ORANJESTAD –Sindicato Di Maestro Di Aruba a emiti un comunicado di prensa den cual e ta haci un yamado na tur su miembronan y no miembronan pa continua cu e accion di protesta contra gobierno den e lucha di indexering cu a inicia ayera. SIMAR ta bisa asina:
Maestronan, miembro di SIMAR y no miembro e lucha ta sigui. Awe mainta nos ta bini hunto na e plaza dilanti Julianaschool pa nos bai un biaha mas rumbo bestuurskantoor pa exihi gobierno, nos doño di trabou, un ahustacion husto di nos salario.
Ayera mainta masalmente maestronan a acudi y anima e marcha pa bestuurskantoor y nos ta gradici nan pa nan respaldo y sosten na nos yamada. Gobierno, nos doño di trabou a tene nos na liña te 5’or di atardi pa duna nos un proposicion inaceptable.
Gobierno ta persisti den su posicion terco di no sinta na mesa pa negosha cu sindicatonan. Pesey nos ta haci un yamada un biaha mas na tur den enseñansa pa bin mustra gobierno cu nos ta exihi ahustacion serio den nos salario.
Trahadornan no por laga gobierno hunga su rol di “puppetmaster” pa ki ora cu e kier usa nos como marioneta.
E lucha ta continua y nos miembronan ta decidido pa sigui lucha. Uni bo mes na e lucha y no laga ningun hende intimidabo of strobabo pa para pa bo derecho. Awe gobierno tabatin e curashi di bin cu un calculacion, cu ni pa un kipashi e ta yega!
Asina e ta demonstra respet pa trahadornan den enseñansa, cu tin na nan encargo, educacion resposabel di e futuro generacionnan di Aruba?
Ta imposibel pa nos acepta e trato aki na man di gobierno, cu ta nos doño di trabou. Maestro, ban para pa nos derecho. Nos no por baha cabes!

ORANJESTAD – Entrante 12 di maart 2008 e prijsnan di benta di productonan petrolero lo cambia. Esaki ta conta pa gasolin, gasoil y kerosin. Minister di Finansa y Asunto Economico ta informa cu a surgi un cambio den prijs di productonan petrolero entrante 12 di maart 2008.
E prijs di benta pa comercio por menor ta como lo siguiente:
Gasolin: 217,7 cent pa liter (aumento di 4,6 cent)
Gasoil: 200,3 cent pa liter (aumento di 8,7 cent)
Kerosin: 193, 2 cent pa liter (aumento di 5,9 cent)

E reduccion ariba tarifanann di accijns pa absorba e aumento di prijs over di e periodo di mei 2007 ta keda manteni.

ORANJESTAD- Comision di Berdad a haci denuncia dia 14 di juni 2002 contra e siguiente personanan:
1. H.W.C
2. H.D.B
3. R.R.P
4. F.E.W
5. E.M.A
6. M.I.B
7. R.M
8. Dr. Robertico Rosendo Croes
Riba e lista aki no ta aparece nombernan di Henny Eman ni di Otmar Oduber. Ta Ministerio Publico a haci su propio investigacion y a base di declaracionnan di esnan envolvi a formula acusacionnan contra Henny Eman y Otmar Oduber.
E investigacion di Comision di Berdad no a formula denuncia contra Henny Eman y Otmar Oduber.
Huez ta duna Comision di Berdad razon, e a haya comproba cu ex Minister di Finanzas y ex lider di partido AVP a haci su mes culpabel di actonan di corupcion.
E actonan aki a tuma lugar mientras cu e tabata lider di partido AVP.
Huez inclusive a exigi un castigo mas halto cu loke Ministerio Publico a pidi. Esun cu a haya castigo ta esun cu tabata lider di partido AVP.
Comision di Berdad su investigacion tabata asina bon haci cu Huez a duna nos razon. Nos no a formula un denuncia den laira. Ora bo ta denuncia un persona bo mester ta hopi sigur di bo caso.
Pesei nos a entrega denuncia contra un dirigente politico y huez ta declara cu nos tabata tin razon den denuncia e politico aki.
Pueblo a haya sa e verdad: Fondo Desaroyo Nobo San Nicolas tabata un caso di bouwfraude, según sentencia di huez. Tur hende por wak awor cu loke nos a trece dilanti no tabata algo di persecucion politico.
Un huez independiente di Hulanda a duna su veredicto: bouwfraude a tuma lugar cu placa di pueblo.

