ORANJESTAD- Recientemente Valero Marketing & Supply - Aruba N.V. (VMSA) a honra Sr. Aiky Croes - Dealer di Valero Savaneta - como "Valero Station of the year 2007".
Sr. Aiky Croes y su (crew) team su dedicacion y consistencia den servicio excelente, limpieza di e stacion y apariencia general, Seguridad den e operacion, optimalisacion den pedida di producto y un landscaping impecabel a haci cu Valero Savaneta a ricibi e honor aki.
Valero Marketing & Supply - Aruba N.V. (VMSA) ta contento di tin Sr. Aiky Croes como un di nos Valero dealernan. Aiky su compromiso pa hisa standardnan di operacion di un stacion ta refleha e compromiso cu VMSA tin pa cu e consumidor local.
VMSA lo sigui promove un cultura di compromiso pa cu e puntonan ariba menciona y di tal forma cumpli cu e mision di ta un compania cu por depende riba dje dunando servicio consistente, trahando safe, eficiente, cu un apariencia agradabel y siendo un bon miembro di e comunidad.
Den aña 2008 VMSA y su stacionnan lo sigui cu e mesun vigor pa sirbi tur nos consumidornan.

Durante lectura organisa pa Fundacion Formacion Politico Digna Lacle Herrera

ORANJESTAD – E siman aki a tuma lugar den Cas di Cultura e lectura organisa pa e Fundacion Digna Lacle Herrera cu e invitado especial Dr. Leo Klinkers. Den un sala completamente yen, e publico a disfruta di un anochi informativo y alabes ameno. Drs. Paul Croes, Secretario di e Fundacion a habri e anochi gradiciendo e publico presente pa asisti. Tambe a duna gracicimento na tur persona cu a colabora den e organisacio di e evento.
Drs. Croes a duna un introduccion corto di e thema cu lo keda trata e anochi aki y alabes a presenta Dr. Klinkers na e publico. Dr. Klinkers durante su presentacion a mustra riba e importancia di liderasco politico pa un pais y pa un partido. Alabes dr. Klinkers a duna requisitonan di un bon lider politico. Dr. Klinkers durante e lectura aki a mustra cu maneho conoce diferente fase. Den su modelo di “De Architectuur van Interactief Beleid Maken” e ta mustra e importancia di e diferente fasenan cu maneho publico ta trece cune. El la enfatisa e importancia pa e Bottom – Up approach pa cu formacion di maneho. E consulta cu comunidad den e fase preparatorio di manejo y tambe den evaluacion di esaki.
Sr. Klinkers a mustra con pa pone e modelo aki den practica y dicon pa Aruba eskai ta importante. Crecemento demografico, gastonan y responsabilidad cu esaki ta trece cu ne. Con bo por stimula participacion di un sociedad na momento di crea un vision pa bo pais? Dicon ta importante pa consulta cu e diferente actornan importante na momento di desaroya un maneho? Pakiko ta importante pa estudionan cientifico keda realisa, prome cu un maneho keda ehecuta?

Aruba, como pais den e region di Caribe y Latino America

ORANJESTAD - Ta di lamenta cu e sindicato di maestro y maestranan aki na Aruba SIMAR ta dicidi pa join e gremio comercial y e politiconan den nan hamber y sed pa poder. Ningun dia nos a tende e Presidente di Simar yama danki na e gobierno pa tur e beneficionan cu nan miembronan a ricibi. Nos ta puntra nos mes si SIMAR di berdad ta bringa pa e interes di e maestro y maestranan.
Awor cu gobierno a caba di cumpli cu maestro y maestranan dunando nan:
* Na November, e gelijk bedrag di Af. 1250,00;
* Na December, un bon suma paga pa e A TV-dagen;
* Na Januari, un bashi premie di Af. 500,00;
* Na Juni, vakantieuitkering equivalente na un luna extra di salario.
Awor ta bin bisa cu e maneho cu gobiemo a hiba ta di faborece famia y un circulo di amigo. Ki berguensa! Esaki ta netamente locual e partidonan den oposicion ta canta tur dia. Ta bon pa SIMAR sinta hunto cu tur su miembronan y haci un rekensom cuanto placa tur e beneficionan aki a costa caha di gobiemo!
Aruba, como pais den e region di Caribe y Latino America ta orguyoso di por ofrece
educadoman, un bon salario y beneficionan luhoso cu hopi den e region aki no tin:
* Nan tin un salario, cu ta wordo paga tur dia 24 di luna pa nan por paga nan gastonan y percura pa nan famia tin pan riba mesa y tambe pa por cumpli cu nan miembrecia;
* Nan tin un auto pa transporta nan famia of nan por haci uso di transporte publico bon y pagabel;
* Nan tin un vakantieuitkering, cu ta fungi como un entrada extra pa nan y nan famia tuma un vakantie bon mereci;

