ORANJESTAD - Laga nos sigui como devoto na San Hudas Tadeo pa invita bo persona p’asina aki nos por reza hunto y hinca den su man nos intencionnan y plannan pa e por hiba nan na nos Tata Dios.
28 di cada luna lo tin rezamento na un cas di un devoto, awo nos ta sigi y e siguiente oracion lo tuma luga riba Diabierna, 28 di Maart 2008 na cas di
Famia Rafini-Werleman. Pos Chiquito 101 E Tel: 584-6052/992-8423
“Caminda grandi pa San Nicolas, yegando na Oduber Welding shop bira na man robes sigi core, e ta e di dos cas (color creme/berde) na man drechi net p’ariba di Pos Chiquito Take Away. Ora: 7:00 p.m. Un y tur ta bon bini na e oracion aki.
Pues p’esei no keda sin asisti y lo bo keda sigura cu Nos Señor lo no nenga di scucha San Hudas Tadeo y nos su yiunan cu nan peticionnan.
Bo devocion sigur lo engrandece y tin San Hudas Tadeo como devoto ta algo grandi. Laga nos comparti nos testimonio tambe cu nos Rumannan den Cristo, confirmando cu Hesus ta Esun di ayera, awe, mañan y semper y ku E ta bibo y cu San Hudas Tadeo a yuda nos experiencia esei!!! Jesus sea alaba y cu Maria siempre sea alaba. Señor mes ta bisa: “Unda tin dos of mas reuni den Su nomber eynan lo E ta meimei di nan”, y tambe ku Su Palabra mes ta bisa: “… Ta Señor!...”. (Huan 21, 7)
E aña aki nos ta rezando hunto pa contribui pa un bon causa pa yuda un fundacion y esaki lo ta pa “FEPO – Fundashon Pa Esnan Cu Problema Di Oido”.
****No lubida! Esnan cu por, por bishita e Santuario di Hesus Sacramentado den silencio tur dia for di 7:00 a.m. pa 9:00 p.m. na Misa La Birgen di Fatima Dakota. Corda cu boso lo por hinca tur boso problema den Su man. ***

ORANJESTAD – Recientemente RBTT Bank Aruba N.V. a duna pabien na tres hubilario. Sr. Rudolf Geerman a recorda cu 40 aña pasa e a cuminsa traha den e sector bancario. Rudolf a cuminsa traha na 1968 na Hollandsche Bank-Unie N.V. como Assistent Boekhouding.
Despues Rudolf a ocupa diferente puesto entre otro: Chef Fiat, Teller, Swift Operator. For di 2001 Rudolf ta trahando como Facilities Officer Administration na RBTT Bank Aruba N.V.
Sra. Elaine Geerman a recorda cu 12 aña y mey pasa e a cuminsa traha den e sector bancario. Elaine a cuminsa traha na 1995 na First National Bank of Aruba N.V. como Credit Documentation input clerk. Despues Elaine a ocupa e puesto di Teller. For di 2001 Elaine ta trahando como Customer Service Representative Sales na RBTT Bank Aruba N.V.

Sra. Lizette Bislip-Koolman a recorda cu 12 aña y mey pasa e a cuminsa traha den e sector bancario. Lizette a cuminsa traha na 1995 na Aruba Trustkantoor N.V./First National Bank of Aruba N.V. como Insurance Clerk. Despues Lizette a ocupa diferente puesto entre otro: documentation clerk, Remittance clerk, Customer Service clerk. For di 2001 Lizette ta trahando como Customer Support Assistant na RBTT Bank Aruba N.V.

