa haya e certificacion.
Blue Flag certification ta trece cune, un cuadra di referencia cu ta sirbi como patronchi pa ehecuta mehoracion di beachnan pa e publico usador. Prome cu cada beach ricibi e seyo di aprobacion, e tin di cumpli cu rekisitonan estricto (29 criteria) cu ta regarda: educacion y informacion ambiental, safety, calidad di awa y maneho ambiental como tambe servicio y facilidad pa usuario. Aruba ta comodamente riba caminda pa logra e certificacion interacional aki.
Aruba ta den un posicion comodo pa sigui su aspiracion pa yega na beachnan certifica como Blue Flag. Cu e recien noticia cu FDA a aproba fondonan pa cuminsa implementacion di trabounan, na Arashi, Mangel Halto y Baby Beach, e entusiasmo pa proyectonan di mehoracion di calidad di beach ta sigui avansa rumbo e certificacion. E pensamento ta pa mas tanto beach na Aruba surpasa e criterianan di Blue Flag den curso di e siguiente añanan nos dilanti.

ORANJESTAD- E fin di siman aki, feria patriotico ta mas grandi y cu mas ambiente cu nunca antes. Hopi sorpresa ta warda bishitantenan na Aruba Entertainment Center na Dakota cuminsando for di diahuebs 6 di maart pa 6’or di atardi.
Un programa paketa cu caha di orgel, gruponan di musica y baile tipico mas bandanan popular di momento, ta rondona pa mas di 50 tent cu tur sorto di producto patriotico, artesania, trahenan tipico, cuminda crioyo y mucho mas.
E aña aki combinando forsa cu Harry Croes y e tradicional festival di composicion tipico, esta Festival Un Canto na Aruba su Himno y Bandera, lo tuma lugar e preliminacion y gran final tambe como parti di e feria patriotico.
E antesala aki prome cu e siman di nos fiesta nacional di himno y bandera, tambe tin competencia di baile, shownan y varios otro sorpresa.
E decoracion lo ta crioyo, dorna al estilo di patriotico cu nos colornan nacional.. Varios banda musical lo deleita bailadornan for di 8:30 cada anochi. Bar y cushina lo ta bon surti. Na unda e diferente tentnan lo ofrece hopi di nos platonan crioyo favorito.
Como sifuera esaki no ta tur, lo tin competencia y rifanan pa hopi premio atractivo. Lo tin un competencia di baile pa e mihor bailado di caha di orgel y tambe mas demostracion dor di nos gruponan di baile tipico.
Pa nos muchanan lo tin un skina special cu wega popular, den cercania di un Gazebo gigantesco tur dorna na nos simbolonan nacional bou di cual mayornan por sinta trankilmente gozando di e espectaculo mientras ta tira bista pa e muchanan.
E feria ta cuminsa diahuebs 6di maart pa 6’or di atardi y ta sigui te 10’or di anochi. Diabierna 7 di maart e feria ta sigui cu e mesun orario di 6’or pa 10’or. Diasabra y diadomingo 8 y 6 e popular feria aki ta cuminsa pa 10’or di mainta y ta termina te 10’or di anochi.

