WILLEMSTAD – Famia Claret awe mainta a entregá un keho ofisial kontra e polisnan di 0-Toleransia. Dos siman pasá e tim di polis a drenta den kas di e famia buskando droga i arma. E famia a reklamá e manera ku esaki a tuma lugá ya komo ku nan no ta metí den nada ilegal. Dor ku te awe nan no a haña reakshon di parti di polis, nan a bai O.M.
E kaso a tuma lugá eksaktamente dos siman pasá, ora e polisnan di 0-Toleransia a drenta den kas di e famia i ordená tur hende pa drumi abou. Despues di hopi gritamentu i uso di palabranan ofensivo, segun e famia, e polisnan a listra den e kas i a bai sin haña algu. E famia ta hopi mal kontentu ku e manera ku henter e listramentu a tuma lugá i a entregá un keho awe na Ministerio Públiko. “Henter e proseder no tabata basá riba un investigashon previo ken nos ta i kon nos ta biba. Si polis vigilá nos dos te tres dia manera nan ta bisa, no por ta asina ku nan ta drenta i puntra ta ken ta doño di kas”, Claret a bisa LA PRENSA.
Mas aleu Claret a splika ku el a eksihí pa bin ku un aklarashon kon e proseso a bai, te ku a disidí ku ta drenta den su kas. “Mi ke pa nan splika ki ora bo ta sospechoso i ki ora ta drenta bo kas. P’esei mi a entregá e keho awe mainta na fiskal mayó Joubert i m’a dun’é 4 siman pa e reakshoná. Dependé e kontesta, lo mi tuma e pasonan ku mi tin planeá. Mi no ta bai aseptá ku e kaso akí ta kaba na aros i koko”, Claret a bisa finalmente.

WILLEMSTAD – Por poko tabatin un situashon hopi lamentabel, kousá dor di abehanan ku a presentá den Marchena durante Seú ayera. E abehanan ku tabata buskando un sitio pa nan traha un nèshi, a kousa basta korementu i pániko bou di un grupo di hende ku tabata na e sitio kaminda e abehanan a baha.
E molèster i problema di abeha ku LA PRENSA a bolbe skibi riba dje no mas ku siman pasá, ketu bai ta wardando riba solushonnan duradero. Despues ku un persona a muri direktamente i un otro indirektamente dor di atake di abeha, i vários kachó tambe a bira víktima di pikánan di abeha, te ainda no tin un maneho konkreto pa atendé ku e situashon. No mester lubidá tur e skolnan ku na diferente okashon mester a sera i manda muchanan kas, pa motibu ku abehanan a drenta den kurá di skol. I finalmente tur e habitantenan den diferente bario rònt Kòrsou ku mester a sera nan mes den nan kas òf mester a bandoná nan kas despues ku abehanan a drenta e bario i kousa hopi molèster.
Pa hopi tempu kaba tin trámitenan ta tumando lugá pa yega na un ‘grupo di trabou’, ku mester studia e molèster akí, pero di un manera òf otro esaki no ke logra. Entretantu abehanan ta keda kousa molèster na momentu ku nan ta buskando un sitio nobo pa traha un nèshi. E suseso di ayera afortunadamente a kaba sin niun víktima. Sin embargo kosnan por a sali kompletamente for di man, si e abehanan a ataká un òf mas hende. E situashon, kaminda tabatin hopi hende riba kaya, por a sali kompletamente for di man si tur hende a kuminsá kore kousando un pániko. E multitut di hende koriendo por a atropeá e muchanan ku tambe tabata na e sitio i kousa mas víktima. No papia mes di e situashon ku por a surgi, si e abehanan a ataká un òf mas hende mortalmente.

