Un trahadó ta hinka un saku di aros importá den un depósito di gobièrnu na Manila, kapital di Filipinas. Preis di aros riba merkado mundial a subi ku 50 porshento den último dos lunanan i a bira dòbel kompará ku 2004 loke a lanta temor pa un skarsedat di e produkto básiko aki na Asia, pero tambe na diferente parti di mundu (foto AP/Pat Roque).
WILLEMSTAD – A drenta e notisia tristu for di Breda, Ulanda ku e èks vòlibòlista yu di Kòrsou Errol Rooi a bin fayesé. Rooi tabata hunga pa e ekipo di Brevok na Breda, Ulanda i tabatin 54 aña. Rooi a hunga den dékada ’80 vários temporada pa Brevok kaminda e tabata resaltá pa su wega atraktivo. Frans Derks, e èks presidente di Brevok a bisa, ku Rooi tabata un persona ku tabata bale la pena pa konosé. “Errol semper tabata kontentu. E tabata un tremendo hungadó, pero ku nunka no tabata kana e kaminda robes”, asina Derks a bisa Rooi tabatin un periodo basta largu malu.
WILLESMTAD – Den kuadro di e proyekto “Você quer jogar Futebol?”, pa manda un òf mas futbolista di 13 i 14 aña serka Fluminese di Rio de Janeiro, a drenta e tremendo notisia ku Romario Souza Faria lo bini Kòrsou komo hurado di e grandioso evento aki. Romario ku resientemente a hinka su di mil gol, lo biaha kompañá pa algun èks hungadó di klase di Brazil i ta e intenshon pa Brasil hunga kontra Kòrsou den un wega amistoso den stadion Ergilio Hato. E plan ta pa e bira un wega di shete kontra shete i e fecha tentativo ta djaweps dia 3 di aprel. Keda pendiente pa resenshá na Kòrsou di un di e hungadónan mas famoso di Brazil. Romario komo hurado i hungadó den un wega speshal di futbòl. Mas detaye ta sigui den e próksimo dianan.
WILLEMSTAD – Federashon di Dam di Kòrsou den su afan pa promové i sostené mas tantu i mas mihó posibel hungadónan lokal di Dam hóben, a akordá pa manda e dos hóbennan talentoso den e deporte di wega di Dam, ku ta Mijail Eisden i Gedion van Eiken, bai partisipá den e Torneo Habrí Internashonal di Dam na Sürnam, ku lo tuma lugá den e periodo di 30 di mart pa 6 di aprel benidero. E torneo aki lo ta un bon okashon pa e dos hóbennan aki kompetí i haña eksperensia kontra di hungadónan di taya den e zona Pan-Amerikano i Europa. E resultadonan di e partisipantenan den e torneo aki ta konta pa e ranking mundial di Federashon di Dam Mundial, FMJD. Hopi forsa i éksito den e torneo aki na Mijail i Gedion.
WILLEMSTAD – Na kontinuashon di e Torneo Tio Daou 2008, e spring training di Kòrsou, ayera nochi den parke di Tio Daou, Sta. Maria Pirates ta logra un viktoria di 8-3 riba Wild Cats den e wega di semi final i asina klasifiká pa e final di djadumingu atardi kontra di Sta. Rosa Indians. E Torneo Tio Daou 2008 ta dediká na e gran picher slengu Yubi Mercelina.
WILLEMSTAD – Ayera nochi e ekipo di Hubentud Fortuna ku un gol den promé tempu anotá pa Everon Espacia na di 43 minüt i dos gol de e di dos tempu anotá pa e rumannan Trinidad ta logra un triunfo di 3-1 riba FC Sithoc. Mauricio Moreno ku promé a dal un bala den palu di gol, pero un ratu despues ta anotá e gol di empate pa Sithoc. Sithoc ayera no tabatin portero di reserva despues ku Gino Costino a leshoná. Djasabra e kampionato ta kontinuá ku SUBT kontra di VESTA.
