ORANJESTAD– Ministerio Publico a emiti un comunicado di prensa ayera tardi den cual ta mustra cu a tuma e decision cu pa laga abogado Hendrik Croes den libertad di inmediatio.
E comunicado ta mustra cu diadomingo anochi 16 di Maart 2008, mr. H.C. a wordo deteni relaciona cu un investigacion di intento di maltrato pisa. Siguientemente, despues di interogacion, el a wordo deteni den interes di e investigacion.
E denuncia tabata encera manda auto riba un agente policial na civil cu a duna señal pa stop. Para y detene hende ta na momentonan asina procedura standard y a sosode e aña aki dos biaha caba.
E investigacion ta wordo haci pa Landsrecherche, cu desde diadomingo den oranan di anochi y ayera a interoga un total di seis testigo y e sospechoso. Tambe a wordo haci investigacion tecnico na e auto y a saca fotonan. Alavez a agrega un declaracion medico na e dossier, hunto cu fotonan di curpa di e denunciante.
Den cuadro di e contenido di e declaracionnan di e testigonan y di loke por wak riba e fotonan y pagando tino riba contenido di e declaracion medico, por bisa na e momento aki cu prolongacion di detencion di e sospechoso den interes di e investigacion, no ta necesario mas.
E investigacion a mustra si cu tabatin un incidente riba rotonde di Paradera entre e sospechoso y e denunciante, pero no cu ta trata claramente di un caso clasico di “manda auto riba un otro persona”.
E significacion penal di e incidente ta exigi mas estudio, pero no ta haci necesario pa sigui cu e detencion y pa e motibonan aki, Fiscal a duna KIA ordo mientrastanto pa pone e sospechoso inmediatamente den libertad.

Comision di Seguridad Nacional a reuni cu sindicatonan

ORANJESTAD- Ayera mainta Comision di Seguridad Nacional a reuni cu lidernan sindical cu ta den accion pa discuti varios situacion cu a presenta for di diadomingo ultimo, ora cu a detene abogado Hendrik Croes kende tabata abogado di Gobierno den varios caso contra sindicatonan siman pasa.
Despues di e reunion entre otro sindicato SEPPA a mustra cu e reunion tabata fructifero pero cu ningun momento e argumentonan presenta, lo por ta dirigi na e sindicatonan den accion.
Sindicatonan ta kere cu e commission mester a yama gobierno pa bin papia, ya cu ta Prome Minister Nel Oduber a bai television y radio pa yama militancia di partido MEP.
Ta Minister Presidente segun e sindicato cu a haci declaracionnan argesivo y a papia di bai guerra.
“Sindicatonan ta den un lucha pa derecho di indexering y ningun di nos accionnan tabata dirigi pa ningun aggression. Nos hendenan ta manifesta y ta tene nan mes na reglanan di decencia pero ta representantenan di e actual Gobierno ta esnan cu ta papia un tono agresivo.
Ta Minister Presidente Oduber a manda yama su militancia, manda yama su hendenan pa bai contra di esnan cu ta lucha pa nan derecho,” e representante di SEPPA a mustra ayera tardi.

ORANJESTAD- Sindicatonan den Accion ta trahando for di ayera riba un plan total, pa mira ki paso nan ta bai tuma pa forza Gabinete Oduber IV pa respeta e derecho di trahadornan publico pa haya indexering paga.
E posicion aki e sindicatonan a ser obliga pa tuma despues cu ayera mainta Minister Presidente Nel Oduber a bai radio y anuncia cu no ta bai tin ningun negociacion mas cu sindicatonan, como reaccion riba detencion di abogado di Gobierno, esta Hendrik Croes.
Sindicatonan a mustra ayera tardi cu nan no tin arte ni parti den loke a sosode cu Hendrik Croes, y cu si Minister Presidente Oduber ta kere cu e lo por intimida e sindicatonan den nan lucha pa nan derecho, anto e ta hopi robez.
Tanto ayera como awe e lidernan sindical lo sinta reuni pa determina kiconan ta bai haci pa logra e exito cu nan kier logra den e lucha pa indexering aki.

