Cu presentacion Amor y Poder, e lider interno dia 8 maart 2008

ORANJESTAD- Den cuadro di dia internacional di hende muher Departamento di Asunto Social (DAS) en particular team di distrito di Oranjestad den cooperacion cu Centro di bario Playa Pabou, ta invita comunidad di Aruba pa un presentacion di ‘Amor y Poder, e lider interno’ diasabra 8 maart 2008 di 6 or di atardi te 8.30 di anochi na Centro di bario Playa Pabou.
E celebracion di e dia conmemorabel aki lo cuminsa cu nos himno di Aruba y e himno di Playa Pabou sigi pa un palabra di bon bini dor di presidente di CBPP señor Dennis Burke y señor Raoul Gravenstein, funcionario di team di distrito di Oranjestad. Despues lo sigi cu e presentacion ‘Amor y Poder, e lider interno’ duna pa e conocida guiador di bida positivo señora Belquis Moreu.
E presentacion ta enfoca e poder di cada ser humano pa haci e diferencia y ta exitoso. Amor y poder ta e lider interno den cada persona .
Despues di e presentacion aki cada participante lo tin e abilidad pa cambia un situacion di menos bon pa bon y lo siña con pa ta un lider cu ta wordo guia dor di amor y poder. E participantenan lo haya tipsnan practico cu lo por conduci na cambio den mentalidad. E presentacion aki ta tanto pa hende muher como hende homber.
Lo termina e anochi aki cu un bunita presentacion di nos artistanan local Quincy Hasham y Lynette Do Nascimento. Lo bai tin snacks , soft y bolo pa esnan presente y e entrada ta totalmente gratis.
Pa e prome 50 participantenan femenino lo tin un recuerdo chikito.

ORANJESTAD- Algun siman pasa, TeleAruba a start cu un curso Papiamento Conciente & Comunicacion cu ta wordo facilita pa Scol di Idioma.
Un hecho cu sigur merece reconocimento pa su iniciativa ya cu ta duna muestra di boluntad pa siña domina nos idioma Papiamento riba nivel profesional.
Docente di e curso ta sra Desiree Correa y iniciador ta sra Lelicia Tromp. E ta un curso desaroya specificamente pa e staf di TeleAruba cu lo termina cu un presentacion verbal y skirbi pa asina determina punto final.
E graduadonan lo ricibi e diploma “Papiamento Conciente & Comunicacion-nivel MBO-Plus.”
Riba e potret por aprecia e grupo y nan docente riba prome dia di curso. Un pabien pa e iniciativa di TeleAruba pa kier studia, profundisa y profesionalisa uso di nos idioma natal.

ORANJESTAD- Arco Iris Kleuterschool ta organisando un evenemento di Bingo, pa asina recauda fondo pa yuda drecha tur material di hunga di e scol.
E materialnan di hunga den e speeltuin di Arco Iris Kleuterschool mester ser cambia y esaki ta un projecto costoso.
Tambe e scol ta trahando ariba e projecto di un speelzaal nobo, pa asina e muchanan por hasi e ehercisionan necesario den un lugar adecua.
Esaki tambeta un proecto grandi pero cu ta priminti di bira hopi bunita, pa nos muchanan.
Pa e motibonan aki, Arco Iris Kleuterschool ta organisa e evenemento di Bingo pa recauda fondo.
E Bingo lo tuma lugar dia 8 di Maart 2008, na Club Caiquetio na Paradera. E lo cuminsa pa 7’or di anochi y prijs pa kaarchi ta solamente Afl.10.-
Ban tur hunto y contribui na un bon causa, yudando asina nos chiquitonan di awe pero cu lo ta nos grandinan di mañan.

ORANJESTAD- Diasabra otro siman dia 15 Maart 2008, pa 8 p.m. te “mid night” na Arubus Terminal Nobo na San Nicolas, lo tin un “Steel Band Concert”.
Ocho (8) “Steel Bands” a registra caba.
Tene e anochi di 15 Maart 2008, liber y bin scucha un concierto unico y fabuloso.
Por tuma contacto ainda cu e coordinador Juby Naar, na tel. 566.2367, prome cu dia 11 di Maart.
“Steel Bands” cu a registra caba ta:
Tradition Steel
A Young Boys Group
Magic Steel
Bito and the Boys
Touch of Steel
North Stars Steel Band
The Failures Steel Band (1945 – 1950 style)
Francis Jacobs and Friends.

