WILLEMSTAD – Fiskal den promé instansia awe mainta a pidi un kastigu di 6 aña pa e polis di O-Toleransia Wensel Magdalena, ku aña pasá a usa un outo di polis pa kometé un delito. Magdalena a bai na Toka La Fama na Maripampoen, kaminda e lo mester a kue un maleta ku 100 mil florin aden.
Awe mainta Magdalena a bisa wes, ku e no a mishi ku nada den e toko. El a splika, ku el a bisa su hefe di O-Toleransia Abrahamsz, ku e ta bai tira un bista na e toko pa wak si tin droga. Abrahamsz lo a palabrá kuné ku si e enkontrá droga e lo regla pa asina e kaso sali bon. Fiskal a kontestá Magdalena ku nunka e no a yega di tende ku un polis por drecha un kos robes. Magdalena a bisa tambe, ku anteriormente el a yega di traha un prosèsverbal den kua el a menshoná ku e tin sospecho ku den e toko tin trafikashon di droga. Niun di su superiornan no a hasi nada ku e prosèsverbal, segun Magdalena.
E tio di Magdalena ku tabata huntu kuné e anochi ei a splika awe den korte ku, Magdalena a bis’é ku su hefenan di polis a rekomend’é pa e bai ku un hende deskonosí pa asina nada no lèk. E hefenan lo a bisa tambe, segun Magdalena a konta e tio, ku nan no ta konfia e otro polisnan. Ora Magdalena i e tio a drenta den e toko, Magdalena a bisa e doñonan “nos ta polis”. Despues el a bai ku un di e doñonan patras, kaminda el a haña un maleta ku algu manera mariwana aden. E ora ei el a manda e doño bai dilanti bèk, sino e ta bui e i bai kuné. Tabata akínan ku e lo mester a kue e maleta i bai kuné. Mas aleu Magdalena a bisa tambe, ku ora el a tende riba e radio di polis ku nan tabata pidi asistensia pa lokalisá e outo polis 75, el a drenta pániko i pèrdè kabes.

WILLEMSTAD – Un kantidat di 12 sindikalista a bai Bestuurscollege awe mainta pa entregá un petishon na Gobièrnu, pa no oumentá preis di gasolin entrante 11 di mart próksimo. Entre e sindikalistanan tabatin Roland ‘Nacho’ Ignacio, Sidney ‘Bicho’ Justiana, Alcides Cova, Richinel Ilario, Pablo Zimmerman i Anralis Dap.
E sindikalistanan a informá Gobièrnu ku nan ke un kontesta promé ku djamars anochi 18.30’or. Despues di e orario akí nan lo reuní ku nan miembronan pa informá nan kiko Gobièrnu a disidí ku e oumento di gasolin. Despues di akí lo palabrá ku e miembronan kiko lo ta e siguiente pasonan ku e sindikatonan lo bai tuma, si akaso Gobièrnu no para e oumentu. Tambe nan a proponé Gobièrnu pa forma un grupo tri partit ku denter di 1 luna mester bin ku un desishon.
LA PRENSA a komprondé ku polis i SKS tabata na kareda ora nan a mira e grupo di sindikalista ta kana bai den direkshon di BC. Afortunadamente no mester a aktua. E echo ku konstantemente mester tene polis i SKS ‘stand by’ ta kostando komunidat hopi plaka últimamente. Durante e enkuentro dos siman pasá na WTC i e siman akí, despues ku Aliansa Patriótiko a menasá di baha Gobièrnu, ta konstantemente tabatin polis i S.K.S. pendiente pa drenta akshon. Tur e efektivonan akí tabata trahando overtaim.

