HARARE, Zimbabwe, - Kas di un kandidato pa Parlamento di partido gobernante di Zimbabwe a bombardi’é awe mainta, den e promé episodio di violensia durante elekshonnan general ku ta tumando lugá na e pais afrikano, polisnan a bisa.
Bosero di polis, Wayne Bvudzijena, a deklará na Reuters ku bòm a eksplotá den kas di e kandidato na e di dos siudat mas grandi di Zimbabwe, Bulawayo.
“Awe mainta trempan a bombardiá e kas i niun hende a resultá heridá. For di e momentu ei nos a rekuperá e artefaktonan eksplosivo. Te ainda no a arestá niun hende”, Bvudzijena a bisa.
Zimbabwe ta votando
E zimbabuensenan awe ta akudí na urnanan den un proseso elektoral ku lo disidí si Presidente Robert Mugabe, kende ta na poder fo’i 1980, lo ekstendé su mandato pa un di seis periodo.
Su rivalnan ta e sindikalista Morgan Tsvangirai, lider di mayó fakshon di Movementu pa Kambio Demokrátiko (MDC), i eks Minister di Energia, Transporte i Finansa, Simba Makoni, kende a apartá fo’i filanan di partido di Mugabe, ZANU-PF, i awor ta presentá komo independiente.
Algun koresponsabel ku ta hasi kobertura di e proseso elektoral zimbabuense a bisa ku fo’i trempan a forma reinan di votante ku deseo di vota n’e sentronan elektoral prinsipal.
MDC a antisipá ku e elekshonnan lo bai keda manipulá, un akusashon ku Gobièrnu a ninga.
Forsanan di seguridat di Zimbabwe ta den alèrta pa kualke brote di violensia.

ATLANTA – Jair Jurrjens ayera a haña su introdukshon den Turner Field.
“Mi ta kere ku mi ta bai gusta picha aki”, asina el a bisa ku un smail grandi riba su kara.
E picher derecho for di Kòrsou lo ta bèk djarason anochi i e wega aki lo no ta un wega di eksibishon.
Jurrjens a bin haña e notisia ofisial for di e coach di picheo di Braves, Roger McDowell ku e lo habri e di tres partido di temporada kontra di Pittsburgh Pirates.
“Mi ta kontentu ku nan a dunami un chèns”, asina e picher di 22 aña a bisa. “Mi ta bai tuma bentaha di esaki i si mi por yuda e tim gana”.
Jurrjens a permití un kareda i kuater hit durante di nuebe ining den su promé tres weganan di spring training, ponchando kuater i regalando dos base por bola.
E èks prospekto di Detroit Tigers a permití 10 kareda i 16 hit den 9-2/3 di ining den su último tres partidonan ku shete base por bola. Pero esaki no a kita su impreshon for di tempran ku tabata fuerte.
“E tin bon “stuff” i ta dushi pa bo hunga su tras ya ku e ta bai tras di e batidónan”, asina Chipper Jones a bisa.
Jurrjens a kulpa su mes di a gasta muchu lansamentu en bes di saka e batidónan out den su último partido kontra di Cleveland Indians ayera.
Sinembargo el a bisa ku e ta kontentu ku su salida, ya ku el a traha riba su kambionan di velosidat.
“Mi “change-up” tabata hopi bon i mi slider tambe tabata bon”, asina Jurrjens a bisa despues di a permití dos kareda i dos hit ku dos base por bola den tres ining i algu.

FORT MYERS, FLA., - Francisco Liriano ta sinti ku e ta kla pa kuminsá temporada den e rotashon di Twins.
Pero Twins ta preferá pa e picher slengu dominikano pasa un tiki mas tempu tirando abou.
Liriano lo habri por lo ménos dos wega den Liga Menor promé ku e drenta e rotashon di e ekipo, asina mènedjer Ron Gardenhire a anunsiá despues ku su ekipo a hunga kontra di Pirates ayera.
Twins a keda mandá klase A Fort Myers despues di wega loke ta nifiká ku Nick Blackburn lo drenta e último puesto den e rotashon di picheo na komienso di temporada.
Liriano lo tin su próksimo salida djaweps awor den apertura na Hammon Stadium na Fort Myers.
Ta un moveshon ku esaki lo fit bon den e skèdjel di Liriano, ya ku su kasá Johana ku ta na estado ta ba duna lus djabièrnè awor na Miami.
Despues e picher slengu lo uni su mes ku Rochester, sukursal AAA sinku dia despues di su promé salida pa kuminsá un wega kontra di Norfolk Tides. Despues di esaki e ta pone pa uni su mes ku Twins.

