ORANJESTAD- Pregunta y mas pregunta, lamento y mas lamento, tur hende ta puntra kico por a pasa y con un hende por yega asina leu, na mata practicamente henter su famia diabierna ultimo.
Eugene Lampe lo a confesa na e horendo crimen familiar aki, caminda el a mata su ruman homber, su mama y su tata diabierna ultimo, lagando tanto famia, conocirnan y henter comunidad, den un shock horribel.
Tanto rumor, tanto motibo di con e mucha homber aki a cai na e limite aki, di elimina henter su famia, cu cual el a comparti practicamente henter su bida, loke ta haci e crimen un acto insolito den su genero.
Diasabra ultimo e unico miembro sobreviviente di e masacre di e famia a yega Aruba, esta Iwan Lampe kende ta studiando na Hulanda y awor hunto cu su ruman Eugene, e sospechoso principal den e caso.
Den fin di siman e sospechoso lo a admiti di a comete e crimen aki y parti di e investigacion awor ta concentrando su mes riba e posibilidad cu lo tin mas hende envolvi den e asesinato aki of algun otro hende lo por a yud’e cu e acto macabro aki.
Hecho ta cu tin varios version ta bai rond pero autoridadnan policial mes no ta dunando ningun informacion riba e investigacion cu ta tumando lugar.

 

ORANJESTAD- Eugene Lampe lo a planea y tuma su tempo pa ehecuta su plan macabro diabierna ultimo, y segun informacion ta sigui drenta, e berdad horendo ta sigui bin dilanti.
Tur cos ta indica cu Eugene lo a golpia su ruman homber Edvard di 30 aña, mata riba su caba drumi, golpiando e cabez di su ruman c’un obheto duro cu a causa su morto practicamente di inmediato.
Esey lo a sosode despues cu su mama Ina a bai traha den oranan di mainta, mientras cu ainda no ta conoci si e tata Juan lo tabata den e cas ora cu e acto aki a tuma lugar, of cu el a Sali un rato bai haci un respondi pa regresa. E tabata malo y no a bai traha e dia ey, y segun indicacion, e tata Juan a ser mata despues cu Eugene lo a mata e ruman homber prome.
E tata tambe tabatin e golpinan mortal den su cabez y cara ey el a ser mata den su camber na e cas, pero for di e hecho cu e tabatin carson largo bisti, e difunto lo tabata cla pa Sali of a caba di yega cas.
For di eynan ta sigui un lapso di tempo increibel, ora cu e hoben sospechoso a sinta warda for di oranan di mainta tempran, y a sinta spera riba yegada di su mama Ina for di su trabou den oranan di atardi, pa laga e mama drenta paden y e ora mata e mama.
E mama ora cu el a yega, a combersa cu su bisiña, y a bai paden pa algun rato despues nan bin descubri cu el a ser mata hunto cu su esposo y jiu homber.
Algun version ta bisa cu e hoben Eugene lo a ser mira serca di laman na Arashi, den pick up di su tata, pero esaki ainda no a wordo confirma.
Un caso tristo, caminda autopsia a ser haci awe mainta riba e victimanan pa haya mas informacion riba tur loke a sosode, mientras cu Eugene ta keda deteni y autoridadnan no ta exclui e posiblidad cu lo por tin un otro persona envolvi den e caso aki.

