ORANJESTAD — E siman aki e studiante nan di e Facultad di Hospitalidad y Turismo a ricibi un lectura tocante e projecto di Aruba Reef Care Project. Ariba invitacion di professor Sr. John Wardlaw a duna un lectura ariba e tema “Aruba Reef Care Project” . E lectura tabata ensera e necesidad pa conscientisa comunidad ariba e importancia pa proteccion y preservacion di bida marina. Sr. Castro Perez di Aruba Reef Care Project a presenta e obhetivo, mision y vision di e projecto. Ademas a ricibi splicacion di tur loque ta ensera e bida marino di Aruba y e importancia di un bon maneho di nos lama y beachnan. A discuti e posibel danjo of menasa cu por afecta nos bida marino, y ejempel nan cu a ser duna ta entre otro: danjo natural, accidental, sobre desaroyo, desperdicio industrial, y awa di riolering cu ta bai den lama etc. Esey nan ta algun desarollo cu por afecta negativamente e calidad di nos rif, mangrove, beach y lama rond di Aruba.

A duna un impresion di con Aruba a desarolla economicamente for anja 1985 te awor aki. A mustra ariba e cantidad di camber di hotel cu a crece, e poblacion cu a subi di 60 mil pa 100 mil, 200 mil turista pa mas cu 1 million y nos naturalesa y medio ambiente a keda atras. Pero di otro banda a ser presenta tambe e aspecto nan positivo cu e ultimo anja nan varios organisacion ambiental a bin cu iniciativa pa conscientisa nos comunidad ariba importancia pa cuida nos medio ambiente. A bin mas accion di limpiesa, campanja di concientisa, a focus mas ariba turismo sostenibel, maneho di zona costero (coastal zone management) y tin plan pa mehora nos beach pa asina Aruba por ricibi e certificacion di “Blue Flag”. Semper ta keda e deseo pa Aruba haya un parke marino, pa asina por garantisa proteccion di nos rifnan y beach. Por tuma nota cu gobierna a bin cu hopi desarollo positivo con pa maneha nos desperdicio. Por ultimo gobierno a bin cu e medida pa elimina uso di saco di plastic. Varios NGO’s semper tabata boga pa elimina uso di saco di plastic, pa motibo cu e ta hasi hopi danjo na nos medio ambiente. E studiante nan a wordu informa cu e anja aki Aruba Reef Care Project ta cumpli 15 anja di existencia y dia 5 y 6 di Juli, 2008 Aruba Reef Care ta organisa otro grandioso accion di limpiesa.

Considerando circumstancianan exepcional di e caso

Leynan local y di reino hulandes, pero sigur tambe principionan di periodismo responsabel, no ta impedi un planta di televishon pa re-transmiti un reportahe traha cu ‘camera scondi’ of declaracion di un hende graba sin su conocemento. E conclusion aki por yega n’e despues di un revision municioso di nos leynan civil aki na Aruba, esnan di reino hulandes, pero tambe hurisprudencia den casonan cu a aparece dilanti di e ‘Conseho di Periodismo”di Hulanda, conoci den lenga hulandes como “Raad voor de Journalistiek’. Cu otro palabra, e argumento pseudo huridico di gerencia di TeleAruba pa no a pasa e programa ‘Un dia den Bida’ produci pa Poentje Castro no tin muchu validez.
E argumento pa no pasa e programa pa motibunan huridico no tin muchu validez pasobra na prome lugar, transmicion of no di e programa no por ta basa ariba argumentonan huridico sino periodistico. Esaki pasobra den mundo di television y radiodifusion ta un hecho cu tur hende cu bai di acuerdo pa haci un entrevista, mester realisa cu e loke e bisa, tanto PROME, DURANTE of DESPUES di e entrevista por y ta worde graba y cu tur loke e persona bisa of haci por y ta worde usa periodisticamente. Un ehempel cla di esaki ta e afamado programa na television hulandes, ‘Pauw & Witteman’, unda despues cu ‘oficialmente’ e transmision a termina, Joran van der Sloot a tira un glas di biña den cara di e periodista investigador, Peter R. de Vries. Aunke productornan di e programa aki a cuestiona e forma con otro canalnan di television a haña e material videografico, nan no por a haci nada nada pa stroba su re-transmision den otro programanan di noticia.