WILLEMSTAD – Den un intento pa informá outomobilistanan riba nan derechi pa stashoná nan vehíkulo na altura di e edifisio di Fundashon Kas Popular na Skalo, LA PRENSA a publiká 2 relato e siman akí. Awe nos ta publiká un último relato ku un splikashon amplio di e leinan vigente.
Den e ‘Memorie van Toelichting’ ku ta kompañá e ordenansa di tráfiko nobo di aña 2000, tin skibí, ku gobièrnu a disidí ku ta adaptá nos leinan di tráfiko na e sistema di Ulanda i usa e leinan di Ulanda komo punto di salida pa nos leinan. Esaki ta nifiká, ku e nifikashonnan di bòrchinan di tráfiko na Ulanda ta meskos ku esunnan di nos na Kòrsou. Den e ‘wegenverkeerswet 1994, uitvoeringsvoorschriften BABW (C1) tin un splikashon tokante e bòrchi E1 ku ta indiká un ‘parkeerverbod’. Esaki ta e bòrchi di tráfiko ku tin dilanti di The Movies i F.K.P. ku ta indiká ku ta prohibí pa stashoná un vehíkulo na e banda di kaya kaminda e bòrchi ta poné.
E parti prinsipal di e splikashon ta bisa; “Het einde van deze verboden wordt niet aangegeven indien dit reeds volgt uit een ander verkeersteken of uit een gedragsregel danwel uit de inrichting van de weg.” Den e kaso akí ta konta ku no mester indiká kaminda e prohibishon pa stashoná dilanti di F.K.P. ta kaba, pasó e bòrchi poné dilanti di F.K.P. ta indiká esaki outomátikamente. “Het einde van deze verboden wordt niet aangegeven indien dit reeds volgt uit een ander verkeersteken .......”

PORT ST. LUCIE, FLA – Despues di a haña e notisia ku e punta ku nan a mira durante di e tèst MRI na su selebre no ta kanser, Bobby Murcer tabata hopi kontentu i a ekspresá su gradesimentu na tur e fanátikonan pa nan sosten.
“Mi kier pa tur hende sa kon agradesido mi ta pa nan sosten”, asina Murcer a bisa e korant The Daily News for di su kas na Oklahoma City. “Tabata un kos spantoso. Mi no sa kon kompleho e kos aki tabata. Pero e punto ku nan a mira no tabata kanser i esei ta bon notisia”.
Murcer di 61 aña ta den un programa eksperimental spesial na M.D. Anderson Cancer Center na Houston.
E prosedura di e “biopsy” ku nan a realisá tabata kasi mes intenso ku e operashon na su selebre.
“Mi no tabata sa ku nan mester a bolbe drenta den mi selebre ku un angua”, asina el a bisa. “Henter e prosedura a dura alrededor di tres ora. Mi ta hopi kansa, pero satisfecho. Mi ta gradisí Bon Dios di a skapami”.
Murcer a bisa ku e tin planiá di pasa restu di spring training na su kas na Oklahoma City, sosegando. Pero el a hura ku e lo ta bèk den kaseta di transmishon pa apertura di temporada.

FORT MYERS, FLA – Boston Red Sox i e closer Jonatha Papelbon a yega na un akuerdo ayera di kasi dòbel su salario di aña pasá, firmando pa un kontrakt di un aña pa 775.000 dollar..
Papelbon tabata entre e 18 hungadónan ku a firma kontraktnan di un aña ayera. Esaki a pone ku e roster di 40 di RSox ta bou di kontrakt.
Papelbon a gana 425.550 temporada pasá, kaminda el a salba 37 wega den 40 oportunidat i tabata tin un era di 1.87. Ademas el a salba tres di e kuater viktorianan di RSox den Seri Mundial kontra Colorado.
El a bisa ku e kier a pone un “standard” pa futuro closernan hóben.
“Mi ta sinti un obligashon no solamente pa mi mes i pa mi famia di gana e plaka ku mi meresé, pero pa e wega di beisbòl”, asina el a bisa ayera. “Mariano Rivera ta hasiendo e trabou aki pa e último 10 añanan i ku ami ta biniendo su tras mi ta sinti sierto obligashon pa hasi meskos”.
E closer di 27 aña ta eligibel pa arbitrahe salarial otro aña.
Entre e otro hungadónan ku tambe a firma un kontrakt ayera tin Dustin Pedroia i Jacoby Ellsbury ku a firma pa 406.000 si e ta den Liga Grandi I 62.500 dollar si e ta den Liga Menor.
Clay Bucchols tambe a firma pa un salario di 396.000 dollar si e ta den Liga Grandi i 62.500 si e ta den Liga Menor.