ORANJESTAD- For di dia 4 di maart te cu 8 maart 2008 Embahador di Republica Popular di China staciona na Den Haag, esta sra. Xue Hanqin ta di bishita oficial na Aruba. Señora Xue Hanqin a bin acompaña pa su prome secretario sra. Hong Hong y tercer secretario sr. Zhang Liang.
Aña pasa Ministro Plenipotenciario na Hulanda sr. Frido Croes a extende un invitacion pa sra. Xue bin Aruba.
Ya den pasado na 2006 y 2007 Ministro Presidente sr. Nelson Oduber a haci bishita na diferente ciudad Chines pa promove Aruba y ofrece Aruba como un puente pa producto- y servicionan Chines pa Norte-, Latino America y Caribe.
Na April 2007 un delegacion di China International Intellectech Corporation –International Business Development Center (CIIC-IBDC) a bin pa sondea e posibilidadnan cu Aruba ta ofrece pa inversion Chines. A base di e bishita aki a firma un Memorando di Entendimiento (M.O.U.) entre Gobierno di Aruba y e Agencia aki.
Na November 2007 Gobierno a firma un contrato cu e Agencia aki cu lo ta responsable pa habri un Aruba Investment and Promotion Office na Beijing cu e meta pa trece inversion pa Aruba.
Embahador Xue a informa su Oficina pa Relacionnan Exterior na Beijing cu a bay di acuerdo pa e bin haci un “site inspection” na Aruba; personalmente e mester inspecciona e situacion y raporta despues.
Durante su bishita diaranson mainta serca Ministro Presidente Nelson Oduber, sra. Xue a splica cu lo ta bon pa nos comerciantenan local tambe bay China y reuni cu empresarionan cu ta interesa den e region aki. Esnan di sector priva ta mas activo, creativo y mas dinamico. Mescos cu Hulanda (Rotterdam) a bira grandi door di transhipment di carga, Aruba tambe por fungi como un waf asina pa e region aki.

ORANJESTAD- E organisacion di hobennan profesional di partido RED Democratico durante ultimo lunanan a conduci un investigación bao di un grupo di studiante Arubano na Hulanda. E topico principal tabata e obstaculonan cu tin den nan caminda pa regresa Aruba después di nan estudio.
Desde eliminación di beurs y introducción di e asina yama “studielening” mas hoben a haya e oportunidad di bay studia den exterior, sin importa nan color politico. Cada aña nos ta despedi di un grupo grandi di hoben cu ta bay busca nan futuro den exterior, cu e anhelo di por bolbe un dia na nan isla natal.
No ta un secreto cu poco ta di esnan cu nos ta tende atraves di e añanan cu nan ta regresa Aruba y asina contribui na e desaroyo di e comunidad. E pregunta ta surgi e ora ta dicon?
RED pa medio di Yahoe cu ta su organización di hobennan profesional a cuminsa cu un investigación bao di diferente studiante na Hulanda den diferente provincia y ciudad riba nan pensamento di bolbe na isla después di nan estudio.
Indudablemente a resalta e hecho cu nan ta stima nan isla y cu sigur nan kier bolbe y traha aki nan. Pero tin un serie di motibo of mihor bisa obstáculo cu ta pone nan pensa dos pa tres biaha na tuma e decisión ey.
E investigación a yega na un top di 6 motibo, nan ta como lo siguiente:
1. Companianan local ta exigi experencia di trabao (werkervaring), loke claro un studiante recien gradua no tin, principalmente esnan cu a termina un estudio di tempo completo, esta un voltijd studie;