Situacion den Enseñansa, Indexering pa empleadonan publico y inflacion

ORANJESTAD- E programa radial di AVP e siman aki a wordo transmiti for di Nijhoffstraat na San Nicolas. Lorna Varlack, educadora y candidata ariba e lista di AVP, a habri porta pa e programa cu ta wordo transmiti via Canal 90 tu diadomingo. E siman aki e programa a wordo modera pa parlamentario di fraccion di AVP, Mike de Meza, candidato di pariba di brug Melvin Tromp y e anfitriona Lorna Varlack mes.
E topiconan e siman aki tabata topiconan hopi actual y esun cu mas a resalta, ta e situacion economico fatal cu nos pueblo ta aden. Pa via di e desaroyonan negativo despues di introduccion di B.B.O. por a mira un decadencia den e situacionan na scolnan. Scolnan ta den mal estado y hopi di nan no tin ni e minimo pa nan por educa nos jiunan di un manera apropia. Pero e situacion pesimo no ta unicamente limita na e parti fisico di e scolnan. E muchanan, segun sra. Varlack, ta duna señalnan cu nan tambe ta sufri di e situacion economico. Un ehempel cu e la menciona ta muchanan cu no ta bin cu paña y keds adecua scol, pasobra cu e situacion economico no ta permiti. Hopi biaha, ta e educadornan mes tin cu acumula paña for di nan mesun iniciativa, pa por juda muchanan. Cuminda ta un otro aspecto dificil pa hopi mucha. Atrobe ta educadornan tin cu tume ariba nan mes pa trece cuminda pa muchanan por come. Pero e responsabel, gobierno, no ta parce di tin interes pa soluciona e tipo di problemanan aki.
Mike de Meza y Melvin Tromp tambe a sigui elabora ariba e topico aki. Melvin Tromp a enfoca mas ariba e situacion tenso cu tin den e mundo sindical. E candidato di pariba di brug, ta mustra cu e situacion economico ta poniendo cu hopi trahador na Aruba ta pasando den situacionan dificil pa motibo di e inflacion serio cu BBO a causa. E ta responsabilidad di gobierno, gabinete Oduber specificamente, pa cumpli cu nan promesanan y sin lubida, tambe cu nan debernan. Y segun sr. Tromp, ningun di e dos aspectonan aki gabinete Oduber ta atenene nan mes na nan. Si nan no por cumpli, sr Tromp a sigui splica, “anto a jega tempo pa nan subi auto y bay. E tempo a jega pa hendenan mas serio y dedica tuma timon di e pais aki.” Melvin Tromp a sigui splica cu durante di gobiernonan di AVP indexering a wordo paga y e tempo aya cu un indexering di 21%. En cambio awe, partido MEP, ta sinta hunga cu pan di famianan pa hasi politica barata. E situacion cu BBO a crea ta hasi e indexering mas y mas nesesario awe, pero no tin boluntad di gabinete Oduber.

Autoridadnan ta logra di detene sospechoso na Miami
ORANJESTAD- Relaciona cu e caso di fraudo na Departamento di Laboratorio na Dr Horacio Oduber Hospitaal, den fin di siman a keda deteni na Miami, e sospechoso principal den e caso aki, esta e homber Maiky F.
Desde cu e caso a bira conoci, e sospechoso a bandona Aruba ya biaha pa Colombia p3ero den fin di siman el a wordo deteni na Miami y dentro di algun dia e lo ser poni riba avion pa Aruba pa akinan e bin duna cuenta di loke a sosode den henter e caso aki.
Inicialmente e suma cu e sospechoso lo a malversa lo tabata di cinco miyon pero despues di mas investigacion a bin resulta cu e suma malversa lo ta supera e suma astronomico di 10 miyon florin.
Con e desfalco aki por a tuma lugar pa un suma miyonario asina sin cu el a wordo detecta, ta e pregunta grandi den e caso serio aki pero kizas den e interogacion cu lo sigui di e sospechoso, e berdad lo bin dilanti y lo bira conoci con e suma aki por a desaparece sin cu ningun instancia a tuma nota di esaki.