ORANJESTAD- Un biaha mas manera ta custumber a avionnan remote control ta kla pa start sali cu competencianan y tambe shownan durante e dia di Himno y Bandera.
Esaki lo bay tuma lugar riba nan pista na Golfweg (patras di Golf Club) San Nicolaas y lo cuminsa pa 10or di mainta y entrada ta gratis.
Ta bay tin competencia di Funfly manera "Sudden Death" y tambe "Lucky 7" y algun demostracionnan manera di jet, helicopter y mucho mas.
E aña aki pa promer biaha lo bay organisa un competencia di "Scale".
Esaki ta un competencia di avionnan cu ta mescos di berdad, pero den miniatura y mester por lanta, bula y baha bek manera un avion di berdad.
Na final di e competencia aki e publico mes lo hanja e oportunidad pa jusga e avionnan aki, anto esun cu mayoria aplauso lo gana e competencia aki.
Lo bay tin opurtunidad pa publico saka potret y tambe hanja informacion riba e avionnan aki.
Aruba Radio Control Club a caba di eligi su directiva pa aña 2008 cu a keda como president Luis Oduber, Vice-president Aldrin Wever, Secretario Rubin Ponson, Tesorero Jurgen Benschop y Comisario Danilo de Freytas.
Directiva ja a traha nan programa pa 2008 asina hasi cu e actividadnan ta na caminda y cu hopi sorpresa.
Tambe ARCC a caba di launch nan website nobo www.arubarc.com cu diferente informacionnan y tambe potretnan di e actividadnan. Esaki sigur ta danki na Jairo Oduber pa e bon trabou riba e website aki.
ARCC kier a invita tur hende pa bishita nan website pa asina mira e actividadnan cu ta na caminda anto tambe invita pueblo di Aruba pa bin celebra dia di Himno y Bandera riba nan tereno cu bunita show di avionnan remote control.

ORANJESTAD- Tur dia nos por tende e profetanan di disaster y opositornan politico di MEP ta yora cu pueblo cu Gabinete Oduber IV y su Minister di Turismo y Transporte ing. Edison Briesen no ta haciendo nada pa eleva e industria di turismo y cu e industria aki ta biniendo abao poco poco.
Sinembargo e realidad ta cu aña 2007 a cera cu un crecemento di nos turismo cu 8.6% y esaki compara cu 2006.
Alavez cada vez mester tende for di boca di e mesun profetanan aki cu e turismo crucero ta cayendo den otro, ya cu e barconan grandi no ta bishitando nos isla mas. Sinembargo den e ultimo siman- y lunannan nos por mira con tur siman nos waf kedando demasiado chikito pa carga e gran cantidad di crucero cu ta bishitando nos isla.
Diasabra mes dia 8 di maart ultimo Aruba a manece cu 4 crucero grandi mara den waf di Playa. E cruceronan aki ta yama: Aida, Brilliance of the Seas, Holiday Dream y Delphin. Riba e potretnan adhunto y saca diasabra mainta por mira tur e 4 cruceronan aki.

ORANJESTAD- Simar a ricibi diferente keho di maestronan, sobre todo maestronan nobo den mundo di enseñansa di intimidacion dor di nan cabezante o director. E cabezante o director ey acaso a lubida cu e mes ta trahador, cu e tambe ta den e mesun boto ?
Simar ta lamenta e actitud aki y ta respeta nan escohencia pa no lanta para pa un lucha cu ta toka nan tambe. Nan ta scohe pa otro para pa nan y esey ta nan derecho. Pero esnan cu si ta mustra cara, cu si ta den e lucha mester haya respet pa nan escohencia. Respeta nan corahe pa para y haci diferencia.
Mayoria di nos tin 7 aña ta perdiendo no solamente placa, pero nos calidad di bida, pa motibo cu nos salario no ta wordo ahusta.
Un maestro , cu 38 aña die dad ya a yega su maximo y no tin ningun otro ahustacion, si no ta ahustacion pa causa di subimento di costo di bida. Nos tur ta sinti den carni propio cu tur cos ta subi y subi: Di preisnan den comercio te nan nos peso di trabou. Nos salario, cu ta compensacion pa nos trabou y cu tin cu duna nos un forsa di compra razonabel si no ta cambia!
Maestronan nobo no mester perde for di bista, cu nan tambe ta gozando di atv-dagen, y e otro compensacion, cu bon mira no a toca nan . Ta acuerdonan cu a sali for di lucha pa ahustacion di salario y cu a keda ancla den protocolnan firma cu gobierno.
Pues dor cu esnan, cu e termpo ey a para firme pa nan derecho y a sacrifica pa awe nos tin mihor salario, benificio y diferente compensacion.
Maestronan no laga ningun hende intimida bo, keda cu e corahe, cu semper bo a demonstra. No perde bo tempo cu esnan cu no tin e corahe, cu no tin e determinacion pa para pa nan mesun futuro, pa nan mesun calidad di bida.