JUPITER, FLA., - Su kòmbèk a keda kòrtiku pa motibu di leshon i Juan Gonzalez a disidí di regresá Puerto Rico. Pero St. Louis Cardinales ta tene porta habri si e kier regresá e temporada aki asina un ofisial a bisa. Gonzalez ku tabata un invitado i no riba roster a keda pone riba lista di hungadónan inaktivo, un moveshon ku ta pone ku e ta keda miembro di e organisashon si e kier regresá. Segun e organisashon ta komprondé ku Gonzalez lo kier regresá kas, kura su mes i skohe kualkier ora ku e kier bolbe purba e por bai “extended spring”. “Ora ku e ta sinti ku e ta kla pa hunga si t’asina e ta deseá, e por bolbe”, asina e gerente general John Mozeliak a bisa. “E lista ku e ta ariba ta permiti’é hasi esaki. Te ainda e ta un atrakshon komo un batidó di poder”. Pero promé e mester ta bon di salú. Gonzalez na edat di 38 aña tabata impreshonante den kampamentu pa su kondishon físiko. Un ofisial di e klup a bisa ku su kondishon tabta esun di mas mihó di e organisashon. E tabata tin promedio di .308 ku un honron ku el a bati kontra di Johan Santana den 26 turno na bate.
WILLEMSTAD - Stakamahakchi/Fatum ta titulá kampion di Kòrsou den Vòlibòl Femenino Superior. Stakamahakchi femenino ta logra asina nan promé título den Femenino Superior. Stakamahakchi den e wega ayera ta bin bèk despues di pèrdè e promé sèt 25-23 i tabata ta atras 21-17 den di dos sèt, pero un tremendo kambio hasi dor di coach di Staka dor di kambia nan opzetter ta trese e kambio pa asina Staka skor 8 punto pa gana e set 25-22. Stakamahakchi ta keda buta preshon riba Hurricane ku tabata benta hopi servisio afó durante e wega i di otro banda e dos pilarnan di Staka ku Neysa Hooi i Christine Anthony tabata pasa ku basta fasilidat dor di e blòk di Hurricane. Staka ta gana e sèt ku skor 25-21. Den e di 4 sèt Hurricane a kai den otro ku Staka ta tuma un bentaha hopi grandi. Hurricane no ta rekuperá mas i ta pèrdè e sèt 25-12. Stakamahakchi/Fatum ku viktoria aki ta titulá kampion di Kòrsou 2007. Un Fabien na STAKAMAHAKCHI/FATUM ku nan título di kampion.
Skina di Sorti, awe djabièrnè 28 di mart di 2008, ta kuminsá ku deseá tur hende un bon dia. Den polítika, tiramentu di peso polítiko den balansa, pa forsa desishon riba un asuntu den ékis direkshon, ta un asuntu ku esun ku ta hasié mester pensa hopi bon riba dje. Por lo general ta trata di un akshon ku ta trese konsekuensia irevokabel, di kual e impakto real ta bira visibel den futuro. Irespekto kon e desishon riba e asuntu spesífiko sali, e midimentu di forsa (lokual en esensia e kaso ta) ta trese divishon (e liña ta keda invisibel ainda, pero e deliñashon a tuma lugá). **** Tiramentu di peso polítiko den balansa de facto ta un sorto di chantahe (si no sosodé manera mi ta deseá, mi ta hasi tal kos). Ta un akshon ku ni remotamente no ta konopá ku e disposishon mental ku ta kompañá un akshonamentu basá riba prinsipio. Un akshon di chantahe, ta un rekurso poko honroso ku ta mas bien konopá ku un akshon di disposishon mental poko deregulá (“je ziet het even niet zuiver”). **** Na momentu ku e disposishon mental ta den balansa, e akshonamentu basá riba prinsipio ta redonda den un sakamentu di konklushon. E aktor ta respetá e órden establesé denter di e organisashon (“the ruling coalition”) i ta hala atras pa evitá di bini den kònòpi ku su konsenshi. Den nos práktika polítiko, por lo general esnan ku ta retirá pa motibu di e “gewetensvraag” ta retorno riba un plano mayor.