ST. PETERSBURG, FLA., - Scott Kazmir a tira den outfield promé ku e wega di ayera entre Rays i Reds na Progress Energy Park i a bandoná e seshon ku un sentimentu bon.
“Mi no ta bai pone un tèrmino di tempu òf kualkier otro kos”, asina Kazmir a bisa.”E bon notisia ta un bon sentimentu. Mi ta sinti great”.
Kazmir ku a enkabesá Liga Amerikana ku 239 ponche tirá temporada pasá, a sufri un problema ku su kokoti robes promé ku un wega di intrasquad dia 25 di febrüari último i ta riba DL pa 15 dia.
El a tira entre 70 pa 80 bala pa e coach di picheo Jim Hickey for di un distansia di 120 pia.
“Awor aki loke mi tin di hasi ta traha riba fortalesé mi brasa i tira iningnan”, asina Kazmir a bisa. “Mi tin di saka tres out, sinta, bolbe regresá montíkulo pa un otro entrada. Esei ta mi próksimo paso”.
Kazmir a bisa ku el a tira un seshon di bullpen djadumingu i despues drenta e fase di un picher durante komienso di spring training.

WILLEMSTAD – Djadumingu 30 di mart, gezaghèber, sra. Lizanne Dindial i diputado di Enseñansa, Kultura i Deporte, sra. Marilyn Alcalá-Wallé lo guia e seremonia kaminda lo inougurá e rotònde na Otrobanda komo Rotonde Ergilio “Orilio” Hato.
Pa hopi aña e defuntu Ergilio Hato a duna un kontribushon ekstraordinario na adelanto di deporte en general i futbòl en partikular. Ku esfuersonan hopi grandi den diferente funshon el a presta den enkuentronan deportivo internashonal i di nos pais mes.
Komo un gran siudadano i atleta ehemplar el a promové nòmber di Kòrsou i Antia i a deleitá fanátikada lokal i mundial ku su arte deportivo inkreibel.
Gobièrnu di Kòrsou ta kombensí, ku e balor i normanan ku Ergilio Hato a representá, ta meresé e desishon di un rotònde na su nòmber.
Esaki ta e forma pa ekspresá gratitut, homenahe, rèspèt i apresio pa e gran leyenda aki ku a kontribuí grandemente na esfuersonan pa edifiká i desaroyá nos komunidat, spesialmente nos hóbennan.
Gobièrnu di Kòrsou, Komishon Nòmber di Kaya, Fundashon Amigunan di Ergilio Hato i Sosiedat di Komersiante di Otrobanda ta orguyoso di por honra Ergilio Hato ku un rekuerdo duradero i p’esei e ta meresé pa un rotònde karga su nòmber.
E seremonia pa inougurá Rotònde Ergilio “Orilio” Hato ta tuma lugá djadumingu 30 di mart, kuminsando 10’or di mainta na krusada di Pater Eeuwensweg, Baden Powellweg i Arubastraat den Otrabanda.

WILLEMSTAD – Partido Frente Obrero Liberashon 30 di Mei i su Ala Hubenil, pa di nuebe aña konsekutivo lo bai organisá nan tradishonal kompetensia di fli, esun di mas grandi na Kòrsou.
Esaki lo tuma lugá djadumingu dia 30 di mart na vèlt di Kanga, for di 9’or di mainta pa 7’or di atardi.
E partisipantenan mester tin entre 6 pa 99 aña i mester paga solamente 1 florin.
Un dia promé esta djasabra 29 di mart den sede di Frente Obrero sala “Wilson Papa Godett” lo tin un tayer di fli, kaminda lo pone material disponibel grátis pa kada mucha partisipante por tin nan fli pa partisipá na e grandioso kompetensia.
Lo bai tin hopi premio pa kada kategoria.
Pa inskripshon por tuma kontakto ku sede di Partido Frente Obrero na Winston Churchillweg 102, na telefon: 888-1969 òf serka miembronan di e Ala Hubenil, Juniel Carolina na selular 562-6501 òf Almir Godett na selular 523-4335.