ORANJESTAD- Den cuadro di e Masteropleiding Social Work & Development Universidad di Aruba ta ofrece e oportunidad pa sigui un module cu e titulo: Economy and Social Work, duna dor di drs. ing. Herbert Diaz MM y Dr. Daniel Villarini.
E module ta ofrece conocemento analitico y den contexto, comprondemento y actitud reflectivo di e relacionnan productivo entre trabou social, maneho social y economia. E module lo elabora riba aspectonan economico pa trabou social y promove e principionan y e rol di economia social dentro di e comunidad Arubiano cu lo ta productivo y beneficioso y cu lo por yuda pa crea un comunidad sostenibel, democratico y cu participacion di tur hende.
E siguiente tres pregunta lo ta e base di e module:
Riba nivel micro:
1. Cua ta e factornan cu ta influencia e aspiracionnan y conducta di hende, respecto mobilidad social y economico?
Riba nivel meso:
2. Cua ta e influencianan di e structura y sistema economico, incluyendo gastonan social, riba nivel di bienestar di gruponan socialmente vulnerabel?
Riba nivel macro:
3. Cua inversionnan ta necesario pa desaroya un estado di bienestar duradero?
Idioma lo ta Ingles y Papiamento. Costo total pa sigui e module ta Afl. 375,-, cual ta inclui e materialnan di e curso. Na final lo ricibi un certificado.
Inscripcion pa e module ta habri pa profesionalnan cu tin por lo menos un bachelor degree.
Dianan di college ta diabierna 4, diasabra 5, diabierna 11 y diasabra 12 di april 2008.
E cantidad di cupo ta limita na 15. E oportunidad aki ta unico pa tur esnan cu ta trahando riba tereno di maneho laboral y social.

ORANJESTAD – Durante un conferencia di prensa teni ayera mainta, Ds. Thijs Oosterhuis a duna un splicacion di e actividadnan cu Kerki Protestant lo bai ta organizando.
E actividadnan aki lo bai tuma lugar den e proximo siman- y lunanan.
Anochi di Alabansa
Un grupo di miembro di Kerki Protestant Aruba a bini cu e idea pa regularmente organiza anochinan di alabansa. Segun Dominee a splica, e plan ta pa bini cu canticanan bunita y simple cu por wordo canta pa tur hende. E mester bira un anochi yen di musica di piano, orgel,fluit, guitara y solista.
Di e manera aki kier expresa nan gratitud na Dios y alab’E.
E prome biaha di Anochi di Alabansa lo bai ta diasabra, 29 di mart y e ta cuminsa pa 8’or di anochi. Esaki lo tuma lugar den Kerki grandi den Wilhelminastraat.
Anochinan di Pelicula
Pa usa un otro forma pa profundisa e fe ta pa wak bon peliculanan cu un cierto mensahe. Despues di a pasa e pelicula, ta duna chens pa discuti riba e contenido. Hoben y adulto por bini cu nan observacionnan.
E prome pelicula ta titula: Bridge to Therabithia y lo wordo pasa diasabra anochi, 26 di april pa 8’or di anochi den Kerki chikito den Wilhelminastraat.
Actividadnan pa hoben
“Aunke cu Aruba ta un “Happy Island” nos ta ripara cu nos teenagers (12 – 18 aña) tin problema pa busca actividadnan cu nan ta gusta y no ta mucho caro pa realisa,” esaki Dominee Oosterhuis a bisa. Y ta pa e grupo aki nan kier introduci diferente actividad sano y un tiki aventuroso tambe manera: rema cu kayak, core cu boto di bela, “clinic” di golf, canamento, etc.

ORANJESTAD- E siman aki e papelucho sushi di Eagle a dicidi di cuminsa ataca nos Minister President sr. Nelson Oduber y esaki relaciona cu e salario cu e ta cobra honradamente como sirbidor di e pais aki pa mas cu 33 aña.
Sinembargo ta parce cu e mentenan frustra di e papelucho sushi aki ta haci como sifuera cu sr. Oduber ta e unico politico na Aruba cu ta cobra salario y pensioen cu e tin derecho riba dje. Hecho ta cu sr. Oduber no ta cay den e categoria di previlegiadonan cu durante 1994 pa 2001 tabata ricibi discuentonan astronomico di belasting for di Gabinete Eman, manera den e famoso SAB y Dividend Special (180 miyon florin). Cu tur e discuentonan di belasting aki ningun previlegiado no tin cu preocupa pa traha y ricibi un salario y/of pensioen ya cu financieramente nan lo ta bon para caba.
Ta pesey partido MEP ta presenta na pueblo Arubano un tabel den cual por mira tur locual e Ministro Presidente anterior, esta sr. Henny Eman tabata cobra na salario y pensioen desde 1995 te cu 2001:


Nos por constata cu na aña 1998 tabata e aña di alegria y bonanza pa sr. Eman, ya cu den e aña ey so e tabata cobra tur luna sagradamente un suma astronomico di Af. 32.145,00 contante y sonante. Un gobernante cu na 1995 tabata haña Af. 9797,00 pa luna, na final di su gobernacion pesimo tabata cobra Af. 23.208,00 pa luna. Esaki si ta informacion cu e papelucho no kier suministra pueblo, ya cu pa di tantisimo biaha caba convenencia y sinverguenseria politico ta tapa tur intriga y maldad entre e partido berde y e papelucho di Eagle aki.

