El a sinta na mesa cu su traidor, come cun’e for di mesun tayo. El a bisa un discipulo, kende lo ta esun cu lo traicion’e y cu e lo wordo crucifico y mata.
Jesus tambe a bisa cu despues di tres dia di su morto, e lo resucita pa despues regresa y sinta na man drechi di su Tata, nos Dios.
Semana Santa tin un nificacion insuperabel den nos bida, y e momentonan historico aki a tuma lugar pa haci nos mihor hende, mihor tata y mama, mihor ruman y mihor prohimo.
Den e dianan Santo aki, ta bon nos refleha si nos ta bibando bon, si no ta bon cu otro y si nos ta pordona mescos cu Jesus a perdona nos, apesar cu e tabata claba, colma di dolor na e cruz di palo.
Ki grandeza el a mustra nos, ki poder di piedad el a siña nos, y ta na su lugar pa nos sikiera carga un tiki di su piedad y bondad den nos curazon.
Semana Santa, un siman di Dios, un siman di nos tur.

ORANJESTAD- Diadomingo dia 23 di maart, lo tin e Egghunt nr. 1 di Aruba: SETAR Family Egghunt!
E Stacion di Radio cu e aña aki ta compaña y ta forma parti di e EGGHUNT di SETAR ta Radio TOP FM. For di 10’or di mainta lo duna e prome pista pa asina por start Sali cu e buskeda di webo. Lo tin un total di 95 pista y mas di 1000 webo cu premionan hopi atractivo scondi full rond di Aruba. E pistanan e aña aki lo enfoca riba e cultura di Aruba, pa duna realse na 2008 cu ta proclama como e aña di Cultura na Aruba.
E premionan lo ta hopi atractivo manera semper lo tin viahenan na destinacionnan hopi bunita, Laptop, Weekend Stay, Telefonnan celular naturalmente, televisionnan flatscreen, yamadanan gratis, servicio di DSL gratis y hopi mas!
Lo tin e EASTER SMS CAR RALLY tambe cu yen di premio atractivo cu henter famia por participa na n’e, door di sintonisa Top 95 FM y manda e contestanan corecto via SMS.
Na final lo topa na e “headquarters” cu ta Adventure Golf na unda lo tin entretenimento special pa nos muchanan y naturalmente e Dino JUMP lo tey hunto cu un bar y cushina bon surti. Ta invita un y tur, grandi y chikito pa participa cu henter famia na e evento grandioso aki!
E bandanan cu lo entretene e publico desde 5:30 di atardi ta Youth Extreme y SEARCH.

ORANJESTAD- Centro di Pesca Hadicurari ta pidi tur piscador, particularmente esnan mara na e pier di e Centro di Pesca Hadicurari na Noord, pa keda pendiente cu nan boto y sigui informe di servicio meteorologico. E alerta aki ta pa un posibel resake cual lo afecta nos area diahuebs of diabierna cu olanan mas halto cu normal.
Informe preliminar ricibi for Servicio di Meteo ta indica cu posiblemente diahuebs pa diasabra, di 20 pa 22 di maart, lama por bolter y resake (Swells of Deiningen) lo por afecta botonan na costa di nos isla.
Ta pidi tur doño di boto y piscadornan pa tuma medida di precaucion y keda pendiente di boletin di Servicio Meteorologico. Lo keda publica boletin informativo encuanto esaki segun ricibi esakinan.
For di awe mainta caba e situacion di laman a cambia rond e isla y ppor a nota cu tin olanan fuerte ta sutando costa y na Eaglebeach, caminda tin hopi hende ta campa, algun mucha mester a wordo yuda pa Sali for di e olanan fuerte di laman.
Un alerta general a ser duna pa autoridadnan competente, pa tur hende paga tino riba e situacion di laman, ya cu ainda e por mira mas serio den proximo oranan y e por tin consecuencianan serio pa cualkier persona.
Net e dianan aki tin hopi hende ta campando na laman y pa e motibo aki tambe autoridadnan a bati alarma general riba e situacion di tempo aki.