WASHINGTON, Merka, - Sekretario di Tesoro di Merka, Henry Paulson, a defendé e medidanan ofisial pa salba banko Bear Stearns di bankarota, dor di bisa ku ta importante sigurá un funshonamentu ordená di merkadonan finansiero.
Den diálogo ku periodistanan ayera despues di enkuentro ku Presidente di Merka, George W. Bush, na Kas Blanku, Paulson a indiká ku esnan preokupá pa e echo di reskate di Bear Stearns a krea un “riesgo moral”, i mester tene den mente ku akshonistanan di e banko di invershon a sufri pèrdidanan fuerte ku benta na preis di ganga di e empresa.
JP Morgan a kumpra Bear Stearns djadumingu último na un preis di solamente dos dollar pa akshon.
E balor di 236 mion dollar di e konvenio di kompra di Bear ta representá ménos ku 90 porshento di e balor total di e kompania for di djabièrnè, ya ku preis di su akshon e dia ei a sera ku 30,85 dollar.
Pa fasilitá e akuerdo, Reserva Federal di Merka a komprometé finansiá te asta 30.000 mion di e akshonnan ménos líkido di Bear Stearns.
E problemanan konfrontá pa e empresa di invershonnan neyorkino ta enfatisá un pèrdida den konfiansa di e inversornan riba estado di e sistema finansiero merikano.
Paulson a splika ku funshonamentu ordená di merkadonan finansiero di Merka ta un prioridat, i ta mihó organisá e atkisishon di Bear Stearns ku para mira e kompania di invershonnan, e di sinku den importansia di Merka, presentá su petishon di bankarota.

ANNAPOLIS, MD., – E tim di beisbòl di University of Maine djadumingu atardi a bin kai ku skor di 7-4 den 12 ining kontra di Monmouth.
Black Bears a bin empatá e wega den bòm di nobeno ining ku par di kareda, pa pone e skor 4-4.
Pero den di 12 ining Monmouth ta anotá tres kareda kual tabata sufisiente pa gana 7-4.
Den e partido aki Jonathan Balentina a tira un entrada.
Curt Smith a fungi komo DH i a bai di 4-2 ku un kareda anotá, 2 base por bola risibí i un ponche i awor ta bateando .439.

SAN JOSE, Costa Rica, - Polisnan di Costa Rica a enkontrá 480.000 dollar (mas o ménos 308.000 euro) na un kas señalá den kòmpiuter di un hefe di FARC, miéntras Interpol ta investigando mas skondite di sèn di e gueria colombiano na otro paisnan, outoridatnan a bisa.
A enkontrá e dollarnan djabièrnè último den un kaha fuerte na un kas di poblashon di Heredia, situá mas o ménos 12 kilometer wèst di San José, bosero di polis, Margarita Morales, a bisa ayera.
Niun hende a keda arestá durante e razia.
Polisnan a drenta e kas riba informashon enkontrá den kòmpiuter ku ta pertenesé na Raúl Reyes, hefe gueriero kende a muri 1 di mart último durante bombardeo di trupanan colombiano kontra un kampamentu di FARC na teritorio ecuatoriano, echo ku a provoká un krísis diplomátiko entre Bogotá i Quito.
Pero e krísis tambe a kondusí den investigashonnan riba presensia di sèlnan di FARC pafó di Colombia.
Na Bogotá, direktor di Polisnan Nashonal di Colombia, general Oscar Naranjo, a bisa ku e supuesto persona vinkulá ku FARC na Costa Rica ta plenamente identifiká i ta trahando ku Interpol pa kaptur’é.
E ofisial a identifiká e persona ei komo Eleuterio Pérez Jiménez.
“Nos ta papiando di un persona vinkulá ku Partido Comunista di Costa Rica, un persona mayó, un persona ku realmente tin hopi aña di trayektoria den iskierda sentroamerikano i awe outoridatnan ta buskando e hende aki intensamente”, Naranjo a bisa periodistanan.

