ORANJESTAD- Minister drs. Marisol lopez-Tromp ta puntra dicon ora di haci pantomina, yora manera kalakuna, grita & sapatea bo ta prome den rij, pero ora di traha debidamente pa Pueblo y informa correctamente bo nunca t’ey.
Pues e pregunta ta keda, pakiko bo no ta corre bay radio, television y corant awor y admiti cu Gobierno ta renobando Biblioteca Nacional na San Nicolas y cu e renobacion ta bayendo bon.
Gastonan di e reparacion, mantencion y renobacion aki lo suma mas cu AWG 300.000,- E trabaonan di mantencion na edificio di Bibilioteca Nacional na San Nicolas ta encera entre otro: instalacion di porta y bentanan nobo, reparacion di e pleisterwerk, drechamento di e dak, instalacion di un trapi di emergencia (brandtrap), cambio di plafond y adaptacion y renobacion di e ductonan di airconditioning pa evita cu sushi, pluma y insectonan etc. causa door di paloma y otro parhanan drenta den e sistema di airconditioning y den e edificio.
Ora cu e trabaonan di renobacion keda finalisa, e biblioteca ta bay keda hopi bunita cu instalacion nobo nobo di tubonan di airco. Por cierto, e biblioteca tin un bista tremendo riba henter San Nicolas, te hasta riba e compania MEMCO. Por ta di aki cu Mike de Meza a bin cu e idea descabeya cu e tubonan di airco di e biblioteca ta contene e bacteria di salmonela.
Na juli 2008 DOW ta premira cu tur trabao di renobacion lo keda finalisa. Minister drs. Marisol Lopez-Tromp ta pidi pueblo di San Nicolas especialmente nos hoben studiantenan pa tene un poco di pasenshi mas te ora cu e edificio keda cla.

ORANJESTAD- Den Paasvakantie ( 2 siman) Gourmet Cooking Club ta organisa un cooking camp pa mucha entre 6 y 12 anja di edad.
E meta di e camp ta pa sinja mucha con pa prepara diferente platonan, con pa traha den team, pa subi nan auto stimacion y sinja e habilidad den cushina.
Tur mucha ta prepara den cada les un plato di desayuno por ejempel scrambled eggs, pancakes, French toast, waffles, algo di cuminda cayente: spaghetti, Lasagna y tambe cos dushi: cupcakes, bolo, diferente cookie etc.
Nan ta sinja tambe con pa come tur dia un menu saludabel door di usa e "Food Pyramid" cu ta mustra e diferente productonan cu un mucha di e edad mester come pa keda saludabel.
Mayornan cu ta traha den e dos siman por manda nan yiu pa e siguiente dia y horario:
Siman 1: 17- 19 – 20 maart
Siman 2: 25 – 26 – 27 – 28 maart
Tin tres grupo pa dia: Grupo 1: 8.30 – 10.30 mainta
Grupo 2: 10.30 – 12.30 merdia
Grupo 3: 12.30 - 2.30 merdia.
Pa inscripcion y informacion jama : 5931-865 of 565-8881
Cupo ta limita. Bin pasa un vakantie na Gourmet Cooking Club y prepara despues tur bo snacks of cuminda pa bo fiesta "Master".
Sintonisa e programa di "Ban Cushina" na Tele Aruba Diadomingo 9 maart pa 7.30 anochi e goza di programa di Gourmet Cooking Club.

ORANJESTAD- Rotary Club of Aruba ta na caminda pa e di 28 Fiesta Rotaria dia 13 di April 2008 dilanti Talk of The Town.
Tur preparacion ta andando den full swing pa Fiesta Rotaria 2008 y esaki ta priminti di bira mas grandi ainda cu nunca. Miembronan di Rotary ya tin un luna bezig ta bendiendo e conocido rifa di Fiesta Rotaria.
Si ainda bo no a busca bo ticket hasi esaki serca tur miembro di Rotary. Tambe den week-end miembronan di Rotary ta para na diferente pomp station y supermarket rond di nos isla E biaha aki lo tin atrobe ariba e Diasabra prome cu Fiesta Rotaria, esta 6 di April, e famoso drive-through situa dilanti Talk of The Town Hotel pa bende rifa di Fiesta Rotaria.
Diadomingo dia 13 di April 2007, for di 10’or di mainta pueblo di Aruba por pasa di tent pa tent y cumpra mata, cuminda panja, comestible, muebles, hardware, buki, accesorios pa bisti y mucho mas. Kids Corner lo bin cu hopi sorpresa e biaha aki.
Tambe hardware lo ta hopi bon surti cu meubelsnan increibel, bunita y barata. E supermarket ta cla prepara for di trempan pa e reynan largo cu ta spera pa cumpra bon comestible pa bon prijs.
E matanan ta hopi bunita atrobe e biaha aki y tin di chiquito te grandi. Cuminda ta surti cu bon restaurantnan cu semper tey y hasta tin restaurant nobo den food corner.
Lo tin entretenimiento for di 10’or di mainta te cu 6’or di atardi pa tanto grandi como chiquito. Bin goza cu ya cu lo tin hope sorpresa e biaha aki. Lo nos acostumbrado Caha di Orgel, Pierewietje y Flash, Kwihi Steelband, Club di Movimiento Dance Group. Aruba, e biaha aki lo tin bailamento cu Orquesta Search, Reload, Tsunami y Dushi Band. Rotary ta gradici tur esnan menciona ariba cu ta coopera gratuitamente pa asina tin entretenimiento pa e publico di Fiesta Rotaria cu ta cumpra cos pa un bon causa.

