ORANJESTAD - E programa pa Conferencia anual ofrece na e operador y aerolineanan di Latino America pa AHATA y ATA ta cla pa ricibi su participantenan. “Tur e dianan di fiesta prome cu e conferencia no tabata obstaculo pa e comite organizador pa por a pone un programa cu lo pasa tur expectativa pa e participantenan” según Mario Arends, e lider di e conferencia.
E aña aki tin registra 78 participante; 29 Tour operador, 5 aerolinea, 11 Representante di hotel, 7 representante di ATA, 5 periodista, di Colombia, Venezuela, Brazil, Chile, Argentina y Ecuador.
Durante e programa lo tin oportunidad pa tuma e curso ACE (Aruba Certified Program), cual ta e curso didactico di ATA unda e operadornan o agente por certifica como vendedor special di Aruba. E curso normalmente ta dura 4 ora, pero na Aruba lo dura un poco menos ya cu e personanan por bishita personalmente e hotelnan y asina sinja con y kiko cada hotel to ofrece nan clientenan. Ademas, di curso aki lo tin durante ceremonia di apertura presentación di e diferente instancianan, manera AHATA, ATA y Aeropuerto un actualizacion di nos producto di Aruba.
Pa sigui cu e tema di aña Cultural, a inclui den e programa un nochi special na Paseo Herencia, unda e participantenan lo disfruta di show y musica di Aruba.
Como orador special e comité organizador lo trece Sr Luis Vicente Leon, un experto den actualidad Economico di Latinoamérica. Sr Leon lo presenta e situación economico actual y kiko lo por spera den e proximo añanan di e mercado aki y den cua di e paisnan lo ta aconsehabel Aruba traha of inverti.

ORANJESTAD - Diasabra di 5 di april, pa 8:30pm ex-studiante di Ir.Cesare Terzano ta organiza un re-encuentro pa e 4 klas di Bouwkunde cu a cuminsa MTS na 1976-1977-1978-1979 y tambe tur esnan cu tabata na school durante e añanan 1976 pa1979 . Esaki lo tuma lugar den e espacioso restaurant “Epilicious” di e actual EPI na Seroe Blanco(ex-Ir.Cesare Terzano MTS). Un comision chikito y algun ex-studiante, tabata tin e dificil tarea pa contact tur demas ex-studiantenan. A logra tuma contacto cu mayoria di ex-studiante y mayoria ta bai e encuentro, pero tin nomber di algun hende cu por a keda afo, kisas door di no sa unda pa localisa nan of paso nan nomber no ta localisabel den e log-boek di school.
Sin embargo e comision organisador kier haci su maximo intento pa invita tur ex-estudiante y pa medio di e comunicado aki haci un invitacion pa tuma contacto cu Franklin Maduro na cell. 7336066. Tambe lo ta presente nos vakdocentnan pa e encuentro aki cu lo bira algo unico caminda despues di 29 a 32 aña, docente y studiantenan ta topa otro atrobe.
TRAHA UN BUKI DI E RE-ENCUENTRO
Ta nos deseo pa cada un di nos prepara un resumen chikito desde cu nos a bai for di school te actual. Por ehempel, e siguiente studionan cu bo a sigui, bo carera, bo hogar, bo hobbynan of deporte etc.etc.
For di esaki nos lo por traha un “buki di e re-encuentro 1976/1979”.
Trece tambe dos potret, un di antes y actual, bo mailing address y/of cellular.
E programa pa e anochi ta e siguiente:
1. Na bo yegada na e restaurant di EPI, un welcome drink.