ORANJESTAD – Miembro di RED, ing. Henry de Cuba na nomber di E-com, e web-site di e Comision di Energia y Desaroyo Sostenibel di partido RED, ta trece dilanti lo siguiente: “E-com” ta presenta su web-site cu ta gelink cu www.red.aw/ ENERGIA/E-com
Nos web-site ta na Papiamento cu sigur ta hopi practico pa lesa y facil pa comprende locual ta wordu presenta..
E-COM SU META TA
* Basa riba investigacionnan riba tur tereno cu tin di haber cu Energia en general, bin cu conseho, alternativa y solucionan practico pa yuda na resolve e problemanan energetico aki na Aruba, cu tin su refleho riba e gastonan halto di awa y coriente;
* Con nos por mantene e calidad di awa y coriente disponibel y pagabel pa nos ciudadanonan etc.;
* informa, educa, y forma nos comunidad pa locual ta energia, energia alternativa y un desaroyo sostenibel cu ta encera e tres facetanan mas importante pa por sobrevivi decentemente, esta economia, ecologia, y e parti social di un sociedad cu mester ta den balance;
Tin diferente otro topiconan riba e web-site cu ta interesante pa nos cuidadanos en general.
P.e. Sector Energia,
* con tarifa di awa y coriente ta wordu calcula;
* con prijs di petroleo ta flucta diariamente;
* con por usa coriente eficientemente
* energia renovabel;
* energia riba tereno internacional etc;
p.e. Sector Desaroyo Sostenibel,
* Globlisacion;
* Cambio Climatico;
* Carrying Capacity;
* Cradle to cradle etc.;
p.e Publicacionan,
articulo di prensa; p.e.
* proposicion pa cambio di tarifanan,

ORANJESTAD - Tiara Air y tur su asociadonan ta hopi preocupa cu e ultimo desaroyonan andando entre gobierno di Aruba y gobierno di Antiyas pa firma e asina yama “OPEN SKY Policy.”
Después di kiebra di nos companianan di aviación AirAruba, ALM, y tambe Avia Air, mas o menos 25 grupo cu a purba lanta un aerolinia na Aruba. Tur a fracasa.
Tiara Air na April 2008 awor ta bai cumpli 2 anja di bida y esaki ta di gradici na e tremendo equipo di empleado cu ta traha cu Tiara, y tambe tur e querido clientenan regional cu ta hasi uso di e servicionan na ora, comodo y simpatico di Tiara Air. Sin nan, awe Tiara Air no lo tey.
Aruba actualmente tin un “OPEN SKY Policy” firma cu varios pais manera por ejempel Estados Unidos, Hulanda y otro. Y esey ta bon.
Entre e Gobierno di Aruba y Antiyas esaki no ta existi ainda pa e trafico aéreo insular.
Tiara Air ta di pensamento cu un firmamento den e caso especifico aki NO lo beneficia e economia di pais Aruba, ni e lo beneficia economia di Corsou ni di Boneiro.
Riba e ruta di AUA CUR actualmente nan ta operando cu un factor di ocupación di 51% y esaki ta door di a cantidad di asiento excesivo cu tin awor aki riba mercado.
Simplemente NO TIN ESPACIO pa 3 linea di aviación pa Aruba, Corsow y Boneiro.
Un “OPEN SKY Policy” entre nos islanan lo trece cune mas linea aereo cu e consecuencia di kiebra di uno of mas di esnan existente.
Varios pais, incluyendo Corsow tin ley cu ta prohibit exceso di capacidad di transporte aereo. (Landsbesluit 15 Februari 2005- No 37)

HOUSTON, - Dòkternan a bisa ayera ku a implantá “pacemaker” pa eks Presidente polako Lech Walesa pa yuda su kurason debilitá.
Walesa, di 64 aña, a drenta djaluna Hospital Metodista di Houston pa risibí tratamentu pa doló den pechu, kansansio i problema pa hala rosea.
“El a tolerá e prosedimentu hopi hopi bon, E tabata di bon animo. El a spièrta fo’i anestesia hasiendo chiste”, kardiólogo di Walesa, Guillermo Torre, a bisa.
E eks lider polako na 1983 a risibí premio Nobel di Pas pa su ròl den kaida di komunismo i tabata Presidente di Polonia di 1990 te 1995.

Foto: Lech Walesa 0103

Imágen emití pa Hospital Metodista na Houston ta mustra eks Presidente polako Lech Walesa, man drechi ta papia ku su kardiólogo dòkter Guillermo Torre.

Skina di Sorti, awe djasabra 1 di mart di 2008, ta kuminsá ku deseá tur hende un bon dia. Asina ku resultado di un enkuesta subi mesa, partidonan ta kore desperdisiá esfuerso den nèt e kosnan ku no ta hiba nan na un mihó posishon elektoral. Nan ta desgastá energia den apresiashon di kalidat dje enkuesta (ora ku e resultado ta na nan desbentaha) òf na gaba nan organisashon (na momentu ku e resultado ta na nan fabor).
****
Ta saka konklushonnan ku ta na kumbinensia dje imágen ku ke krea òf mantené di e organisashon i su respektivo miembronan, miéntras ku disidentenan ta brasa resultado di e enkuesta pa ataka mando di partido. Pa lokual ta maneho asertá di un organisashon polítiko, e akshonnan ku mi ta skirbi di dje ta un desgaste di energia.
****
Pa un organisashon ku ta funshoná bon, un bon enkuesta su resultadonan, ta representá un momentu pa kontrolá diferente aspekto di un plan stratégiko (mi ta bini despues riba esnan ku no tin un plan i ophetivonan). Komo ku strategia su mira ta na un punto den futuro, un enkuesta ta nada mas ni ménos ku un instrumento pa realisá un meta.
****
Si ta trata di meramente un enkuesta pa determiná e apresiashon di elektorado pa un partido òf polítiko,kuantu asiento ta aloká pa partido i kiko ta wòrdu pensá di representantenan di partido), e informashon ta importante, pero pa lokual ta análisis di un plan stratégiko, e informashon ta ménos relevante ku un enkuesta ku ta bisa algu di e prioridatnan di komunidat i komunidat su tendensia pa tuma desishon.