WILLEMSTAD – Na e momentunan akí Ministerio Públiko tin un montante di 223.895 florin pa kobra, di outomobilistanan ku a kometé un infrakshon di tráfiko. Esaki ta resultado di kòntròlnan di tráfiko ku RASPA i 0-Toleransia a tene den e promé tres lunanan di e aña akí.
En total e polisnan a parti 2011 prosèsverbal pa diferente infrakshon di tráfiko. E infrakshon ku a skor mas haltu ta bistimentu di faha di seguridat. En total e aña akí polis a parti un total di 714 prosèsverbal pa outomobilistanan ku no tabatin nan faha bistí durante di un kòntròl. Na di dos lugá polis a parti un kantidat di 662 prosèsverbal pa outomobilistanan ku no tabatin nan papelnan di outo na òrdu. Den e kaso akí ta trata di entre otro 288 outomobilista sin reibeweis, 121 outomobilista sin seguro di outo, 87 outomobilista ku un vehíkulo ku no tabata di kùr, 55 outomobilista ku a pasa den lus kòrá, 55 outomobilista ku a papia na selular sin ‘handsfreeset’ i 32 outomobilista ku no a paga nan number di outo.
E kantidat di 2011 prosèsverbal ku LA PRENSA a kalkulá, ta basá riba informashon ku polis a manda kada bia ku nan a tene un kòntròl. Esaki ta nifiká, ku kisas e informashon no ta kompleto. E montante di 223.895 florin ku LA PRENSA a kalkulá, ta basá riba e tarifanan ku LA PRENSA tin na su disposishon aktualmente. Kisas den e tarifanan akí tambe a surgi kambio entretantu. E último datonan ku LA PRENSA tin ta indiká e siguiente tarifanan; vehíkulo sin seguro 400 florin, pasamentu den lus kòrá 150 florin promé bia i 350 florin di dos bia, vehíkulo no di kùr 150 florin, vehíkulo sin number pagá 150 florin, papia na telefòn selular sin ‘handsfreeset’ 150 florin i faha di seguridat 75 florin.

WILLEMSTAD – E sistema outomatisá di telefonista, ku hopi empresa ta usando últimamente, ta kousa di hopi iritashon serka klientenan ku yama. Diferente empresa tin e servisio akí kaminda un stèm grabá ta duna instrukshon. “Pa papiamentu primi 1”, ta un di e instrukshonnan hopi konosí ku bo ta tende konstantemente. Sin embargo tur e instrukshonnan akí ta tuma tempu i ta kousa iritashon serka esun ku tin purá. Antó no papia mes di e ‘beltegoed’.
Ya ta basta tempu kaba ku diferente hende a reklamá e servisio outomatisá di telefonista akí. Te ku resientemente un hende a reklamá ku su ‘beltegoed’ a kaba sin ku el a haña un hende na telefòn pa yud’é. LA PRENSA, den su afan pa haña sa kiko ta bèrdat di e situashon, a hasi un investigashon chikí i a yama algun empresa. Mester bisa ku a konstatá ku algun empresa ta duna hopi instrukshon promé ku komuniká ku un empleado. Un di e empresanan ku LA PRENSA a yama ta saludá na promé lugá esun ku a yama den tres diferente idioma. Despues e ta bisa un biaha mas den tres diferente idioma kiko mester hasi pa skohe e idioma preferí. Seguidamente e ta duna 8 diferente posibilidat di servisio, pa finalmente e informá kua number tin ku primi pa haña e operador personalmente na telefòn. Tur e trámitenan akí mester a hasi, djis pa puntra te ki ora e establesimentu ta keda habrí.

