Falta un par di dia mas pa nos drenta siman Santo, na mundo un siman hopi respeta door di tur cu ta un bon Cristian. Nos ta cabando cu e era di cuaresma cu pa hopi hende rond mundo ta un temporada hopi importante. Awe ta bon pa nos reflexiona ariba e dos fiestanan hopi grandi cu nos conoce como Cristian. Esun prome y nos por bisa esun cu nos ta sera aña cune ta Pasco di Nacimento. Pasco di nacemento ta un fiesta familiar, na unda e union familiar na prome instante ta hopi importante.
Ya for di basta luna prome cu e fiesta importante aki, famianan ta cuminsa pa drecha nan hogar, esta nan cas, cu verfmento, docoracion, trahamento di ayaca etc. Ta pensa con pa come hunto, con pa bishita famia y conocirnan. Ta purba di busca paz na unda esaki por ser alcansa. Ta un temporada hopi bunita y importante den bida di cada ser humano, pero especialmente di un famia completo. Canticanan hopi bonita ta keda composita, cu palabranan cu ta alimnenta alma y curpa di cada ser humano.
Awor si nos papia di Pasco di Resureccion, anto aki nos ta pensa ariba nos propio bida, aki e ser humano ta haya e oportunidad pa dedica mas di 40 dia largo ariba su propio bida. Aki ta na unda e cas personal, e persona, su alma, mente y corason ta keda limpia y prepara pa un temporada asina importante. Aki ta na unda nos ta haya e oportunidad unico pa nos por repasa nos propio bida, pero repasa di berdad y para keto un rato, especialmente na unda nos ta kere cu nos a comete errornan cu a causa nos propio persona daño y cu a keda reflexiona ariba bida di e sernan cu tin un contacto directo cu nos, esta nos famia.

ORANJESTAD- Un guante di boxeo a ser colga como recuerdo Dialuna mainta 10 di Maart 2008 momento cu Dios a yama den su reino un gran Arubano cu a dedica tur su bida na boxeo amateur,professional y internacional.
Ta trata aki di Sr. Mateo Efigenio Kock, mihor conoci como “Fenchi” un homber di deporte tanto den boxeo como futbol.
Sr. Fenchi Kock a nace dia 25 di November 1925 (82 anja) y a fayece Dialuna mainta na su cas Savaneta 361 despues di tabata hopi dia malo.
Dios a manda jama Fenchi pa gradici’e pa tur loke el a haci pa Aruba riba tereno deportivo.
Fenchi tabata un bon futbolista y a limita den Union Santa Cruz y Tricolornan di Solito R.C.A.
Debi na un accidente di auto el a retira di futbol y a dedica su mes na boxeo amateur y profesional como entrenador.
Fenchi a sirbi servicio militar “Schutterij” na Aruba durante segundo guera mundial.
No solamente Sr. Fenchi Kock tabata entrenador di boxeo pero el a funda Aruba Boxing Association pa asina Aruba haya reconocimento internacional pa boxdonan di Aruba por a competi internacional y e mes na varios ocasion a bay exterior cu boxdonan pa defende nomber di Aruba exitosamente.
Tur su bida el a dedica na boxeo, entrena un cantidad di hobennan cu a bira grandi den boxeo local y internacional. Tur dia Sr. Fenchi Kock tabata entrena boxdonan amateur y profesional, sea na Santa Cruz, Savaneta, San Nicolas, Playa, Dakota, Noord y varios districto.
Pa menciona algun boxdo cu Fenchi a yega di yuda den boxeo sea como entrenador, den skina of cu conseho den boxeo, Juan Maduro, Efi Croes, Gerrit Croes, Mai Croes, Romualdo Croes, Reginaldo Curiel, Sugar Boy Nando, Battling Siki, Fenton, Nulfo Steba,

ORANJESTAD - Enconexion cu Himno y Bandera y Pasco Grandi, gerencia di SERLIMAR kier avisa tur negoshinan y e publico en general, cu e horario di operacion di e landfill y containerpark na Parkietenbos lo ta como lo siguiente:
- 18 maart: 8.00 di mainta pa 12.00 di merdia
- 21 maart: sera
- 23 maart: 8.00 di mainta pa 12.00 di merdia
- 24 maart: 8.00 di mainta pa 12.00 di merdia

E horario aki naturalmente lo wordo aplica solamente riba e fechanan menciona, pues tuma bon nota di esaki ya cu despues di e horario di ciere no lo haci ningun excepcion encuanto deposito di desperdicio na Parkietenbos. SERLIMAR ta desea un y tur un bon dia di Himno y Bandera y un bon Pasco Grandi.