ORANJESTAD – Director di SKOA, Sr. Haime Mata a señala cu apesar di e accion cu a tuma lugar ayera mainta, e diferente scol catolico tabata drai normal. Ademas e examennan na MAVO-school tambe a tuma lugar sin dificultad. “E informacion ta cu el a cana e proceso normal”, asina sr. Mata a declara na Bon Dia Aruba.
Ora cu sr. Mata a duna e declaracion aki banda di 10’or y mei di mainta, el a declara cu ainda no tabatin un bista riba e nivel di ausentismo cu a ser registra na e diferente scolnan Catolico cu ta resorta bou Skoa.
El a señala cu den ora ei e no por informa cu seguridad riba e cifra di ausentismo cu a ser registra ayera, ya cu nan ta 48 scol y 703 maestro, y solamente nan tin dos miembro di personal pa haci e trabou aki, y naturalmente den e ora ei ainda nan no a bini cla cu nan trabou.
Encuanto e panorama cu Skoa ta vislubra den e dianan benidero den caso cu no ta bin cu un solucion satisfactorio entre sindicatonan y Gobierno, ta cu nan lo mantene e scolnan habri. “Nos punto di salida ta cu te aworaki nos ta mantene scolnan habri. Si e maestronan di scol no ta bai den welga, esei ta su responsabilidad propio”, asina director di Skoa, sr. Haime Mata a declara na Bon Dia Aruba.
Sinembargo e ta haci e siguiente yamada na e mayornan, esta cu tin scol pero te momento cu nan ta ripara cu enberdad e situacion ta bira cu e scol ta plat completo, anto no ta keda otro alternativa cu cera scol.

Donacion di compania di construccion pa ex Minister Tico Croes a perhudike 

ORANJESTAD- No ta ningun acto di corupcion, pero un acto di acepta soborno tabata e base di Corte den Prome Instancia a haya cu ta suficiente pa condena ex Minister di Finanza, Tico Croes, na 10 luna di prison condicional of 240 ora di trabou comunitario.
E base di e sentencia aki ta un suma di apenas 4000 florin c’un compania di construccion a boek como donacion na e campaña di e ex Minister y ex politico, Tico Croes.
Segun Huez, e donacion aki a sirbi pa e ex Minister duna ordo pa e compania aki haya un contrato den e proyectonan di Fondo di Desaroyo San Nicolas.
Un suma cu den circulo politico ta practicamente nada pa un campaña electoral pero cu Huez a haya cu ta inaceptable pa un mandatario acepta algo asina.
En realidad e suma di placa aki pa colmo, nunca a pasa den bista di e ex Minister mes ya cu ta su comision di campaña a ricibi e suma aki y ta nan a usa e suma aki den campaña.
Sinembargo Corte ta considera cu Tico Croes ta responsabel pa e desaroyonan aki y como tal a haya cu e tin cu carga responsabilidad den e desaroyo aki y ricibi un condena.
Ta un hecho tambe cu ayera mes abogado di Tico Croes a dicidi cu lo apela e decision di Corte den Prome Instancia y bai busca un decision di Corte Superior den e caso aki.
Sin duda algun e caso aki a cai manera un bom pa tanto Tico Croes como su famia, ya cu no a spera cu e lo ser haya culpabel den un asunto cu realmente e no tabatin arte ni parte aden.
E hecho cu tin companianan ta dunando placa pa campaña ta bon conoci pa tur hende y pa tur partido, y for di inicio Tico Croes a mustra cu e no tin nada di haber cu e asuntonan aki, ya cu den su campaña politico, ta comisionnan ta trahando den esaki, mientras cu e tin responsabilidad di bishita su hendenan, casnan di famia pa haya nan confianza.