ORANJESTAD- MEP su gobierno desde 2001 a aplica den e tabelnan di belasting pa tur hende cu ta paga loonbelasting un inflatiecorrectie pa un total di 18.7 %, esta cu e conciudadano ta paga menos na belasting y esaki ta pa yuda cubri inflacion. Desde 2006 por ehempel a duna e trahador, e empleado publico 100 % di inflatiecorrectie cu ta pa e aña ey 3 %, na 2007 3.1 % y 2008 esaki ta 4.4 %. Pues en total den 3 aña so esaki ta 10.5 %.Esaki ta un reduccion den e belasting cu lo bo mester paga.
Compensacionnan drastico
Ora a introduci BBO na 2007 a cambia tur e tabelnan di belasting, unda principalmente esnan cu ta gana mas cu Af. 3000,00 pa luna a haña un compensacion drastico di belasting, esta ta paga menos. Lo ta bon pa duna un par di ehempel.
Desde Gabinete Oduber p.e. un hende cu a keda gana Af. 25000,00 pa aña desde 2001, unda el a haña reduccion di Af. 1846,00 cu e ta paga pa aña di Af. 61,10 y awe na 2008 e ta paga compara cu 2001 un suma di Af. 476,00 pa aña y e reduccion cu el a haña ta Af. 104,04. Cu otro palabra desde Gabinete Oduber, 2001 pa 2008, el a paga Af. 1370,00 menos na belasting cu e reduccionnan anualmente.
Mescos un empleado cu ta gana desde 2001 Af. 45000,00 pa aña a haña total Af. 2857,50 na belasting menos cu e ta paga anualmente. Cu Af. 45000,00 na entrada pa aña, e empleado a ricibi na 2001 Af. 197,60 di discuento y na aña 2008 e lo ricibi Af. 2857,50 menos na belasting pa paga. Esaki ta un sorto di compensacion.
Laga nos compara un onderwijzer na school basico cu ta gana Af. 60000,00 pa aña, a haña na 2001 inflatiecorrectie di Af. 335,40 y na 2008 lo ricibi discuento di Af. 4236,50 cu ta hopi menos entrada pa caha di gobierno. Pa luna esaki ta na 2008 Af. 353,00.

Formularionan ta disponibel na Biblioteca Nacional.

ORANJESTAD- Aruba Scholarship Foundation ta recorda studiantenan pa somete nan aplicacion pa participa den Latin America/Caribbean (LAC) Scholarship Program no mas tarda dia 18 di April. 2008.
Pa esnan cu ta residencia na Aruba y ta studiando na UCF of cu a aplica pa studia na UCF pa e aña scolar 2008 – 2009 tin posibilidad cu nan por bin na consideracion pa haya status di residente di Florida y asina paga “state resident fees” en bes di “non-resident fees”.
Esaki lo por significa un ahoro di mas di 14 mil dollar pa aña. Si e studiante a aplica caba pa drenta UCF pero ta pensa di inscribi (enroll) te na di dos semester (na Januari 2009), mester haci aplicacion na Aruba Scholarship Foundation awor. No por warda pa despues.
Pa bin na consideracion pa ricibi e status di residente di Florida pa asunto di tuition na UCF, yena un formulario disponibel na Biblioteca Nacional di Aruba na George Madurostraat, Oranjestad y entreg’e no mas tarda dia 18 di April, 2008 na e adres menciona riba e formulario. Tambe por contact clydeharms@setarnet.aw pa ricibi e formulario on-line y mas informacion di e programa LAC .
E rekisito di yena e formulario ta vigente tambe pa esnan cu ya ta studiando na UCF.
Si un studiante cu actualmente ta disfruta di e programa aki no haci un aplicacion nobo e ta core riesgo di perde su status. Sin un formulario valido ningun studiante lo wordu considera pa ricibi of renoba e status especial.
Aruba Scholarship Foundation ta recorda un y tur cu e proceso pa aplica pa un beca pa yuda studiantenan den necesidad financiero lo cuminsa na luna di Mey.

NEW YORK, Merka, - E kantante merikano Beyonce Knowles di 26 aña i su frei ya pa sinku aña, Jay-Z, di 38 aña, konosí komo “e magnate di Rap”, a kasa den un seremonia privá na New York, revista People a anunsiá den su edishon.
Sitando un amigu di e pareha, e revista spesialisá den bida di hendenan riku i famoso, a afirmá ku Beyonce i Jay-Z a kasa djabièrnè anochi último den apartamentu di e amigu ei, situá den bario eksklusivo di Tribeca, dekorá ku mas ku 50.000 orkidia blanku importá for di Tailandia.
“Jay realmente tabata ke un seremonia privá, ku amigunan serkano i famianan”, e amigu a presisá, sitá pa People.
Eks kompañeranan di Beyonce di e grupo “Destiny’s Child”, Kelly Rowland i Michelle Williams, i aktris Gwyneth Paltrow tabata entre e invitadonan.