WILLEMSTAD – Algun di e argumentunan ku S.K.S. a usa den nan komunikado pa prensa siman pasá, pa hustifiká nan akshon dilanti di Fundashon Kas Popular, no ta kuadra ku e realidat ku tin riba kaya na Kòrsou. S.K.S. a emití e komunikado despues ku LA PRENSA a kuestioná un kòntròl, durante kua nan a pone klèm di wil pa diferente outo stashoná dilanti di F.K.P. na Skalo.
Un di e puntonan ku S.K.S. ta trese dilanti pa defendé nan ponensia ta ku, artíkulo 49 di e ordenansa di tráfiko 2000, ta papia di un obligashon pa stashoná outo únikamente na man drechi di kaminda. LA PRENSA a kapta algun foto di situashonnan kaminda tin outonan stashoná na man robes di kaminda, miéntras ku tantu D.O.W. komo S.K.S. ta pèrmití esaki. D.O.W. a asta marka e lugá kaminda e outonan por stashoná nan man robes i SKS a aseptá esaki. LA PRENSA tin ku konstatá, ku S.K.S. ke defendé su ponensia ku un lei ku probablemente no ta konta tur kaminda na Kòrsou. E fotonan ta saká den e kayanan kaminda tin e kasnan di polis patras di Recreation Park. Tambe tin algun foto saká den Kaya Grandi di Otrobanda.
Un otro argumento di SKS ta ku, e konsepto di ‘werkingssfeer’ ku LA PRENSA a usa, no ta eksistí den nos lei di tráfiko. Den e ‘Memorie van Toelichting’ ku ta kompañá e Ordenansa di Tráfiko 2000, tin skibí: “Op grond van de hierboven genoemde argumenten werd het raadzaam geacht de Nederlandse verkeerswetgeving als uitgangspunt ten grondslag te leggen aan de nieuwe Wegenverkeersverordening Curaçao, doch de verdere uitwerking ervan is sterk gemodelleerd aan de plaatselijke gebruiken en de jurisprudentie op dit gebied.” E pasashi akí ta indiká ku nos leinan di tráfiko ta originá di e leinan ulandes i komo tal tin e mesun aplikashon ku esunnan ulandes. E fenómeno ‘werkingssfeer;’ tambe!

Skina di Sorti, awe djaluna 10di mart di 2008, ta kuminsá ku deseá un i tur un bon dia. Sakamentu di konklushon tin di tuma lugá a base di e kuadro den kual tin di pone e informashonnan relevante (tin influensia riba senario den futuro) i signifikante (e implikashon ta unu ku tin efekto supstansial riba e senarionan). Den polítika dimenshon di sosten (“draagvlak”) i su dinámika (kon e ta kambia) ta informashon relevante i signifikante. Pues e tendensia di popularidat di promé minister Emily de Jongh-Elhage i su oponentenan ta informashon relevante i signifikante pa es ku ke plantia strategia ku probabilidat grandi di éksito.
****
Riba un opservashon di un lektor, riba mi ponensia ku e movida stratégiko ku esun ku ta karga signatura di gobièrnu (Emily de Jongh-lhage di PAR) mester hasi, ta di amplia base di su koalishon entregando puestonan ehekutivo, mi ke kuminsá na ripití pa di tantísimo bia, ku kende tin rason den nan punto di bista riba e proseso estatal no ta relevante (pues kon ami ta pensa riba dje, òf si esnan ku a mobilisá akadémikamente tin hopi punto di rason, no ta relevante). Nos ta den polítika i einan ta elektorado ta disidí (“draagvlak”!!!!)
****
Konsekuentemente e faktor determinante pa mi ponensia ta sinta den e sosten ku Emily de Jongh- Elhage tin riba e oponentenan, ku algun evidentemente den un kaida di “stervende zwaan”. E siguiente faktor determinante ta sinta den e echo ku den e oponentenan ku tin representashon den Parlamento i Konseho Insular, no tin partido ku pa punto di prinsipio ankra den nan statutonan (kumplimentu ku prinsipio manera mi a mustra ta un punto sumamente suak den nos práktika polítiko), ku ta hasi un posibel entrada den koalishon imposibel.