SELMA, Merka, - E prekandidata demókrata, Hillary Clinton, ayera a kuestioná eksperensia di su rival Barack Obama pa manehá un krísis di seguridat nashonal, miéntras sondeonan a mustra ku e dama senador ta pèrdiendo tereno na porta di e elekshonnan primario di djamars awó na Texas i Ohio.
E kampaña di Clinton a publiká un anunsio nobo komersial na televishon na Texas, ku huntu ku Ohio ta sitionan krusial pa posibilidatnan di revertí un seri di derota frente Obama.
E anunsio a mustra muchanan drumiendo pasífikamente riba nan kama miéntras un naradó ta bisa: “Ta 3’or di mardugá i bo yunan ta salbá i drumí. Pero tin un telefòn na Kas Blanku i e ta zonando. Algu a pasa na mundu. Bo voto ta disidí ken ta kontestá e yamada aki”.
E kampaña di Clinton ta spera ku e anunsio nobo ta konvensé e votantenan ku e dama senador ta kla pa aktua rápido i disididamente den kaso di otro krísis manera esun di 11 di sèptèmber 2001 na Merka.
Obama a kontestá ku su propio anunsio komersial, den kua tambe ta aparesé muchanan drumí, i ta papia di un telefòn zonando na Kas Blanku.
“Ora e yamada ei keda kontestá, no mester ta e Presidente kende, e úniko ku, tin e huisio i e balor pa oponé e guera na Irak for di kuminsamentu?”, e naradó a bisa.
Clinton, senador pa New York i eks Promé Dama konsiderá esun faborito pa logra nominashon presidensial di su partido, djamars awó mester triunfá na Texas i Ohio pa márgennan amplio, òf kontrali, e lo por konfrontá tèrmino di su kandidatura.

WILLEMSTAD – Pa di dos aña konsekutivo iglesianan ta bini huntu pa e Evangelisashon Masal ku lo tuma lugá djadumingu Pasku di Resurekshon. Tabata aña pasá ku a selebrá e promé edishon di e marcha aki ku ta sali for di rotònde Palu Blanku pa bai tèrminá na Rif. Aña pasá segun konteo di outoridatnan mas di 5000 hende tabata riba pia, tantu esnan ku a partisipá den e marcha komo esnan kant’i kaminda.
E aña aki un biaha mas e marcha aki lo keda organisá pa di e manera ei evangelisá na esnan di Kristu Hesus. Durante e marcha aki ta halsa e Nòmber di Hesus, miéntras ku e meta di e evangelisashon masal aki ta pa alkansá mas tantu hende ku e evangelio di Señor Hesus Kristu. E testimonio di amor i harmonia meimei di rumannan lo hasi e hendenan kere den Dios. E marcha aki lo sali for di rotònde Palu Blanku, siguí pa Stoppelweg drenta Roodeweg pa yega na Hamelbergweg pa tèrminá na altura di Rif.
E marcha lo kuminsá pa 4’or di atardi i tin diferente iglesia ku lo partisipá durante e marcha aki. E marcha aki lo tin presentashon di agrupashonnan Fuego, Simia Resusita, Kidsroom, Proskuneo, Avivamentu i Fuego, Zamar i tambe e Biba Nobo Praise Team. Aña pasá e agrupashonnan tabata kambia na kaminda, ya ku ta 1 trailer tabatin. E aña aki tin mas presentashon musikal, ku ta nifiká, ku lo bai tin mas di 1 trailer.
Pa e marcha aki iglesianan ta preparando banner ku diferente nòmber di Señor, miéntras ku e partisipantenan lo tin tamburein i diferente otro tipo di instrumènt pa animá durante e marcha. Durante e marcha lo nota ku kada iglesia ta skohe su mes koló pa partisipá den e marcha. Durante di e marcha lo hasi orashon pa esnan ku tin un ke otro nesesidat kant’i kaminda.