ORANJESTAD - Den cuadro di e Masteropleiding Social Work & Development Universidad di Aruba ta ofrece e oportunidad pa sigui un module cu e titulo: Economy and Social Work, duna dor di drs. ing. Herbert Diaz MM y Dr. Daniel Villarini.
E module ta ofrece conocemento analitico y den contexto, comprondemento y actitud reflectivo di e relacionnan productivo entre trabou social, maneho social y economia. E module lo elabora riba aspectonan economico pa trabou social y promove e principionan y e rol di economia social dentro di e comunidad Arubiano cu lo ta productivo y beneficioso y cu lo por yuda pa crea un comunidad sostenibel, democratico y cu participacion di tur hende.
E siguiente tres pregunta lo ta e base di e module:
Riba nivel micro:
1. Cua ta e factornan cu ta influencia e aspiracionnan y conducta di hende, respecto mobilidad social y economico?
Riba nivel meso:
2. Cua ta e influencianan di e structura y sistema economico, incluyendo gastonan social, riba nivel di bienestar di gruponan socialmente vulnerabel?
Riba nivel macro:
3. Cua inversionnan ta necesario pa desaroya un estado di bienestar duradero?
Idioma lo ta Ingles y Papiamento. Costo total pa sigui e module ta Afl. 375,-, cual ta inclui e materialnan di e curso. Na final lo ricibi un certificado.
Inscripcion pa e module ta habri pa profesionalnan cu tin por lo menos un bachelor degree.
Dianan di college ta diabierna 4, diasabra 5, diabierna 11 y diasabra 12 di april 2008.
E cantidad di cupo ta limita na 15. E oportunidad aki ta unico pa tur esnan cu ta trahando riba tereno di maneho laboral y social.

Unico reaccion tabata un oferta tipo di tarjeta di Pasco

ORANJESTAD-“Diahuebs dia 20 maart 2008 Bloke Sindical a tene nan rueda di prensa y despues di e rueda di prensa aki abogado mr. sr. David Kock a entrega e caso na corte pa wordo trata.
Companjero(a) esaki despues di mas di un anja ta haciendo investigacionan y purba di hanja Gobierno na mesa no a logra. Porfin den luna di december 2007 ta bin un carta cu ta parce un tarjeta di pasco sin niun proposicion ni invitacion pa cu sikiera tende e sindicatonan pa sa kiko ta nan problema. Y awor ta bin cu un proposicion di acepta of no. No, no ta sina nos hendenan civilicia ta papia cu otro.
Companjero(a), despues di a purba di duna Gobierno e informacion tocante di indexering, ta parce cu e Gobierno no lo ta kier ta serio.
Tur sorto di manera nos di Bloke Sindical a purba di bisa y ilustra sr. Minister Swaen cu pa no bin cu e argumento cu indexering no ta presupuesta. Nos di Bloke Sindical a bise na varios ocacion cu e argumento ey ta nulo pa nos pasobra na augustus 2007 y dia 10 december 2007 a bolbe splike na placa chiquito cu e mester presupuesta e indexering. Aunke tabata cu fl.1,00 esey mester bin den presupuesto sino nos ta pone personalmente responsabel cu di mala fe e no ta presupuesta indexering. Y tambe a pone na altura di articulo 31 di e ley di comptabilidad. Of e no kier lese of e ta kere cu e ley no ta conta pa sr. Ministro Swaen.
Companjero(a) tambe sr. Prome Minister N. Oduber ta bin cu argumento cu indexering no ta un ley pesey e no ta aplica esaki y nunca esaki a wordo aplica.

WILLEMSTAD – E departamentu di tráfiko di polis huntu ku RASPA i polisnan riba motosaikel, a establesé un rèkert ayera nochi na S.D.K. despues ku futbòl a kaba. Den 40 minüt e polisnan a sòru pa e fluho di tráfiko a normalisá. Asina bosero di Kuerpo Polisial Inspektor Imro Zwerwer a bisa LA PRENSA.
E públiko grandi ku a akudí na S.D.K. ayera nochi no tabatin niun problema pa a bandoná e área despues di e partido di futbòl. Zwerwer a splika ku e departamentu di tráfiko di polis, bou di guia di e Inspektornan Eddy Hodge i Neis Inesia, konhuntamente ku e polisnan riba motosaikel i e tim di RASPA, a introdusí un sistema nobo pa guia e fluho di tráfiko. “E polisnan a parti e área di stashoná vehíkulo rònt di S.D.K. den 3 sekshon. Tabatin un lugá pa stashoná na e parti Ost di S.D.K., unu na e parti mei mei i unu na e parti Wèst di S.D.K. Ora e aktividat a kaba, polis a dirigí tur e vehíkulonan ku tabata stashoná na e parti Ost, den direkshon pariba via Ronde Klipweg. E vehíkulonan ku tabata stashoná na e parti mei mei a sali via Kaminda Brievengat, miéntras a dirigí e vehíkulonan ku tabata stashoná na e parti pabou di S.D.K., den direkshon di Gosieweg”.
Mas aleu Zwerwer a splika ku dor di parti e fluho di tráfiko den tres direkshon, tráfiko no a stagna niun momentu. “Ora e fluho di tráfiko a baha, tur outomobilista por a skohe e direkshon ku nan tabata deseá. En total a dura 40 minüt pa a trankilisá e tráfiko, loke ta un rèkert sigur”, Zwerwer a finalisá bisando.

