ORANJESTAD- Sector di Distribucion di Awa di W.E.B. Aruba N.V. ta bay ehecuta trabounan necesario riba e red di distribucion di awa den districto di Sta. Cruz. E trabou ta riba e caminda principal di Mundo Nobo Supermarket te na warda di Polis unda nos lo remplasa un tubo bieu di 5 duim y pone un tubo nobo mas grandi di 8 duim.
E ta riba un distancia di 978 meter y lo mester sera trafico riba e caminda menshona pa salvaguardia seguridad di trafico y di e trahadornan.
E trabou ta un inversion di casi 400 mil florin y ta wordo ehecuta pa e contratista local Eddy Ruiz Construccion N.V. y lo ta bou supervision di departamento di proyecto di Sector di Distribucion di Awa di W.E.B. Aruba N.V.
E caminda principal di Sta. Cruz entre Mundo Nobo y Warda di Polis lo ta sera riba e riba dianan di trabou entre: di 17 di mart y 2 di april. E orario di sera caminda tambe ta den oranan di trabou, pues entre 8:30 di mainta pa 4’or di atardi.
Gerencia di W.E.B. Aruba N.V. ta pidi comprension pa e incombinencia aki.
E trabounan aki ta pa garantisa suficiente capacidad di awa di bebe pa e districto y besindarionan den Sta. Cruz. Un palabra di danki ta bay na Polis cu ta copera pa e seramento di caminda. Ta pidi publico y specialmente chaufeurnan pa tene cuenta cu e seramento di caminda menshona.

ORANJESTAD- Dianan 11 pa 13 di april proximo, Aruba lo bira e sede na unda lo tene e conferencia di Districto 42 di Quota International un biaha mas. E districto 42 ta ensera Hulanda, Suriname, Corsow, St. Maarten y Aruba. Esaki lo ta di tres bes cu e conferencia aki ta tuma lugar na Aruba. Aña pasa ela tuma lugar na Paramaribo, Surnam. Esaki ta nifica cu varios miembronan di Quota International di e paisnan cu ta menciona lo bin Aruba pa atende e conferencia. Te cu awor ta spera un total di 30 invitado for di exterior di e diferente paisnan hunto. Cu e miembronan di Aruba e ta bira mas o menos 75 delegado cu lo participa den e conferencia.
Ademas di esaki, Quota International di Aruba a ricibi e noticia cu lo bin bishitantenan ehecutivo di Directiva di Quota International for di Merca. Un di nan ta e South Area Director di Quota International Sra. Gwen Jackson, un medico di profesion cu ta sumamente contento di por bishita e club di Aruba. Manera ta conoci, aña pasa, nos propio Arubana Sra. Enid Croes Marugg tabata forma parti di e Directiva Internacional y a carga e funcion di Presidente Internacional di Quota. Den e districto 42 e club di Aruba ta esun di mas grandi te cu awor.
Aruba ta un club hopi dinamico y ta wordo reconoci pa e trabounan cu nan ta desplega den Quota. E delegacion di Hulanda cu actualmente tin 3 club lo ta presente na Aruba na unda nan lo topa cu e delegacion di tanto Suriname, Corsow, St.Maarten y naturalmente e miembronan di e club di Aruba.
Tin un programa hopi extenso prepara tanto den e diferente session cu lo tene entre e miembronan di e club na unda entre otro lo tin raportahenan di logronan di diferente proyectonan social y cu ta bai bek pa e causanan comun cu nan ta traha pe. Tambe tin un programa pa recori Aruba y sera e invitadonan mas conoci cu nos isla y lo bishita proyectonan di Quota Aruba.

ORANJESTAD- Diaranson ultimo 5 di maart 2008, Kiwanis Club of Aruba tabatin e placer di por
a instala sr. Maarten van Oosten como miembro nobo.
Kiwanis ta un organisashon global di voluntarionan dedica na cambia e mundo pa via di un mucha y un comunidad cada biaha y tin como lema: sirbiendo e muchanan di mundo. Kiwanis Club of Aruba ta activo den e comunidad Arubano desde 1965. Pa mas informashon di Kiwanis Club of Aruba y of su actividadnan por acudi na www.kiwanisaruba.org. Tambe por bishita e website di kiwanis Internacional na www.kiwanis.org.
Ariba e potret adhunto por mira sr. Maarten van Oosten
Riba e siguiente potret di robes pa drechi por mira sr. Radi (sponsor), sr. Ray (Past Lt. Governor), Kiwanette Natalie Doorenbos, sr. Maarten van Oosten y sr. Ebby Schwengle (President).