WILLEMSTAD – Vários kèlder lo keda restourá den e proyekto di restourashon di Santana Militar. Awe mainta un biaha mas grupo di militarnan boluntario a reuní pa e trabounan di restourashon riba grafnan den e Santana Militar. Tabata aña pasá ku LA PRENSA den un di su edishonnan a relatá riba e trabounan ku ta tumando lugá. E tempu ei tabata desvelo di un bòrchi ku e nòmber, pero poko poko pero sigur e trabounan ta sigui.
Te na e altura aki tabatin algun aktividatnan, manera e monumento ku kònsùl di Merka a desvelá den santana aki, di e merikanunan ku a kai durante di dos guera mundial. E monumento aki ta karga e diferente nòmbernan di e militarnan ku a batayá pa defendé e bandera ulandes.
Tambe un di e trabounan ku a keda realisá ta restourashon riba e monumento di e tres polisnan militar Vass, Van Zuilen i Marcusse, kendenan ta esnan ku a defendé fòrti na momentu ku general Urbina a invadí e fòrti pa hòrta armanan pa e revolushon na Venezuela. e tres polis militar aki a kai riba 8 di yüni 1929 i ku tur tres a keda derá huntu i a krea un monumento na nan onor. Atraves di añanan e monumento aki a bai atras i a restourá esaki i asta a pone un kadena nobo rònt di e monumento aki.
Durante e dianan aki tambe a pone un suela nobo di ‘baksteen’, asina eliminá e parti di tera pa di e manera ei trese mas realse den e santana aki. Awe mainta e miembronan di direktiva di e fundashon di militarnan boluntario ku a eredá e santana aki i ku ta dediká nan tempu liber pa drecha e santana aki a bin huntu pa e trabounan di restourashon di graf. Un kantidat di graf lo keda kompletamente restourá, ya ku nan kondishon a bai atras. Den kombersashon ku algun di e militarnan boluntario a splika, ku nan ta hasiendo tur esfuerso pa asina duna balor na e santana aki, ya ku esaki ta un di e sitionan históriko di e isla.

BRAZIL, - E modelo britániko Naomi Campbell ayera den helikòpter a bandoná e hospital brasileño kaminda a kita un ‘kist ováriko’, un fotograf di AFP a informá.
E helikòpter a sali fo’i Hospital Sirio Libanés ku Campbell pa un destino deskonosí.
E hospital a divulgá den deklarashon kòrtiku ku e modelo di 37 aña “ta rekuperando bon” di e sirugia na kua el a keda someté djaluna último pa kita un ‘kist ováriko’ i komo konsekuensia e por a sali for di hospital.
Campbell a disgustá ku atenshon di Prensa durante su rekuperashon i personal di e hospital a bisa ku e pashènt no ta’tin bon beis i a pidi pa saka telefòn fo’i su kamber pa protehá su privasidat.
E dòkternan ku a atendé, e ginekólogo José Aristodemo Pinotti i e spesialista den enfermedatnan di infekshon David Uip a bisa ku e operashon tabata un “emergensia”.
Su publisista na Europa a konfirmá e operashon i a bisa ku a saka un ‘kist ováriko’.
Campbell ta un bishitante frekuente di Brazil i spesialmente Sao Paulo kaminda e sa keda den kas di amigu mionario brasileño Marcus Elias ku kende e tin romanse.
Elias permanentemente tabata kompañá Campbell na hospital.

Foto: Naomi Campbell 0103

E modelo britániko Naomi Campbell na Berlin riba pòtrèt di archivo 28 di yanüari 2008.

VRUTAAL
Gersön Gerald Antonio
Mihó konosí komo Tjeppie
A laga atras mamanan di kriansa Olga Herts, Joahnna Herts, welanan Wilma Herts i Clinton Lancelot, Ivy Davelaar, bisawela Johanna Herts-Leissius, Seferina Perret Gentil, abuelo Wilfrido Vrutaal, Cornelis Perret Gentil. Akto di entiero ta wòrdu anunsiá despues. Bishita na Iglesia Maranatha na Paradijs 4, Aruba, 2or-4or siguí pa un sirbishi i despues pa santana Algemeen na Caya Ernesto Petronia.

JAMANICA
Petra Celestina
A laga atras su yunan Carmen Jamanica, Hensley Jamanica i Janine Maduro, Richardson i Marvea Jamanica-Meulens, yunan di kriansa Janolda Martina, Johnny Hooi i nan famia. Akto di entiero ta djamars 4 mart for di El Consolador Sala Celeste pa santana Soto. Bishita 1or. 4or tin un s.s. di misa na misa Soto. Trahe alegre.

MINGUEL-MERIEN
Ivy Martina (repentino)
A laga atras su kasá Edgar Minguel, yunan Marlon Minguel, Ryangelo Minguel, rumannan Efraim, Aquilles, Harvey Tokaay, Norma Ster, Yvonne Beers, Anthony Merien, Godfried Merien. Akto di entiero ta djadumingu 2 di mart 4or for di El Consolador pa santana Roodeweg. Bishita 1or. Promé ku entiero 3.30or tin un respòns na El Consolador.

GONSALVES
Vasco
A laga atras su kasá Frida Gonsalves-Cabrera, yunan Lourdes i Jaime Querol-Gonsalves, Rita i Maikel Ruiz-Gonsalves, Vasco Junior i Katty Gonsalves-Zwalef. Akto di entiero ta djadumingu 2 di mart 4or for di misa Suffisant pa santana Gr. Kwartier. Bishita 1or. Promé ku entiero tin un s.s. di misa 3.30or.