WILLEMSTAD – E bista kustumbrá di e edifisio di Amstel na Nieuwehaven lo no tei mas den futuro. Na e momentunan akí tin negosashonnan ta tumando lugá ku algun kumpradó ku ta interesá den henter e tereno. Sin embargo e distribushon di serbesnan Amstel i Heineken lo keda Kòrsou.
LA PRENSA a kombersá awe ku direktor Van het Hof, di e kompania di distribushon i el a konfirmá ku e tereno ta na benta. Van het Hof a sigurá mes ora ku komunidat no mester prekupá pasó e serbesnan Amstel i Heineken lo keda disponibel riba merkado. “Pone esei ku kabes grandi den korant”, Van het Hof a bisa, pa asina no trese ningun duda bou di esnan ku semper a disfrutá di e serbesnan.
Pa loke ta trata e partidonan ku ta interesá den e tereno, Van het Hof no por a duna masha detaye. “E kombersashonnan ta kanando i tur kos ta indiká ku e aña akí mes e parti di distribushon lo muda pa un lokalidat nobo”. For di 1959 ku e empresa a establesé su mes, tur hende tabata usa e fábrika di serbes komo punto di referensia. ‘Riba Nieuwe Haven den direkshon di Amstel’, ta un frase ku frekuentemente ta zona.
Despues ku fo’i ’59 e empresa a produsí serbes so, na 1961 Antilliaanse Brouwerij a kuminsá ku produkshon di Malta Amstel, un bebida sin alkohòl ku un smak sut. For di 1999 produkshon di Amstel Bright a kuminsá, te ku na 2001 e serbes akí a subi merkado ulandes. J.A.J. Sprock a lanta Antilliaanse Brouwerij dia 2 di aprel 1958 i na sèptèmber 2005 el a sera su portanan.

WILLEMSTAD - FAC i Komishon Organisadó ta invitá tur e fanátiko i koredornan na e próksimo evenementu di Street Legal djasabra awor 29 di mart na Curaçao International Raceway na Ronde Klip.
Ta e kareda “Riba un webu” ku ya nos ta den siman di konènchi di Pasku Grandi.
Durante e último kareda di Street Legal mester bisa ku mester a dèskualifiká e ganador di Street Bracket.
Ta trata di e outo ku a keda inskribí pa Anthony Rozendaal pero e outo a keda manehá e anochi ei pa Rafael Willems.
Manera e regla ta bisa ku e puntuashon ta mara na koredor, pues outomátikamente Anthony Rozendaal i Rafael Willems ta pará na 0 punto. Tambe ta trata di un poinstanding kaminda e mihó koredornan ta keda premiá fin di aña.
Djasabra awor ta sigui ku e 3 klasenan ku ta Street Bracket, Street E.T. Bike i Heavy Bracket.
Street Bracket ku ta e outonan ku ta kore di 18.00 pa 13.00 sekònde tin lider di e kampionato 2008 ta Otmar Conradus ku 120 punto.
Na di dos lugá Mitch Koolmeyer ku 110 punto. Tin un empate na di tres puesto entre Johnny “Juni Mondi” Dickes i Marlon Rock, ámbos ku 100 punto.
Street E.T. Bike ku ta e motosaikelnan ku ta di 11.50 sekònde pa mas rápido lider di e pointstanding 2008 ta Steven Soeterboek ku 120 punto.
Na di dos lugá ta sigui ku 110 punto Farley Candelaria. Na di tres lugá Hendrick Zimmerman ku 100 punto. Na di kuater i di sinku puesto tin Rendolf Torbet i Sajid O’Neil ku 90 punto.