ORANJESTAD- Bloke sindicatl, cu awe ta consisti di SCCA y TOPA, ta mustra den un comunicado di prensa cu locual Gobierno a duna na compensacion ta 3.52%. Esaki ta un acumulacion di e siguiente for forma.
Vakantie uitkering + 1⅓ % (di 7% pa 8⅓) -/- 1.3 %
Gelijkbedrag + fl.354,00 -/- 0.91%
Voorjaarspremie/Bashi premie fl. 500,00 -/- 1.28%
Sumando -/- 3.52%
For di 1983 te cu 1994 a vries indexering. Durante e anjanan aki e acumulacion di indexering tabata 47%. Na 1996 a reintroduci indexering y a entrega derecho di 25%. A keda combini cu e 22% lo bira inhaalmanoeuvre pa e siguiente 5 anjanan. Na 2001 a keda ainda pendiente un inhaalmanoeuvre 5.2%
Indexering pendiente for di 2001 te cu 2005 13.5%
Sumando 18.7%
Si Gobierno ta bisa cu e compensacion 3.52% ta parti di indexering anto ainda tin 15.18% of afgerond 15.2% di indexering cu abo trahador di Gobierno tin derecho riba dje te cu 2005.
Na 2006 ta bin aserca 3.6%
Na 2007 ta bin aserca 4.2%
Na 2008 ta bin aserca 5.7%
Sumando 13.5%
Bo derecho total di indexering ta 28.7% (pues 18.7% mas 13.5% minus 3.5%) sin conta otro ajustacionnan cu mester tuma lugar.
Check e tabel aki bou cuanto bo salario lo mester ta despues cu lo bo a ricibi indexering.
Xxxxxxxx 5.4% 3.7% 3.0% 3.1% 3.6% 4.2% 5.7%
Salario2001 2002 2003 2004 2005 2006 2007 2008
1,000 1,054 1,095 1,130 1,165 1,210 1,265 1,340
3,615 3,810 3,955 4,075 4,205 4,360 4,545 4,805
4,490 4,735 4,915 5,065 5,225 5,415 5,645 5,970
Acumulativo e ajustacion di bo salario ta mas of menos 32.9%.

ORANJESTAD- Gabinete Oduber IV a tira un “blof” cu sindicatonan den accion pero na final di cuenta esaki no a prospera y den oranan di ayera tardi, sindicatonan den accion a mustra Gobierno e forza di su trahadornan.
Pa banda di 2.30 di ayera tardi, e lapso di tempo cu sindicatonan a duna Gabinete Oduber IV pa bin c’un oferta di indexering a pasa bai y e sindicatonan a dicici di pone un mesa riba caminda principal dilanti di oficina di Gobierno, pa yama un conferencia di prensa y pa reuni cu nan miembronan.
Ey dilanti den porta di Gobierno su oficina, of mihor bisa di Minister Presidente, Sindicatonan den Accion a anuncia cu Gobierno no a cumpli y cu lo bai over na medidanan mas drastico.
A anula tur palabracion haci den Corte di Prome Instancia, esta cu varios servicio mester keda cu un asina yama “minimale besetting” y a yama tur trahador pa bin den accion.
Un rato despues sindicato di bomberonan a yama tur hende pafo, dunando indicacion cu lo no tin personal na pia di trabou na aeropuerto, sindicaton di polis tambe a manda avisa su miembronan cu for di awe mainta 8’or na lo no mester presenta na pia di trabou pero pa reuni na club di POVA, y hasta representantenan di toren di aeropuerto, a anuncia cu nan tambe ta yamando tur hende pa pone trabou abou.
Mesora a surgi un situacion di caos cu hopi hende bayendo den panico y a busca direccion di supermercadonan pa cumpra principalmente awa y cosnan di prome necesidad.
E rumor grandi despues ta cu trahadornan di WEB Aruba NV y tambe di compania NV Elmar tambe lo bin afor pa sostene e trahadornan di Gobierno y den sector turistico e intencion lo tabata pa aki tambe bin cu accionnan grandi cu lo a paraliza e sector aki.