WASHINGTON, Merka, - Un destaká asesor di kampaña di senador Hillary Clinton bou di preshon pa a mantené reunion ku un dama diplomátiko colombiano pa diskutí aspektonan di un akuerdo di komersio liber, a bandoná su puesto ayera.
E aspirante presidensial demókrata ta oponé un akuerdo komersial ku Colombia.
Su asesor di kampaña, Mark Penn, a reuní ku representante di Bogotá den kalidat di direktivo di un empresa di ‘lobby’ ku a keda kontratá pa e pais suramerikano pa reuní apoyonan na fabor di un “TLC”.
“Despues di akontesimentunan di último dianan, Mark Penn a pidi renunsia di su ròl komo hefe asesor di kampaña di Clinton”, direktor di kampaña di Clinton, Maggie Williams, a bisa den komunikado.
El a añadí ku Penn i su empresa di análisis, Schoen and Berland Associates, lo sigui entregá enkuestanan i asesorando kampaña di e prekandidata demókrata.
Informashon tokante di un reunion di Penn 31 di mart último ku Embahador colombiano, Carolina Barco Isakson, durante kua nan a papia riba un akuerdo di komersio liber, a haña sa di esaki djabièrnè último.
Penn a pidi despensa p’e reunion, i a bisa ku el a mantené komo Presidente ehekutivo di empresa Burson Marsteller Worldwide, ku a keda kontratá pa Colombia pa yuda reuní apoyonan pa aprobashon di e tratado komersial den Kongreso merikano.
Pero e asuntu a kontaminá kampaña di dama senador pa New York, ku ta kompetí fuertemente ku senador pa Illinois, Barack Obama, pa bira e proksimo kandidato demókrata den e elekshonnan presidensial di novèmber.

BOGOTA, Colombia, - Gobièrnu colombiano tin lokalisá n’e área selvátiko di Tomachipán, situá 70 kilometer sùitwèst di e kapital provinsial aki, e lugá kaminda “Fuerzas Armadas Revolucionarias de Colombia” (FARC) tin entre otro eks kandidata presidensial colombiano-franses Ingrid Betancourt i tres siudadano merikano retené, fuentenan militar i kampesinonan di e region a bisa El Nuevo Herald.
Segun e korant, Fiskalia di Colombia a kapturá Helver Uriel Rodríguez Cruz, dòkter di FARC, kende resientemente a atendé Betancourt, na un suburbio di sùit di Bogotá, i e ta’tin huntu kuné relato riba estado delikado di salú di Ingrid.
A informá ku Rodríguez, ta dòkter di frente di guera number un di FARC, komandá pa alias “Cesar”.
Fuentenan di Fiskalia General a sigurá ku fo’i masha tempu tin informashon di e dòkter ei, kende ta enkargá pa praktiká abortonan entre e damanan gueriero kendenan a resultá embarasá.
Dòkternan partikular konsultá pa diferente medio di komunikashon a bisa ku, di akuerdo ku e relato kapturá, Betancourt lo por ta sufri di problema ku kurason i nir, desareglonan den e sistema nervioso sentral i inkluso morto.
Ubikashon di Ingrid i e merikanonan n’e region di Tomachipán ta koinsidí ku informashonnan suministrá na periodistanan di parti di pastor katóliko Manuel Macera, kende tin 20 aña rekoriendo e region.

CUIDAD JUAREZ – Merka a gana Mexico 3-1 ayera den e Pre-olípimiko di futbòl femenino ku un skor di 3-1. E Pre-olímpiko ta definí a ekiponan di CONCACAF ku lo partisipá na e torneo na Beijing na ougùstùs awor.
Na di 13 minüt di wega Natasha Kai a hinka e promé gol pa e ekipo merikano, miéntras ku Teresa Guadalupe Worbis a empatá na di 30 minüt pa e mehikanonan. Dos minüt despues, despues di un eror di e defensa di Mexico, Mary Abby Wambach a hinka e di dos gol pa Merka. Den e parti komplementario e mesun kai a anotá un gol mas pa Merka ku a kompliká e situashon na e mehikanonan. Finalmente e wega a kaba 3-1.
Merka tin 6 punto den Grupo A ku viktorianan riba Jamaica i Mexico. E mehikanonan tin tres punto komo ku nan a gana di Jamaica i nan a pasa pa e semi final komo e di dos di grupo A. Mexico lo topa awor Canada djarason awor.
Merka awor lo enfrentá Costa Rica.