Skina di Sorti, awe djabièrnè 7 di mart di 2008, ta kuminsá ku deseá tur hende un bon dia. Si ayera mi a mustra riba e inevitabel kaida drástiko den popularidat di PNP serka elektorado (konsekuensia primordialmente di eskoho di kartera ku elektoralmente ta kontené hopi riesgo i poko probabilidat di benefisio), awe mi ke mustra riba asuntunan ku otronan a faya garafalmente kuné den nan akshonamentu polítiko. Kosnan pa kual entre otro Skina di Sorti a mustra riba dje.
****
Na di promé lugá tin e kestion di kresementu di e malkontentu general ku polítika. Na novèmber di aña pasá por ehèmpel, Skina di Sorti ta atvertí, ku e tono den kual ta atendé ku otro i konsekuentemente e klima ku ta krea lo bai afektá polítika komo ramo. Mi a mustra ku e panorama polítiko di Kòrsou ta resultado di polítika reakshonario ku masha hopi antagonismo mes.
****
Pa lokual ta e aspekto di polítika komo instrumento pa atendé ku inkomodidat di elektorado e atvertensia kasi a bira un letania. Laga mi ripití un biaha mas ku e posishonamentu polítiko ni e aserkamentu gubernamental na nivel insular no ta sirbi komo instrumento pa hiba un gobernashon efektivo i efisiente. Tin un desperdisio enorme di e rekursonan skars di komunidat ku por ehèmpel yamamentu di reunion ku sea no ta tuma lugá, ta keda deskontinuá òf ta resultá den diskushon riba futilidat en bes di debate serio.

Krísis di Bogotá ku Quito i Caracas sentro di atenshon na kumbre na Repúblika Dominikana

SANTO DOMINGO, - E di XX Kumbre di Grupo di Río di paisnan latinoamerikano awe a kuminsá na Repúblika Dominikana den un klima di tenshon haltu p’e krísis entre Colombia i Ecuador, na kua Venezuela i Nicaragua a uni, i e insertidumbre ku e reunion aki por sirbi pa un diálogo.
E konflikto aki a bira sentro di atenshon i e posibilidatnan di un aserkamentu diplomátiko ta aspekto di mayó interes di e kumbre aki ku Hefenan di Estado i di Gobièrnu, apesar ku no a inkluí e tema aki den agènda.
Deliberashonnan di e kansiernan a kuminsá ayera na Santo Domingo enbuska di konsenso pa e dokumento presentá den e kumbre i di kua e teksto te na e momentu aki no a hasi menshon di e konflikto.
Ayera nochi, Presidente dominikano Leonel Fernández a risibí mandatario colombiano Alvaro Uribe den su ofisina i despues a brinda un sena na e kansiernan.
Grupo di Río tin reunion awe na Santo Domingo, loke lo obligá Presidente colombiano Alvaro Uribe, sinta na mesun mesa ku su koleganan di Ecuador Rafael Correa, i di Nicaragua Daniel Ortega, kendenan a kibra relashon ku su pais, i ku Hugo Chávez ku kende e tin lunanan di tenshon i interkambio di akusashonnan.
Nicaragua ayera a uni ku Ecuador kibrando relashon ku Colombia. Presidente nikaragwense ta konsiderá Colombia peliger pa e region, miéntras akshon di OEA apénas ta logra suavisá e tenshonnan di un di e krísisnan mas profundo entre Gobièrnunan latinoamerikano di último dékadanan.

WASHINGTON, - Barack Obama a realisá esaki riba e 35 mion dollar di su rival demókrata, Hillary Clinton, asina kampaña di e senador di estado di Illinois a anunsiá.
Ku sifranan di luna pasá, Obama ya a logra 193 mion dollar pa su kampaña.
E anunsio a yega solamente dos dia despues ku e senador a pèrdè na tres di e kuater elekshonnan primario ku a keda realisá djamars último na Ohio, Texas, Rhode Island i Vermont, e úniko estado kaminda Obama a gana.
E viktoria di e dama senador di New York a oumentá insertidumbre riba futuro di e karera demókrata i a frena empuhe di Obama, kende a akumulá 10 viktoria konsekutivo promé ku e elekshonnan di djamars último.
Esun di febrüari ta e di dos rèkòrt di rekoudashon di Obama, kende a bati e promé rèkòrt na yanüari ku 36 mion dollar rekoudá, mas ku niun otro aspirante pa presidensia den e elekshonnan primario realisá te ku awor aki.
Di su banda, e kampaña di Clinton a anunsiá ku a rekoudá 4 mion dollar via Internet for di dia di e elekshonnan primario di djamars.
Asesornan di e dama senador a sigurá ku e fondonan a keda rekoudá fo’i dia di siere di urnanan djamars último, te djaweps mèrdia.
E kampaña a anunsiá ku 30.000 donante a aportá ku fondonan for di djamars último, i ku ya a logra 6 mion dollar via Internet e luna aki.