ANTÁRTIKA, - Pida eis kasi mes grandi ku isla karibense di Sint Lucia a kuminsá kita fo’i Antártika.
Esaki ta un fenómeno kalifiká pa sientífikonan komo evidensia adishonal di kalentamentu global.
Imágennan di satélite a indiká ku parti di kapa di eis ta kitando i pronto e lo disparsé.
Kapa di Eis di Wilkins tabata stabil último siglo, pero a kuminsá retrosedé den dékada di 1990.

GREENSBURG, Merka, - E dama aspirante pa logra kandidatura demókrata pa elekshonnan presidensial, Hillary Clinton, a bisa ku el a kometé un eror ora el a sigurá ku e tabata bou di tiramentu di frankotiradónan durante un bishita na Bosnia na 1996 tempu ku e tabata Promé Dama di Merka.
Den un diskurso na Washington i den vários entrevista siman pasá, Clinton a konta ku e i su yu muhé Chelsea ta’tin ku kore pa protehá nan mes di tiramentu enemigu ora nan a aterisá na Tuzla, Bosnia.
Vários medio di komunikashon a pone na duda su vershon, i un video di e bishita a mustra esposa di e tempu ei Presidente di Merka Bill Clinton bahando for di e avion kompañá pa su yu muhé, i a keda risibí pa un mucha muhé ku flornan, den un seremonia chikitu riba pista di e aeropuerto durante kua no ta’tin indikashon di tenshon òf peliger.
“Mi a kometé un eror pa papia riba esaki”, Clinton a deklará na Prensa na Pensilvania, kaminda e tabata hasiendo kampaña promé ku e elekshonnan primario na e estado aki 22 di aprel benidero.
El a sigurá di tin un rekuerdo diferente di e aterisahe.
“Asina ta ku mi a kometé un eror. Esaki sa pasa. Esei ta demostrá ku mi ta humano. Loke boso sa, pa algun ta un revelashon. Tur esaki ta trata di e eksperensia polítiko ku nos tin i di ken ta prepará pa bira hefe komandante. Ami ta enkantá di kompará mi eksperensia na kualke momentu ku esun di Barack Obama”, Clinton a bisa.

BUENOS AIRES, Argentina, - E dama Presidente di Argentina, Cristina Fernández de Kirchner, ayera a konfrontá su promé gran protesta urbano ora míles di persona a sali riba kayanan pa apoyá produktornan agrario, den un wèlga ku a kuminsá dos siman pasá pa motibu ku a subi impuestonan n’e sektor aki.
Protesta di e kampo, un di e motornan di ekonomia di e pais, ademas ta inkluí blokeonan di kareteranan di e pais kompletu, i ta menasá ku lo no suministrá alimentonan p’e siudatnan.
E reakshon na Buenos Aires i otro sentronan urbano a repudiá desishon di e Gobièrnu di no negoshá ku e produktornan.
Minütnan despues ku e kuater entidatnan den wèlga a anunsiá ku nan lo mantené nan mes den wèlga “te ora ku ta nesesario”, e dama mandatario a kontestá ku ta trata di un protesta “di abundansia”, dor di sigurá ku e kampo ta un di e sektornan mas rendabel di e pais.
“Mi no ta bai someté mi mes na niun ekstorshon! Mi por komprondé interes di e sektor, pero mi ke pa boso sa ku mi ta Presidente di tur argentino!”, Fernández a bisa den un akto na Casa Rosada.
Inmediatamente despues a kuminsá uni míles di persona na diferente punto di e siudat, i spesialmente na Plaza de Mayo situá dilanti Palasio di Gobièrnu, pa apoyá produktornan agrario i kritiká e dama mandatario pa ke dividí e poblashon.
“Ku gran doló mi a skucha e Presidente indiká desunion manera semper. E úniko plan ku e tin ta konfrontashon”, un señora na e plasa a bisa un kanal di televishon lokal.