ORANJESTAD- Un biaha mas nos ta celebra Dia Internacional di Hende Muhe. Un dia importante cu a keda introduci pa Nacionnan Uni.
Tema pa e aña aki ta: "Financing for Gender Iquality".
Semper ta keda importante pa riba un dia asina aki pone atencion riba e situacion di e ser femenino na Aruba. Mas importante ainda ta pa nos mes como hende muhe para un rato keto y puntra nos mes unda nos ta awe en comparacion cu aña pasa. Nos a bai dilanti? Y si nos a bai dilanti, den kico nos a bai dilanti?
Lamentablemente contesta riba e prome pregunta pa hopi hende muhe lo ta un NO rotundo. Pasobra igualdad di genero ainda ta laga hopi di desea aki na Aruba.
Awe riba Dia Internacional di Hende Muhe, mi kier a felicita tur hende muhe na Aruba, pero mi ta conciente cu e felicitacion aki ta keda djis locual e ta: un felicitacion.
Pesei mi kier a conseha tambe nos hende muhernan pa nan realisa cu nos no mester laga nos situacion keda depende di otronan. Nos mester tuma destino den nos man. Nos mes mester sacrifica pa nos mes. Awendia (casi) nada no ta cai for di shelo. Traha pa bai dilanti, sigui curso den oranan liber, sigui un estudio profesional etc. Esaki ta nifica un sacrificio grandi pa algun tempo, pero e satisfaccion na final lo resulta di ta impagabel.
Ki balor palabranan bunita tin riba Dia Internacional di Hende Muhe, si den praktica esaki no ta keda refleha.
Pesei, como Presidente di Comision Nacional di UNESCO Aruba, mi kier a conseha tur hende muhe, pero muy en particular esnan cu no a haya e oportunidad (ainda) pa por percura pa nan mes, pa tuma destino den bo man y envolucra bo casa, partner, amigo of amiga den esaki. Y semper sea orguyoso di ta hende muhe. Asina berdaderamente nos lo duna contenido na e celebracion di Dia Internacional di Hende Muhe. Celebra e dia di awe pensando kico abo como hende muher kier logra pa bo mes.

Segun Serge Mansur di Democracia Real

ORANJESTAD- Tur hende por corda con na luna di Maart 2004 dos minister, esta ministernan Croes y Wever a dicidi di sera porta di nan respectivo departamentonan pa Centrale Accountants Dienst (CAD). Esaki no solamente ta en contra di tur principionan di bon gobernacion y transparencia, pero ta en contra di leynan di contabilidad of otro leynan cu posiblemente por ta aplicabel.
Den un caso asina, caminda cu un of mas ministro ta tuma un decision irresponsabel, ta bira tarea di e lider di e Gobierno en cuestion pa coregi esaki. Lamentablemente, apesar di tur e protestanan encontra di e forma di actua di e dos ministronan, nos prome ministro a dicidi di hunga ciego, sordo y mudo den e caso aki.
Desde e dia cu e dos ministronan aki, cu apoyo tacito di nos Prome Ministro, a nenga di laga CAD controla nan departamentonan nos comunidad a wordo sorprendi cu:
Un fraude enorme den Landslaboratorium.
Sorpresa di un deficit enorme den AZV.
Un posibel fraude grandi den Departamento di Ambulance.
Benta di rijbewijs.
Sorpresa di un deficit enorme den Serlimar.
Aparente benta di permiso.
Lo no ta nada stranjo si nos ta hanja nos mes confronta cu mas sorpresa desagradabel for di e respectivo departamentonan di (entre otro) e dos ministronan aki.
Mester señala cu no tin ningun prueba di complicidad di e dos ministronan en cuestion den e casonan aki, pero e hecho cu nan a stroba e departamento encarga cu control den Gobierno di hasi su trabao ta lanta hopi pregunta. Y hasta si nan no tin ningun involvimento den e escandalonan aki, nan huicio mester wordo cuestiona seriamente. Mescos ta conta pa Prome Ministro cu a tolera e situacion aki.