ORANJESTAD- Diasabra ultimo a sali un comunicado di prensa di partido MEP, den cual nan ta lansa un atake frontal contra maestronan di scol. Segun nan maestronan di Aruba mester cai na rudia y gradici gobierno pa nan bondad, pa tur e fabornan cu nan ta ricibi dia aden, dia afo.
Imagina boso, maestronan ta haya un salario tur luna, nan ta haya gelijkbedrag, dianan di atv paga, bashi- premie, vakantieuitkering, nan mag baha cu penshun cu nan 60 aña y ainda nan tin e ‘guts’pa yama nan miembronan pa accion ! Esta curashi, no! Con maestronan por ta dj’e mal agradecido asina ! Kico mas nan kier anto? Foei, maestronan
Pero, laga nos ta franco, si e intencion tabata pa bergonza maestronan, e scirbidornan a faya, faya barbaramente, pasobra e comunicado aki ta un cos di hari, e ta chistoso.
Pa boso informacion: un hende no ta bira maestro di scol a base di fabor politico. Prome cu bo para dilanti di klas, mester sigui un studio di alomenos 4 aña , riba nivel HBO. Manera tur trahador maestronan tin derecho riba nan salario y nan condicionnan secundario, cu lamentablemente a mengua considerablemente. E lista di placa cu segun e scirbidornan maestronan ta haya ta nan derecho tambe.. Ta un debe cu gobierno tin cu su trahadornan, e asina yama ‘inhaalmanoeuvre’ y cu ainda gobierno no por caba di paga bek. Nos tur ta corda ainda con trahadornan di Aruba, incluso maestronan di scol, a aporta, pagando ‘ solidariteitsbelasting’, con a vries indexering pa añanan largo, con nos forsa di compra a baha drasticamente.

WILLEMSTAD – E polisnan di tráfiko i RASPA huntu ku efektivonan di SKS, a parti un kantidat di 1700 prosèsverbal e aña akí. E kantidat akí ta representá un montante di 188.175 florin, si Ministerio Públiko konvensé tur e outomobilistanan akí pa nan bai paga nan prosèsverbal boluntariamente.
E prosèsverbalnan tabata pa outomobilistanan ku tabata kondusí nan vehíkulo sin faha di seguridat bistí (598), outomobilistanan ku no tabatin nan papelnan di outo na òrdu (577), outomobilistanan sin reibeweis (226), outomobilistanan manehando un vehíkulo sin seguro (101), outomobilistanan manehando un vehíkulo sin ku e ta di kùr (69), outomobilistanan ku a pasa den lus kòrá (55), outomobilistanan ku a papia na nan selular sin ‘handsfree set’ (46), outomobilistanan manehando un vehíkulo sin ku a paga impuesto (31), pa 1 outomobilista ku a karga su vehíkulo mal kargá i 1 outomobilista ku tabata manehando su vehíkulo ku un mòfler kibrá.
E kòntròlnan akí a tuma lugá den e periodonan 2 pa 4 di yanüari. A parti 83 prosèsverbal ku ta bon pa 13.225 florin, 8 pa 11 di yanüari a parti 271 prosèsverbal ku ta bon pa 27.100 florin, 22 pa 24 di yanüari a parti 260 prosèsverbal ku ta bon pa 30.625 florin, 28 pa 31 di yanüari a parti 198 prosèsverbal ku ta bon pa 19.800 florin, 2 pa 8 di febrüari a parti 263 prosèsverbal ku ta bon pa 37.075 florin, 11 pa 17 di febrüari a parti 324 prosèsverbal ku ta bon pa 32.425 prosèsverbal, 18 pa 20 di febrüari a parti 104 prosèsverbal ku ta bon pa 10.100 florin i 21 pa 26 di febrüari a parti 197 prosèsverbal ku ta bon pa 17.825 florin.