WILLEMSTAD – E bòrchinan di tráfiko ku ta indiká un ‘wachtverbod’ na altura di The Movies i Fundashon Kas Popular, ta indiká ku ta prohibí pa stashoná un vehíkulo na e banda di kaya kaminda e bòrchi ta poné.
Resientemente LA PRENSA a publiká un artíkulo den kua a menshoná ku efektivonan di S.K.S. a pega klèm di wil na diferente vehíkulo ku tabata korektamente. E vehíkulonan tabata stashoná na e banda di kaminda ku no tabatin bòrchi poné. E bòrchi ku ta poné na man robes di kaminda nèt dilanti di The Movies, no ta konta pa e vehíkulonan stashoná dilanti di FKP. E bòrchi akí no ta konta mas, pasó su funshon ta terminá kaminda e siguiente bòrchi ta poné, esta nèt dilanti di e edifisio di F.K.P.
Den e ordenansa nobo di tráfiko 2000, tin skibí den artíkulo 6; “De verkeersborden E1 en E2 gelden slechts voor de zijde van de weg waar zij zijn geplaatst.” E bòrchi E1 (parkeerverbod) ta indiká un prohibishon pa stashoná un vehíkulo. E ta rondó, rant blou i kòrá paden. Riba e bòrchi tin un strepi kòrá ku ta kore di man robes pa man drechi. E bòrchi ku e krus meimei, E2, ta indiká un ‘verbod stil te staan’. Esaki ta nifiká, ku ta prohibí pa para pa un hende baha òf drenta den un vehíkulo.

WILLEMSTAD – Ni Klínika Capriles ni Hòspital, CEMS i Polis ta karga e kulpa di morto di Sovyendy Kopra. Esaki ta konklushon di e rapòrt ku Inspekshon di Salú ta bai publiká próksimamente. Kopra a muri aña pasá 22 di ougùstùs 2007 den un ambulans di CEMS dilanti di Warda di Polis na Punda. Tabata despues ku el a usa droga venená i a bira agresivo, ku polis mester a bai busk’é huntu ku CEMS.
E kaso di Kopra a hala hopi atenshon, pasó tantu Klínika Capriles komo Hòspital a haña ku no ta nan mester a duna Kopra asistensia médiko dia el a bira malu. E diskushon si ta Hòspital òf Klínika Capriles mester a yuda Kopra a terminá, ora a sali na kla, ku tin un palabrashon entre Hòspital i Klínika Capriles. E palabrashon ta ku pashèntnan sikiátriko por akudí na Klínika Capriles te ku 5’or di atardi. Despues di 5’or ta hòspital ta responsabel pa nan. Na momentu ku Kopra a bira malu 5’or no a bati ainda. P’esei a hib’é Klínika Capriles. Sin embargo médikonan a konstatá, ku Koprá no tabatin niun indikashon sígiko. E tabatin señalnan di intoksikashon di koka. Pa e motibu akí Capriles no a tum’é.
Ora polis a yama Hòspital pa splika e situashon, Hòspital a bisa, ku nan no ta atendé ku pashènt sikiátriko promé ku 5’or. Esaki tabata motibu pa CEMS a hiba Kopra Warda di Polis na Punda pa ser’é den un sèl te ora e kalma. Segun e patruya di polis ku tabata huntu ku Kopra, ta òrdu el a haña di su superior na Punda. Sin embargo Fiskal Gisele Veen- Jonkhout a duna pèrmit pa no sera Kopra den un sèl, pasó e no a kometé niun krímen. Finalmente Kopra a muri den e ambulans dilanti Warda di Polis na Punda.

WILLEMSTAD – Ayera den oranan di anochi a yega Kòrsou Presidente di Sürnam Runaldo R. Venetiaan i un delegashon di 5 persona. Na tal okashon, Minister Presidènt di Antia sra. Emily de Jongh Elhage, huntu ku Kònsùl -General di Sürnam sra. Evline Timmer, i Direktor di Relashon ku Eksterior Eduard Mendes de Gouveia, a bai risibí Presidente Venetiaan di Sürnam na porta di avion. Den e VIP Lounge na aeropuerto Ministernan Omayra Leeflang i Elvis Tjin Asjoe tambe tabata presente kompañando Minister Presidènt p’asina duna Presidente di Sürnam un kordial bonbiní.Despues a sigui un kòmbersashon ameno kaminda a trata temanan mutuo di interes. Djaweps mainta Presidènt Venetiaan a sigui su biahe pa Bahamas via Miami ku American Airlines.
Riba e pòrtrètnan por mira e mandatario di Sürnam den kompania di ministernan De Jongh-Elhage, Leeflang i Tjin Asjoe.