WILLEMSTAD – ‘When digital comes to town, local governements are caught off guard’. Esaki ta e pensamentu ku ta biba serka trahadónan di lei na Merka, ku ta hibando un lucha kontra billboardnan estilo pantaya di televishon. E fenómeno di billboard elektróniko, manera LA PRENSA a publiká den un artíkulo anterior, tin Merka den su gara aktualmente. Un di e aspektonan fèrfelu den e situashon akí ta e intentonan di esnan envolví den e industria di billboard pa pone preshon riba legisladónan. Kompanianan di billboard ta manipulá ku informashon i ta pone hopi preshon riba esnan ku mester habri kaminda pa leinan drenta na vigor, segun esnan envolví. Na e momentunan akí tin un investigashon ta tumando lugá ku lo keda kla te den transkurso di otro aña. E resultadonan di e investigashon akí lo mester prueba ku e billboardnan tin efekto negativo riba tráfiko si òf nò.
E diskushon tokante e billboard digital ku ta produsí imágennan ku ta move, a tuma e lugá di diskushonnan ku tabatin anteriormente kaba riba e billboard konvenshonal. Den e Estado Kentucky e industria di billboard estilo pantaya di televishon no tabata eksitoso ora nan a bai buska pèrmit. E loke nan ta yama ‘State Transportation Regulations’ di e estado a prohibí tantu Tri-Vision komo señalnan LED (Light Emitting Diodes). Jerry Watchel, un ingeniero i sikólogo ku 25 aña di eksperensia den e materia di komportashon di outomobilista, a konkluí, ku tin muchu kos ku ta kita atenshon di outomobilistanan i ku ta kontribuí na aksidente, pa por prueba ku un solo aspekto ta kousa aksidente. Mayoria aksidente no ta kousá pa un kos so, sino pa diferente kos ku ta pasa pareu. Pero no opstante esaki, Watchel ta konvensí, ku billboardnan digital ta kontribuí na e kantidat kresiente di aksidentenan di tráfiko. E ta bisa ku telefòn selular, sistemanan di navigashon i cd/dvd, ta kosnan den e vehíkulo ku ta kita atenshon di e outomobilista. Miéntras billboardnan, espesialmente esunnan ku ta kambia imágen, ta kousante di kitamentu di atenshon pafó di e vehíkulo. Tur dos forma di kita atenshon ta peliger pa tráfiko.

WILLEMSTAD – E tereno na altura di e fábrika di Coca Cola ta limpi atrobe. Despues ku un drogadikto a dòrna tur e palunan di sumpiña ku sakunan di plèstik i a akumulá un kantidat di potoshi riba e tereno, Selikòr a limpia e tereno djaluna último.
For di aña pasá desèmber e drogadikto a ubiká e tereno i a konvertié den su habitat. Poko poko el a kuminsá dòrna e palunan di sumpiña ku saku di plèstik di diferente koló. Tabatin hende ku a pensa asta ku ta su ‘Palunan di Pasku’ e tabata prepará. Sin embargo e situashon a sali for di man kompletamente, ora el a kuminsá akumulá tur sorto di potoshi riba e tereno. Tabatin diferente reklamo di parti di siudadanonan ku tabata trafiká den e área regularmente. E preokupashon tabata espesialmente pa turistanan ku ta mira e shushedat i no ta komprondé kiko ta pasando.
LA PRENSA a hasi diferente intento pa lokalisá e doño, pero niun hende no por a konfirmá di ken e ta. LA PRENSA a komprondé ku en todo kaso e no ta di CPA. E direktor di CPA, Agustin Diaz a konfirmá esei. Gerensia di Coca Cola no tabata alkansabel awe pa duna un komentario. Di un fuente ku ta bon na altura, LA PRENSA a komprondé, ku e tereno ta di Gobièrnu. Sin embargo Selikòr a limpia e tereno riba su propio inisiativa, segun informashonnan ku LA PRENSA ta disponé di dje.
En todo kaso e tereno ta limpiá i esei ta loke ta konta.

WILLEMSTAD – Preparando pa e kaso den korte dia 17 di mart próksimo, kontra eksplotadónan di mashin di wega di plaka ilegal, polis a konfiská 4 mashin mas ayera nochi. Un di e sitionan ku polis a bishitá tabata Tio Snèk riba Gosieweg, kaminda algun luna pasá polis a konfiská un mashin kaba. Sin embargo e doñonan a pone un otro mashin.
E akshonnan di ayera tabata pa akumulá mas tantu prueba posibel pa e kaso di dia 17 awor. Pa prueba wes ku e doñonan di snèk, restorant i otro establesimentunan di horeka ta krea oportunidat pa wega di plaka ilegal, polisnan bistí na sivil a bai sinta na e snèknan manera kliente, i a tuma nan tempu pa opservá eksaktamente kiko tabata tuma lugá. Dor di opservá, e polisnan a mira kon e klientenan ta duna e doño di e establesimentu sèn i pidié sende e mashin di plaka. Tambe a konstatá kon e doño di e establesimentu ta aktivá e mashin di wega di plaka i tambe kon e doño di e establesimentu ta paga e klientenan ku gana. Tur e aspektonan akí e polisnan a opservá i skibi den nan prosèsverbal. Ku e informashonnan akí Ministerio Públiko lo mester konvensé wes ku establesimentunan di horeka ku tin un mashin di wega di plaka ilegal, ta krea e oportunidat pa wega di plaka ilegal tuma lugá.
Durante e akshonnan di ayera nochi, polis a bai tambe na un snèk riba Rooseveltweg, un snèk riba Winston Churchillweg i un snèk na Seru Fortunaweg. Polis a informá ku no tabatin niun insidente ku klientenan ku tabata usando e mashinnan. Na un di e snèknan tabatin un kliente ku a kaba di pone un montante basta haltu den e mashin. Polis a laga e kliente kaba e wega pa despues a konfiská e mashin.