ORANJESTAD - Departamento di Enseñansa, seccion Examenbureau ta participa na e candidatonan cu ta inscribi pa Landsexamen MAVO/HAVO/VWO cu e rooster di e “mondeling gedeelte commissie-examen” ta cla.
Esaki ta nifica cu cada candidato mester pasa busca su rooster pa ta informa di e ora y fecha di nan examen oral (mondeling gedeelte commissie-examen).
Awe por pasa busca esaki despues di merdia (1.15). Y for di dia 13 di maart di dialuna pa diabierna di 7.45-11.45 y 1.15-4.15 na Examenbureau situa na Seroe Blanco 14.
Ta e responsabilidad di cada candidato pa pasa busca su rooster.
E examen oral ta for di dia 31 di maart te cu 25 april 2008 y ta tuma luga na Colegio Arubano. E candidato mester ta presente pa 2.30 di atardi.
Por fabor tene na cuenta cu nos oficina ta sera dianan 17, 18, 21 y 24 di maart. Pa cualkier pregunta por yama e seccion concerni na telefon 583-8684.

ORANJESTAD- JCI Aruba orguyosamente ta anuncia cu e Vice Presidente di JCI International encarga cu JCI Dutch Caribbean, Gabriela Filippini tabata di bishita na nos isla pa un corto estadia. Meta di su bishita ta pa inicialmente conoce e directiva y miembronan di tanto JCI Aruba como JCI Aruba Female. Y na mes momento adqueri un bista general di e situacion gubernamental y economico di nos pais. Mirando e caracter internacional di su posicion den JCI, esaki sin duda algun lo worde promove den conferencianan y congresonan mundial di dicho organisacion.
Durante su estadia na Aruba ela bishita diferente companianan y medionan di prensa manera Valero, Centrale Bank, CMB, Magic FM y Canal 90. Tambe Gabriela Filippini hunto cu representantenan di JCI Aruba y JCI Aruba Female a bishita Presidente di Parlamento Sra.Wyatt-Ras. Tur esaki cu e meta pa promove JCI aki na Aruba y na mesmomento crea posibilidad pa traha hunto den un futuro sercano.
E miembronan y invitadonan di JCI Aruba y JCI Aruba Female tambe a ricibi un training tocante ‘Leadership y Corporate Social Responsalibity’ cu a wordo presenta pa e JCI Vice Presidente Internacional Gabriela Filippini cu ta un Certified JCI International Trainer.
Gabriela Filippini sigur lo hiba informacion valioso y interesante di tanto di JCI Aruba y JCI Aruba Female como nos isla cu ne durante su compromisonan internacional y sigur tambe Argentina!
JCI Aruba ta forma parti di e organisacion international JCI (Junior Chamber International). E meta principal ta pa crea lidernan profecional den comunidad y na mesmomento contribui na un cambio positivo. Pa logra e meta aki JCI Aruba ta ofrece su miembronan progamanan aliña den areanan di Individual, Business, International y Hermandad. Manera e slogan ta bisa BE BETTER. E organisacion ta duna hoben profecional tur e instrumentonan pa ta miho den tur aspecto di nan trabou, bida personal y pa comunidad.

ORANJESTAD - Cu sumo placer Comision Organisador di Premio Promocional Santa Anna ta anuncia e ganador di dicho premio pa aña 2008. E aña aki e premio ta bai pa Grupo Uni di Centro di Bario Noord, un grupo di 25 ama di cas masha activo riba tereno social y cultural.
E grupo aki a ser funda dia 22 di maart 1978, bou guia di Sra. Glenda Gil, e tempo ei “stagiaire” na C.B.Noord. E grupo ta un grupo social, democrata, cultural cristian y tin su propio bandera, himno y logo. Fuera di organisa actividad pa nan propio menbrecia, nan ta masha activo riba tereno social.
Nan ta organisa actividadnan pa muchanan menos afortuna, pa muchanan cu desabilidad y pa personanan cu pa un motibo of otro ta den rolstul.
Ademas nan a yega di representa nos dushi Aruba riba tereno cultural na Corsou, Boneiro y Republica Dominicana. Tambe nan ta duna atencion na esnan di KIA (prison).
Pa mas di 20 aña caba nan ta sirbi tur invitadonan durante e celebracion di Himno y Bandera na St. Annaschool. Nan ta ehempel pa tur ama di cas aki na Aruba. Fuera di ta desempeña nan tarea di ama di cas, nan ta den sirbishi di comunidad di Aruba y di nan dushi bario di Noord en particular.
E aña aki, pa ser exacto 22 di maart, nan ta cumpli 30 aña di existencia. Ricibiendo e premio aki merecidamente, ta e mihor forma pa corona nan di 6 lustro.
Tambe e aña aki ta entrega un premio special na Sr. Eduardo(Eddy) Tromp, pa su aporte enorme na cultura musical di nos pais Aruba. Eddy a hasi hopi riba e tereno aki.
Si solamente pensa riba e programa radial Butishi di Alegria nos tin un idea con grandi e aporte di Eddy ta. Ta pesey mes Comision Organisador ta di opinion cu tanto Grupo Uni como Eddy mester ser honra pa nan grandisimo aporte.