SLOVENIA – E paisnan ku ta forma Union Europeo i e komiténan olímpiko ta oponé un bòikòt di Weganan Olímpiko na Bejing komo konsekuensha di e reakshon di China riba e protestanan na Tibet.
E minister di deporte di Union Europeo i e komiténan olímpiko a reuní ayera i a afirmá ku deporte no mester wòrdu vinkulá ku e tema di índole polítiko i a rekòrdá ku bòikòtnan olímpiko anterior a demonstrá ku tin impakto limitá.
“Bou di ningun sirkunstansia nos no ta bai respaldá un bòikòt. Den esaki nos tur ta di akuerdo di un forma unánime,” asina Patrick Hickey, direktor di Komité Olímpiko europeo a bisa den un entrevista.
“Ningun lider gubernamental no pidi pa un bòikòt. Un bòikòt solamente ta kastigá e atleta,” Hickey a afirmá.
Milan Zver, e minister di deporte di Eslovenia ku ta enkargá ku e enkuentro aki di e prinsipal funshonarionan deportivo di e 27 sosionan di Union Europeo i komiténan olímpiko, a señalá ku outoridatnan gubernamental tampoko ta di akuerdo ku un bòikòt.
“Mi ta kontra di un bòikòt di Weganan Olímpiko na China,” asina Zver a bisa. Su punto di bista ta wòrdu kompartí ku e otro ministernan ku a papia di e tema aki durante un gala djadumingu anochi.
“Ta inkorekto ku deporte tin algu di haber ku esaki. Ta un asuntu polítiko,” asina Erica Terpstra, presidente di Komité Olímpiko di Ulanda a bisa.

CASTELFIDARDO – E siklista spañó Oscar Freire a gana e di seis etapa ayera den e klásiko Tirreno-Adriatico. E suiso Fabian Cancellara ketu bai a mantené su mes komo lider di e klasifikashon general.
Freire a kubri e distansia di 196 kilometer entre Civitanova i Castelfidardo den sentro di Italia ku un tempu di 4 ora, 46 minüt i 44 sekònde.
E trikampion mundial, Freire a superá e koredónan italiano, Filippo Pozzato i Danilo Di Luca den un sprint final i asina logra su di nuebe viktoria di un etapa di prueba.
Cancellara ounke ku el a drenta na di 13 lugá den e etapa aki, ta sigui na kabes di e klasifikashon general. Su bista ta riba e di shete i último etapa ku ta un kareda di 176 kilometer den besindario di San Benedetto. E tin un bentaha di 16 sekònde riba su rival mas serkano.
E klásiko aki ta sirbi komo preparashon pa e Klásiko Milan-San Remo ku su di 99 edishon lo kuminsá djasabra awor.

INDIAN WELLS – E tenista spañó Rafael Nadal a mantené su mes riba e kaminda pa gana su promé torneo di ATP despues di a gana fásilmente di e merikano Donald Young i asina avansá pa kuart final di e torneo habrí di Indian Wells.
E kampion defensor i di dos riba e lista di klasifikashon mundial a vapolea su rival di 18 aña 6-1 i 6-3 ku un wega potente for di e liña di fondo pa asina seya su viktoria den un ora i 22 minit.
“Tur wega ta importante pa mi i sigur ora mi ta defendiendo mi titulo despues di a hunga mi mihó torneo aki nan,” asina Nadal a deklará. “Mi ta kontentu di bini aki nan i duna mi mihó tènis posibel.”
E spañó a kibra e servisio di e merikano na tres okashon den e promé sèt. Den un partido entre tenistanan surdo, e number dos di mundu a kibra sèt durante dos okashon mas den e di do sèt i a seya e viktoria ku su servisio.
Nadal kende tabatin seis viktoria di ATP na 2007, inkluso si di tres titulo sigui di Habri di Fransia, lo topa awor ku e franses Jo-Wilfried Tsonga kende a gana su kompatriota Paul-Henri Mathieu 7-6 i 6-4.
Di otro banda e serbio Noval Djokovic a gana e aleman Phillip Kohlsschreiber 6-3 i 6-2. Su próksimo rival ta e argentino Guillermo Cañas kende a gana su kompatriota Juan Monaco den un wega ku a dura dos ora i mei.
Mas tempran James Blake a superá e spañó Carlos Moya 6-3 i 6-4 pa tambe avansá pa kuart final. Blake awor lo topa Gasquet.

