ORANJESTAD- Sport Boys “Valero” lo bai tin un grandioso torneo di Domino y Futbol e dianan 14, 15 y 17 di maart 2008 en coneccion cu celebracion 18 di Maart Dia di Himno y Bandera.
Dia 14 di maart lo bai tin Domino cuminsando pa 8’or na unda Urataka lo enfrenta Gianni’s (Gan.C).
Den futbol lo bai tin weganan di Veterano 40+ cual lo cuminsa 8’or cu e wega entre Maritimo contra Caravel (Gan. X) y despues pa 9:30 lo bai tin Sport Boys contra Toke Britania (Gan. Y).
Dia 15 di maart lo tin domino pa 8’or cual lo ta Solo Pueblo contra Bena di Koper (Gan.D).
Den futbol Damas lo bai tin 2 wega cual lo cuminsa pa 6’or entre Britania contra Bubali (Gan.A) y pa 7’or lo ta Savaneta Stars contra Santa Fe (Gan.B).
E weganan lo tin un duracion di 25 minuut pa banda.
Despues lo bai tin weganan di caballeros pa 8’or Atlantico contra Dos Caminos (Gan.I) y pa 9:30 Sport Boys contra Universal (Gan.II).
E weganan lo tin un duracion di 35 minuut pa banda.
Dialuna 17 di Maart lo bai tin e weganan final di e torneo. Promer cu esei lo bai tin un wega di competitie Junioren pa 6’or di atardi na unda Sport Boys lo enfrenta Dakota.
Despues di e wega lo bai cuminsa cu e weganan final na unda den damas pa 7:30 lo ta entre Gan. A contra Gan. B.
Pa 8:30 lo bai tin wega di Veterano 40+ entre Gan. X contra Gan. Y.
Den Caballeros pa 9:45 lo bai tin Gan. I contra Gan. II.
Final di Domino ta cuminsa pa 8’or entre Gan. C contra Gan. D.
Lo tin trofeo pa Campeon y Sub Campeon di tur categoria.

ORANJESTAD- Desde cuminsamento di aña aki departamento di proyecto di Sector di Distribucion di Awa di W.E.B. Aruba N.V. ta haci trabounan di mantenshon riba e tanki di awa na Alto Vista. E trabounan ta wordu ehecuta pa e contratistanan local: ARCOS N.V. bou di supervision di W.E.B. Aruba N.V. den persona di ing. Pedro Plaza (projectleider) y Edsel Vos (Hoofd Operator).
E ehecucion ta planea den e siguiente forma: Trabounan parti pafor di e tanki lo wordu ehecuta den e periodo di januari pa mitar di mei y e parti paden di e tanki lo wordu ehecuta durante e periodo di juni pa augustus di e aña aki. Periodicamente nos empresa ta mantene e tankinan di awa pa evita deterioro y pa garantisa un suministro di awa den tur bario di calidad halto y riba un base continuo.
Durante e mantenshon parti paden di e tanki W.E.B. Aruba N.V. ta garantisa e suminstro continuo di awa pa medio di pompnan cu suficiente capacidad pa cumpli cu e demanda. Den e mesun periodo di juni pa augustus, W.E.B. Aruba N.V. lo construi un conexion nobo pa distribucion di awa riba e tanki di Alto Vista.
Esaki lo ta e di dos conexion pa saca awa for di e tanki, ya cu nos ta premira un crecemento grandi den nos cantidad di consumidornan pa e area cu ta cay bou di e tanki aki.
Den futuro lo conecta mas tuberia di distribucion riba e tanki. E proyecto di mantenshon aki hunto cu e tubo nobo, ta un invershon di algo mas cu 1 miyon florin.
Pa siguridad di tur envolvi durante e periodo completo di januari te cu augustus, e entrada pa e tanki di Alto Vista lo ta sera pa publico y trafico.

