ORANJESTAD – Colegio Frere Bonifacius ta invita henter pueblo di Aruba pa nos Fiesta Cultural Arubano.
E Fiesta Cultural Arubano lo tuma lugar riba Diasabra 15 di maart proximo.
E Fiesta Cultural Arubano aki ta un continuacion di e Fiesta Multicultural exitoso cu Colegio Frere Bonifacius a tene na 2007.
Invitadonan: E actividad lo conta cu participacion di entre otro e escritora Liliana Braamskamp-Erasmus, Grupo di Betico, Sun rise dancers, Chaz Models y otro gruponan invita.
Tambe alumnonan di diferente klas lo hasi nan presentaciona di baile, canto y actuacion.
Lugar: E actividad aki lo tuma lugar di 6’or di atardi pa 10’or di anochi riba e tereno di scol mes. Entrada lo ta 1 florin entrada general.
Durante e actividad aki lo tin diferente stand cu cuminda y bebida tipico di Aruba. Cada stand lo konta cu su tipo di cuminda tipico dependiendo di su celebracion. Sin laga afo nos stand di cos dushi.
Nos lo trata tur celebracionnan tipico di Aruba manera Dera Gai, Pasco, Aña di La Reina, Dia di bestia y naturalmente nos Himno Y Bandera.
Tambe lo rifa diferente door-prize durante henter e anochi aki. manera dinners, movieticktes y hopi premionan atractivo.
Colegio Frère Bonifacius ta invita tur su alumnonan, nan mayornan y e pueblo di Aruba en general pa e actividad aki cu tin como meta pa recauda fondo pa mantencion di e scol y mantencion di e airconan y tambe pa yuda cubri gasto di coriente.

Minister drs. Marisol Lopez-Tromp ta informa:

ORANJESTAD- Minister drs. Marisol Lopez-Tromp ta informa cu aña pasa parlamento di Aruba via un amienda a aproba 2 miyon florin pa renoba Mater Dei School y pa converti esaki den un scol pa muchanan cu dificultad pa siña (MLK) pa asina ubica Un Paso pa Futuro eynan. Renobacion di e scol a cuminsa algun siman pasa y esaki ta bayendo bon.
Actualmente na Aruba tin 3 scol pa muchanan cu dificultad pa siña, esta Emma School situa na Ayo, Caiquetio School y Un Paso pa Futuro. E scol Un Paso pa Futuro ta temporariamente ubica na Burubundu. Asina cu renobacion di ex Materdei keda finalisa lo muda un Paso pa Futuro pa su ubicacion nobo na Playa.
Gobierno su obhetivo ta pa nos sistema di enseñansa ta traha di tal forma pa fomenta enseñansa pa tur mucha. Tur mucha mester por disfruta di enseñansa na e nivel cu e por studia. P’esey gobierno ta subsidia y financia diferente tipo di enseñansa.
Den nos enseñansa regular a aproba pa financia un sistema di cuido y guia profesional pa scolnan, caminda scolnan tin trahado social, tin orthopedagogo y tambe por hasi uso di guia di departamento begeleiding na departamento di enseñansa.
Un di e retonan nos dilanti ta un bon ubicacion pa nos muchanan cu tin dificultad pa siña y no por keda den enseñansa regular (Moeilijk Lerende Kinderen).
Enseñansa na Aruba mester percura pa cada mucha por studia na su nivel. Anto asina e scol aki di pa muchanan cu dificultad pa siña keda cla, Gobierno lo logra aporta un alternativo mas pa nos sistema di enseñansa.

Entrante 9 di mei 2008:

ORANJESTAD – Dia 9 di mei proximo Servicio di Aduana lo pone den practica e prome fase di su sistema automatisa nobo, cual sistema ta forma parti di e sistema di informacion integra di Servicio di Impuesto y Aduana. Lo realisa e ehecucion di e sistema automatisa nobo den dos fase.
Den e prome fase ta automatisa e proceso di declaracion y e proceso di cobramento. Despues lo realisa e di dos fase cual ta e automatisacion di e parti logistico. Pa e clientenan ta importante pa nan ta na altura di e cambionan pa cu e declaracion y pago y pesei Servicio di Aduana lo percura tambe pa duna tur informacion necesario.
Cambio den sistema di haci declaracion
Servicio di Aduana ta bai uza un sistema nobo pa e registracion di declaracion y e calculacion di derecho. Mester remarca cu e formulario di declaracion mes, conoci como “Enig Document”, no lo cambia. E clientenan ta keda uza e formulario aki manera custumber, pa declara mercancia. E clientenan lo mester tene cuenta si cu den e sistema nobo, cierto parti di e “Enig Document” ta bira obligatorio pa yena. Pesei prome cu acepta e "Enig Document", Servicio di Aduana lo bai control’e detayadamente pa chek si el a wordo bon y completamente yena.
Den caso cu no a yena e formulario corectamente of completamente, Servicio di Aduana no lo acepta e documento. Den un caso asina e cliente mes lo mester percura pa corigi e declaracion. Ora e "Enig Document" ta corectamente y completamente yena, e por wordo acepta pa wordo procesa.

ORANJESTAD– Ta falta un par di dia pa nos gran celebracion di Arubadag na Hulanda. E agrupacion Le Groove a yegando Hulanda dia 6 di Maart pa presenta durante di e evento ariba diadomingo 9 di Maart.
Le Groove a haci un cos e aña aki durante di Carnaval 54 cu nan roadjam King of the Road di T Money. Tambe Black Diamond a bai cu e titulo di Calypso King 2008. Ingredientenan pa Arubadag lo bira un fiesta grandi cu un di e mihor bandanan for di Aruba. Ya caba hopi fanaticonan di Le Groove aki na Hulanda a cuminsa cumpra caarchi masalmente pa nan bin baila ariba musica di Le Groove.
Hopi persona ya caba a haci uso di e posibilidad di reserva caarchi on line. Desde dialuna 3 di Maart por cumpra caarchi unicamente na Cas di Aruba durante di oranan di oficina y loque cu resta diadomingo na porta.
E celebracion ta cuminsa 12 or di merdia cu presentacion di varios artistanan cu canto y baile pa duna realce na nos cultura Arubano. Ta nos cultura e ta. Stimé!
E edicion aki di Arubadag lo bira uno nostalgico, pasobra ta e ultimo biaha cu nos por celebra nos dia den Groenoordhallen na Leiden.
Probecha pa cumpra bo cuminda crioyo y bo boca dushi y bolo Arubiano. Tin un mini – kermis pa e muchanan unda cu nan por hunga den un ambiente safe.
Manera ta e caso den e añanan anterior na Leiden, lo tin suficiente stul pa e publico por sinta, descansa of sinta disfruta di un plato crioyo.
No lubida cu e aña aki atrobe ta rifa como doorprice dos pasashi ida y vuelta pa Aruba. Bo no sa unda bo suerte ta!
E comicion organisador ta spera cu hopi Arubiano y amigonan di Aruba bin canta nos himno y hisa nos bandera pa celebra hunto cu nos nos dia nacional Dia di Himno y Bandera.

ORANJESTAD- Aruba a sera 2007 cu un subida notable di 8.6% den turismo. E ultimo 4 luna di aña en especial a mustra un incremento significativo, particularmente for di e mercado Venezolano. Según Ministro di Turismo & Transporte, Edison Briesen, “Nos ta hopi contento cu e resultadonan preliminar cu ta indica un crecemento substancial di turismo pa Aruba compara cu 2006, a pesar di obstaculonan manera e costo di fuel creciente, subida den impuestonan den transporte aereo, riesgonan di inflacion y costonan di interes halto rond mundo.”
Geraldine Coutinho, Directora di Turismo pa Norte America pa Gobierno di Aruba ta confirma cu e “feedback” cu nan a ricibi for di e operadrnan na CHA na Bahamas ta uno masha positivo pa Aruba.
Nan ta indica cu e reservacionan (bookings) ta ariba pa 2008 cu mas o menos 10% compara cu 2005 cu tabata un aña record pa Aruba. Alavez e ta confirma cu e mercado Mericano a crece cu 3.3%.
E informacion aki ta hopi motivante te cu awor y ta demonstra e adaptabilidad di Aruba como destinacion y nos determinacion pa mantene nos mes como e destinacion preferi den Caribe, según Ministro Edison Briesen.
Mester destaca tambe cu e “marketshare” di e distinto paisnan y/of regionan a cambia y awor ta como lo siguiente 67.6% USA (antes 71%), Noord America 70.9% (antes 74.3%), Sur America16.3% (antes 12.4%), Centro America/Caribe 3%, (antes 4%).
Aruba ta pasando den un “boom” di remodelacion di hotelnan y construccionan nobo di condominium, un proceso cu ta creando un fundeshi mas amplio ainda pa crecemento turistico pa 2008, a pesar di un recesion cu prácticamente a inicia caba na Merca dor di e subida di desempleo na December 2007 pa Merca, nos no ta mira cu esaki lo afecta Caribe particularmente fuerte, mirando cu durante di e recesion global na 1970 y 1980 turismo pa Caribe a subi 52.2% di 1978-1988.