PARIS – David Beckham lo hunga su di 100 partido ku selekshon di futbòl di Inglatera awe na Stade de France kontra Fransha.
“E lo hunga. Mi no ta kere ku e ta bin for di Merka i keda sin hunga”, asina e direktor tékniko ingles di orígen italiano Fabio Capello a bisa den un konferensha di prensa. “Mi konosé David Beckham i mi sa kiko e por duna i mi ta kere ku e por hasi un diferensha den diferente aspekto. Mi sa kiko e por duna e ekipo den su totalidat”, asina Capello a bisa. “Pa loke ta trata futuro nos tin ku wak kiko ta bai pasa. Niun hende no sa kiko futuro lo trese”, asina Capello a bisa. Capello a bisa ku e no por bisa ainda si Beckham lo sigui ta volante di e ekipo den futuro tambe.
Solamente kuater futbolista a hunga por lo ménos 100 partido ku selekshon di Inglatera: Bobby Charlton, Bobby Moore, Billy Wright i Peter Shilton.
“Mi ta kere ku tur hungadó kier yega e meta aki pero poko lo logra esei. Mester duna Beckham krédito pa e gran logro aki”, asina e direktor tékniko a bisa.
Otro partidonan amistoso awe ta:
Spaña kontra Italia; Oustria-Ulanda; Suisa-Alemania; Romania-Rusia; Portugal-Gresia (na Dusselforf); Fransha-Inglatera; Polonia-Merka; Eskosia-Kroasia; Biellorusia-Turkia i Dinamarka-Repáblika Cheko.
Un otro partido amistoso awe lo ta Brasil-Suesia na Londen. Brasil i Suesia, sin nan prinsipal astronan, lo topa konmemorando 50 aña di e final di e Mundial 1958 na Suesia kaminda Brasil a gana su promé Mundial. Brasil a gana Suesia 5-2 ku dos gol di Pelé. Brasil lo no konta awe ku Kaká ku tin un problema muskular miéntras ku Ronaldinho no a haña un konvokatorio di e tékniko Dunga. Di parti di Suesia Zlatan Ibrahimovic lo no ta presente komo ku e tambe ta leshoná.

QUITO – Si Antia gana awe di Nikaragua i klasifiká pa e próksimo buèlta di e eliminatorionan mundialista, e lo tin ku topa ku Haiti. Haiti den pasado a yega di partisipá kaba na un mundial. Bon chèns pues pa skoutnan di e selekshon antiano ta na Quito pa mira e partido di awe pero probablemente esei lo no ta e kaso komo ku Antia lo topa Nikaragua awe na Kòrsou.
Ecuador ta bisa ku nan no ta balotá Haiti. Den e ekiponan di CONCACAF tin algun ekipo importante, entre nan Hondúras ku a klasifiká pa Beijing pero tambe a resaltá ku e hechu ku Mexico, favorito kla, a keda eliminá durante e torneo sub23 di siman pasa.
Komo ku Ecuador no ta balotá Haiti, e direktor tékniko d Ecuador ( e promé tékniko lokal di e pais den mas ku dos dékada) Sixto Vizuete lo debutá awe ku un selekshon kontra Haiti ku 6 futbolista ku ta hunga den eksterior. Ecuador di e forma aki a kuminsá e siklo di preparashon di Ecuador konsiderando e enkuentro na yüni awor kontra Argentina na Buenos Aires pa reanudashon di e eli9minatorionan mundialista.
Vizuete a pone fin na un racha largu di téknikonan kolombiano ku a kuminsá ku Francisco Maturana entre 1995 i 1998, siguí pa Hernán Gómez entre 1999 i 2004 ku tabata e promé ku a klasifiká e pais pa un Mundial i despues di 2004 pa 2007 Luis Fernando Suárez, ku a ripití e klasifikashon mundial. E último tékniko ecuatoriano tabata Ernest Guerra na 1977.