Skina di Sorti, awe djamars 25 di mart di 2008, ta kuminsá ku deseá un i tur un bon dia. Si no tin momentunan di reflekshon, praktiká diario i den dje e manera ku hende ta eksperensia bida (“belevenis”) ta bai propulsa akshonamentu. Konsekuensia ta e ora ei, ku gradualmente i inatvertí, kosnan por bai di malu pa pió. Ta keda baha e lata pa kompará funshonamentu, a medida ku deterioro mental ta wòrdu apsorbá. E persepshon di momentu ta para bira e kuadro di pensa i aktua. Efektonan sosio sikológiko ta perpetua i fakultat pa rasoná ta keda afektá pa lokual a bira un patronchi kultural.
****
Den práktika polítiko, e tendensia di duna nan mes un importansia eksagerá, ta algu ku e mayoria di polítiko ta peka kuné (ela bira e “way of life” polítiko). E aspekto di representashon di pueblo i di sirbi interes di miembronan di un komunidat, ta bini den sombra di akshonamentu den kuadro di rivalidat polítiko (e bringamentu di partido kontra di partido òf polítiko) i propagamentu di un sierto imágen propio. Den esei tin hopi mal uso di derechonan fundamental, entre kual esun di libertat di ekspreshon.
****
Esnan den polítika ku saka momentu pa reflekshon, en bes di keda den e tormulina di bida diario, ta komprondé ku tin un diferensia fundamental entre apliká “terughoudendheid” den trese kambio den legislashon kaminda derechonan ta ankrá i ser “terughoudend” den ekspresá un opinion riba aplikashon di un lei òf derecho. Mi a yega di skirbi na vários okashon ku “de politiek” mester ta “terughoudend” pa lokual ta kambio den lei ku tin di haber ku derechonan fundamental, entre kual derecho di liber ekspreshon.

WILLEMSTAD - E prestigioso korant merikano, The New York Times (NYT) a dediká basta espasio siman pasa riba e fenemeno turistiko nobo ku Kòrsou a sera konosí kuné for di aña pasá. Esaki ta e turismo di dollar for di Venezuela. E relato aki ta amplio ku ta wòrdu kompañá ku 12 foto di Kòrsou. No ta un sekreto ku for di dia ku venezolanonan a deskubrí un fayo den nan leinan i tambe den intenshonnan di presidente Hugo Chávez, ku e tipo di turismo aki a bin ta floresé pa Kòrsou. No solamente aeroliñanan a bin saka probecho di e fenómeno basta nobo aki, pero tambe hotelnan, kompanianan di hür outo, restorantnan, komersio i personanan privá ku a mira un negoshi ku e kambiamentu di dollar. Ta konosí ku e personanan aki i tambe algun negoshi ku ta kambia dollar ku e venezolanonan a gana hopi plaka ku e tipo di transakshonnan aki. Bankonan ta man na kabes i miéntras ku algun ta tuma un posishon mas rígido otro nan ta mas fleksibel.
E fenómeno aki a bin ta hala hopi atenshon na nivel mundial i prensa internashonal a dediká hopi atenshon riba e turismo di dollar aki. LA PRENSA atraves di último lunanan a tuma nota di vários artíkulo ku ta pone atenshon riba e fenomeno aki. LA PRENSA mes den pasado a skibi basta riba esaki.
E periodista di New York Times, Simon Romer a skibi un artíkulo basta amplio riba turismo di dollar na Kòrsou ku apesar ku a kere ku a bin mengua tòg ainda ta un parti importante di e kantidat di venezolanonan ku ta biahando ketu bai pa Kòrsou. Prueba di esaki ta e sifranan ku Curaçao Airport Partners a publiká siman pasá den kual ta demostrá ku ketu bai tin un oumento supstansial di turistanan venezolano ku ta yega nos isla.

NEW YORK, - Gobernador nobo di New York, David Paterson, kende siman pasá a remplasá Eliot Spitzer despues ku Spitzer a retirá pa skandal di prostitushon, a atmití ku el a usa droga.
Paterson, kende a asumí gobernashon 17 di mart último aparentemente ku imágen limpi ku lo pèrmitié laba polítika di e Estado merikano, a bisa televishon NY1 ku el a usa tantu mariwana komo kokaina den dékada ’70.
“Mi ta’tin 22 òf 23 aña. Si, mi a purba nan un par di bia”, Paterson a indiká, kende awor aki tin 53 aña.
E “honeymoon” polítiko di Paterson, kende ta e promé gobernador neyorkino siegu i di rasa pretu, a finalisá velozmente despues di tiki ora di asumí gobernashon, ora tantu e komo su esposa a atmití ku nan ta’tin relashon ku amante pafó di nan matrimonio.
Pero su konfeshonnan probablemente lo no daña su karera polítiko.
Eks Presidente merikano Bill Clinton, por ehèmpel, a atmití ku el a usa droga promé ku el a yega Kas Blanku, i ora e tabata einan e ta’tin aventura amoroso pafó di matrimonio.