CARACAS, - Abogado di narkotrafikante Hermágoras González Polanco, Freddy Ferrer Medina, a indiká ku su kliente a keda detené di manera “ilegal”, pasobra no a kaptur’é ora e tabata kometiendo e delito.
E abogado a señalá ku Polanco ta venezolano i no di nashonalidat colombiano.
Ferrer Medina a indiká ku e kredensialnan di Guardia Nashonal i DISIP ku tin Polanco a keda otorgá pa komandansia.
E abogado a bisa ku e tin kopia di papel di nasementu, estudionan i programanan edukativo di Polanco.
“Sertifikadonan di institutonan edukativo ora el a studia den bachillerato na Zulia”, e abogado a sigui splika.
Ferrer a señalá ku e ta’tin kredensialnan venezolano pasobra e tabata dediká na eksportashon di krio di bestia, lechi i karni.
“E ta trahando, e no ta skondiendo”, e abogado a sigui bisa.
E abogado a splika ku su kliente a keda detené na finka La Trinchera na sùit di Lago i e akshon ta kontra artíkulo 44 di Konstitushon nashonal.
El a señalá ku e akusado si ta buská pa Interpol i e tin un Sirkular Kòrá, manera polisnan internashonal ta definié.
E abogado a ekspresá ku e akshon ta estriktamente polítika, “ta un skandal polítiko, nunka el a skonde pa Interpol. A tuma su deklarashon den mi presensia”.
El a señalá ku p’e i famia di Polanco ta parse nan sorpresivo e vínkulonan ku ta establesiendo González ku narkotráfiko i el a insistí ku si e órganonan tin pruebanan i elementonan ku por komprometé su kliente den algun di e delitonan, ku esaki mester keda prosesá.

TUCSON, ARIZ., - E mènèdjer di Chicago White Sox, Ozzie Guillen, ku nunka no tin miedu di bisa algu ku e tin na su kurason, den un entrevista ku ESPNdeportes.com ta defendé kultura latino.
Guillen ta katalogá komo rasismo e notisia ku a sali un par di luna pasá na Merka ku e picher di Mets, Pedro Martinez i e miembro di Salon di Fama, e picher dominikano, Juan Marichal a sali riba un video na un pelea di gai na nan pais.
“E kos ei ta rasismo. E kos ei ta nos kultura i niun hende no por kita nos kultura for di nos, ta nos forma di ser”, asina Guillen a bisa.
E mènèdjer venezolano ta señalá ku ta inhustu kompará pelea di gai ku pelea di kachó di Merka. Pelea di gai ta legal i ta ser praktiká popularmente, miéntras ku pelea di kachó na Merka ta prohibí.
“Nos kultura ta diferente. Nan ta pone e pela di gai den e mesun rosea ku e pelea di kachónan kaminda Michael Vick tabata enbolbí”, asina Guillen a agregá. “Aki no tin pelea di kachó. Na Repúblika Dominikana, Venezuela i Puerto Rico, pelea di gai ta permití i ta nos kultura, niun hende no por kita esaki for di nos”.
Resientemente Michael Vick, un hungadó di futbòl merikano, a keda kondená na prizòn pa motibu di tabata organisá pelea di kachó i tabata kria kachó pa bringa.
Na Merka nan a pasa un video kaminda ku Martinez i Marichal ta laga dos gai kuminsá un pelea na Repúblika Dominikana.

CASPER, Wyoming, Merka, - Despues di pèrdè siman pasá djamars na Ohio, Texas i Rhode Island, a deklará Barack Obama vensedó na Wyoming, un estado di mayoria republikano, pero kaminda e demókratanan djasabra último den forma masivo a sali pa vota pa nan kandidato.
Obama a optené 61% di e votonan i Clinton 38%, i asina Obama a frena euforia di Clinton.
Wyoming, ku apénas 13 delegado den disputa, a uni i bira shete pa Obama i sinku pa Hillary Clinton, alargando ainda mas tantu e drama elektoral demókrata.
E triunfo aki atrobe a demostrá kon bon e kandidato ta sali for di e “caucos” (asambleanan partidista lokal).
Ku esaki, Obama a logra 13 viktoria.
E votashon benidero lo bai tuma lugá djasabra awó na Mississippi.
Clinton, ounke a kuestioná poder di representashon popular di e “caucos”, tampoko kier a laga tur kos den man di Obama, i den último dianan a move ku su esposo Bill Clinton i nan yu muhé Chelsea pa informá riba plan di Gobièrnu den kaso si e keda eligí Presidente di Merka.
Meimei di akusashonnan di ámbos parti, e kampaña ainda tin seis siman mas promé ku yega Pensilvania, e otro gran estado kaminda ta spera ku lo bai realisá e delantera sufisiente pa un di e dos prekandidatonan demókrata, ku e meta di keda lansá den kompetensia pa nominashon.
Den tèrminonan matemátiko, Obama kómodamente ta enkabesá e karera demókrata ku 1.578 delegado i Clinton tin 1.468 skohé atrabes di voto.

E aña aki a otorgá pa di tres aña konsekutivo e 2008 Outstanding Woman Award kual rekonosementu a bai pa e gran Mila Palm.
Otorgamentu di e rekonosementu a tuma lugá durante di e di sinku konferensha anual pa hende muhé ku a tuma lugá den fin di siman último na Kòrsou ku tabata e konferensha ‘About Women and Health’. E konferenshanan aki ta tuma lugá tur aña den e promé fin di siman di mart i ta den kuadro di e konmemorashon mundial di Dia Internashonal di Hende Muhé.
E organisashon di Bright Ideas & Services a bini ku e rekonosementu aki den kuadro di otro proyekto pa dokumentá nos historia i pa duna rekonosementu na hendenan ku riba nan tereno a kontribuí di un forma òf otro direktamente na bienestar di hende muhé i nan famia. Mila Palm ta kontinuá den e rei di muhénan ekselente ku tabata na 2006 Nilda Juliana i na 2007 Zelma Maduro.