Serge Mansur ta haci su entrada den politica riba mal pia


ORANJESTAD –Ministerio di Salubridad Publico, Medio Ambiente, Asuntonan Administrativo y di Stranhero, a emiti un comunicado di prensa como reaccion riba e politico Sergio Mansur di partido Democracia Real.
“Nos a tuma nota di comentarionan di sr. Serge Mansur den prensa local, unda e kier a corda tur hende cu minister Wever na maart 2004 a sera porta pa CAD, strobando e instancia aki pa haci su control den (algun) departamento cu ta resorta bao di Ministerio di Salubridad Publico y Medio Ambiente (awor tambe di Asuntonan Administrativo y di Stranhero).
Sr. Mansur sea “heeft de klok horen luiden, maar weet niet waar de klepel hangt”, of – y esaki ta mas di lamenta – hunto cu su entrada den politica a join e team di e gañadonan patalogico, cu dia pa dia aparentemente ta crece den miembrecia.
Si sr. Mansur NO a bay tras di calumnianan den prensa, pero a haci un esfuerso extra mediante un yamada na CAD pa verifica e situacion, lo ela siña conoce e berdad.
Hecho ta cu minister Wever NO a nenga CAD entrada na su departamentonan pa nan “doorlichting”, pero ela pone como condicion di e bishitanan ey, cu CAD lo mester a informe prome si e nombracionnan di e director di CAD y di e director di Directie Financiën e tempo aya SI a tuma lugar conforme mesun reglanan y leynan di contabilidad cu ta conta pa e departamentonan di minister Wever.
Straño, ademas hopi cuestionabel den e asunto aki ta cu sr. Mansur SI ta condena e posicion di Ministerio, pero - ni “à titre personnel”, ni como miembro y/of presidente di ATIA y/of Camara di Comercio - NO a cuestiona e tempo ey e nombracionnan di e directornan di CAD y di Directie Financiën.

WILLEMSTAD – E diskushon si por stashoná un vehíkulo na man robes di un kaminda ta sigui. For di despues ku LA PRENSA a señalá ku S.K.S. a aktua robes dilanti di Fundashon Kas Popular na Waaigat, kaminda nan a pone klèm di wil pa diferente vehíkulo ku tabata stashoná na man robes di kaminda, LA PRENSA a nota ku na diferente sitio mas ta permití outo stashoná na man robes di un karetera.
Resientemente LA PRENSA a publiká algun foto di vehíkulonan stashoná na man robes di kaminda den Mundo Nobo i tambe den Kaya Grandi di Otrobanda. E vehíkulonan tabata stashoná kaminda D.O.W. mes a marka lugánan pa stashoná. Pues e outonan tabata stashoná ku pèrmit di D.O.W. Den tur e kasonan tabata trata di kareteranan ku vianan den 1 direkshon. Sin embargo S.K.S. ta pretendé ku ta prohibí pa stashoná outo na man robes di un karetera. Awe LA PRENSA ta publiká un foto di un karetera ku vianan den 2 direkshon, kaminda D.O.W. mes a marka lugá pa stashoná na man robes di e kaminda. E foto ta saká na altura di Topogigio riba Roodeweg. Asta D.O.W. a pone un bòrchi di ‘wachtverbod na e banda drechi di kaminda.
E diferente ehèmpelnan akí ku LA PRENSA ta publikando, kaminda ta permití stashoná na man robes di kaminda, ta pa move S.K.S. pa nan splika konkretamente kiko ta pasando eksaktamente. S.K.S. mester splika dikon por stashoná na man robes den e ehèmpelnan ku LA PRENSA a menshoná. S.K.S. tin ku splika tambe si no ta bèrdat ku nos leinan di tráfiko ta kopiá for di e leinan di Ulanda. Finalmente S.K.S. tin ku splika dikon na Ulanda for di 1990, a saka for di RVV e obligashon di stashoná un vehíkulo ‘aan de uiterste rechterzijde van de rijbaan’. Pasó den e artíkulo 23 ei tin skibí; ‘Het vervallen van dit voorschrift en daarmee het openen van de mogelijkheid om een voertuig ook aan de linkerzijde van de rijbaan tot stilstand te brengen, is een verruiming en biedt meer mogelijkheden tot stilstaan en parkeren’.