A palabra tempo limite diamars media 12’or

ORANJESTAD- Ayera nochi e caso sumario cu Gabinete Oduber IV a entabla contra di sindicatonan den accion, a tuma lugar caminda pa 11.30 Huez a tuma un decision.
Analisando tur argumento di ambos banda Huez a mustra cu ta bon cla cu tin un conflicto serio pero cu den e disputa aki, no tin ningun discusion tumando lugar ya cu e dos partidonan no ta sintando na mesa.
Mirando e situacion serio cu tin, Huez a determina cu Gobierno y sindicatonan tin cu sinta na mesa y busca pa yega na un acuerdo y pa esaki a duna ambos partido 48 ora pa sinta y analisa loke ta tumando lugar pa yega na un acuerdo.
Si no yega na un acuerdo, e ora Corte lo tuma un decision den e caso sumario aki, pa determina si e accion di e sindicatonan ta hustifica of no of si mester cancela tur accion.
Huez a bin cu e proposicion pa di parti di Corte apunta un persona neutral pa sinta cu e dos partidonan, mientras cu di parti di e sindicatonan den accion, a anuncia cu Magaly Brito, Presidente di SEPPA lo sinta na mes den e comision aki, y di parti di Gobierno ta Minister di Finanza Nilo Swaen lo ta esun encarga pa sinta na mesa y trata di yega na un acuerdo.
E decision di Corte ta loke e sindicatonan tabata desea pa masha dia caba, esta pa Gobierno sinta na mes y bin cu proposicionnan adecuado cu ta aceptabel pa e sindicato.
Mirando cu tin dianan di fiesta religioso importante dilanti porta, Huez a pidi comprension di ambos partido, pa laga e dianan aki pasa y ora cu ambos partido a bai di acuerdo, a dicidi cu e ora limite pa yega na un acuerdo, lo ta diamars merdia 12’or.

ORANJESTAD- Minister di Finanza Nilo Swaen den un intento pa trata di convence trahadornan di Gobierno pa acepta e oferta di Gobierno pa un suma 950 florin pa aña riba nan salario, a bruha e asunto di indexering un tiki mas.
Tratando na convence e trahadornan pa nan regresa trabou, e Minister a sigura e trahadornan cu introduccion di indexering lo no cumbini e trahadornan y cu nan lo haya menos riba nan salario.
Un splicacion cu a bruha e situacion ainda mas, ya cu si enberdad e indexering no ta cumbini e trahadornan, y cu e oferta di Gobierno ta mucho mas mihor, ta di con Gobierno no ta duna e trahadornan indexering e ora, y laga e oferta mas “lucrativo” y supuestamente mas placa pa Gobierno, cai?
Sindicatonan den Accion a reacciona mesora y a mustra cu e oferta cu Minister y Gobierno ta tirando den aire, ta ofertanan cu a yega di wordo rechaza caba y cu ta yegando e momento cu Gobierno tin cu pone cos riba papel pa wordo discuti, pero te na e momentonan aki, ainda Gobierno no a pone nada concreto riba papel.
Pa colmo tababa Minister Presidente Nel Oduber kende den fin di siman a informa cu Gobierno no ta bai duna ningun hende indexering y cu e lo no papia mas riba e asunto aki cu ningun sindicato.
Sinembargo e accionnan di ayera tardi caminda e accionnan a bira mas severo, a pone cu e situacion a bai for di man y practicamente a obliga Gobierno na cambia su postura fuerte cu e kier a impone riba e sindicatonan.

WILLEMSTAD – E polis di 0-Toleransia Wensel Magdalena, a haña awe un kastigu di prizòn di 4 aña. Magdalena a haña e kastigu pa motibu ku, sin pèrmit di su superiornan, el a usa un outo di polis for di su ora di trabou pa bai Toko La Fama na Maripampun unda el a kometé ladronisia.
Wes a haña konvinsentemente pruebá ku riba e dia en kestion Magdalena a kue un outo di polis for di e warda na Rio Canario sin pèrmit di su superiornan. Ku otro palabra el a ‘Joyride’ e outo di polis. Wes a haña tambe konvinsentemente pruebá ku Magdalena a drenta den e establesimentu i a fòrsa e doñonan di e toko pa kumpli ku su òrdunan. Seguidamente el a duna e doñonan di e toko òrdu pa nan keda para dilanti den e toko, miéntras ku el a bai ku un di nan patras pa a listra. Tambe e lo a menasá e doño akí ku si e no koperá e lo bui e. Despues di a listra den e kambernan el a bai ku un maleta ku kontenido. Ku ‘zwaailicht’ sendé el a kore bai Rio Canario kaminda el a stashoná e outo di polis bèk.
E doñonan di e toko a reklamá ku Magdalena a bai ku un maleta konteniendo un montante di 100 mil florin. Sin embargo esaki no a keda pruebá. Magdalena a nenga esaki redondamente i a deklará ku ta droga tabatin den e maleta ku el a benta afó despues. Fiskal Angela a prueba tambe ku Magdalena no tabata outorisá pa drenta den e toko pasó e no tin e funshon di un fiskal ousiliar. Pa por fungi komo un fiskal ousiliar un polis mester tin e rango di inspektor, loke Magdalena no ta.