WILLEMSTAD – Tur outomobilista ku a haña un prosèsverbal i klèm di wil dilanti di e edifisio di F.K.P. resientemente, por reklamá esaki serka S.K.S. E vehíkulonan ku tabata stashoná na man drechi di kaminda entre e brùg di Skalo i e edifisio di F.K.P. tabata bon stashoná.
Siman pasá efektivonan di S.K.S. a parti un kantidat grandi di prosèsverbal i a pone klèm di wil pa diferente vehíkulo stashoná dilanti di e edifisio di F.K.P. Sin embargo e kòntròl no tabata na su lugá, pasó tur e vehíkulonan akí tabata bon stashoná i nan no a kometé niun infrakshon kontra lei di tráfiko. Na altura di e entrada di e edifisio di F.K.P. tin un bòrchi di tráfiko ku ta indiká un ‘wachtverbod’. E prohibishon akí pa stòp ku un vehíkulo pa algun ratu, ta konta solamente pa e banda di kaminda ku e bòrchi ta poné. Den e kaso akí e bòrchi ta poné na man drechi di e kaminda, esta na e banda di kaminda di e edifisio di F.K.P. Tur vehíkulo ku stashoná na e otro banda di kaminda no ta kometé niun infrakshon.
Den e bògt na altura di e edifisio di The Movies tambe tin un bòrchi ku ta indiká un ‘wachtverbod’. E prohibishon akí ta konta pa e banda robes di kaminda. Ku otro palabra, tur vehíkulo ku stashoná na man robes for di den e bògt kaminda e bòrchi ta te na e zebrapad kaminda e otro bòrchi ta situá, ta kometé un infrakshon. For di momentu ku e bòrchi na man drechi su funshon drenta na vigor, e bòrchi na man robes su funshon ta kaduká. Esaki lei ta indiká komo ‘werkingsfeer’ di un bòrchi di tráfiko. Ku esaki lei ke mèn ku un bòrchi di tráfiko su funshon ta kaduká na e sitio, kaminda un otro bòrchi di tráfiko ta poné. ‘Werkingsfeer’ semper ta entre dos bòrchi di tráfiko ku ta indiká e mesun kos òf entre dos skina di hanchi.

BOGOTA / CARACAS / QUITO, - Venezuela i Ecuador a reforsá nan presensia militar na nan frontera ku Colombia despues ku su pais bisiña a realisá un bombardeo durante kua un lider gueriero colombiano na teritorio ecuatoriano a muri, un akshon ku Caracas a bisa lo por provoká un guera i Quito a konsiderá esaki un violashon di su soberanía.
Quito a retirá su Embahador na Bogotá i a ekspulsá for di su pais e Hefe di representashon diplomátiko colombiano, miéntras Caracas a duna òrdu pa sera su Embahada na Colombia komo rechaso p’e operashon durante kua lider di e gueria di FARC, Raúl Reyes, a muri.
Colombia a pidi èksküs na Ecuador pa entrada di su efektivonan i helikòpternan n’e teritorio di e pais aki i a sigurá ku esaki tabata un akshon “obligá”.
E petishon di diskulpa no a satisfasé Presidente ecuatoriano Rafael Correa, kende a bisa ku Colombia a realisá un “agreshon inaseptabel” i a eksigí komunidat internashonal pa sanshoná Bogotá.
“E teritorio ecuatoriano a keda bombardiá i intenshonalmente ultrahá di parti di un Gobièrnu estranhero”, Presidente Correa a bisa na radio i televishon ayera nochi.
Despues Colombia a denunsiá ku dokumentonan enkontrá na e lugá ta involukrá Gobièrnu di Presidente ecuatoriano, Rafael Correa, ku gueriero di FARC, kalifiká pa Merka i Union Europeo komo organisashon terorista.

CARSON, California – Israel Vázquez a dominá e tres último ròntnan i a superá Rafael Márquez pa desishon dividí djasabra den e di tres pelea entre e dos bòksdónan mèksikano ku tabata un intenso interkambio di gòlpi manera den e dosnan promé.
Vázquez, kende a rekuperá di un kaida den di kuater, a keda ku e título super gai di Konseho Mundial ku su di dos viktoria siguí riba su gran rival.
E wes Max de Luca a duna Vázquez a triunfo ku 114-11, miéntras James Jen Kin a konsiderá e pelea mas pèrta i a skor 113-112 tambe pa e kampion. Tom Kaczmarek a duna Márquez e triunfo ku 114-111.
E rèfri Pat Russell a kita un punto for di Márquez pa tira moketa bou di faha den di 10 rònt.
Vázquez di 30 aña, tabata na punto di gana pa nòkout ora el a hinka Márquez den huki den e último sekòndenan di e pelea i Russell parse tabata kla pa para e akshonnan. Pero Márquez a kontestá ku e por sigui i miéntras tantu e gueranan a bolbe start te ora ku bèl a indiká ku e pelea a kaba.
Prosedente di Mexico City i kende ta biba den e suburbio Huntington Park di Los Angeles, Vázquez a rekuperá e korona na sèptèmber den un revancha na Hidalgo, Texas. Ku heridanan profundo na su sehanan, el a tumba Márquez den di seis rònt di e pelea ei i el a kaba kuné na di 1:16 minüt di e di shete.