WILLEMSTAD – Sekretario di Estado pa Asuntunan Konstitushonal di Ulanda, Ank Bijleveld-Schouten lo ta na Antia for di djamars te ku djaweps pa un bishita kòrtiku informal. E lo reuní ku entre otro promé minister Emily de Jongh-Elhage i diputado pa Asuntunan Konstitushonal di St. Maarten Sarah Wescot-Williams. Promé Minister a duna di konosé, ku e bishita aki lo ta puramente informal, pasobra e gruponan di trabou no a finalisá nan tareanan ainda. Tambe e grupo di direkshon polítiko ku mester evaluá tur lokual mester wòrdu hasi ainda relashoná ku e proseso di kambionan konstitushonal i duna un konseho riba e fecha di 15 di desèmber lo no keda kla pa e deadline di fin di mart. Un Konsulta Polítiko tabata planiá pa tuma lugá na aprel pa tuma un desishon polítiko riba entre otro si en bèrdat 15 di desèmber ta realisabel. E reunion aki a keda posponé te ku mei. Promé minister lo reuní ku e Sekretario di Estado ulandes djarason. Manera a informá ayera, diputado Sarah Wescot-Williams tambe ta yega Kòrsou otro siman. E tópikonan ku lo keda diskutí ta diferensha pa kada isla ya ku tantu St. Maarten komo Kòrsou tin diferente prioridat. “E asuntu di debe ta e prioridat pa Kòrsou, miéntras ku esaki no ta e kaso pa St. Maarten,” asina Emily de Jongh-Elhage a duna di konosé. Un di e áreanan di prioridat pa St. Maarten ta Hustisia i Seguridat, segun de Jongh-Elhage. “Promé minister di Ulanda, Jan Peter Balkenende a bisa klaramente ku si St. Maarten demostrá ku nan ke atené ku e asuntu di Hustisia, ku Ulanda lo yuda. E asuntu di un Banko Sentral tambe ta un prioridat pa St. Maarten.”
WILLEMSTAD – Pa adoptá dollar merikano komo moneda ofisial di St. Maarten no ta un opshon real pa minister di Asuntunan Konstitushonal, Roland Duncan. Ounke ku e ta pone énfasis ku e no ta un ekonomista, e ta di opinion, ku un Banko Sentral pa St. Maarten i Kòrsou ta parse di ta e opshon mas lógiko pa St. Maarten. Den kaso ku e opshon aki no ta realisabel, el a bisa ku e ora ei St. Maarten mester eksplorá e posibilidat di un aliansa ku e Organisashon di Estadonan di Ost Karibe (OECS) i ku e posibilidat pa opta pa dollar di Ost Karibe. Duncan ta kere, ku den e proseso pa desmantelá Antia, partidonan mester pone mas spit den e diskushonnan riba Banko Sentral i e futuro moneda pa e pais di futuro St. Maarten i Kòrsou. Manera ta konosí, direktor di Banko Sentral, Emsley Tromp a bisa siman pasá ku den kaso ku no por logra un Banko Sentral pa St. Maarten i Kòrsou, St. Maarten mester studia e posibilidat pa introdusí dollar merikano komo moneda. Sinembargo, Duncan no ta di akuerdo ku esaki. El a bisa, ku e ta kere ku tin vários aspekto relashoná ku introdukshon di dollar merikano ku mester wòrdu evaluá. “E ta laga bo habri na desaroyonan internashonal ku bo no tin den bo man,” asina Duncan a duna di konosé. El a referí na e balor di dollar merikano ku ta fluktua i ku e moneda aki ta bou di tremendo preshon di un euro fuerte. “Por ta pa e hòmber ku ta atendé ku turista, introdukshon di dollar ta zona interesante, pero nos tin un ekonomia ku nos mester protehá. Kiko gobièrnu ta bai hasi ku e salarionan? Nos ta kuminsá paga empleadonan públiko den dollar tambe? Kua montante di kambio lo usa? e minister ta puntra.