Foto: Barack Obama 0703

WILLEMSTAD – UTS ta brinda tur su fiel klientenan di Kòrsou i Boneiru e posibilidat pa gana sèn kèsh òf un KIA den e tremendo kampaña nobo di TeleCuraçao ‘Kanta Bingo ku Blinko’. UTS ta sumamente orguyoso i kontentu di por ta huntu ku nuebe otro kas komersial atrobe un di e partnernan den e kampaña aki.
Pa partisipá ku UTS na e tremendo kampaña aki ta fásil. Un kliente ta risibí un lòt mustrando òf kambiando su komprobante despues ku e:
- Paga su resibu di telefòn di kas, selular Chippie, TDS òf di ADSL. (1 lòt pa kada Naf. 25 ku un máksimo di 25 lòt pa kada resibu);
- Rekargá Chippie òf Telefásil, (1 lòt pa kada Naf. 25);
- Sera un kontrakt di OneNet pa 2 aña (10 lòt);
- Sera un kontrakt di selular postpago pa 2 aña (10 lòt);
- Pidi un instalashon di Telefásil (1 lòt pa kada Naf. 25);
- Pidi un instalashon di telefòn di kas (1 lòt pa kada Naf. 25);
- Inskribí pa bira miembro di TDS (1 lòt pa kada Naf. 25)
No ta importá kon e kliente paga su resibunan òf rekargá su Chippie òf Telefásil, basta e bin ku e komprobante (p.e. via banko, Sentro di Kliente òf Internet).
Esaki ta konta tambe pa klientenan ku rekargá nan Chippie i Telefásil. Nan mester mustra òf kambia e karchi uzá òf un komprobante, si ta via otro sistema nan a rekargá (p.e. Util, E-pin, bankomátiko).

WILLEMSTAD - 15 Kursista a risibí nan sertifikado di formashon personal ku kontenido di motivashon laboral, planifikashon i téknika empresarial. E kurso aki ta dirigí riba hóbennan ku ta deseá di drenta proseso laboral. Un kurso di personanan ku ta solisitá na 2nd Chance Uitzendbureau. E kurso aki ta den estrecho koperashon ku Fundashon Willem Evertsz (MCB) i SNAYDP pa finansiá e proyekto den kua ta prepará tur e hóbennan aki pa subi merkado laboral di un manera bon. E kurso aki ta kontené temanan dirigí riba formashon personal, meskos tambe motivashon laboral. Tambe lo trata temanan ku ta yuda nan planifiká ku téknikanan empresarial. un di e temanan ku sigur no ta pèrdè for di bista ta esun ku ta yuda nan kon atendé ku finansa.
Aparte di e parti teorétiko tin práktiko, ku nan ta bishitá empresanan den e komunidat pa haña un bista kon e parti di laborá ta tuma lugá. Dor di partisipá den e entrenamentunan aki e hóbennan por drenta sosiedat bèk ku un base sólido i ku un trabou digno. Durante e kurso e kursistanan a haña e chèns pa mira riba e flur di trabou. E grupo aki a bishitá WTC i pasa diferente di e empresanan pa mira kon e empresanan aki ta traha.
Tambe nan a bishitá e konstrukshon Renaissance Hotel i aki tambe nan a haña sa hopi kos. Awor 2nd Chance ta buska trabou pa nan i trabou ku ta pas pa kada un di e kursistanan ku a terminá e kurso ku éksito. E trabou lo ta riba un base duradero i sigur. Durante e entrega di e sertifikado a gradisí pa e kontribushon ku a bin di Fundashon Willem Evertsz, SNAYDP, Burton Daal i Dairon Naarden. E entrega di sertifikado a tuma lugá na Plaza Hotel den Punda Room. E kombinashon di foto ta ilustrá entrega di sertifikado.