MEXICO – E Direktor Tékniko di e selekshon mèksikano di futbòl, Hugo Sanchez a bisa awe mardugá, ku e lo no renunsiá di su kargo apesar di e frakaso di e ekipo preolímpiko den su intento pa bai Beijing 2008 despues di a keda eliminá for di e torneo ku ta wòrdu disputá aktualmente na Merka.
Djadumingu Mexico a keda for di Weganan Olímpiko 2008 pa diferensia di gol, ounke ku nan a gana di Haiti ku skor di 5-1 den e torneo preolímpiko den kual nan por a hinka muchu mas gol, pero e delanteronan a faya.
“Mi a bisa kaba na un okashon,” asina Sanchez a bisa.
Despues di e frakaso di e torneo, prensa mèksikano a pidi ayera pa Sanchez renunsiá. Un korant a skibi ku palabranan grandi “BAI” riba un foto ku e kara di Sanchez.
“Hugo tene dignidat na bo mes i renunsiá. No pèrmití mas vengansa, hasi esaki pa futbòl mèksikano i no warda te ora e dañonan ta muchu grandi,” asina un otro korant a skibi.
E kontinuidat di Sanchez lo keda disidí den un reunion di e Federashon di Futbòl di Mexico di dia 31 di mart.
“Hugo lo entregá su rapòrt na e komishon i esaki lo analisá i duna un konseho amplio pa por tuma un desishon,” asina Decio de Maria, e sekretario general a bisa.
Te awor Hugo Sanchez no a kumpli ku e promesanan dia ku el a bira Direktor Tékniko na novèmber 2006. Un di e promesanan tabata e klasifikashon pa Weganan Olímpiko 2008 i asta ku e selekshon lo gana un medaya.

TAMPA, FLA., - E picher derecho, Daisuke Matsuzaka lo habri e promé wega di temporada regular kontra di Oakland Athletics dia 25 di mart na Tokyo, Hapon.
“Lo ta un algu eksitante pe”, asina e mènedjer RSox Terry Francona a bisa. “Mi sa ku ta un honor pe”.
Jon Lester lo tira e di dos wega di e seri di dos kontra di Oakland dia 26 di mart.
Clay Buchholz i Tim Wakefield lo tira e dos promé weganan di eksibishon na Hapon promé ku e dos weganan kontra di Oakland ku ta inisio di temporada 2008.
Ayera Matsuzaka a keda di regresá kampamentu despues di no tabata presente pa dos dia debí ku su kasá a duna lus na un yu hòmber djasabra.
“E kuater gainan ei tabata sa esaki probablemente ya pa un siman kaba”, asina Francona a bisa. “Tabatin e situashon di “Dice K” ku e dunamentu di lus di su kasá, pero e tabata prepará pa picha. El a bai kas i tur kos a bin sali bon. RSox a opta pa no move Wakefield.
Josh Beckett lo no hasi e biahe pa Hapon. Ayera el a tira for di un distansia di 120 pia.
“Un otro bon dia. Ta mustra ku e ta rekuperando mas lihé”, asina Francona a bisa di Beckett.
Beckett lo por picha den weganan di Liga Menor, pero no ta konosí ki dia lo e hasi su prome salida.
“Lo ta dependé di kon e ta sinti. Kualkier otro kos di mi parti lo no ta bon. E ta tratando di hasi mas lihé ku e por, nos sa esei”, asina Francona a tèrminá bisando.

WILLEMSTAD – E fin di siman ki FFK tabatin solamente un partido programá.
Victory Boys a enfrentá e ekipo barika hel di SUBT.
E partido no a yega mas leu ku un empate di 1-1.
Pa e ekipo di Victory Boys a anotá Vaylison Lake for di kasi na komienso di e partido.
E delantero Airic Damoen a bin anotá e empate pa SUBT algu promé ku deskanso.
Den di dos mitar no a bini mas anotashon.
Ku e empate aki SUBT awor tin 12 punto i Victory Boys a yega 21 punto.
Awe djamars ta sigui e wega entre Jong Colombia i Centro Dominguito.

WILLEMSTAD - E sindikato Horecaf a aseptá i konformá su mes, ku mester paga impuesto riba teps ku e doño di trabou ta registrá. Asina Kenneth Valpoort, di direktiva di Horecaf a splika. Siman pasá Horecaf a duna instrukshon na BAB pa investigá e situashon na entre otro Hotel Marriott, pa trese klaridat den e asuntu di pago di belasting riba teps pa trahadónan den e sektor di horeca.
Den un reunion ku a tuma lugá resientemente entre representantenan di Horeca, BAB, Inspekshon di Belasting, e sindikato a risibí e splikashon kiko e asuntu di impuesto riba teps ta enserá. E splikashon ku Horecaf a haña ta, ku tur teps ku ta wòrdu atministrá dor di un empresa i poné riba salario dje empleado, mester retené belasting riba dje. Pa loke ku ta trata e teps ku e trahadó ta risibí direktamente for di man di e kliente, no mester paga impuesto riba dje.
‘Den e kaso dje teps ku ta wòrdu atministrá i pa kua lei ta eksigí pago di impuesto, nos no por hasi nada, pero nos mester a konformá nos mes ku esei’. Asina Kenneth Valpoort a remarká, indikando mas aleu, ku e sindikato ta boga sí, pa un kòntròl, unda ku ta akumulá tur e tepsnan di dia i duna e trahadó partisipashon. ’Di e forma aki e trahadónan por tin kòntròl riba e sèn ku nan mes a traha pe’. Entre otro tin algun empresa ku no ta duna e trahadónan ningun oportunidat pa nan kontrolá e sèn ku nan mes ta traha.’ E situashon aki ta di lamentá, segun Horecaf.