TIBET, - A pega vários lokal i vehíkulonan na kandela awe meimei di un violensia ku a eksplotá na Lhasa, kapital di Tibet, agensia di notisia chines Xinhua a informá, despues di dianan di protesta riba kayanan n’e region disputá.
Algun testigu a bisa ku a kima vários negoshi i vehíkulonan, segun informashon.
Mas ku shen persona awe a bolbe sufri den kayanan di Lhasa, komo desafio pa outoridatnan chines, apesar di un fuerte presensia polisial i informashonnan di klousura di monasterionan, di akuerdo ku otro fuentenan.
Gobièrnu chines n’e region budista remoto a bira den foko di krítikanan ku kara pa Weganan Olímpiko di Pekin 2008, ku marchanan na mundu kompletu e siman aki pa rekòrdá aniversario number 48 di un lantamentu frustrá kontra outoridatnan komunista.
Entre 300 i 400 habitante i padernan a sali manifestá awe na Lhasa, un fuente ku a sita un testigu a bisa.
A arestá mas ku 10 pader budista, i tankinan di guera ta patruyá n’e plasa situá pegá ku Palasio di Potala.

Foto: Tibet 1403

Pòtrèt emití pa ‘International Campaign for Tibet’, por mira polisnan na Jokhang Square na Lhasa, Tibet. Manifestantenan rabiá a sende vehíkulonan di polis i di armada na kandela den sentro di Lhasa awe.

WILLEMSTAD - Algun mil empleado ta den wèlga ketu bai na Aruba, eksigiendo adaptashon di sueldo na subida di kosto di bida. Wes a bai di akuerdo ku e akshonnan basta esei no tin konsekuensia pa kompanianan vital ku ta importante pa ekonomia di e isla. Te awor aki no a logra haña un salida pa e intrankilidat laboral ku tin e isla den su gara henter siman. Por sierto ku awe tambe a informá ku na Kòrsou tur preis a subi den febrüari kompará ku yanüari. Nos tin detaye di e desaroyonan di Aruba i e situashon di oumentu di preis na Kòrsou den nos edishon di awe. (foto LA PRENSA ARUBA).

Skina di Sorti, awe djabièrnè 14 di mart di 2008, ta kuminsá ku deseá tur hende un bon dia. “The day after syndrome” ta lokual ta bini na mente ora ku mi tuma nota di pretenshon di e aliansa den mobilisashon. Sin un vishon kla di futuro, sin un plan konkreto òf por lo ménos un pretenshon kon tin di atendé ku e retonan real ku ta propulsá e impakto di ekonomia global riba nivel di bida di Kòrsou, éksito di e mobilisashon aktual no por ta nada otro ku aktivamentu di un bòm sosial.
****
Ta algu pió ku tempu a mobilisá kontra di e maneho di èks promé minister mr. Miguel Pourier su maneho di stabilidat ekonómiko (un maneho pa kontrarestá impakto di realidat ekonómiko di momentu), pa despues remplasá e impuesto riba ingreso for di aktividat ekonómiko (t’esei e BBO ta) ku un variante mas malu ainda. Simplemente no tabata tin maneho alternativo. Awor aki tin e mesun situashon.
****
Mi ta ripití ku oposishon no tin outoridat moral pa mobilisá, pasobra nan no tin un maneho alternativo. Pa buena marcha mi ke apuntá ku tin alternativa riba e maneho aktual. E problema ta ku e alternativa ta un maneho ku ta eksigí un otro aserkamentu filosófiko. Mi ta insistí ku e úniko kaminda pa un solushon real ta unu kaminda tin e disposishon mental pa “bloed, zweet en tranen”.
****
Pero e mobilisashon no ta unu di “bloed, zweet en tranen”, pero di “rozengeur en maneschijn”. Ta mobilisá entre otro kontra efekto inevitabel i irevokabel di kosto di energia. Ku Bestuurscollege a disidí di posponé sierto oumentonan ta mas un “bestuurlijke zwaktebod” ku e ta akto di bon gobernashon. Despues ku e Bestuurscollege anterior a dispidí plaka ku e fantasma ku yama fondo di energia, e Bestuurscollege aktual no mester laga espasio pa e pensamentu robes ku tin mas konènchi pa tofer saka for di sombré.