WILLEMSTAD – Pa polis drenta den kas di un hende e mester tin un dokumentu di un wes komisario ku ta dun’é pèrmit pa e drenta. Sin e ‘last tot binnentreden’ akí e no por drenta si e no haña pèrmit di e doño di kas. Esaki ta loke abogado Nelson Navarro a splika LA PRENSA awe.
LA PRENSA a kombersá ku Navarro relashoná ku un kaso ku a tuma lugá djamars último, ora e polisnan di 0-Toleransia a drenta den un kas di famia sin ku nan a mustra e habitantenan e ‘last’ di wes komisario promé ku nan a drenta paden. Despues ku nan tabata den e kas pa algun ratu i a pone tur hende drumi abou, un di e polisnan a introdusí su mes komo fiskal ousiliar. Ora e doño di kas a puntr’é si e tin pèrmit pa drenta den e kas, un otro polis a saka un papel i ‘primi’ esaki den kara di e doño di kas. Ora e doño di kas a bisa e polis ku e no por a lesa kiko tabatin skibí, e polis a kontestá ku ta ‘mustra’ (tonen) so e tin ku ‘mustra’ e papel. Mes ora e polis ku a identifiká su mes komo fiskal ousiliar a kontestá ku ta esei ta e ‘last’.
Mas aleu Navarro a splika ku polis mester buska indikashonnan konkreto ku tin echonan kastigabel ta tuma lugá den un kas, promé ku nan por disidí nan drenta den e kas. “Despues di hasi investigashon, akumulá prueba i papia ku testigunan, polis por pidi un wes komisario un ‘last’ pa drenta den e kas en kestion. Solamente si ta trata di ‘heterdaad’, polis por drenta un kaminda sin e ‘last’ di wes komisario.”

NEW YORK, - E mucha muhé a bandoná su kas na New Jersey ora e ta’tin 17 aña pa biaha bai New York i traha komo kantante di Rhythm & Blues na sentronan nokturno.
Awor na edat di 22 aña, inkonsientemente el a bira protagonista di e drama ku a pone Gobernador demókrata di New York, Eliot Spitzer, renunsiá.
Su nòmber ta Ashley Alexandra Dupré, i di akuerdo ku loke The New York Times a publiká den su artíkulo “E muhé meimei di kaida di Gobernador” yama “Kristen”, e prostituta di élite ku ta’tin enkuentronan ku Eliot Spitzer 13 di febrüari na Hotel Mayflower di Washington.
E hóben di New Jersey último dianan a keda den su apartamento na Manhattan, asina e korant neoyorkino a informá den su página di Internet.
Apénas djaluna último el a hasi aparishon na Korte federal, kaminda a asigná un abogado pasobra a pronostiká ku e lo ta testigu den e kaso kontra kuater persona akusá di operá un ret di prostitushon yamá Emperor’s Club V.I.P.
Den un entrevista telefóniko, Dupré a bisa ku el a drumi masha tiki último dianan debí na stress paso e ta involukrá den e kaso. “Mi no ke pa nan mira mi komo mònster”, e hóben a agregá.
Di su banda, Don D. Buchwald, abogado designá pa representá Alexandra, a hasi menshon ku a sita Dupré p’e testifiká komo parti di e investigashonnan, pero el a evitá papia di e dia ku e hóben a kuminsá traha pa Emperor’s Club i ki dia el a konosé e eks Gobernador Eliot Spitzer.