Skina di Sorti, awe djaweps 27 di mart di 2008, ta kuminsá ku deseá tur hende un bon dia. Un di e problemanan grandi ku gobernashon antiano tin, ta e kultura di krea i mantené ambiente di konflikto. Lokual ta uni nos ta wòrdu kubri totalmente pa e intensidat, ku kual ta usa e puntonan di diferensia, pa krea un ambiente di enemistat. Ta reina e persepshon ku bo no por gana sosten elektoral si no ta eksistí e persepshon di enemistat. Si bo no ta ku mi, bo ta kontra mi a bira si nan gusta bo, mi ta kontra di bo.

E kultura aki a krea raisnan asina fuerte, ku no tin ni sikiera intentonan pa hiba un aserkamentu di “issue” riba kontenido. No ta wak ta unda ke bai i konsekuentemente ta kon tin di yega. Den práktika polítiko ta interpretá e posishon elektoral propio komo konsekuensia di popularidat di otronan, enbes di fayonan propio. Oportunistanan semper lo saka probecho di un krísis di konfiansa ku por surgi serka elektorado (òf parti di e elektorado), pero nan éksito hamas i nunka por ta duradero.

Espasio pa oportunistanan (probechá di e oportunidat pa saka benefisio personal) ta wòrdu kreá dor di hustamente esnan ku tin un pretenshon polítiko válido (atendé ku “maatschappelijke noden”), pero den nan aserkamentu ta faya na alkansá elektorado, pa pèrdèmentu temporal òf permanente di konsiensia di kiko ta e meta ku nan lanta pa sirbi. Den polítika e meta general, ku aki aya un diferensiashon den e manera ku e tin di wòrdu alkansá, ta keda nivel di bida di komunidat.

WILLEMSTAD – Sint Maarten kier un klaridat riba futuro di Banko Sentral di Antia. E punto aki no a haña atenshon te awor aki anke e ta menshoná den un e Deklarashon Final di novèmber 2006.
Diputado di Asuntunan Konstitushonal di St. Maarten, Sarah Wescott-Williams, ta biaha pa Kòrsou otro siman pa topa ku Promé Minister Emily de Jongh-Elhage i diputado di Asuntunan Konstitushonal Zita Jesus-Leito pa papia entre otro riba e punto aki. E reunion ta pa diskutí asuntunan konstitushonal, spesífikamente áreanan ku entidatnan antiano mester asumí un posishon pa loke ta e proseso di kambio konstitushonal.
“Tin vários asuntu ku ta pendiente ku mester di atenshon di Gobièrnu Sentral”, asina e diputado di St. Maarten a indiká.
Algun tópiko ku lo keda atendé ta Winair, penshun di eks polítikonan di teritorionan insular, finansiamentu di e sistema hudisial.
E grupo di trabou di Hustisia a kaba di regresá for di Ulanda resientemente pero Wescott-Williams a bisa ku tin vários reunion mas planiá pa aprel i mei.
Un otro asuntu ku a keda pendiente ta Banko Sentral. Masha poko progreso a keda hasí riba un posibel Banko Sentral pa tantu Kòrsou komo St. Maarten pa e futuro paisnan aki.
“Ningun partido no a bisa ofisialmente ku e no ta den akuerdo ku loke a keda firmá dia 2 di novèmber 2006 ku ta papia di un Banko Sentral. Sinembargo despues di desaroyonan polítiko na spesialmente Kòrsou, no tabatin diskushonnan mas kon eksaktamente esun di Banko Sentral lo keda realisá”.