ORANJESTAD- Minister Edison Briesen di turismo a mustra sumamente contento cu rapportnan riba turismo di 2007 y ainda mas contento pa motibo cu e panorama pa 2008 ta mustra mas positivo ainda.
Sr. Humphrey Vrolijk, Director di Turismo pa Europa, ta indica cu lo tin mas asiento disponible pa Aruba for di e mercado aki na 2008. Ela duna di conoce cu Arkefly lo cuminza bula den zomer cu nan di tres (3) vuelo, Martinair a start cu nan di dos (2) vuelo na November 2007 y lo sigui na 2008, Italy Charter lo bula durante 2008 y 2009 cu Dimensione Turismo cu shete mil dos cien (7200) asiento, First Choice lo bula tambe na 2008 y 2009 cu nan charter for di UK dos bez pa siman y tambe tin e cruise chartersnan di Pullman Tours (Spanje), AIDA (Alemania) y Ocean Village (UK).
Pa Latino America tambe 2008 ta mustra positivo. Tin tur indicacion cu e tendencia di e crecemento di Venezolano cu a bishita Aruba na 2007 ta bai sigi den 2008. Akinan nos por spera un “double digit increase”.
Según WTO (World Tourism Organization)
Den e contexto global di crecemento, lo tin un aumnto continuo di turismo, cu ta calcula na mas o menos 5% pa anja, pa di cuater anja consecutive. E turbulencianan mas recien den e mercadonan financiero no tabata tin ningun efecto significativo pa turismo mundial te cu awor.
Nan ta sigi bisa cu e resultadonan di 2007 ta confirma e resiliencia di e e demanda di turismo y e efectonan di factornan externo ariba dje, manera aspectonan di seguridad y salud, costonan halto di fuel, inflacion y tarifanan di interes halto.
Sin embargo, algun di e factornan ariba menciona lo por afecta mas consumidor den mas Mercado, cu eventualmento lo por tin un efecto ariba turismo gloal na un cierto momento.

WILLEMSTAD – Un hóben di 20 aña di edat, ku ta pashènt sikiátriko, a muri awe mainta den kurá di su kas. E hóben a lanta awe kontra di tur hende i a destruí tur kos den e kas kaminda e ta biba i a heridá su mes tambe. Miéntras ku durante basta ratu no por a haña niun instansia pa duna asistensia, e hóben a dal abou i muri.
LA PRENSA a komprondé, ku ora famianan a yama su dòkter di kas, esaki no por a akudí pa duna asistensia. Polis ku a tuma kontakto ku Hòspital, a haña e informashon, ku mester purba via di Skuchami òf Klínika Capriles pasó ta despues di 5’or di atardi Hòspital ta atendé ku pashèntnan sikiátriko. Ta konosí ku Hòspital tin un palabrashon ku Klínika Capriles ku kasonan ku tuma lugá despues di 5’or di atardi ta kai bou di Hòspital. Konsekuentemente Hòspital no ta duna asistensia na niun pashènt promé ku 5’or. E pashèntnan akí mester akudí na Klínika Capriles.
Aña pasá tabatin un kaso similar ku a hala hopi atenshon, ora e hòmber Sovyendy Kopra a muri den un ambulans dilanti di Warda di Polis na Punda. Den e kaso akí CEMS a transportá e pashènt pa Klínika Capriles, kaminda nan a konstatá ku e tabata intoksiká ku droga. No a konstatá ku e tabata sígiko i ku e tabatin mester di tratamentu, p’esei no a tum’é. Despues ku para médikonan di CEMS a tuma kontakto ku Hòspital, nan a komprondé ku ta despues di 5’or Hòspital ta atendé ku pashèntnan sikiátriko. E momentu ei 5’or no a bati ainda. Finalmente e polisnan ku tabata na e sitio a kompañá e ambulans di CEMS i a hiba e pashènt Warda di Polis na Punda, pa a ser’é den un sèl te ora su kurpa drecha. Sin embargo fiskal a duna òrdu pa no sera e pashènt den sèl, pa motibu ku e no a hasi nada kontra lei. Miéntras tur e diskushonnan akí tabata tumando lugá, e pashènt a muri den ambulans. E siman akí Inspekshon pa Salú a keda di entregá e rapòrt ku a traha den e kaso di Kopra. E rapòrt mester indiká, si un di e instansianan ta kulpabel na morto di Kopra i kiko ta e medidanan ku mester bai tuma den futuro pa evitá e kasonan akí. Pa e hóben ku a muri awe mainta, e medidanan akí ta yega lat.