WASHINGTON, - Sòldánan merikano ya a sakrifiká sufisientemente na Irak i ta tempu pa nan regresá Merka, e aspirantenan demókrata pa Kas Blanku a bisa, ora ku sifra di militarnan merikano morto na e pais di Golfo a yega 4.000.
“Ta tempu pa terminá e guera aki ku nunka mester a kuminsá. E trupanan mester regresá kas ku e meta pa pusha lidernan di Irak pa responsabilisá di nan propio futuro”, senador pa Illinois, Barack Obama, a bisa.
Rival demókrata di Obama, Hillary Clinton, a bisa ku e militarnan merikano a hasi tur loke a pidi nan, entre otro tumba régimen diktatorial Saddam Hussein i asta proveé espasio “safe” pa irakínan uni.
Sin embargo, e kandidato republikano, John McCain, a bisa: “Al Qaida no a keda derotá. Nos tin ku sigui train e militarnan irakí i sigui hasi loke nos ta hasiendo si nos ke establesé situashon stabil na Irak”.

Tur hende mester para ketu i realisá ku algu serio a pasa kaba i ta sigui pasando na momentu ku bo bario bira víktima di vandalistanan deskonosí kendenan ku grafiti ta okashoná konsientemente polushon visual i destrukshon serio na propiedat di otro.
Mi ta ninga na akomodá mi mes ku e pensamentu ku ta trata aki djis di akto di algun mucha baldadi. Sigur ta ku ta hende ku un sierto nivel di formashon pasobra nan òf e, no a kometé eror den loke a skibi. Pero kon ku ta un problema grandi ora bo realisá ku tin kriminal sin eskrúpulo ta baha balor di un bario kompleto markando riba propiedat di otro hende. Esaki ta un krímen, sin importá ki edat esun ku a hasié tin. I pa e motibu aki mester duna atenshon na e realidat aki pasobra despues di vandalismo kiko mas?
Ya kaba por a nota diferente otro akto molestioso, pero e grafitinan i sigur loke ta keda ilustrá (wak e potrèt) ta un krímen sumamente serio.

Un vandalista ta un hende ku mente kriminal ku ta kometé su akto konsientemente ku e úniko meta pa hasi daño na propiedat di otro hende òf propiedat públiko. I ta bèrdat. Tòg por nota ku ta asina ku no ta konsiderá vandalismo komo algu masha serio, ta dependé den ki konteksto por hink’é pa e haña e atenshon mas serio. Loke si tur hende na tinu ta rekonosé ta ku e ta un akto di hende no kulto ku tin un meta: daña loke ta di otro.
I por tipifiká esun ku ta hasié komo kriminal, pasobra e ta na tinu sufisiente pa hasié na momentu ku niun hende no ta wak e i ku no por identifik’é ku e komportashon di fe sla di un vandalista.