MADRID – Fanátikonan no a skonde nan desepshon pa e manera ku e ekipo di Barcelona di e direktor tékniko ulandes Frank Rijkaard a bin ta funshoná últimamente. Na lugá di probechá e chènsnan, e fin di siman un biaha mas e ekipo mester a kontentá su mes ku un empatá kontra Getafe. Ku komo Real Madrid a empatá, esei tabata un bon chèns pa kòrta e diferensha den punto, pero Barcelona tambe e empatá.
Despues di e enkuentro na Nou Camp e ekipo a haña un konsierto di flùit i “boe” di parti di e fanátikonan. Diferente lensu di protesta a kai riba tereno na Nou Camp. Barcelona ku no por a konta ku su astronan Lionel Messi, Ronaldinho i Samuel Eto'o, no a logra kòrta e distansia riba e tabla di posishon despues di e derota di Villareal i empate di Real Madrid.
Den otro weganan di ayera Atlético de Madrid a sigurá e di kuater posishon ku un viktoria abrumador di 6-3 riba Almería E ekipo di Almería a duna bon bataya i a bin bèk na tres okashon, pero finalmente mester a sukumbí despues ku rèfri a saka dos di su hungadónan, un di pa un hugada brutu i e otro pa akumulashon di karchi hel.
Atlético a logra awor 53 punto, 3 mas ku su persiguidó mas serka Racing de Santander ku a kai 3-1 kontra Deportivo La Corunja. Real Madrid ku ta na promé lugá for di e promé fecha di e kampionato, tin 66 unidat despues di a empatá 1-1 ku Mallorca djasabra. Villarreal, ku a kai 2-0 kontra Sevilla i Barcelona ku a empatá 0-0 ku Getafe ta empatá ku 59 punto.

BAHREIN - E piloto brasileño, Felipe Massa a duna un empuhe nobo na su kampaña di Fórmula 1 despues di a gana ayera e Gran Premio di Bahrein, su promé triunfo di e tempo-rada aki.
Massa a logra pasa e pi-loto polako Robert Kunica di BMW ku a kuminsá e kareda aki na kabes. Massa mester a soportá tambe un bataya fuerte di su kom-pañero di ekipo di Ferrari. Kimi Raikkonen, e lider nobo den e klasifikashon general di Fórmula 1.
Massa a gana Raikkonen pa 3.339 sekònde. Kubika a finalisá na di tres lugá nèt promé ku su kompañero di ekipo Nick Heidfeld. Heikki Kovalainende di McLaren, a kompletá e top 5. Su kompañero Lewis Hamilton a kaba na di 13 lugá despues di un salida hopi pober.
Esaki ta e di seis viktoria di Massa su karera i ta dun’é 10 punto pa e klasifi-kashon general.
E aktual kampion mun-dial, Raikkonen a subi riba podio pa di 50 biaha den su karera i awor ta enkabesá e tabla di posishon ku 19 punto, tres mas ku Heifeld. Hamilton, Kovalainen i Kubica ta sigui e ora ei ku 14 punto. Jarno Trulli, di Toyota; Mark Weber, di Red Bull; i Nico Rosberg, di Williams; ta kompletá e promé ochonan.


E piloto brasileño, Felipe Massa ku su trofeo.

Massa den su Ferrari

WILLEMSTAD - E organisashon di bario di Wishi i Marchena, tin intenshon serio pa kuminsá un kaso kontra doño di un toko ku ta situá den Marchena. Den fin di siman tabatin un kaso, unda ku tin sospecho ku un dama drogadikto, a wòrdu venená. E señora aki kende originalmente ta di Aruba, lo mester a konsumí e venenu, den un bakoba.
Den deklarashon ku Kenneth Valpoort, di e organisashon di Wishi i Marchena a hasi, el a konfirmá ku e organisashon tambe a risibí e informashon dje supuesto kaso di venenamentu. Mesora e organisashon di bario di Wishi i Marchena a mobilisá den bario pa wak ta kiko a sosodé presis. Te ainda investigashonnan ofisial no a duna ningun detaye riba e loke a tuma lugá, segun Valpoort.
Pero e komishon di bario di Wishi i Marchena, ta kondená e hecho aki, pasobra ounke ku ta trata di un drogadikto, ta trata aki di un ser humano.
SOSPECHO
E organisashon di bario di Wishi i Marchena tin sospechoso fuerte ku doño di e toko den Marchena, ta metí den e asuntu aki. Segun Kenneth Valpoort, esaki pasobra na vários okashon e doño dje toko, situá na Marchena a bisa, ku komo ku regularmente ta hòrta den su toko, riba un dia e ta venená kualke hende den Marchena. Esei a pone ku e organisashon di bario, ta konvensí ku e propietario dje toko na Marchena, ta metí den e asuntu. Ta e intenshon pa nos enkaminá e kaminda hudisial pa entamá un kaso kontra doño di e toko en kuestion. Valpoort: ’El a papia e kos i direktamente despues e kaso di venenamentu a tuma lugá’.