ATLANTA – Atlanta Braves tabatin un mihó aña na banko ku den tereno na 2007.
E tim di Braves a gana 23 mion dollar “cash flow”, loke ta un punto pa midi nan estado finansiero, asina doño di e tim Liberty Media a revelá.
E revelashon aki ku ta e señal mas kla ku Braves, despues di a laga vários estrea bai den añanan resien, ta bon pará.
Si esaki lo pone ku nan lo por bai firma e primera base Mark Teixeira ku ta eligibel pa bira agente liber despues di e temporada aki i Jeff Francoeur ku ta deseá un kontrakt di mas aña, ta di mira.
Den su rapòrt na Securities and Exchange Commission, Liberty Media a bisa ku Braves a gana na tur 159 mion dollar i tin un “cash flow” pa operá kuné for di meimei di luna di mei 2007 dollar, ora ku e kompania ku tin su base na Colorado a atkerí e frankisia.
Liberty a ninga di duna mas komentario riba e estado finansiero di Braves.
Terry McGuirk, presidente di e fundashon ku ta dirigí Braves no tabata kier a duna un komentario djaluna. Pero anteriormente ela bisa ku aña 2007 a bai muchu mas mihó ku loke nan a presupuestá. Asistensia a subi ku 200.000 fanátiko.
El a bisa e tempu ei ku Braves a sali for di pèrdidanan kuantioso na 2003 pa serka di “break even” na 2006.
El a sigurá, ku Braves lo bai gasta mas mion riba hungadónan na 2008.
Braves a kuminsá temporada pasa ku un ‘payroll” di 81 mion dollar i te awor aki ta un tiki riba 91 mion dollar pa e aña aki, ku te ainda ta hopi atras for di esun di mas haltu di 103 mion ku nan tabatin na 2003.

Jo-Jo Reyes ta luchando ku Jair Jurrjens i Chuck James pa e di sinku puesto


PORT ST. LUCIE, FLA., - Jo-Jo Reyes ta den kompetensia fuerte pa e di sinku puesto den rotashon di Braves i e ta hasiendo su trabou.
Durante di su 10 salidanan temporada pasá el a demostrá di tin e talento pa habri wega, pero ku un falta di kòntròl despues ku el a tira 26 base por bola i poncha 26 den 47-1/3 di ining, djaluna el a demostrá bon kòntròl.
El a pèrmití un kareda i dos hit den dos entrada, sin tira niun base por bola kontra di Mets.
“Mi no tabata kier a tira riba e parti pretu di plato henter ora”, asina Reyes a bisa, kende a poncha unu. “Tira mas strike meimei di plato i konfia den mi fastball”.
Reyes a tira kasi eksklusivamente fastball i a tira solamente dos lansamentu “off speed” durante di e dos entradanan. Na tur el a tira 29 lansamentu di kual 19 tabata strike.
Reyes ta bisa ku e tin mas eksperensia di e salidanan ku e tabata tin aña pasá. El a krese i madurá tambe.
E picher slengu di 23 aña a kasa durante di offseason i nan ta spera nan promé yu.
“Reyes tabatin un bon salida”, asina mènedjer Bobby Cox a bisa. “Su kòntròl tabata hopi bon. Mi a gusta esei”.
E mester mantené esei pa por gana di Jair Jurrjens i di Chuck James pa un puesto den rotashon.
“E puesto ta habri pa loke mi ta mira, dependiendo kon Chucky lo hasi biniendo bèk for di un operashon na su rotator cuff. E puesto ta hanchu habrí”, asina Cox a bisa.