WILLEMSTAD - E trabounan di konstrukshon, di 2 di e 5 lotsnan ku a kima den Zona Liber, ta avansando rápidamente. “Ta hopi trabou tin i nos ta riba dje manera nan ta bisa. Ounke semper bo ke pa e kosnan kana mas lihé posibel, mi tin ku bisa ku en todo kaso nos no ta malkontentu”, e direktor di CURINDE NV, Eric Smeulders a bisa LA PRENSA awe.
Smeulders a deklará ku nan ta hasiendo nan máksimo esfuerso pa kosnan kana manera mester ta. “Aktualmente nos ta kondusiendo dos konstrukshon pareu i esei ta trese kuné hopi trabou i organisashon. Di e promé lots ku a kima nos ta bashando e flur aktualmente. E di dos lots ku a kima tambe ta den konstrukshon i ta hañando forma poko poko.” Pa loke ta trata e periodo ku e lotsnan lo keda kla, Smeulders a bisa ku den luna di sèptèmber próksimo por spera e promé lots. “E promé lots ku a kima kompletamente lo ta kla den sèptèmber. Nos a konstruí un lots nobo nobo. E di dos lots ku a kima ta esun na entrada di Zona Liber. Esei lo ta kla den transkurso di mei/yüni otro aña.”
Mas aleu Smeulders a konta ku gran parti di e primanan di seguro ta kubrí entretantu. “Di e 5 lotsnan ku a kima, 4 tabata di CURINDE NV i 1 tabata di un kliente di Zona Liber. Nos a traha 2 lots nobo i e otro 2 nan ta pendiente pa konstruí próksimamente. Nunka bo no ta satisfecho kompletamente, pero mirá e sirkunstansianan aktual mi tin ku atmití ku nos no ta malkontentu. Tur nos klientenan t’ei ainda i nos a logra ubiká nan segun sirkunstansianan a pèrmití tur e tempu. Na momentu ku e lotsnan nobo ta kla, nan tur lo bin bèk na nan sitio kustumbrá.”

Skina di Sorti, awe djasabra 29 di mart di 2008, ta kuminsá ku deseá tur hende un bon dia. Den práktika polítiko antiano i partikularmente esun na Kòrsou, tin demasiado kreamentu di aparensia (“schertsvertoning”) ta tuma lugá. Hopi akshonamentu pa krea ékis persepshon, den kuadro di e aserkamentu erátiko di mansa gruponan den komunidat na soño (“sussen, pappen en zoethouden”). Tapa kos, wanta kos i laga pasa ku tin solushon na bista.
****
Gobernashon responsabel, hustu, transparente i kuidadoso ta basá riba hasi eskoho i karga responsabilidat pa e eskohonan aki. No riba kreamentu di aparensia. Tin tambe un atenshon eksagerá riba deklarashon di diferente polítiko ulandes (pa kolmo pa konsumo polítiko ulandes), ku no tin ningun relevansia pa komunidat antiano, simplemente pasobra e mayoria no ta konsumí e mensahe polítiko di ulandesnan.
****
Tin kreamentu di ambiente kontra di ulandes i spesífikamente polítikonan ulandes, den kuadro dje strategia di krea un enemigu komun, pa kubri kosnan mas serka di kas (ku sea nos no ke atende òf no por atende), òf bibamentu di resentimentu pa echonan historiko ku no tin ningun relevansia pa e retonan ku ta na orden. Kosnan ku por ehempel ni e kolonia antiano bibá na Ulanda (pa kual e posishon dje ulandesnan tin sierto relevansia), no ta ni rel ni trel.
E realidat di un postura di arogansha iritante di grupo grandi dje politikonan ulandes, no ta hustifika e ningamentu di e erornan molestioso den nos práktika polítiko ku e ulandesnan ta señalá. Ta mas bien bobo di nos parti pa en bes di saka siñansa for di lokual nan ta hasi bon, pèrdè tempu valioso den mustra dede riba e tantísimo kosnan robes ku e ulandesnan tambe tin ta hasi.

WILLEMSTAD – Durante e fin di siman largu di fiesta siman pasá, un grupo di sambuyadó a tuma nota di un grupo grandi di chucho (manta) ku ta wòrdu yamá na ulandes ‘Arendskoprogen’ i na ingles ‘spotted eagle’.
Tabata siman pasá ku e organisashon ambiental, Curaçao Wildlife a risibí diferente yamada di personanan ku a mira algun piská masha straño ta landa na kosta sùit di Kòrsou.
Mesora personal di Wildlife ku tabata na e sitio por a konstatá, ku ta e tipo di chuchonan ya menshoná ariba. Lokual ta hala atenshon ta, ku ounke e tipo di chuchonan aki no ta peligroso, den último seis luna, nan tabata enbolbí den dos aksidente trágiko na Florida.