ARIES: Bo komunikashon pa ku otronan ta faborabel. No ta importá e tema ku nan ta toka ku bo i bo ta sintibu awor dispuesto na papia òf kòmbersá. 39,27,15.

TAURO: Hasi un reorganisashon di loke ta bo kosnan di balor i esei ta inkluí no solamente plaka i kosnan material, sino tambe bo mundu spiritual. 43,12,16.

GEMINIS: Bo konosé bo mes komo individuo i loke bo ta deseá bo ta logra den bida. Ta tempu tambe pa enbolbí bo mes den aktividatnan sosial. 04,36,20.

KANSER: Bo ta mas uní ku esnan ku tin mester di ayudo i ta ofresébu e mesun nan sin kondishonnan. Na bo banda no ta falta ken ta sirbi di maestro spiritual. 08,42,47.

LEO: Aktividatnan den grupo ta enfatisá, spesialmente esnan ku ta relashoná ku bo trabou. Bo amistatnan lo ta di gran ayudo na momentu ku bo tin mester di nan. 36,19,07.

VIRGO: Awor bo ta hasi tur lo posibel pa logra un lugá di prestigio i bo ta logrando. Tur esfuerso ku bo hasi ta lagábu alkansá bo ophetivonan den bida. 10,03,22.

LIBRA: Ta presentá hopi bon oportunidatnan pa biaha, asina tambe posishon di por eduká òf siña otro personanan. 49,18,06.

SKORPION: Bo ta benefisiá awor di suerte di otro persona. Ta tempu di uni forsa i di hasi negoshi en konhunto. Si bo mester pidi un fiansa na banko, hasié awor. 33,12,47.

SAGITARIO: Si bo mester ayudo personal, no duda pa busk’é, ya ku bo ta benefisiá grandemente di bo mes. 18,09,01.

WILLEMSTAD - Si nos por a logra forma un gobièrnu i un parlamentu ku tabata mas tantu un refleho di un federashon di seis isla huntu, chèns ta grandi ku awe nos lo tabatin un Antia ku ta funshoná.
Esei ta konvikshon di William Marlin, miembro di parlamentu pa frakshon di National Alliance, partido polítiko di St. Maarten representá den Staten.
Djasabra último tabatin e selebrashon ofisial di 70 aña di eksistensha di Staten di Antia. Esaki a sosodé ku un reunion solèm di parlamentu den oranan di mainta.
Durante e reunion aki, por a skucha tantu ekspreshonnan di elogio komo tambe krítika fuerte riba funshonamentu di parlamentu durante e último 70 añanan.
Presidente di parlamentu Pedro Atacho, den su diskurso a bisa ku nos pais mester ta kontentu ku 70 aña di demokrasia parlamentario sin interupshon. Hopi pais na mundu, asina el a bisa, mester a hiba lucha fuerte, asta den sierto kasonan ku dramamentu di sanger pa nan a optené nan derechinan demokrátiko.
Den un reflekshon pa Radio Nederland Wereldomroep, William Marlin, representando National Alliance a bisa ku e ta weta bèk ku sintimentu miksto riba e periodo tras di lomba.
Nos no tabatin nunka un pais ku berdaderamente por a yama Antia.
E diferensha den representashon di e seis islanan tabata asina grandi, ku tardi òf tempran lo a surgi frikshon, segun Marlin.
El a duna un ehèmpel di esaki.
“Promé minister di Antia semper ta di Kòrsou, presidente di parlamentu mesun kos, Griffier semper ta sali di e isla mas grandi ku yama Kòrsou i asina tin vários otro funshon ku pa definishon Kòrsou mester a produsí. Esaki manera tur hende por komprondé, tardi òf tempran ta kondusí na frikshon.