E rekonosementu e aña aki pa Mila Palm ta unu hopi bon i meresí. Mila Palm ku ta bai kumpli e luna aki 72 aña di bida, ta un hende muhé profeshonal ku a traha durante di su karera ku mucha i hendenan muhé i ku segun testimonionan tabata masha inspirante pa hopi di nan. Su influensia tabata pone ku hopi hende muhé ku na mas hóben no a bai skol pa kualke rason òf otro, a disidí na bai siña i di kua tin vários ku awe tin trabou di responsabilidat den nos komunidat.
Otro hende muhé ku el a toka i ku tabatin yu chikitu a haña guia pa nan tuma bon desishon pa nan yunan i naturalmente pa nan mes. Tambe Mila Palm tabata envolví den profeshonalisamentu di sistemanan pa atendé ku yunan chikí pa mamanan ku mester traha.

WILLEMSTAD – Awe Colon Shopping Center ta kumpli 35 aña despues di e di dos kandela ku a destruí e kompleho komersial aki. Awe vários negoshi den e kompleho komersial den Otrabanda aki ta di fiesta. Negoshinan ku ta selebrá nan di 35 aniversario ta Wayaca, Botika Otrabanda huntu ku algun negoshi mas. LA PRENSA awe lo ke para ketu na trese den publisidat e selebrashon di 35 aña di un empleado ehemplar ku tambe a selebrá 35 aña trahando na Wayaca ku ta sra. Glenda Janze.
Pa esnan ku sa bai bebe sòpi den Wayaca, mester por konosé Glenda Janze, ya ku e kariño ku semper a bin dilanti den su trabou ta hasi ku niun hende no por lubidá riba e persona. Glenda Janze durante 35 aña a hasi su trabou ku mes amor i semper a gana apresio serka klientenan. Sin duda ku Glenda Janze ta un figura ehemplar ku por wòrdu usá pa su perseveransia, loyalidat i konfiansa pa ku e doñonan di Wayaca.
Glenda Janze a traha bou di direkshon di mayornan di Ana da Silva Gois, kende awe ta fungi komo gerente. Por kòrda tempunan ku a kuminsá ku e negoshi aki, Ana mes tabata mucha i tabata e otro rumannan Joe i Antonio tabata yuda nan mayor den e negoshi. Awe a toka Ana da Silva Gois pa felisitá Glenda Janze i tambe entreg’é un ènvelòp pa e 35 añanan di labor sirbiendo klientenan.
Komo sirbidó Glenda Janze, un dama semper nechi i puntual den su trabou, mester ta un forma pa mustra ku por kere den nos propio hendenan. Masha poko por haña un persona den e ramo di trabou aki ku por selebrá 35 aña trahando den sirbishi. Glenda ta demostrá ku trabou no ta mata niun hende i no mester tin bèrgwensa pa traha. I manera e mes a bisa, bo mester ta stima bo trabou pa hasié ku amor. Aparte ku Colon ta selebrá 35 aña, Wayaca 35 aña, Glenda ku su 35 aña den servisio, Wayaca tambe tin 35 aña ku LA PRENSA.

WILLEMSTAD – Honesto i práktiko tabata e guia ku e sikólogo Paula French a duna na partisipantenan di e Konferensha Anual ‘Muhénan Ekselente’ di Iglesia Grasia Abundante (IGA) pa selebrá 8 di mart, e Dia Internashonal di Muhé. E tópiko ku a ser tratá durante e konferensha riba djabièrnè 7 i djasabra 8 di mart tabata ‘Relashonnan signifikante’.
French a elaborá riba e tema aki, ilustrando bida di dos muhé bíbliko ku a biba dos bida opuesto: Maria ruman di Marta, ku tabata stima Hesus i Mikal, kasá di Rei Saul. Kaminda e promé tabata bondadoso i kariñoso, manera un zeta perfumá, e di dos tabata yalurs, renkoroso i amargá, manera venenu pa su mes. French a relat’é e kualidatnan opuesto aki na e dos mandamentunan prinsipal ku Dios a duna na hende: stima E i stima bo próhimo. Pues ta Dios mes ke pa nos desaroyá relashon signifikante: kunÉ mes, i ku otro hende rondó di nos.
Ku ehèmpelnan kontemporáneo, vários bes hasta for di su eksperensia personal, el a mustra kon kada muhé na su manera tur dia ta hiba un lucha pa kumpli ku e mandamentunan ku Dios a duna. Si nos no paga tinu i keda sin kumpli, simplemente ta káos lo reina den nos bida! E ehèmpel di Mikal, kasá di Rei Saul ta ilustrá esei klaramente.
Den grupo chikitu e partisipantenan a papia kiko ta stroba nan den nan afan pa mantené relashonnan signifikativo ku otronan. Puntonan manera sufrimentu òf malesa, un bida drùk, kansansio i problema por kousa distansia. I situashonnan ku por daña i hasta kibra relashonnan: orguyo, sinismo, sarkasmo, spiritu di huzga i kondená i spiritu será.