MARYVALE, ARIZ., - Mark De Rosa a regresá aliniashon di Chicago Cubs, pero ketu bai e tim lo trata di hasi un kambio den e último 20 dianan ku a sobra di spring training.
“Bo por mira e roster”, asina De Rosa a bisa. “Bo mester kere ku lo bai tin moveshon. Bo mester kere”.
Tin demasiado picher pa dos puesto. Infieldernan ta hunga den center field, komo reserva.
Den e kaso dim as malu, Cubs tin sufisiente talento i profundidat pa por ripití komo kampionnan di Divishon Sentral di Liga Nashonal.
Miéntras ku Cubs lo hunga ku nan aliniashon regular pa di promé bes, ta masha tiki hungadó ta kere ku e roster lo keda asina aki pa e próksimo tres simannan.
“Mi ta kere ku algu lo bai pasa”, asina e tersera base Aramis Ramirez a bisa. “Pero nos a kustumbrá komo hungadó. Si bo ta bai mehorá e tim, kambio mester bini. Nos ta den un divishon tòf. Tur hende sa ku Reds a bira un mihó tim i Brewers tambe. Nos mester bira mas mihó”.
Ta fásil pa Ramirez bisa, pero ta De Rosa lo ta esun ku lo bai pèrdè su puesto komo regular si Cubs por fin logra di haña Brian Roberts for di Orioles, ku lo hunga na segunda i bati komo promé bate.
Pero otro hungadónan manera e picher Sean Marshalls i e infielder Ronny Cedeño lo por bai den e kambio pa Roberts. Ainda tin Matt Murton, Felix Pie, i Jason Marquis ku tin rumor ta bisa ku lo bai Boston huntu ku Sam Fuld un prospekto den un kambio pa Coco Crisp segun a sali den e korant The Boston Globe.

JUPITER, FLA., - E rotashon habridó di St. Louis Cardinals lo por ta sin un di su miembronan na apertura di temporada, despues ku ayera un di su miembronan Joel Pineiro, tin problema ku su skouder.
Esnan di e rotashon ku por habri temporada ta Adam Wainright i Braden Looper.
Matt Clement awor a kuminsá tira práktika di bateo i e coach di picheo Dave Duncan no ta kere ku Pineiro lo por ta kla pa komienso di temporada. Mark Mulder ku a operá lo por ta kla pa luna di mei.
“Lo mi ta gana boso si mi bisa ku mi no ta preokupá”, asina Duncan a bisa. “Pero mi no a drenta den pániko. Mi sa ku ora temporada kuminsá lo tin sinku picher den rotashon i nos ta sinti ku ta sinku gai ku lo duna nos un chèns pa gana”.
Todd Wellemeyer i Brad Thompson lo ta esnan ku lo por yena e dos puestonan, ku Anthony Reyes komo e di sinku habridó. Tin e prospektonan Mike Parisi i Kyle McClellan tambe por ta aden.
Si Cardinals buska picher mediante di kambio lo ta pichernan ku mas potensial ku Sidney Ponson i Jeff Weaver.
Pineiro a kaba di firma un kòntrakt di dos aña pa 13 mion dollar despues ku aña pasá el a tèrminá ku rèkòrt di 6-4 i un era di 3.94 den 11 salida despues di a bini den un dil for di Boston Red Sox.