WILLEMSTAD: - Aliansa Patriótiko, konsistiendo di partidonan di oposishon den Konseho Insular di Kòrsou ta keda dispuesto semper pa papia ku gobièrnu ulandes. Nos no tabata di akuerdo ku e forma ku kier a hasi esei djarason último, pero nos ta mantené kanalnan di komunikashon habri, asina bosero di Aliansa Patriótiko mr. Nelson Navarro, lider di Forsa Kòrsou a enfatisá.
Aliansa Patriótiko a tene un manifestashon siman pasá durante bishita di sekretario di Estado enkargá ku Relashon den Reino Ank Bijleveld.
E partidonan no tabata di akuerdo ku e tiki tempu ku nan a haña pa papia, ku tabata un ora i mei en total.
Kon por ta posibel diskutí struktura estatal, o sea futuro di Kòrsou, den apénas un ora i mei, siendo bo tin 21 miembro di Konseho Insular ku lo tin nan aporte pa duna? E kos aki ta algu apsurdo, asina Gregory Damoen, miembro di frakshon di Forsa Kòrsou den Konseho Insular a bisa na e okashon ei.
Segun Damoen, si analisá e tempu ku a pone disponibel, ta un kos ridíkulo. Si nos tuma un ora i mei, esei ta nifiká, ku pa kada miembro di Konseho Insular tin apénas algu mas ku 4 minüt.
“Si konsiderá ku probablemente Bijleveld mes lo ke bisa algu tambe komo introdukshon, anto e tempu ta bira ménos ainda. Ta di kiko nos ta papiando, di dos minüt pa kada miembro di Konseho Insular? E kos aki no por ta algu serio,” Damoen a bisa.
E manifestashon a bai den forma trankil. El a finalisá ku e partidonan entregando un karta di protesta na e representashon di Ulanda na Kòrsou.

WILLLEMSTAD - E kompania di konvoi di Kòrsou Autobusbedrijf Curacao, no t’ei na promé lugá pa hasi ganashi. Tarea di e kompania aki, meskos ku den mayoria parti di mundu ta pa sirbi komunidat, dunando un bon servisio.
Esei pa Wendell Meulen di e sindikato UGTK/CADMU mester ta punto di salida
Meulen a bisa esaki den kuadro di e negosiashonnan ku ta kanando pa yega na un kontrakt kolektivo nobo pa trahadónan di e kompania di konvoi.
E deliberashonnan no ta bayendo fásil. Ya tin algun tempu kaba ku partidonan ta sintando na mesa pero te ainda no tabatin masha progreso den e negosiashonnan.
Ta konosí di otro banda, ku e kompania ABC no ta pasando su mihó momentunan. Esei ta un dje faktornan pakiko te ku awor e empresa semi estatal no ta masha inkliná pa kumpli ku tur e deseonan dje sindikato. Ta un hecho ku e kompania di konvoi ta pasando momentunan difísil pa basta tempu kaba. Situashon finansiero no ta kos di gaba, miéntras ku estado físiko di e flota di vehíkulo di ABC dia pa dia ta birando mas grave.
Den pasado a yega di buska konvoi segunda mano for di diferente destinashon, di manera ku tin diferente marka di konvoi ta kore rònt na Kòrsou. Asta tabatin un aña ku a manda buska konvoi for di Brasil ku tabata ekipá ku èrko. Pero manera por a antisipá, e èrko a daña den un tempu relativamente kòrtiku.
E konvoinan simplemente no por a soportá e intensidat di trabou i ta mustrando kaba señal di deterioro.

WILLEMSTAD – “Den e era nobo ku nos lo drenta, ku institushon di Pais Kòrsou, no tin lugá mas pa nombramentu polítiko manera el a bin ta tuma lugá den pasado. Esei mi por sigurá boso”, asina diputado Zita Jesus-Leito a deklará durante su presentashon den e seshonnan di informashon pa empleado públiko ku a tuma lugá siman pasá na International Trade Center.
Mester bisa, ku práktikamente tur empleado públiko a asistí na e enkuentronan aki, ku tabatin durashon di 2 ora kada unu, konsiderando ku ta na nan mes interes tambe.
Durante e diferente presentashonnan ku a tuma lugá, entre otro di sekretario di Estado enkargá ku Asuntunan Konstitushonal Hubert Martis, di hefe di Asuntu di Personal di gobièrnu di Kòrsou i di e kompania KPMG ku ta enkargá ku diseño di e aparato gubernamental nobo pa Pais Kòrsou, por a ripará klaramente sinembargo, ku ainda tin hopi pregunta sin kontesta.
Esaki a krea sierto inkietut entre e empleadonan, ku a manifestá ku e dia ta yegando, anto ainda no tin klaridat riba diferente kos importante.
Un nota interesante ku por menshoná aki ta e hecho, ku Hubert Martis, a bisa ku pa gobièrnu, no tin kambio den su planifikashon.
Nos ta mantené e fecha ku nos tur a palabrá, esta 15 di desèmber 2008, komo fecha riba kua e kambionan mester bira un hecho.
Ta den e lus ei mes, mester mira tambe e hecho ku durante e enkuentro, gobièrnu a anunsiá na tur empleado públiko ku pa mas tardá dia 1 di sèptèmber benidero, lo hasi kada ámtenar un oferta. Manera LA PRENSA a informá anteriormente, no por bisa ainda si tin hende di mas pa e aparato públiko nobo. Ku otro palabra, no por bisa pues si mester manda hende kas den forma obligatorio. Esei lo dependé di vários faktor, entre otro kuantu hende den forma boluntario lo bai, kuantu ta bai den forma natural, esta ku penshun i kuantu lo hasi uso (boluntario) di e areglo di VUT i Wachtgeld. E ámtenar tin un sierto periodo pa reakshoná riba e oferta aki. Kuantu tempu e lo haña, tampoko ta konosí ainda.