WILLEMSTAD – Fundashon pa maneho di Adikshon (FMA) a hasi entrega di sertifikado Peer Educator na 7 hóben ku lo bai kuminsá duna informashon riba droga. Tabata djabièrnè ku FMA a entregá e sertifikado na e hóbennan ku a partisipá na e promé kurso di Peer Educator. Durante di e kurso aki a trein e hóbennan pa duna informashon tokante di droga i adikshon na otro hóbennan. E preparashon ta konsistí básikamente di konosementu dje materia, treinen di habilidat pa papia i e parti práktiko kaminda hóbennan a duna lès di instrukshon na klasnan di skol básiko i skol avansá.
Awor ku nan a kaba nan preparashon, e hóbennan aki sistemátikamente lo bishitá skol i otro instituto hubenil pa duna informashon tokante droga i adikshon. E 7 hóbennan a tèrminá nan kurso ku éksito ta Juliska Manuela, Terèse Balootje, Edjon Lacroes, Mylène Luisa, Fisenthly Passial, Dayenne Sernavie, Jennifer Statia i Luviennne Coupain. FMA próksimamente lo kuminsá ku e di dos kurso di Peer Educators pa prepará hóbennan pa duna informashon na otro hóben.

WILLEMSTAD – Sindikatonan ta spera riba un reakshon formal di parti di gobièrnu promé ku duna un punto di bista mas kla rondó di subida di preis. En bèrdat por a skucha ku gobièrnu lo wanta ku e oumento di 10 sèn riba preis di kombustibel, pero si no tin un reakshon formal, esaki no ta hasi ku sindikatonan por keda trankil.
Den kombersashon ku Nacho Ignacio di ABVO ta duna di konosé, ku mester warda riba e reakshon, ya ku por tin dos tipo di reakshon di kua unu no ta esun satisfecho ku e sindikatonan ta deseá. E senario ku mas e sindikatonan lo ke mira ta esun pa yega na un diálogo pa atendé na un manera serio i struktural e asuntu di energia i tambe e poder di kompra. E último aki e trahadónan, penshonadonan i desempleadonan ta sufri bastante bou di dje i ta motibu pa buska alternativa kontra e influensia aki lokalmente.
E diálogo mester kondusí tambe pa yega na tin un maneho struktural ora ta trata di subida i bahada pa medio di un mente trankil. No ta kuestion di yega na alternativanan pa preis di kombustibel, pero tambe riba alimento i tambe e ambiente den kua mester determiná e kalidat di bida. Sindikatonan ta kere, ku a yega momentu pa gobièrnu skucha nan, apesar ku nan no ta pretendé di tin e solushon ku por kambia kos, pero pa medio di diálogo si por tin alternativanan ku e pueblo lo por sinti su mes kómodo kuné.
For di 2005 sindikalismo a hasi ehersisio pa krea un rapòrt pa atendé ku maneho energétiko i e konsekuensianan riba e gremio sosial. Pero no a aseptá na un manera serio pa gobièrnu atendé ku e partnernan pa duna oportunidat pa duna aporte na konstrukshon di e maneho aki. Na e momentunan aki gobièrnu ta bolbe haña e oportunidat pa karga ku nan responsabilidat pa yega na alternativa ku mente habrí pa yuda un parti aliviá e situashon, miéntras ku di otro banda konsientisá e pueblo pa yuda nan tambe karga ku nan responsabilidat.