WILLEMSTAD – Otro siman Jean Carlo da Silva, Diana Rigaud i Arthur Nieuw ta sali pa Antártika pa djòin un ekspedishon di Robert Swan. Robert Swan ta e promé persona ku a kana yega tantu Zuidpool komo Nortpool na pia. Awendia Robert Swan ta dediká su tempu na konservashon di Antártika i kombatimentu di “Global Warming”.
Swan i su ekipo di mas o ménos 6 otro persona ta na Antártika kaba i ta biba den e-base. Einan e paisanonan ta bai topa nan dia 14 di mart. E-Base (Base Edukashonal) ta un base chikí traha kompletamente di material resiklá ku otronan a bai laga na Antártika. Fuente di energia di E-base ta solo i bientu. E propósito di E-Base ta pa duna hóbennan rònt mundu oportunidat pa opservá bida na Antártika i tambe haña mas informashon di “Global Warming”, kambio klimatológiko, i protekshon di Medio ambiente. E-base ta usa mas poko energia posibel i ke propagá e pensamentu aki.
Dia 13 di mart Kòrsou lo tin un “Live Chat” ku Robert Swan bibu i direkto for di Antártika. E “live chat” aki ta kuminsá 8.30or di mainta i ta keda transmití via di e programa “Mòru Bon Dia” na Tele Kòrsou. Tambe e lo keda transmití na e mes momentu na Radio Hoyer i Z 86. Via di e ‘live chat’ aki hóbennan lo haña e oportunidat di hasi pregunta na Robert Swan den kuadro di e protekshon di medio ambiente i “Global Warming”.

WILLEMSTAD – Curaçao Lions Club ayera a firma e statutonan pa lanta Fundashon Duna e Mucha un Man pa sigui duna e mucha yudansa. No mester ta un sorpresa ku un mucha ku no por probechá di por ehèmpel un desayuno, no por presta optimal na skol. Konsekuentemente e mucha no por tin tinu na su lèsnan i ta bira un dropout. Esaki sigur tin un impakto grandi riba e komunidat, pasobra esaki tambe ta pone ku kriminalidat riba e isla ta subi. Lions Club semper tabata preokupá pa e situashon aki i p’esei eksaktamente 10 aña pasá a kuminsá ku e proyekto “Duna e Mucha un Man”.
Meta di e proyekto aki ta, pa evitá ku e mucha ta kai den mal sirkulo dor di duna nan un man. Un man ku literalmente ta konsistí di 5 dede ku lo fungi pa traha riba un mihó futuro pa nan mes i nan komunidat. Durante e último 10 añanan aki e proyekto a krese konsiderablemente i p’esei a opta pa lanta Fundashon Duna E Mucha Un Man.
E dede ku ta mas konosí pa tur hende ta e dede di desayuno na skol pa mas ku 1300 mucha diariamente. Mester tene na kuenta e fundashon Duna e Mucha un Man ta bai hopi mas leu ku esaki so. Parti di e proyekto aki tambe ta:
Proveé e mucha ku ‘naschoolse aktiviteiten’ pa medio di guia ku tarea eskolar, rekreashon i aktividatnan deportivo;
Guia sosial kaminda eventualmente ta buska ‘pleegouders’ pa e muchanan pa nan fungi komo guia i mentor pa e muchanan;
Proveé e mucha i e mayor ku guia riba e parti di edukashon, nutrishon, informashon seksual, norma i balor, adikshon i maneho finansiero, etc. etc. i

WILLEMSTAD – E proyekto pa rekoudá fondo pa restourá e aula di Huize Habaai a lanta gran interes. For di 1995 e sala a keda será pa motibu ku no por hasi uso di esaki pa motibu di mantenshon. E fundashon ku tin e proyekto aki bou di nan enkargo a disidí un tempu laga tur kos keda drumi den lachi, ya ku no tabatin masha interes den komunidat pa duna un sosten finansiero na Huize Habaai pa e proyekto aki. awe e proyekto aki ta keda balorá mas di 1 mion florin pa por keda restourá i ku lo drenta den akshon pa e proyekto aki por keda konkluí.
Resientemente Ministerio Bida Abundante a anunsiá e konsierto gospel “Laga nos ta un” ku lo tuma lugá dia 20 di mart próksimo den Curaçao Festival Center, ku lo bai rekoudá fondo komo e promé stap pa yega na restourashon di e aula aki. E aula aki tabata un sala di enkuentro pa e grandinan kaminda ántes nan fiesta nan tabata tuma lugá. E aula aki tabatin presentashon di musika klasiko di tempu di Shell i fiestanan di bailenan di elegansia. Ademas tabata un sala di enkuentro pa muchanan di skol ku un tempu atras tabata pasa momentunan agradabel. Den e sala aki vários komedia pa muchanan di skol a keda presentá, meskos ku otro aktividatnan.
E sala aki sin duda ta hasi falta i pa motibu aki ta hasi ku Huize Habaai mester plama e habitantenan, ya ku no tin un sala kaminda por agrupá tur hende huntu pa un selebrashon spesial. Por tuma nota ku den oranan di atardi mester pone algun di e grandinan bou di palu, den pasio i tambe den hardin. Esaki naturalmente ta trese kuné ku mester di personal repartí pa tira bista. Pa falta di un espasio ta bira sierto momentu inkómodo pa mobilisá e grandinan aki, ya ku tin momentu ku nan ta wòrdu aislá for di nan propio ambiente i kustumber.