WILLEMSTAD – E chèns pa shuata ku piskánan den awanan rònt di Kòrsou i Boneiru ta masha chikitu, kontrali na Isla Ariba i otro áreanan den kua e venenu ciguatoxin ta asina fuerte. Den kòmbersashon ku dr. Dòlfi Debrot, eksperto di biologia marino, e la splika LA PRENSA ku e Snoek ku e famia a kumpra na barku i shuata ku ne, ta prosedente di un área ku tin piskánan grandi ku tin akumulashon di e venenu aki. E venenu aki ta produkto di e micro algae, ku ta un protekshon rònt di lima ku ta venenoso. Ta e protekshon pa e lima aki piská chikitu ta kome. Na momentu ku piskánan grandi kome esnan chikitu ta produsí bioakumulashon ku ta produsí e venenu aki den kurpa di e piská.
Segun dr. Debrot, mas grandi e piská bira, mas tantu e venenu aki ta akumulá, konsekuentemente na momentu ku bai na kome e piská aki, lo produsí shuatamentu. Tin áreanan ku ta kontené e venenu ku ta duna ciguatera. Einan e hendenan no ta tribi kome piská grandi, pero ta preferá piskánan mas chikitu. Den Karibe tin hopi isla ku ya no ta kome piská grandi pa evitá shuatamentu. Islanan den Karibe manera Islanan Vírgen, Tortola, St. Johns, Islanan Ariba ta islanan vulnerabel pa kome piská grandi, ya ku den mayoria kaso lo tin shuatamentu.
Debrot ta manifestá ku den awanan rònt Kòrsou i Boneiru no por haña esaki, ya ku no ta un kustumber pa esaki tuma lugá. Un di e motibu ta ku dor ku ta kome hopi piská ta duna ménos chèns pa piskánan desaroyá i bira grandi. Ménos grandi un piská ta ménos akumulashon e tin di ciguatoxin. Snoek semper ta keda un piská peligroso, debí ku no sa unda a piska e piská aki i di unda e ta bin. Tambe e piská Snoek ku e famia ku a shuata Bièrnèsantu a kome, mester ta un piská ku a kue den un área kaminda ta prohibí pa kome e piskánan grandi ku ta frekuentá e área aki.

WILLEMSTAD - E klup di Toastmasters di Aqualectra konsiderando ku tin hopi diskurso di kalidat ku ta keda presentá den e klupnan di Toastmasters rònt Kòrsou a disidí pa bini ku un anochi di “Best of the Best”.
Meta di e anochi aki ta pa tur klup di Toastmaster di Kòrsou manda nan mihó diskursonan pa kompetí den un ambiente sano estilo Toastmasters, kaminda no ta intenshon pa saka e mihó sino simplemente laga e públiko sera konosí ku e diskursonan mas impreshonante ku a keda presentá den e diferente klupnan.
Ta e intenshon pa e aktividat aki bira unu ku ta bini bek tur aña.
E gran evento di “Best of the Best” di e aña aki ta tuma lugá djabièrnè 28 di mart den Ouditorio SEHOS di 6’ or atardi pa 8 or di anochi.
Lo bo por mira Toastmasters ku awe ta avansá i ku hasta tin titulo di ta un Toastmaster distinguí duna nan mihó diskurso di tur tempu.Ta un oportunidat di rekordá e bon diskursonan aki i biba e aventura di ta un Toastmaster.
E partisipantenan ta Aishel Rudolfin, Aqualectra Maldishon òf bendishon
Carlos de la Paz ,Aqualectra Biba pa bo mes
Marvis Olbino, Simadan
Ai ja jai, bida
Irving Roosburg, BNA Nunka mas
Kenneth Navarro, Emmastad It happened in Kaya Grandi
Iris Maduro, Concordia Konfiansa
Calviany Eleonora, Trinitaria
Sulema Paulina , Kibrahacha Kultura of webu di gai
Felix Arrundell, Aqualectra Pull the wagon

WILLEMSTAD – E lei riba lotto pronto lo keda tratá den Komishon Sentral pa despues e reunion públiko. Esaki ta loke diputado Mike Willem a deklará na LA PRENSA awe mainta den un kòmbersashon telefóniko. Segun diputado Willem hustamente ayera sekretario di Konseho Insular a inform’é di e desaroyo aki.
Esaki ta nifiká ku mas pronto posibel ku e lei aki keda tratá lo bin ku destaho pa logra haña e operador ku lo bai operá lotto pa Gobièrnu. Lotto ta keda den man di Gobièrnu, pero lo buska e mihó oferta di un operador ku lo bai operá e wega aki pa Gobièrnu. Den e destaho aki tur hende ta haña oportunidat pa entregá nan oferta pa di e manera ei por skohe un operador ku lo bai operá e lotto pa Gobièrnu. No ta konosí e fecha di tratamentu di lotto den Komishon Sentral, pero e proseso aki mester ta unu ku tin ku kana rápido pa kontinuá ku e reunion públiko.