JUPITER, FLA – Ray King, e eks relevista di St. Louis Cardinals, ku awor ta hunga ku Washington Nationals i e mènèdjer di St. Louis Cardinals promé ku wega a kòmbersá amikalmente alrededor di 10 minüt ku otro.
Sèptèmber pasá, tempu ku King tabata ku Milwaukee Brewers, kaminda ku e dos timnan aki tabata enbolbí den un dalmentu di otro ku bala, reportadamente King lo a bisa mènèdjer di Brewers Ned Yost, ku Cardinals tabatin un seña pa dal un batidó ku bala intenshonalmente.
Yost reportadamente a bai mira video i a mira un seña promé ku Prince Fielder a bin haña un deadball.
Despues di e enkuentro di djaluna La Russa a bisa ku e ta satisfecho ku e splikashon di King.
“El a bisa, ku e no tabatin nada di haber ku e kos ei. Solamente mi tabata kier a “clear” e kos aki ku King”, asina La Russa a bisa.
Sinembargo La Russa a bisa ku nos no ta hasi e kos ei.
King a bisa: ”Mi ta bai keda ketu riba e kos aki”.

JUPITER, FLA – Ku ingreso di mas pais den Confederacion den Beisbòl de Caribe esaki ta fortalesé e organisashon aki i ta evitá ku den Seri di Karibe e pais anfitrion lo mester tin dos ekipo, manera a pasa e aña aki, asina Tony Perez a bisa.
Segun Perez si algun otro pais a demostrá di tin e mesun nivel ku e miembronan aktual ku tin den e konfederashon, e direktiva di e konfederashon mester duna nan un oportunidat.
Den e edishon di e aña aki Puerto Rico ku no tabata tin un kampionato invernal, tabata ousente loke a pone ku Repúblika Dominikana a partisipá ku dos representante.
“Por ta ku Colombia lo por drenta. Nan tin e nivel?” asina Perez ta puntra. “Nan ta trata di regresá ya ku nan tabata un tempu aden kaba. Meskos ku Panamá”, asina Perez ta bisa.
Perez ku a hunga hopi aña den beisbòl invernal di Puerto Rico ta bisa ku Puerto Rico mester tene un kampionato invernal próksimo aña. Si nan no hasi esaki nan lo sufri un daño ireparabel.

PEORIA, ARIZ., - E mènedjer di Chicago Cubs djaluna a regresá un di su lugánan faborito, e kampamentu di Seattle Mariners ku el a dirigí pa 10 aña durante di su añanan di gloria i a tèrminá ku e organisashon na 2002.
Piniella a usa e yegamentu na e kampamentu pa deklará ku esaki su di sinku puesto komo mènedjer, unu ku a kuminsá for di 1986, ku Yankees, lo ta su último.
E karera ki ta inkluí un título di Seri Mundial na 1990 ku Cincinnati Reds i un empate di rèkòrt di 116 viktoria ku Seattle na 2001.
“Loke mi por bisa boso ku esaki lo ta mi último”, asina Piniella a bisa promé ku e wega kontra di Mariners. “Kisas un tiki trabou di konsulta, pero pa loke ta dirigí un ekipo esaki ta mi último”.
Ora ku nan a puntra si e lo aseptá un ekstenshon despues di e kontrakt aki di 10 mion dollar ku lo tèrminá despues di temporada 2009 i un opshon pa 2010.
“Mi no a bisa nada. Tur loke mi a bisa ku mi tin e aña aki i otro aña. Nada mas ni nada ménos. Miéntras ku mi ta disfrutá di e kos aki, e klup ta hungando bon, ku e doñonan i e “front office” ta satisfecho, mi ta habri pa un diskushon”, asina el a bisa. “Pero mi no ta mirando den futuro. Mi ta wak e aña aki i otro aña lo sòru pa su mes. Ta un karera largu, ku hopi trabou tambe”.
E trabou ei ta sòru pa bo tin algun hungadó bon di salú.