WILLEMSTAD – Niun di e dos víktimanan di uso di droga eksesivo, ku a muri den outo di polis, no a usa droga venená. Ta trata di Gershwin La Croes ku a muri dia 4 di mei aña pasá dilanti di warda di polis na Punda i Orlando Amerikaan ku a muri dia 24 di mei aña pasá dilanti di warda di polis na Rio Canario.
Fiskal Gisèle Veen-Jonkhout a informá LA PRENSa awe ku, investigashonnan toksikológiko no a indiká ningun supstansia venenoso den e droga ku e dos víktimanan a usa. Fiskal mr. Veen-Jonkhout a splika ku La Croes a muri di un atake di kurason. “E investigashon a indiká ku e uso di koka kontinuo a pone ku e adernan di e víktima a blòkia. Ounke ku e investigashon a indiká ku e konsentrashon di droga ku a midi den sanger di La Croes tabata normal pa un hende ku ta usa droga.”
Den e kaso di Orlando Amerikaan, fiskal Veen-Jonkhout a bisa, ku e víktima akí tambe a muri di un atake di kurason kousá pa adernan ku a sera dor di uso eksesivo di koka. Tèstnan a indiká ku Amerikaan tabatin un konsentrashon hopi haltu di koka den su sanger. “E konsentrashon tabata mas ku loke ta normal pa un hende ku ta usa droga, segun e investigashon”, Veen-Jonkhout a bisa. Den e kaso akí tambe a haña solamente koka i niun otro supstansia ku por indiká droga venená òf kontaminá. Mas aleu e investigashonnan a hasi menshon di e echo ku, uso di droga ta stimulá e persona su ‘centraal zenuwstelsel’, pon’é hala rosea mas lihé i ta subi su preshon di sanger.

WILLEMSTAD – For di seno di G.G.D. tin trabounan ta tumando lugá pa yega na un grupo di trabou ku mester bai atendé ku e problema di abeha na Kòrsou. Den un periodo di algu mas ku 1 aña dos persona a muri sea direktamente òf indirektamente pa motibu di atake di abeha.
E bosero di G.G.D. a bisa LA PRENSA ku na e momentunan akí tin hopi kos ta tumando lugá pa yega na un maneho, pero no por divulgá nada konkreto ainda. Ta bai tuma algun tempu mas promé ku yega asina leu ku por sali den publisidat ku informashon.
Manera LA PRENSA a informá na diferente okashon kaba, e problema di abeha a kousa basta preokupashon den komunidat. Último tempu no tabatin niun kaso kaminda mester a pidi asistensia di un apikultor, manera tabata e kaso den kuminsamentu di aña. E último kaso tabata di un kachó ku a muri a konsekuensia di e pikánan ku el a haña ora un grupo di abeha a atak’é.

WILLEMSTAD – Stakamahakchi, ta e kampion di 2007 di Kòrsou den Kategoria Maskulino.
E úniko ekipo ku Xaverianen ta tin problema kuné den kampionato 2007 tabata Stakamahakchi/Fatum. Stakamahakchi/Fatum a gana Xaverianen 6 bes den nan último 8 enkuentro.
Xaverianen ta kuminsá wega bon konsentrá i spanta tur hende tumando un distansia for di Stakamahakchi/Fatum di 5–0 poniendo staf di coach di Staka pidi purá un “time-out” pa trankilisá su hungadónan.
E “time-out” pidí a yuda pasobra Stakamahakchi a drenta bèk den wega i ta kòrta e bentaha ku Xaverianen ta tin i asta bai dilanti pa gana e wega 25 – 21.
Na e momento kosnan a sigui drei i ta Stakamahakchi ta tuma tur inisiativa den e siguiente sètnan.
Ámbos ekipo ta duna e públiko grandi ku a asistí na SDK pa mira e wega algun hugando tremendo ku nan ta tin di lanta para i aploudí e hungadónan. Stakamahakchi sigur a hasi bon uso di nan hóben pa no laga Xaverianen ningun momento drenta den nan wega durante sèt 2 i 3. Staka ta gana sèt number dos 25 – 21 pa despues gana sèt number 3 tambe ku skor 25 – 21.
Asina nan ta titulá kampion di Vòlibòl 2007. Xaverianen ta keda komo sup kampion meresí.
Di parti de Federashon di Vòlibòl un pabien na Stakamahakchi/Fatum i Xaverianen i tur e mundu di Vòlibòl.
Pa tur hende felis dianan di fiesta i nos ta topa otro siman djaweps 27 di mart pa 19:30 na momentu ku den Kategoria Femenino Superior Hurricane topa ku Stakamahakchi/Fatum.