Lorito ta yama tur hende un felis djaweps. Nos ta den euforia total despues di e wega di ayera. No opstante poko preparashon e tim antiano a hunga hopi bon. E defensa mester un “tune-up” pasobra bo mester asumí ku e próksimo kontrinkante (Haiti) ta hopi mas fuerte ku e rival di ayera. Antia a demostrá un otro kos mas: keda den atake i pone preshon ta e mihó defensa! Pabien!

Fotolorito2703

Lorito a bishitá e sentro di NAVU i nos a topa hendenan ku ta trahando ku masha amor. Un di nan ta e kabayero aki ku tabata poniendo tur unifòrm na òrdu. Nan tambe meresé elogio. Bon trabou!
****
Pa e profetanan di maldat ku ta kana pretendé yen di kos negativo, tambe ta bai nos saludo. Nan sa mihó ku nos ku niun aktividat grandi no por keda sin usa spònser. Esei ta un fenómeno internashonal. Ta na unda nan ta biba anto? No opstante nan negativismo, mester konstatá ku nan tambe ta parti di nos sosiedat i nos no por kore ku nan. Danki Dios ku algun di nan mes ta preparando pa bai biba afó. Bon voyage! Anto, kòrda ku ta fin di luna atrobe. No lubidá di pasa kobra!
****
Nos a haña un karta tambe ofisial di Kas di Antia riba nos Lorito di ayera. Parse ku e kos a pika nan kueru un poko. Nos ta publiká e karta ku nos a haña integralmente di nos amigu Norman ku por sierto ta hasiendo bon trabou na Ulanda. E karta ta bisa asina aki: “Kas di Antia semper ta duna tur asistensia na tur mandatario di Antia ku ta hasi bishita di trabou na Hulanda. Esei semper na momentu ku ta pidi nos yudansa i asistensia i na momentu ku nos ta na altura di e programa di e mandatario. Den kaso di sr. Rhuggenaath, for di basta tempu pasá a anunsiá su bishita i a pidi nos asistensia pa publisidat i otro asuntu. Esei ta motibu ku a manda prensa ayera un komunikado di prensa ku pòtrèt. Den kaso di diputado Godett ku tambe ta na Hulanda, no opstante ku ta na último ora nos a haña sa di e bishita, Minister Plenipotensiario Comenencia a bai risibí sr. Godett na Schiphol djamars, manera semper nos ta purba hasi, i a ofresé sr. Godett nos servisio di kustumber. Sr. Godett a keda di laga sa si e mester di kualke forma di asistensia pero te na e momentu aki e no a laga sa i ta ayera numa nos a risibí via via un kopia di su programa di bishita, ku ta dura te djabièrnè (mañan). Mi ta spera ku e informashon aki a duna klaridat riba loke ta hasi menshon di dje den 'Lorito'. Ku saludo”. Fin di e karta.

WILLEMSTAD – Banko Sentral di Antia a bolbe atvertí awe pa práktikanan di Seguros Curiel. Den pasado ya kaba a atvertí públiko pa e práktikananan, konsiderando e responsabilidat ku e instituto tin pa garantisá un sektor finansiero íntegro i salú. A base di e responsabilidat aki na diferente okashon Banko Sentral di Antia a atvertí pa práktikanan di Seguros Curiel.
E aktitut di Seguros Curiel a pone ku Ministerio Públiko a entregá un keho kontra e kompania loke a pone ku Ministerio Públiko a detené e propietario E. Curiel aña pasá. No opstante e atvertensianan aki, Banko Sentral di Antia a bolbe haña reklamonan nobo riba e práktikanan di Curiel.
Banko Sentral di Antia ta pidi tur hende ku ta sera un seguro pa averiguá promé si e kompania tin un pèrmit di Banko Sentral pa move riba e tereno aki. Tur kliente por pidi e kompania pa wak e pèrmit aki. Na momentu ku tin duda por tuma kontakto ku e sekshon di Supervishon Kompanianan Institushonal na telefòn 4345691.