MINGELI
Marvis Marcela (repentino 55 aña)
A laga atras su mama Crisma Mingeli, yunan Cholaica Mingeli i Jackson, Sharlon i Evi Mingeli, Gregori Mingeli, Marioneta Paulina. Akto di entiero ta djasabra 8 mart for di El Consolador pa santana Brievengat. Bishita 10or. Promé ku entiero tin un respòns 4or na El Consolador. Trahe alegre.

ROSALINA
Arturo Francisco
Mihó konosí komo Broertje
A laga atras su kasá Xiomara Rosalina-Cannegieter, rumannan Maureen i Eddy Michel-Rosalina, Diana i Edward Merencia, Rogia Martus-Rosalina, Nestor Roslaina, Maurits Rosalina i Milushka de Geus, suegro(a)nan Elvia Cannegieter-Desbarida, Crispino Cannegieter. Akto di entiero ta djasabra 8 mart for di misa Sta. Rosa pa santana Bethania. Bishita 12or-3or. Promé ku entiero tin un s.s. di misa.

STATIA-PETRONA
Servia Maria
Mihó konosí komo Sibia
A laga atras su yunan Mildred, Melfrin, Sonny, Izaira Statia, Vivian Statia i Jacinto Sint Jago, Sharine Statia i Peter Hulsman, Mareline Statia i Noy Neuman, Errol i Norma Felix. Akto di entiero ta djasabra 8 mart for di misa Montaña pa santana Montaña. Bishita 1or. Promé ku entiero tin un s.s. di misa 3.30or.

ADAMUS-ZIMMERMAN
Mercelina
Mihó konosí komo Chelin
A laga atras su yunan Jorge Adamus i esposa i yunan, Godfried Adamus, esposa i yu, Lydia Adams i yu, Ruthline Willems-Adamus, esposo i yunan, Cornelis Adamus, Bernadette Fonce i yu. Akto di entiero ta tuma lugá djamars 11 di mart na Ulanda.

WASHINGTON, - E promé enkuesta realisá despues di konfirmashon di ku John McCain lo bai ta kandidato republikano no tabata presisamente faborabel pa e veterano aki di Vietnam.
Segun último sondeo di Washington Post-ABC News, e dos aspirantenan demókrata Hillary Clinton i Barack Obama tin bentaha riba e republikano, kende asina a pèrdè su kondishon di faborito for di apénas un siman.
E enkuesta emití ayera den edishon digital di e korant merikano a anunsiá ku Obama ta konta 12 punto di bentaha den un duelo hipotétiko ku McCain novèmber benidero, kende ya ta konta ku e delegadonan nesesario pa keda proklamá kandidato pa su partido.
Di su banda, segun e mesun enkuesta aki, Clinton lo logra 6 punto di diferensia riba e kandidato republikano, kende su edat di 71 aña, tambe ta un opstákulo den opinion di esnan entrevistá, ya ku e lo bira e Presidente ku mas edat skohé pa un promé mandato.
Segun e sondeo, ta dòbel esnan ku ta alegá edat di e kandidato republikano frente “esnan ku ta mustra mas entusiasmo” apoyando Obama pa ta afroamerikano òf Clinton pa ta hende muhé.
E pòtrèt di McCain kaminda e ta haña “bendishon” di un di e Presidentenan mas impopular di tur tempu, George W. Bush, lo por a influensiá den kaida di su popularidat.
Segun sondeo, dos terser di merikanonan a rechasá e manera ku Bush a hasi su trabou i mayoria “ku firmesa” a opiná ku no ta bal la pena e lucha na Irak.