WILLEMSTAD - Hopi emoshon tabata tin djamars anochi durante di e torneo di e damanan.
Den luna di mart CTTB a organisá torneo Kopa Harry Walters pa e kabayeronan, Kopa Irene Moreno pa damanan, e torneo mensual Hubenil i dia 27 di mart lo tin torneo di Veterano pa tur hungado riba 35 aña.
Kopa Harry Walters
Den klase A, Kabayero 14 hungadó a presentá pa kompetí pa Kopa Harry Walters.
E weganan tabata na un bon nivel den e pulnan a pone ku e weganan a tarda promé ku por a yega na e semi-finalnan.
Eldert van Hout i Joaquin Rodriguez na esun banda i Ronaldi Vos i Henny Metry na e otro banda ta bai semi-final.
Eldert ta gana Joaquin Rodriguez pa default pa motibu di un leshon i Ronaldi Vos ta gana di Henny Metry den straight sets.
E final ta bai entre Eldert van den Hout i Ronaldi Vos.
Ounke ku Ronaldi Vos ta pika bon dilanti den tur e sètnan tòg Eldert van den Hout ku un wega mas ekilibrá ta gana ku e skornan 11-7, 11-6 i 11-9.
Harry Walters, ku a dirigí e Federashon di Pin Pòn for di 1961 te ku 1970, no por tabata presente siman pasá pa motibu di kebrante di salú.
CTTB ta kaba di risibí e tristu notisia ku Harry Walters a fayesé i ta deseá su famianan hopi forsa.
Kopa Irene Moreno
E echo ku den e sekshon di Damas ta presentá tres dama nobo ta trese hopi nervio i emoshon.
E rumannan Jouraida i Juralice de Leça ta hasi nan come-back i e hulandes Tjarda Fuyckshot despues di 10 aña di inaktividat ta hunga su promé wega den kompetensia di Kòrsou.

Skina di Sorti, awe djaweps 20 di mart di 2008, ta kuminsá ku deseá tur hende un bon dia. Komo estudioso di e fenómeno polítika, mi ta hiba un aserkamentu poko mas formal ku e praktikantenan di polítika na momentu di analisá sierto insidentenan. Un di e puntonan na kual mi ta atribuí hopi peso ta na definishon di konseptonan ku ta na órden. Mi a bini ta mustra riba un interpretashon superfisial ku ta biba serka vários polítiko di reglanan di bon gobernashon.
****
Hopi ta wak bon gobernashon simplemente komo un kuadro di regla di kondukta i partikularmente e kuadro hurídiko kaminda kosnan ta hopi eksplísito enkuadrá den lei òf reglanan skirbí. Bon gobernashon sinembargo ta relashoná ku meta di ékis entidat. Ku otro palabra e aspekto di akshoná di tal manera ku bo ta sirbi e meta ta e kuadro mas amplio. Den negoshi ta papia di forsa bo mes pa yega na oumentá i/òf mantenshon di balor dje entidat (“duurzame waardecreatie”).
****
Pa un strategista e “duurzame waardecreatie” manera mi a skirbi na diferente okashon ta nifiká ku bo ta wak alokashon di rekursonan den lus di e posishon mas mihó na un determinado momentu den futuro (por papia di un “ongoing resource conversion cycle”). Den gobernashon e meta general ta keda esun di elevá nivel di bida. Tur rekurso di pais su uso mester ta ku un determinado nivel di bida (òf akseso na dje) den futuro.
****