WILLEMSTAD – Un dama a muri awe mardugá, ora e vehíkulo ku e tabata sintá aden a aksidentá. E aksidente a tuma lugá na e lusnan di tráfiko na Fokkerweg na altura di Mc Donald i Kentucky. Polis a identifiká e víktima komo Maritsa Martina-Mathilda nasé na Kòrsou dia 19 di òktober 1948. E tabata biba na Kaya Sambarku.
E aksidente a tuma lugá den kareda di 4’or di mardugá. E shofùr di e outo den kua e víktima tabata sintá, tabata koriendo riba e kaminda di Lam Yuen Restorant bayendo den direkshon di e lusnan di tráfiko na altura di Mc. Donalds i Kentucky. Na e krusada e shofùr a bai hasi un ‘bògt U’ pa e lora i bai bèk den direkshon di Lam Yuen. Nèt na momentu ei un pikòp tabata aserkando for di direkshon di Parera. E choke tabata inevitabel i e pikòp a dal violentamente den e outo. E víktima ku tabata sintá na e banda kaminda e pikòp a dal, a frakturá su kurpa di tal forma ku el a muri na e sitio mes. Un total di 5 persona a sali leshoná for di e aksidente, di kua un di nan su situashon ta hopi grave.
Maritsa Martina-Mathilda a bira e di tres morto den tráfiko pa e aña akí. Anteriormente e hóben Keesje Lake di 20 aña di edat a muri, ora e vehíkulo ku e tabata sintá aden a dal den un muraya di kurá di blòki dia promé di yanüari mainta tempran. E di dos víktima tabata e dama ulandes oropeo Karen Flameling di 43 aña di edat, ku a muri dia 19 di febrüari último. E tabata kanando patras di Bon Biní Supermarket, ora el a krusa dilanti di un trùk di shushi di Selikòr sin paga tinu. E trùk a pasa riba dje i herid’é mortalmente.

 WILLEMSTAD - El a keda basta ratu sinta sin por a move, despues ku a anunsiá ofisialmente ku el a gana e distinshon komo Hende Muhé Mas Sobresaliente. Despues el a realisá ku ta e mes nan a kaba di anunsiá komo e ganadó di e aña aki. Mila Palm a destaká pa dékada riba tereno di enseñansa i a hasi un diferensia enorme den formashon di nos hóbennan. Un hurado di eksperto a deliberá dianan largu riba 4 nominado i finalmente nan a koinsidí ku e premio mester bai pa Mila Palm ku tabata hopi konmové ku e distinshon, un plaka di spil ku un sapatu di hilchi di oro riba dje. Riba e pòtrèt por mira e ganadó den kompania di Reyna Joe di e kompania Brights Ideas & Services, ku a organisá e evento i miembro di hurado Orphaline Saleh. (Foto eksklusivo LA PRENSA)

SANTO DOMINGO, Repúblika Dominikana, - Presidentenan di Colombia, Ecuador i Venezuela ayera a seya un pas simbóliko dunando otro man ku a baha tenshon den e krísis grave diplomátiko, originá pa morto di un lider gueriero di FARC na teritorio ecuatoriano.
Efektivonan militar colombiano siman pasá djasabra a protagonisá un inkurshon den selva ecuatoriano durante kua e di dos hòmber di ‘Fuerzas Armadas Revolucionarias de Colombia’ (FARC), konosí komo Raúl Reyes, a muri.
Ecuador a kalifiká e echo komo un “agreshon”, ku ademas a risibí apoyo di Venezuela i Nicaragua eksigiendo un kondena internashonal pa Gobièrnu di Alvaro Uribe.
Despues di un hornada kompletu di akusashonnan mutuo, mandatarionan di e tres paisnan andino a aksedé petishon di anfitrion di e kumbre, Presidente dominikano Leonel Fernández, di mustra dor di tene man e intenshon ku e konflikto no a eskalá, ounke a mantené algun reserva.
“I ku esaki, komo pais, e insidente gravísimo aki ku a kousa nos asina tantu daño a keda superá”, Presidente di Ecuador Rafael Correa a bisa, pa momentunan despues agregá ku “e problema ta sigui latente”.
E Presidentenan i e delegadonan di Grupo di Río, reuní na kapital di Repúblika Dominikana, a aploudí e gesto i a dal gritunan di alegria na momentu ku Presidentenan di Colombia, Ecuador i di Venezuela a duna otro man.
Despues, Uribe tambe a pidi pa duna su kolega nikaragwense Daniel Ortega man, kende a yega di ekspresá su respaldo apsoluto na eksigensianan di Ecuador.