ARIES: Drecha bo mente, lesa i asistí na tur loke ta stimulá bo intelekto. Bo opinion ta fuerte i direkto, bo ta sirbi pa optené mayor logro. 47,15,04.

TAURO: Ta e momentu adekuá pa kuminsá planiá algun vakashon o un biahe. Dibertí bo mes i ekspandé bo horizonte, spesialmente esnan ku bo ta stima. 41,25,22.

GEMINIS: Organisá bo pensamentunan i buska solushon. Traha tempu pa pone bo kas na òrdu i bo responsabilidatnan di akuerdo ku su urgensia. 16,02,14.

KANSER: Bo energia ta hopi i bo ke hasi hopi den poko tempu. Esei ta trese konsekuensia i tenshonnan entre esnan ku no ta bai ku mesun velosidat ku bo. 19,37,39.

LEO: Tur kos ta kambia di rumbo di un dia pa otro, pero bo no ta preokupá. Bo energia i bo sabiduria i enkanto personal por ku tur esei i hopi mas. 03,05,22.

VIRGO: Konsentrá mas den bo trabou i hasta un empleo nobo. Atraves di kombersashon i negosiashonnan, bo por konosé un bon persona. 29,13,18.

LIBRA: Kuida bo mes di ta ku personanan ku por transmití enfermedatnan pa bo o eksponé e situashon pa pió. Tampoko bo ta keda ku renkor, esei por afektá bo salú. 06,15.

SKORPION: Bo habilidat pa yega direktamente na otronan, ta eksponé bo ideanan. Bo tin hopi físika i bo ta envolví den diskushonnan. 21,08,07.

SAGITARIO: Relashonnan den amor ta mehorá notablemente si bo ta mustra mas fleksibel i koperador. Ta ora pa bo relashon ta serio i saka tempu pa bo famia i amigunan. 08.

WILLEMSTAD - Ruben Severina, presidente di e federashon ku ta agrupá un kantidat di organisashon ku ta sali na defensa di antianonan na Ulanda ta bai korte pa eksigí rektifikashon di James Schrils.
Schrils a akusá Severina di ta korupto i di a hòrta plaka di e organisashon ku ta presidí, ku ta MAAPP.
MAAPP ta e federashon di tur e organisashonnan antiano ku ta eksistí na Ulanda. Ta un organisashon basta aktivo ku ki ora ku tin kualke menasa kontra antianonan na Ulanda ta asumí posishon. Esei tabata e kaso por ehèmpel resientemente ku e lei ku minister di Hustisia Ernst Hirsch Ballin kier a introdusí i ku segun hopi hende, ta un forma kamuflá pa bin ku e areglo di ekspulshon di antianonan for di Ulanda a atrobe, e medida estilo Verdonk.
Ruben Severina a desmentí akusashonnan di Schrils den tur forma.
“Kon por kita un pluma for di un galiña sin pluma?” ta loke el a puntra, referiendo na e hecho ku MAAPP práktikamente no tin entrada.
Bou di ningun sirkunstansia mi no ta aseptá e akusashon aki, asina Severina a duna di konosé. E presupuesto di mas haltu ku e organisashon a yega di tin tabata 15 mil euro. Ademas tin un sistema kaminda no ta un hende so por saka plaka for di e organisashon, segun Severina a duna di konosé. El a bisa ku tin un komishon finansiero ku ta kontrolá tur aktividat, ku fin di aña ta traha su relato di e aña anterior i ku ta presentá esaki na reunion general di MAAPP.
I tur aña, e komishon finansiero a haña aprobashon di miembresia, el a agregá.