Willemstad – E direktor tékniko di e selekshon nashonal di futbòl di Antia, lo a anunsiá e 18 hungadónan ku lo mester perkurá pa e viktoria kontra Nicaragua djarason 26 di mart próksimo den Stadion Ergilio Hato.
E 18 hungadó selekshoná
Esnan selekshoná ta: Wencho Farrell (Turkiyemspor) 2. Lennox Mauris (Turkiyemspor) 3. Angelo Martha (Willem II) 4. Tyrone Loran (NAC) 5. Djuric Winklaar (AFC Quick 1890) 6. Angelo Zimmerman (BV Veendam) 7. Revy Rosalia (Top Oss) 8. Anton Jongsma (FC Zwolle) 9. Robin Nelisse (FC Utrecht, kapitan) 10. Brutil Hosé (Haaglandia) 11. Orlando Smeekes (GA Eagles) 12. Richel Leitoe (FC Lisse) 13. Giovanni Franken (RVVH) 14. Eugene Martha (Jong Colombia) 15. Angelo Cijntje (BV Veendam) 16. Dyron Daal (Club de Fútbol Fuenlabrada, Spaña) 17. Benjamin Martha (RBC) 18. Raymond Homoet (Volendam).
Mayoria di hungadó ku ta hunga na Europa ta pone pia na Kòrsou djadumingu atardi pa 5.15or.
Un i tur ta keda invitá pa ban yama bon bini na nos streanan di e Selekshon Nashonal di futbòl ora nan yega Kòrsou.
E entrenamentunan di e selekshon ta tuma lugá den Stadion Ergilio Hato riba e siguiente fechanan i oranan:
Djaluna 24 di mart pa 4’or di atardi;
Djamars 25 di mart pa 9.30 or di mainta i 4’or di atardi;
Públiko ta invitá pa bin mira e Selekshon Nashonal entrená i mira e streanan den nan práktika.
Karchinan na benta na 4th of July na Barber i Beebeepnan

PHILIPSBURG – Diputado di Asuntunan Konstitushonal di St. Maarten, Sarah Wescot-Williams tin speransa ku diskushonnan ku Sekretario di Estado di Ulanda pa Asuntunan Konstitushonal, Ank Bijleveld-Schouten riba e fecha di 15 di desèmber lo tuma lugá na aprel. E konsulta polítiko programa ku tur partner di Reino lo keda kanselá. “Durante mi diskushonnan ku Bijleveld na Ulanda, e tambe a ekspresá su dudanan ku lo bai tin un konsulta polítiko na aprel próksimo, esaki pasobra lo no tin asuntunan kla pa tuma desishon polítiko riba nan ku eksepshon di e fecha di 15 di desèmber,” asina e diputado di St. Maarten a deklará.
Wescot-Williams a bisa Bijleveld-Schouten, ku e si ta kere ku un diskushon mester wòrdu ten’é na aprel, ounke ku lo no tuma ningun desishon. “E informashon riba e posibilidat pa logra e fecha stipulá tei i mester keda diskutí.”
Di akuerdo ku diputado Wescot-Williams, e Sekretario di Estado di Ulanda a indiká, ku ta na fabor di un diskushon asina, pero no na un nivel di konsulta polítiko. “Ban spera ku na mei un konsulta polítiko por tuma lugá,” e diputado a sigui bisa.
Pa loke ta trata e negosiashonnan ku ta andando relashoná ku e proseso di kambio konstitushonal, el a bisa ku St. Maarten ta mantené e punto di salida ku desaroyo konstitushonal ta un pakete kompleto riba kual tur partner a yega na un akuerdo riba diferente área manera finansa, hustisia i bon gobernashon, ku bista riba e kambio di status pa e diferente entidatnan.

FERNANDES
Alvin J.
A laga atras su rumannan Lionel Fernandes, May Fernandes, Rosemarie Fernandes-v.d. Wall Arneman.

LUIS
Emilio José (88 aña)
Mihó konosí komo Mio
A laga atras su yunan Dulce i Irving Carty-Luis, Mavis Luis, Rosemarie i Oswald Seferina-Luis, Kenneth i Sandra Luis-Isenia, Herbert i Idis Luis-Ogenio, Harold Luis i Miosotis Suarez, Ludmila i Stanley Kleinmoedig-Luis, Arthwin i Liesbeth Luis-Calister. Akto di entiero ta djasabra 22 di mart for di El Señorial. Bishita 9or. Sirbishi na El Señorial i despues pa santana Montaña.

ARENDS
Elina Margaritha
Mihó konosí komo Mama
A laga atras su yunan Roiberto i Sandra Gonzalez, Hilario, Dila, Raquel, Toribio Gonzalez, Ramon i Mayra Gonzalez, Violeta i Anibal Teixeira-Gonzalez, Ronald i Fatima Gonzalez, Reynaldo i Nerijda Gonzalez, Marcos i Gina Lieder-Gonzalez. Akto di entiero ta djasabra 22 di mart 3.30or for di El Señorial pa santana Memorial Park. Bishita 1or-3or.