SURPRISE, ARIZ., - E tersera base di Texas Rangers, Hank Blalock tabata un tiki steif i tabatin un tiki doló despues ku e tabata enbolbí den un aksidente di outo, ora ku el a para na un krusada i un outo a kore bin dal su tras.
Blalock, su kasá i su yu hòmber di tres aña i mei, tabata biniendo bèk despues ku nan a kaba di kome, ora ku e aksidente a tuma lugá. Blalock a bisa ku nan tur ta oké.
“Nan a dal nos duru djatras”, asina Blalock a bisa sintá na su locker ayera. “Mi tabata enbolbí den aksidente di outo anteriormente, pero esaki tabata unu fuerte”.
E impakto a kibra e frònt di e outo i tambe a kibra e bumper di e SUV luho di Blalock.
Mènedjer Ron Washington a bisa, ku e tabatin planiá pa usa Blalock komo DH ayera, pero a kambia di idea despues di e aksidente.
“Nos ta bai mira kon e ta sinti su mes kada dia. El a haña un tiki “whiplash”. E ta hóben i por bini bèk lihé. E kos prinsipal ta, ku su famia ta oké”, asina Washington a bisa.

WILLEMSTAD – Un total di 38 dama a risibí nan sertifikado di lès di kòmpiuter den e proyekto di halsa kalidat di hende den bario. Esaki ta un kurso ku Fundashon Era Nobo a ofresé na kursistanan den koperashon ku otro instansianan lokal. E kurso aki a ser tené na Skuchami i ta un forma den kua Era Nobo ku fondonan risibí di Oranjefonds a logra ku di e 40 kursistanan 38 a tèrminá esaki ku éksito.
E kursistanan ta prosedente di barionan Otrabanda, Souax, Groot Kwartier i Weis Afó. E kursistanan aki tur djasabra tabata partisipá na e kurso den e proyekto di Compusova ku ta entrenamentu pa traha riba kòmpiuter i habilidat personal. E proyekto aki tambe ta mará den kuadro di kombatí pobresa i purba pa halsa e kalidat di bida di e hende den bario. E vários diskursonan ku a bin dilanti tur ta prueba ku esaki tambe ta un di e formanan pa logra duna sosten na hende pa desaroyá su mes i por logra den futuro pa haña un trabou.
Durante e anochi di entrega di sertifikado a onra tres dama ku a sobresalí den e kurso aki. Ta bon pa menshoná, ku 1 hende hòmber so a partisipá den e kurso aki i ku tambe a logra tèrminá esaki ku éksito. E damanan ku a sobresalí ta Sharilly Mercelina, Richmasily Holder i Jovesta da Silva ku puntuashon mas haltu.

WILLEMSTAD – Kas di Beibel a logra re-imprimí 11 título di buki ku ya tin un tempu ku nan a kaba i a imprimí 7 buki nobo. Ku esaki ta danki na Fundashon Paps Capriles pa Hubentut ku a bira posibel pa bolbe imprimí e bukinan aki. Tambe nan a logra imprimí título nobo for di e seri “Biblito ta konta” i “Beibel pa Mucha” Tomo 5.
Aña pasá a kompartí e soño di ke a imprimí henter e seri di “Biblito ta konta” i tambe di “Beibel pa Mucha”. Fundashon Paps Capriles pa Hubentut demostrando ku realmente nan kurason ta bati pa hubentut, nan a aseptá di ta padrinu di e esfuerso aki i a yuda kubri mitar di e gastunan di imprenta i asina hasi posibel ku Kas di Beibel por sigui ofresé e bukinan aki na un preis supsidiá i tambe grátis na tur instituto ku ta den nesesidat.
Un di e bukinan ku a logra imprimí ta “Beibel pa Mucha – Tomo 5”. E Beibel pa Mucha aki ta kontené 14 historia tumá for di tèstamènt Nobo. Nan ta tradusí ku e meta pa presentá e mensahe di beibel na un manera animá i interesante di moda ku mucha lo komprond’é fásilmente. A kompañá kada historia ku ilustrashonnan hopi kolorido pa asina e buki ta mas atraktivo pa mucha. Apesar ku e buki tin un kaft duru, a tene preis di benta na mesun preis ku a bende e promé tomo 12 aña pasá pa asina e por yega den kas di hopi mucha.
Pero último añanan tabata bira kada biaha mas difísil pa superá dos reto:

Man i Forsa Kòrsou so a manda representante pa orashon:

WILLEMSTAD – Pastornan a disidí ku nan lo no entregá i lo hasi esfuerso pa drenta Konseho Insular kaminda por haña tantu koalishon komo oposishon pa hasi orashon pa direkshon di Dios. Esaki ta loke a keda konkluí na final di e enkuentro ku tabatin den Fortkerk awe mainta, den kua un invitashon urgente a sali pa lidernan di partido di koalishon i oposishon.
Un asistensia pober, pero ku e pastornan a mustra ku nan lo no entregá, pero ku nan lo sigui hasi esfuersonan pa yega kaminda lo haña ámbos banda pa palabra di enkurashamentu i orashon.
E únikonan ku a presentá i ku a kontestá riba e invitashon tabata e dos partidonan di oposishon MAN i Forsa Kòrsou, ku a manda representante pa e okashon spesial aki. Loke ta di lamentá ku esnan invitá no a hasi uso di e oportunidat aki, ya ku ta na masha poko okashon por haña un kantidat grandi di pastornan huntu pa un kousa. Den e kaso aki e kousa ta pa buska intervenshon di Dios pa ku e situashon aktual.
Un situashon preokupante den diskushonnan ta tumando lugá entre koalishon i oposishon, ku ámbos mensahenan mustrando riba bienestar di e pueblo. Den e intervenshon awe mainta, tabata pastornan Raimy Juliet, Anthony Valerius i Rob Braumuller ku a trese skritura dilanti, miéntras ku pastor Kenneth Thijm a enkargá ku e orashon di apertura. A kanta himno di Kòrsou i a lanta bos pa hasi Señor grandi den alabansa.

DUBAI, Emiratonan Arabir Uni – Rafael Nadal a superá problemanan pa sali ganadó djamars ku skor di 3-6, 6-1, 6-4 di e aleman Philipp Kohlschreiber pa avansá pa di dos rònt di e torneo di Dubai.
E spañó, number dos di mundu, a bisa ku e kancha rápido i e atversario a hasi su bida kompliká.
“Sigur, e tabata un wega difísil”, Nadal a trese dilanti. “Bo ta hunga den promé rònt meskos ku ta den kuart final”.
Un dia despues ku e favorito Roger Federer a keda eliminá pa Andy Murray den promé rònt, e serbio Noval Djokovi a demostrá su klase di kampion di e torneo Habri di Oustralia ora el a derotá e kroata Marin Cilic 6-4, 6-3.
“Roger a kuminsá pèrdè kaba biaha mas”, Djokovic a bisa, kende na Oustralia a eliminá Federer den semi final. “Awor e hungadónan ta kere ku nan por gané”.
Djokovic, kende a superá e franses Jo-Wilfried Tsonga den e final di Oustralia, no a skonde su alivio di a pasa e debut na Dubai, un torneo ku un grupo hopi kompliká.
“Semper ta bon pa pasa e promé rònt ku sètnan stret”, e serbio a deklará.
E merikano Andy Roddic tambe a pasa promé rònt ora el a gana e spañó Juan Carlos Ferrero. Tabata un ripitishon di e final di e habri di Merka 2003, e Uniko Grand Slam ku Roddick a gana te awor.
Roddick a sùrf 18 as, inkluso unu di 237 km pa ora. Den di dos sèt, Roddick gana un game ku kuater as.

ELIZABETH
Moises Gilberto (repentino)
Mihó konosí komo Mooi
A laga atras su yunan Eveline de Castro, Edsel Elizabeth, Boy Elizabeth i Lucilles Brito-Moreno, yunan di kriansa Rudy i Theodorita Elizabeth, Richinel i Norma Richards, Harvey i Charlotte Martina, Amarilles de La Croes. Akto di entiero ta djasabra 8 mart. Bishita 1or na misa Janwe. Promé ku entiero tin un s.s. di misa 3.30or.