WILLEMSTAD - Istoriadó James Schrils ta keda para riba su akusashon ku Ruben Severina a aktua inkorekto ku plakanan di e organisashon MAAPP. En bes di a depositá sèn ku a sobra riba kuenta di e organisashon, el a depositá e plaka aki otro kaminda, asina Schrils a bisa den un reakshon riba e kaso aki.
Tal manera nos ta informá den un otro artíkulo den e edishon aki, Schrils siman pasá a okashoná konmoshon den mundu di organisashonnan antiano, na momentu ku el a denunsia ku Ruben Severina, konosido yu di Kòrsou i aktivista di e kousa antiano na Ulanda, lo a kometé aktonan dudoso ku plaka di MAAPP, e federashon di organisashonnan antiano di kua e ta presidente.
Schrils a pidi pa Severina baha inmediatamente for di su puesto di presidente di MAAPP.
Schrils a bisa ku el a keda babuká (el a usa e palabra ingles “flabbergasted”) ora el a tende reakshon di Severina den e programa pa antiano na Ulanda “Tambú” di djasabra último.
Den e programa aki, Severina a rechasá e akusashon ku tin kontra dje. El a bisa ademas, ku ta imposibel ku ta akus’é di un kos asin’aki, siendo ku tur hende sa ku MAAPP de fakto no tin plaka.
E presupuesto di mas grandi ku MAAPP a yega di haña ta di 15 mil euro. Kere mi ku bo no por bira riku, si bo pensa di hòrta den MAAPP, ta loke Severina a indiká.
El a anunsiá por sierto, ku e ta bai entamá un kaso kontra Schrils pa difamashon i manchamentu di su bon nòmber. “Lo mi pidi rektifikashon, ounke mi sa ku e daño ku el a hasi, ta masha difísil pa bo kita kompletamente”, Severina a bisa.

WILLEMSTAD - Miembro di Konseho Insular Eugène Cleopa di frakshon di MAN ke sa kiko ta kiko awor ku e pakete ku diputado Eugène Rhuggenaath a presentá siman pasá, komo un pakete di alivio pa pueblo pa e oumento bárbaro di kosto di bida.
E pakete ta un kos viabel, si òf no? e konsehal a puntra.
Su duda ta basa riba reakshon ku a bin di parti di Gobièrnu Sentral riba e proposishon di Rhuggenaath.
Rhuggenaath a anunsiá, ku Bestuurscollege di Kòrsou a aprobá un pakete di medida pa aliviá e oumento fuerte di preis di produkto (di promé nesesidat) riba nos isla. E pakete aki ta enserá entre otro, ku ta proponé Gobièrnu Sentral pa eliminá derechi di importashon i eliminá OB riba un sierto kantidat di produkto.
Diputado Eugène Rhuggenaath, kende a anunsiá esaki ayera tardi, a bisa ku realmente mester a konsiderá medida pa aliviá e peso di oumento, pasobra sifranan ta indiká, ku oumento di kosto di bida a bira un problema serio pa pueblo.
Segun sifranan disponibel, inflashon último tres añanan aki tabata di 3.4 porshentu. Esaki ta nifiká konkretamente ku preis di produkto a bira mas karu i ku forsa di kompra a bai atras drástikamente.
Minister di Finansa di Antia Ersilia de Lannooy a bisa sinembargo den un reakshon basta skèrpi, ku pa kuminsá, e no ta na altura di e pakete di medida aki den kua Gobièrnu Sentral lo mester hunga un papel krusial.
Pero De Lannooy a bai mas leu: el a mustra ku mester wak e tipo di akshonnan aki masha bon, pasobra tur medida ku bo tuma, tin konsekuensia pa kaha di gobièrnu.