Skina di Sorti, awe djasabra 8 di mart di 2008, ta kuminsá ku deseá tur hende un bon dia. Polítika su esenario no ta unu manera di tarima na un instituto di formashon kaminda ta tene diskurso i eksposishon di konosementu teorétiko. Polítika ta esenario pa influensia direkshon di pais. Si mi tira un bista riba e kontigente polítiko di awor aki, mi apresiashon pa hopi lo ta ku nan ta “gewogen en te licht bevonden”.
****
Komo ku polítika na Kòrsou a para bira meramente un guera di imágen, e tendensia pa skohe pa personanan ku supuestamente ta kai bon i ta “de liefste jongens en meisjes uit de klas” ta resultá den un kantidat eksagerá di “ja knikkers”, “crowd pleasers” i “puppets on a string”. Tin masha poko personalidat. Sigur na nivel insular di Kòrsou, un siguidó krítiko di polítika no tin motibu pa entusiasmá.
****
Na vários okashon mi a skirbi ku mi ta konsiderá èks minister Rita Verdonk un bon gobernante. Determiná, konsistente i kla. Bo no tin mester di ta di akuerdo ku un polítiko pa apresiá su kalidat komo gobernante. Un biaha mas, mi ta ripití ku den polítika e kestion ta “draagvlak” di elektorado.
****
Un problema ku hopi polítiko den posishon di gobernante tin ta ku nan no ta komprondé òf no por komprondé ta kiko e puesto ta eksigí. En bes di duna direkshon i guia, nan ta wòrdu pushá den sierto direkshon. Dikta ta ora ku bo ta imponé bo pensamentu sin ku bo tin “draagvlak”.

WASHINGTON, - Samantha Power, asesor den temanan di polítika eksterior di e prekandidato demókrata pa nominashon pa elekshonnan presidensial di Merka, Barack Obama, ayera a presentá su retiro despues di a referí na Hillary Clinton “komo mònster” den entrevista ku medio di komunikashon britániko.
“Lamentando profundamente mi ta presentá mi retiru komo asesor di kampaña di Obama”, Power a señalá den komunikado.
“Djaluna último mi a realisá komentarionan imperdonabel ku konsiderablemente ta kontra mi atmirashon pa senador Clinton, i ta kontra espíritu i propósito di kampaña di Obama”, e eks asesor di senador di Illinois a indiká.
E kampaña di Obama ayera tambe a denunsiá e komentarionan aki.
“Senador Obama ta kondená karakterisashonnan manera esaki, ku no tin lugá den e kampaña aki”, bosero Bill Burton a bisa.
Deskonfiansa
Ademas di e komentarionan riba Hillary Clinton, Power a señalá den entrevista djarason último ku kadena britániko BBC, ku lo por resultá Obama imposibel retirá trupanan for di Irak den plaso di un aña, manera el a primintí durante kampaña.
E dama profesor di Harvard University i ganadó di premio Pulitzer, a indiká ku retirá tur trupa fo’i Irak den plaso di 16 luna ta e esenario mas optimista bisá pa e senador, i el a agregá ku Obama lo revisá e plannan aki si e bira Presidente.

BOGOTA, - Minister di Defensa di Colombia, Juan Manuel Santos, a señalá ku “mi ke informá pais i mundu ku FARC a sufri un gòlpi nobo kontundente ku morto di Manuel Jesús Muñoz, alias Iván Ríos, otro miembro di sekretariado (dirigensia) di e grupo terorista aki”.
Segun Santos, e hefe di seguridat di e insurgente, ku a identifiká su mes komo “Rojas” djaweps anochi a presentá dilanti un unidat militar na zona rural di departamento di Caldas (wèst) “i e ta’tin huntu kuné man drechi, sédula di siudadania, pasport i kòmpiuter personal di Iván Ríos”.
Santos a agregá, ku segun propio palabranan di “Rojas”, el a mata Ríos tres dia pasá pasobra e tabata buskando aliviá e preshon militar na kua nan tabata someté.
El a bisa ku nan ta desabastesé i inkomuniká.
E funshonario a anotá ku e situashon a originá despues ku vários dia pasá trupanan di Ehérsito a inisiá e asina yamá operashon “Fortín”, entre departamentonan di Caldas i Antioquia (nortwèst).
For di e ora ei a presentá shete kombate kontra frente 47 di FARC, ku tabata renchi di seguridat di Ríos.
Ríos ta e di dos miembro di e sekretariado, ku ta muri den forma violento den último siman.
Siman pasá djasabra, militarnan colombiano a ataká un kampamentu di FARC na teritorio ecuatoriano, durante kua number dos di FARC, Raúl Reyes, a muri.