A kuminsá estrená kansionnan den programa Mas Bida Abundante:

WILLEMSTAD – Konsierto “Laga nos ta un” ta na punto di kibra rekòrt di mas di 8000 persona di “Candela que se mantiene I” ku Funky Town a marka riba Brionplein. Ya e siman aki a kuminsá presentá e kansionnan ku lo bai keda interpretá den konsierto gospel “Laga nos ta un” den programa Mas Bida Abundante. Esaki komo un forma di antesala pa e públiko por prepará nan mes i sa tambe kua ta e kansionnan ku lo bai keda interpretá den Curaçao Festival Center. E agrupashonnan a risibí 3 kansion pa nan por prepará nan mes pa presentá durante e anochi aki. Tres kansion konosí den nan mayoria ta trata di kansionnan di agrupashonnan gospel lokal ku lo bai keda interpretá.
Agrupashon Guess apesar ku nan ta ensayá e kansionnan risibí for di Ministerio Bida Abundante, nan tin un komposishon ku nan a lansa resientemente ku lo bai keda estrená dia 20 próksimo den e konsierto. Segun deklarashon di Norwin Josepa di Ministerio Bida Abundante ta splika, ku e kansionnan ta netamente un direkshon ku Dios a dun’é pa entregá na e gruponan pa nan por presentá nan mes.
Josepa ta splika, ku na momentu ku a haña konfirmá pa hasi e konsierto aki, a risibí un mandato tambe pa entregá e kansionnan na e gruponan. Inkluso asta e kansionnan ta direkshon di Dios pa kada agrupashon. Kada kansion ta kai den e estilo di e agrupashon, motibu pa kua sa delantá ku e públiko lo bai na kanta huntu ku nan durante e anochi aki.

REGALES
Jean-Pierre Felipe
Mihó konosí komo Pipo
A laga atras su mama Baby Regales, rumannan Diomara Regales, Raycheline Sling, Frank Boye, tanta i tionan Ria Regales, Marisela Regales, Xiomara Maria, Jeritza Paulina, Cheryl Maria, Jacqueline van Eindhoven, Solange Mooring, Mariola, Sharlice, Sholine Maria, Boys Regales, Samuel Casseres, Cedrick Casseres, Tyrone, Edson, Roland Maria, namorada Jadienne Dal i famia. Akto di entiero ta djarason 12 di mart 4.30or for di Bottelier pa santana Bottelier. Bishita 1or. Promé ku entiero tin un sirbishi. Trahe Alegre.

CASTILLO
Roberty Francisco (repentino 65 aña)
A laga atras su kasá Edna Castillo-Schoop, yunan Angélo i Regala Castillo-Maria, Roberto Castillo, ñetunan Reangelo Castillo i Dayenne de Windt, Stephanie Castillo, Timothy Castillo, suegra Maria Schoop-Jakobus, rumannan Carlos, Richard, Raymundo Castillo. Akto di entiero ta djamars 11 mart for di misa Coromoto pa santana Sta. Maria. Bishita 9or-11or. Promé ku entiero tin un s.s. di misa.

LA CRUS
Lidio Mateo (repentino)
Mihó konosí komo Livio eks trahadó di Princess Beach i Kentucky
A laga atras su mama Angela La Crus, yunan Angelo La Crus i India Nique, Urly la Crus, rumannan Solange La Crus, Sedney La Crus i Roselin Mayor, Lorraine La Crus i Juan Carlos De la Crus-Martes, Ramon la Crus i Xiomara Girigorie, Rayshall La Crus, Magalian La Crus, mama di su yunan Joyceline Laken. Akto di entiero ta djaweps 13 di mart for di El Consolador pa santana Roodeweg. Promé ku entiero tin un respòns 3.30or. Bishita 12or. Trahe alegre.

Lorito ta yama tur hende un felis djaluna. For di momentu ku Lorito su ala a hak den e sintanan di un baile di sinta, nos kurpa ta due. Masha dushi mes tabata pa mira un baile di sinta i mira Yves Cooper baila. Masha aplouso Yves a haña pasobra manera nos a bisa nunka ántes un hende no a sali for di no sa nada di bailamentu i presentá den un ouditorio grandi. ¡Vaya hermano!
****
Te awor aki ku nos ta skibi Lorito nos no a haña ni un frase di palabra di PAR kon a para ku e deliberashonnan riba nombramentu di Chebu. PAR ta demostrá un biaha mas ku su problema mayó ta falta di komunikashon. Sikiera e presidente por a skibi un karta ku ta bisa: “PAR a deliberá riba e asuntu aki i lo tin mas informashon despues”. Pero nada!
****
Nos no ta komprondé e pensamentu di Do ku un hende ku mester traha den un sierto área mester konosé e área ku e ta bai traha aden. Masha tempu mundu no ta funshoná asina mas. Bo mester sa di maneho. Esei ta punto di salida. Ademas a kai masha malu atrobe ku ta papia di bai buska un ulandes oropeo. Aparentemente niun hende no kier realisá kon delikado e punto aki ta. Nos ta manda nos yunan bai studia, nos no ta kere den nan i finalmente otronan ta bin tuma nan lugá. Ora no tin hende nos por komprondé, pero tin yen, simplemente no por!
Pa refreská memoria di tur esnan ku ta sulfurá nos a bai buska algun ehèmpel di pasado. Mario Evertsz, konsiderá e krísis manager di tur tempu, a pasa di awa/koriente, bai Dòk i despues bai ALM/DCA. Piet Sampson a sali for di drechamentu di barku bai CTDB; Javier Hernandez for di petroli a bai duna konseho mil i un kaminda, Steven Martina a sali for di ingenieria di awa/koriente bai kaba den seguro, Zita Leito a pasa di telefonia, bai seguro i mundu bankario pa kaba pa awor aki den polítika. Agustin Diaz i Dito Mendes tabata mener di skol. Diaz ta eksperto di haf, Mendes eksperto di tur kos. Ke men, kiko ta e argumentu anto? Si tin otro kos, bisa nos i no “beat around the bush”. Esei ta transparensia!