 

WILLEMSTAD - E tres Yunan di Tera ku lo bai hasi un ekspedishon aventuroso na Antártika a yega na e parti mas zùit di Argentina Ushuia. For di einan nan lo subi un barku ku lo hiba nan Antártika den un ekspedishon enkabesá pa Robert Swan. Einan nan lo haña informashon entre otro riba e efektonan di kalentamentu global ku ta un peliger serio pa humanidat. Di robes pa drechi por mira Jean Carlo Da Silva, Arthur Nieuw i Diane Rigaud promé ku nan . a sali rumbo pa Antártika. Nan a ekspresá masha entusiasmo pa e loke nan a yama “e aventura di nan bida”. LA PRENSA lo sigui nan aventura di serka. (Foto: kortesia Amigu di Tera)

NEW YORK, - E Gobernador demókrata di New York, Eliot Spitzer, ta den problema serio.
Spitzer konosí pa su lucha kontra prostitushon i droga, a revelá ku e ta “Kliente 9” di un ret di prostituta VIP.
Polítika di New York a keda sakudí p’e situashon aktual di Spitzer, despues ku investigashon di FBI a revelá ku e tabata kliente di Emperor’s Club, un ret di prostitushon VIP online.
Konosí komo “Kliente 9”, ounke su beinam tabata George Fox, e anochi promé ku Dia di San Valentin, el a kontratá servisionan seksual di un dama hóben ku yama Kristen, un merikano, ku kabei koló bruin, ku ta midi 1.63 i ta pisa 50 kilo.
E enkuentro a tuma lugá na Hotel Mayflower, un di e hotèlnan mas luhoso na Washington, den kamber 871, despues di realisá un depósito via e-mail ku tabata inkluí tur gastu, no solamente e “servisionan básiko”, sino tambe karchi di trein ku e dama a tuma fo’i New York i e bebidanan i kumindanan, entre otro.
Kristen a kana pasa lobby di e hotèl i yega e kamber.
Den e kamber ta’tin kama ‘king size’, situá den huki di “Club floor”, den ala VIP.
Ora el a yega einan, e hóben a yama su dama hefe na telefòn, Temeka Lewis, pa komunik’é ku ya el a yega.
Di e forma aki, Kristen i Spitzer tabata huntu mas ku un ora i, segun e prostituta, Spitzer a pidi p’e hasi kosnan ku un hende no ta konsiderá ‘safe’, ounke e tabata sa kon trata e tipo di situashonnan aki.

Skina di Sorti, awe djarason 12 di mart di 2008, ta kuminsá ku deseá un i tur un bon dia. Pa bo por kibra ku un empase den un situashon di konflikto, e faktor determinante ta ku e aktornan tin e konvikshon ku no por mantené e situashon manera e ta. Sin ku e aktornan a yega na e konvikshon ei, bo no ta bai kibra ku e empase. Si un dje respektivo aktornan den e konflikto kere ku tin bentaha di saka, e konflikto ku tur probabilidat lo intensifiká despues ku e kontra partida tuma nota di e echo ku e otro no tabata sinsero.
****
Konflikto ta karakterisá su mes pa divishon di pensamentu riba un òf mas asuntu. Hopi bia e orígen di e konflikto no ta den e asuntu ku ta aparentá (e asuntu rondó di kual e aktornan ta konfrontá otro), pero den un otro asuntu ku pa ékis motibu ningun di e aktornan no ke divulgá òf no ke papia abiertamente riba dje. Si e orígen di un konflikto na ta den e asuntu ku ta na órden, papiamentu riba e asuntu hamas i nunka ta trese un apertura real. Kos ta keda brui.
****
Ami ta floho pa kere ku e situashon insano den polítika na Kòrsou tin di haber ku e proseso estatal. Tal manera lider polítiko di FK, mr. Nelson Navarro a deklará for di despues di e sonado akuerdo di Spaanse Hof, tin mas punto di akuerdo ku tin puntonan di desakuerdo. Ami ke agregá na e ponensia di mr. Nelson Navarro, ku e diferensia di pensamentu ta sinta den e manera ku mester atendé ku sierto puntonan.
****
E relashon malu entre PAR-PNP di un banda i MAN di otro banda tabata reina promé ku e problema rondó dje firmamentu di “Slotverklaring” na Spaanse Hof. Ta na vários okashon e manera di práktika polítika di MAN tabata motibu di iritashon denter di e koalishon PNP-MAN-PAR-NPA-Lak. Te hasta èks minister pa MAN, Kenneth Gijsbertha, por lo general un persona ku ta kana e kaminda di diplomasia, tabata tin su momentunan di konfrontashon ku entre otro minister pa PAR, Omayra Leeflang.