WILLEMSTAD – Un famia di 8 persona a shuata pa piská i mester a keda hospitalisá. Un famia kompleto a kome piská riba Bièrnè Santu a keda hospitalisá ku urgensia despues ku nan a sinti nan mes malu. Algun di e miembronan di famia inkluso mester a keda interná den kuido intensivo, ya ku nan kondishon tabata na peliger. Durante e fin di siman algun di e miembronan aki mester a baha for di kuido intensivo, pero tabata ayera nochi ku kondishon di e mama a bolbe empeorá i ku mester a buska otro fórmula pa atend’é.
Un ruman hòmber i e tata di famia ainda ta sufriendo di keintura, ya ku e piská Snoek ku nan a kumpra na barku venezolano ta kousa di e kondishon. Segun LA PRENSA a komprondé di algun miembro di famia ku Servisio di Salubridat Públiko a manda buska pida di e piská aki, di manera ku investigashon ta kontinuá. Den oranan di awe mèrdia mester a hiba parti di e piská aki na GGD pa investigashon.
E famia aki a kumpra e piská aki riba djaweps i pa bièrnèsantu un famia di 8 persona tabata bou di tratamentu na hospital. Bosero di St. Elisabeth Hospital a konfirmá e kaso aki, mustrando ku enbèrdat ku tin un famia ku a keda hospitalisá, miéntras ku algun ya nan kondishon a normalisá. Di otro banda no por divulgá mas informashon ya ku e kaso aki a bira un kaso ku GGD mester atendé di manera ku ta buskando informashon di GGD.
Di e ocho miembronan di e famia aki ku a kome e mesun piská aki, tres tabata den kuido intensivo, miéntras ku e sinkunan a keda hospitalisá pa tratamentu. Den fin di siman tin ku a bai kas, pero ku a sigui ku keintura haltu. E tata ku tabata den kuido intensivo a baha, pero den fin di siman a surgi komplikashon, meskos ku e mama tambe ku keintura haltu ku a hasi e kondishon muchu mas delikado. Pa awe mèrdia lo presentá ku muestra na GGD pa investigashon di e Snoek ku a keda kumprá na barku djaweps último.

WILLEMSTAD – Solamente 39 persona a hasi uso di e oportunidat pa registrá e tereno ku nan a okupá ilegal na Las Almas. Sin embargo gobièrnu a identifiká siman pasá un kantidat di 147 tereno okupá di un òf otro forma. No ta habitantenan di Las Almas so, pero esnan di Barbouquet i Seru Loraweg tambe mester bai registrá e tereno ku nan a okupá sin pèrmit di gobièrnu.
Di e manera akí e inventarisashon ku mester a tuma lugá di kasnan trahá ilegal den Las Almas, a haña un buèlta kontrali di e petishon di Plataforma Banda Ariba. E petishon pa inventarisá e área di Las Almas a kambia den un parti di Barbouquet te Seru Loraweg. Esaki sigur a kai komo sorpresa, segun e Plataforma ku a urgí pa bin ku investigashon riba konstrukshonnan ilegal, ku a para bira ku lo bai tin hopi hende ku mester bai na registrá.
E profeshonalnan di Domeinbeheer, DROV i Kadaster kompañá pa SKS a hasi e promé parti di inventarisashon di okupashon ilegal di tereno i konstrukshon ilegal na Las Almas. Gobièrnu di Kòrsou a duna e servisionan ariba menshoná e tarea pa duna un bista general di e situashon di okupashon ilegal di tereno i konstrukshon ilegal na Las Almas pa asina yega na solushonnan konkreto. Basá riba e petishon aki a kuminsá ku inventarisashon kompleto di henter e área di Las Almas, kaminda tin diferente bibienda konstruí riba tereno di gobièrnu.
Tin bibienda ku ta den estado penoso, sin fasilidat sanitario adekuá i tin bibienda ku si ta kuadra ku loke lei ta preskribí ounke ku e doño no tin pèrmit legal pa konstruí. Siman pasá a wak i midi i saka pòtrèt di tur konstrukshon den e área aki.

(Nicaragua a yega ayera nochi)