CHILE, - Bishita di dama hefe di diplomasia merikano, lo no bai dura mas ku 12 ora.
Rice lo bai tin enkuentro ku kansier Foxley i un sena ku Presidente chileño Michelle Bachelet.
Despues di su bishita na Brazil ayera, e Sekretaria di Estado di Merka, Condoleezza Rice, lo aterisá awe mèrdia na Chile, pa realisá tres aktividat ku e tin den su agènda, den ménos ku 12 ora.
Rice lo reuní ku kansier Alejandro Foxley pa trata asuntu regional i bilateral, tambe e lo asistí na mesa rondó ku empresarionan, akadémikonan i otro kolaboradónan di plan “Chile California Siglo XXI” i lo kulminá su bishita senando ku Presidente chileño Michelle Bachelet.
Di akuerdo ku Embahador merikano na Chile, Paul Simons, Rice a insistí p’e bai Chile, pasobra ámbos nashon ta kompartí un vishon positivo, ku ta fortalesé relashonnan bilateral.
“E agènda positivo ta basá den un vishon fortalesiendo demokrasia, komersio liber, hustisia sosial”, e diplomátiko a komentá.

Foto: Condoleezza Rice 1403

Sekretaria di Estado di Merka Condoleezza Rice ta zuai man ayera na e seremonia di bonbiní na su yegada na Air Force Base na Salvador, Brazil.

WILLEMSTAD – Awe mainta a kuminsá un reunion ekstraordinario di BC pa trata e karta di habitantenan di bario di Barbouquet i besindario a manda pa Gezaghèber. Nan a pone un ultimatum pa aktua den e kaso Las Almas, sino nan mes lo tuma lei den nan mes man i okupá tur tereno mañan mainta. Miéntras tantu un unidat spesial di SKS ta vigilando e situashon for di ayera nochi. LA PRENSA a komprondé sinembargo ku un patruya di SKS a haña menasa ku machete, pero nan no a sukumbí pa e preshon aki.
E reunion ekstraordinario di awe ta destiná pa yega na un desishon pa e aktonan ilegal di konstrukshon ku ta tumando lugá riba e terenonan di Las Almas. Tin indikashon ku internamente tin problemanan riba e kaso aki. Un di esnan ku ta oponé akshon fuerte ta diputado Anthony Godett, ku a bisa e siman aki ku mester studia e kaso mas mihó. Pero miéntras ta studiando e kaso, e situashon ta empeorando i tin mas konfiskashon di tereno ku no ta di esnan ku ta konfiská nan. Hasta tin vershon ku esnan ku ta kue tereno tin e plan ofisial di Verkaveling di e área den nan poder. Kon nan a hasi haña esei ta un misterio.
Ayera nochi habitantenan a tene un reunion na Hòfi Fon, den kua a disidí di manda un karta pa BC pa buska yudansa pa kaba ku e forma ilegal ku terenonan ta keda verkavel sin outorisashon di Gobièrnu. Tur e terenonan aki ta keda okupá pa stranheronan ku di un forma ilegal ta kue e terenonan aki i ta verkavel sin nan tin e papelnan korespondiente. LA PRENSA a drenta den kontakto ku gezaghèber Lisa Dindial, kende a splika ku mester yega na un desishon final den henter e asuntu aki. Despues ku el a risibí e karta, a yama un reunion ekstraordinario pa atendé e tema di urgensia aki, ya ku habitantenan a pidi un kontesta promé ku 5’or di awe tardi.

WILLEMSTAD – E tereno banda di fábrika di Coca Cola (Curaçao Beverage Bottling) a keda di dèmpel riba enkargo di CPA pa konstruí un “E Zone”. Den kombersashon ku Agustin Diaz direktor di CPA, a splika LA PRENSA tabata un tempu ku CPA tabata interesá den e tereno aki pa konstrukshon di un zona komersial. Esaki no tabata nada ku palabrashon, di manera ku a kuminsá ku dèmpel e área aki. Na momentu ku a kuminsá susha e área aki i ku CPA no por a hasi nada kontra di esaki, a disidí di wanta pendiente di akuerdonan ku gobièrnu. Segun Diaz ta sigui mustra, ku e asuntu di tereno rònt di haf, for di den tempu di 70 pa 80 ya tabatin sierto luchanan pa por haña e terenonan aki.
Tambe pa por a haña e kantidat di 87.5 mion florin pa konstruí e haf di kònteiner, mester a pasa e terenonan ku tabata bou di hendenan privá pa CPA. Esaki tabata un kondishon di Ulanda pa finansiá e proyekto aki. Mayoria di e terenonan den haf tabata den man di famianan Gorsira, Maduro i CTC. Despues ku e terenonan aki a pasa bou di CPA a haña enkargo pa eksploitá esakinan. Meskos ta e intenshon di e tereno banda di Coca Cola, ku tambe tabata intenshon pa CPA eksploitá, huntu ku terenonan na Baai Macola i Parera.
Ku komersialisashon di terenonan aki lo pèrkurá pa gobièrnu por haña dividendo for di esaki. En bèrdat un tempu tabata intenshon pa un fábrika di djus riba e tereno aki, pero esaki tabata muchu mas promé ku CPA a kuminsá dèmpel e laman aki. CPA ta keda pendiente di desishon ku gobièrnu mester tuma ainda pa e proyekto aki por tuma lugá. Inkluso e Baai Macola i Parera CPA ta mira dilanti pa ekspanshon di e haf di kònteiner pa por duna mas servisio.

