ORANJESTAD- PEDAGOGIA 2000 kier a recorda tur studiantenan cu e programa ‘GUIA DI ESTUDIO”, despues di un interupcion di dos siman, ta continua riba dialuna 31 di maart 2008.
Lugar: Colegio Arubano Playa – local TL7. Ora 4:00 – 6:00 pm.
Docente / Guia: drs. RUDOLF R. KELLY.
E di tres y ultimo trimester di scol a cuminsa y awor aki ta e momento pa traha hopi serio y duro pa e aña escolar aki bira un exito.
PEDAGOGIA 2000 ta ofrece e oportunidad, e espacio, e facilidad y e organisacion pa un studiante, den tur trankilidad, den un ambiente agradable y positivo y bao guia di un profesional, por cumpli cu tur su tareanan di scol. E tareanan di scol ta varia y ta encera entre otro: *traha huiswerk, *studia y prepara pa tur e formanan di un test (overhoring, proefwerk, C.P. of S.O. etc.), traha cu un lista di e fechanan cu tin test, *traha riba un projecto, *lesa buki, *haya ayudo y “overhoring” individual, *participa na training y haya tips “con pa studia” etc.
E programa “GUIA DI ESTUDIO” ta tuma lugar riba dialuna, diamars, diaranson y diahuebs.
Tin algun lugar habri ainda.
Mayornan, si bo ta haya cu bo yui mester di ayudo y sosten pa e bai over of slaag pa su examen, ya cu su rapport of S.O.-kaart no ta mucho bon, yama PEDAGOGIA 2000 y inscrib’e mas rapido cu ta posibel pa e participa na “GUIA DI ESTUDIO”.

ORANJESTAD - Segun ta ser bisa, muchanan Indigo ta pertenece na e generacion cu ta naciendo awendia y mayoria tin un edad di 8 aña of menos. Nan ta diferente. Nan tin caracteristicanan hopi unico cu ta pone nan apart di generacionnan ya existente.
Hopi biaha nan ta rebeldia contra autoridad, nan no ta conforma nan mes y nan ta extremadamente emocional, psichicamente sensitivo y fragil, cu un talento academico of metafisico enorme.
Tin hende ta haya cu ta trata aki di muchanan cu ta sufri di e diagnosis psychiatrico ADHD (Attention Deficit Hyperactive Disorder) of Attention Deficit Disorder (ADD), of OCD (Obsesive Compulsive Disorder) of te hasta autismo.
Mientras cu criticonan ta bisa cu no tin ningun prueba palpabel cu ta trata aki di muchanan special, e creencia New Age ta considera cu Buchanan Indigo lo ta esnan cu lo haci e diferencia na e mundo aki y cu un di nan metanan ta pa yuda hisa e frecuencia di nos planeta y di tur hende cu ta bibando riba dje, pa asina prepara pa aña 2012, e momento cu mundo lo conoce un aumento di su frecuencia.
- berdaderamente nos ta mirando evolucion humano den muchanan Indigo?
- nan ta mas sabi cu nos tabata tempo nos tabata nan edad?
- pakico ta diagnostica asina hopi di nan di tin Attention Deficit Hyperactive
Disorder?
- cua ta e cambionan cu nan kier trece y con nan kier logra esaki?
Abo kier sa mas, bo tin conocemento of experiencia cu e topico aki cu bo kier comparti, anto bo ta keda cordialmente invita pa scucha y participa den e programa Cosnan Straño, awe Dialuna 31 di maart cuminsando pa 8or di anochi, ora nos trata e topico: "Muchanan Indigo, creencia New Age of un berdadero cambio na caminda? Esaki atrabes di bo 99.9 Radio Galactica…Cosnan

ORANJESTAD– Tin un dicho na Papiamento cu ta bisa cu ‘macaco ta hunga cu su yiu te ora cu e basha su wowo afor’. Asina mester cataloga e actitud anti-turismo di e man yen di manifestantenan cu ta bolbe menaza di continua cu nan accionnan descabeya pa e siman aki. Ta parce cu e hendenan aki no tin un ‘flauw benul’ of no ta importa nan net nada di locual ta come y bebe den e mundo turistico. Alavez den nan ignorancia nan ta lubida completamente cu mas cu 75% di henter comunidad ta biba di e industria aki. E comportacion anti-turismo dilanti Aeropuerto dos siman pasa riba diasabra y e ceramento constante di e caminda dilanti Bestuurskantoor strobando tur trafico den vecindario y consecuentemente e fluho di turismo, ta demonstra con e hendenan aki ta hunga cu nan pan y kier pone pan di otro trahadornan den peliger.
Hecho ta cu nos isla ta sumamente vulnerable pa e desaroyo den sector di turismo ya cu nos tur mester por corda con serio Aruba a wordo afecta despues di e atake terorista na Merca dia 11 di September 2001. Tambe e caso di Natalee Holloway tabata tin su impacto negativo riba e fluho di turismo pa Aruba. Nos por a mira con turismo tanto na 2001 como 2005 a bin cabez abao y tur cos tabata mustra cu e caidanan aki lo tabata catastrofal pa Aruba.
Sinembargo Gabinete Oduber no a tira serbete den ring, pero a percura pa sigui stimula y promociona e turismo pa Aruba y ta cu orguyo nos por bisa cu aña 2007 a sera cu un crecemento den turismo ‘stay over’ di casi 9 %. Alavez Gobierno ta haciendo tur su esfuerzo pa percura pa e turismo crucero sigui crece y ultimo lunanan practicamente tur dia y en especial fin di siman un gran cantidad di crucero ta bishitando Aruba. Por ehempel diasabra 29 di maart un biaha mas tabata tin 4 crucero grandi mara den haf di Playa. Esakinan tabata e cruceronan Aida, Brilliance of the Seas, Empress y Crown Princess. Y e biaha aki te hasta un di cruceronan mester a mara te na e entrada parti patras di e edificio di Aruba Ports Authority, ya cu no tabata tin lugar pariba mas pa e crucero aki mara. E fotonan adhunto ta papia pa nan mes.

Pa garantizsa experiencia di usuario

ORANJESTAD- Denter di poco ta cuminsa cu e prome fase di mehoracion di calidad di beachnan di Aruba. Esaki ta encera cu na 3 beach lo cuminsa implementa principionan cual lo implementa na tur beach publico di Aruba riba termino largo (corda cu tur beach na Aruba ta publico). E trabounan ta encera cu na Arashi, Mangel Halto y Baby Beach, lo cuminsa cu trabounan pa 1) structura acceso y parkeo, 2) embeyecemento di paisahe natural, 3) instala mas facilidad pa publico.
E trabounan aki ta parti di un programa integral pa yega na un maneho di zonanan di costa. Pa esaki a inventarisa, discuti y diseña liñanan di maneho pa beach, costa y zonanan marino di Aruba, cual a envolvi hopi instancia tanto di sector priva como gubernamental. E pensamento di e mehoracionnan aki ta, pa segura uso di beach, costa y lama den cuadro di desaroyo sostenibel cu ta garantisa optimo uso riba termino largo poniendo un balansa entre desaroyo economico na un banda y proteccion di balornan natural y cultural na otro banda.
E principio cu tur beach ta publico ta encera cu uso di beach ta pa comunidad en general. Esaki ta trece cune e reto pa introduci cierto liñanan di maneho (richtlijnen) na cual un y tur por atene na nan. Pa tin beachnan natural cu un paisahe amplio cual por brinda usuarionan un experiencia di calidad, e prome fase aki ta dirigi pa pone den practica e ideanan con lo maneha esaki den futuro.
Pa medio di zonificacion, esta asigna zonanan specifico pa diferente tipo di uso (of prohibicion di uso) lo yega na beachnan mas ordena, miho organisa y cu ta ofrece un miho experiencia na tur usuario. Na yegada di cada beach usuarionan lo haya indicacion cu a drenta un area di balor halto cual ta resorta bou di maneho estricto. Ademas di indica e nomber di e beach lo tin tambe borchinan di informacion cu ta splica e regla y leinan viginte, como tambe cada balor natural of cultural specifico di cada beach. Na e beachnan aki, lugar pa core of parkeer y consecuentemente luganan cu no ta permiti core cu auto lo ta bon demarca. Tambe lo separa esakinan pa medio di muraya y/of barancanan pa entre otro no permiti vehiculo motorisa core mas riba santo blanco.

WILLEMSTAD – Tin dos kandidato interesá den e tereno kaminda e èks fábrika di serbes Amstel ta situá riba Rijkseenheid Boulevard. For di tempu ku e serbeseria a sera su portanan i e kompania a sigui fungi únikamente komo distribuidó, e tereno ta na benta. E kompanianan interesá den e tereno ta CURINDE NV i Aqualectra.
E kandidato mas serio na e momentunan akí ta Aqualectra. E kompania di utilidat tin un kantidat di alrededor di 500 empleado partí na 3 diferente sitio na Kòrsou. Na Rif tin e kantor prinsipal ku 100 i piku empleado. Na Mundu Nobo tambe tin 100 i piku empleado miéntras na Dokweg tin sigur 200 empleado. “Ora tin reunion ta masha korementu bai bin ta tuma lugá. Esun bia bo mester ta na Dokweg i e otro bia bo mester ta na Mundu Nobo. Tin bia sa sosodé ku bo ta kore bai te Nieuwehaven kaba ta na Mundu Nobo bo mester ta”, segun bosero di Aqualectra Sharo Bikker.
Bikker no por a bisa ku eksaktitut kon avansá e plannan ta ubiká tur empleado di Aqualectra den un edifisio nobo riba e tereno di Amstel. “Loke mi por bisa ta ku, tin plannan sigur pa nos pone tur nos empleadonan den un edifisio. Tambe ku nos ta pensá pa hasi esaki riba e tereno kaminda Amstel Brouwerij tabata. E plannan akí ta data di basta tempu kaba, pero debí ku otro plannan di invershon no a kana manera planeá, e proyekto pa muda pa e tereno di Amstel Brouwerij no a inisiá.”

CURINDE NV

E plannan pa amplia e zona komersial di CURINDE NV tambe t’ei ketu bai. CURINDE NV mes tabata kier a amplia nan tereno, hasiendo uso di e tereno ku ta situá banda di Zona Liber. Esaki sin embargo no a konkretisá. Entretantu ya ta basta tempu kaba ku tin kòmbersashonnan ta tumando lugá pa un otro sitio, segun e direktor Eric Smeulders. Manera LA PRENSA a publiká den su edishon di djaweps siman pasá, tin interes di diferente partido pa kumpra e tereno di Antilliaanse Brouwerij i CURINDE NV ta un di nan. Segun Smeulders, ta basta tempu pasá nan tabatin kòmbersashon ku e propietario di e tereno, kaminda Amstel ta situá. E interes pa e tereno ta debí na e intenshonnan pa amplia e zona komersial di CURINDE NV. “E interes pa e tereno i e sitio t’ei ainda, pero e ta ‘op een laag pitje’, Smeulders a bisa finalmente.

WILLEMSTAD – Korementu di outo duru a kousa dos morto den fin di siman. Malvel Kroonstadt (32) a muri ora e tabata krusando kaminda na Ser’i Dòmi, miéntras ku Rafaelito Martina a muri ora el a dal violentamente ku su outo den un palu di lus na altura di Tera Cora.
Tabata djasabra anochi 23.41, ora ku polis a risibí e notifikashon di un aksidente ku a tuma lugá riba Anna Altagracia de Lanooy Boulevard, na altura di Ser’i Dòmi. Un vehíkulo modèl SUV ku tabata koriendo ku velosidat haltu, a alkansá e víktima Kroonstadt na momentu ku e tabata krusando kaminda. Segun testigunan, e impakto tabata asina fuerte, ku e víktima a bai kai 50 meter mas leu for di e sitio kaminda e vehíkulo a alkans’é. E shofùr a lastra un brek basta largu promé ku el a alkansá e víktima mortalmente. E daño material na e vehíkulo ta indiká kon fuerte e impakto tabata, debí na e velosidat haltu ku e shofùr tabata manehando su vehíkulo.
E di dos aksidente fatal a tuma lugá djadumingu mainta 6.01 na altura di Tera Cora. E hóben Rafaelito Martina (26) tabata manehando su outo ku velosidat haltu, ora pa motibunan deskonosí el a pèrdè kòntròl i dal den un palu di lus. E impakto a bent’é for di su outo i el a bai kai kantu di kaminda. Despues di a dal den e palu di lus, e outo a dal den un kurá di kas di betòn i a keda kompletamente destruí. Korementu di outo duru sin bisti faha di seguridat sigur ta e kousanan di morto di Martina. Si e tabatin su faha di seguridat bistí, e lo no a bai resultá bentá kantu di kaminda, loke tambe indudablemente a kousa frakturanan grave ku a kondusí na su morto.

WILLEMSTAD – Mañan lo ta un gran dia pa Bolo di Batrei i esaki no ta un chiste di promé di aprel. Bolo di Batrei ta hospedá aktualmente na Archivo Nashonal di Antia. Mañan lo firma e kontrakt pa restorashon di e legendario monumento aki ku ta den kondishon pésimo. Awor aki ta palunan di stet ta wanta parti di e edifisio huntu pa e no kai den otro. Huntu ku e restorashon lo traha tambe un depósito nobo pa Archivo Nashonal di Antia. E pregunta ku ta surgi, ta kon bin ta bai finansiá un monumento pa un entidat antiano, siendo ku ta papiando di desmantelashon di Antia. Tur e puntonan aki lo bin na konsiderashon, ora firma e kontrakt mañan atardi den presensia di ministernan Roland Duncan i Ersilia de Lannooy. Plan D-2 di Dito Abad lo ta enkargá ku e proyekto. E pregunta grandi ta: lo mantené e koló bèrdè bunita? (foto LA PRENSA).

Skina di Sorti, awe djaluna 31 di mart di 2008, ta kuminsá ku deseá un i tur un bon dia. Na okashon di e sentenario di Doktor, Parlamento antiano, den kuadro di selebrashon di su di 14 lustro, tin un foro di debate rondó di algun ponensia remarkabel di dr Frumencio da Costa Gomez. Sentido komun ta dikta ku mester mira ponensianan di Doktor den kuadro di su vishon i konotashon emoshonal (“belevenis”) ku e kousa ku e tabata biba pe. Lo ta un falta grave di rèspèt pa e selebre hòmber aki, si diferente di su ponensia i ekspreshonnan, wòrdu usá pa sirbi kousanan personal ku ta karesé di e noblesa djesun ku Doktor a lucha pe.
****
E kousa di Doktor tabata unu universal (emansipashon), konsentrá pa su isla, pero hamas i nunka kontra ningun otro isla òf pais. Kualkier ku a surgi komo un estorbo a konta ku un Doktor, bon prepará, dokumentá, determiná i elokuente. Tabata un lucha ku hopi sakrifisio, ku a konta entre otro ku represaya (entre kual “verbanning”), pero ku finalmente a konta ku avanse signifikativo.
****
E pregunta klave ku mester wòrdu entretené, en bes di e fiamentu di ponensia, ekspreshon i lourelnan di Doktor, ta nos a hasi ku e herensia sosio polítiko di Doktor. Kiko a hasi ku e kandela pa emansipashon ku el a sende den e pueblo. Kiko a hasi ku e loyalidat na e kousa noble ku Doktor a inspirá serka su siguidónan. “Es ku tin un kousa ku pe ta mas grandi ku Kòrsou, por fabor no brinda ku nos” no a resultá den ningun deflaktor.

CARACAS, Venezuela, - Cuba, Merka i Venezuela ayera a risibí kondenanan pa violashonnan di libertat di prensa i informashon di parti di “Sociedad Interamericana de Prensa” (SIP) ku ta agrupá propietarionan di 2.000 korant di Amérika.
SIP a señalá den su relato interanual riba libertat di prensa i informashon “un deterioro di libertat di prensa i oumento di violensia kontra periodistanan na Amérika en general den último seis luna”, segun konklushonnan aprobá durante su reunion di mei aña.
E anfitrion, Venezuela, a risibí tres kondena ekspresá den e dokumento final di resolushonnan pa menasanan konstante kontra Prensa, radio i televishon, e no renobashon di konseshon di kanal di televishon RCTV i konfiskashon di su ekiponan, i “akoso” kontra medionan opositor.
Di su parti, Cuba a risibí un kondena di asamblea di SIP pa oumento di kòntròl gubernamental riba uso di Internet i opstakulisashon di akseso n’e ‘blogs’ realisá for di e isla.
E relato riba Cuba ta apuntá “ekspektativanan di kambio” generá pa renunsia komo Presidente di Fidel Castro na febrüari último, despues di 49 aña na poder, i e elekshon di su ruman hòmber Raúl Castro, pa remplas’é n’e kargo.
Pero na mesun momentu SIP ta enfatisá ku “transferensia di poder na Cuba, di Fidel Castro pa su ruman hòmber Raúl, no ta afektá situashon di 25 periodista ku ainda ta enkarselá na e pais aki.

WILLEMSTAD - E presidente di Eerste Kamer Yvonne Timmerman-Buck a bisa bon kla, ku dokumentonan a wòrdu formá den kual a yega na akuerdo ku St. Maarten i Kòrsou lo bira paisnan den Reino. “Tantu Ulanda komo Antia mester kumpli ku e akuerdonan aki,” segun Timmerman-Buck.
El a finalisá su biahe na Antia djasabra, ku un bishita na Saba i St. Eustatius. Su mensahe prinsipal una bes e yega Ulanda bèk ta, ku gobièrnu ulandes mester sostené e esfuersonan ku ta wòrdu hasí pa logra e fecha di 15 di desèmber, dia ku e kambionan konstitushonal mester tuma lugá.
Timmerman-Buck a bisa, ku tabata impreshonante pa wak e trabou positivo ku ta keda hasí pa finalisá e trabounan na tempu. Tambe el a tuma nota di vários preokupashon i puntonan problemátiko di e islanan.
Un di e problemanan ku e lo atendé ta e fecha di 15 di desèmber. “Mi ta na fabor pa e fecha di 15 di desèmber i lo mi keda na fabor tambe,” asina el a sigui bisa. El a referí tambe ku e islanan BES (Boneiru, St. Eustatius i Saba) tin mester di sosten di personal kualifiká pa hasi e trabounan nesesario.
“Ulanda no por bisa ku e fecha programá ta importante i ta nesesario pa mantené e ritmo den e proseso, miéntras ku e islanan no por logra e fecha.”
E presidente di Eerste Kamer Yvonne Timmerman-Buck ta kere, ku Gobièrnu Ulandes mester wak bon ta ken ta eksaktamente ta e faktor ku ta wantando e proseso. El a tuma nota di preokupashonnan ku Gobièrnu Sentral tin e tendensia di no ta aktuando ku firmesa den ehekushon di transferensha di material, personal, finansa i outoridat na Teritorionan Insular.

WILLEMSTAD - Ku Ton Wakelkamp lo a pone un torneo di veterano riba su nòmber no tabata un sorpresa mirando su weganan di delaster tempu tantu den veterano komo den A-klase kabayero.
Djaweps el a sali number un den su pul ora el a sorprendé Erwin Sophia ku e skor di 3-1.
Den e finalnan krusá e ta gana ku skore di 3-0 di Hubert Burleson, pero den semi final e mester a bringa duru pa kita Edith Mac Leod ku 3-2 for di su kurpa.
Na e otro banda e atakadó fuerte Peter Wong ta yega final sin muchu problema.
Sinembargo den e final Peter Wong mester a baha kabes pa Ton Wakelkamp ora ku e no por a pasa e balanan ku hopi backspin ku su atakenan sin spin.
Ton Wakelkamp ta gana ku e skornan 11-6, 11-6 i 11-6.
Den luna di aprel tin vários torneo. Esakinan ta:
18 aprel Torneo Hubenil
21 aprel Kopa Lulu Salas (damas)
22 aprel Kopa Oscar Salas (kabayero).
29 aprel Torneo di Veterano.

Un kuart di aña a pasa i ta notabel ku kisas muchu hende no ta komprondé kiko realmente ta pasando ku nos, sea ku nos ke òf no. Situashon mundial i di mes di nos tambe, ta birando malu.
Turesten tin hende lokal ku visibel òf nò, ta demostrá kon nan no ta gusta nan mes. Nan ta ekspresá i demostrá (ku grado di distinshon) anti-estranherismo sin niun sentido di patriotismo.
Si e estranhero ta bin di un área òf pais ku nos a lanta kere ku ta nan ta di respetá, anto ta baha kabes pa e estranhero; bende tur loke ta di nos kuné; asept’é komo superior den trabou i push’é den klase sosial haltu sin sa kua patu a brui e.
Si e ta bin di pais òf área ku nos a lanta ta kere ku ta hende kèns, bobo, sin sivilisashon tin einan; anto ta ku nos ignoransia ku no sa nada nada di otro kultura; ta papia kon ku ta ku i di dje i ta ninga na komprondé ku kisas ta e ta esun ku tantu nos tabata sinta warda pa realmente yuda nos pais.

Kombiná emoshonnan negativo ku nos mes ta kreando, ku e falta di konsiensia di kiko ta pasando i di no ke òf por mira ni skucha ku e aktual situashon ekonómiko di nos ta un realidat mundial. Emoshonnan negativo kontra di estranhero i kon desafortunadamente nos ta programá pa balotá i balorá otro hende.
E emoshon prinsipal ku mester tin kuidou kuné ta esun di rabia ku nos, kreativamente, ta skonde den ekspreshonnan di menospresio pa un i na mes momentu pa hasi otro mas ku e ta.

WILLEMSTAD – Minister Omayra Leeflang ta kompletamente di akuerdo ku deklarashonnan diputado Marilyn Alcala-Walle ku mester eliminá enseñansa di fundeshi pa e nivel VSBO. Den kòmbersashon ku minister Leeflang ta mustra ku tabata hustamente esaki ku e tabata ke pa tuma lugá basta dia, ya ku ámtenarnan a purba di pèrsistí un kos ku no tabata bai bon. Motibu ku no a skucha e profeshonalnan den enseñansa, a tuma desishonnan robes ku awe mester krea otro forma pa por sigui ku a trayektoria edukativo.
Minister Omayra Leeflang ta splika ku for di kuminsamentu ku ta papia di inovashon mester a keda adaptá, ya ku e forma ku esaki tabata bai no tabata e mihó resultadonan lográ. E meta di e profeshonalnan den e vèlt no tabata logra, asta ku a mustra ku si no skucha e maestronan den e trabou kosnan mas grave lo a tuma lugá. Ámtenarnan tabata deseá pa sigui pèrsistí pa sigui riba e rumbo, miéntras ku maestronan ta atvertí ku kos lo bai pega i a resultá ku a pega di bèrdat.
Minister Leeflang ta splika ku dianan 28 i 29 di febrüari a sinta ku representantenan di skol i a diskutí, lagando pa nan presentá ku nan lista di rekomendashon di kua preguntanan a bin dilanti. For di e lista aki a forma enkuesta ku sierto pregunta pa papia mas profundo riba e resultado pa evaluashon di e forma básiko di VSBO. For di e momentunan ei a primintí maestronan ku lo bai tuma akshon, ya ku semper a tende di otronan, nunka di e profeshonal pará dilanti di klas.

WILLEMSTAD - Piskadónan ta determiná ku un akshon stratégiko si resultá mañan Marina Real no konsedé nan un trato humano pa sigui gana nan pan di kada dia. Hustamente na momentu ku e reunion lo mester tuma lugá mañan mèrdia 2’or ta anunsiá ku entrenamentunan masha pisá ku tiroteonan ku lo tuma lugá pa un luna largu den awanan konosí di Wacawa i tambe Punta di Angua. Esaki a hasi ku piskadónan di tantu boto grandi komo chikitu ta bastante furioso, ya ku esaki ta nifiká pa un luna largu nan no por gana nan pan di kada dia.
E área ku piskadónan sa ta frekuentá pa buska nan pan di kada dia ta hustamente e áreanan ku Marina Real ta usa pa nan entrenamentunan. No solamente tabatin aksidentenan ku a tuma lugá, pero tambe e peliger ku entrenamentunan ta trese kuné den kua piskadónan ta keda vulnerabel pa e tipo di entrenamentunan aki.
Den un enkuentro ku a tuma lugá djasabra atardi na Playa di Westpunt piskadónan a bini huntu pa diskutí e último detayenan ku lo bai keda presentá djamars próksimo den e reunion ku komandante di Marina Real, pero den mesun rosea den un forma indigná piskadónan tabata sumamente furioso. Piskadónan a determiná i traha riba un plan di akshon stratégiko pa nan por haña oido den nan lucha pa sigui gana nan pan di kada dia, sin interupshon. E situashon aki ta birando mas kayente ainda, mirando ku mandatarionan ainda no a duna atenshon na e grupo aki.

WILLEMSTAD - Na vários okashon diputado di Enseñansa, Kultura i Deporte, sra. Marilyn Alcalá-Wallé a tuma nota, ku no ta eksistí serka nos pueblo un uniformidat ora ta tende òf kanta Himno di Kòrsou òf ora ta subi Bandera.
Segun sra. Alcalá-Wallé, ta hopi importante pa mustra pueblo e importansia pa brinda rèspèt na nos himno i bandera. Esaki ta yuda na fortalesé union serka nos siudadanonan i konstruí nos nashon.
Gobièrnu di Kòrsou pa medio di dekreto no. 53 di aña 2003 a pone reglanan pa tene kuenta kuné ora ta toka nos himno. Artíkulo 4 di e dekreto aki ta menshoná, ku mester tuma un posishon respetuoso, pero no ta spesifiká kiko esaki ta enserá.
Tumando nota di esaki Bestuurscollege a hasi e kambionan nesesario den e dekreto aki pa spesifiká kon e posishon menshoná mester ta.
Den reunion di Bestuurscollege dia 26 di mart último esaki a keda aprobá.
E teksto aprobá ta lo siguiente:
Durante presentashon di nos himno presentenan ta para den un posishon respetuoso ku nan brasanan di strèk kontra di nan kurpa, kaminda hende hòmber, ku eksepshon di esnan uniformá, ta deshasí nan mes di e kubri kabes i tene esaki den nan man drechi.
Pa por efektuá e kambio di lei konserní diputado di Enseñansa, Kultura i Deporte, sra. Marilyn Alcalá-Wallé lo hasi un rekorido na tur skolnan kaminda konhuntamente ku maestronan i muchanan lo bai kanta himno i hisa bandera den e posishon nobo ku a ser aprobá dor di Bestuurscollege.

WILLEMSTAD - Promé Konferensha tokante “Information Governance” presentá pa CARIFIG huntu ku “Information Managing Day” presentá pa ProDocIT. E dos organisashonnan aki a uni pa organisá dos dia di konferensha ku lo tuma lugá dianan 8 i 9 di mei próksimo den ouditorio di Banko Sentral di Antia.
E konferensha aki ta di sumo importansia pa mundu empresarial i gubermental, ku awor ta haña oportunidat pa sera konosí i haña mas informashon kon pa atendé ku e konsepto moderno di maneho di informashon, asina yamá “Information Governance”.
Informashon ta sentro di tur loke un organisashon ta hasi, manera; maneho stratégiko, investigashon i desaroyonan. Informashon mester ta kla, transparente i konfiabel. Informashon ta un rekurso ku mésun balor ku entre otro rekurso humano o rekurso finansiero. Informashon mester ta aksesibel i disponibel na tur momentu pa tur hende ku tin outorisashon na dje.
Kon e organisashon ta manehá e informashon i su dokumentunan por afektá hasta su abilidat pa kompetí, pa kumpli ku reglanan, pa rekuperá despues di un desaster, ku otro palabra, pa operá efektivamente. Kompanianan mundial ku a faya den nan maneho di informashon, manera p.e. Enron, Ahold, KPN Quest, Worldcom a mustra ku esaki por ta devastador. Kada kompania mester manehá su informashon segun un método disiplina pa minimalisá su riesgonan pa frakasá. E konferensha aki lo atendé tópikonan ku ta yuda pa haña i mantené kòntròl riba maneho di informashon.

HORTENCIA
Ismaël Marco
Mihó konosí komo Isma
A laga atras su kasá Judith Hortencia-Paula, yunan Heinrich i Fereal Hortencia, Judeska Hortencia, yunan di kriansa Jaïro i Jerzho Martha, Djureena i Djureeny Peternella, Zaid i Rannick Paula. Akto di entiero ta djarason 2 di aprel for di misa Sta. Famia pa santana
Roodeweg. Bishita 1or. Promé ku entiero tin un s.s. di misa 4or.

WINDSTER
Ashanti A. (repentino)
A laga atras su mama Esmeralda Martines, tata Erquiles Windser, rumannan Monika, Nilo, Sharine, Magali, Suli, Alesander, Nana Windster, Junnie Pieternella, Ailina i Reimundo Windster, Ronaldo Erquiles Windster. Akto di entiero ta djamars 10or for di El Tributo pa santana Sta. Maria.

GONZALEZ
Royston Gregory
Mihó konosí komo Roychi
A laga atras su mama Selma Pietersz, yu Tiffany Gonzalez, rumannan Shannon Gonzalez, Tamara Gonzalez, Sakura gonzalez, Ivo Gonzalez i Nicole tur ku nan yunan. Akto di entiero ta tuma lugá na Sao Paolo-Brazil.

NIVILLAC
Victorino theodulio
Mihó konosí komo Theo
A laga atras su kasá Irena Nivillac-Manuel, yunan Axel Valentyn, Germine Niessne-Nivillac, Edsel Nivillac, arthur Nivillac. Akto di entiero ta djaweps 3 di aprel 4or for di misa Brievengat pa santana Betania. Bishita 1or. Promé ku entiero tin un s.s. di misa 4or.

BULO
Frits August
Mihó konosí komo Frits sneiru di Fleur de Marie
A laga atras su kasá Maria Bulo-Bernabela, yunan Glenda Bulo i Kenneth Santiago, Anthony Bulo, Ludgarda Bulo, Elvis i Richel Bulo-Roemer, Albert i Claudette Bulo-Norton, Rudy i Dolores Bulo, Erwun Bulo, Carlos Nicolaas. Akto di entiero ta djamars 1 aprel for di El Señorial pa santana Ser’i Pietermaai. Bishita 9or.

WASHINGTON – Temporada nobo 2008 a kuminsá ayera den National Park, ku ta e parke nobo di e ekipo di Washington Nationals na Washington, D.C. ayera nochi.
Ryan Zimmerman a konektá un homerun ku dos out den di nobeno ining na man di e relevista di Braves Peter Moylan pa duna Nationals un viktoria di 3-2.
E picher habridó di Braves, Tim Hudson, a tira shete ining fuerte, pèrmitiendo dos kareda, tres hit den e promé ining i a retirá 19 bateadó konsekutivo pa terminá su aktuashon.
Odalis Perez a habri pa Nationals i tambe a tira bon, un kareda i kuater hit den sinku ining.
Tabatin un asistensia di 39.389 fanátiko den un wer basta friu.
Presidente George W. Bush a tira e promé bala.

Chelsea ta na punto pa kontratá un di tres futbolista di Ulanda di Hubenil. E klup londinese e biaha aki su wowo a bin kai riba Shayron Curiel. E atakante aki di Kòrsou aktualmente ta hunga den e ekipo amatùr Spartaan’20, pero ta miembro di e selekshon U-17.
Den luna di aprel awor Curiel lo bai Chelsea pa kore “stage”. Ku e selekshon U-17 e atakante a logra siman pasá klasifiká pa e kampionato europeo.
Den Chelsea tambe tin aktualmente den Hubenil Jeffrey Bruma, (Feyenoord) i Patrick van Aanholt (PSV).