WILLEMSTAD - Djadumingu pa 5’or di atardi e buelo di KLM K735 for di Amsterdam a baha ku miembronan di e selekshon nashonal di futbòl.
For di djadumingu a kuminsá tambe ku e último preparashonnan di e selekshon pa e gran partido di futbòl ku tur hende tabata spera mayan djarason.
Entretantu e promé entrenamentu di nos selekshon a tuma lugá den Stadion Ergilio Hato.
Nos selekshon nashonal definitivo, bou di direkshon di Leen Looyen, ta konsistí di e siguiente streanan:
Kipernan: Wencho Farrell i Raymond Homoet
Defensornan: Angelo Cijntje, Tyrone Loran, Angelo Martha, Eugene Martha, Lennox Mauris i Djuric Winklaar.
Medio kampistanan: Giovanni Franken, Anton Jongsma, Revy Rosalia, Orlando Smeekes i Angelo Zimmerman
Atakantenan: Dyron Daal, Brutil Hosé, Richal Leitoe, Benjamin Martha i Sendley Bito.
Mester apuntá ku Robin Nelisse lo no forma parti di e onsena ku ta subi tereno kontra Nicaragua debí na estado di su señora ku ta en esperá di e pareha su promé yu un di e dianan aki.
Entretantu djaluna anochi 7 or e selekshon di Nicaragua, bou di direkshon di Mauricio Cruz, e pone pia na Kòrsou i lo kuminsá awe djamars ku nan entrenamentu pa mañan djarason.
Aki na Kòrsou nos mester minimalmente empatá ku Nicaragua pa por sigui pa nos siguiente reto ku ta Haiti.
E selekshon ta konta ku e ta risibí apoyo i sosten di e públiko lokal p’asina por garantisá nos pase.

WILLEMSTAD -- Thakai Doran tin na su enkargo, trèk i kordiná e proyekto pa selekshon di Antia bolbe kuminsá move ta trahando den silensio pero bastante duru.
E foto ta indiká un kombersashon no-ofisial entre e hóben dirigente i Renato Anasagasti. Ta trata di e di dos kombersashon den e aserkamentu di NaBaFe pa inkorporá Anasagasti na e kuerpo tékniko antiano.
Fuentenan hopi yegá na e desaroyonan ta indiká ku den transkurso di e siman aki partidonan lo bai mesa pa yega na un aserkamentu ofisial, entendimentu i posibel akuerdo. A straña hopi ku Rey Nato a keda ekskluí na inisio di su lugá den e kuerpo tékniko.
E super pelotero i dirigente ku a kondusí Wild Cats sierto momento na shete título konsekutivo no kier a duna ningun deklarashon.
Ta sigur ku e pelotero/dirigente lo pidi kuenta i rason pa e hecho ku a pasé “voorbij” den promé rònt.
Thakai Doran ta un hóben hopi dinámiko ku ta trahando ku entusiasmo ku mira riba un “new start” pa nos beisbòl pa loke ta representashon internashonal.
Doran ta di opinion, ku no e komo persona, sino e trabou ku e ta ehersé i e produkto ta importante.
Entretantu Antia ya ta forma parti di e skema di wega di e di 24 edishon “Haarlemse Honkbalweek” ku lo tuma lugá den luna di yüli próksimo. Antia lo debutá dia 4 yüli kontra Cuba, 5 di yüli nos lo mira akshon kontra Ulanda, dia 7 versus Hapon, dia 8 di yüli nos lo midi forsa ku e ekipo merikano i finalmente dia 11 di yüli kontra China Taipei.

LEITO
Ivonne Istanisla (repentino)
A laga atras su yunan Shurman Cachemir, Fania Cachemir, Shurmemel Cachemir i Shudeska Daal, rumannan Edgar i Gladys Leito, Edna i Eligio Haynes, Efraim i Thisia Leito, Greta i Ronald Rosa, Mayra Leito, Melvis Leito i Michael Marchena. Akto di entiero ta djarason 26 di mart na Ulanda.

WILSON-TRENIDAD
Anna Martina (89 aña)
A laga atras su yu Rozana Atwell-wilson, ñetunan Rosette Atwell, Ryan Atwell, subrinanan Jo Janga, Flora Claassen ku nan famia. Akto di entiero ta djarason 26 di mart for di El Tributo pa santana St. Maria. Bishita 9or. Promé ku entiero tin un respòns na El Tributo 11or.

ROSA
Sergio Augusto
A laga atras su kasá Angela Rosa-Tokaay, yu Vernon i Sharmin Rosa, tur ñetunan, rumannan Nilda Janze, Rosalia Rosa, Ernesto Hersilia. Akto di entiero ta djaweps 27 di mart 3.30or for di El Señorial pa santana Sta. Maria. Bishita 1or. Promé ku entiero tin un respòns na El Señorial.