Skina di Sorti, awe djaweps 13 di mart di 2008, ta kuminsá ku deseá tur hende un bon dia. Tin algun konsepto ku si nos polítikonan no internalisá (hasi parti di nan sistema emoshonal i rashonal), nan no por elevá nan mes riba e nivel aktual di kanibalismo moderno (instinkto defenso ku ta redundá nan akshonamentu pa hasi daño no otro su imágen). Hiba un debate ta nifiká ku bo mes tin un kuadro di pensamentu ku bo ta defendé i komo táktika bo ta mustra riba inkoherensia den e pensamentu opuesto. Sin kuadro di pensamentu propio un debate no ta posibel.
****
Evaluá i analisá kuadro di pensamentu di un otro, no ta un debate, i ta nifiká ku bo ta buska pa komprondé ta kiko e kuadro di pensamentu ta, i den un siguiente fase por analisá i evaluá e kuadro di pensamentu pa despues saka un ke otro konklushon al respekto. Na momentu ku bo saka ékis konklushon, bo por papia di un kuadro di pensamentu derivá riba kual bo por debatí ku e sostenedó di e kuadro di pensamentu original òf otro derivadonan.
****
Den nos práktika polítiko, ta masha poko tin un kuadro di pensamentu propio (lokual ami a bini ta señalá den un forma konsistente) i esnan ku no tin un kuadro di pensamentu propio no ta sigui un proseso pa yega na un kuadro di pensamentu derivá tampoko. Den Skina di ayera mi a indiká ku por ehèmpel MAN tabata esun indiká den oposishon pa profilá ku un kuadro di pensamentu propio i konsekuentemente mester tabata kla pa hiba debatenan fruktífero riba hopi tema di gobernashon.

NEW YORK, - E Gobernador nobo di New York, David Alexander Paterson, ta bira e promé hende pretu ku ta dirigí riendanan di e estado aki, i di manera ofisial i legal e lo bai tin un kargo di gran importansia.
Paterson a nase 20 di mei 1954.
E ta siegu total na wowo robes i vishon limitá na wowo drechi.
El a inisiá su karera polítiko na 1985, komo miembro di kampaña di David Dinkins, pa Alkaldia di Manhattan, kaminda el a keda opservá pa lider demókrata di e tempu ei Leon Bogues i a bai kuné komo representante minoritario den Senado.
Pa 2002 Paterson a bira lider di minoria demókrata na Senado.
Na 2006 el a kompetí ku Eliot Spitzer pa kandidatura pa Estado di New York, pero e votonan no a fabores’é.
Inkluso e tabata un di e kandidatonan pa remplasá Hillary Clinton na puesto komo Senador pa estado di New York, den kaso si e dama prekandidato demókrata gana kandidatura di e partido e aña aki.
Paterson tabata Vise Gobernador di New York.
Paterson ta konta ku ‘American Foundation for the Blind’, ku ta dediká na tratamentu di personanan ku ta sufri di pèrdida di vishon i tratamentu sikológiko pa e enfermedat aki.
E Gobernador nobo di New York ta kasá ku Michelle Paige Paterson i nan tin 2 yu: Ashley i Alex.

Ministerio Bida Abundante ta duna mas posibilidat pa famianan partisipá: Mucha te 10 aña por drenta grátis konsierto “Laga nos ta un”

WILLEMSTAD – No tin restrinshon pa niun edat pa e anochi di konsierto di “Laga nos ta un”. Ta un konsierto pa henter famia i no ta mara niun persona pa partisipá na sierto edat. Loke si Ministerio Bida Abundante ta purba di pone énfasis, ku e konsierto ta kosta 10 florin di manera ku por duna mas tantu hende e posibilidat pa partisipá e anochi aki. Mirando yamadanan ku a drenta, a disidí pa duna entrada liber na muchanan bou di 10 aña. Ta kere ku en bèrdat esaki lo ta un agregashon na mayornan den kaso ku tin yunan bou di 10 aña ku ta deseá di partisipá. Tambe pa evitá ku un famia ta wòrdu strobá pa partisipá pa motibu ku tin yunan bou di 10 aña.
Mirando e propósito di e konsierto aki, ta bon pa duna sosten na famianan ku tin hopi miembro ku ke ta presente riba e anochi aki. E interes ta kresiendo i ku di tur banda tin komentario pa presensiá e grandioso anochi aki. “Laga nos ta un” no solamente lo ta un konsierto, pero manera a keda partisipá, lo bai tin orashon durante e anochi aki, pa tur esnan ku tin un nesesidat. Orashon pa malesa, finansa, problema matrimonial, trabou, etc. lo ta algun di e puntonan di orashon ku lo konsentrá riba dje pa presentá dilanti di trono di Dios.
Di otro banda e agrupashonnan ku ta partisipá D-One, GMO, ERA, Guess, Rumba Band, Tune, Show i GIO ta den preparashon i ku diariamente nan mes ta konfrontá ku nan fanátikonan ku ta konfirmá ku nan lo bai t’ei e anochi aki. Kantantenan manera Ilvia Guistina, Mammy Luv, Ephrem J i Reinir Lijfrock tambe ta kla wardando e anochi yega. Tur e artistanan e anochi aki, lo kanta na Dios, ku otro palabra lo ta únikamente músika gospel. Tur e gruponan lo presentá gratuitamente i ku e fondonan rekoudá e anochi aki lo keda destiná komo e promé stap pa logra haña fondonan pa drecha e oula di Huize Habaai. E oula aki ta será for di 1995 i ku ta hasi ku e grandinan no tin un espasio pa nan dibertishon.