WILLEMSTAD – GGD mester bira mas aktivo riba piskánan ku ta subi merkado via barkunan venezolano i tambe kònteiner. Hopi okashon tin problemanan ku piskánan kontaminá, pero ta e konsumidónan no ta hasi denunsia. Konstantemente tin reklamo riba komementu di piská i haña diarea òf kualke síntoma di malesa. Echo ku e hende no sa unda akudí ta hasi ku e parti di denunsia ta keda neglishá. Esaki ta kontribuí ku esnan ku ta importá piská via barku òf kònteiner ta sigui hasi e tipo di negoshi aki. E echo ku siman pasá un famia por a shuata ku Snoek ta motibu ku no tin un kòntròl rígido riba piská di eis ku ta subi merkado. Segun Erwin Koenze ku nan mes a kaba di yega for di Boneiru ku kargamentu di Snoek fresku i ku no ta kontaminá. Boneiru no tin banki di koper ku ta kousa problema di kontaminashon bou di piskánan. Piskánan ku ta for di e área aki semper mester tene kuenta ku nan, ya ku nan por ta kontaminá. Koenze ta afirmá ku GGD mester ta mas aktivo pa kòntròlnan, ya ku e konsumidó lokal no ta kustumbrá di entregá keho, debí ku nan no sa unda nan mester bai. Mester di mas informashon i konsientisashon pa konsumidónan por akudí ora nan tin keho riba kuminda. Mester kuminsá regulá merkado di manera ku tin un mihó kòntròl riba e produkto. Den kòmbersashon ku Erwin Koenze ta afirmá ku mester kuminsá hasi algu lihé pa evitá e forma ku benta di piská ta tumando lugá. Últimamente tabatin un subida di preis di piská ku no ta aseptabel, ya ku e piskadónan lokal mes no a subi nan preis. Esaki ta nifiká ku esnan ku ta drenta ku piská sea via barku òf kònteiner no por kere ku nan ta sigui hasi negoshi riba kustia di e pueblo.
WILLEMSTAD – Djamars próksimo komishon di piskadónan lo reuní ku komandante di Marina Real riba e problemátiko ku ta surgi den área di Banda Abou. Manera ta konosí ku piskadónan a forma nan komishon pa asina por haña aseso serka Marina Real pa skucha nan petishon. Piskadónan di e área di Wacawa, Punta Largu i besindario, ta reklamá e forma ku ta atendé ku entrenamentu i ku esaki ta stroba e desaroyo di nan trabou di peska. Durante periodo e marina ta den nan entrenamentunan, piskadónan mester keda for di e área di trabou i ku esaki ta trese sierto desbentaha pa nan por gana nan pan di kada dia. Pa e motibu aki i pa kousa di e vários aksidentenan ku a tuma lugá ku sigur a pèrkurá pa pániko, piskadónan ta urgí pa tin kombersashon ku Marina Real. Den un karta ku a bai pa kombersá, Marina Real a invitá piskadónan pa djamars próksimo 2or di mèrdia, pa kòmbersá pa wak na ki areglo lo por yega ku otro. Den kombersashon ku bosero di e komishon di piskadónan, Erwin Koenze a splika, ku djamars nan lo bai pa atendé tur e problemátiko ku ta unu ku mester haña atenshon. No solamente ku piskadónan ta wòrdu perhudiká, pero pa motibu di subida di gastunan ta hasi ku piskadónan tambe ta wòrdu afektá ku subida di preisnan manera gasoil. Piskadónan ta kere, ku mester tin un solushon pa nan problemanan, ya ku nan ta opiná ku nan no por sigui pèrdè. Pa djamars nan ta spera di haña oido pa nan situashon i ku lo sa di yega na akuerdonan den kua niun hende ta keda perhudiká.
WILLEMSTAD - Fundashon pa Konsumidó a tuma nota dje deklarashonnan di sr. Joel da Silva Gois, miembro di e Asosashon di Supermerkadonan di Kòrsou, SUVECO, kaminda e ta alertá e pueblo konsumidó, ku mester kuminsá prepará pa un oumentu 100% di preis di komestibel. Fundashon pa Konsumidó ta konsiderá e deklarashon di sr. Gois komo sumamente inoportuno i lamentabel. Inoportuno, ya ku e deklarashonnan aki ta bini nèt na momentu ku Gobièrnu a kaba di instruí un komishon pa bini ku alternativanan pa wak kon ta suavisá e subidanan di preis di último tempu. Deklarashonnan di SUVECU ta pone Fundashon pa Konsumidó haña tambe e impreshon ku ta supermerkadonan ta esnan ku ta pone preis i ku tur supermerkado ya ta kontemplando un subida di preis di kasi dòbel. Pueblo di mes ya tin e impreshon ku tin afspraknan di preis entre supermerkadonan i ku pa e konsumidó tantu bal e kumpra aki komo aya ya ku tur ta mesun karu. Pa Fundashon pa Konsumidó tipo di deklarashonnan asin’aki ta lamentabel i únikamente ta yuda krea pániko i káos den komunidat i no ta yuda e konsumidó ku nada. Pueblo ya ta sklamando kon preisnan a subi sky high i ku un grupo grandi di nos pueblo ta bibando stail di dal vla saka vla, ya ku esaki t’e úniko manera ku nan ta mira pa sobrebibí. Mihó lo tabata si sr. Gois a bisa ku nan organisashon tambe ta di akuerdo ku e medida ku Gobièrnu ke tuma pa entre otro amplia e makutu di produktonan básiko ku ta kai bou di kòntròl di Gobièrnu. Esaki sigur ta un dje medidanan ku lo pone pueblo sinti un tiki alivio den su pòtmòni.