JOUBERT
Joseph Everard (84 aña)
A laga atras su yu André i Karen Joubert-Hoo, ñetanan Amey i Alyssa Joubert, rumannan Jules Jouber ti Wilhelmina Staarhof, Edgar Joubert. Akto di entiero ta djaweps 27 di mart for di misa San Bernardo na Playa. Bishita 9or-10or siguí pa un s.s. di misa.

DANIA
Robert Charles (64 aña)
Mihó konosí komo Jobi
A laga atras su yunan Adrie, Robert, Xiomara, Airon Dania i famia, rumannan Felix Dania, Arthur Dania i famia. Akto di entiero ta djarason 26 di mart 1or-4or, for di El señorial pa santana Ser’i Pietermaai. Bishita 1or. Promé ku entiero tin un respòns 3.30or na El Señorial.

Lorito ta yama tur hende un felis dia. Dianan liber a pasa masha lihé mes, pero ya bo mes sa, Lorito tin ku sigui bula. Danki pa e kuminda di para ku un hende ku nos no sa ta ken a manda pa nos. Nos a sabori’é. Danki!
*********
Nos kier a manda un pabien ainda pa Justine ku a hasi aña ayera. Awe ta mama Reyna mes a hasi aña. Hopi aña mas di bida i kòrda warda johnny cake pa Lorito!
*********
E situashon na Dok ta sigui ta status quo. Awor ta e tim ku a atendé tur kos a sali ku un komunikado ku ta hinka tur kos den konteksto. Ban wak kon esaki ta bai kai, pero Lorito a tende ku Shon Do no kier laga nada slèk. Anto oposishon ta morto riba e asuntu aki. Si Lorito tabatin partido, masha dia Lorito lo a pidi un reunion pa forsa un desishon!
*********
For di despues ku e aliansa aya no a haña masha hende den Punda i despues den bario, kosnan a bira masha trankil atrobe. Ta Nelson Boroto so nos a tende ta borotá atrobe den fin di siman. Ta kiko falt’é anto? Un storia totalmente inkoherente ku nos no a komprondé te awe. Papia trankil, artikulá mas mihó i nos tur ta komprondé bo mensahe. Asina aki si nos no sa kiko ta kiko mas!
*********
Lorito a pasa bula wak kuantu hende a bai registrá relashoná ku e konstrukshonnan na Las Almas. Nan no ta masha. Loke Lorito a sinta wak ta si e polítiko aya ku a kue dos pida tereno lo a bin registrá. Te awe e no a bin, pero tur kaminda e tin su boka yen di kon hende mester anda i aktua! Ora bo tin manteka riba bo kabes, mihó bo keda ketu!

WILLEMSTAD – “Tur kos a kana korektamente den e proseso pa skohe un direktor nobo pa Curaçaosche Dok Maatschappij (CDM)”. Asina e komishon di solisitut ku a lanta pa atendé e prosedura ta bisa den un komunikado publiká awe. Ku esei tambe e komishon ta kibra su silensio relashoná ku e kontroversia ku a surgi pa loke ta trata postulashon di Franklin Sluis na e posishon. Sluis a resultá e mihó kandidato pero e diputado enkargá ku Dòk, Eugene Rhuggenaath, a informá ku e lo no sostené ningun desishon pa nombra Sluis na e puesto.
Un reunion ku mester a tuma lugá djabièrnè pa akshonistanan ratifiká Sluis no a sigui. Manera kosnan ta pintando, e reunion lo no sigui por lo pronto tampoko. Ta bin aserka ku aparentemente mayoria den PAR, inkluyendo e lider polítiko Emily de Jongh-Elhage, a skohe pa e posishon di e diputado pa wanta e union interno den e partido hel. Remarkabel ta ku mayoria hende den PAR ya kaba a felisitá Sluis ku e nombramentu. E úniko kaminda ku a keda Sluis awor ta pa eventualmente akudí na Korte.
E komishon ku a haña enkargo pa atendé e solisitut na Dòk, enkargá pa Hunta di Komisario, a atendé e proseso i a splika kua prosedura a sigui den e kaso aki. “Maske no ta kustumber ku un komishon di solisitut ta diskutí su enkargonan den públiko, e komishon enkargá ku e proseso pa solisitut pa un Direktor di CDM ta haña, den e kaso spesífiko aki, tòg nesesario pa duna aklarashon riba ponensianan no korekto ku a sali publiká”, asina e komunikado ta bisa.