CAIRO – Ku un atake renobá i ku ousensia remarkabel di Lionel Messi, Argentina lo topa Egipto awe ku a kaba di Gana Kopa di Afrika pa di dos bes konsekutivo.
Federashon di Futbòl di Egipto a presentá e selekshon di Argentina komo e “bailadónan di tango” miéntras ku e la yama su mes hungadónan “e fáraonan”. Argentina ta na promé lugá di e klasifikashon mundial di FIFA. Egipto a kaba di gana Kopa di Afrika den un final ku a pone Kamerun un banda.
Sin Messi, Carlos Tevez i Juan Román Riquelme, un trio konosí pa nan akoplashon i ritmo, Argentina lo topa un Egipto ku a demostrá efisiensia i solides den tur liña.
E tékniko argentino Alfio Basile, no a yora e hungadónan ousente pasobra manera e mes a bisa Argentina tin hungadónan masha bon mes manera Luis González, Sergio Agüero i Julio Cruz òf Fernando Cavenaghi, ku lo trata di pone e fanatikada lubidá e streanan ku no tei awe. Messi (Barcelona) ta leshoná, Tevez di Manchester United a pidi un deskanso miéntras ku Basile no a konvoká Riquelme ku ta hungando na kas. E selekshon ku Basile a konvoká tur ta hungadónan ku ta hunga den eksterior. E ousensia di Riquelme lo pèrmití entrada di "Lucho" González, ku ta lusiendo ku Porto di Portugal. Agüero (Atlético Madrid) lo hunga na lugá di Tevez, miéntras ku e otro lugá lo bai pa sea Cavenaghi (Bourdeaux de Francia) i Cruz (Inter di Italia).

ARIES: Bo energia i vitalidat ta oumentá i bo por envolví bo den hopi aktividat i proyektonan na mesun momentu ku bo ta resolvé bo problemanan personal. 44,56,34.

TAURO: Relashonnan di amor permanente ta sigui pasa dor di pruebanan fuerte. Solteronan tin hopi oportunidatnan, pero no ta riska hasi kompromiso. 55,68,90.

GEMINIS: Bo tin un gran nesesidat di komuniká tur loke bo ta sinti i loke bo ta pensa i esei ta yudabu interkambiá konosementunan ku los demas. 89,77,32.

KANSER: Amor ta sigui na bo banda ounke bo no ta rekonosé. Bo spiritualidat ta eksaltá i ta un bon momentu pa retiro. 09,78,34.

LEO: Ta eksistí un deseo di progreso di éksito den tur plannan ku bo ta hasiendo. Bo ta gusta di kolaborá ku personanan influyente i di bon posishon ekonómiko. 87,43,11.

VIRGO: Bo ta sintibu mas liber i den kòntròl di bo aktonan. Bo a siña lèsnan ku a presentá den bo bida i awor bo ta pone nan den práktika. 00,26,74.

LIBRA: Limitashon o retrasonan den bo sektor di finansa ta kibra algun biahe o vakashon ku bo a bin ta plania. No opstante bo por hasi areglonan nesesario. 06,89,32.

SKORPION: Bo relashonnan íntimo ta yen di pashon i ta laga markanan den bo bida atras. Hopi kuidou di ta hopi posesivo i yalùrs. 15,68,33.

SAGITARIO: Di ser útil pa los demás ta dunabu hopi satisfakshon. Nan ta buskabu pa pidi konseho o pa sirbi komo mediadó den algun situashon. 89,54,31.

WILLEMSTAD, - Kòrsou mester kuminsá prepará pa un oumento 100 porshentu di kosto di bida. E oumento aki lo bira inevitabel, si nos weta desaroyo riba merkado mundial, asina Joel da Silva Gois, doño di e empresa GOISCO i kende ta miembro di Asosashon di Supermerkadonan di Kòrsou SUVECU a pronostiká.
Ya pa basta dia kaba komunidat kompleto ta reklamando kon preis di práktikamente tur kos ta subiendo.
E parti ferfelu ta ku un parti grandi di e kosnan aki ta forma parti di pakete di produkto di promé nesesidat, o sea, kosnan ku un hende sin mas ta kumpra ora e bai tienda, toko òf supermerkado.
Un ehèmpel konkreto: galiña, ku ta ser konsiderá komo un di e kumindanan di mas barata i ku tur tempu tabata aksesibel pa tur hende, inkluso esnan di ménos rekurso, a subi ya kaba barbaramente na preis. Un kaha di pia di galiña, ku te ku resientemente tabata kosta komo 5,75 awor ta kosta práktikamente 10 florin.
Ta imposibel sigui asina’ki, ta komentario ku por tende tur dia.
Joel da Silva Gois ta antisipá pió. El a bisa ku si weta kon desaroyo ta tumando lugá riba merkado mundial, mas oumento ta evidente. Esaki no tin di aber solamente ku preis di krudo ku manera tur hende sa ta masha dia a superá 100 dollar pa barí, pero tambe di otro desaroyonan di paisnan for di kua nos ta importá produkto i merkansia.
Un ehèmpel di esaki ta e desaroyonan ku a bin ta tuma lugá na pais bisiña Venezuela, kaminda Gobièrnu venezolano ta tumando medidanan pa protehá su mes merkado pero ku tin konsekuensia pa sektor di eksportashon.