WILLEMSTAD – “Mi ke mas! Mi ke mas!” Ora nos ke kada bes mas i mas den nos bida, nos por yega fásilmente na un bida di satisfakshon i trankilidat? Outor Sylvia Varlack di Iglesia Grasia Abundante (IGA) a skibi un obra teatral riba e tema aki, kaminda ta ilustrá sirkunstansianan konosí pa nos tur den nos mundu moderno. Grupo di teatro IGA-DRAMA lo presentá e obra aki.
E obra ta dramatisá bida di Linchi ku ta haña su mes den hopi problema pa motibu di su deseo pa haña mas buskando pa yena e nesesidat pa ta felis i tin balor. Bo ta rekonosé Linchi? Bo ke mira su eksperensianan?
Lo tin solamente un funshon, riba djabièrnè 21 di mart 2008, di 19.00 pa 21.30 or’ na Sentro di Grasia na Zuikertuintje. Entrada ta 10 florin i por kumpra karchi na Sentro di Grasia. Pa mas informashon por yama 738-3927/ 6676930/6777204.

EFEX 2008, E Eksposishon di Teknologia ta na kaminda:

WILLEMSTAD - Di djaweps 15 di mei pa djadumingu 18 di mei den World Trade Center lo tuma lugá e di 10 edishon di EFEX. EFEX ta e eksposishon di mas grandi i mas popular riba tereno teknológiko den Caribe. EFEX 2008 lo tin tur kos tokante inovashon nan nobo, teknologia, Hardware i Software, telekomunikashon, kòmpiuter i tur sobrá kosnan ku tin di haber ku teknologia moderno pa bo negoshi i kas.
Mas ku 90% di e booth nan ta reservá kaba. Mirando e kantidat grandi di bishitante di añanan anterior, e organisadónan ta spera un Expo grandioso e aña aki atrobe.
E entrada lo ta grátis e aña aki tambe manera semper (djabièrnè, djasabra i djadumingu). EFEX ta invitá un i tur pa bin e Eksposishon, asina ta, skibi e dianan den bo agènda òf blackberry.
Invitado spesial durante di e reunion di partisipante lo ta Rene Boender.
E “Trend watcher” Rene Boender ta esun ku a kambia basta kos den merkadeo na USA.
E lo splika e partisipante nan di EFEX, ku ehèmpel nan tur e kosnan nobo, tur triki i moda riba tereno di merkadeo.
Rene Boender ta un presentadó hopi pidí internashonalmente i ta garantia pa un anochi edukativo i gezellig pa tur partisipante. Esaki lo tuma lugá 8 di aprel próksimo.
Komo preparashon pa EFEX lo sali un revista (15.000) grátis. E revista lo ser repartí pa mas ku 10.000 kas i tambe kaminda ku tin Go-weekly. Naturalmente ku tur bishitante di EFEX tambe lo risibí un revista.

NESS CITY, Kansas, Merka, - Un muhé di 35 aña a pasa dos aña pegá den pòchi w.c. di su frei na Ness City, na Kansas, te ora servisionan di urgensia ku un palanka a sak’é for di e kas.
Segun korant lokal The Hutchinson News, frei di e dama, kende no a keda identifiká, na febrüari último a yama ofisina di polis na telefòn pa informá nan ku algu straño a pasa ku su frei, komishonado polisial Bryan Whipple a bisa.
Yegando na e kas, polisnan a enkontrá e dama sintá riba e pòchi, ku múskulonan ku ta muriendo, pasobra e no a move debí ku e ta pegá den e pòchi pa loke Whipple a deskribí komo “medionan natural”.
Polisnan a kalkulá ku e dama tin mas o ménos dos aña sintá riba e pòchi.
Su frei tabata dun’é kuminda i awa.
Servisionan di urgensia ku un palanka ta’tin ku ranka e asiento for di e pòchi.
“Ku un palanka nos a ranka e asiento, i e asiento a bai ku e dama hospital. A kita e asiento na hospital”, Whipple a deklará.
E frei a sigurá ku e dama tur tempu tabata riba e pòchi pasobra e tabata ke, i, den prinsipio, e sheriff a dun’é rason.
“Ku su aktonan parse ku e dama tabata apoyá loke e frei bisa, pasobra ora nos a enkontr’é el a ninga bai den ambulans”, Whipple a sigurá.
“P’e seriedat di e situashon, nos a yama ambulans di tur manera, pero e dama no kier a bai”, Whipple a agregá.