WILLEMSTAD – Buki konmemorativo riba brùg Juliana a keda presentá den un seremonia, den kua e outor Karel Josefa a indiká ku ta trata di un buki ku tur siudadano mester tin. E buki aki ta sumamente informativo i ku hopi ilustrashon riba e desaroyo di konstrukshon di brùg Juliana. Den e buki aki tambe ta presentá e tragedia durante di e konstrukshon di brùg ku a tuma lugá hopi aña pasá. E akto seremonial a konta ku presensia di gezaghèber Lisa Dindial, diputado Marilyn Alcalá-Wallé, ademas di famia Josefa i invitadonan.
Gezaghèber na e okashon aki a duna di konosé, ku e ta sumamente kontentu ku e buki aki, pasobra pueblo di Kòrsou ta na kaminda pa un pais nobo, anto loke ta sumamente importante den esaki ta pa un hende konosé su historia. Konosé bo historia lo bo sa ken bo ta ademas di por definí unda ta bai. Pues e historia ku e buki aki ta trese ta sumamente interesante. Diputado enkargá ku Enseñansa Marilyn Alcalá-Wallé na su turno a bisa ku e buki ta importante pa futuro di Kòrsou.
Hóbennan i esnan di futuro por mira i haña sa kuantu esfuerso tabatin pa konektá Punda i Otrabanda. Pa esnan ku no ta gusta lesa, e buki ta kontené hopi ilustrashon ku ta hasi esaki mas fásil i dushi ainda pa lesa. Finalmente e outor Karel Josefa ta agregá, ku e buki ta spesial pa hóbennan sa di brùg i ta spera ku e buki lo por drenta siklo di enseñansa. <

WILLEMSTAD – RBTT Financial Holdings Limited a anunsiá ku su akshonistanan a vota na fabor di e propuesta di amalgashon di RBTT ku e supsidiario Karibense di Royal Bank of Canada (RBC) [RY na bolsa di TSX i NYSE]. A tuma e desishon ayera na un asamblea ekstraordinario di akshonista selebrá na Hilton Trinidad Conference Center.
A aprobá e resolushon di amalgashon ku mas di 98.18% di votonan di propietarionan di akshon ordinario, surpasando ampliamente e 75% rekerí pa e aprobashon.
Dia 2 di òktober 2007 RBTT i RBC a anunsiá un areglo pa atkisishon, di parti di RBC, di 100% di kapital di akshon di RBTT, na un preis di kompra di aproksimadamente TTD 13,8 bion (aproksimadamente USD 2,2 bion segun tasa di kambio di dia 28 di sèptèmber 2007).
Sr. Peter J. July, Presidente di Grupo di RBTT Financial Holdings Limited, a bisa: “Esaki ta un desishon históriko ku lo benefisiá tur ‘stakeholder’. RBTT lo kontinuá awor pa kumpli ku e rekisitonan regulatorio, pa sigurá ku nan lo por kulminá e transakshon akí den un tempu mas kòrtiku posibel”.
Despues di e amalgashon, RBTT Financial Holdings Limited i RBC Holdings (Trinidad & Tobago) Limited, un supsidiario di RBC, lo kontinuá komo propiedat kompleto i supsidiario indirekto di RBC.
Akshonistanan di RBTT lo risibí un kompensashon di aproksimadamente TTD 40 pa kada akshon (suheto na variashon bou di sierto sirkunstansia, manera stipulá den e RBTT “Directors’ Circular” ku ta disponibel riba www.rbtt.com), ku lo ta pagadero den un kombinashon di efektivo (aproksimadamente 60%) i akshon ordinario di RBC (aproksimadamente 40%).