WILLEMSTAD, - Kompanianan di aviashon ku ta sali konstantemente lat, pió ainda, ku ta kanselá buelo, perhudikando nan pasaheronan mester bai riba un lista pretu. Manera a bin ta sosodé, simplemente no por mas, asina señora Roemer, bosero di Socialistische Partij (SP) a deklará durante e debate den Tweede Kamer ayera riba e tema aki.
Roemer a bisa ku hopi hende ta bira víktima di kompanianan di aviashon ku ta hasi i deshasí manera nan haña ta bon.
Esei tabata e kaso atrobe algun dia pasá ku e kompania Arkefly, ku – pa di tantísimo biaha! – tabatin problema serio ku su buelonan.
Un para ku a drenta motor di un avion di Arkefly na Gambia a pone ku e kompania a hañ’é den problema serio ku e avion aki. Pa kolmo, mester a buska tékniko pa biaha pa e aeropuerto di Gambia pa drecha e avion, loke tambe a tuma su tempu.
“Nos tin hopi mala suerte”, asina Simone van den Berg, bosero di e kompania TUI ku ta doño di e kompania Arkefly, a duna di konosé.
El a splika ku un solushon lo por ta naturalmente ku e kompania ta sòru pa e tin un avion komo reserva, dado kaso algu asina’ki sosodé. Anto esei ta banda di e hecho ku no ta fásil mes, pa haña un avion di reserva.
“Ta un realidat ku un kompania di aviashon tin avion pa nan ta den aire, no pará pòrnada den un hangar. No opstante esei, nos ta buskando un kompania pa drenta un kombenio kuné pa den kaso ku tin problema, nos por hasi uso di un òf mas avion di nan”, asina Van den Berg a duna di konosé, ekspresando e speransa ku di e forma aki Arkefly den futuro lo tin mas kapasidat pa kualke eventualidat.

WILLEMSTAD - Ulanda no ta kargando su responsabilidat den kaso di e polushon ku Refineria Isla ta okashonando na Kòrsou. Ta kuantu morto mas mester kai promé ku tuma akshon? Femke Halsema bosero di e partido Groen Links den Tweede Kamer a puntra.
Halsema, manera ta konosí, algun tempu pasa a hasi un seri di pregunta den direkshon di gobièrnu ulandes.
Halsema ke sa kiko ta bai sosodé den kaso di e refineria na Kòrsou ku – segun práktikamente tur rapòrt ku a sali te ku awor – ta kousando un berdadero desaster ku salu di hende riba nos isla.
No ta promé biaha ku Halsema ta pidi atenshon pa e tema aki.
Halsema ta konosí komo un persona ku den pasado a yega di mustra su prekupashon pa e desaroyo aki.
Resientemente, Halsema a haña kontesta riba e preguntanan ku el a hasi na gobièrnu ulandes. “Mi no ta kontentu ku e kontestanan di sekretario di estado Ank Bijleveld. Nan ta demasiado vago,” asina Halsema a reakshoná bisando.
Halsema ta mustra ku e ta haña ku Ulanda mester asumí su responsabilidat den e kaso aki, anto esei no ta sali na kla den e kontestanan ku Bijlveld a duna.
El a agregá ku ta esei a bin ta sosodé último añanan. “Nos ta haña kada be un kontesta ku ta hopi vago, ku no ta bisa masha kos.”
“Ta evidente ku e loke ta sosodiendo no por ta kuadra ku tratado i reglanan internashonal,” segun Halsema.
“Mi ke sa te kon leu e situashon aki ta violá reglanan di derechi humano, reglanan di derechi di mucha. Mi ta hañando kontestanan ku mi no por hasi nada kuné,” el a bisa.