WILLEMSTAD -- Fiansanan komersial (promé ku reserva) a krese ku 6,2%. “Nos ta orguyoso ku nos por a regla o duna finansiamentu na algun kompania i institushon importante den nos komunidat. Esei a inkluí hotèl nobo i ekspanshon di hotèlnan eksistente, detayistanan i sentronan komersial, kompanianan di material di konstrukshon i hardware, institushonnan di salú, kompanianan di utilidat i kompanianan di servisio den haf i di zona liber”, asina gerente general di e grupo Chicú Capriles a bisa.
For di e relato anual di MCB Group ta resaltá tambe ku fiansanan partikular (promé ku reserva) tambe a konosé un kresementu sano durante e aña i a subi ku 7.9%. “Nos a introdusí un sistema nobo outomatisá pa garantisá pago di fiansa, ku ta kla pa drenta na vigor na nos sukursal i supsidiarionan na e otro islanan, loke tabatin un impakto positivo i signifikante riba nos nivel di servisio i a redusí retraso i tempu di espera. Danki na direct mailing i fasilidatnan spesial pa gruponan spesífiko di merkado nos ta eksitoso den logro di nos meta di duna fiansa personal i hipotek”, asina Capriles a bisa.
Na 2007 MCB a otorgá na Kòrsou so kaba kasi 7000 fiansa personal nobo i fiansa pa outo, loke ta representá mas di NAf. 125 mion i a duna 423 hipotek nobo pa vivienda, loke ta representá un suma di mas di NAf. 74 mion. Durante e diesdos lunanan en kuestion MCB a duna na Kòrsou un total di 840 fiansa komersial nobo, loke ta representá un suma di mas di NAf. 300 mion. Esei a inkluí no ménos ku 530 fiansa na empresa chikí i 136 fiansa mikrofinansiero, segun e relato di MCB Group pa 2007.

WILLEMSTAD – Awe ta dos siman ku Fred Wiel a entregá su retiro komo Defensor di Pueblo i ketu bai no tin klaridat kiko ta bai pasa. Aparentemente ta buskando konseho riba e último desaroyonan prinsipalmente pa evitá ku a tum’é bèk na servisio violando reglanan ku e mes tin ku vigilá. E kos ta pegá te awor aki, ounke den Konseho Insular mayoria di frakshon ta kere ku e mester bin bèk.
Defensor di Pueblo, Fred Wiel ta na altura ku no ta tur frakshon a vosiferá nan opinion enkuanto su posibel regreso den e funshon di Ombudsman. “Loke ku mi ta sinti ta, ku no ta tur frakshon a ekspresá nan mes positivamente, klaramente i públikamente pa mi persona bin bèk den funshon di Ombudsman”. Wiel a bisa, di no ta spera ku e no ta gustá dor dje hendenan en kuestion, pasobra ku e ta hasi su trabou na un manera imparsial. ’Pasobra ta netamente esei ta e loke ku nan mester eksigí di un Ombudsman’. Wiel a enfatisá, ku un Ombudsman ta independiente i tambe imparsial. E mester ta independiente den su funshon i e mester ta imparsial den relashon ku tur hende.
Wiel a konfirmá, ku e ta na altura ku tin frakshon ku a keda ketu i ku no a opiná riba e situashon ku a surgi ku e posishon di Defensor di Pueblo. ‘Mi no tin problema ku esei, pasobra ta su derecho’, Wiel a bisa. Ademas, segun Wiel, den kaso ku Konseho Insular no logra haña mayoria sosten pa bisa Defensor di Pueblo regresá, e ta respetá esei. Wiel a splika, ku Konseho Insular ta representante di pueblo i ku e mester respet’é. ‘Si Eilandsraad no anunsiá ku e ke pa mi bin bèk a base di mi petishon, e ora ei mi tuma mi konklushon i mi ta buska algu otro di hasi. Lo mi no tin renkor tampoko, pasobra mi mester respetá e representantenan di pueblo’.