SEOUL, - Nort Korea awe a realisá lansamentu di tèst di vários misil di alkanse kòrtiku, Sur Korea a bisa. Analistanan a konsiderá esaki komo muestra di ta fadá ku Merka, i ku Gobièrnu konservador nobo di Seoul. E lansamentu a tuma lugá un dia despues ku Pyongyang a ekspulsá vários funshonario surkoreano kendenan tabata traha na un sentro industrial konhunto na nort di e zona fronteriso fuertemente armá, despues ku Seoul a pidi su bisiña pa mehorá su polítika di derechonan humano i stòp tarda e negosiashonnan pa su desarme nuklear. Bosero di presidensia di Sur Korea a bisa den Konferensia di Prensa ku Pyongyang a lansa algun misil di alkanse kòrtiku komo parti di algun tèst militar. Medionan di komunikashon lokal a indiká ku a lansa tres pa laman na kosta wèst di e pais. Presidente nobo di Sur Korea, Lee Myung-bak, a bisa ku e ke pone fin na e fasilidatnan ku a risibí di Nort Korea durante 10 aña di presidensia surkoreano di tendensia iskierdista ku a duna miónes di dollar den yudansa i a pidi poko a kambio pa konsiderá e preis di stabilidat. Gobièrnu di Lee a bisa ku e ta kla pa invertí sumanan grandi den su bisiña di nort, basta su Pyongyang kumpli ku e kondishonnan di desmantelá su programa di armanan nuklear òf debolbé e mas ku 1.000 surkoreano sekuestrá òf mantené n’e pais despues di e Guera di Korea, di 1950 pa 1953.
KIMMENAEDE-IETSWAART Chatariena (82 aña) A laga atras su yunan Dennis i Altagracia van Kimmenaede-Ferero, Marjorie van Kimmenaede, Irving i Anette van Kimmenaede-Hart, Jeannine i Bruce Soemanta-van Kimmenaede, Kenneth i Claudia van Kimmenaede-Hernandez, Viveca i Frans Koopal-van Kimmenaede, Wilhelm i Hélene van Kimmenaede-Hernandez, Wilhelm i Hélene van Kimmenaede-tweeboom, Dwight i Meredith van Kimmenaede-Louisa, Sharine van Kimmenaede i Marco Mellema, Dashielle van Kimmenaede, Merle i John van Kampen-van Kimmenaede. Akto di entiero ta djaluna 31 di mart for di El Tributo pa santana Janwe. Bishita 9or-11or.
TRONCON Miguel Wenceslao (96 aña) Mihó konosí komo Ongue A laga atras su yunan Simona i Vicente Markes-Troncon, Felis i Maria Troncon-Martha, Nilda i Frank Laken-Troncon, Aurora i Franklin Celestijn-Troncon. Akto di entiero ta djabièrnè 28 di mart for di El Consolador pa santana Sta. Maria. Bishita 1or den sala Krystal. Promé ku entiero tin un respòns 4or. Trahe alegre.
REYMOND-RYAN Olive (87 aña) A laga atras su yunan Imelda i Eddie Remilia-Reymond, Wannita Reymond, Austin Eunice Reymond-Varlack, Diana Reymond i yu, yu di kriansa Etienne Reymond i sra. Akto di entiero ta djasabra 29 di mart for di Barret Methodist Church na Abraham de Veerrstraat pa santana Montaña. Bishita 1or. Promé ku entiero tin un sirbishi 3or.
MARTHA-ZIMMERMAN Imelda Theresa Mihó konosí komo Mimi A laga atras su rumannan Misillia Victoria, Maria Antonia-Hart, Rosana Roosje, Bertha i Victor Martinus, ruman di kriansa Angelica Servania. Akto djasabra 29 mart for di misa Jandoret pa santana Jandoret. Bishita 1or na misa Jandoret. Promé ku entiero tin un s.s. di misa 4or.