ORANJESTAD- A bira custumber pa Arthur Dowers den casi tur funcion di pantomina di AVP habri afo contra Minister Wever.
Arthur ta bisa cu cuido medico di Aruba ta den mal caminda y e culpa di esey ta e mal maneho di minister. Tambe Arthur ta bisa cu Booshi ta haci politica door di declara cu lo bin un centro di diabetes y di cardiologia na San Nicolas.
Arthur ta reta minister Wever pa splica con e ta bay paga esakinan, asina pues poniendo den duda cu e centronan ta bini AT ALL !
Na Hulandes tin un dicho cu ta bisa: “wie kaatst, moet de bal verwachten”. Cu nan ta bin, ta un hecho sigur, cabez di minister Wever riba un blokki!! Minister Wever ta reta Arthur awor pa lo siguiente: minister Wever ta retira VOLUNTARIAMENTE si e centro no bin; di otro banda Arthur mester tuma e reto y e retira dia di apertura di e centronan, despues cu e, ARTHUR !, corta e cinta!
Esey lo ta muestra di hombresa: “put your money where your mouth is”, “be a man, and not a mouse!”.
Nos ta den espera di e palabra (di homber) di Arthur, cu e ta acepta e reto. Claro cu bo compinchinan tambe ta invita pa presencia e cortamento di cinta!
Awor despues cu minister Wever ta contesta preguntanan na canal 90 - pasobra e no ta sconde pa e neishi ey - Toko tambe ta apoya Arthur door di insinua cu Booshi mester retira, no den tanto palabra, pero bo no mester ta un genio pa bo comprende kiko Toko tabata kier meen cu su palabranan !!
Minister Wever ta retira ora pueblo expresa esey, y no ora Toko of Arthur cu su compinchinan grita esey, a no ser cu Booshi mes dicidi pa laga su trabao pa e generacion joven….of si e centro no habri!

Instituto Alarma y Seguridad Aruba ta presenta su relato di Januari 2008 

ORANJESTAD- IASA, departamento cu ta resorta bou di Ministerio di Husticia ta anuncia e resumen di Januari 2008 pa seccion di Guarda Nos Costa (GNC), Imigracion na aeropuerto y nos wafnan.
Guarda Nos Costa
En total pa luna di Januari, personal di GNC a logra trece aden un total di 63 persona pa controlnan administrativo pasobra cu na momento di control rutinario nan no por a presenta documentonan valido pa traha legal aki na Aruba.
Di e cantidad aki a resulta cu 19 a wordo laga den libertad dor cu despues di trabou administrativo a resulta of nan por a prueba cu nan tabatin un permiso di estadia legal pa permanece na Aruba.
Un total di 44 persona a wordo traslada pa CDI wardando pa nan deportacion. Despues di investigacionan mas profundo, departamento di Husticia a dicidi cu 2 di nan mester a wordo laga den libertad.
E resumen di deportadonan pa e luna di Januari 2008 ta 42 stranhero a wordo pasa over na Imigracion cu orden di deportacion. Despues di investigacionan a resulta cu 12 di nan a drenta clandestinamente cu boto y 30 a drenta cu avion y a dicidi di keda atras intencionalmente.
E resumen di deportadonan pa e luna di Januari 2008 ta cu 42 stranhero a wordo pasa over na Imigracion pa ehecusion di e orden di deportacion.
E top 5 nacionalidadnan di e personanan cu a drenta of a keda ilegal ta; 18 Colombiano, 5 Ecuatoriano, 5 Peruano, 4 Surnameo, 3 Venezolano y 7 tabata di otro paisnan. E sexonan di e ilegalnan deporta ta 35 masculino y 7 femenino.

ORANJESTAD- Cifra di pasaherhonan cu IASA a procesa na luna di Januari 2008, ta mustra cu algo menos cu 100 pasahero a wordo atendi pa e departamento aki.
Pa loke ta trata luna di Janauri 2008 e cifrasnan ta manera ta sigi. E total di pasaheronan cu a wordo procesa ta 88.727.
E cantidad di stranheronan cu a drenta cu avion a suma 77.353. I pa loke ta trata personan stranhero cu a bandona nos isla den e luna ey ta 80.772. Personal di imigracion tambe a nenga entrada na Aruba di un total di 29 stranhero, di cual 12 ta di nationalidad Venezolano, 4 Haitiano y 13 di otro paisnan.
E razonan cu no a permiti e entrada di e stranheronan menciona ta manera ta sigi; 13 no tawata tin un permiso di estadia valido, 7 no tabata tin un documento di viahe valido, 3 no por a demostra cu nan tin suficiente medionan financiero pa cubri nan estadia y 3 no tawata tin visa pa drenta Aruba.
Tambe nos ta publica cu un total 42 persona a wordo tuma over di GNC pa wordo deporta for di Aruba (verwijderde personen) pa motibo di a pertenece illegal riba nos isla. Tambe tawata tin algun casonan particular cu a sosode durante luna di Janauri cu nos departamento di imigracion a reporta.
Algun di nan ta manera ta sigi: un vuelo di American Airlines for di Miami a ateriza cu emergencia dor cu e presion di cabina no tawata traha optimalmente. A detene un pasahero procedente di un vuelo transatlantico di e aerolinea Arke for di Amsterdam cu actuacion agresivo durenate vuelo.
El a wordo pasa over na autoridadnan concerni pa despues e sigui cu un otro vuelo pa su destinacion final Corsow. Tambe un otro caso cu un pasahero a perde conocemento y e mester a wordo transporta cu ambulans pa Hospital.