WILLEMSTAD - TDS den su afan pa mehorá su kalidat di servisio ta bai kambia su infrastruktura. Otro siman durante e mardugá di djaluna, 17 di mart pa djamars 18 di mart, TDS lo bai kambia su sistema di koriente. Esaki ta e komienso di mas aktividat pa drecha kalidat di servisio di TDS.
E kambio di e sistema di koriente aki ta tuma lugá spesífikamente entre 12:00 di anochi te ku 5:00 di mainta, 18 di mart i e ta konta pa Kòrsou kompleto i tambe Boneiru.
For di 12:00 di anochi, lo kuminsá paga tur kanal di TDS pa e trabounan di kambia koriente por tuma lugá. Esaki ta nifiká ku for di 12:00 di anochi, abonadonan di TDS no por wak ningun kanal. Durante oranan di mardugá e kanalnan lo bini bèk den aire poulatinamente. Pues djamars, 18 di mart, pa 5:00 di mainta abonadonan por haña tur kanal di TDS mira bèk.
Pa garantisá ku un kliente lo por mira tur kanal atrobe sin problema, ta di suma importansia pa kada kliente sigui e instrukshonnan aki entre 12:00 pa 5:00 di mardugá:
• Sòru pa e decoder ta den koriente promé ku 12:00 di anochi
• No mishi ku e decoder
• No saka e karchi for di e decoder
• No sende ni paga e decoder
• No saka e decoder for di koriente
Siguiendo e instrukshon nan aki al pie de la letra, bo por sigurá ku lo bo sigui disfrutá di bo programanan faborito manera kustumbrá i tambe pronto Major League Baseball, Europese Kampioenschappen i Weganan Olímpiko.

WILLEMSTAD - Kas di Kultura den koperashon ku LVV, Plataforma Bèrdat Históriko, Grupo Trinchera, KeWeLa i kunukeronan di Kòrsou ta invitá pueblo di Kòrsou na klousura Eksposishon: Kosecha i Seú na Lanthùis Kenepa.
E programa ta kuminsá 10.00 di mainta ku benta di produktonan di kunuku i kuminda krioyo. Djadumingu pueblo tin e último oportunidat pa mira eksposishon di “Plantamentu te Seú” den mangasina grandi.
11.00 tin charla balor nutritivo di produktonan di kunuku pa Rudolf de Wit
12.00 tin charla uso di awa di laman pa fria rais di mata pa Kenneth Hooten
14.00 tin un pènel di kunukeronan i instansianan di gobièrnu pa diskutí i yega na e mihó strategia pa nos logra seguridat riba tereno di nos alimentashon. Panelistanan pa e atardi aki ta un representante di KEWELA, komishon Paga Tera, kunukeronan i di instansianan di gobièrnu un representante di DOW, DROV, DEZ, Domeinbeheer i LVV.
16.00 ta klousura ku un tremendo presentashon di Grupo Hóben Positivo ku Kantadó Mayó Reinier Lijfrock.
Kas di Kultura ta invitábu djadumingu awor 16 di mart for 10’or di mainta te 5’or di atardi na Lanthùis Kenepa.
Tradishon, ta prolongashon di un memoria bibu.
Kultura, e motor pa desaroyo duradero!

WILLEMSTAD - Komishon di bario di Barbouquet i Las Almas a manda un karta pa gezaghèber komo ultimatum pa para konstrukshon ilegal den e bario di Las Almas, sino mañan mainta habitante mes lo tuma akshon. Despues di vários súplika i atvertensia, e habitantenan a reuní ayera nochi i a disidí di manda un karta i ku pa 5’or awe tardi por haña reakshon di parti di gobièrnu. Den kombersashon ku Elvin Gerard a splika ku no por laga e konstrukshon ilegal aki sigui, ya ku e stranheronan aki ta demostrá niun klase di rèspèt pa outoridatnan lokal.
Hendenan lokal ku si tin konstrukshonnan ku mester a wanta pa kasi 14 aña, pero ku e stranheronan aki si no ta hasi kaso di niun aviso. Segun Gerard ta splika, ku e konstrukshonnan ilegal aki ta tumando lugá manera nada no a pasa i ku DROV no ta aktua debí ku e kontroladónan di DROV a wòrdu menasá ku machete. E hefe sr. De Lannooy a disidí di no manda su empleadonan di DROV pa kontrolá, pendiente na un desishon di gezaghèber pa protehá nan den e trabou partikular aki.
Durante e reunion di ayera nochi a bin dilanti ku e forma ku e stranheronan ta subi riba e tereno di Las Almas i kuminsá konstruí ta nada mas ku faltamentu di rèspèt pa e komunidat. Gerard ta splika ku hamas lo por hasi esaki na nan pais, motibu pa kua mester para firme i aktua kontra e tipo di ilegalidat ku ta tumando lugá riba e isla. Ademas tambe e habitantenan ta mustra den e reunion ku no por sigui tolerá intimidashon.