WILLEMSTAD – E kambionan estatal ku ta na kaminda lo garantisá bon seguridat i un hustisia imparsial pa Kòrsou i Sint Maarten den futuro. Asina minister di hustisia David Dick a duna di konosé.
E minister a bisa ku pa Kòrsou i St. Maarten, ku ta bira pais den Reino, ta sumamente importante pa nan tin garantia di bon seguridat i hustisia imparsial. “Den negosiashonnan ku ta tumando lugá entre Antia, Kòrsou, St. Maarten ku Ulanda ta hasiendo palabrashonnan hustamente pa duna e garantia aki na pueblo. Ta trahando akuerdo pa korte di hustisia imparsial, un ministerio públiko fuerte, imigrashon i polis ku ta funshoná na un nivel haltu pasobra esakinan ta e pilánan pa garantisá bon seguridat i hustisia imparsial den e struktura nobo. Pues pa kontesta e pregunta, por bisa ku debidamente lo tin garantia di bon seguridat i hustisia imparsial ora yega pais outónomo den Reino”, asina e minister a bisa.
Mas aleu minister Dick a splika ku e status outónomo pa Kòrsou i St. Maarten ta trese kuné ku kada isla lo haña un mandatario ku ta dediká tur su atenshon na e pais aki so. “Den e situashon ku nos konosé awor aki, Antia tin un minister pa atendé ku tur sinku isla, kaminda den e status outónomo Kòrsou i St. Maarten kada un lo tin su propio minister di hustisia. E kambio aki so kaba ta pone ku e mandatario tin atenshon total pa su teritorio. Banda di esei e puntonan riba kua ta trahando pa logra akuerdo manera korte komun di hustisia, OM, imigrashon i polis ta hustamente e sektornan ku mester ta fuerte pa asina nan por duna sosten na e trabou di e mandatario pa garantisá seguridat na pueblo. Ta p’esei ta asina importante pa subi e nivel di kuerpo polisial, imigrashon etc. Korte komun di hustisia ta kanando bon i por mira ku tur kaminda korte tin e rèspèt i rekonosementu hustamente pasobra e ta un korte imparsial”.

Polisnan a haña formashon pa atendé situashonnan di krísis, manera den kaso di aktonan di terorismo

WILLEMSTAD – Un grupo di polis di Antia i Aruba a haña un formashon speshal pa atendé asuntunan di krísis, manera un desgrasia grandi di tráfiko òf situashonnan ku tin di aber ku terorismo. Bintidos (22) di nan a pasa e formashon speshal aki ku e titulo “Opleiding Officier van Dienst Politie” ku éksito. Resientemente tabatin entrega di diploma na e miembronan aki di Kuerponan Polisial di Antia Hulandes i Aruba ku a pasa e kurso ku éksito.
Direktor di LPO, sra. Falbru den presensia di hefenan di Kuerpo di e diferente islanan a entregá e diplomanan. E formashon a kuminsá dia 18 di febrüari 2008 na Super Club Breezes ku partisipashon di koleganan di rango òf funshon di inspektor di Aruba, Boneiru, Kòrsou i Isla Riba. Tres grupo a tuma parti na e formashon ku a dura dos siman pa kada grupo. E parti teorétiko a tuma lugá na Super Club Breezes miéntras e parti práktiko a tuma lugá na un sitio riba Rijkseenheid Boulevard. Ta trata aki di un formashon kaminda e funshonario polisial por manehá situashonnan di desgrasia serio di tráfiko, kaminda órden públiko ta keda peligrá, aktonan di terorismo i otro situashonnan di krísis. Den e formashon pa “Officier van Dienst Politie” e funshonario polisial ta siña manehá e situashon di un manera responsabel huntu ku otro instansianan (manera entre otro Brandweer, Ambulance ets.). E opleiding ta hopi práktiko hasiendo uso di aktornan i situashon kasi real.