Lorito ta yama tur hende un felis djabièrnè. Asina un otro djabièrnè mas a yega rápidamente i bida ta sigui!
****
Danki Dios Lorito no a pone ku e enkuesta ku nos a papia di dje ta di PNP. Lorito a bisa ku tabatin un enkuesta i nos a defendé nos fuentenan. Nos sa ta ken pero nan a pidi nos pa no bisa ta ken! Si otronan a kue nos informashon i hasi algu otro ku ne ta pa nan responsabilidat. Lorito ta sigui a la karga. Sigui lesa Lorito pa mas primisia nashonal!
****
Lorito a sigui tambe di serka e desaroyonan rondó di nombramentu di Chebu Sluis na Dòk. Por sierto ku Lorito ta e promé ku a informá riba e intenshon aki. Lorito mester bisa ku e manera ku ta reakshoná riba e kaso aki a krea disgustu serka nos.
****
Nos a bisa kaba anteriormente ku a disidí ku ta sigui un proseso habrí i transparente. Awor na final di e proseso aki no por bisa ku e kos no a bai bon. Bo ta afektá e kandidatonan, bo ta afektá kredibilidat di SOAB/Deloitte, bo ta afektá kredibilidat di partido i su fundeshi ku ta di no hasi ku otro loke bo no kier pa otro hasi ku bo. A buen entendedor!
****
Un hende ku nos tin masha apresio pa su posishonamentu ta Kenneth Gijsbertha. E ta stima su pais, e ta dispuesto pa hasta kontra su mes hendenan den partido tuma posishonnan ku ta linea rekta kontra e pensamentu general ku ta biba basta esei ta pa un bon kousa. Kenneth lo ta un bon hende pa trèk un proseso pa atendé e situashon na Kòrsou huntu ku algun otro hende. El a demostrá su abilidat kaba den pasado pa uni tur hende, den e kaso di orkan Ivan.

WILLEMSTAD/PHILISBURG - Komunidat no sa mira e kos aki pasa, sigur no públikamente, pero e siman aki Ministerio Públiko na Sint Maarten a pidi despensa pa un vupa ku a kometé den un investigashon. Den e kaso di investigashon di un robo grandi ku a tuma lugá dia 7 di desèmber último na Aeropuerto Internashonal di Sint Maarten a detené e empleado di Gobièrnu di Sint Maarten, Tamara Bell ku ta traha na Registro Sivil di e isla. Ministerio Públiko ta bisa, ku detenshon di e dama tabata un kasi di “identidat robes”.
Den un karta pa hefe di sra. Bell, fiskal mayó Taco Stein ta apsolv’é e dama di kualke akusashon i a bisa ku outoridatnan a buska e persona robes. Sra. Bell tabata un di e hendenan interogá den e kaso di robo di mas ku 860 mil dollar na prenda. Den e kaso aki tabatin detenshonnan tambe na Kòrsou di rumannan Martines. Un di nan ta detené ainda. Sra. Bell mes a bisa, ku loke a pasa ta masha lamentabel. “Mi ta spera ku aki 5 aña nan no ta mustra dede riba mi ketu bai”, asina el a komentá. Stein a bisa, ku e investigashon ta sigui i ku por spera mas detenshon den e kaso aki.

WILLEMSTAD – Si Franklin “Chebu” Sluis den un prosedura di solititut habrí a resultá e mihó kandidato pa e puesto na Dok, mester nombr’é na e puesto. Esei ta opinion di eks minister Kenneth Gijsbertha (MAN) ku a traha estrechamente ku Sluis den pasado.
Gijsbertha a bisa LA PRENSA awe mainta, ku el a tuma nota di e diskushon rondó di nombramentu di Sluis komo direktor di Dok. “Mi tabatin e previligio di por a traha ku Sluis den mi kalidat komo minister di Tráfiko i Komunikashon. Sin importá koló polítiko mi a nombré na kabes di e komishon ku a asistí mi den negosiashonnan ku CPIL/Canadian Post. Mi mester bisa honestamente, ku Chebu huntu ku otronan (manera Suzy Römer i Etienne Ys etc) a hasi un tremendo trabou i mi ta sigur ku ta danki na e trabou di Chebu i e komishon ku awe nos a keda kla ku CPIL/Canadian Post na un manera satisfaktorio”, asina Gijsbertha a bisa.
Gijsbertha a lamentá, ku tin diskushon riba nombramentu di Sluis, sigur si konsiderá ku ta SOAB a kondusí e solisitut. “Si kuestioná kandidato di Sluis ta igual na trese duda den un di nos institutonan di mas importante ku pueblo mester tin konfiansa den dje ku ta SOAB. Si Chebu ta mihó kandidato mester nombr’é. Pa kolmo aki ta trata di un di nos hende lokal ku a demostrá kon via "de lange weg" por alkansá un nivel di estudio tòp”, asina Gijsbertha a bisa referiendo na e hecho, ku Sluis resientemente a gradua pa su Ph.d.