MADRID, - Polisnan a detené na Madrid un grupo di siudadano chines ku tabata dediká na pirateria oudiovisual i tur dia nan tabata gana 240.000 euro, den e mayó operashon desaroyá na Spaña te ku awor riba e tereno aki, Polisnan Nashonal a bisa den un komunikado.
E seis detenidonan, sinku hòmber i un hende muhé, ta akusá nan di delitonan kontra propiedat industrial pa falsifiká obranan fonográfiko i sinematográfiko, algun di nan no estrená ku a keda grabá den salanan di sine.
E grupo tabata suministra e produktonan na hendenan ku ta hasi negoshi den kayanan, i ku benta di e kopianan ilegal produsí tur dia nan lo por optené mas o ménos 240.000 euro, segun polisnan.
E agentenan a lokalisá tres depósito di e organisashon na Leganés i un sentro di duplikashon i montahe na Arganda del Rey, e tayer mayó di falsifikashon desmantelá te ku awor aki pa polisnan.
Den e depósitonan a enkontrá diskonan no usá, grabadónan i otro material na un sentro di duplikashon, ku tabata realisá na gran eskala kopianan ilegal di pelíkulanan riba DVD-R i obranan musikal riba CD-R.

WILLEMSTAD - Dia 16 di mart Kas di Kultura pa medio di su proyekto Museo Tula, ta hasi un yamada na kunukeronan pa nan asistí na e diskushon di panel tokante kiko mester ta e strategia ku gobièrnu mester hiba pa por logra sostené kunukeronan. Sosteniendo kunukeronan por logra promové produkshon lokal di produktonan agríkola. Esaki ta generá empleo. Alabes e proseso aki ta sòru ku e pueblo por kumpra produkto ku ta salú i orgániko. E strategia ta pa sòru ku mas famia ta kuminsá planta na nan mes kas. Ku esaki nos ta baha gastu di famia i bira ménos vulnerabel di pafó.
Ku otro palabra un strategia riba tereno di alimentashon su meta mester ta pa oumentá e seguridat di alimentashon di pueblo di Kòrsou. Konsekuensia di esaki ta ku ta oumentá outonomia riba tereno di alimentashon.
Na fin di e atardi ta importante pa yega na proposishonnan ku tin di haber ku reformanan, ku ta enserá entre otro :
• entrega di tera, distribushon di tera i uso di tera pa agrikultura i krio di bestia
• asistensia tékniko pa kunukeronan
• maneho di awa
• posibilidatnan pa finansiamentu na un tasa di interes abou i supsidio pa kunukeronan
• investigashon pa logra mas agro industria
• preis hustu pa produkto
• protekshon pa e kunukero chikí i mediano
• training i kurso pa kunukeronan i pa esnan ku ke bira kunukero
• plantamentu i komementu salú komo parti di kuríkulo den skol.

WILLEMSTAD – “Laga nos ta un” lo no ta solamente un konsierto, pero tambe lo tin e parti di orashon pa tur tipo di nesesidat ku por ta biba e momentunan ei bou di e públiko. No tin duda ku tur hende tin nan nesesidat, pero ku e okashon lo presentá pa hasi orashon, pidi Dios su intervenshon pa e nesesidat ku ta biba e momentu. Lo konfia Dios pa milager por tuma lugá den bida di hende, meskos ku sanashon. Minister Bida Abundante ta kere den e poder di Dios i ta konvensí ku lo tin milager ku lo tuma lugá pa medio di orashon. Mirando ku e konsierto aki lo keda bishitá pa un públiko grandi, lo no laga niun hende bai nan kas, sin ku hasi orashon pa nan.
Ministerio Bida Abundante ta hasi un yamada pa tur esnan ku tin malesa, ku mester di un trabou, kualke situashon den matrimonio, spesialmente pa hóbennan ku ta pasando den situashonnan doloroso. Sa ku tin hopi hóben ku ta enfrentá situashon difísil, manera abuso seksual, maltrato, rechaso, insultonan verbal, violashon i hopi mas. Pa tur esakinan lo tin yamada pa orashon, ya ku ta intenshon pa e hóbennan tambe haña ministrashon. “Laga nos ta un” lo dediká atenshon na e kurason heridá i konfia Dios pa sana e kurason herida.
“Laga nos ta un” ta un konsierto sin alkohòl, di manera ku mas i mas hóben por partisipá den e konsierto aki. E organisashon Ministerio Bida Abundante ta haña preguntanan riba tur tipo di tereno ku mester keda kontestá. Un di e preguntanan ku últimamente ta bin dilanti ku si ta bende bebida stèrki òf alkohòl durante e anochi aki. Konsiderando ku ta trata di un konsierto gospel, no ta pèrmití bende niun produkto ku ta kontené alkohòl.