DEN HAAG / WILLEMSTAD – Despues di un tempu largu di preparashon, e tradukshon nobo di Kuifje na papiamentu ta riba merkado. E buki yama E Asuntu di Florisol (di e obra original na ulandes De Zaak Zonnebloem).
E persona ku a tuma e inisiativa pa e tradukshon a biba tempu ku e tabata mucha na Kòrsou. Su tata tabata redaktor en hefe di korant Beurs- en Nieuwsberichten. Su eksperensia di bida na Kòrsou a pone ku Jan Aarnout Boer a bin ku e idea pa tradusí e buki. E idea a nase for di 1992 pero ta na mei 2005 tempu ku e outor tabata na Kòrsou un biaha mas, e idea a haña mas forma. Awor e idea a kristalisá ofisialmente i tabatin presentashon di e obra na Den Haag, kaminda Jan Aarnout Boer a duna un splikashon riba e kaminda ku el a kana pa e proyekto aki. Ademas Igna van Putte a duna un presentashon riba interes di papiamentu di enseñansa.
Boi Antion, periodista i presentadó di radio/televishon di Boneiru, a tradusí e buki. E promé edishon a sali ku 10 mil ehemplar. Lo pone e bukinan grátis na disposishon di muchanan ku ta bai skol na Kòrsou i Boneiru.

PEKIN – E sùrnan di un di e tèmpelnan mas sagrado di budismo di Tibet a desafiá outoridatnan chines awe manifestando na fabor di nan lider spiritual, Dalai Lama, dilanti di periodistanan estranheru na Lhasa, kapital di Tibet.
E protesta a tuma lugá durante un bishita organisá pa Gobièrnu chines pa duna reporteronan e vershon ofisial di e disturbionan grave ku a sakudí e region aki.
E demonstrashon ku a tuma lugá awe pa e sùrnan na e tèmpel di Jokhang na Lhasa ta prueba ku ainda tin deskonfiansa den e régimen chines.
“Nos ke libertat, nos ke Dalai Lama”, asina nan tabata grita dilanti mas o ménos 26 periodista ku tabata den e grupo guiá pa funshonarionan chines.
Un sùr a kibra e splikashon di un di e representantenan chines i a akus’é di ta gaña.
E insidente aki a hala atenshon di prensa internashonal. Un medio ta papia di 30 sùr i otro ta papia di entre 50 pa 60 sùr. Na e momentu di e protesta e ofisialnan chines a pidi e grupo di periodista pa bandoná e lugá.
Periodistanan estranheru no ta pèrmití di bai Tibet for di inisio di e protestanan.

Sùrnan a probechá di e oportunidat di presensia di periodistanan internashonal pa demostrá nan malkontentu ku Gobièrnu chines

BEIJING – E agensia di notisia estatal a indiká awe ku ayera nochi a tuma lugá un eksploshon di vürwèrk ku a kosta bida di 22 persona i 10 otro a resultá heridá den e region di Xinjiang.
E agensia Xinhua a bisa ku e aksidente a tuma lugá djarason anochi ora ku outoridatnan di e suidat Turpan tabata destruyendo vürwèrk.
Xinhua a bisa ku a paga e kandela, pero no a duna mas informashon.

CABO CAÑAVERAL – E transbordador Endeavour i su shete tripulantenan a regresá tera ayera nochi den un aterisahe nokturno poko usual i asina ta konkluí un aventura di dos siman na e stashon espasial internashonal.
E nave a mishi tera un poko despues di 8:30 riba e pista iluminá pa NASA. “Bonbiní na kas”, asina Kòntròl di Mishon di NASA a bisa e tripulantenan di Endeavour. “Felisitashon na tur e tripulantenan”.
Komandante di e mishon, Dominic Gorie, a kontestá ku tabata un mishon ku hopi gratifikashon ku emoshon for di prinsipio te fin.
E regreso di e transbordador a retrasá un poko. E aterisahe tabata programá pa mas banda di 7’or pero práktikamente na último minüt algun nubia a kubri e zona. Miéntras ku e astronoutnan tabata dal buèlta adishonal rònt di planeta, shelu a habri sufisientemente pa satisfakshon di e kontroladónan aéreo i despues di pidi Gorie su opinion nan a dun’é lus bèrdè pa aterisá.

E transbordador Endeavour ku a baha sin problema ayera na Cabo Cañaveral.