WILLEMSTAD - Djasabra dia 8 di mart tabata un Dia Internashonal di Hende Muhé hopi original! E Dia Internashonal aki ta eksistí ya 100 aña i esei nos mester a selebrá, pero no ku un mainta di bebe kòfi i kome bolo. Ni tampoko dor di sali bai papia den un bar. Ni tampoko dor di un anochi di diskushon tokante di e problemanan ku hende muhé ta konfrontá. No, nos no mester papia, pero aktua!.
Riba e Dia Internashonal di Hende Muhé, 18 hende muhé a bini First Class Gym na Otrobanda pa traha duru duru pa dos ora i mei durante di un workshop "Defendé bo mes" pa hende muhé. Téknika di Kickboxing- i Jiu-jitsu a wòrdu demonstrá i praktiká. Kon bo ke men relashonnan entre hende hòmber i hende muhé mester kambia. Drecha mundu, kuminsá serka bo mes!
Pero un palabra di kuidou si pa e tatanan, rumannan, i amigunan di e damanan aki. Sierto di e partisipantenan tabata asina entusiástiko ku nan kier bai praktiká e loke nan a siña riba Bo........ Ojo! Podisé ta tempu pa un fakansi chikitu, na unda e folder di e cruise ei a keda?
Pa mas informashon tokante di e workshop por tuma kontakto ku e trainers Glenda Poeder (banda pretu kickboxing, cell 512-8703) i Charlotte Doornhein ( banda pretu jiu-jitsu, cell 512-1389). Òf wak e online magazine di Kòrsou www.cpost.nl bou di "Sportief op Curacao".
Diesocho hende muhé a partisipá na e workshop 'Defendé bo mes' pa hende muhé. E workshop ta pa hende ku no a train ántes, di edat 14-60 aña. E workshop tin vários biaha pa aña. Dos trainers femenino ta duna e workshop: kickboxer Glenda Poeder (dilanti, banda robes) i jiu-jitsuka Charlotte Doornhein (meimei, dilanti). Asistentenan: Alexandra, Ilona, Sue, Susan, Tamara (den t-shirts pretu).

DAAL
Adolf (65 aña, repentino)
Mihó konosí komo Barbaroso òf Lopez
A laga atras su kasá Zulay Daal-Rodriguez, rumannan Domenilia, Heronimo, Lourencio Daal, Lucia Wanga-Daal tur ku nan yunan. Akto di entiero ta djabièrnè 14 di mart for di misa Montaña pa santana Montaña. Promé ku entiero tin un s.s. di misa 3.30or. Bishita 1or. Trahe alegre.

MARTINA-MATHILDA
Marrise Idy 59 aña, trágiko)
Mihó konosí komo Marisa Bugalú
A laga atras su kasá Ulrik Martina, yunan Vidalis, Shailon, Radoiska Mathilda, Xiomara i Ruud Jonkman, Brenda i Jan, Frienéska, Wegarda i Dok. Akto di entiero ta djasabra 15 di mart for di El Consolador pa santana Seru Pietermaai. Promé ku entiero tin un respòns 3.30or na El Consolador. Bishita 1or den Sala Celeste.

ALLEE
Victor Augusto
Mihó konosí komo Totto
A laga atras su yunan Victor, Edward, Francis, Esmeralda, Waldemar Allee, ñetunan Richeline, Diangelo, Jenny-ann, Daimari, Serlon, Jeanneretty, Edwardson, Jarnelys, Richently Allee, Edelbert, Sinderley Serbony. Akto di entiero ta djasabra 15 di mart for di El Señorial pa santana Memorial Park. Bishita 9or. Promé ku entiero tin un respòns 11or na El Señorial.

ANASAGASTI
Elga Caridad (54 aña)
A laga atras su yu Faralice, rumannan Randell, Angel i Terri, Gisela, Arlina i Rupert, Silvio i Joyce, Sandra. Akto di entiero a tuma lugá djasabra 8 di mart na Eindhoven, Ulanda.