WILLEMSTAD – “No ta momentu pa bai wak ken a faya i kiko a bai robes, pero mas bien mester ban wak kon ta hasi ku e mas di 1500 alumnonan ku ta meimei di problemátiko aki”, segun Bichi Justiana presidente di Sitek a deklará na LA PRENSA. Na promé lugá diputado Marelyn Alcalá-Wallé tin e kurashi di sali bisa, ku kosnan a bai malu den enseñansa di fundeshi, ya ku pa mas di 5 aña kaba Sitek ta bisando esaki na komunidat.
Segun Justiana, ta momentu pa ban buska e solushon pa e kantidat di alumnonan i tambe pa esnan ku a kaba e nivel aki. Tin ku por bisa ku e deklarashonnan hasí pa diputado Marelyn Alcalá-Wallé por ta personal, pero ta un bèrdat ku e sistema aki no a funshoná manera mester ta. Sitek a bin ta antisipá e diskushonnan riba e nivel aki, pero hustamente niun hende no a duna oido. Awor ku diputado mes a deklará, no mester ekskluí ku e mandatario aki tambe lo bai haña su mes den situashon ku e mester defendé su opinion. “Mirando e kantidat di mandatarionan ku tabata enkargá ku enseñansa ku ta eksponentenan di PAR lo por surgi problema na kaminda”, tabata pensamentu di Bicho Justiana.
Durante dékada, vários di e mandatarionan tabata di partido PAR i ku solamente ku Eduardo Cova pa un periodo ku tabata di PKLP. Mester mira si mandatario na nivel sentral tambe ta kompartí e mesun pensamentu aki. Otro miedu ku Sitek tin ta na momentu ku grupo 8 ku ta igual na klas 6 den sistema bieu ku lo hasi hende spanta pa e logronan. Tabata bon pa inovashon den enseñansa no solamente tabata bon riba papel, pero bon den e forma pa implementashon ku a kousa problema.

WILLEMSTAD- Otro siman e Komishon pa atendé e impakto di preis di produktonan petrolero lo entregá e pakete di alternativa na BC pa despues tuma e desishonnan korespondiente. Den un reunion ku lo tuma lugá djamars otro siman e komishon aki lo bolbe sinta huntu promé ku entregá e pakete di alternativa na BC. Den e reunion aki lo analisá e puntonan di prioridat i kiko ta e posibilidatnan.
Den kombersashon ku Sidney “Bicho” Justiana, miembro di e Komishon, el a splika LA PRENSA ku a palabrá, ku lo no divulgá e kontenido. E por bisa si ku e pakete lo bai kontené informashon riba kon lo atendé ku asuntu di preis i kòntròl di produkto. Mas aleu Justiana a splika, ku por spera otro problema na kaminda riba aparente spekulashonnan ku ta den aire.
E spekulashon riba skarsedat di produkto lo pone ku mester bai wak si esei ta realidat. Justiana ta bisa ku e deklarashonnan di Joel da Silva Gois (SUVECU) ku e siman aki a duna di konosé ku lo bai tin subida di preis 100%, no mester trese pániko den komunidat. Mester investigá e deklarashonnan di Da Silva Gois pa mira si nan ta kuadra ku bèrdat òf ku ta simplemente spekulashonnan. Na momentu ku tin e pakete ku Komishon lo entregá otro siman, lo tin diskushon riba e puntonan pa yega na konklushonnan konkreto pa loke ta trata desishonnan ku gobièrnu di Kòrsou lo tuma, asina Justiana a bisa.

WILLEMSTAD - Djarason 26 di mart, Stadion Ergilio Hato, kolmá ku un gran públiko, tur apoyando e selekshon nashonal di futbòl ku a respondé i duna nos un viktoria konvinsente riba Nicaragua, ta bai den istoria komo e fecha kaminda nos lo rekordá ku a dal e promé paso rumbo pa Mundial 2010.
Nederlands Antilliaanse Voetbal Unie (NAVU) ta felisitá pueblo ku e triunfo di nos selekshon nashonal di futbòl.
Stadion Ergilio Hato tabata esenario pa un momentu den istoria yená ku emoshon, orguyo i union.
Danki na e patrosinadònan mayó esta Fundashon Bon Intenshon, Ennia i Maduro & Curiel’s Bank, e sosten masal di pueblo i e prestashon sublime di nos selekshon nashonal di futbòl ku awe por mira bèk riba un gran momentu.
NAVU ke felisitá i gradisí un i tur pa e sosten i aporte.
Ku e triunfo riba Nicaragua, nos selekshon su bista awor ta fihá riba Haiti.
Miéntras ku ainda nos ta den euforia di e triunfo di djarason último preparashonnan ta kuminsá pa por ta kla ora nos mester subi tereno kontra di e onsena di Haiti.
E ekipo di Haiti no ta fásil, pero no imposibel.
Nos selekshon nashonal, bou di guia di e direktor tékniko sr. Leen Looyen, lo prepará su mes debidamente pa por kumpli ku e kompromiso ku nos selekshon tin ku komunidat.
E promé partido kontra Haiti lo tuma lugá medio yüni próksimo na Haiti, miéntras ku e partido di regreso, na Kòrsou den Stadion Ergilio Hato, lo tuma lugá un siman despues. NAVU ke pidi un i tur pa sigui sostené nos selekshon nashonal engrande a fin ku huntu nos por surpasá Haiti i pone nos mas serka ainda di Mundial 2010 na Sur Afrika.