LOS ANGELES, Merka, - Patrick Swayze, e bailarin i estrea di pelíkulanan di éksito manera “Dirty Dancing” i “Ghost”, a diagnostiká ku e tin kanser di pánkreas, pero e ta kontestando bon e tratamentu, su publisista a bisa ayera.
Patrick Swayze, di 55 aña, ta trahando durante e tratamentu, su agente Annett Wolff a bisa, desmintiendo e notisianan ku a aparesé den Prensa sensashonalista ku a sigurá ku e aktor ta grave i a ked’é simannan di bida.
Wolf a publiká komunikado di dòkter di e aktor, dòkter George Fischer, ku ta indiká ku “Patrick tin un grado di enfermedat hopi limitá i parse e ta kontestando bon e tratamentu”.
“Tur notisia riba margen temporal di su pronóstiko i su efektonan sekundario físiko ta apsolutamente falsu”, dòkter Fischer a añadí den e komunikado. “Konsiderablemente nos ta mas optimista”, e dòkter a bisa.
Wolf a añadí ku Swayze profundamente a gradesí “e apoyo” ku el a risibí di públiko.
Ounke Swayze a interpretá hopi ròl den pelíkulanan, televishon i teatro, e ta konosí prinsipalmente pa su ròl komo profesor di baile Johnny Castle, kende tabata siña personahe di Jennifer Grey (e teenager Frances “Baby” Houseman) baila den e musikal di 1987 “Dirty Dancing”.

Foto: Patrick Swayze 0603

Aktor Patrick Swayze riba pòtrèt di archivo 28 di novèmber 2005.

Skina di Sorti, awe djaweps 6 di mart di 2008, ta kuminsá ku deseá tur hende un bon dia. Un organisashon semper bai mester tene na kuenta ta kual tipo di informashon e ta buska i kual interpretashon tin di duna na informashon ku e haña na su disposishon. Informashon lòs di su relevansia i signifikashon pa planifikashon ta un faktor den e aspekto di maneho stratégiko di bo rekurso humano i relashon públiko i komersial. E manera ku esnan ku bo tin di konsiderá komo “stakeholders” di e organisashon ta digesta e informashon ta un aspekto sumamente importante pa bo proyekshon di senario.
****
Proyekshon di senario, manera mi a splika na vários okashon ta un dje kuadronan di informashonnan mas importante den e proseso di formulashon di strategia. Ta p’esei informashon riba tendensia di komportashon i prioridat di “stakeholders” entre kual tin elektorado, fasilitadornan i mobilisadornan no polítiko i potensial oponentenan, ta hopi mas importante i ménos riesgoso ku situashon di popularidat (kuantu asiento un partido tin na ékis momentu i kende ta gustá òf nò na un determinado momentu).
****
Miembronan di e respektivo partidonan polítiko tin e tendensia di reakshoná emoshonalmente kargá riba resultado di enkuesta riba popularidat di partido òf polítiko. Ta bini inkietut den partido i mobilisashon interno den direkshon di liderazgo di partido òf ékis ehekutivo, parlamentario òf miembro di Konseho Insular ta e resultado. Por lo general no ta bini un análisis rashonal di e informashon for di kual por surgi un plan di akshon pa alkansá ophetivonan den futuro.

WILLEMSTAD – “Vanddis ku tin pueblo di Kòrsou asina tantu na pechu ta dispuesto pa bende e gasolin i gasoil ku e ta kumpra serka Curoil bou di e preis kual e ta paga pa haña e produkto?”, tabata pregunta di direktor di Curoil Gensly Capella.
Manera ya ta konosí Curoil den 2007 a sufri un pèrdida dor di bende produktonan derivá for di petroli bou di preis real kousando un pèrdida direkto pa Curoil. Vanddis di su parti SI tabatin ganashi. Curoil tin tur sifra di entrega na tur e pòmpnan di gasolin na Kòrsou i fásilmente nan tambe por kalkulá lokual e pòmpnan di Vanddis a generá na ganashi. Pueblo por puntra dikon Vanddis no a bende gasolin i gasoil bou di preis pa yuda komunidat? Paso si bèrdat señor Van der Dijs ta deseá di yuda pueblo fásilmente e por hasié, tabata ponensia di Capella durante e konferensia di prensa ayera.
Gobièrnu ta stipulá preis máksimo pues Vanddis lo por a kita un pida di su márgen di ganashi di 12.35 sèn riba kada liter i bende ku un márgen di 8 òf 7 sèn. Asina lo e por a regalá 4 sèn na pueblo. Òf mihó ainda Vanddis por bende sin márgen manera Curoil ta hasi pa yuda komunidat.
Den 2007 Curoil a entregá 108 mion liter di gasolin i 39 mion liter di gasoil na pòmpnan di gasolin. Di e 25 pòmpnan di gasolin riba e isla aki Vanddis ta doño di 4 esta kontando Rio Canario komo un pòmp apesar ku e tin nan na tur dos banda di kaminda.