Lorito ta yama tur hende un felis djaweps. Lorito a bula, bula i bula pa nos konta kuantu hende tabata t’ei ayera. Nos a keda hopi desapuntá. Na lugá di un manifestashon masal, nos a haña muchu poko hende pa realmente manda un mensahe kla. Esei no ta nifiká sinembargo, ku no mester skucha opinion di esnan ku a manifestá den último dianan. Lo ta un akto di arogansia masha grandi pa dal bai, hasi komo si fuera no tin opservashon krítiko i malkontentu den nos komunidat.
*********
Si no ta pa elementunan supversivo i ku no tin rèspèt pa nan ko-suidadanonan, Lorito tambe lo tabata presente ayera. Lorito no por uni ku hende ònbeskòp, frustrá, mente chikí i ku kompleho di inferioridat. Ta bon pa Lorito bisa, ku pa loke ta trata struktura estatal, Lorito no ke nada (lesa bon: nada) ku tin di aber ku Sint Maarten. E úniko eksepshon ku nos kier hasi ta pa korte pasobra nos ta kere ku no por otro. Asuntu di un PG kompartí, un Banko Sentral kompartí, un moneda kompartí, un Polis kompartí, un Duana kompartí, un SVB kompartí, un APNA kompartí etc. etc. no ta haña nos apoyo. Ademas nos ta di e grupo ku ta kere ku Sint Maarten no tin derechi di haña un status outónomo den Reino (ainda). E isla simplemente no ta kla p’e!
*********
Kòrsou si ta kla infrastrukturalmente i tin sufisiente rekurso humano pa haña un status outónomo den Reino. E úniko problema ku nos tin, ta nos mentalidat di esun versus di e otro. Si bo tende un dirigente polítiko pretu papia malu ayera nochi di un intelektual pretu meskos kuné (diskulpa ku nos mester pon’é asina skèrpi), anto ya bo sa ku nos ta leu for di kas. E mesun dirigente ta boga pa independensia, pero ta ku ken e kier bai independensia anto si bo no tin rèspèt pa bo mes hendenan kalifiká?

WILLEMSTAD - Niun di e partidonan di e Aliansa Patriótiko a saka un komunikado awe mainta pa duna nan opinion riba e manera ku kosnan a bai ayera. Den privá, algun di e dirigentenan a ekspresá desapunto, pasobra nan a kere ku lo a bin hopi mas tantu hende ku e kantidat grandi ku a asistí na Hòfi Biesheuvel resientemente. Algu mas ku mil hende a hasi akto di presensia ayera. Na momentu ku diferente dirigente a hiba palabra, ainda kosnan tabata masha kurú ainda. Kiko ta kousa di e kantidat ménos di hende ku a hasi akto di presensia no ta masha kla. Algun hende ta tira esei riba e hecho ku ta den siman i na un lugá muchu difísil pa alkansá. Algun otro hende a bisa, ku ounke nan ta kontra, nan no kier asosiá nan mes ku sierto gruponan ku krea bochincha manera Niun Paso Atras, PLKP i Pueblo Soberano. Un grupo a bisa ku e meta di ayera no tabata masha kla, komo ku e manifestashon a kuminsá komo algu kontra e proseso estatal i a bai kaba den un meskla di kos kaminda inkluso a hinka temanan manera sèks ku animal i sèks públiko na Ulanda den e temanan ku a bin dilanti. Algun dirigente a papia palabra insolente ku sigur a zona hopi duru den e transmishon na radio.
LA PRENSA mester bisa, ku di tur manera e manifestashon no ta algu ku outoridatnan na mando por ignorá. El a manda un señal kla ku tin sierto malkontentu riba diferente tema.
Un di e puntonan ku a disidí ayera ta pa bai bario awor ku e mensahe. Ta konosí, ku den pasado hopi ta e partidonan ku a anunsiá ku nan lo bai bario (manera e famoso Krusadanan Popular ku a kaba na aros i koko) i ku despues di tempu e interes a baha gradualmente.
Te na momentu ku LA PRENSA a bai imprenta awe, no tabatin niun komentario ofisial di Aliansa Patriótiko riba kon nan ta pèrsibí e manifestashon. Por sierto, ku gran ousente ayera tabata lider di Democrat Norbert George ku a preferá di bai hasi un biahe pa Ulanda serka VNG ku akudí na un manifestashon popular ku e mes a invitá p’e.