Lorito ta yama tur hende un felis djasabra. Lorito a bula te kansa riba Diálogo Nashonal pa nos sigui tur kos di serka. Nos a siña hopi tambe di e oradornan prinsipal ku nan pensamentunan. Lástima ku e presentadó no tabatin zjeitu i ademas no konosé diferente palabra. E palabra ta pènel (ku è) i no panel!
*********
Hopi polis den ITC. Pa hasi kiko? No ta un diálogo ku pueblo tin? Esei a manda un señal robes. Ora tin un diálogo nashonal nos ta komprondé bou di esei ku tin un diálogo ku pueblo. Konsekuentemente nos ta spera ku tur hende mester ta kómodo sin ku kantidat grandi di polis i vigilansia ta presente.
*********
Ademas e pregunta ta surgi, ta ken ta bai paga e kos aki. Ta masha sèn na overtaim mester bai paga. Djis aki ta tira tur kulpa atrobe riba pober David ku te a violá normanan di presupuesto. Esei no ta hustu tampoko!
*********
Nos a mira yen di mandatario ta kana ku vigilansia. Pasikiko? Den kampaña nan no ta bai buska voto tòg ku vigilansia. Lorito por bisa ku kualke hende ku bati na nos porta pa pidi nos voto, anto e ta ku vigilansia por wèl lubidá!
*********
Nos a mira un mandatario kurpa chikí den un outo asina grandi ku yen di vigilansia dilanti i patras. Di baina su kabes tabata sali. Promé nos a kere ku ta yu di un mandatario tabata hiba skol. Esei tambe tin! Pero a resultá ku ta un di nos mandatarionan kabei di ferf! Ridíkulo i sumamente eksagerá!

WILLEMSTAD – Un detenido a horka su kurpa awe mardugá ku un feter den un sel di FOBA den Bon Futuro.
Informashonnan ku LA PRENSA a haña ta indiká, ku ta trata di Urly Maduro, ku a nase na Kòrsou dia 23 di yüni 1966. E tabata biba ántes na La Guardiaweg 20 na Buena Vista. Maduro tabata será for di dékada 80 den e instituto komo un residivista króniko. Esei ta nifiká, ku e tabata sali for di prizòn, bolbe drenta komo ku e tabata un drogadikto molestoso (chòler).
Un bosero di prizòn a bisa LA PRENSA, ku Maduro tabata sintando un kastigu pa ladronisia. Komo ku ta un detenido ku un malesa sikiátriko, e tabata será den e sekshon spesial FOBA. E tabata será e so den un sel. E detenido tabatin kustumber pa tur anochi para dilanti bentana di su sel. Awe mardugá atrobe esei tabata e kaso, pero ku e diferensha ku e biaha aki e lo mara un feter na e bentana i a horka su kurpa. Esei tambe a pone ku a detektá su kaso despues numa komo ku esnan ku tabata enkargá ku vigilansia a kere, ku un biaha mas e tabata pará dilanti e bentana manera semper e ta hasi. Dòkter a konstatá morto di e prezu i fiskal a duna òrdu pa konfiská a restunan mortal pa un outopsia.
Te asina leu ku LA PRENSA por a determiná awe ta di 5 kaso di suisido ku ta tuma lugá den e prizon na Koraal Specht den último 20 aña. Den nan tabatin tambe un hóben.
LA PRENSA ta ekspresá palabranan di kondolensia na famianan di e defuntu.

WILLEMSTAD – Kòrsou tambe lo tene un seremonia tur aña dia 15 di desèmber pa duna atenshon na esnan ku a nashonalisá bira ulandes na Kòrsou. Asina gezaghèber Lisa Dindial a bisa LA PRENSA awe mainta.
LA PRENSA a aserká e mandatario relashoná ku e desishon di Konseho di Minister di Reino pa skùif e fecha di naturalisashon di 24 di ougùstùs pa 15 di desèmber. A tuma e desishon riba inisiativa di minister di Integrashon Ella Vogelaar. Ku e desishon a bai di akuerdo ku e opheshonnan ku ta eksistí riba e fecha serka munisipionan ulandes, pero tambe na Antia komo na Aruba.
Un di e argumentunan pa kambia e fecha ta, ku 24 di ougùstùs ta kai den fakansi grandi. Mayoria di e alkaldenan na Ulanda i otronan ta ku fakansi.
For di 2006 munisipionan na Ulanda ta obligá pa tene un dia di naturalisashon, A skohe den pasado pa dia 24 di ougùstùs komo ku e dia e ta konmemorá e hecho ku e promé Konstitushon ulandes a drenta na vigor na 1815. E fecha nobo ku a skohe tin tambe un nifikashon simbóliko. Riba e dia ei ta Dia di Reino (ántes Dia di Statüt). Riba e fecha ei Statüt ku ta regla e relashonnan den reino a drenta na vigor. Por sierto ku dia 15 di desèmber di e aña aki ta e fecha tentativo tambe pa desmantelashon di Antia.
Gezaghèber Dindial a konfirmá, ku dia 15 di desèmber awor lo ta e promé bes ku Kòrsou tambe lo tene e seremonia di naturalisashon. Riba e dia ei lo duna rekonosimentu na esnan ku a haña nashonalidat ulandes i ku ta parti di nos sosiedat. “E ta parti di e proseso di konsientisashon ku awor nan tambe tin nashonalidat ulandes”, asina Gezaghèber a bisa.