Imigracion a procesa un total di 270 diferente tipo di boto den hafnan

ORANJESTAD- E seccion di imigarcion cu ta cai bou di IASA na e hafnan ta entrega e cifranan pa luna di Januari 2008.
Pa loke ta trata e cifranan di e total di embarcacion cu a wordo procesa tanto na entrada como na salida e personal di imigracion di hafnan a procesa 270 diferente tipo di boto. Na e haf di Barcadera a procesa un total di 100 boto, na Oranjestad 124, i na e haf di Valero 46.
Siguientemente, ta specifica e cantidad i tipo di botonan cu a drenta nos hafnan. Ta trata di 56 barco crusero, 19 barco di carga, 60 boto di motor chiquito, 61 yate (boto di placer), 26 barco di container, 44 tankero, 2 barco cu cargamento di auto, y 2 clasifica como otronan.
E cantidad di personanan cu no a wordo permiti entrada pa medio di nos puertonan a suma un total di 89 (landingsverbod), di cual tur tabata di nationalidad Colombiano.
E razon cu e 85 hombernan i e 4 muhernan aki no a wordo permiti entrada ta cu tur no tabatin permiso pa drenta Aruba.
Adicionalmente, tawata tin 7 casonan di origen particular di cual ta envolvi 5 caso cu e pasaheronan di barco crucero cu mester a keda Aruba pa motibonan medico, 1 yate a ricibi un boet dor cu nan no a raporta na imigracion na momento din an jegada y finalmente 1 caso di fayecimento a bordo di e tankero Amazon Explorer.

...I por tin impakto riba elektornan...

WASHINGTON, - Skandal di sex ta bolbe sakudí polítika di Merka.
E bia aki esaki ta afektando Gobernador demókrata di New York, Eliot Spitzer, di 48 aña, kende ayera huntu ku su esposa Silda a pidi despensa dilanti kámaranan despues ku a deskubrí ku e tabata kliente di un klup di luho di prostituta.
Bèrdat ta ku tipo di skandalnan asina aki no ta faboresé Partido Demókrata i por tin un impakto riba e elektornan.
E notisia a kai manera un baño di awa friu entre e demókratanan, kendenan ta den pleno kampaña, i pa e disputa pèrtá di Barack Obama i Hillary Clinton.
Spitzer den un Rueda di Prensa yen di reportero den su ofisina na Manhattan a pidi “pordon” na su famia i siudadanonan den un deklarashon durante kua e no a atmití preguntanan despues ku Prensa merikano a vinkul’é ku un ret di prostitushon di luho.
E no a hasi menshon di su retiro, ounke ta ferwagt ku e lo hasi esaki awe.
“Mi ta desepshoná pa no a mantené ekspektativanan ku mi mes a marka. Mi tin ku dediká tempu pa haña konfiansa bèk di mi fama. Mi no ta bai kontestá niun pregunta. Masha danki”, asina e Gobernador di New York a konkluí.
“Mi a aktua di un forma durante kua mi a violá mi obligashonnan ku mi famia”, Spitzer a bisa.
Edishon ‘online’ di korant New York Times a sita un kolaboradó anónimo di e Gobernador di New York, i a sigurá ku Spitzer a atmití dilanti su Gabinete su vinkulashon ku un ret di prostitushon.

MADRID, - Míles di persona ayera a rekoré kayanan di Mondragón pa rekòrdá Isaías Carrasco, eks konsehal sosialista asesiná siman pasá djabièrnè na e lokalidat aki den un atentado atribuí na ETA.
E marcha, bou di lema “Pa Libertat ETA no”, tabata enkabesá pa viuda i yunan muhé di Carrasco i pa numeroso polítiko vasco.
“Nos ta aki pa bisa asesinonan di Isaías ku tur firmesa di mundu ku lo bai detené, huzga i enkarselá nan”, lider di sosialistanan vasco, Patxi López, a bisa den lektura di e komunikado final.
“Nan lo no por ku demokrasia i ku libertatnan di nos tur. Nan lo no por ku mayoria inmenso di Euskadi, su destino ta disparsé fo’i nos bida pa semper”, el a agregá.
E manifestashon, ku a transkurí den silensio solamente interumpí pa aplousonan i gritunan di “Isaías, Isaías”, ta’tin e momentu mas emoshoná ora ku a yega porta di kas di e eks konsehal, lugá kaminda a tir’é mata djabièrnè último i kaminda a tene un minüt di silensio.
Parti mainta ta’tin konsentrashon silensioso dilanti ofisinanan prinsipal spañó di Gobièrnu, manera Madrid, Bilbao òf Barcelona, pa asesinato di Isaías.