SEBASTIANA
Eligio Ricardo Liborio
Mihó konosí komo Camaguey
A laga atras su eks kasá Esther Herrera, yunan eligio Jr., Reinier, Ramsley Sebastiana tur ku nan famia, ñetunan Rachid, Lakeisha, Ryneisha i Sue-Allen, ruman Aristides Sebastiana i famia. Akto di entiero ta djamars 25 di mart for di El Consolador pa santana Roodeweg. Bishita 9or. Promé ku entiero tin un respòns 10.30or na El Consolador.

WALTERS
Hendrik Carolus (75 aña)

WILLEMSTAD- Maduro & Curiel's Bank, E Amigu di Deporte i orguyoso spònser prinsipal di nos Selekshon Nashonal di Futbòl for di aña 2004 ta duna pueblo di Kòrsou e oportunidat pa sera konosí di aserka ku miembronan di nos selekshon Nashonal di Futbòl ku ta rumbo pa Mundial 2010.
E Ban Topa Nos Selekshon ta tuma lugá djamars, dia 25 di mart na Skaloko (patras di The Movies). E Ban Topa Nos Selekshon ta start mitar di 7 di atardi i ta terminá 9’or di anochi.
Riba e anochi aki Bo Banko Amigu lo presentá kada un di e hungadónan di nos selekshon un pa un na pueblo di Kòrsou.
Aparte ku por konosé hungadónan di nos selekshon Nashonal di aserka na e Ban Topa selekshon dia 25 di mart, tambe lo tin presentashon di Rhydd’m Band, refresko grátis pa tur hende i regalito pa tur hende.
Riba e anochi Bo Banko Amigu lo regalá 100 karchi i T-shirt grátis pa e wega di Antia v/s Nicaragua ku ta tuma lugá djarason 26 di mart na SDK.
E propio hungadónan di nos selekshon Nashonal di Futbòl lo saka e 100 ganadónan riba e anochi aki.
Maduro & Curiel's Bank, orguyoso spònser prinsipal di Selekshon Nashonal di Futbòl for di aña 2004 i NAVU ta invitá pueblo di Kòrsou pa Ban Topa miembronan di nos selekshon di aserka dia 25 di mart pa asina dia 26 di mart den e partido eliminatorio pa Mundial 2010 kontra di Nicaragua, nos tur por apoyá nos selekshonadonan na nan nòmber.

Lorito ta yama tur hende un felis djaweps. Awe ta Djaweps Santu. For di mainta hopi hende ta kumprando eis i karni. Nos ta kontentu di mira tambe hendenan ku ta preparando pa e parti spiritual.
*********
Nos kier a bin bèk riba e kaso di famia Claret ku a laga nos masha preokupá. LA PRENSA komo úniko medio a bisa den un editorial for di aña pasá, ku e hecho ku tin organisashonnan di polis ta funshoná sin kòntròl adekuá, por krea organisashonnan paramilitar ku nan mes kultura den nos pais. Semper kualke unidat di polis mester ta supordiná na un outoridat mas haltu ku mester duna kuenta i rason pa e akto di e unidat aki, sea ku ta AT, RST, 0 Toleransha òf kualke otro.
*********
Pa Lorito no ta straño ku Ulanda ta dia pa dia mas enbolbí den nos asuntunan di hustisia i polis. Es mas, e pregunta ta, si no mester pone hustisia kompleto den man ulandes konsiderando den kiko nos a hinka nos mes. Lorito ta bisa e kosnan aki ku masha doló den nos kurason, pasobra nos si ta kere den nos mes pero nos a traha un káos ku prinsipalmente nos polis. Por sierto ku polisnan mes a yama e situashon un káos den e rapòrt “Nu of nooit” ku nos ta rekomendá tur hende pa lesa.
*********
Lorito ta hopi preokupá ku den forma indiskriminá i aparentemente sin kòntròl, un Tim di Polis por drenta unda ku ta, pasobra tabatin un tep òf tepnan den un kaso. P’esei nos ta sostené famia Claret kompleto den su búskeda di klaridat i satisfakshon. Un di e preguntanan ku mester kontestá ta: unda e informashon konkreto ta pa hustifiká e entrada na kas di hendenan ku ta bisa ku nan ta biba segun reglanan di órden i desensia? Si no tin e informashon konkreto aki, nos tur ta na mersét di outoridat den nos mes pais. Na ulandes nan ta bisa: “vogelvrij” (verklaard).