Lorito ta yama tur hende un felis djabièrnè. Awe si nos ta masha kontentu, pasobra den un korant di mainta nan a yama Lorito un “roddelrubriek”. Lorito di ku pa promé biaha un hende a komprondé ku ta un rúbrika ku tep di hopi “redu” den dje. Awor splika nos esaki: kon bin den un korant nan ta usa un informashon (verídiko) pa traha nan mes artíkulo ku nos informashon? Ra, ra, ra? Di tur manera, bedankt voor het lezen van Papegaaitje! ********* E pelíkula di Geert Wilders tan sperá por sierto, a resultá un flòpi. E no ta un flòp, pasobra Wilders no a bai demasiado leu, pero ta parse ku Wilders a “chicken out” pa e preshon ku tabatin riba dje. Nos a kere ku e tabata un hende di mas prinsipio, pero un biaha mas el a kai den nos bista. Nos no gusta hende ku ta papia duru, bisa ku nan lo bai duru i finalmente resultá papa. ********* Nos amiga Rita Verdonk a papia palabra duru atrobe i a duna kaba un “voorproefje” di ora e haña poder na Ulanda. Nos ta gosa Doña Rita. Nos ta hañ’é un muhé great, di prinsipio i ku hopi karisma. Nos no ta gusta su polítika i pronunsiamentunan tur ora, pero e ta un pal’i muhé! ********* Nos no a gusta e manera ku Fundashon pa Konsumidó a bin ta reakshoná riba e diferente atvertensianan ku preisnan lo sigui subi. Ta manera kos ku sea Fundashon pa Konsumidó ta biba den su mes mundu òf ta bisa e no kier bisa e konsumidó pa prepará. Nos tabata na kuna di lantamentu di Fundashon pa Konsumidó i nos ta haña ta lamentabel ku e organisashon no ta tuma nota di loke ta pasa realmente den mundu i rondó di nos. Lesa un poko mas, no solamente den prensa tradishonal, pero den e medionan ku realmente ta splika ta kiko ta pasando. Despues di tuma nota di e realidat ei, kuminsá splika e konsumidó ta kiko ta sper’é!
WILLEMSTAD – Ulanda no ta ko-responsabel pero kompletamente responsabel pa debe di Antia. Esei ta opinion di miembro di Konseho Insular, Gregory Damoen (Forsa Kòrsou). Segun Damoen, awe mainta den un korant lokal na Hulandes a keda informá ku sra. Rita Verdonk a deklará ku Ulanda ta ko-responsabel ku awe Antia ta bankrut. Ku otro palabra ko-responsabel pa e debenan di Antia. Es mas, segun e korant, el a deklará ku Den Haag a frena e islanan den nan desaroyo pa elevá nan mes na un pais madurá i ku ta funshoná bon. Segun sra. Verdonk esaki por keda atribuí na un kondukta di Ulanda kaminda Ulanda tabata demasiado komplasiente ku Antia e último mei siglo. “Kontrali na loke sra. Verdonk a deklará, Forsa Kòrsou i hopi otro yunan di tera a i ta bisa ku Ulanda ta responsabel pa e situashon sosio ekonómiko i finansiero di pais Antia. Suponiendo ku komplasiente, sra. Verdonk ke men duna plakanan di desaroyo i duna sosten den otro forma pa loko, esaki segun nos ta un interpretashon inkorekto i leu for di e realidat. Pa kuminsá mester remarká ku ta kuestionabel si e plaka di desaroyo a kontribuí den desaroyá e islanan di Antia di tal grado ku nan por a funshoná bon. E echo ku nos ta den e situashon ku nos ta awe ta un konfirmashon di esei. Pues un uso inefektivo di e medionan di desaroyo. No ta nada sekreto tampoko ku via di porta patras mayoria di e medionan aki ta bai bèk Ulanda i de fakto a ser usá pa paga gastunan di ayudo tékniko, konsultantnan i kompanianan di konstrukshon Hulandes. Pero banda di e echo aki, loke sra. Verdonk a faya di mira ta e maneho Hulandes di stroba Antia i spesialmente Kòrsou di desaroyá i por para riba nan propio pia finansieramente i ekonómikamente. E maneho di stroba aki ta kuminsá