WILLEMSTAD - Gobièrnu di Kòrsou ke yega na un nivel optimal den funshonamentu di Autobusbedrijf Curaçao, konosí komo ABC. Ta ku e meta aki na bista, un delegashon a biaha resientemente pa Ulanda, pa hiba kombersashon ku tantu kompanianan di konvoi ulandes komo tambe ku instanshanan di gobièrnu ulandes. E delegashon ta konsistí di representante di tantu e kompania ABC, di servisio DOW, Transporte Públiko huntu ku algun konsehero di gobièrnu.
Pa basta aña kaba ta papiando i hasiendo esfuerso pa optimalisá servisio di transporte públiko na Kòrsou, tantu pa loke ta e servisio di konvoi, komo tambe servisio di bùsnan chikí. E último aki manera ya ta ampliamente konosí a bira un kos delikado, ya ku shofùrnan di bus no ta masha inkliná pa lanta un kompania bou di kua nan tur lo bai kai den futuro, pero ku ta permití gobièrnu struktura e servisio aki muchu mas tantu.
Di otro banda ta un hecho ku e kompania di konvoi ta pasando momentunan difísil pa basta tempu kaba. Situashon finansiero no ta kos di gaba, miéntras ku estado físiko di e flota di vehíkulo di ABC dia pa dia ta birando mas grave.
Den pasado a yega di buska konvoi segunda mano for di diferente destinashon, di manera ku tin diferente marka di konvoi ta kore rònt na Kòrsou. Asta tabatin un aña ku a manda buska konvoi for di Brasil ku tabata ekipá ku erko. Pero manera por a antisipá, e erko a daña den un tempu relativamente kòrtiku.

WILLEMSTAD, - Diputado pa Asuntunan Ekonómiko Eugene Rhuggenaath ta rekonosé ku e no a aserká minister di Finansa di Antia Ersilia de Lannooy ofisialmente ku e pakete di medida ku mester trese alivio pa pueblo, promé ku el a trese esaki den publisidat.
Pero ta mi intenshon pa hasi esaki riba tèrmino kòrtiku, asina e mandatario a duna di konosé, despues di e reakshon di e minister menshoná.
Durante un konferensha di prensa djaweps 13 di mart último, diputado Rhuggenaath a anunsiá ku Bestuurscollege di Kòrsou a aprobá un pakete di medida pa aliviá e ola di oumento di preis di produkto (di promé nesesidat) riba nos isla. E pakete aki ta enserá entre otro, ku ta proponé Gobièrnu Sentral pa eliminá derechi di importashon i eliminá OB riba un sierto kantidat di produkto.
Diputado Eugene Rhuggenaath a bisa ku realmente mester a konsiderá medida pa aliviá e peso di oumento, pasobra sifranan ta indiká ku oumento di kosto di bida a bira un problema serio pa pueblo.
Minister di Finansa Ersilia de Lannooy a reakshoná sorprendí pa e anunsio aki.
“Komo Gobièrnu bo mester ta bon konsiente di kada paso ku bo tuma. Si bo tuma un desishon aki banda pa baha sierto entrada ku bo ta risibí, bo mester haña un alternativa pa kompens’é di otro banda. Sino e ta afektá entrada di Gobièrnu”, asina De Lannooy a indiká.
De Lannooy a splika bon kla, ku si Gobièrnu di Kòrsou ke bai baha derechi di importashon i akseins, e mester ta bon konsiente ku esei ta nifiká ménos entrada pa e mes.

TEGUCIGALPA – E sifra di morto di e bùs ku a kai den un abismo di mas ku 500 meter di profundidat na Honduras ayera, a keda elevá awor na 26 morto i 20 otro heridá.
Esnan ku a muri ta 16 hende muhé, tres mucha i shete hende hòmber. Mas o ménos shete persona heridá a keda trasladá pa hospital ku helikòpter pa un base aéreo merikano i tambe un base militar di Honduras mes i pa hospital.
“Ta trata aki di un teribel tragedia ku a sakudí hopi kas pober den e pais aki”, asina e hefe nashonal di bomberonan di Honduras, Carlos Cordero, a duna di konosé.
El a duna di konosé ku algun di e víktimanan ku a keda trasladá pa hospital ta den estado grave. E hefe di bombero a atribuí motibu di e aksidente na desperfektonan mekániko.
“Ningun di e pasaheronan no a keda den e bùs despues di e aksidente. Tabatin 71 pasahero na bordo.
Na e área di reskate tabatin un gran kantidat di bombero, militarnan i miembronan di un grupo di reskate.