WINKLAAR
Imelda J. (repentino 76 aña)
Mihó konosí komo Shon Me, Mem òf Chichi
A laga atras su yu Carine i Robert Walter-Winklaar, yu di kriansa Roanth Winklaar i yunan, ñetunan Adric Walter i Judith Zwier, Derrick Walter i Zanetta Walter, Edion i Quincy Peny. Akto di entiero ta djaluna 17 mart for di misa Janwe pa santana Janwe. Bishita 9or. Promé ku entiero tin un s.s. di misa 10.30or.

JUAN-PEDRO
Fransica Rosalia
Mihó konosí komo Chika
A laga atras su yunan Lourdes Juan-Pedro, Nilva, Sonia, Marcel, Michael, Boy i Saida, Cislyn, Xiomara, Hubert, Gilberto i Sharine Juan-Pedro, Silvia i Jubert Mercera. Akto di entiero ta djadumingu 16 di mart 4or for di El Tributo pa santana Janwe. Bishita 1or. 3.30or tin un sirbishi.

CORNELIA-BALENTIEN
Giordalene Maria Fransisca
A laga atras su mayornan Giordanny Balentien i Marylene Schoobaar i demas famia. Akto di entiero ta djasabra 15 di mart 9or-10or na El Consolador.

DAAL
Adolf (65 aña, repentino)
Mihó konosí komo Barbaroso òf Lopez
A laga atras su kasá Zulay Daal-Rodriguez, rumannan Domenilia, Heronimo, Lourencio Daal, Lucia Wanga-Daal tur ku nan yunan. Akto di entiero ta djabièrnè 14 di mart for di misa Montaña pa santana Montaña. Promé ku entiero tin un s.s. di misa 3.30or. Bishita 1or. Trahe alegre.

MARTINA-MATHILDA
Marrise Idy 59 aña, trágiko)
Mihó konosí komo Marisa Bugalú
A laga atras su kasá Ulrik Martina, yunan Vidalis, Shailon, Radoiska Mathilda, Xiomara i Ruud Jonkman, Brenda i Jan, Frienéska, Wegarda i Dok. Akto di entiero ta djasabra 15 di mart for di El Consolador pa santana Seru Pietermaai. Promé ku entiero tin un respòns 3.30or na El Consolador. Bishita 1or den Sala Celeste.

ALLEE
Victor Augusto
Mihó konosí komo Totto
A laga atras su yunan Victor, Edward, Francis, Esmeralda, Waldemar Allee, ñetunan Richeline, Diangelo, Jenny-ann, Daimari, Serlon, Jeanneretty, Edwardson, Jarnelys, Richently Allee, Edelbert, Sinderley Serbony. Akto di entiero ta djasabra 15 di mart for di El Señorial pa santana Memorial Park. Bishita 9or. Promé ku entiero tin un respòns 11or na El Señorial.

ANASAGASTI
Elga Caridad (54 aña)
A laga atras su yu Faralice, rumannan Randell, Angel i Terri, Gisela, Arlina i Rupert, Silvio i Joyce, Sandra. Akto di entiero a tuma lugá djasabra 8 di mart na Eindhoven, Ulanda.

SINT JAGO
Felipa Guillermina (88 aña)
A laga atras su yunan Stanley i Krissy Capriles-Rucinski, Eileen i Celestino de Freitas-Capriles, Richard i Evelyn Sint Jago-Hernandez, ñetunan Millan Capriles i Anouk van Cauter, Marianella i Reagan de Freitas, Susanne i Burton Sint Jago, Shane i Skylar Capriles. Akto di entiero ta djasabra 15 di mart 4or for di misa Steenrijk pa santana Janwe. Promé ku entiero tin un s.s. di misa 3.30or. Bishita 1or.

KOOTS
Merselino Alicio (repentino)
Mihó konosí komo Chilin
A laga atras Thelma Willem, yunan Ifna Francicka, Carla i Humphrey Camelia, Carlos Koots, Geraldine i Randolf Echobardo, Litiana Koots, Glenda Koots i Giovanni, Wendel Koots i Sulaica Marchena, Shareen i Wilbert Antonia, Inaida Joots tur ku nan yunan. Akto di entiero ta djabièrnè 14 di mart for di mis asta. Rosa pa santana Sta. Rosa. Bishita 1or. 3.30or tin un s.s. di misa.