for di eliminá nos off-shore te na eliminá un simpel turismo di reibeweis riba e islanan mas chikí den Antia. Pues konkluyendo e Hulandes mes ta rekonosé ku e debe di Antia ta debe di Ulanda, sigur si mester relashoná e deklarashonnan di sra. Verdonk ku artíkulo 43 di nos Statüt, kaminda Ulanda ta responsabel pa a intervení ora kosnan a kuminsá sali for di man i konsientemente Ulanda no a hasi esei pa nan mes benefisio. Ademas, no ta Kòrsou ta esun ku a imponé e struktura ku yama Antia kaminda a kumbiní Ulanda ku e ruman grandi Kòrsou mester a karga i kuida esnan chikitu den Antia”, sr. Damoen a deklará pa nos awe mainta. Finalmente segun sr. Damoen di Forsa Kòrsou, ku e deklarashon di sra. Verdonk aki el a reforsá e posishon di spesialmente Kòrsou pa negoshá (na lugá di mendigá), un pakete di aktividat ekonómiko pa yuda desaroyá Kòrsou pa den un tèrmino di aki 5 pa 10 aña finansieramente i ekonómikamente nos no ta dependé di Ulanda mas i esaki kuminsando ku parker e debe di Antia serka Ulanda”.
WILLEMSTAD – Tin hende ku aparentemente no kier komprondé òf deliberamente kier krea un otro impreshon, pero e situashon di produktonan di promé nesesidat lo bai bira un problema serio pa tur pais, inkluso pa Kòrsou. Ya kaba e promé señalnan t’ei i sea nos gusta òf laga, mester bai atendé ku nan. P’esei ta keda straño ku diferente persona i/òf organisashon ta hasi komo si fuera e skarsedatnan ku ta konstatando di produktonan di promé nesesidat lo no yega na nos porta. Ayera e presidente di Asosashon di Supermerkado di Kòrsou (SUVECU) Joel Da Silva Gois a anunsiá ku pronto lo tin skarsedat di un gran kantidat di produkto, no pasobra komersiantenan ta retené e produktonan aki, pero mas bien pasobra den e paisnan kaminda ta produsí e produktonan a disidí ku ta wanta e produktonan aki pa nan mes pueblo. Nos a haña e ehèmpel kaba di e situashon na Venezuela, kaminda Gobièrnu di e pais a disidí ku produktonan produsí na Venezuela ta na promé lugá pa pueblo venezolano mes. Esei a pone ku na Kòrsou a surgi skarsedat di diferente produkto, manera webu, banana i hariña di pan. Diferente produkto a bira karísimo, manera keshi. E deklarashonnan di Gois no a kai den bon tera, entre otro di Fundashon pa Konsumidó ku tin un direktiva nobo. Pa loke ta trata aros, LA PRENSA a haña kopia di un artíkulo ku a sali awe den Financial Times, un di e revistanan finansiero mas renombrá na mundu, ku a konfirmá ku preisnan di aros a subi ayera riba merkadonan na Asia ku 30 porshento riba ún dia. Segun e korant, e oumento a produsí e miedu ku por bai surgi intrankilidat sosial den diferente pais di Asia kaminda aros ta e kuminda fundamental pa mas ku 2.5 mil mion hende. E korant a bisa ku e oumento a surgi, despues ku Egipto ku ta e eksportador prinsipal di aros, a introdusí un prohibishon pa bende aros ku eksterior pa tene preisnan abou na Egipto mes. Na otro banda Filipinas a anunsiá ku e lo bai kompra aros riba merkado internashonal pa abastesé su reserva di aros. E reserva di aros di Filipinas ta na e nivel mas abou for di 1976. Pa kolmo Gobièrnu di India a anunsiá ku el a imponé restrikshon pa eksportashon di aros pa motibu di inflashon ku ta subiendo. Komersiantenan di aros di India a bisa ku e medida ta nifiká ku básikamente a para benta di aros di e tipo basmati ku eksterior. Aros ta e fuente di kaminda prinsipal pa mayoria pais den Asia i sobra di mundu, inkluyendo paisnan ku ya kaba ta den un pobresa enorme manera Kamerun, Burkina Fasso i Senegal.