WILLEMSTAD - Ta un lástima ku den un tempu di krísis di energia, Vanddis ta kis pa e modelo di oportunista pa difamá un kompania manera Curoil i su gerensia, tabata deklarashon di direktor di Curoil Gensly Capella. Capella ke enfatisá un biaha mas ku Curoil sí tin étika i ta realisá tur dia ku Curoil ta di pueblo i nan ta traha realmente na bienestar di pueblo i niun sèn no ta bai den saku di gerensia di Curoil manera den e kaso di Vanddis, un kompania privá ku tur ganashi ta bai den saku di su doño, señor Van der Dijs.
Segun Capella, ku Van der Dijs kier sembra pániko den pueblo i purba okashoná un orkan den un glas di awa pa brua pueblo i mandatario pa su metanan personal. Ni un Pueblo ku ta respetá su mes, ni un Gobièrnu ku ta respetá su mes i realmente tin e bienestar di pueblo na pechu, no por pèrmití un komersiante barika yen ku ta sinti su mes riba tur hende i su arogansia pa no aseptá regla kual ta na interes di e situashon finansiero di un kompania di pueblo i ku tur otro doño di pòmp si ta kumpli kuné.
Por sierto e reklamonan di señor Van der Dijs ta mané un disko rayá ku tin 22 aña for di tempu ku Curoil a wòrdu lantá i ta basá puramente riba vengansa i oportunismo propio. Ta bon pa trese pa dilanti ku esaki lo ta e promé i último reakshon di Curoil relashoná ku e insinuashonnan lansá, semper i kuando no trata na mancha nòmber di Curoil i/òf su gerensia.

WILLEMSTAD – “Kanta Bingo ku Blinko” ta kampaña nobo ku TeleCuraçao i su partnernan anunsiá pa aña 2008. Ta trata di otro grandioso proyekto, kaminda klientenan di e kompanianan partisipante, tur luna, kuminsando for fin di luna di mart te ku fin di desèmber 2008, tin chèns pa gana sea un outo KIA nobo nobo òf 10.000,00 florin kèsh. Ku e kampaña “Kanta Bingo ku Blinko”, for di ora bo klasifiká serka un di e kasnan komersial, ya kaba bo ta un ganadó. E biaha aki, tur partisipante lo gana plaka kèsh na final den e Game Show di “Kanta Bingo ku Blinko”.
Konsiderando e éksito di e kampañanan anterior, públiko por ta garantisá, ku e kampaña “Kanta Bingo ku Blinko” lo bira ainda mas grandi ku e otronan. Durante 10 luna, tur luna den un “Game Show”, ku lo keda transmití na TeleCuraçao, ganadónan di e kampañanan di kada partner, lo kompetí kontra di otro pa gana un premio. E aña aki esaki por ta un outo òf plaka kèsh.
Pa partisipá ta fásil. Djis lokual un persona mester hasi ta, kumpra serka di un di e kasnan komersial partisipante sea Better Deals, Kentucky Fried Chicken, Pizza Hut, Subway, KIA, Landsloterij, Licores Maduro, Maduro & Curiël’s Bank N.V., Marchena Hardware, Verzekeringswinkel Pearl N.V. i UTS ta kla. Kada kompania lo hiba nan kampaña na nan manera i lo saka dos ganadó ku lo partisipá den e Game Show “Kanta Bingo ku Blinko”.