BERLIN, - E kandidatura presidensial di Barack Obama ta ganando kabes i kurason di Europa, i su karera, hubentut i promesanan di kambio ta laga speransanan krese di ku Merka lo por bolbe kai na agrado di mundu.
E kandidatura di Obama pa presidensia di Merka djamars último a sufri un revés dor di no optené nominashon demókrata despues di pèrdè elekshonnan krusial di Ohio i Texas frente Hillary Clinton.
Sin embargo, Europa a bira faborito di hendenan i di medionan di komunikashon, segun analistanan polítiko, despues di un namoramentu kòrtiku ku Clinton aña pasá.
E revista aleman influyente Der Spiegel a publiká pòtrèt di e senador di Illinois na febrüari último bou di título: “Faktor Mesias: Barack Obama i e anhelo di un Merka nobo”.
Den su interior, e revista a deskribí Obama komo símbolo di rechaso di Merka p’e era di George W. Bush, un periodo ku hopi oropeo a relashon’é ku e guera di Irak, skandal di prizòn di Abu Ghraib i diplomasia aislá di e pais.
“E alemannan ta namorá di Obama”, Volker Perthes a bisa, kende ta lider di grupo di eksperto den polítika eksterior SWP ku sede na Berlin.
“Su elekshon lo demostrá ku Amérika ta kapas di renobá su mes, òf di outo-koregí su mes despues di añanan di Bush”, Perthes a bisa.
Karsten Voigt, kordinadó pa relashonnan ku Merka den Ministerio di Asuntunan Eksterior aleman, a afirmá ku Berlin lo por traha bon ku Obama, Clinton i kandidato republikano John McCain, un sentimentu ku tambe por a sinti na otro kapitalnan oropeo.

WILLEMSTAD – E fin di siman aki gobièrnu mester pone nan kabes na pareu i analisá kua ta e pasonan ku nan mester tuma e siman benidero, tabata deklarashon di Bicho Justiana di Kámara Sindikal na LA PRENSA. “Si nan buska e forma inteligente, nan lo sali glorioso for di e siman, en bes di keda kabesura komo si fuera ku nan tin mandato i no haña un sla profundo e siman aki. Esaki ta den kuadro di e karta ku e Plataforma sindikal a entregá e siman aki na gezaghèber den presensia di sekretario di Konseho Insular den kua ta pidi pa anulá e subida di 10 sèn riba preis di kombustibel e luna aki, ya ku nan ta kere ku tin un otro alternativa pa evitá esaki.
Bicho Justiana ta splika, ku na momentu di entrega di e karta aki a splika e seriedat di e asuntu aki, ya ku ta para riba un alternativa, pero despues di a purba na diferente forma gobièrnu no a mustra interes. For di 2005 a entregá un rapòrt i nunka gobièrnu a bisa ni hasi nada pa ku esaki. Plataforma Sindikal mirando e deterioro sosial, ku forsa di kompra ku a bai atras, tenshon enorme bou di trahadónan ta pidi pa kanselá e introdukshon di subida di 10 sèn di e luna aki.
Justiana ta pidi pa lanta un komishon pa hiba diskushonnan ku tin riba mesa i duna espasio den 1 luna pa e komishon aki bin bèk ku un proposishon ku mester keda apliká. Ta di akuerdo ku preis di petroli a subi i ku e tipo di kosnan internashonal no por influensiá riba e komestibel ku e subimentu di preis. Konsiderando ku no tin un maneho no tin un proseso di konsientisashon sin tene kuenta ku e aspekto di e manera ku akseins ta keda atendé pa Gobièrnu Sentral. Ta Kòrsou ta pagando akseins pa tur e otro islanan ku tambe ta hasi uso di gasolin i ku mester bai na analisá kiko por bin kuné, di manera ku por kita e peso aki for di e isla aki.

WILLEMSTAD – “Ta bon pa Aliansa Popular skohe e modelo di aserkamentu di diálogo di Kumbre di Rio en bes di hinka nos pueblo den mas tenshon”, tabata deklarashonnan formulá di Anthony Godett despues di e resultado di un final históriko di e konflikto di Venezuela, Colombia i Ecuador. Segun lider polítiko di FOL, Anthony Godett ta afirmá ku Aliansa Popular mester stòp di rekurí na atakenan personal sin kontenido, kobarde i sin base òf ku no ta sirbi na un meta komun pa elevá e pueblo na un desaroyo positivo. Den un komunikado Godett ta splika, ku un smak el a disfrutá di e mas di 6 ora di kumbre di Rio ku a tuma lugá na e pais bisiña Santo Domingo, kaminda presidentenan di diverso paisnan Latino Amérika a bin huntu pa diskutí vários tópiko di interes. Prinsipalmente esun di siman pasá kaminda pais Colombia a usa teritorio di pais Ecuador pa a drenta, enfrentá i te asta likidá algun miembro di FARC.
Ku esaki a demostrá ku diálogo serio i sin menasa pa destabilisá pais, kanta wèlga, pone sino fono ta posibel pa yega na akuerdonan satisfaktorio pa tur pais enbolbí. Godet ta mustra, ku e mes a disfrutá kon presidente di Santo Domingo Leonel Fernandez Reyes a dirigí e reunion ku tabata ku hopi tenso, pero ku a tèrminá ku algun akuerdo i logro di basta balor. “Ken por imaginá nan mes ku presidente Alvaro Uribe lo a brasa òf duna man na presidente Rafael Correa di Ecuador? Ken por a imaginá nan mes ku presidente Alvaro Uribe i Hugo Chávez Frias lo a brasa otro i a kombersá amenamente ku otro?, tabata pregunta di Anthony Godett.