Riba e foto por mira momentu ku miembronan di reskate ta kargando un di e víktimanan.

WILLEMSTAD – Riba e kaminda di bándabou, na altura di Daniël i Duzu, tin un situashon peligroso segun Hensley Koeiman (MAN). Un roi ku ta kore kantu di kaminda grandi den e área di Daniël i Duzu, por resultá fatal pa un outomobilista ku mester baha for di kaminda direpente.
Den un karta ku Koeiman a dirigí na gezaghebber, e ta hasi Bestuurscollege diferente pregunta relashoná ku e situashon akí. Koeiman a puntra entre otro; 1) si BC ta na altura di e situashon ku el a deskribí, 2) si BC ta di akuerdo ku e situashon ta peligroso i por kousa bida di hende, 3) si e situashon aktual ta bai keda asina òf ku te ainda tin trabou ku mester kaba kuné, 4) dikon no a pone ‘vangreel’ na e sitio, 5) si a tene kuenta ku hasimentu di e kaminda mas hanchu, mirando ku e roi ta hopi serka di kaminda grandi, 6) si BC ta dispuesto pa duna instrukshon pa laga drecha e situashon mas pronto posibel i asina hasi e situashon mas sigur, 7) si BC por informá Konseho Insular ki dia (fecha) e situashon aki lo keda drecha, si BC por informá Konseho Insular si tin mas situashon peligroso asin’aki otro kaminda na Kòrsou, 8) si BC por informá Konseho Insular kua ta e maneho pa ku protekshon di kasnan i kuránan ku ta situá hopi pegá ku kaminda (speshal e kareteranan prinsipal) kontra di vehíkulonan.
Finalmente Koeiman ta bisa ku e kaminda en kestion ta esun prinsipal di bándabou, i tur dia míles i míles di outo ta pasa einan ku velosidatnan bastante haltu. “Si pa un motibu òf otro un outomobilista hañ’é tin ku baha for di kaminda e konsekuensianan tin hopi chèns di ta fatal. E roi ta unu bastante hundu i ta keda hopi pega ku di e kaminda. Mester a pone por lo mínimo un ‘vangreel’ pa evitá outonan di kai den e roi por ehèmpel den kaso ku nan kore den skual.”

WILLEMSTAD – Un investigashon kondusí pa RST na St. Maarten i Kòrsou, a resultá den detenshon di 7 sospechoso. Dos di e sospechosonan ta representante di kompanianan di transporte na St. Maarten miéntras a detené 5 sospechoso na Kòrsou.
E detenshonnan a tuma lugá djamars último. Fiskal Taco Stein a splika ku detenshon di e dos sospechosonan na St. Maarten, ta relashoná ku kontrabanda di droga via aeropuerto Juliana. E sinku sospechosonan detené na Kòrsou ta relashoná ku nan partisipashon den transportashon ilegal di droga for di Colombia via Kòrsou pa St. Maarten. E sospechosonan C.B. i M.W., empleadonan di e kompanianan di transporte di karga Inn Cargo NV. i Jackson Enterprises, ta detené despues ku RST i Duana a tene redada na nan kas i negoshi. Ta sospechá nan di importashon di un gran kantidat di droga.
Sin embargo fiskal Stein a deklará ku no a lokalisá nada di droga na e dos empresanan, pero a konfiská kòmpiuter i dokumentunan atministrativo pa mas investigashon. E sospechosonan detené na Kòrsou tambe ta empleadonan di kompanianan di transportashon di karga na aeropuerto Hato. E sospechosonan akí ta sospechá tambe di ta envolví den e robo grandi na e hoyeria Swiss Port. Anteriormente a sera dos sospechoso na St. Maarten i un na Kòrsou, sospechá di a hòrta mas ku $800.000 na hoya den luna di desèmber último.