WILLEMSTAD – Promé minister di Antia Emily de Jongh-Elhage a rekonosé ku e kambionan estatal ku ta trahando riba nan no ta fásil. “Pero nan no ta for di nos alkanse”, asina el a bisa ayera na apertura di e Diálogo Nashonal den Iinternational Trade Center. E mandatario a ripití ku pueblo di Kòrsou i e otro islanan a skohe pa keda den reino ulandes. “Ku ta ku e eskoho aki na bista, ta trahando riba e kambionan nesesario”, asina e mandatario a bisa.
Segun e promé minister antiano, no tin sentido pa pretendé ku e proseso akí ta fásil. “Pero no tin sentido tampoko pa pretendé ku e ta for di nos alkanse. Sin duda tabatin diferente seru haltu na kaminda i sin duda lo bini mas promé nos yega kaminda pueblo ke pa nos yega. Kaminda pueblo a planta su speransa dia el a skohe su futuro estatal den referendum di 2005. Struktura estatal no ta un meta riba su mes. Pueblo a skoh’é komo base pa logra su meta berdadero. E meta mes, ta pa e por hiba un bida sano, ku oportunidat di trabou, bon enseñansa, salú públiko na nivel, un moneda stabil, penshun di behes garantisá, chèns pa bai dilanti i pa drecha su kalidat di bida. Tambe pa biba den libertat i seguridat, komo parti di Reino Ulandes i komo siudadano di union europeo, ku su tradishon demokrátiko largu i duradero. Ta e meta di pueblo aki ta keda konta semper na promé lugá”, asina e mandatario a bisa.
Promé minister de Jongh-Elhage a konstatá ku na ámbos banda di laman, tin hende ta desbaratá e konvivensia entre e pueblonan den Reino. “Nan ta venená mente di pueblo maske historia mundial a proba kuantu daño esaki ta kousa. Na ambos banda di laman, tin hende ta lanta e sintimentunan mas abou di ser humano, esta odio i deskonfiansa. Algu ku ta bai kontra di e deseo di nos pueblo pa forma parti di Reino Ulandes. Na Ulanda í na nos islanan, tin hende ta eksigí pa negoshá na moda di ‘sino fono’. Bou di e preteksto ku nan ke protehá pueblo kontra di enemigu, nan ta kritiká tur logro den e proseso di transishon komo muestra di traishon. Nos tambe lo por a skohe pa subi e bapor di guera ei. Maske e drif bai den awa turbulento sin ku nos sa unda esei lo bai hiba nos. Pero esei lo no ta hustu. Pasobra e pueblo di Antia a duna un mandato kla. Pueblo no a opta pa bòmbòshi ni konflikto. E ke mira su futuro estatal komo parti di Reino Ulandes. Esei nos ta logra a base di rèspèt mutuo i konsenso. Hopi di boso, ku ta den sala awe nochi, sa kuantu kònòpi mester lòs tras di kòrtina, promé í durante negosashon. Hopi di boso sa kuantu esfuerso mester hasi pa e diferente puntonan di bista gatia yega serka otro. Si esei a logra kada biaha, ta pasobra semper a tene e meta di pueblo nos dilanti. Den kuadro di esaki i sin kita nada di tur e trabounan i e entusiasmo di sra. Bijleveld, mi ta duna hopi importansia na e bishita ku promé minister Balkenende a hasi na nos islanan. Komo úniko promé minister ulandes el a bini Antia tres biaha pa sostené e proseso akí. E ta interesá den e proseso, pero e ta papia kla tambe: no bira rònt ni laga bai. Mester sigui kana pa por sera e kapítulo akí den nos historia, i habri e kapítulo nobo ku pueblo a pidi p’e. Komo promé minister di Antia huntu ku mi gobièrnu i alabes fasilitador di e proseso nos a skohe pa pusha bai dilanti. Pasobra manera m’a bisa na kuminsamentu, pueblo tin un deseo grandi, basá riba speransa. I ta e deseo ei ta nos deber di yuda realisá!”, asina e mandatario a bisa.

Prof. dr. Jaime Saleh na Diálogo Nashonal:

WILLEMSTAD – Eks-Gobernador di Antia i eks presidente di Korte, Jaime Saleh a hasi un apelashon ayera pa kaba di atendé e proseso estatal pa di e forma ei atendé asuntunan ku ta realmente importante pa pueblo. Saleh a bisa ku personalmente p’e e asuntu di struktura ta masha importante, pero no esun mas importante pa pueblo. Pueblo ta ansioso pa kuminsá traha riba su problemanan riba diferente tereno. Saleh a boga tambe pa fortifiká lasonan den Reino. “No dediká atenshon na asuntunan ku ta krea frikshon so, pero tambe aspektonan ku ta trese e pueblo huntu”, asina el a bisa den su presentashon na UTC durante e promé seshon di Diálogo Nashonal.
“Nos mester hasi bon uso di e bon relashonnan aktual ku tin den Reino, pasobra – mirando e preshonnan negativo ku tin na Ulanda pa ku Antia i Aruba – nos no por sa kiko un otro Gobièrnu na Ulanda lo por bai hasi. Den e kuadro aki nos pueblo por hasi bon uso di e variedat sosio-kultural i sosio-ekonómiko ku nos Reino ta ofresé. For di e variedat aki por surgi lasonan di koperashon i oportunidatnan komun. Fortifikashon di e sentimentu di konvivensia den tur parti di Reino i di e noshon ku nos tur ta ulandes, lo por hiba nos na un buèltu radikal pa loke ta trata e diferensianan sosio-ekonómiko den Reino, partikularmente riba tereno di enseñansa, vivienda popular, salubridat públiko i kombatimentu di pobresa. Pa e motibu aki e buèltu radikal aki mester bira parti di maneho di tur e Gobièrnunan den Reino. Pero esaki no ta trabou di Gobièrnu so. Sektor privá tambe mester tuma inisiativa riba tereno no-gubernamental. Afortunadamente nos ta mira vários gruponan riba nos islanan i na Ulanda ta lantando ku inisiativa privá. Asina nos por mira e bon trabou ku Antilliaans Netwerk i Genootschap Aruba-Nederland ta hasiendo na Ulanda. Mr. Pieter van Vollenhoven i mi persona a lanta basta tempu pasá kaba Comité Koninkrijksrelaties, ku ta konsistí di personanan bon konosí na Ulanda, Antia i Aruba, ku tin bienestar di nos pueblonan na pechu. Pues, nos no mester dirigí nos mes solamente riba asuntunan ku ta krea frikshon òf ku tin di haber ku gobernashon, pero tambe i partikularmente riba asuntunan ku ta trese e pueblonan huntu. Statüt ta duna oportunidatnan amplio pa hasi esaki. Trahando huntu den un unidat mas grandi, nos ta sali for di un posishon isleño isolá i nos por konta ku garantianan pa un nivel rasonabel di seguridat sosial. Esaki no ta kita nada di e relashonnan inter-gubernamental, sosio-ekonómiko i kultural ku paisnan den region di Karibe i Latinoamérika. E lasonan aki tambe por wòrdu fortifiká. Unu no ta ekskluí otro. Awe asuntunan di struktura estatal no tabata tópiko di mi presentashon. Pa mi personalmente esaki no ta e asuntu di mas importansia pa nos pueblo. Naturalmente nos mester tin nos asuntunan gubernamental bon reglá. Pero na final di dia hende no ta biba den strukturanan estatal; hende ke biba den un bon kas di famia, ku un bon enseñansa, ku un bon trabou i un bon salubridat públiko. Pa mes un motibu lo ta bon pa nos kaba mas lihé ku ta posibel tur e asuntunan di struktura estatal pa di tal manera nos islanan por haña nan status nobo i pa traha riba asuntunan ku ta berdaderamente importante pa nos pueblonan”, asina Saleh a bisa.

WILLEMSTAD – “Si Aruba bou di kondishonnan mas malu a logra su status aparte, dikon Kòrsou no?”. Na palabra Mito Croes durante di e Diálogo Nashonal ayera papiando riba status aparte di Aruba. Ampliamente Croes, un hurista destaká, tabata minister den e gabinete di Aruba i Antia i tambe minister Plenipotensiario na Ulanda. Pa hopi aña e tabata tambe miembro di Staten di Antia i a duna kátedra na Universidat Nashonal di Antia.
Croes a bisa, ku prinsipalmente den e promé añanan di status aparte di Aruba tabata difísil, pero a logra pone tur kabes huntu pa pasa e temporada difísil. Croes a bisa, ku e ta kontentu ku e tabata parti di e proseso ei (komo minister di AVP na Aruba).
“Kisas mi ta kreando e impreshon ku nos kier gaba i ku nos ta broma ku loke a logra den e promé añanan di Status Aparte na Aruba, pero no ta p’esei awe nochi mi ta trese e kosnan aki pa dilanti. E úniko motibu ku mi ta trese e kosnan aki padilanti ta, pasobra mi ta spera ku tur hende aki na Kòrsou por hasi nan mes un pregunta. Un solo pregunta.
Esta e pregunta ku si Aruba bou di kondishonnan hopi mas malu ku Kòrsou, por a logra, anto ta di kon Kòrsou si lo no por logra hasi su Status Aparte un éksito. Ami en todo kaso no ta mira ningun, ningun motibu válido pakiko Kòrsou lo no por logra pa hasi meskos òf mihó ku Aruba a hasi mas ku 20 aña pasá. Kòrsou tin e mesun potensial humano ku Aruba. Aki na Kòrsou mes. Pero tambe na Ulanda. Na Ulanda mi konosé un grupo grandi di studiante di Kòrsou ku hopi bon idea, ku kreatividat, ku hopi idealismo i ku hopi, hopi gana di aportá na desaroyo di nan isla. Amigunan: si Aruba tabata por anto Kòrsou tambe por. P’esei mi ta spera ku na konklushon di e diálogo aki, ora ku tur hende ta morto kansá despues di a diskutí henter un dia riba tur e kondishonnan pisá ku Ulanda a pone, a diskutí riba tur e problemanan, riba tur e kontratempunan ku e Status Aparte di Kòrsou lo bai konfrontá i riba ta ken mester karga e kulpa pa tur e problemanan aki, mi ta spera ku mañan despues ku tur hende nan kabes ta yen di tantu kontratempu, ku Kòrsou lo bai enkontrá un hóben lo por lanta para i grita meskos ku Barack Obama ta hasi na Merka: “Yes we can; Si nos por!” Òf un hóben lanta for di kualkier skina i grita, meskos ku nos tabata grita 22 aña pasá, ban konstruí un Kòrsou nobo. Lagami terminá felisitando pueblo di Kòrsou ku su Status Aparte i felisitá tambe en partikular sra. promé minister Emily i deseá sra. Emily hopi forsa i hopi pasenshi. Kòrsou hopi éksito”, asina Croes a bisa.