NEW YORK, - Barí di petroli awe pa promé bia a superá 109 dollar na New York i 105 dollar na London pa motibu di un akseso nobo di debilidat di dollar, ku a kai na un mínimo históriko nobo di 1,5489 unidat pa euro.
Na New York a kotisá barí di petroli “light sweet crude” na 109,20 dollar i esun di Brent na London ta 105,40 dollar, markando rèkòrtnan históriko.
Ya for di un siman kotisashonnan di petroli ta bati rèkòrt tras di rèkòrt.
Ayera na New York, a superá e barera simbóliko di 107 dollar i despues 108 dollar.

Foto: Yena tanki 1103

Un kliente ta yena gasolin den su outo na un pòmp di gasolin na Ohio. Preis di petroli a subi i bira 109 dollar na New York awe.

WASHINGTON, - Ku kara pa e elekshonnan primario di awe na Mississippi, e prekandidato presidensial Barack Obama, a deskartá ku e tin interes pa bira kandidato pa Vise Presidente di Merka huntu ku su rival Hillary Clinton, i a bisa ku e idea sirkulá pa kampaña di Clinton tin komo meta di laga e votantenan kere ku ta e dama senador ta esun ku ta dilanti den e kontienda ora ku no ta asina.
E dama senador di New York ta na di dos lugá ku menos delegado komprometé i Obama ta super’é pa 110, segun e mas resiente konteo di Associated Press.
“Mi no por komprondé kon un hende na di dos lugá por ofresé vise presidensia na un hende ku ta na promé lugá”, Obama a afirmá.
Na Columbus, Mississippi, e senador di Illinois, a indiká: “No pensa asina. Boso tin ku skohe (entre Clinton i Obama) den e elekshon aki”.
Obama asina a kontestá e komentarionan ku den último dianan Clinton i su esposo, Presidente Bill Clinton, a formulá, kende fin di siman a bisa ku e fórmula Clinton-Obama lo ta “un forsa imparable” pa kapasidat di e dama senador di gana na zonanan rural i estadonan grandi, i kapasidat di Obama di gana entre votantenan independiente, ku mayó edukashon i na sentronan urbano.
Pero Obama, kende a antisipá ku e lo gana e primario di awe, a afirmá ku “mi no ta kumpliendo pa bira Vise Presidente, sino pa bira Presidente di Merka”.
Ademas, Obama a bisa, si Clinton ta kere ku e no ta kapasitá pa ta Presidente, e ora ei pakiko e ta bisa ku mi por ta su kompañero di fórmula.

WILLEMSTAD – BAB lo bai aserká gerensianan di hotèl pa averiguá si enbèrdat ta kitando belasting for di tepnan ku e trahadónan ta risibí. Esaki ta den kuadro di e dekreto ku minister di finansa a saka pa no kita belasting for di e tepnan. Tin inkluso empresanan ku ta pone e tepnan huntu ku e salario ku ta hasi ku doñonan di trabou ora di kita belasting ta kita for di e montante aki.
Horecaf relashoná ku reklamonan di empleadonan di Marriott Hotel a konsultá ku BAB pa averiguá e asuntu e siman aki. BAB mes lo bai aserká e gerensianan pa mira kiko di bèrdat tin den henter e asuntu aki. E empleadonan tambe ta manifestá ku e salario ku nan ta risibí aktualmente no ta ni yega i ku ta e tepnan ku nan ta risibí ta yuda duna nan un espasio. Nan ta mustra ku bou di niun kondishon lo aseptá pa e gerensia retené belasting riba e tepnan ku nan ta risibí mensualmente.
Horecaf ta indiká ku no solamente na Marriott Hotel tin e problema aki i ta pidi pa BAB hasi su investigashonnan na otro hotèl, manera Hilton i Floris, ya ku na e hotèlnan aki e wega aki ta tumando lugá. Segun bosero di Horecaf, Kenneth Valpoort, ta splika ku sr. Casperson ta bai hasi e chekeo na e hotèlnan, pasobra nan no a komprondé kon nan por ta kitando plaka for di e empleadonan ku ta risibí nan tepnan. Tin hotèlnan ku ta pone e montante risibí riba nan salario, konsekuentemente ta kita belasting afó.
Horecaf ta kontentu ku BAB a reakshoná i lo bai aserká e kompanianan pa di e manera aki kita tur duda i mal intenshon di parti di gerensianan ku no ta kumpli ku e dekreto di minister. Pa e mesun motibu aki Horecaf ta spera ku otro empresanan ku tambe ta kometé e práktika aki, pa retené belasting riba tepnan for di trahadónan, pa nan stòp di hasi esaki i duna e trahadónan e loke ku ta di nan sin ku mester kita nada afó.