WILLEMSTAD - Hucor Holding Co. N.V. na nòmber di su restorantnan KFC (Kentucky Fried Chicken), Pizza Hut i Subway lo ta un di e orguyoso Partnernan di e game show nobo di TeleCuraçao “Kanta Bingo ku Blinko” pa aña 2008.
E otro Partnernan pa e Gameshow di 2008 aki lo ta:
Better Deals, Kia, Landsloterij, Licores Maduro /Dewar’s, Marchena Hardware, MCB, Pearl N.V. i UTS.
Tur luna nos lo saka dos (2) finalista ku lo representá nos den e Gameshow aki.
Pa partisipá ta fásil: na kompra di Naf.10,- òf mas na un di nos restorantnan, tur persona mayor di edat, por tuma nan resibu, yena esaki ku tur nan datonan na e parti patras (Nòmber, fam, ID, Adres + number di telefon/selular) riba e resibu di e luna korespondiente. Kada luna ta bolbe saka dos (2) finalista di nobo. E sorteo aki lo sosodé tur luna den un di nos restorantnan i lo wòrdu transmití ‘live’ atraves di Radio Direct i tambe grabá dor di TeleCuraçao.
Tur luna nos (2) finalistanan ademas di partisipá i representá nos den e Gameshow, kada un lo risibí un kadobon na balor di Naf. 300,- pa gasta na Wimco, kortesía di Hucor Holding i Wimco!
Ban “Kanta bingo ku Blinko” i Hucor Holding.

WILLEMSTAD – Kenneth Gijsbertha for di ayera nochi kaba a trese dilanti den seno di direktiva di MAN riba e direkshon ku e partido mester tuma riba futuro estatal. Gijsbertha di e forma ei no a laga niun dia pasa, pero a drenta akshon despues ku ayera mainta un yamada a wòrdu hasí na su persona pa trese unidat. Manera ta konosí, ayera mainta tabatin un enkuentro ku pastornan a yama ku koalishon i oposishon, di kual tres miembro di oposishon tabata presente. Tabata Efi van Meent i Kenneth Gijsbertha di MAN i Runia Mercelina di Forsa Kòrsou.
Segun Kenneth Gijsbertha ta splika na LA PRENSA, ku e tabata presente, ya ku e ta duna kontesta riba e tipo di invitashon asina. Na promé lugá e enkuentro di ayera tabata unu sumamente positivo i ku por a nota di un yamada sinsero na tantu partidonan di koalishon i oposishon. Un yamada sinsero ya ku no por a mira ku tabatin interes pa defendé niun banda, pero simplemente pa mustra i tambe atvertí pa e eventual direkshon ku ta bayendo.
Gijsbertha ta indiká ku e forma ku kosnan ta bayendo mester evitá ku esaki lo por desplegá den un situashon ku niun hende ta deseá pa evitá malai. E enkuentro tabata positivo i Gijsbertha ta lamentá ku tin otronan ku no a duna oido na e invitashon, pero e ta kontentu ku e grupo di pastornan a mustra ku nan lo no wòrdu deskurashá i ku nan lo sigui. E grupo di pastornan a mustra nan disponibilidat pa kontribuí pa duna sosten. Loke mas tabata remarkabel ta, ku na final di e enkuentro aki ku pastor Welton “Pappi” Esprit a para ketu i a pidi su koleganan pa hasi orashon pa duna Kenneth Gijsbertha e mandato pa bai purba logra haña tur hende huntu pa un mihó pais. Gijsbertha a konsiderá ku e yamada aki e ta un instrumento ku por wòrdu usá pa yega na bon entendimentu pa e pais por bai dilanti.

MINGELI
Marvis Marcela (repentino 55 aña)
A laga atras su mama Crisma Mingeli, yunan Cholaica Mingeli i Jackson, Sharlon i Evi Mingeli, Gregori Mingeli, Marioneta Paulina. Akto di entiero ta djasabra 8 mart for di el Consolador pa santana Brievengat. Bishita 10ro. Promé ku entiero tin un respòns 4or na El Consolador. Trahe alegre.

ROSALINA
Arturo Francisco
Mihó konosí komo Broertje
A laga atras su kasá Xiomara Rosalina-Cannegieter, rumannan Maureen i Eddy Michel-Rosalina, Diana i Edward Merencia, Rogia Martus-Rosalina, Nestor Roslaina, Maurits Rosalina i Milushka de Geus, suegro(a)nan Elvia Cannegieter-Desbarida, Crispino Cannegieter. Akto di entiero ta djasabra 8 mart for di misa Sta. Rosa pa santana Bethania. Bishita 12or-3or. Promé ku entiero tin un s.s. di misa.