WILLEMSTAD – (Eks) Komisario di Polis Derrick Holiday lo ta den korte dia 16 di aprel awor pa kontestá akusashonnan di falsifikashon di dokumentu, asina Ministerio Públiko na Sint Maarten a informá awe.
E eks-hefe di kuerpo di polis di Sint Maarten, Saba i Statia lo mester defendé su mes kontra di e akusashonnan ku el a firma dokumentunan falsifiká, asina fiskal Taco Stein a informá.
A detené Holiday dia 5 di febrüari último i el a keda den detenshon durante di tres dia promé ku a lag’é den libertat. Durante di su detenshon, RST a interog’é fuertemente relashoná ku dokumentunan falsifiká ku tin su firma bou di nan.
Holiday ta un di e tres funshonarionan haltu den hirarkia di polis ku outoridatnan a detené. E promé detenshon di Marcel Loor a produsí un kastigu den korte miéntras ku resientemente a detené e eks hefe di Imigrashon di Aeropuerto Alfred Marsdin.
Stein a bisa ku lo usa algun di e deklarashonnan di Loor kontra Holiday, pero ku e eks hefe di imigrashon no a impliká su kolega di trabou. “Parti di e deklarashonnan di Loor lo usa den e kaso den e kaso Holiday, pero no tabata e intenshon pa hinka Loor den barika di Holiday, asina Stein a bisa.

LONG ISLAND, New York, - Djabièrnè último, mundu kompletu a konosé Max i Emme, yunan ohochi di Jennifer López i Marc Anthony.
Revista People den eksklusivo a publiká imágennan di e beibinan.
“Nos ta emoshoná pasobra mundu kompletu pa promé bia a mira e imágennan aki den revista People”, Larry Hackett, editor di e publikashon a bisa.
“Esaki ta loke eksaktamente nos lektornan ta spera di nos: imágennan bunita i íntimo di e hendenan famoso mas grandi”, el a añadí.
Ademas di inkluí 12 página di pòtrètnan nobo, e publikashon ta konta ku un entrevista eksklusivo realisá den nan kas na Long Island, New York, ku ta trata tur tipo di tema, for di kon peso di Jlo (Jennifer López) a oumentá, te e rumornan di infertilidat.
“Jennifer ta mustra espektakular. El a subi 45 i 50 liber durante su embaraso, pero e mes tabata ke esei, pasobra e tabata na estado di yunan ohochi i e tabata ke pa nan ta grandi. Awor aki el a pèrdè bastante peso, pero e no tin purá di pèrdè e kilonan. E ta enfoká di disfrutá di su maternidat”, Peter Castro a relatá, kende ta editor ehekutivo, ku a realisá e entrevista.
Den e historia ta relatá ku e pareha ta konta ku yudansa di dos verpleegster i dos asistente, pero ku e pareha ta partisipá aktivamente den tur ko’i hasi.
“Nan ta hasi gran parti di e trabou. Nan ta keda lantá te 6’or pa alimentá e beibinan i kuida nan. Nan no ke separá fo’i nan. Nan ta hopi uní”, Castro a splika.