WILLEMSTAD - Un remodelashon ku ta tumando lugá na Schottegatweg na Rio Canario, a pone ku a surgi un káos enorme awe riba kareteranan di Kòrsou. Komo ku ta trata di un kaminda importante awe mainta hopi hende (ku no ta sigui e informashonnan di serka) a haña nan konfrontá ku e situashon. Otronan a desviá di ruta, loke a pone ku otro rutanan tambe tabata bou di preshon enorme. E trabounan lo dura 6 siman largu. LA PRENSA ta pidi i un tur pa tuma bon nota di e kambionan aki. (Foto Yves Cooper).

Skina di Sorti, awe djaluna 3 di mart di 2008, ta kuminsá ku deseá un i tur un bon dia. Tomo di desishon semper bai mester ta ku mira riba futuro ophetivonan. Lokual a pasa mester sirbi komo informashon pa korekshon riba proseso di tomo di desishon i struktura di personalidat i tendensia di pensamentu di aktornan ku bo tin di topa atrobe den pasado. Ta únikamente echonan ku no ta revokabel òf virtualmente imposibel di revoká tin di sirbi komo elementonan di e futuro situashon.
****
E proseso estatal a yega den un fase kaminda mester konstatá ku diferente asuntu a haña e karakter di irevokabel òf virtualmente irevokabel. Ku tumamentu di “voorschot” riba e akuerdonan polítiko ku a keda será, nan a haña e karakter di virtualmente irevokabel. Un referèndem di ratifikashon komo tal ta mas bien algu pro forma. E úniko konklushon ku por mara na un eventual rechaso di lokual a keda akordá ta ku koalishon tin di saka konklushon polítiko.
****
Te kon leu un referèndem pa ratifiká lokual a keda akordá ta “voorschrift”, mi no sa. Ta parse mi ku ta mas un kestion di algu ku lo a primintí (pa bende e referèndem pa por negoshá un realidat estatal nobo) ku e ta un “voorschrift” pa konkluí un eskoho estatal ku ta resultado di un referèndem. Mi ta ripití ku un eventual referèndem, ta apsoleto ku tumamentu di “voorschot” riba e akuerdonan.
****

MOSKU, Rusia, - Dmitry Medvedev ayera a keda eligí pa un márgen amplio pa remplasá su mentor, Vladimir Putin, komo Presidente di Rusia, den algun elekshon durante kua oposishon a denunsiá iregularidatnan segun largura di e pais.
Medvedev, kende a traha huntu ku Putin for di dékada 1990, na mei lo risibí presidensia for di man di su eks hefe, pero ainda no ta kla kua di nan dos realmente lo tin riendanan di Rusia.
Despues di siere di urnanan, Medvedev brevemente a aparesé riba esenario di un Konsierto di Rock riba Plasa Kòrá huntu ku Putin, ku kende tambe el a aparesé na Kremlin.
Medvedev a bisa ku su polítikanan lo bai ta “kontinuashon direkto” di esnan di Putin, i el a agregá ku lo mantené kòntròl di e akshon den eksterior pa defendé interesnan di su pais.
“Mi ta kere ku lo bai ta un kontinuashon direkto di e kaminda ku Presidente Putin a realisá”, Medvedev a bisa den Konferensia di Prensa.
“Nos ta konfia un den otro, esei probablemente ta mas importante”, el a agregá.
Medvedev a traha ku Putin durante mas ku 17 aña i ta e protegido di e aktual Presidente ruso.
“Mi ta konvensí di ku nos trabou konhunto por duna e pais resultadonan bastante interesante i laga nan bira un faktor positivo den desaroyo di nos estado”, Medvedev a enfatisá.
Vladimir Putin, Promé Minister
E eks abogado di 42 aña a señalá ku lo forma su Gobièrnu nobo i atministrashon di Kremlin konsultando ku Putin, kende lo bai bira su Promé Minister.