WINDSTER
Ashanti A. (repentino)
A laga atras su mama Esmeralda Martines, tata Erquiles Windser, rumannan Monika, Nilo, Sharine, Magali, Suli, Alesander, Nana Windster, Junnie Pieternella, Ailina i Reimundo Windster, Ronaldo Erquiles Windster. Akto di entiero ta djamars 10or for di El Tributo pa santana Sta. Maria.

GONZALEZ
Royston Gregory
Mihó konosí komo Roychi
A laga atras su mama Selma Pietersz, yu Tiffany Gonzalez, rumannan Shannon Gonzalez, Tamara Gonzalez, Sakura gonzalez, Ivo Gonzalez i Nicole tur ku nan yunan. Akto di entiero ta tuma lugá na Sao Paoulo-Brazil.

NIVILLAC
Victorino theodulio
Mihó konosí komo Theo
A laga atras su kasá Irena Nivillac-Manuel, yunan Axel Valentyn, Germine Niessne-Nivillac, Edsel Nivillac, arthur Nivillac. Akto di entiero ta djaweps 3 di aprel 4or for di mis abrievengat pa santana Betania. Bishita 1or. Promé ku entiero tin un s.s. di misa 4or.

BULO
Frits August
Mihó konosí komo Frits sneiru di Fleur de Marie
A laga atras su kasá Maria Bulo-Bernabela, yunan Glenda Bulo i Kenneth Santiago, Anthony Bulo, Ludgarda Bulo, Elvis i Richel Bulo-Roemer, Albert i Claudette Bulo-Norton, Rudy i Dolores Bulo, Erwun Bulo, Carlos Nicolaas. Akto di entiero ta djamars 1 aprel for di El Señorial pa santana Ser’i Pietermaai. Bishita 9or.

KIMMENAEDE-IETSWAART
Chatariena (82 aña)
A laga atras su yunan Dennis i Altagracia van Kimmenaede-Ferero, Marjorie van Kimmenaede, Irving i Anette van Kimmenaede-Hart, Jeannine i Bruce Soemanta-van Kimmenaede, Kenneth i Claudia van Kimmenaede-Hernandez, Viveca i Frans Koopal-van Kimmenaede, Wilhelm i Hélene van Kimmenaede-Hernandez, Wilhelm i Hélene van Kimmenaede-tweeboom, Dwight i Meredith van Kimmenaede-Louisa, Sharine van Kimmenaede i Marco Mellema, Dashielle van Kimmenaede, Merle i John van Kampen-van Kimmenaede. Akto di entiero ta djaluna 31 di mart for di El Tributo pa santana Janwe. Bishita 9or-11or.