LELTIO
Dario Zosimo
Mihó konosí komo Dari
A laga atras su kasá Teresita Leito-Granviel, yunan Ellen Leito, Liesbeth Leito i Wini Jansen, Raymison Leito, Milton Leito i Janihaima Martina, Elise-Marie i Elvis Leito, Rayshall Leito i Amalfi Maduro. Akto di entiero ta djabièrnè 14 di mart for di El Tributo pa santana Barbver. Bishita 1or.

ROSINI
Felis Martinus (86 aña)
Mihó konosí komo Felis ku tabata traha na Kooyman Dominguito
A laga atras su kasá Abigail Rosini, yunan Ivonne, Swinda, Ludwin, Shirley, Erno Rosini, Judith Rosini i Elvin Hooi, Edson Rosini i Duzaira Cecilia, Eithel i Amaris Rosini-Apostel. Akto di entiero ta djaweps 13 mart. Pa 3.30or tin un respòns na El Tributo siguí pa santana Soto.

MARTINA
Gertruda Victoria
Mihó konosí komo Bea
A laga atras su yu Marlon Martina, rumannan Sira, Frida, Ronny Martina, Merita Jansen, Ada Martina i Lucio Marta, suegra Mila Haard, ñetunan Marlisse i Rayan. Akto di entiero ta djaweps 13 di mart 4or for di misa Gr. Kwartier pa santana Gr. Kwartier. Promé ku entiero tin un s.s. di misa. Bishita 1or.

REGALES
Jean-Pierre Felipe
Mihó konosí komo Pipo
A laga atras su mama Baby Regales, rumannan Diomara Regales, Raycheline Sling, Frank Boye, tanta i tionan Ria Regales, Marisela Regales, Xiomara Maria, Jeritza Paulina, Cheryl Maria, Jacqueline van Eindhoven, Solange Mooring, Mariola, Sharlice, Sholine Maria, Boys Regales, Samuel Casseres, Cedrick Casseres, Tyrone, Edson, Roland Maria, namorada Jadienne Dal i famia. Akto di entiero ta djarason 12 di mart 4.30or for di Bottelier pa santana Bottelier. Bishita 1or. Promé ku entiero tin un sirbishi. Trahe Alegre.

Lorito ta yama tur hende un felis djarason. Nos a sleip nos pik i no a pasa un bon bòrstel riba nos plumanan, pasobra na manifestashon nos ta bai! Ojo shonnan, Lorito ta na kaminda.
*********
Nos ta kontentu ku Helmin a realisá, ku el a kue e kaminda robes di ataká hende djis pa ataká. E mester kòrda, ku no ta tur hende ta dispuesto pa aseptá su “chambonadanan”. Nos no ta skucha, pero kere nos ku tin hende ku ta sigui monitor e desaroyo di serka. Asina ku ta nesesario nos lo bin bèk!
*********
Loke a duel nos hopi den e atakenan di Helmin no ta e atake personal ku el a lansa kontra nos. E kos ku mas a duel nos, ta ora el a bisa ku nos korant no ta klase. El a ofendé henter un korant ku su doño, staf i personal. Pa su informashon i nos a bai chèk esei: nos ta e úniko korant ku tur biaha di nobo a publiká tur su komunikadonan i nos a sigui su ponensianan den reunion públiko (pasobra nos ta un di e pokonan ku ta sigui e reunionnan aki ainda). Nos ta haña, ku esei ta nos responsabilidat. Nos a bai wak e otronan ku si el a gaba i nan a skor masha leu for di e espasio ku nos a duna tur tempu na PS. Ta bon pa bisa, ku no opstante su ponensianan, na momentu ku e tin kosnan relevante, nos lo sigui publiká! Dje demokrátiko ei nos ta!
*********
Nos no a gusta e deklarashonnan di Doña Omayra riba e emisora ku ta kalumniá, ofendé i indiká hende tur anochi. Lógikamente Doña Omayra ta mira espasio pa introdusí su lei di medio, pero nos ta kere, ku mester hasi algu awor aki! E lei ta duna espasio pa hasi algu, pero ta kurashi mester tin pa atendé un hende ku ta kometé instigashon. Lei ta prohibí lenguahe instigatorio. Den e kaso aki nos mester mira atrobe den direkshon di OM, ku no mester sinta warda den nan “koepel” pa hende hasi denunsia, pero ku tambe por tuma un aktitut pro-aktivo. Ademas Büró Telecommunicatie tambe tin un ròl ora tin medionan ku ta pretendé di violá reglanan di e pèrmit ku nan a haña.