WASHINGTON, - Hillary Clinton i Barack Obama èlebog ku èlebog ta luchando pa viktoria na Ohio i Texas, un dia promé ku e elekshonnan primario demókrata na e estadonan aki, segun enkuesta di Reuters/C-SPAN/Houston Chronicle emití ayera.
Clinton, kende ta luchando pa mantené su kandidatura pa presidensia di Merka despues di 11 triunfo konsekutivo di Obama, desesperadamente tin mester imponé na estadonan grandi p’e optené nominashon demókrata pa e elekshonnan presidensial na novèmber.
Obama, senador di Illinois, tin bentaha leve riba Clinton na ámbos estado, ounke e bentaha aki ta dentro di márgen di eror di e enkuesta, ku ta tiki ménos di 4 punto porsentual.
Obama a imponé entre 47 i 44 porshento na Texas, despues ku Clinton a subi un punto den enkuesta realisá pa Zogby International.
I tambe e ta dilanti ku 47 porshento kontra 45 porshento na Ohio, revirtiendo e bentaha di un punto ku Clinton ta’tin ayera.
E senador, kende lo por bira e promé Presidente pretu di Merka, den último simannan a logra kambia desbentahanan grandi na ámbos estado, pero den último dianan e kandidatonan a mantené sin kambionan grandi.
“No tin movementu grandi. Ta kareranan ahustá”, e enkuestadó John Zogby a bisa.
“Pa awor aki parse niun di nan dos lo bai gana pa pálisa”, Zogby a agregá.
Den filanan republikano, e faborito John McCain parse ta na kaminda di triunfonan kómodo na ámbos estado pues e ta manteniendo bentahanan amplio riba su rival, eks gobernador di Arkansas, Mike Huckabee.

Zoila Mercera Rodriguez
Un di e promé kosnan ku Zoila a retami ora mi a konosé algun aña pasá, tabata pa un dia mi hasi un programa di televishon den kua e ta ofresé diferente peluka pa mi bisti, simplemente pa laga wak kon lo mi keda ku diferente sorto di kabei riba mi kabes.
Mi a lag’é sa mesora, ku mi no a apresiá su sugerensia, pero e no a preokupá ku mi i a defendé su reto pasobra segun e, esei no únikamente lo ta un programa diferente i interesante, pero tambe lo a laga mi mes wak di kon mi mester hasi un kambio. Na mes momentu lo tabata un bon promoshon pa su piesanan di kabei.
Te awe mi ta konvensí, ku mi no mester di niun kambio, pero si nos a bira hopi bon ku otro i mi a primintié ku un dia, mi ke sa mi di kuné pronto, lo mi permitié bistimi diferente peluka den un presentashon públiko manera un programa di televishon.
Esei no por mas. Ke men pa ami e reto ei a kaduká. Zoila no ta ku nos mas.

Loke e ta laga pa ami ku no ta famia ni amistat di aserka, ta un espíritu di un hende muhé empresario dinámiko ku masha ambishon i konvikshon pa bai dilanti. Atendiendo ku Zoila komo empresario, bo ta sinti ku ta dilanti so por bai. No tin chèns pa duda. Nos kòmbersashonnan durante di e lùnchnan mensual di ADECK kual e tabata frekuentá regularmente, a bai mas riba kiko mas por hasi pa empresarionan, kiko tin pa empresarionan i ku bo mester kere den bo mes i sigui dilanti ku bo negoshi.