WILLEMSTAD - “Mi tarea na promé lugá ta pa goberná e pais aki ku yama Kòrsou. Mi no t’ei pa manehá kompanianan di gobièrnu,” diputado Humphrey Davelaar a deklará resientemente. Diputado Davelaar ta konsiderá mas adekuá, pa los e funshon di presidente komisario for di e funshon di diputado responsabel pa e kompania di gobièrnu.
E deklarashon aki ta relashoná ku e diskushon públiko ku a surgi rondó di kompanianan di gobièrnu manera Selikor, pero tambe fundashonnan manera BZV.
Mester bisa ku no ta promé biaha, ku diputado Davelaar ta ekspresá su mes den e direkshon aki.
Aña pasá, hustamente durante un reunion di Konseho Insular pa diskutí e mesun problema di nombramentu di Ivar Asjes komo di dos direktor na Selikor, e mandatario a para ketu na e aspekto aki.
“Pa mi parti, mi no ta presidènt komisario di niun entidat di gobièrnu.
Esei sigur lo kontribuí positivamente na mi funshonamentu komo diputado,” Humphrey Davelaar a bisa na e okashon ei.
Asuntu ku ta deseabel i rekomendabel ku un diputado ta presidènt komisario di un kompania di gobièrnu tambe a bin dilanti durante e reunion públiko aki.
Manera LA PRENSA a informá, durante e reunion ei a bin dilanti ku Bestuurscollege no por kore ku ni direktor ni direktor interino di e kompania Selikor. E úniko instansia ku por hasi esaki ta StIP, siendo e akshonista hurídiko di e kompania.

WILLEMSTAD - Kon a para ku e investigashon ku mester a determiná kiko i na unda kosnan a bai robes den produkshon di e plachi di number di outo pa 2008? Ta di kon e kos aki ta durando asina tantu? ta preguntanan ku miembro di Konseho Insular pa partido Forsa Kòrsou Gregory Damoen a lansa den un karta ku el a manda pa gezaghèber di Kòrsou mr. Lisa Dindial.
Kuminsamentu di e aña aki a surgi bastante konmoshon pa e produkshon di e plachinan aki. Tabatin masha krítika riba e kombinashon di koló riba e plachi.
E plachinan tin un koló blou/lila ku lèter oraño, loke ta hasi ku visibilidat di e number di outo, asta na un distansha relativamente kòrtiku, ta práktikamente nihil.
Esei mes a pone ku, entre otro riba un preshon enorme ku a bin for di komunidat, a tuma e desishon ku ta laga retirá e plachinan aki i sigui usa e plachinan mes ku a usa durante último añanan, esta esun blanku ku pretu. Loke a sigui usa ta e plachi di kòntròl oraño.
Diputado di Finansa Mike Willem bou di kende produkshon di e plachinan aki ta kai a anunsiá ku e ta laga hasi un investigashon profundo pa determiná unda kosnan a bai robes.
Willem sinembargo a antisipá, ku ta na diferente punto kosnan no a kana korekto. El a primintí Konseho Insular ku asina e rapòrt ta kla, e lo sòru pa manda un kopia pa tur miembro di Konseho Insular.
Gregory Damoen, den su karta ta referí na e hecho ku ta for di 14 di yanüari diputado Willem a anunsiá e investigashon aki i ku te awe no a tende nada. E investigashon aki ta den man di SOAB.

WILLEMSTAD - Christoffelpark ta selebrá 30 aña di eksistensia den 2008 huntu ku tur amante di naturalesa riba nos dushi isla. Pa e okashon aki a organisá vários aktividat kaba den e luna aki i tin vários aktividat pa amantenan di naturalesa den e wikènt benidero.
Parke Kristòf ta será riba Bièrnèsantu (Djabièrnè 21 di mart próksimo). Ta pidi tur hende pa tuma esaki na kuenta.
Djadumingu dia 23 di mart ta organisá un Familyday plasentero, pero tòg aventuroso pa henter famia. Kuminsando 08.30or di mainta ta kuminsá ku e kaminata aki den direkshon pa kosta nort. Na kaminda tur hende por disfrutá di e naturalesa fabuloso ku nos Parke tin di ofresé. Alrededor di 12.30or ta yega bèk na e sentro di Parke kaminda bo por sigui disfrutá ku un ko’i bebe riba teras.
Den kuadro di 30 aña di eksistensia di Parke Kristòf ta ofresé e kaminata aki pa Nafl. 5,- pa persona. No Pèrd’é.
I naturalmente e aña aki tambe ta organisá e subida di seru tradishonal riba di dos dia di Pasku di Resurekshon. Ta kuminsá 04.00or di mainta djaluna 24 di mart. Partisipashon ta kosta Nafl.5,- pa persona. Huntu ku un guia por disfrutá di subida di solo riba e parti di mas haltu di Kòrsou. Tuma nota ku portanan di parke ta sera ora e grupo sali. Parke lo habri atrobe 07.30or di mainta segun e orarionan regular.