WILLEMSTAD – Kòrsou a selebrá ayera nasementu di diferente yuchi. Kontrali na 1 di yanüari kaminda e promé yu ku nase ta haña tur atenshon, ayera tur yuchi ku a nase a haña mes tantu atenshon. Tur ta yunan nasé den un aña bisiesto i riba e fecha mágiko 29 di febrüari. E fecha akí ta mágiko pasó ta 1 bia den kada kuater aña febrüari tin 29 dia.
Ya ta algun mil aña kaba ku 29 di febrüari ta un dia spesial. Kisas por yam’é un dia bisiesto pasá ta den un aña bisiesto so e luna di febrüari tin 29 dia. Komo ku un aña no tin eksaktamente 365 dia, sino 365 dia, 5 ora, 48 minüt i 45,1875 sekònde, a tuma e medida pa introdusí e dia èkstra akí kada 4 aña. En prinsipio e ‘dia bisiesto’ akí tabata un dia sin number meimei di 23 i 24 di febrüari. Despues a disidí di añadí un dia èkstra ku a bira 29 di febrüari. Hendenan ku nase dia 29 di febrüari konsekuentemente por selebrá nan kumpleaño solamente 1 bia den 4 aña ofisialmente riba dia di nan nasementu. E yuchinan ku a nase ayera pa e motibu ei por a konta riba un tiki atenshon èkstra.
Na Fundashon Duna Lus a nase 4 yuchi ayera. Nan ta Roweandrick Gibbs (mucha hòmber) ku a nase 10.35’or i a pisa 3240 gram. E mama ta Evelyn Gibbs i e partera tabata Agnes Cobelens. E di dos yu a nase 12.27’or i no tin nòmber ainda. El a pisa 3640 gram. E mama ta Solange Schoop-Maduro i e partera tabata Edna Matroos. E di tres yuchi a nase 13.38’or i tampoko tin nòmber ainda. El a pisa 3560 gram. E mama ta Marjanella Jozef i e partera tabata Edna Matroos. E di kuater yuchi ku a nase tabata e úniko mucha muhé. El a nase 16.12’or i a pisa 3625 gram. Su nòmber ta Charinel Lake i e mama ta Zugedi Lake. e partera tabata Lucy Whiteman.

WILLEMSTAD – Polis ta informá ku un kantidat alarmante di pakete ku pòstkantor ta risibí, regularmente ta kontené droga. E paketenan ku ta destiná pa eksterior den hopi kaso ta entregá dor di hóbennan ku, probablemente ta víktima di manipulashon.
E paketenan, segun polis, ta kontené droga skondí den bleki, saku di mangel, bòter ku líkido, deodorante i diferente otro artíkulo. Polis ta preokupá ku e echo ku, den hopi kaso ta trata di hóbennan ku ta hiba e paketenan pòstkantor. P’esei polis ta atvertí tur hende pa ta kouteloso ora nan tuma un pakete serka un otro hende, pasó e ta responsabel si e pakete ta kontené droga. Kòntròlnan severo na aeropuerto Hato a pone ku transportadónan di droga a bira hopi kreativo i nan ta buska tur manera pa sigui ku nan negoshi di droga.
No ta na Kòrsou so droga ta un problema. Na Ulanda aña pasá un miembro di Marechaussee a pèrdè su trabou ora a detené ku 26 tablèt di xtc. Marechaussee tabatin un mal aña na 2007 ora 54 di su miembronan a pèrdè trabou pa motibunan di integridat. Bou di esnan ku a pèrdè nan trabou tabatin asta algun ku tabata den nan periodo di preparashon. E kuerpo ta konsistí di 6.500 miembro.
No ta poseshon di xtc so tabata un di e motibunan serio pa retiro. Polis a detené un otro marechaussee ku tabata manehando su outo bou di influensia di alkohòl. Un total di 35 marechaussee a pèrdè nan trabou pa motibu di faltamentu ku integridat. Serka marechaussee e drèmpel di integridat ta poné hopi mas haltu ku serka otro departamentunan di forsa armá. Humamentu di mariwana por ehèmpel dor di un marechaussee ta pone ku e ta pèrdè su trabou mes ora.