Tur hende ta sigui komentá riba “Laga nos ta un” dia 20 mart:

WILLEMSTAD – E interes pa e konsierto gospel “Laga nos ta un” dia 20 mart den Festival Center tin e agrupashonnan kompletamente den inspirashon. Por spera na final di e anochi aki diferente kantante lo subi huntu ku e agrupashon GIO Fuertísimo pa sera e anochi aki den e kantika “Viktoria”. E kantika interpretá pa e agrupashon gospel Proskuneo, lo ta e kantika ku lo sera e anochi aki den gran forma. Manera ta konosí, Ministerio Bida Abundante mes a skohe e kantikanan ku e agrupashonnan lo bai interpretá e anochi aki.
Tur e agrupashonnan ya a risibí nan 3 kantikanan i ensayonan a kuminsá pa e preparashon di e grandioso anochi aki. E agrupashon Gio Fuertísimo lo sera e anochi i ku e número “Viktoria’ lo presentá e momentu ku diferente di e kantantenan di e otro agrupashonnan lo subi pa pregoná ku e agrupashon aki. E número “Viktoria” ta unu masha gustá i ku un i tur lo por kanta huntu. E siman aki tambe e programa Mas Bida Abundante lo bai presentá e seri di kantikanan ku lo bai keda interpretá durante e anochi aki.
Ademas di ta toka e kantikanan ku e agrupashonnan lo bai toka, lo bai tin entrevistanan ku sierto di e miembronan di e agrupashonnan ku lo bai papia riba nan preparashon i kon nan ta mira e konsierto aki. Un interes grandi ta biba bou di gruponan musikal pa e anochi aki i e manera ku nan ta kontestá por mira ku nan mes ta anhelá pa e anochi aki yega. Ta un anochi di gratitut na Dios pa nan talento ku nan a risibí di Dios i ademas pa para ketu duna Señor loke E meresé. Den mesun rosea ta probechá tambe pa aportá pa un bon kousa, kua ta pa yega na fondonan pa drecha e oula di Huize Habaai.

Awe ta konmemorá Dia Internashonal di Hende Muhé. Damanan di mundu kompletu ta realisá diferente akto durante e dia di awe. Ounke algun dama a bisa ku no tin nada di festehá, pasobra deskriminashon ainda ta eksistí. Tin algun dama a bisa ku deskriminashon i sobre-eksplotashon ta sigui presentá na empresanan kontra hende muhé. Por ehèmpel, na sierto empresa ta paga un dama ménos ku un hòmber, sin risibí kursonan di kapasitashon pa subi posishon. Pues no tin igualdat. Deskriminashon tambe ta presentá dor di kontratá damanan hóben i stroba muhénan adulto drenta sektor laboral. Riba pòtrèt por mira kon damanan kurdo a bini huntu na Sulaimaniyah, situá nortost di Bagdad, pa konmemorá Dia Internashonal di Hende Muhé awe.

LEONARD-MARTINA
Susanita Virgen
Mihó konosí komo Susanita Kòrá
A laga atras su yunan Silfrida, Amyra, Rudy, Jahaira, Elfried Leonard, Franklin Leonard i Diana Leonard, yu di kriansa Aquiles Borgschot. Akto di entiero ta djaluna 10 di mart 3.30or for di misa Janwe pa santana Janwe. Bishita 1or. Promé ku entiero tin un s.s. di misa.

MARTIS-MANSANA
Emilia Martha (93 aña)
Mihó konosí komo Mimi òf Shon Mi
A laga atras su yu Judith Boutisma-Martis, suegro Siegfried Boutisma, ñetunan Shaleska, Jyulrich Boutisma, Suzyanne Boutisma, Jyulryan Boutisma, Everon Rosini, Nazaira Sambo, Antoinette Obispo. Akto di entiero ta djamars 11 mart djamars 11 di mart. Bishita 1or na El Consolador. Promé ku entiero tin un s.s. di misa 4or na misa Tera Kòrá i despues pa santana Willibrordus.