WILLEMSTAD – Den nos edishon di djasabra último riba e trabounan di restourashon di Santana Militar, LA PRENSA mester mustra ku e parti di e monumento ku tabata un opsekio di kònsùl merikano, mester tabata kònsùl ingles. E desvelo di e monumento aki a tuma lugá dia 11 novèmber 2007. E nòmbernan ku ta aparesé riba e monumento aki ta militar britániko ku a muri durante guera tantu na Aruba komo Kòrsou.
Tambe e nòmber Vass mester tabata Vaas, komo un di e polis militarnan ku a riska nan bida durante invashon Urbina na Kòrsou pa hòrta armanan pa e revolushon ku tabata na Venezuela na 1929. Mester tèrminá ku Stichting Militair Erfgoed Curaçao ku ta esnan responsabel pa e santana, ta masha kontentu ku LA PRENSA ta duna posibilidat na e trabounan, sperando ku den futuro lo por sigui gosa di esaki.

WILLEMSTAD – Erwin Koenze a keda apuntá komo kordinadó i bosero pa den diálogo ku lo bai tin entre Piskadónan di Kòrsou i Marina Real. Piskadónan ketu bai ta frekuentá problema durante nan labor di gana nan pan di kada dia, strobando nan den esaki pa motibu di trainingnan ku ta tumando lugá di Marina Real.
Resientemente piskadónan prinsipalmente di e área di Banda Abou ku ta konfrontá hustamente problemanan durante di nan trabou a reuní pa asina buska solushon riba e problemátika ku ta surgi den e área di nan tereno di trabou. E áreanan ku mas tin reklamo di dje ta esun di Wacawa, Punta di Angua i Savaneta, kaminda trainingnan feros ta tumando lugá. E trainingnan militar aki ta strobando literalmente piskadónan di atkerí e loke nan tin mester i ku ta pone eksistensia di piskamentu na peliger. Ademas bida di e piskadónan tambe ta gravemente na peliger.
Den un enkuentro di e piskadónan a bin dilanti ku piskadónan di boto grandi di Westpunt, Sta. Martha i Boka Samí sporádikamente Caracasbaai tambe ta sufri bou di e konsekuensianan di e trainingnan militar. Prinsipalmente ora ku e trainingnan aki ta bira rònt di Kòrsou piskadónan di tur área ta sufriendo. Piskadónan a reuní i apuntá kordinadó di desaroyo di e akshonnan ku lo bai bin pa resolvé problema kresiente ya ku e área tin biaha ku gran frekuensia ta wòrdu será no mas ku un dia òf mitar dia.

WILLEMSTAD – Konsierto “Laga nos ta Un” ta birando mas grandi di loke a spera, ya ku e partisipantenan ta preparando den un forma eksepshonal. Ku konfirmashon di e último agrupashon D-One ta sera e kapítulo di agrupashonnan musikal ku lo forma parti di e konstelashon di agrupashonnan ku lo bai kanta gospel den e konsierto menshoná. E konsierto aki lo tuma lugá djaweps 20 di mart próksimo den Curaçao Festival Center, den kua e konstelashonnan musikal manera GMO, Tune, Rumba Band, Show, Guess, ERA, D-One i GIO huntu ku e kantantenan Ilvia, Mammy, Ephrem J i Reinir Lijfrock lo bai kanta na Dios. Ademas lo tin presentashon di Dj Renzo ku lo presentá un meks di gospel, miéntras ku e maestronan di seremonia ta Mark Seferina i MC Monty.
Pa loke ta trata Mark Seferina tambe ta preparando un rèp pa wòrdu lansá durante e anochi di “Laga nos ta Un”. E formashon Guess tambe a prepará su mes i a drenta studio di Zion Music & Academy pa un kantika spiritual ku lo bai keda lansá pa promé biaha den e konsierto aki bibu.
Loke siman pasá na momentu ku e konferensha mester a tuma lugá, Claudius Phillips tambe a afirmá ku e tambe lo bai forma parti di e konsierto aki.
E konsierto aki ta uni pa rekoudá fondonan pa restourá e oula di Huize Habaai ku ta será for di 1995. Ministerio Bida Abundante for di aña pasá tabata traha riba kontaktonan ku agrupashonnan pa logra haña nan tur huntu pa e selebrashon grandi aki. E fecha di 20 di mart ta un fecha den kua lo no tin fiestanan bailabel na Kòrsou, motibu pa kua a skohe un fecha den kua un i tur por bin huntu pa reflehá riba e motibu ku Kristu Hesus a muri pa hende.