WILLEMSTAD – Diputado Eugène Rhuggenaath, e di dos riba lista di PAR, ta menasando ku retiro. Su intenshon ta relashoná ku e intenshon di Hunta di Komisario di Curacaose Dokmaatschappij (CDM) pa nonbra dr. Franklin “Chebu” Sluis komo próksimo direktor di e kompania. Kiko eksaktamente ta su problema ku e nombramentu no ta masha kla. Rhuggenaath ta responsabel pa e kartera di Dok. Aparentemente e diputado ta alegá ku no a inform’e na tempu di e proseso. Ademas Rhuggenaath a mustra riba e hecho ku Sluis tin un kondena pa falsifikashon, pero den e referenshanan ku a pone pa nombra un direktor nobo no a pone niun kaminda ku si un hende tin un kondena (ku el a kumpli kuné) no tin sentido pa solisitá. Es mas, reportadamente diputado Rhuggenaath e siman aki a presentá kandidatura di Ramon Chong (hefe di Servisio di Asuntunan Ekonómiko) pa dirigí e proseso di privatisashon di Curaçaose Dokmaatschappij. Chong, un eks diputado di Partido Nashonal, a haña un kondena kondishonal pa korupshon den pasado.
Informashonnan ku LA PRENSA ta disponé ta indiká ku Rhuggenaath a informá lider polítiko di PAR Emily de Jongh-Elhage e siman aki ku e tin masha problema ku postulashon di Sluis. E siman aki ya kaba un tim di Hunta di Komisario di Dok a duna lus bèrde pa firma un akuerdo di trabou ku Sluis pendiente aprobashon di Hunta di Komisario. Un reunion di Hunta di Komisario ku mester a tuma lugá ayera pa ratifiká e desishon no a sigui, aparentemente pa motibu di e desaroyo nobo ku a surgi. A disidí ku e presidente-komisario di Dok, Nelson Vinck lo papia ku e diputado mañan riba e postulashon di Sluis pa despues PAR mes reuní riba e kaso aki. E reunion di PAR lo ta 1’or di mèrdia.

WILLEMSTAD – Frakshon di PAR den Parlamentu ta lamentá e echo ku atrobe un pashènt sikiátriko a muri pa falta di ayudo. Esaki mesora ta bira e promé reakshoná polítiko, riba morto di pashèntnan sikiátriko último tempu. Parlamentario Jacqueline Spencer di PAR, den un karta dirigí na minister di Salubridat Públiko Omayra Leeflang, ta ekspresá preokupashon di su frakshon.
E siman akí atrobe un pashènt sikiátriko a bira malu i muri, miéntras famianan tabata trata na haña ayudo durante algun ora. E kaso akí a sosodé nèt na momentu ku Inspekshon di Salú ta na punta pa saka un rapòrt di un kaso similar, kaminda e pashènt Sovyendy Kopra a muri den un ambulans dilanti di warda di Polis na Punda. Promé ku e dos kasonan akí, e pashèntnan Gershwin La Croes i Orlando Amerikaan tambe a muri den outo di polis despues ku nan a bira agresivo. E promé kaso a tuma lugá dia 4 di mei 2007.
Spencer ta menshoná den su karta ku frakshon di PAR den Parlamentu ta lamentá, ku atrobe un pashènt sikiátriko a muri pa falta di ayudo, despues ku aparentemente niun instansia por a duna asistensia. “Nos frakshon ta hopi preokupá i ta p’esei nos a manda aña pasá un karta pa minister Leeflang pa laga e departamentu di Inspekshon di Salú hasi un investigashon riba e kaso di Kopra, ounke minister Leeflang tambe tabata e tempu ei riba e mesun linia ku nos frakshon. Mirando ku ni un aña a pasa, ainda no a yega na un maneho pa ku e instansianan ku ta duna kuido i transportá pashèntnan sikiátriko agresivo bou di influensia di droga. Nos frakshon ta haña ku esaki ta tarda i nos lo ke vigilá e kalidat di kuido. Ora un persona bira malu e mester haña yudansa di emergensia.”