LEITO
Dario Zosimo
Mihó konosí komo Dari
A laga atras su kasá Teresita Leito-Granviel, yunan Ellen Leito, Liesbeth Leito i Wini Jansen, Raymison Leito, Milton Leito i Janihaima Martina, Elise-Marie i Elvis Leito, Rayshall Leito i Amalfi Maduro. Akto di entiero ta djabièrnè 14 di mart for di El Tributo pa santana Barber. Bishita 1or.

LOUISA-NICOLINA
Irma Maria
Akto di entiero ta wòrdu anunsiá despues

MERCELINA
Severino Antonio
Mihó konosí komo Siro òf Copies
Akto di entiero ta wòrdu anunsiá despues

ROSARIA
Fidel
Mihó konosí komo Buchi
Akto di entiero ta wòrdu anunsiá despues

DAFLAAR
Aquiles Gilberto Ricardo
Mihó konosí komo Beto
Akto di entiero ta wòrdu anunsiá despues

REINITA
Nohemia L.
Akto di entiero ta tuma lugá na Ulanda.

VAN KIMMENAEDE
Wilhelmus
Mihó konosí komo Wim
Akto di entiero ta wòrdu anunsiá despues
Akto di entiero ta wòrdu anunsiá despues

LA PRENSA ta manda kondolensia na famianan

Lorito ta yama tur hende un felis djabièrnè. Nos ta kansá i ta hala rosea pisá pasobra ora nos a pasa bai wak na Las Almas nan a basha nos ku piedra. Nos di ta kiko Lorito a hasi malu anto pa nan trata di dal nos alanan ku piedra? Aki ratu nos ta bai atrobe pasobra otronan no por kere ku nan ta bin kue tereno kaminda Lorito tin su nèshi.
****
E kaso di Dòk ta sigui hala masha atenshon. Basta komentario ta sirkulá tur kaminda i Shon Diputado a bisa públikamente ku e ta kontra. Shon Diputado a bisa ku el a papia na nòmber di su partido tambe i nos sa ku palabra duru a kai! Pero nos a tende di otro banda ku tin un otro opinion den e partido pues na e momentu aki ta parse ku e partido hel tin dos lenga. Nos no ta kontra pa tin dos òf kisas mas opinion den un partido (esei ta masha bon) pero e ta konfundí e votador. Mas ainda e ta pone e votador pensa ta ken ta dirigí anto?
****
VBC tambe a duna su opinion riba e nombramentu na Dòk. E kos mas straño ta ku dia e mesun hende ku kier nombra awe na Dòk tabata negoshá pa Antia ku Canada Post i a yega na un bon akuerdo no a tende nada di VBC. Lorito a kuminsá sara pa e manera selektivo ku ta reakshoná riba un issue. Un biaha ta para aki, un otro biaha ta para aya. Ban serio!
****
Ta mesun kos ta konta pa traha den un koalishon. Shon Diputado kier pone integridat te aya pero e ta trahando ku un hende ku a haña kondena pa korupshon. El a nombra un hende kondená pa korupshon pa trèk un trayekto fiskal i ta nombrando un hende ku ta kondená pa korupshon pa trèk un proseso di privatisashon. Ta na unda e liña ta anto?

PHILIPSBURG / WILLEMSTAD – No opstante ku lider di DP-Sint Maarten Sarah Wescott-Williams a biaha pa Ulanda pa lòbi pa un status outónomo pa e isla, el a bolbe haña un “nò” rotundo. Ta resultá tambe ku den diferente di e komishonnan di trabou tin problema ku Sint Maarten. Promé minister Jan-Peter Balkenende ku a traha tempu speshal pa risibí sra. Wescot-Williams a ripití su punto di bista ekspresá luna pasá durante su bishita na e isla, ku sin kambionan fundamental (entre otro riba tereno di hustisia) e isla no por konta ku koperashon di Ulanda. Sra. Wescot-Williams a papia tambe ku eks-ministernan Pechtold, Remkes, Nicolaï, sekretario di estado Bijleveld i otro figuranan polítiko di mundu polítiko. LA PRENSA lo bin bèk riba e deliberashonnan aki.

WILLEMSTAD – Preisnan a subi ku 0.7 porshento den luna di febrüari kompará ku yanüari, segun Ofisina Sentral di Statistik a informá awe. Si kompará e periodo di e último 12 luna ku e periodo promé ku esei ta resultá ku preisnan a subi ku 3,4 porshento.
Meskos ku último lunanan komestibelnan tabata esun ku a subi mas haltu den preis (+1,4%). Tur e gruponan di komestibel a kontribuí na e subida aki, pero e grupo di manteka i zeta a subi konsiderablemente(+3,8%). Karni i piská ku un subida di preis di 2,6 porshentu tambe a subi konsiderablemente, prinsipalmente preis di karni di baka a subi. Preisnan di gastu pa konsumo pafó di kas (+1,5%), di otro komestibelnan (+1,5%) i di produktonan di lechi (+1,3%) tambe a subi debidamente. Preisnan di otro gruponan di komestibel a subi entre 0,2 i 0,9 porshento.
Preisnan di transporte i komunikashon a subi na febrüari ku 1,2 porshento, esaki a ser okashoná dor ku preisnan di gasolin (+5,2%), di disel (+10,4%) i di transporte ku bùs a subi. Preisnan di muebel, aparato- i artíkulonan doméstiko a subi na febrüari ku 0,8 porshento, prinsipalmente muebel i lus a subi (+2,8%).
Preisnan di bibida i sigaria (+0,6%), di paña i sapatu (+0,4%), di bibienda (+0,2%), di rekreashon i desaroyo (+0,1%) i di e kategoria di sobrá (+0,2%) a subi na febrüari. Preis di salubridat a keda igual ku na yanüari.
E promedio di preis durante e periodo di último diesdos luna di febrüari 2008 tabata 3,4 porshentu mas haltu ku febrüari 2007. E sifra aki ta duna segun CBS un bon indikashon di inflashon riba término largu. Ku esaki e tendensha di subida di inflashon ta kontinuá fuertemente, asina CBS ta bisa.

WILLEMSTAD – Asosashon di Komersio i Industria (VBC) ta sostené e posishon ku diputado Eugène Rhuggenaath a tuma relashoná ku nombramentu di un direktor nobo na Dok. VBC ta suprayá e ponensia di e diputado ku e direktor nobo di Curaçao Drydock Company (CDM) mester ta un hende ku un reputashon indiskutí, ku mester tin konosimentu di e mundu di reparashon di barku i kende ta kapas pa duna guia adekuado na e kompania. VBC ta bisa, ku e lo aploudí si gobièrnu na ora di nombramentu di direktor i funshonarionan altu den kompanianan i institutonan di gobièrnu hiba un maneho, kaminda tin e obligashon ku kandidatonan minimalmente mester kumpli ku eksigensianan di kapasidat i di integridat. Mester apliká un maneho asina tambe ora di apuntá i nombra mandatarionan polítiko. VBC ta konvensí ku introdukshon di un maneho asina lo kontribuí en grande na mehoransa i realisashon di práktikanan di “good governance” ku ta asina nesesario i deseá. Bon gobernashon lo kondusí na drechamentu i kresementu grandi di konfiansa den Kòrsou i su klima di invershon. E efekto positivo di esaki den forma di kresementu ekonómiko, invershonnan, kupo di trabou i entrada lo ta di benefisio pa komunidat.
Pa buena marcha ta bon pa bisa, ku e proposishon di eksigensianan di kapasidat i integridat na aseptashon i nombramentu di funshonarionan altu na empresanan i institutonan gubernamental, komo tambe nombrashon di mandatarionan polítiko no ta un novedat. Den sektor privá ya ta apliká e maneho aki ora ta trata e sektor di servisio finansiero. Banko Sentral di Antia Ulandes ta supervisá ku na nombrashon di funshonnan altu den e sektor aki, e kandidato mester kumpli ku eksigensianan di kapasidat i di integridat. E pensamentu prinsipal tras di esaki ta ku den e sektor aki mayoria di biaha ta traha ku fondonan di terser partido i ku pa esei mester apliká un diligensia mas altu posibel. Na gobièrnu i kompanianan i institutonan di gobièrnu kaminda ta traha ku fondonan di komunidat, esaki no ta otro. Aki tambe mester apliká e mas altu grado di diligensia. VBC ta insistí serka Bestuurscollege i Konseho Insular pa deklará i implementá e proposishon di diputado di Asuntunan Ekonómiko komo maneho ofisial di gobièrnu, asina VBC ta bisa den su komentario ofisial di awe.

WILLEMSTAD – Polis a konfiská 2 arma di kandela i un kantidat di mariwana i koka durante un búskeda den un kas riba F.D. Rooseveltweg djarason último. Na e kas akí a detené mes ora 5 sospechoso. Nan ta R.M. (49), H.T. (43), H.A. (43), A.A. (43) i Q.M. (22).
Tabata den kareda di 21.40’or ku e polisnan di 0-Toleransia huntu ku e tim di RASPA a bai na e kas. E armanan di kandela ku a konfiská ta un pistol ku su balanan i un revòlver ku su balanan. E droga ku a konfiská ta 160 gram di base, 347 gram di mariwana i 87,5 gram di koka. A konfiská tambe diferente atributo pa prepará droga i tambe atributonan pa bende e droga.