WILLEMSTAD – E fin di siman ku ta tras di lomba tabatin un eksposishon ku a tuma lugá den Flamboyant Room di Curaçao Breezes den kuadro di Eastern Baking Extravaganza 2008. Diferente kompania i profeshonalnan den pasteleria a presentá nan kreashon hasiendo uso di produktonan National Flour Mills di Trinidad. Siman pasá kaba tabatin algun demostrashon ku tabata na enkargo di Desiree da Costa Gomez i Yadira Isenia-Dovalle ku a hasi uso di e diferente produktonan fabriká p’e kompania menshoná.
E kompania aki ta konosí pa su produktonan di kalidat di marka Lotus All Propuse Flour, Lotus Bakers Flour, Lotus Whole Wheat Flour, Lotus Cake Flour & Natural All Propuse Flour, Special High Gluten Bakers Flour i Whole Wheat Flour. E kombinashon di fotonan ta duna bista di e ekshibishon ku a tuma lugá den Flamboyant Room.

WILLEMSTAD - Den estrecho koperashon ku Ministerio pa Asuntu di Eksterior di Reino, ta analisando e desaroyonan ku ta tumando lugá den e konflikto di Venezuela i Colombia i ku awor a haña Ecuador a aserka. Direktor di Ofisina pa Asuntunan Eksterior, Dito Mendes de Gouveia a deklará na LA PRENSA awe mainta ku e situashon ku tin aktualmente entre Venezuela i Colombia ta lógikamente un situashon preokupante, ya ku semper a anhelá pa e isla ta den zona di pas di trankilidat.
Ainda no por bisa ki influensia e konflikto aki lo tin pa Kòrsou, ya ku ta spera ku por yega na e mesa di negosiashon riba e diferente puntonan ku e ámbos pais mester atendé. E situashon ta un situashon interno ku mester keda atendé i ta spera ku esaki por keda atendé riba un nivel internashonal. Mendes de Gouveia ta indiká, ku ámbos pais ta miembro di OEA (Organisashon di Estadonan Amerikano) i ku den e organisashon aki sin duda lo por atendé ku e problemátiko aki. Mirando tambe ku últimamente sifranan di turismo a mustra bunita di turistanan prosedente di e paisnan aki, ta di spera tambe ku lo no tin influensia pa e Kòrsou. Mendes de Gouveia ta sigui mustra ku e problemanan lo no afektá desaroyo di e isla aki, ya ku ta problemanan interno di ámbos pais ku mester yega na solushon. Na e alturanan aki ta difísil ainda pa antisipá un desaroyo di e konflikto, ya ku riba un plataforma general esaki ainda por keda atendé pa OEA.
“Mester keda ku e dede riba pòls, di manera ku ta wak kiko ta pasando”, tabata deklarashon di Dito Mendes de Gouveia. Ademas ta difísil ainda pa komentá, ya ku ainda e situashon aki ta unu di konflikto i ku por hasi uso di negosiashonnan na mesa pa evitá algu peor. Te na e altura aki Ministerio pa Asuntunan Eksterior di Reino i Ofisina pa Asuntunan Eksterior ta analisando e konflikto ku a surgi.