WILLEMSTAD – E Asosashon di Doñonan di Pòmp di Gasolin (COPDA) no a haña invitashon pa partisipá den e komishon pa studia alternativanan pa e impakto di preis di produktonan petrolero riba nos komunidat. E desishon pa no invitá COPDA a kousa masha strañesa, no pasobra COPDA ta un protagonista importante riba e tereno aki pero tambe pasobra pa mas ku 10 aña COPDA ta un di e pokonan ku a bin ta mustra riba e nesesidat imperativo pa atendé e situashon di energia ku nos komunidat lo konfrontá. “Awor aki nos ta koriendo tras di e hechonan”, asina sekretario di COPDA Norman Perry a duna di konosé. Pa loke ta trata e desishon pa no invitá COPDA, Perry a bisa ku aparentemente ta konsiderá un tipo di “enfant terrible”.
“Nos opinionnan pa loke ta trata posibel alternativanan ta masha kla”, asina Perry a bisa. Perry a bisa ku mester hasi un estudio serio di un posibel afiliashon na e inisiativa venezolano Petro Caribe. Ademas tin e oferta pa pone kabelnan di koriente entre Venezuela i Kòrsou. “Posiblemente hende lo pensa ku esei no ta posibel pero teknologia ta avansando”, asina Perry a bisa. Perry a bisa tambe ku mester wak tur e komponentenan di struktura di preis di gasolin, disel i otro produktonan. Pa yega na esei mester haña e fakturanan mira ku CUROIL ta paga.
E sekretario di COPDA a bisa ku su organisashon lo no aseptá pa mishi ku e márgen di ganashi di doñonan di pòmp ku awor aki ta 12.35 sèn pa liter. “Ya ta 10 aña kaba ku no a ahustá e porsentahe aki i por bisa ku nos a kontribuí ku e situashon mas ku 10 aña kaba”, asina Perry a bisa.

PHLIPSBURG/WILLEMSTAD – Inspektor di polis Alfred “Churchill” Marsdin a haña su libertat ayera nochi, despues ku a interog’é pa espasio di 10 ora relashoná ku alegashonnan ku e tabata enbolbí den iregularidatnan na momentu ku e tabata Hefe di Imigrashon na Aeropuerto Internashonal di Sint Maarten. Den un entrevista ku e korant The Daily Herald despues ku el a bandoná prizòn, e funshonario di polis a proklamá su inosensia i a insistí ku e tabata víktima di un intento kruel pa asesiná su karakter.
Kontrali na e kaso di Derrick Holiday ku outoridatnan a detené ku un despligue di forsa eksagerá, e biaha aki Ministerio Públiko a invitá Marsdin pa presentá na Ministerio Públiko. Despues di a hasié diferente pregunta a pasa pa su detenshon relashoná ku e sospecho ku el a falsifiká dokumentunan di imigrashon. A hib’é prizòn Point Blanche pa interogashon. E detenshon di Marsdin ta e di tres di un funshonario haltu di polis na Siunt Maarten den 9 luna i e di dos den un luna di tempu. Su detenshon tabata kombersashon di dia na Sint Maarten. Fiskal Taco Stein a bisa ku a prolongá detenshon di Marsdin i a haña aprobashon pa detené te mañan djabièrnè 3’or di atardi. Pero a lag’é bai ayera nochi 7’or. Famiananan i amigunan tabata pará na su kas na Walter Nisbeth Road ta ward’é.
Marsdin ku ta tambe un polítiko aktivo (number 10 riba lista di National Alliance den e último elekshon) a bisa ku nan kier tapa su boka, pero nan lo no logra hasi esei. Den un entrevista ku e korant Marsdin a bisa, ku e no tin nada di skonde i ku e no a hasi nada malu. “Mi ta 100 porshento sigur, ku mi no a hasi nada robes. Mi a traha di akuerdo ku proseduranan”, asina Mardsin a bisa. El a splika, ku nan a hasi’é un seri di pregunta riba iregularidatnan ku e lo a kometé na Imigrashon di aeropuerto. Algun di nan ta kosnan di basta aña kaba manera e hecho ku el a laga un hende ku no ta tin residensia drenta pa 100 dollar. El a bisa, ku e no ta korda e kaso aki, pero si el a laga e hende drenta lo tabatin bon motibu pa esei. Ademas nan a puntr’é tambe tokante di yudansa pa laga damanan di e stripclub Bada Bing drenta pais violando e protokòlnan eksistente. “Esei no ta bèrdat. Ademas si t’asina di kon nan no a tene mi será?”, asina el a puntra.