WILLEMSTAD- Durante e Marshe pa Empresario UTS a stimulá empresanan chikí dor di tene un enkuesta i a saka un ganadó entre e partisipantenan. E ganadó a bira sr. W.P. Geertruida di e negoshi C-Gardens B.V. riba Gosieweg ku a risibí un HTC Touch, un telefon masha sofistiká .
Sr. Geertruida ta un ehèmpel di un empresario chikí ku ya pa 11 aña kaba tin su propio negoshi i ku ta hasi bon uso di e servisionan ku UTS ta ofresé. E tin su Chippie ku ta dun’é un kobertura total i su telefon fiho den su kantor. E ta hasi su yamadanan lokal, interinsular i internashonal hasiendo uso di e dos maneranan aki. I pa konekshon di Internèt, sr. Geertruida ta hasi uso di servisio di Internèt di OneNet ku tin un spit hopi haltu.
Riba e pòtrèt por mira e felis ganadó, sr. W.P. Geertruida, den kompania di Fayna Haseth, relashonista públiko di UTS, risibiendo su telefon HTC Touch na man di sr. Lyrio Gomez, direktor suplente di UTS.

WILLEMSTAD - E preparashonnan pa e marcha masal di Alabansa, riba di Pasku di resurekshon ta den “full drive” i tur kos ta mustra ku e aña aki lo e ta muchu mas grandi ku aña pasá.
Aña pasá tabata e promé bia ku e marcha aki a wòrdu organisá i apesar di esaki e akohida tantu pa loke ta trata e kantidat di partisipante den e marcha komo esnan pará kantu di kaya tabata grandi. Kristian di mas ku 15 iglesia a subi kaya masalmente pa duna honra i gloria na Dios i kantu di kaya tambe tabatin hopi hende.
Motibu di e marcha ta pa selebrá e echo grandi, ku riba e dia di - Pasku di Resurekshon- Hesu Kristu a sakrifiká su bida na e krus di Kalvario pa pordon di nos pikanan i vense morto dor di resusitá riba e di tres dia, pa tur ku kere den dje haña bida eterno (Huan 11:25).
E aña aki e organisashon ta den man di e Asosashon di Pastornan Kristian.
E loke ta hasi e marcha aki asina úniko ta e echo ku e ta e visualisashon di loke beibel ta bisa kristiannan mester ta: uní den un kurpa i esaki e marcha ta: e kurpa di Kristu moviendo den kayanan di Kòrsou, alabando i glorifikando Dios su nòmber i na mes momento yamando pa Kristu su intervenshon riba nos isla.
Diferente agrupashon di gospel lo sòru pa e parti musikal. E alabansa i adorashon ta na enkargo di E.O: Zamar, Proskuneo, Fuego, Avivamiento i Fuego, E simia resusitá, Kidsroomband i mas.
Tur persona ku ke partisipá por kumpra un T-shirt na balor di fl 15,- òf un package ku ta konsistí di un t-shirt, grill mix platter i tambe un refresko na balor di 25.- pa mas informashon por yama Zion Recording & Music Academy na tel 737-2716.

WILLEMSTAD – Djasabra último kongregashon House of Worship a honra diferente hende muhé den e konferensha “Muhé Balente”. Diferente figuranan konosí ku den nan funshon diario ku semper ta sali dilanti a keda honra pa pastor Arlete Juliet. Despues di su mensahe pa enkurashá e hende muhé i tambe pa mustra e papel importante ku hende muhé tin den komunidat a honra algun di e hendenan muhé den komunidat pa nan trabou ku nan ta hasi. Diferente persona den e komunidat a keda rekonosé riba e Dia Internashonal di Hende Muhé.
Entre e personanan ku a keda honrá tabata promé minister Emily de Jongh-Elhage, minister Omayra Leeflang, Sharo Bikker, Corine Genaro, pastor Olga for di Boneiru, Mila Kleinmoedig, Elia Isenia, sra. Koeiman di DOS, Mama May, Lira, Shermelin Josepa i tambe pastor Arlete Juliet su propio mama. Pa kada persona tabatin un deskripshon di e motibu ku a duna un rekonosimentu pa nan funshon den e komunidat. Riba e kombinashon di foto por mira algun di e personanan ku a keda honrá.