Lorito ta yama tur hende un felis djasabra. Awe si kosnan a kue nos duru tene. No tin moda di hasi. Tin biaha kosnan ta bai asina aki i mester atendé nan!
*********
Un biaha mas nos a keda sumamente impreshoná pa e saber di entomólogo Gisette Seferina. Banda di bon konosementu di su materia, e konosedó di insekto tin tambe un dominio impreshonante di papiamentu, loke ta algu ku semper nos ta apresiá di tur hende ku tin e abilidat aki i ku por sierto nos mester stimulá. Nos a siña masha tantu mes di loke sra. Seferina a presentá e siman aki. Bon mirá, sra. Seferina mester ta un orador na tur skol, pasobra nos ta imaginá nos, ku mucha lo tin gana di sa kiko un insekto ta i kiko e ta nifiká pa nos medio ambiente.
*********
Hopi hende ta konsiderá insektonan en general algu ku por kaba ku nan manera ta haña ta bon. Pero no mester lubidá, ku insektonan tambe tin nan lugá den nos medio ambiente. Sin insekto no tin por ehèmpel fruta i berdura. Tene bon kuenta ku esei! Un pabien na Gisette ku e bunita presentashon aki i nos ta spera ku otro medionan tambe lo invit’é pa e papia.
*********
Nos a tende hopi e siman aki di oumento di preis i nos ta ripití pa no laga niun hende gañabu. Hendenan ku mester sa mihó ta bisa, ku nan no sa si e informashon ta korekto si òf no. Awe den e mundu digitalisá ku nos ta biba, bo por haña e informashon tur kaminda. Nos ta sugerí bo pa bai riba Google i usa e palabranan Food Crisis. Bo ta haña sa mesora ku ki ta trata di un situashon hopi serio!

Oportunidat pa bai partisipá na kompetensia mundial na India:

WILLEMSTAD -- JCI Dutch Caribbean en koperashon ku Kámara di Komèrsio ta organisando un kompetensia pa e mihó plan di empresa. Pa di 3 biaha kaba e organisashon ku lasonan internashonal ta lansa e programa di ‘Best Business Plan’ kaminda miembro i no miembro por partisipá i gana premionan estimulante. Último fecha pa inskripshon lo ta dia 31 di mart, miéntras ku e fecha final pa entregá e plan lo ta dia 31 di mei. E final di kompetensia lo tuma lugá den luna di yüni. E ganadó ta haña e oportunidat pa partisipá den e kompetensia mundial di 4 pa 10 di novèmber na New Delhi, India.
JCI Dutch Caribbean ku ta afiliá na e organisashon internashonal Junior Chamber International, huntu ku Kámara di Komèrsio, ta lansa e kompetensia pa saka e mihó plan di negoshi den 2008. E kompetensia aki ta pa personanan di edatnan entre 18 pa 40 aña, ku tin ideanan faktibel i tin e kalidatnan, skills i motivashon pa lanta un propio negoshi.
Dor di partisipá na e kompetensia aki e futuro empresarionan hóben ta haña e oportunidat pa gana premionan riba nivel lokal. Spònsernan lo kontribuí na e proyekto aki. Banda di esaki e ganadó apsoluto lo haña e chèns di biaha pa New Delhi, India kaminda lo tin e final di e kompetensia riba nivel internashonal. E ganadó lo haña biahe, estadia i registrashon pa e kongreso mundial kompletamente grátis.

Seminario Fundashon Stanley Lamp – KPMG ta organisá seminario

WILLEMSTAD – “E impakto di e último desaroyonan finansiero international riba nos ekonomianan lokal” ta título di un seminario organisá pa.Fundashon Stanley Lamp i KMPG. Durante e seminario aki lo wòrdu elaborá riba e oportunidat, riesgo i menasanan ku e tempu finansiero turbulento aktual ta trese kuné. T’asina ku awor aki mundu internashonal finansiero ta pasando aktualmente den un tempu difísil. Esaki tin naturalmente influensia riba e ekonomia lokal di Antia Ulandes i Aruba.
Den e seminario aki e oradornan Ference Lamp, Roan Lamp, Emsley Tromp i Ralph Palm lo duna un análisis di e situashon internashonal finansiero for di diferente punto di bista. Pero nan presentashon lo no ta solamente un análisis: e oradornan lo trata tambe di trese posibel solushonnan. Despues di e charlanan lo sigui un diskushon kaminda presentenan den sala por hasi pregunta na un panel.
Ference Lamp ta Direktor Ehekutivo na Lehman Brothers na Amsterdam i London, Roan Lamp ta abogado na Brauw Blackstone Westbroek na Amsterdam, Emsley Tromp ta Presidente di Banko Sentral di Antia Ulandes i Ralph Palm ta Presidente di KPMG na Antia Ulandes i Aruba. Pa e seminario aki ta pidi un kontribushon di ANG. 175 pa persona i tur ingreso lo bai pa Fundashon Stanley Lamp i lo wòrdu usá pa metanan karitativo na Kòrsou.
Ference Lamp ta bisa lo siguiente tokante di kombinashon di algu bon i algu útil: