ORANJESTAD- Enconexion cu dia di Himno y Bandera directiva di Centro di Bario Playa Pabao ta organisa un anochi Cultural riba 18 di Maart. E actividad aki ta cuminsa pa 6’or di atardi y lo termina pa 10’or.
Riba e programa tin eo e artistanan di Playa Pabao cu ta e alumnonan diAnglo Kleuterschool bou di direccion di juffrouw Poppy, Grupo di Baile di Sinta di Mimi Kock, Quincy Hasham, Lynette do Nacimiento y Chaz Dancers, gruponan di baile “Super Dancers” y “Masiduri”, y tambe lo tin presentacion di e ganador di e festival “Un Canto na nos Himno y Bandera” Jerrino Ridderstap.
Directiva di Centro di Bario Playa Pabao ta invita e bario di Playa Pabao y Aruba en general pa e activdad aki. Bar y cushina lo ta bon sorti.

Mensahe di Aruba Scholarship Foundation ta anuncia

ORANJESTAD - Aruba Scholarship Foundation ta contento di anuncia cu su acuerdo cu University of Central Florida (UCF) na beneficio di studiantenan Arubiano na UCF ta sigui pa aña scolar 2008 – 2009.
Pa esnan cu ta residencia na Aruba y ta studiando na UCF of cu a aplica pa studia na UCF pa e aña scolar 2008 - 2009 tin posibilidad pa bin na consideracion pa participa den e programa Latin America/Caribbean (LAC) Scholarship Program y haya status di residente di Florida y asina paga “state resident fees” en bes di “non-resident fees”.
Esaki lo por significa un ahoro di mas di US$14.000,00 pa aña pa un studiante undergraduate. Studiantenan cu ta pensa di drenta UCF pa spring term 2009 tambe mester haci e aplicacion di awor.
Pa bin na consideracion pa participa den e programa LAC, un studiante mester tin un averahe minimo di “B” (3.0) of un 7+ di HAVO of VWO. Yena un formulario disponibel na Biblioteca Nacional di Aruba na George Madurostraat, Oranjestad y entreg’e no mas tarda dia 18 di April, 2008 na e adres menciona riba e formulario. Tambe por pidi e formulario via un email pa clydeharms@setarnet.aw.
E rekisito di yena e formulario ta aplica tambe pa esnan cu ya ta studiando na UCF y cu ta pensa di bolbe UCF. Sin un formulario valido ningun studiante lo wordu considera pa ricibi of renoba e status especial. Pa mas informashon di e programa aki please contact clydeharms@setarnet.aw
Aruba Scholarship Foundation ta recorda un y tur cu e proceso pa aplica pa un beca pa yuda studiantenan den necesidad financiero lo cuminsa na luna di Mey.

WILLEMSTAD – Un homoseksual tabata e promé bishitante na e seshon di orashon di 24 ora organisá pa e predikadó Norwin Josepa. E seshon di orashon a kuminsá djasabra mainta 6’or i a dura te ku djadumingu mainta 6’or. E meta tabata pa hasi orashon pa Kòrsou. Un hòmber metí den droga a entregá dos paki di droga kompañá pa su kasá.
Durante e orashon maratóniko a toka diferente tópiko manera gobièrnu, prostitushon, homoseksualidat, pobresa hubentut, matrimonio i estado finansiero. “Hendenan tabata kana drenta i bai bin bèk. Esnan ku a keda 24 ora tabata mas ku loke nos a pensa. Tabatin partisipashon di vários hóben durante di dia i hopi a libra durante e orashonnan”, Josepa a splika LA PRENSA awe. Mas aleu Josepa a splika ku tabatin un dama ku den pasado su tata a viol’é. Tabatin tambe un otro dama ku un miembro di su mes famia a viol’é. “E partisipante ku mas a hala atenshon tabata un dama ku a pensa na mata su kasá i yunan. Tur a bin e orashon pa rekonsiliashon i pa nan liberashon”, Josepa a splika. Segun Josepa, muchanan ku ta traha den Colon a bin den nan pousa pa partisipá na e orashon.
Pa loke ta trata e promé bishitante, Josepa a splika ku e homoseksual a bin hasi orashon promé ku el a bai su trabou. Despues ku el a bandoná e orashon, el a bolbe ku su kabei pelá kòrtiku kòrtiku. Josepa a splika, ku homoseksualnan nan orguyo ta sintá den nan kabei. “E persona ku a trese droga a kana drenta i a bisa ku el a bin deshasí di e kos aki, paso el a kansa di e bida. Nos a hasi un orashon kuné huntu ku su kasá. Dado momentu e di e ta bai bin bèk. Ora el a regresá, el a bin ku un mas saku di koka i a poné riba e beibel ku mi tabatin den mi man”, Josepa a splika.