WILLEMSTAD – Djasabra 15 di mart Ministerio Bida Abundante ta drenta den un 24 ora di orashon non stòp pa Kòrsou. E 24 ora di orashon intensivo aki mester hasi ku no solamente por yega mas serka di Señor, pero pa intersedé pa e situashon preokupante ku ta reina riba e isla.
Ministerio Bida Abundante ta konsiderá e 24 ora di orashon aki pa invadí e fòrtinan di satanas i kita loke a hòrta, mata i ta purba di destruí di e komunidat. For di basta dia kaba por skucha den e programa Mas Bida Abundante ku e evangelista Norwin Josepa ta hasiendo un yamada na e komunidat pa mas orashon i den mesun rosea a anunsiá e 24 ora di orashon. No tin duda ku esaki ta e momentu korekto pa bin huntu i konfia Dios pa su poder por manifestá i okashoná un kambio radikal meimei di e pueblo.
Meimei di tur diskushon i divishon, no tin otro forma pa kambio dor di yama riba Dios pa por yuda ku tin unidat bou di e pueblo. Diskushonnan den kua ámbos partidonan di koalishon komo oposishon ta mustra ku nan tin e mihó alternativa pa bienestar di e pueblo i ku esaki simplemente a hiba na konfushon bou di e pueblo. Ku e konfushon aki a bin ta desanimá i deskurashá e habitantenan di e isla aki i awe ya práktikamente no tin hende ku ta kargando e speransa ku lo bin un kambio. Sin insultá niun hende, Minister Bida Abundante ta opiná, ku a yega momentu di pone interes personal òf di partido un banda i pa kada hende ninga nan mes i buska e solushon ku ta Dios so lo tin pa e pueblo aki.

ROSINI
Felis Martinus (86 aña)
Mihó konosí komo Felis ku tabata traha na Kooyman Dominguito
A laga atras su kasá Abigail Rosini, yunan Ivonne, Swinda, Ludwin, Shirley, Erno Rosini, Judith Rosini i Elvin Hooi, Edson Rosini i Duzaira Cecilia, Eithel i Amaris Rosini-Apostel. Akto di entiero ta djaweps 13 mart. Pa 3.30or tin un respòns na El Tributo siguí pa santana Soto.

MARTINA
Gertruda Victoria
Mihó konosí komo Bea
A laga atras su yu Marlon Martina, rumannan Sira, Frida, Ronny Martina, Merita Jansen, Ada Martina i Lucio Marta, suegra Mila Haard, ñetunan Marlisse i Rayan. Akto di entiero ta djaweps 13 di mart 4or for di misa Gr. Kwartier pa santana Gr. Kwartier. Promé ku entiero tin un s.s. di misa. Bishita 1or.

REGALES
Jean-Pierre Felipe
Mihó konosí komo Pipo
A laga atras su mama Baby Regales, rumannan Diomara Regales, Raycheline Sling, Frank Boye, tanta i tionan Ria Regales, Marisela Regales, Xiomara Maria, Jeritza Paulina, Cheryl Maria, Jacqueline van Eindhoven, Solange Mooring, Mariola, Sharlice, Sholine Maria, Boys Regales, Samuel Casseres, Cedrick Casseres, Tyrone, Edson, Roland Maria, namorada Jadienne Dal i famia. Akto di entiero ta djarason 12 di mart 4.30or for di Bottelier pa santana Bottelier. Bishita 1or. Promé ku entiero tin un sirbishi. Trahe Alegre.

LA CRUS
Lidio Mateo (repentino)
Mihó konosí komo Livio eks trahadó di Princess Beach i Kentucky
A laga atras su mama Angela La Crus, yunan Angelo La Crus i India Nique, Urly la Crus, rumannan Solange La Crus, Sedney La Crus i Roselin Mayor, Lorraine La Crus i Juan Carlos De la Crus-Martes, Ramon la Crus i Xiomara Girigorie, Rayshall La Crus, Magalian La Crus, mama di su yunan Joyceline Laken. Akto di entiero ta djaweps 13 di mart for di El Consolador pa santana Roodeweg. Promé ku entiero tin un respòns 3.30or. Bishita 12or. Trahe alegre.