WILLEMSTAD – Dia 2 di mei awor, un djabièrnè, lo ta ofisialmente un dia liber. Ta antisipá tambe ku riba e dia ei lo tene e aktividatnan relashoná ku Dia di Internashonal di Trabou (òf Dia di Obrero/Trahadó manera hopi hende ta bisa popularmente).
Djaweps 1 di mei ku ta Dia Internashonal di Trabou ta liber kaba komo ku ta Dia di Asuncion. A base di esei a pensa pa duna e dia siguiente liber pa asina konmemorá Dia Internashonal di Trabou. Ta promé bes for di 1913 ku Dia Internashonal di Trabou ta kai riba un dia ofisialmente liber (ku no ta djadumingu).
Esei ta nifiká ku esnan ku ta traha 5 dia pa siman lo ta liber for di djarason te e siguiente djaluna. Por sierto ku skolnan ya kaba den nan interinario lo ta liber dia 2 di mei. Esnan ku ta traha djasabra mester traha normalmente ku eksepshon di esnan ku haña un dia liber obligatorio di nan doño di trabou.
Informashonnan ku LA PRENSA a haña ta indiká, ku aktualmente nos leinan no tin un provishon ku ta duna liber outomátikamente e siguiente dia di trabou, ora ku Dia Internashonal di Trabou kai riba un dia ofisialmente liber. Den e lei nobo ku a drenta na vigor na aña 2000 a disidí, ku si Dia Internashonal di Trabou kai riba un djadumingu lo ta liber e siguiente djaluna. Si ta riba djasabra no ta liber, pasobra ta konsiderá djasabra un dia normal di trabou. Pero den e Areglo Laboral di 2000 no a tene kuenta kiko lo hasi si Dia Internashonal di Trabou kai riba un dia ofisialmente liber manera Asuncion.

WILLEMSTAD – No por usa e mas o ménos 20 mion florin di Fondo di Solidaridat ku ta disponibel pa e islanan mas chikí di Antia pa aliviá preis di gasolin i produktonan petrolero na Kòrsou. Kontrali na e impreshon ku ta reina, a hinka e sumanan ku ta disponibel pa Boneiru, Saba i Statia kaba den nan presupuesto pa 2008, asina un bosero di Komishon Superfishon Finansiero a bisa LA PRENSA awe mainta.
Den e proposishon ku entre otro e miembro di Konseho Insular Gregory Damoen a hasi pa temporisá preis di produktonan petrolero, el a sugerí pa atendé ku e struktura di preis di produktonan petrolero, entre otro e akseins i OB ku tin riba e produktonan aki. Banda di esei el a sugerí pa usa e 20 mion florin ku ta bin liber di Fondo di Solidaridat awor ku Ulanda ta tuma responsabilidat di e islanan mas chikí pa suavisá e impakto. Damoen a splika ku komo Ulanda a tuma responsabilidat di e islanan mas chikí di Antia no tin nesesidat mas pa Gobièrnu di Antia (lesa Kòrsou ku ta e kontribuyente mas grandi di Fondo di Solidaridat ku 55 porshento) hinka sèn den e islanan BES. A pensa ku e suma ku ta bin liber por usa pa Kòrsou frena e impakto di preis di petroli riba nos ekonomia. E bosero di Komishon Supervishon Finansiero a bisa ku pa 2008 di tur manera esei no ta posibel mas pasobra ya kaba a inkorporá e loke e islanan mas chikitu mester haña di Fondo di Solidaridat den nan presupuesto pa e aña aki. E no por a bisa kiko lo bai pasa ku e Fondo despues di 2008. E Konseho a determiná ku e islanan den un tèrmino di 3 aña ainda por sigui ku un défisit limitá pero nan mester tin presupuestonan balansá den 3 aña di tempu. Despues di Saba, awor a aprobá presupuesto di Boneiru ku un défisit di 17.7 mion florin. Gobièrnu di e isla mester bai tuma medida na rason di 15.7 mion florin pa baha e défisit te na 2 mion florin. Meskos ku pa e otro islanan pa Boneiru tambe ta konta ku den tres aña di tempu mester tin presupuestonan sin défisit, asina e bosero a bisa.