STATIA-PETRONA
Servia Maria
Mihó konosí komo Sibia
A laga atras su yunan Mildred, Melfrin, Sonny, Izaira Statia, Vivian Statia i Jacinto Sint Jago, Sharine Statia i Peter Hulsman, Mareline Statia i Noy Neuman, Errol i Norma Felix. Akto di entiero ta djasabra 8 mart for di misa Montaña pa santana Montaña. Bishita 1or. Promé ku entiero tin un s.s. di misa 3.30or.

ADAMUS-ZIMMERMAN
Mercelina
Mihó konosí komo Chelin
A laga atras su yunan Jorge Adamus i esposa i yunan, Godfried Adamus, esposa i yu, Lydia Adams i yu, Ruthline Willems-Adamus, esposo i yunan, Cornelis Adamus, Bernadette Fonce i yu. Akto di entiero ta tuma lugá djamars 11 di mart na Ulanda.

Lorito ta yama tur hende un felis djaweps. Ta masha kos mes ta pasa. Nos kier a yama bonbiní na nos kolega nobo Trupial-Kachó, ku tambe ta bula tur kaminda i ta mira masha kos mes tur dia. Trupial-Kachó a basha bon pisá riba diferente kos ku el a señalá. El a hasi uso di nos e-mail ku ta loritotabula@yahoo.com Kòrda bo tambe por bisa nos tur kos ku bo sa ku nos no sa (ainda). Nos ta bin bèk riba e kontribushon di Trupial-Kachó.
*********
Awe Lorito por poko a bai skonde, ora nos a tende e kaso di un polítiko prominente ku su kabes ta riba blòki. Ta kuestion di algun dia ku su karera lo yega na un fin abrupto. E kaso ta hopi serio, te ku Lorito kier a bai skonde bou di un mesa. Pero nos alanan a keda bati bou di e mesa, di manera ku nos mester a bai skonde otro kaminda. Nos a keda tembla so! Lorito di Hechuchééé! Boontje komt om zijn loontje!
*********
Nelson Navarro a hinka su mes den un “camisa di once barra” awor ku el a bin dilanti komo bosero di e manifestashon di otro siman. Nos konosé Nelson komo un hende ku tin su opinion skèrpi i ta kalkulá su riesgonan polítiko, pero nos no a imaginá nos mes ku e lo bai dje leu ei, siendo un persona di reputashon rekonosé. Lógikamente e por duna su opinion loke e ta hasi tambe, pero si algu bai robes otro siman, anto esun promé ku lo “kologá” ta Nelson. E otronan ta hari chikí chikí.
*********
Pa loke ta trata e manifestashon di otro siman, nos ta atvertí for di awor ku mester tuma e medidanan di prekoushon nesesario. Nos a mira diferente manifestante ku no kier someté nan mes na kòntròl i disiplina. Ademas, un manifestashon habrí fásilmente por bira un evento, kaminda agitadónan por drenta. Nos kier usa un bon proverbio na papiamentu ku ta bisa: “Makaku ta hunga ku wowo di su yu te ora e sak’é!”

WILLEMSTAD – Den un kaso ku na Kòrsou tambe ta siguiendo masha di serka, Korte di Apelashon resientemente a ratifiká e claim di Norman Chester Wathey Jr. komo yu di e konosido komersiante Chester Wathey. E famia di Wathey nunka a ninga e claim. Pa hopi aña Chester Wathey Jr. a biba ku e nòmber Leo Hughes, pero despues ku e tata a muri el a pidi pa rekonosimentu i hasta den e kaso aki i bai saka e defuntu for di su graf pa hasi un tèst di DNA. E tèst a sali positivo i a konfirmá ku Hughes, ku miéntras tantu a kambia su nòmber ta yu di e defuntu multi mionario.
Hughes konsekuentemente ta bin na remarke pa e herensia ku su tata a laga atras. Nan ta kalkulá ku Wathey a laga atras terenonan na balor masha haltu di algun mion dollar. Wathey promé ku el a muri, a rekonosé solamente 4 yu muhé den su matrimonio. Chester Wathey Jr. awor mester warda 90 dia pa wak su e 4 damanan aki lo apelá e desishon den cassatie.