ORANJESTAD- Museo Historico den Fort Zoutman ta tene un ciclo di charlanan cu enfasis riba historia di Aruba y lo cuminsa cu drs Raymundo Dijkhoff como e prome orador di e ciclo aki.
Diahuebs awor, dia 6 di maart, cuminsando pa 8.00 or di anochi.
E topico di e prome charla ta: "Aruba den tempo ceramico y preceramico".
drs Raymundo Dijkhoff ta un conocido archeologo di Museo Archeologico cu tin un facilidad pa splica partinan menos conoci y menos popular den historia y desaroyo di nos pais. E charla ta worde acompanya pa un powerpoint presentation, ya asina ta illustra locual ta worde papia y splica.
Raymundo Dijkhoff tin diferente publicacion haci riba tereno di archeologia , muy en especial estudionan y research tocante archeologia di Aruba.

Comision Celebracion Dianan Nacional ta recorda comunidad:

ORANJESTAD- Comision Celebracion Dianan Nacional (CCDN) a ripara cu e expectativanan den comunidad Arubano relaciona cu nos Dia Nacional ta hopi halto y cu e animo y entusiasmo a cuminsa drenta caba den nos hendenan pa cu e celebracion aki. Especialmente e defile di tur aña di e gruponan uniforma riba tereno social, cultural y deportivo ta mustra di lo kibra tur record. Manera anuncia anteriormente, e ultimo dia di inscripcion pa cu e defile lo ta diabierna awor dia 7 di Maart 2008.
E formulario pa inscripcion di e gruponan uniforma ta obtenibel ainda na Ministerio di Labor, Cultura y Deporte, Wilhelminastraat 6 (pabao di Stadhuis).
Alavez CCDN ta recorda tur organisacion cultural, social y deportivo cu tur aña ta organisa actividadnan den bario y cu ta desea pa bin na remarke pa un contribucion financiero pa haci nan peticion no mas tarda cu dialuna 10 di maart 2008 serca e Presidente di CCDN sr. Frank Croes, Wilhelminastraat 6.
CCDN ta spera cu un y tur lo tuma bon nota di e dos fechanan aki y ta avisa cu lo NO tin ningun excepcion si dado caso toch tin grupo- y organisacion (nan) cu kier inscribi pa e defile y haci peticion pa contribucion financiero despues di e fechanan menciona.

ORANJESTAD- Recientemente Albertico Quandus a cumpli 30 aña den servicio di telecomunicacion y a tene un brindis den Kantina di Buitendienst na unda famia y coleganan cu a traha cu ne antes y awor tabata presente. Nan a elogia su dedicacion na su trabou y SETAR. STT den representacion di Richard Kelly a dune un homenage special como un representante di STT cu semper a demosta curashi pa bringa pa SETAR. Albertico Quandus ta trahando actualmente den e departamento di MTX & Verdelers na SETAR.
Quandus a cuminsa traha dia 14 februari 1978, na telefoondienst como leerling in losse dienst.
Durante e 30 añanan di servicio, Albertico a ocupa varios posicion den nos compania, cu awor ta SETAR N.V., di e siguiente manera: dia 25 di december 1979 el a worde nombra como Telefoonmonteur B den losse dienst, dia 11 di januari 1983 el a wordo promovi pa Telefoonmonteur A den losse dienst, dia 2 di februari na 1988 el a wordo nombra Onderopzichter 1ste klasse den vaste dienst, dia 1 di augustus 1994 el a wordo nombra Monteur 1ste klasse y dia 1 di augustus 1999 el a worde promovi pa Technisch Opzichter 1ste klasse.
Dia 1 di juli 2003 Albertico a bai over cu e compania SETAR N.V. den posicion di Groepsleider Verdelers den e departamento di MTX & Verdelers . “Dia mi cuminsa traha nobo nobo, mi trabou tabata ensera pa mantene e zoekernan di e centralnan di e tempo ei limpi. Aki nos ta papiando di Analoog Centrales.”, asina Quandus a bisa.
Un aspecto cu Quandus ta haya diferente awendia compara cu prome ta cu antes bo por a wak cu e central analog con tur e sistema tabata traha y con e ta core. E tabata habri, pero awor cu computer bo no ta wak esaki mas.

Minister Marisol Lopez-Tromp ta reacciona:

ORANJESTAD – Un comunicado di prensa di oficina di Minister Marisol Lopez-Tromp, ta mustra cu e departamento a haya diferente yamada di hendenan cu ta averigua kico a pasa den e caso di e mama cu su yiu tabata perdi na Inglatera. Esaki ta e motibo tambe pa nos oficina splika en extenso kico a pasa.
Pa di tantisimo biaha matutino Diario ta malinforma pueblo y ta lanta calumnia riba Minister Marisol Lopez-Tromp. Den e edicion di diasabra 1 di maart 2008 tanto Diario como Jenny Cratz ta gaña cu mama di e yiu perdi a acudi na despacho di minister Marisol Lopez-Tromp pa ayudo. Ningun momento e mama di e yiu perdi a acudi na oficina di Minister Marisol Lopez-Tromp pa yudansa.
Loke a pasa ta cu ruman muher di e mama a yama e telefonista di nos Ministerio y a bisa cu su sobrina ta perdi na Inglatera y el a puntra kico e mester haci. E telefonista a dune informacion pa acudi na oficina di Relacionnan Exterior, pasobra nan tin contacto cu embahadanan rind di mundo y einan por averigua un cu e otro p’e na Inglatera. E telefonista a duna informacion corecto.
Oficina di Minister Marisol Lopez-Tromp su portanan ta habri pa duna ayudo te unda cu lei ta permito na henter pueblo sin importa status social, rasa of credo. Si acaso e ayudo concerni ta trta un otro departamento ta haci referencia na e esakia di biaha.
Ta tristo cu Diario ta haci abuso di su poder di prensa pa malinforma nos pueblo cu e solo fin di insulta y caba cu popularidad di nos mandatarionan. Ministerio di Enseñansa, Asunto Social y Infrastructura kier recorda Diario cu e tipo di abuso aki cu yama difamacion ta castigabel pa nos leinan y tambe contra di nos sistema di democracia. Pues, Diario y Jenny Cratz cu e comunicado aki ta alerta cu difamacion ta castigabel pa lei.

WILLEMSTAD – Fayonan médiko ta kousa morto di entre 8 pa 10 pashènt tur aña den hòspitalnan na Kòrsou. Ora e kaso ta serio antó famianan mes no entregá un keho, Inspekshon pa Salú mes ta entregá un keho. Esaki ta loke dr. Theo Braeke, hefe di Inspekshon pa Salú a bisa LA PRENSA.
Dr. Braeke a splika, ku na Kòrsou tin e komishon ‘Fona’ ku ta atendé ku investigashonnan ora un pashènt entregá un keho. “Na promé lugá tur hòspital mester tin nan mes komishon ku ta hasi investigashon. Si un pashènt ke entregá un keho antó e hòspital no tin un komishon ku ta investigá, e pashènt por entregá e keho serka e gerensia di e hòspital. Sin embargo tur hòspital mester tin un komishon independiente pa atendé un keho.”
Pa loke ta trata e kehonan, dr. Braeke a splika ku e ta kalkulá, ku anualmente tin un kantidat di 35 keho ku ta yega Inspekshon di Salú. Banda di e kehonan akí tin loke el a yama ‘melding’ nan ku e hòspitalnan mes ta atendé. “E kehonan por ta pa e trato ku e pashènt a risibí di médikonan i ku el a eksperensiá komo inhustu, mal trato dor di bruder òf zùster i tratamentunan ku no a finalisá eksitosamente i di kua e pashènt tin e sospecho ku algu a bai malu.” Mas aleu dr. Braeke a splika, ku ora un keho yega serka nan i nan ta kere ku un fayo a tuma lugá, nan ta konsehá e persona ku a bin ku e keho pa entregá e keho na ‘Medisch Tuchtcollege’. “Si nos haña ku e keho ta serio sufisiente, pero tòg e famianan no a tuma niun paso nan mes, Inspekshon pa Salú mes ta entregá e keho e ora ei. Pero mester tin un situashon ku por konsiderá komo ‘ernstig verwijtbaar’.”

BOGOTA – E fanátikonan di Santa Fe kende ta bai tribuna popular di e stadion lokal lo tin ku paga e dañonan ku miembronan di e barranan brava a kousa na un misa i otro lugánan.
E desishon a bini di e presidente di e “Expresso Rojo” Armando Farfán i el a ofresé diskulpa pa loke a pasa djaweps den kuadro di selebrashon di 67 aña di e ekipo.
Peleanan entre e baranan a kuminsá riba e plenchi di Colegio Mayor de Nuestra Señora del Rosario (den sentro di siudat), a sigui durante e subimentu di e seru di Monserrate, na e iglesia di Señor Caído (di Monserrate) durante e misa i ora di bai bèk.
E fanátiko Cristian Camilo Rodriguez di 19 aña a resultá heridá den su plant’i man drechi, pero e no a laga kose esaki, asina Hospital Santa Clara a indiká.
“E korporashon (Santa Fe) lo respondé, na komienso kanselando tur e dañonan, pero esei e fanátikonan mes lo paga pasobra nos no ta bai spònser e ko’i sinbèrgwensa ei, e plaka ei nos ta haña ku oumento di e balor di benta di karchi na e tribuna sùit den e wega kontra Once Caldas i si e no yega ku esei nos lo hasié tambe den e wega kontra Millonarios”, Farfán a bisa.
E murayanan dje misa a ser pintá, e altar a sufri daño i e sektor di konfesá i bankinan a ser destruí, akshon ku a ser atribuí pa polis na muchanan entre 13 i 14 aña. Tambe nan a pinta riba e murayanan di e Quinta de Bolívar.

BERLIN – E peruano Pablo Guerrero a hinka dos dje golnan ku kua Hamburgo a vense Eintracht Francfort djadumingu 4-1 i asina drenta e lucha pa e título di Bundesliga.
Tur dos gol di Guerrero na di 5 i 79 minüt, a konta ku koperashon di e kiper Oka Nikolov den un wega riba kancha di Hamburgo bou di fuerte bientu i awa.
Nikolov a slep ora Guerrero a kòp pa su promé gol i despues e no por a tene un tiru di Rafael van der Vaart, lagando e bala na boluntat di e delantero peruano pa su di dos gol.Nigel de Jong i Mohamed Zidan a hinka e otronan, miéntras ku Sotirios Kirhiakos a deskontá pa Francfort.
E viktoria a permití Hamburgo pone su mes di tres riba kuenta d Bayer Leverkusen, ku a pèrdè 2-0 kontra Bochum.
Bayern Munich, ku djasabra a gana Schalke 1-0, ta lider ku 47 punto. Werder Bremen ta di ds ku 43, siguí pa Hamburgo ku 41 i Leverkusen 38.
Den otro weganan: Hertha Berlin-Duisburgo 2-0; Hannover-Nuremberg 2-1; Werder Bremen-Borussia Dortmund 2-0; Hansa Rostock-Arminia Bielefeld 1-1 i Karlsruher-Wolfsburgo 3-1.

WILLEMSTAD – Miéntras ku na Kòrsou mes ta diskutiendo mil i un kos ku na opinion di esun pa e otro no ta bayendo bon, mundu a deskubrí ku aki tin un tesoro real. E revista prominente riba tereno di buseo Scuba Diving a dediká espasio amplio na e oportunidatnan di buseo di Kòrsou den su edishon di e luna aki. “Curaçao: An underwater treasure trove of marine life awaits divers on the healthy reefs of this Netherlands Antilles Island”. E revista ta pidi su lesadónan pa “discover a treasure trove of colorful macro life in Curaçao’s mini splendored things”. E artíkulo ta kompañá pa diferente pòrtrèt bou di awa, tambe unu di Karnaval i un eskultura di Benin na Museo Kurá Ulanda. Kiko mas nos ke anto? (Foto: kortesia Scuba Diving – March 2008 edition)

Skina di Sorti, awe djamars 4 di mart di 2008, ta kuminsá ku deseá un i tur un bon dia. Pa buena marcha ta bon pa mi aklará algun kos. Komo kolumnista, bo ta manera un portal (“uithangbord”) di un korant. E lektor ta identifiká e kolumna ku sierto spesialidat. Na final di kada Skina di Sorti mi ta skirbi ku e meta di e kolumna ta di fomentá un desaroyo di pensamentu krítiko den komunidat i komo tal nos no ta pro ni kontra persona. Pues pasobra den Skina di Sorti tin opservashon krítiko, no mester saka e konklushon ku nos ta sostené òf desaprobá un persona, instansia òf organisashon.
****
Ku PAR ta karga signatura di koalishon i PNP-PAR ta e as dje koalishon, ta trese kuné ku opservashonnan krítiko riba gobernashon ta toka nan. Esei sinembargo no ta nifiká ku PAR-PNP ta un as inferior pa forma un koalishon ku otro posibel kombinashon di partido. Te awor aki, e kombinashon PAR-PNP ta keda e mihó alternativa, pasobra kontrinkantenan no ta profilá un direkshon di gobernashon alternativo.
****
Es ku no duna indikashon di kiko ta e ophetivonan ku e ta duna komo prioridat, kon e ta bai utilisá e rekursonan ku ta na disposishon i den kuantu tempu e ta pensa di realisá e ophetivonan proyektá, no ta alternativa pa esnan ku sí ta den un direkshon (irespekto kiko bo ta pensa di e direkshon skohé).
****
Ku pais ta keda drai den rònchi sin ningun kambio real den asuntunan ku a bini ta representá un problema, ta pasobra no tin alternativa den direkshon ku ta wòrdu brindá. Meramente por papia di un eskoho den ehekushon i pretenshon di mihó ehekushon di e mesun kos. Presupuestonan ku kambio di konstelashon polítiko no ta mustra ningun kambio signifikativo. Ta meramente ahustenan.

JERUSALEM, - Sekretaria di Estado di Merka Condoleezza Rice, awe a yega Israel enbuska di salba akuerdonan di pas di Konferensia di Annapolis na novèmber último entre palestinonan i israelínan, p’e ola nobo di violensia.
Rice a yega aeropuerto di Tel Aviv, prosedente di Cairo, kaminda el a reuní ku Presidente di Egipto Hosni Mubarak, i a urgí Gobièrnu di Israel i teritorionan palestino pa pone fin n’e violensia i reanudá negosiashonnan di pas.
Apesar ku e bishita tabata planiá promé ku e kombatenan di aviashon israelí kontra Fraña di Gaza di siman pasá, awor Rice ta buskando pa konvensé Gobièrnu palestino pa reanudá diálogo.
Presidente di Outoridat Nashonal Palestina, Mahmoud Abbas, djadumingu último a konfirmá kiebro di su negosiashonnan di pas ku Israel, p’e atakenan na Gaza, ku a kousa 120 morto.
Di akuerdo ku agènda ofisial di su bishita, Rice inmediatamente lo bai siudat di Ramallah pa kòmbersá ku Abbas i Promé Minister Salam Fayyad. Despues Rice lo regresá Israel pa akudí na sena ku Promé Minister israelí Ehud Olmert ta ofresé, durante kua Rice lo inform’é di su kòmbersashonnan ku Presidente palestino.

Foto: Condoleezza Rice 0403

Sekretaria di Estado di Merka, Condoleezza Rice, ta yega siudat di Ramallah awe.

COLOMBIA, - Luis Eladio Pérez i Gloria Polanco, eks kongresistanan librá siman pasá pa FARC i entregá den selvanan colombiano di departamento di Guaviare na un komishon humanitario enkabesá pa Minister di Interior di Venezuela, Ramón Rodríguez, a regresá Colombia huntu ku dama senador colombiano Piedad Córdoba i Yolanda Pulecio, mama di e ainda sekuestrá eks kandidata presidensial colombiano franses Ingrid Betancourt, debí n’e krísis diplomátiko entre nan pais i Venezuela, pa motibu di guerieronan morto di FARC, den man di Ehérsito colombiano na frontera di Ecuador.
Nan ta lamentá loke ta pasando, i nan a bisa ku nan lo pidi kongresistanan di Colombia pa reuní ku esnan di Venezuela den búskeda di un klima di akuerdo i di pas ku ta benefisiá ámbos nashon.
No opstante Pérez a bisa ku ámbos pais “mester buska akuerdo diplomátiko, no guerero”.
P’esei el a manifestá dilanti medionan di komunikashon “ku mester ta kreativo i buska solushonnan diferente”.
Pérez a indiká ku nan a bai Colombia pero nan ta regresá Venezuela pa kontinuá nan biahe pa Cuba, “kaminda mi persona, Gloria Polanco i Jorge Eduardo Géchem lo risibí tratamentu médiko”.
Na Cuba nan lo spera haña señal di Gobièrnu di Fransia pa bai Paris i papia ku Presidente Nicolas Sarkozy riba pas di Colombia i suerte di 40 persona ainda sekuestrá.

WASHINGTON, - Ku avanse den mayoria enkuesta, ayera pa promé bia a pone Barack Obama, di 46 aña, na kabes di e enkuestanan na Ohio, mientras base di su apoyo na Texas tabata lucha pa trata kibra e empate tékniko ku ta antisipá un kontienda pèrtá den e elekshonnan primario awe na e estado fronteriso desisivo ku Mexico.
Segun e último sondeo realisá pa Zogby International, Obama a revertí tendensia di e apoyonan na Ohio, kaminda awe e lo superá Clinton pa un márgen di 47% kontra 45%, miéntras na Texas e senador pa Illinois ta mantené un márgen di 3 punto di bentaha (47% kontra 44%).
“Tur kos parse ta indiká ku lo no bai tin regreso pa Hillary Clinton”, David Ploufee a konsiderá, kende ta direktor di kampaña di Barack Obama, ora el a deskartá un viktoria pa márgen amplio di Clinton na Texas i Ohio.
E sombra di e empate tékniko na Texas (sùit), Ohio (nort), Vermont i Rhode Island (nortost), kaminda awe lo bai tin 444 delegado den wega, ta alehá e posibilidat di un viktoria inapelabel pa Hillary.
Ku e enkuestanan kontra kampaña di Clinton, pa tur medio tabata trata revertí e tendensianan ku awe ta varia entre su derota i un viktoria mínimo na Texas i Ohio.
Futuro di e kandidata presidensial Hillary Clinton, di 60 aña, ta dependé di e votantenan di Ohio i Texas, kendenan awe ta akudí na urnanan den e lucha mas difísil di e dama aspirante demókrata kontra su rival Barack Obama.

WILLEMSTAD - “Muhénan Balente”, esaki ta nòmber di e anochi ku Iglesia House of Worship ta organisá djasabra awor, 8 di mart, den kuadro di “dia internashonal di hende muhé”. E anochi aki ta pa tur hende muhé, sin importá rasa, kredo i/o posishon sosial, paso tur ta importante i indispensabel pa nos komunidat.
Durante e anochi aki Pastor Arlette Juliet di Iglesia House of Worship lo hiba palabra.
Meta di e anochi aki ta pa duna rekonosementu na nos hende muhénan i tambe enkurashá, fortalesé i bendishoná nan pa asina nan por sigui enfrentá nan posishon/situashon ku mas kurashi, goso i balentia.
Si bo ke ta parti di e anochi spesial aki aseptá e komunikado aki komo un kordial invitashon personal.
E aktividat lo tuma lugá: djasabra awor, 8 di mart, di: 19.30 - 21.30 or na Iglesia House of Worship, na Erosweg 52. E anochi ta grátis.
Pa mas informashon por yama: 737-2716.

WILLEMSTAD - Iglesia di Dios Mission Board lo ta anfitrion di e Kongreso Karibe Hispano organisá pa International Church of God. Church of God ta un di e institushonnan pentekostes pionero den mundu ku ta situá den 166 diferente pais ku 27.150 iglesia rònt mundu, 66671 mishon i 31.636 ministro. Huntu ku esaki tin 106 skol di entrenamentu i 30.130 studiante den diferente nivel.
Tur aña e departamentu di Karibe hispano ta organisá un konferensha internashonal di e region Karibe Hispano. E aña aki pa boluntat di Dios e isla di Kòrsou a wòrdu skohé pa organisá e konferensha internashonal aki, ku lo ta un bendishon pa e isla aki i tur sobrá den Karibe. Pa e evento aki por spera alrededor di 300 partisipante ku lo bini di entre otro Merka, Venezuela, Puerto Rico, Antigua, Colombia, Repúblika Dominikana i otronan. Tambe lo por konta ku partisipashon di supervisor general Dennis Mc Guirre, direktor di Misionnan mundial Roland Vaughan, e representante di region Fedlyn Beason i otro lidernan.
E konferensha lo tuma lugá dianan 3, 4 i 5 di aprel 2008 i tin komo tema sentral “Spiritu Santu”. Durante e 3 dianan aki lo tin tayernan parti mainta i konferensha anochi. E tayernan lo bai tuma lugá den e sala di konferensha di Hotel Breezes i e konferensha plenario anochi lo bai tuma lugá na Iglesia House of Worship. Pa partisipá na e tayernan ta pidi un kontribushon di fl. 27,- i mester registrá via di e wepsait www.congresocaribehispano 2008.org.
Riba djasabra 5 di aprel lo tin tambe un konsierto hubenil na Brionplein ku bandanan lokal i Nancy Amancio komo artista invitá. Iglesia di Dios Mission Board ku pastornan Andres i Iris Ovalles a trese dilanti pa henter pueblo di Kòrsou pa sea anfitrion huntu ku nan i risibí 3 mas di 300 bishitantenan ku lo partisipá na e kongreso Karibe hispano aki. Personanan di kontakto ta Kenia Fullinck na 522-2076 i Elica Ras na 520-8540.

WILLEMSTAD – Por spera un buèlta nobo pa e proyekto di Wechi, ya ku por presentá un ‘claim’ den último ora ku lo por para e trabounan pa konstrukshon di 2500 kas di pueblo. Siman pasá, direktor di Fundashon Kas Popular den presensia di diputado Anthony Godett a anunsiá proyektonan di konstrukshon di kas, den kua a menshoná e konstrukshon di kasnan riba e tereno di Wechi. LA PRENSA sa kuantu lucha i ku hasta kasonan den korte, tantu na Kòrsou komo den kasashon na Ulanda, den kua famia Ferrero a buska nan derechi for di famia Pietersz pa terenonan di Gato/Malpais.
Dokumentunan ta proba ku e tereno di Wechi tambe ta unu ku ta mará na Gato, ya ku ta e kaminda ta separá e dos áreanan aki for di otro. Tempu ku Fundashon Kas Popular (FKP) a bai pa kumpra e tereno di Wechi, a laga notario Marcel van der Plank hasi e trabou di investigashon riba e tereno aki. For di e investigashon aki no tin informashonnan konkreto, pero si dokumentunan ta proba ku e dos áreanan aki ta pertenesé na otro.
Tabata mesun katibunan ku tabata traha riba Plantage di Gato, tabata traha den krio di bestia riba e tereno di Wechi. E persona ku a hunga un ròl den e henter e asuntu aki tabata un tal Richard Zoon, ku e tempu ei tabata fungi komo ‘Rooimeester” ku a kita biennan/propiedat for di katibunan. E katibunan di Gato/Malpais tin mesun derechi di e tereno di Wechi i ku hamas FKP a kumpra e tereno aki serka e doñonan legítimo.
E dokumentunan di kompra den kua FKP, e tempu ei direktor Herman George a firma ta bin dilanti ku “Weitje, voorheen genaamd Klein Malpais, met privilegien van schapen- en geitenkoralen, gelegen alhier in het beneden Kwartier bezuiden de plantagie van de Heren Jacob en Abraham Naar, liggende rondom in zijne eigen trankeren, met een vrije weg langs beoosten de westtrankeer en ook dat de Landsgeut die benoorden den gemeenten weg ligt, buiten blijven moet, benevens nog een canoekje of stuk gronds genaamd Rustplaast, gelegen tusschen Groot Piscaderes en de genoemde plantagie Klein Malpais, liggende rondom in zijne eigen trankeeren, met een vrije patrouilleweg benevens een stuk gronds zijnde getaxteerd waarvan jaarlijks aan den Lande de gerechtigheid van zes pesos van achten en zes realen moet worden betaald”.

WINDSTER
Humphrey Poliento (repentino 58 aña)
Mihó konosí komo Django di taksi 173
A laga atras su yunan Alice van Eer, Michael Windster i Jeanette Heyliger, Rachita Windster i Jurich Campagnard, yunan di kriansa Stanley i Gregory Melendez. Akto di entiero ta djaweps 6 di mart for di El Señorial i despues pa santana Sta. Rosa. Bishita 1or. Promé ku entiero tin un s.s. di misa na misa Sta. Rosa. Trahe alegre.

MARIA
George Anthony (repentino 44 aña)
Mihó konosí komo Palang òf Jack Palance
A laga atras su mama Judith Maria, tata Franklin Schoop i yunan, rumannan Bea i Errol Kirindongo, Sharine Maria i Frans Petrochi, Clavio, Sevenne, Tony Maria, Unice Elisabeth, Etty Martina, Noraima Martina. Akto di entiero ta djabièrnè 7 di mart for di el consolador pa santana Roodeweg. Bishita 1or. Promé ku entiero tin un respòns 3.30or na El Consolador.

ALBERTUS
Claudia Marcelo Bernadica
A laga atras su yunan Cornelia i Juan Martina, Gloria i Elvio Martes, Maria i Rutilio Fullinck, yunan di kriansa Frida Lukas, Meredith Gijsbertha, Jessica Lukas. Akto di entiero ta djarason 5 di mart for di misa Sta. Rosa pa santana Sta. Rosa. Bishita 1or. Promé ku entiero tin un s.s. di misa 4or.

MULLER-ROSALIA
Catharina
Mihó konosí komo Pòpi
A laga atras su mama Ina Rosalia-Pieters, kasá Fredo Muller, yunan Alfredo i Netty Muller-Francisca, Odiska Muller, rumannan Ibi Rosalia, Luisa i Jnchi Bodak-Rosalia, Rene i Maureen Rosalia-Lourens, Greta i Sigfried Cleofa-Rosalia, Hytel i Altagracia Rosalia-Martus. Akto di entiero ta djarason 5 di mart. Bishita 1or na misa Janwe. Promé ku entiero tin un s.s. di misa 3.30or i despues pa santana Janwe.

MADURO
Urly Rudsel Apostel (trágiko)
A laga atras su mama Serapia Pieter, tata Sho Ma Maduro, rumannan Meredith, Ruthline, Relon, Naishel Pieter, Geraldine Martina, Wensley, Carla, Julian, Nanouk Maduro, Lucrecia Thomasa, Zenaida Thomasa. Akto di entiero ta djaweps 6 di mart for di El Consolador pa santana Sta. Maria. Bishita 1or. Promé ku entiero tin un respòns 3.30or na El Consolador. Trahe alegre.

ESPACIA
Eduard Jenaro
Mihó konosí komo Eddy
A laga atras su kasá Editha Espacia-Lacroes, yunan Gilbert i Melinda Espacia, Sharine i August de la Court-Espacia, Enid Espacia, Myriën Espacia i Julio Helburg, Eduard Espacia, René Espacia, Mitchell i Seujen Espacia-Martina. Akto di entiero ta djamars 4 mart for di misa Coromoto pa santana Betania. Bishita 1or. Promé ku entiero tin un s.s. di misa.

ETTIENNE
Alma Teresita
A laga atras su yunan Anthonie Ettienne, Angeline Ettienne i Bahram Djafari, Curtis Ettienne i Magalie Martines, Gilien Ettienne i Rubia Caupain. Akto di entiero ta djarason 5 di mart 9or-11or for di El Señorial pa santana Memorial Park. Promé ku entiero tin un seremonia na El Señorial.

DA SILVA
George Facunda (repentino)
Mihó konosí komo Bross
A laga atras su yunan Jorge Da Silva Junior, Janine Da Silva, Elion Da Silva, Kenneth Martina tur ku nan yunan, mama di su yunan Idelca Ignacio, kompañera Iris Orman. Akto di entiero ta djamars 4 mart for di misa Sta. Maria pa santana Sta. Maria. Bishita 1or. Promé ku entiero tin un s.s. di misa. Trahe alegre.

Lorito ta yama tur hende un felis djamars. Lorito ta wardando ku ansiedat riba kiko ta bai pasa mañan, pero tin manera un silensio hermétiko. Òf ta e silensio promé ku e tormenta òf e krítika tabata asina severo ku a dobla rabu warda? Ban wak!
*********
Lorito a haña diferente sosten i remarke pa e proposishon pa Ban Midi! Nos proposishon preliminar pa wak kiko ta kiko a haña apoyo den algun gremio ku tambe ta masha preokupá. Tur kaminda ku Lorito a bula, hendenan a ekspresá preokupashon pa e situashon aktual. Pero ora bo diskutí ku tur hende, nan niun no tin un alternativa kon ta e mihó manera pa atento e situashon aki.
*********
Loke ta remarkabel tambe ta, ku yen di hende ta manera papagayo (no manera Lorito). Loke nan tende otro papia i kou pa nan, esei nan ta papia. Lorito a bisa mil bes i nos lo sigui bis’é: forma bo mes opinion i no laga otronan disidí pa bo! Buska tur informashon ku bo por haña, si bo no haya no haña bèrgwensa, pasobra tur kaminda tin informashon. Despues bo mes ta opiná! No kou loke otronan ke pa bou kou. Bisa nan ku bo no ta un baka “herkauwer”. Ademas bo no tin pata!
*********
Ta parse ku Kòrsou (Antia) te awor aki a tuma e menasa di un guera den nos region masha trankil. Aparentemente mundu ta kaba na nos kosta. Pero shonnan realisá ku Venezuela i Colombia ta djis den porta ei! Dios laga sano huisio prevalesé i spar nos di un faktor eksterno hopi serio ku lo destabilisá henter nos área.

WILLEMSTAD – Ekspertonan ulandes ku ta atendiendo e kambionan estatal a sugerí pa manda desmantelashon di Antia pa desèmber 2010, ke men un retraso di dos aña kompará ku e deseo ku tin awor aki riba mesa. Despues di yüli 2007, a pone 15 di desèmber 2008 komo fecha (tentativo) pa realisá e kambionan. E empleadonan públiko ulandes a pone na posishon den un nota pa e gruponan tékniko ku ta trahando riba e proseso. Nan ta argumentá ku e proseso no ta avansando ku e rapides nesesario. Minister di Asuntunan Interno Roland Duncan a bisa ku pusha e fecha pa aki dos aña ta inaseptabel. “No tin motibu pa pániko pasobra no a tuma un desishon ainda”, asina Duncan a bisa.
Gobièrnu di Antia a anunsiá ku lo tuma un desishon final den e grupo di direkshon polítiko (regie-groep) mas lat e luna aki.

WILLESTAD – Ku hopi alegria tabatin ayera apertura di Kas di Kuido Hamiëd, ouspisiá pa Fundashon Hamiëd i Fondo Prensès Wilhelmina. E Hamiëd’s Hospice, manera e yama ofisialmente, ta situá na Kurá di Shon Fil na Naniestraat 28 den Otrobanda. Hamiëd ke men Angel di Milager.
E motor tras di e proyekto ta sin duda sra. Tessa Aalse. “Esaki ta mi soño ku a bira nos soño”, asina sra. Aalse a bisa. Sra. Aalse a bai studia na Ulanda na 1990 komo enfermera HBO. Despues el a spesialisá den trabou di geriatria i kuido terminal. Sra. Aalse a bisa ku trahando ku klientenan ku ta den último fase di nan bida, el a realisá ku esaki ta su pashon i mishon.
Pa loke ta trata e proyekto sra. Aalse a splika ku ora un hende yega final di su lucha i e no por mas (sin importá ki edat e hende tin), den e Kas di Kuido lo karga e hende i kita e peso di su lucha. “Kada un di nos meresé esaki, no solamente ku amor i dedikashon pero tambe ku un tim di profeshonal ku sa kiko nan mester hasi”, asina sra. Aalse a bisa.
Mas aleu e direktor di e Kas di Kuido a reakshoná tambe riba e ponensia ku por ta hopi hende tin den sentido ku den un Kas di Kuido ta muri bo tei muri i di kon mester tin kuido adishonal. “Pa esnan ku ta pensa asina mi kier bisa ku tin hopi aspekto pa tene kuenta ku ne. E doló ku hopi hende tin den e fase aki, ken ta pas’é un angua i kit’é? Ora bo mester di oksígeno, ken ta dunabo esei? Bo infus, ken ta pega e saku nobo ora e bira bashí? Esakinan ta djis algun ehèmpel”, asina sra. Aalse a bisa. Segun e direktor, e diferensia di un Kas di Kuido i institutonan di kuido ta ku den e Kas di Kuido ta krea e esfera korekto pa guia e hende den su último fase di bida, teniendo kuenta ku e hende su deseonan. “Esaki ta trese trankilidat pa e kliente i su famianan. E kos aki ta un regalu sumamente bunita pasobra kada hende ku sinta na kama di morto di un hende ku ta bai fayesé i berdaderamente skucha kiko e kliente terminal tin di bisa a siña lèsnan balioso. Si pasa e lèsnan aki pa kada hende rondó di nos, pronto nos mundu, nos Kòrsou lo ta un paraiso, i a yega ora pa nos bai traha huntu na esei”, asina sra. Aalse a bisa.

WILLEMSTAD – Lo mester bai stimulá e proseso pa mas hende hòmber bira maestro di skol. Lo mester usa ehèmpelnan maskulino ku tin awor aki pa atraé mas hende hòmber pa e profeshon di maestro. Esei ta un di e konklushonnan di e konferensha riba enseñansa ku a tuma lugá ku diferente protagonista di enseñansa.
Aktualmente e kantidat di maestro maskulino den enseñansa ta bahando dia pa dia mas. Ainda tin un grupo grandi aktivo den enseñansa sekundario, pero den enseñansa di fundeshi (ántes skol básiko) e kantidat di maestro maskulino a baha konsiderabelmente den ultimo añanan. Mester bisa, ku e fenómeno aki no ta algu ku ta konserní e profeshon di maestro di skol so, pero por konstatá ku dia pa dia mas hende muhé ta haña profeshonnan den nos komunidat, inkluso profeshonnan ku tradishonalmente tabata di hende hòmber. Na enseñansa avansá por nota, ku e kantidat di hende muhé ku ta presente i ta logrando dia pa dia ta birando mas grandi, loke ta un preokupashon serka diferente outoridat den nos pais. Minister di Enseñansa Omayra Leeflang ta hasiendo un estudio riba e aspekto aki.
Siman pasá e punto aki a bolbe bin na diskushon na momentu ku a trata e tema di eskases di maestronan di skol. Durante e diskushonnan a yega na un resolushon ku rekomendashonnan pa Gobièrnu di Kòrsou. Na e konferensha a partisipá diferente aktor for di mundu di enseñansa manera representantenan di Sitek, FIdE, SAE, DOS, Direktivanan di Skol Katóliko i skol protestant, UNA, APK, Rema Uni i otronan. A konkluí, ku ni maske pa e aña eskolar aktual tin sufisiente maestro di skol, tòg tin preokupashon ku den futuro por tin un posibel skarsedat atrobe. Esaki debí na diferente motibu, manera edat relativamente haltu di e promedio di maestronan aktual i kaida di e status ku e profeshon ta tin.