Lorito ta yama tur hende un felis djamars. Nos ta spera ku tur hende di buena fe ta sigui traha duru pa Kòrsou bai dilanti.
*********
Lorito a komprondé, ku nos ta dje popular ei, ku a dediká un programa kompleto na Lorito. E mesun hende (nan) ku ta bisa ku nan no ta lesa Lorito òf LA PRENSA, nan ta komentá tur loke tin den nos korant. Kon e kos ei ta kuadra ku otro? Si bo no ta gusta un kos, bo no ta koment’é tampoko tòg?
*********
Nos amigu Helmin Wiels a sulfurá ayera atrobe, aparentemente pasobra nos a publiká ku e tabatin e kurashi di aseptá un biahe pagá pa Ulanda, algu ku e mes a kuestioná di otronan tur biaha. Awe mainta na Radio Hoyer el a trata di defendé su mes masha fofo mes ku un storia ku ta Sekretariado di Konseho Insular a pon’é riba lista. Kere nos: si bo no kier bai un kaminda, niun hende no por ponebu riba ningun lista! Un defensa pober pa hustifiká un eror garafal!
*********
Kòrda ku no ta Lorito ni LA PRENSA a pone Helmin Wiels riba ningun lista. Es mas, nos no ta interesá tampoko si Helmin Wiels lo a bai si òf no. E mester dediká atenshon na e issue real: e issue ta, kon bin tur tempu bo a kritiká tur hende ku a bai biahenan pagá afó ku daggeld reimu i awor bo mes a bai di akuerdo pa nan paga tur kos pa bo i awor si bo a kore tuma! Si bo no a hiba e daggeld bèk ainda, hasi nos un fabor, hib’é bèk purá pa e no putri den bon man. Lorito lo bai puntra!

WILLEMSTAD – Miembro di Forsa Kòrsou Gregory Damoen, a presentá un proposishon konkreto pa kontra-arestá e krísis di energia ku Kòsou ta pasando aden na e momentunan aki. Damoen kier mira medidanan prinsipalmente den ambiente di akseins i impuesto pa suavisa e impakto pa komunidat. “Redusi akseins (i OB) riba gasolin i disel i redusí impuesto riba entrada pa kontrarestá e pèrdida den forsa di kompra di spesialmente e klase media, a rais di e ultimo oumentonan di preis di krudo riba merkado internashonal.” Esaki ta e proposishonan mas impaktante di e frakshon di Forsa Kòrsou, despues ku Bestuurscollege di Kòrsou a anunsiáá ku a kongelá e oumento di tarifa di gasolin i disel ku mester a drenta na vigor awe diamars.
“Nos frakshon ta aploudí e intenshonnan di Bestuurscollege pa tuma un time out di 4 siman i pa asina ei huntu ku e sektor sindikal i esun empresarial traha riba alternativanan. Ta bon konosí ku nos frakshon den kartanan separá i durante di diferente intervenshonnan den reunionnan di Konseho Insular a lansa diferente proposishon kon pa kontrarestá e efektonan di oumento di preis di krudo riba merkado internashonal riba nos ekonomia. Laga nos no krea ningun duda. Tur hende ta rekonosé ku gobièrnunan no tin influensia riba e oumento di preis di krudo riba merkado internashonal. Sinembargo analisando e tarifa final, ta opvio ku tin otro komponentenan ku si gobièrnu tin influensia riba nan. I ta aki gobièrnunan pa medio di entre otro e instrumento fiskal mester stipulá i apliká un maneho pa evitá e.o. ku e forsa di kompra di pueblo ta sigui bai atras. Den kaso ku no tin kambio di maneho, pueblo sin duda lo sinti e efekto di e oumento direkto den su saku. I ta p’esei Gobièrnu Insular huntu ku Gobièrnu Sentral pa medio di entre otro e instrumentonan fiskal di Gobièrnu Sentral i esun di supsidio no por sinta mira, pero mester aktua.” Sr. Damoen miembro di Konseho Insular a deklará. Segun sr. Damoen kompensashon di pèrdida di entrada pa Gobièrnu Sentral i Insular por tuma lugá e.o. dor di e surplus di Gobièrnu Sentral, e suma di 20 mion ku mester bai den e fondo di solidaridat i e saldo di gastu èkstra i ménos entrada pa gobièrnunan pa motibu di e propio oumento di tarifanan. Pa loke ta trata oumento di tarifa di awa i koriente, sr. Damoen a proponé pa Bestuurscollege pordoná Aqualectra e debe di 40 mion na gobièrnu di Kòrsou i asina tene e tarifa na e nivel aktual pa por traha riba e solushonnan riba tèrmino mas largu ku ta energia alternativa hasiendo uso di entre otro solo i bientu, asina e proposishon ta bisa.

ORANJESTAD/WILLEMSTAD – Korte den promé instansia a konkluí awe mainta, ku eks minister di Ekonomia i Turismo di Aruba, Tico Croes (AVP) a hasi su mes kulpabel na korupshon den e kaso di Fondo di Desaroyo di San Nicolas. Korte a dun’é un kastigu kondishonal di 10 luna i 240 ora di trabou pa komunidat ku un tempu di prueba di dos aña. Eks promé minister Henny Eman ku tambe tabata akusado den e kaso aki a sali liber. E 10 lunanan kondishonal pa Croes ta mas tantu ku loke Ministerio Públiko a pidi durante tratamentu di e kaso. Fiskal a pidi un kastigu kondishonal di 6 luna.
Korte a konkluí, ku Croes a violá e regla di komo mandatario no tuma nada (bou di mesa) pa ehekushon di proyektonan. E hecho ku el a hasi esei, ta un violashon di leinan di Aruba ku ta bisa, ku un empleado públiko (loke ta konta tambe pa un gobernante) no por tuma soborno òf laga nan soborn’é. Pa loke ta trata e aspekto di violashon di leinan di kontabilidat, wes a yega na e konklushon ku no tin sufisiente prueba pa esei. Ademas hopi aña a pasa kaba despues ku e kaso aki a tuma lugá i ku a violá presupuesto di Aruba. Wes den su kondena a tene kuenta ku Croes ta dunando kátedra na un Universidat na Merka i e lo por pèrdè su trabou si e bai prizòn.
Pa loke eks promé minister Henny Eman, Korte a yega na e konklushon ku no tin sufisiente prueba pa yega na un kondena. A akusá Eman di violashon di leinan di kontabilidat i no pa korupshon. Durante tratamentu di e kaso Ministerio Públiko a pidi un kastigu kondishonal di 4 luna pa e eks mandatario. Den deklarashonnan pafó di korte, Eman a mustra ku e no a spera otro resultado i ku e ta lamentá profundamente e insistensia di e aktual gobièrnu (MEP), pa tacha su kredibilidat i su bon nòmber. Eman a mustra, ku nunka el a duda den su inosensia, ya ku nan a traha pa Aruba i ku e situashon aktual ta demostrá un biaha mas e gran diferensia ku tin aki na Aruba entre su gobièrnu di ántes i esun aktual di Nel Oduber.

WILLEMSTAD -- E Komishon Fiho di Konseho Insular pa loke ta trata enseñansa lo biaha pa New Orleans pa un konferensha di ASCD.
Diputado di Enseñansa Marylin Alcala-Walle a informá awe ku den kuadro di mehorashon di e komunikashon entre Kolegio Ehekutivo di Kòrsou i Konseho Insular riba tereno di enseñansa, Konseho Insular a bai di akuerdo riba 28 di yüni 1989 pa instituí e Komishon Fiho di Enseñansa ku ta reuní periódikamente. E meta prinsipal di e komishon ta pa interkambiá di idea i informá otro di e diferente desaroyonan ku tin den kuadro di mehorashon di nos maneho pa ku enseñansa i ku ta e komishon ku ta duna konseho riba tereno di enseñansa.
Pa por risibí un bista kon enseñansa profeshonal ta organisá den un pais ku ta bastante desaroyá riba e tereno aki, pa promé biaha un delegashon di Komishon Fiho di Enseñansa konsistiendo di kuater miembro lo kompañá Diputado di Enseñansa, sra. Marilyn Alcalá-Wallé na un biahe pa New Orleans dia 14 pa 18 di mart próksimo. E asina yamá “ASCD Annual Conference and Exhibit show” ta e evento maestro i profeshonal, kaminda tur partisipante por eksplorá e desaroyonan importante riba tereno di edukashon mundialmente, eksaminá desaroyonan nobo den e kontinentenan spesífiko òf den sierto grado di sistemanan eskolar. Alabes e intenshon di e konferensha ta pa kontribuí na e partisipantenan su konosementu riba sierto área spesífiko den e área di enseñansa, manera por ehèmpel aplikashon práktiko di ICT.