BRIDGEWATER-BOATSWAIN
Louise
Mihó konosí komo Lou
A laga atras su yunan Lennox Bridgewater, Mariesol Valks-Isenia, subrino(a)nan Dennisse Boatswain, Barbara Boatswain, Jean Horn, Edna williams, Edmund Allen, Pedro Agustin tur ku nan famia. Akto di entiero ta djabièrnè 7 mart for di Bottelier pa santana Bottelier. Bishita 1or-3.30or. bishita 3.30or.

APOSTEL-POULINA
Julia Virginia
A laga atras su mama Jonita Herman-Poulina, kasá Tirso Apostel, yunan Sharline Apostel i Gerson Jones, Idrid Apostel i Lester Brotway, Rudguerdo i Sandra Apostel, Roxane Apostel i famia, yu di kriansa Sedric Chtlein, Lindomar van Aanholt. Akto di entiero ta djasabra 8 mart for di El Consolador pa santana Roodeweg. Bishita 1or. Promé ku entiero tin un respòns 3.30or.

RODRIGUEZ
Cleofa Amanda
Mihó konosí komo Manda
A laga atras su yunan di kriansa Laro Janga, Carina Timber i yunan, Amara Williams, subrino(a)nan Dolores i Freddy Donker, Yolanda Domacassé, Hubert i Mabel Marsera, Sterling, Judith, Glenda, Franklin Marsera, Marelva i Hubert Pietersz i sobrá subrino(a)nan. Akto di entiero ta djabièrnè 7 di mart 4or for di el Tributo pa santana Sta. Maria. Bishita 1or. Promé ku entiero tin un respòns na El Tributo.

Lorito ta yama tur hende un felis djarason. Lorito a keda bula, bula i bula pa sigui e primarionan na Merka. E alanan a lanta un poko kansá awe.
*********
Hillary a bin bèk ku tur forsa manera Lorito a pronostiká. Obama ta manera kos ku a suak un poko i e desapunto tabata grandi ku e no a logra KO Hillary ayera. Hillary a impreshoná ku su spich di viktoria, miéntras ku Obama tabata mustra basta desepshoná. Interesante pa sa kon e kombate aki lo sigui, prinsipalmente awor ku Obama lo mester bai sigui un polítika mas tradishonal (di tira lodo) pa trata di konvensé elektorado.
*********
Mester duna Hillary krédito ku e so riba su mes a gana Obama ayera den dos estado importante, gana prensa ku ta kontra dje i gana enkuestanan tambe. Ta un trabou masha formidabel Hillary a hasi. Nos ta huzga independiente (i trata di hasi esei sin emoshon) a bisa for di adelantá ku Hillary lo bin bèk. Pero aki na Kòrsou, sierto analistanan ku nan simpatia a prediká otro i nan tambe a haña. Un di nan a krusa kaminda awe mainta pa e no tin nodi di tende nos pensamentu!
*********
Awe tabatin ekspektativa pa sa kon a para ku e asuntu di baha gobièrnu. Tur kaminda tin krítika riba e intenshon aki, inkluso di esnan ku ta kontra e manera ku e proseso ta tumando lugá. Un gran kantidat di hende ta koinsidí ku e asuntu di baha gobièrnu tin riesgonan serio. Ademas, si bin un gobièrnu nobo mes, despues di algun siman lo por baha e gobièrnu aki un biaha mas i asina nos lo keda baha gobièrnu na nos antoho?

WILLEMSTAD – Aki aya tabatin diferente rumor awe mainta kiko por spera despues ku e dianan a pasa ku Aliansa Patriótiko a pone pa Gobièrnunan bai kas. E kantidat di dia a vense awe. Ta masha vershon tabata sirkulando kiko lo bai pasa. Algun hende a plama e rumor ku a sera Punda, pero no tabatin nada ta mustra den e direkshon aki. E reunion di Konseho di Minister a sigui normalmente, miéntras ku na Skalo tabatin e reunion semanal di Gobièrnu di Kòrsou. Na porta di Bestuurscollege por a tuma nota di mas aktividat di vigilansha ku normal. Na último ora LA PRENSA a komprondé, ku e 6 partidonan di e Aliansa Patriótiko a anunsiá, ku lo reuní otro siman 5’or na Alameda i for di einan lo disidí ki paso lo tuma. Opservadornan a konsiderá e anunsio komo un indikashon ku sano huisio a prevalesé, a lo ménos pa awor aki.