DE JAGER
Johannes Machiel (50 aña)
Mihó konosí komo Jos
A laga atras Elly de Ridder-Jager, Arie de Ridder, Suzanne i Jolanda. Bishita djadumingu 10 di mart for di 10or-11.30or den Krematorio na Brievengat.

MARTINA
Suitberto Cristoforo
Mihó konosí komo Pedritu
A laga atras su yunan Cloretha Recordino, Russell, Rutmila, Angela Martina, Gilbert, Glenda, Herrel Cordilia tur ku nan famia. Akto di entiero ta djaluna 10 mart for di Sta. Rosa pa santana Sta. Rosa. Bishita 1or.

WILSON
Bertram Ezekiel Howard (37 aña)
Mihó konosí komo Don, Bertje, Boris

Riba e djasabra pisá i drùk aki, Lorito t’ei un biaha mas bulando, bulando......bulando!
*********
Un pabien spesial na tur dama awe riba nan dia. Pa Lorito tur dia ta dia di hende muhé. Ayera un eksperto merikano a duna un presentashon hopi interesante riba e konsepto di rabia riba hende muhé. Hasta hende muhé tin rabia riba hende muhé. Segun e eksperto, hopi rabia kontra hende muhé ta pasa sin ku tin hende ta reakshoná riba nan. Mester kambia e aktitut aki, asina e eksperto a bisa na e Konferensha About Women and Health na ITC.
*********
El a bisa tambe ku tin hende tin nan rabia kontra muhé internalisá. Hasta hende muhé tin e rabia aki kontra nan mes i nan mester traha pa rekonosé e rabia aki. Lorito a bula pa nos skucha i nos mester bisa ku nos a keda impreshoná pa e presentashon, pasobra na Kòrsou nos no sa papia riba e kosnan aki. E ta manera un tabú!
*********
Nos a tuma nota di e mensahe di PAR riba dia di Hende Muhé. Ta masha great ku ta un hòmber a skibi e mensahe den un partido kaminda ta hende muhé ta manda. Un kos ku nos no a gusta den e komunikado ta ku a lubidá di menshoná un pionero pa lucha di hende muhé na Kòrsou ku ta Maria Liberia. Nos si kier duna mérito públiko na un gran dama di Kòrsou ku te awe ta sigui traha i konsientisá nos komunidat!
*********
Ta masha hilaridat tin tur kaminda i tin hende no kier kere mes ku Yves ta bai baila awe. Un hende a bisa nos ku ta un chiste adelantá di promé di aprel. Pero Lorito por konfirmá ku e informashon ta bèrdat. Yves ta bai marka historia komo e promé hende ku nunka a baila, sali train, bruha den su pia lenks i regts i presentá dilanti un ouditorio yen. E kos aki ta algu nunka bisto. Yves lo ta den e shou Bida ta un Baile awe nochi den ouditorio di International Trade Center.