WILLEMSTAD – SKS ta bisa ku semper e tabatin pòstnan ambulante i nunka tabatin problema ku e pòstnan aki. Asina SKS ta bisa relashoná ku un publikashon di e siman aki den LA PRENSA riba e situashon na Las Almas. Den e artíkulo en kuestion nos a reprodusí un entrevista ku nos tabatin ku Arthur Nivellac di ARBO Consult.
SKS ta bisa ku el a investigá un ke otro i a drenta entre otro den kontakto ku señor Nivellac di ARBO Consult. Nivellac a informá SKS ku e apsolutamente no ta di akuerdo ku e manera ku den e artíkulo en kuestion ta krea e impreshon ku el a duna su opinion tokante SKS su pòst na Las Almas o ku el a desaprobá esaki. Riba djaluna último el a keda aserká pa un reportero di e vespertino en kuestion ku algun pregunta general tokante kondishonnan di trabou. Fuera di esaki Nivellac a reakshoná riba algun pregunta hipotétiko, ku di ningun manera no ta’tin di haber ku e situashon real di e pòst di SKS. Na ningun momento durante di e kòmbersashon aki no a papia di medidanan ku SKS a tuma rondó di e vigilansia aki. Durante hopi aña, SKS a keda regularmente enkargá ku vigilansia for di pòstnan temporario i ambulante. Fo’i inisio de e trabounan na Las Almas, SKS a sòru p’e funshonarionan keda kambiá ku regularidat n’e pòst aki. Durante nan presensia na e pòst, nan no ta obligá di keda sintá den e vehíkulo. Fuera di esaki, nan tin e oportunidat - segun nan nesesidat - pa bai na e edifisio di SKS na Seroe Loraweg, ku ta keda mas o ménos 2 minüt for di e pòst na Las Almas. E grupo di servisio di SKS semper ta keda konsultá ora ta tuma e medidanan aki. LA PRENSA lo bin bèk riba e deklarashon aki di SKS.

WILLEMSTAD – Asosashon di Komersio i Industria (VBC) a rechasá e idea di gobièrnu pa apsorbá subidanan di preis. “Gobièrnu mes ta hisa preis (di hasi negoshi) tur dia i no por spera ku komersio ta karga ku e oumentonan aki. Ademas tin un seri di faktor eksterno ku ta impaktá riba desaroyo di preis”, asina VBC ta bisa den un komentario relashoná ku e petishon ku promé minister Emily de Jongh-Elhage a hasi e siman aki den un diskurso pa wanta oumento di preis. Sra. De Jongh-Elhage tabata orador invitá na un almuerso di Kámara di Komersio. E promé minister a hasi un apelashon tambe na sektor empresarial pa adaptá sueldo mínimo na e gastu di mantenshon di bida ku ta subiendo.
VBC ta bisa ku e ta komprondé masha bon, ku e subidanan di preis resien, ta kai duru pa hopi hende i sigur pa e gruponan ku ta kai bou di entradanan mas abou. “Nos ta di akuerdo ku Minister-Presidènt ku mundu empresarial mester hasi su esfuerso pa tene subida di preis pa e konsumidó bou di kòntròl. VBC por sigurá Promé Minister ku ya pa añanan kaba, mundu empresarial no ta hasi otro ku trata di tene preis mas kompetitivo posibel. Den e último 10 añanan inflashon kumulativo na Kòrsou di total mas o ménos un 20% tabata mas abou ku esun di Estádos Unídos di Amérika, Ulanda (tabata serka di 25%) i den paisnan di Caricom, unda ta papia di oumento di preis kumulativo di no ménos ku 70%. Grásias na e kompetensia entre nan, preis na Kòrsou a keda abou i no tin motibu di kere ku empresarionan lo bai desviá di esei. Pero sí hende mester realisá ku mundu komersial no tin espasio pa apsorbá subida di preisnan eksterno (zeta, produktonan alimentisio, materia prima etc), mas aún si komèrsio ta ser konfrontá tambe pa faktornan interno ku ta kondusí na subida di preis. Ta trata aki di medidanan gubernamental, manera subida di primanan di seguro sosial, tarifanan di utilidat, subida drástiko di tarifanan pa pèrmit di trabou, oumento di sueldo mínimo. Miéntras ku di un banda gobièrnu mes ta okashoná inflashon ta hasi un yamada na mundu empresarial pa tene preis abou. No por spera di komèrsio ku esaki lo por sigui apsorbá mas subida di preis”, asina VBC ta bisa.