WILLEMSTAD / AMSTERDAM - Un damita ku a laga pone un “piercing” na su punta di lenga, mester a ser operá ku urgensia na su kurason ku no tabata funshoná normal mas.
E dama aki, ku a laga pone e “piercing” na su lenga, despues di tempu a kuminsá sinti grip i su rosea a kuminsá bira kòrtiku.
A intern’é den Academisch Ziekenhuis na Maastricht. Ora su kondishon sinembargo a sigui bai atras, a disidí di oper’é ku urgensia.
E dama a haña un klep nobo na su kurason.
Loke a pasa ta, ku kaminda el a pone e “piercing” a surgi un infekshon, ku a afektá na su turno su kurason.
Promé ku esei, el a haña kaba infekshon na su karni di djente.
Interesante ta pa menshoná, ku promé ku e “piercing”, e dama aki di apénas 30 aña di edat, no tabatin un istoria médiko.
Ekspertonan médiko a skibi di e kaso aki den e revista Bulletin, un edishon di Rijksinstituut voor Volksgezondheid en Milieu, RIVM.
E ekspertonan aki ta rekomendá tur hende ku tin problema ku kurason, pa no hasi niun tipo di “piercing”.
Ta konosí ku na Kòrsou tambe tin un kantidat relativamente grandi di hóben ku ta laga pone e “piercing” aki. Hopi biaha, esaki no ta sosodé serka un eksperto ni tampoko un klínika ku ta kumpli ku tur rekisito di lei.
Lo ta rekomendabel, segun ekspertonan pa tene kuenta ku e tipo di konsekuensianan aki, ora ta laga pone “piercing” na kurpa.

WILLEMSTAD - Trahadónan di Fundashon Kas Popular a disidí ku djasabra awor, ounke ofisialmente ta nan dia liber, nan lo traha gratuitamente pa asina atendé trabou ku eventualmente por a kai atras durante e dos dianan di wèlgá siman pasá.
E akshon di dos dia aki a enserá ku no tabatin niun tipo di trabou ta tuma lugá, ni e parti atministrativo, ni tampoko ehekushon di proyektonan ku ta kanando.
Esei naturalmente posiblemente tabatin konsekuensia pa e trabounan ku mester a sigui.
Richenel Ilario, presidente dje sindikato SEBI a anunsiá siman pasá ku trahadónan di FKP, den deliberashon ku nan sindikato a disidí ku nan ta pone nan djasabra liber na disposishon di FKP e fin di siman aki.
Djasabra awor, e trahadónan lo traha, sin pago, pa asina kompensá e oranan di trabou ku a bai pèrdí durante e akshon di siman pasá.
Di e forma aki, nos ta demostrá nos sentido di responsabilidat, alabes nos kompromiso ku nos trabou ku semper nos a konsiderá un kos sagrado, asina Ilario a duna di konosé.
Ilario tambe a ekspresá su satisfakshon pa e forma ku e deliberashonnan a bai de korte siman pasa. Nos a kuminsá atardi, nos a sali ya den kuminsamentu di anochi for di sala di korte, el a afirmá.

WILLEMSTAD - Un protokòl ku gobièrnu di Kòrsou, e fundashon enkargá ku trahamentu di kas Fundashon Kas Popular i e sindikato ku ta representá trahadónan ku ta traha na e fundashon aki SEBI a firma Djaweps Santu den oranan di atardi, a kaba di seya e pas ku partidonan a sera siman pasa den presensha di wes mr. Van Schendel.
Pa FKP a firma e direktor finansiero Henry Jourdain, pa gobièrnu di Kòrsou diputado Anthony Godett i pa e sindikato SEBI su presidente Richinel Ilario.
Trahadónan di FKP a pone trabou abou djaluna siman pasá, eksigiendo pa sea kuminsá negosiashonnan pa un kontrakt kolektivo nobo òf paga e “lumpsum” ku gerensia a primintí na lugá di esei.
Despues di un akshon di dos dia, e sindikato SEBI i gobièrnu di Kòrsou a haña otro. Tantu gerensia di FKP komo e sindikato SEBI a entamá un kaso den korte: gerensia, pa obligá e trahadónan di bai traha bèk, e sindikato pa laga korte disidí riba e asuntu di e pago di “lumpsum”.
E kaso no a desemboká den un sentensia, ya ku korte a pone partidonan sinta na mesa pa asina yega na un akuerdo ku a restablesé mesora pas laboral atrobe den FKP, negosiashon ku a kuminsá den oranan di atardi i a finalisá ten den oranan tempran di anochi.
Djaweps siman pasá partidonan a firma un protokòl ku ta kontené vários punto riba kua a yega na un akuerdo.
E promé punto ta, ku trahadónan lo bai traha bèk, loke por sierto a sosodé tambe for di djarason mainta.