WILLEMSTAD -- PAR ta konvensí, ku poko poko e lucha di hende muhé a kuminsá duna fruta den tur sektor. Asina e partido hel ta bisa den un mensahe relashoná ku Dia Internashonal di Hende Muhé. Remarkabel ta, ku e mensahe ta skibí pa un hende hòmber, den e kaso aki Marlon Jamaloodin ku ta miembro di frakshon di e partido den Staten di Antia. E ta bisa, ku hopi biaha ta bisa ku e lucha pa emansipashon di hende muhé a kuminsá den añanan ’70, pero tabatin hopi otro promé ku esei. “Ta bon pa nos rekonosé ku “damanan di djarason” ta e pioneronan di henter e lucha di emansipashon na Antia ku a kuminsá organisá nan mes for di añanan ‘48 partisipando aktivamente den polítika di Pais. Si awe regularmente nos ta papia di logronan di Doctor Frumencio da Costa Comez komo un di nos héruenan di polítika antiano, hamas no por lubidá damanan di djarason ku fielmente banda di Doctor tabata lucha pa e mesun kousa. Damanan manera señora Karita da Costa Gomez, ruman di Doctor i señora Telma Römer, ku tabata e motornan tras di e lucha. Despues di “damanan di djarason” nos ta kòrda tambe na aña 1962 ku a lanta e moveshon forsa femenino, bou di guia di señora Lucina Da Costa Gomez.
Asina nos por mira kon e lucha no solamente di emansipashon, pero tambe di igualdat, a sigui na unda na 1988 a logra pago igual entre e hòmber i muhé”, asina Jamaloodin ta bisa.
Jamaloodin na nòmber di frakshon di PAR den Parlamento ta bisa, di ta konvensí ku poko poko e lucha di emansipashon aki a kuminsá duna su fruta den tur sektor. “Si Pais durante último añanan a produsí diferente Promé Minister, Minister, Diputado i konsehál, anto nos mester ta konvensí, ku esaki ta kosecha di un lucha duradero. Banda di esaki nos a tuma nota ku den e otro sektornan manera enseñansa i trabou profeshonal, e kantidat di hende muhé den tur sentido ta surpasá e kantidat di hende hòmber. Nos frakshon ta kere, ku e pioneronan di e desaroyo aki, na bida por tabata orguyoso, ora nos mira ku henter e desaroyo di struktura estatal na e momentunan aki pa un gran parti ta wòrdu kargá pa hende muhénan klave den nos komunidat manera señoranan Emily De Jongh-Elhage, Zus de Lannooi, Zita de Jesus-Leitoe i Susanne Camelia-Römer. Esaki ta muestra di un tera bon prepará ku ta duna fruta. Un desaroyo ku ta di aploudí, ounke nos a tuma nota ku mundialmente poko poko organisashonnan international ke skùif e asento di e desaroyo menshoná un poko i duna un poko mas atenshon riba e desaroyo di hende den e sentido di famia. Dor di hasi esaki, bo ta duna e famia (gezin) komo núkleo di tur desaroyo, un ròl mas importante i bo ta dediká atenshon na tur e miembronan di e famia sin distinshon. Aki tambe e ser muhé sigur den nos kaso ta e figura prinsipal, apesar ku no semper e ta e kabes di kas. Atenshon spesial riba mamanan soltero pa medio di formashon i guia, na opinion di nos frakshon, ainda mester haña poko mas atenshon meskos ku esaki ta konta pa parehanan hopi hóben, ku pa falta di guia, hopi biaha no por kombiná e responsabilidat komo mayor huntu ku e responsabilidat ku nan mes ainda ta den un proseso di formashon. Frakshon di PAR den Parlamento ta sigui kere den un emansipashon balansá kompañá pa formashon, formashon i mas formashon. Ta únikamente di e forma aki nos por sigui elevá nos komunidat di ta manera ku kada suidadano ta bira un balor agregá pa nos komunidat i pa e Pais Kòrsou, ku pronto nos mester bai karga huntu”.
Terminando Frakshon di PAR den Parlamento ke felisitá tur hende muhé, tur mama i tur nos damitanan hóben riba e dia di hende muhé i ta pidi un i tur di no laga pa ta awe so nos ta duna realse na nos hende muhénan sino, dunanan diariamente e atenshon, trato i respetá nan dignidat. Un pabien spesial ta bai tambe na tur nos damanan ku ta traha den sektor públiko i nos lider di Pais sra. Emily de Jongh-Elhage”, asina Jamaloodin ta bisa.

WILLEMSTAD – Partido Laboral Krusada Popular (PLKP) lo dediká atenshon riba Dia Internashonal di Hende Muhé na Jacqueline Cras ku a sobrebibí un lucha fuerte kontra kanser. Jacqueline Cras òf Jackie, manera nan ta yam’é den PLKP, semper a lucha na banda di e sindikato SITEK siendo maestro di skol i despues pa PLKP. Te awe e ta duna su esfuerso na su partido. Sra. Cras mes a papia abiertamente riba e situashon ku el a hañ’é den dje i kon kada hende muhé por sobrebibí e enfermedat teribel aki.
Den kuadro di Dia Internashonal di Hende Muhé, Simia Laboral, ku ta un komishon di Partido Laboral Krusada Popular ta konmemorá “ Dia Internashonal di Hende Muhé”. Énfasis di e konmemorashon 2008 ta riba hende muhé i e diferente funshonnan den su bida diario i e hende muhé i su salú. Simia Laboral ta tira lus riba un miembro inkansabel di P.L.K.P., alabes dosente penshonado, sra. Jacqueline Cras.
Jackie, manera nos di partido ta yam’é, despues di su estudio komo yùfrou di skol na Ulanda a regresá na 1974 Kòrsou definitivamente pa yuda su pais den sektor di enseñansa komo edukadó i a duna lès na diferente skol, spesialmente na nivel di skol profeshonal básiko i tabata un dosente strikto pero masha gustá, pa su dedikashon i entusiasmo. Jackie banda di su trabou di maestro a militá kasi 30 aña den sindikato di Enseñansa, SITEK komo shopsteward i despues komo miembro di direktiva. Tambe el a forma parti di diferente organisashon i fundashon manera Union di Muhé Antiano, Fundashon Parke Nashonal, Fundashon Material di Skol i a dirigí e programa di kues de televishon Mira pa Bo Sa.