WILLEMSTAD – E website liveincuracao.com no ta ofresé solamente un skat na informashon balioso i variá di nos isla loke ta interesante tantu pa esnan den eksterior komo esnan bibá aki mes. Awor ku a pone un webcam riba dak di Plaza Hotel den Punda, a bira posibel tambe pa durante 24 ora pa dia sigui tur moveshon den entrada di nos haf ku ta e ardu ekonómiko mayó. Un di e servisionan mas usá riba e website interaktivo aki ta un registro di kondolensia. A base di notisianan di morto por manda mensahe di kondolensia pa famia di e defuntunan.
Ya na e bolsa Living den WTC na ougùstùs 2006 e kompania Iseeyou a lansa e website aki. E tempu aya e tabatin un karakter mas komersial ainda. Mientrastantu a modifik’é algun bes i a agregá múltiple rúbrika informativo. E vershonnan mas resien ta muchu mas atraktivo i nan ta haña un bon akohida serka públiko. Sifranan a mustra ku ta habitantenan di Antia mes ta forma e grupo mas grandi di esnan ku ta bishitá e website aki; esnan na Ulanda ta na di dos lugá, siguí pa esnan na Merka i despues ta sigui hende for di tur parti di mundu. Na 2007 ya e website tabatin un total di mas ku 1 mion hit. Pa luna liveincuracao.com tin un promedio di sigur 100.000 hit. Ademas, na mart e aña aki so mas ku 5000 bishitante a konsultá e página di webcam, loke ta ilustrá ku su popularidat tambe ta kresiendo.
Ta trata di un website ku hopi faseta. Aparte ku e ta duna CAP su orario di yegada i salida di buelo na aeropuerto Hato, por haña tambe orario i tarifa di konvoi; dianan ku tin barku krusero den haf; dato di konsierto, bolsa, eksposishon i aktividatnan karitativo ku ta na kaminda, sin papia mes di e konekshon direkto pa e resúmen di aktividatnan di K-Pasa i Teatro Luna Blou; dato di kompanianan di utilidat manera Aqualectra, Selikor, UTS, ofisinanan di pòst, belasting i Curoil, pero tambe wardanan di polis pa por ta na sirbishi di hende ora mas mester di dje. Riba e website aki por haña tambe reportahe di pòtrèt ku nan ta remplasá ku sierto regularidat pa material fresku. Tambe nan ta duna algun informe di aktualidat, ounke esei no ta e ophetivo primario di Iseeyou.

WILLEMSTAD - Riba invitashon di NATRES, Nationale Reserve Nederland, un delegashon di VKC konsistiendo di komandante Ronald de Jesus, promé teniente R. Tom Josefa i segundo teniente Marten den Dulk lo sali djaluna 7 di aprel pa Ulanda.
NATRES lo selebrá dia 10 di aprel próksimo nan di 60 aniversario i lo organisá pa e okashon aki un Symposium Militar na Soesterberg.
Durante e bishita di VKC na Hulanda e delegashon lo bishita tambe e Hoofdkwartier di Defensie na Den Haag kaminda lo hiba kòmbersashonnan tambe ku e.o. Commandeur Frank Sijtsma i otro hefenan militar di Marina Real.
Manera ta konosí, VKC na nòmber di Gobièrnu Antiano tin tratadonan pa uso di fasilidatnan di Marina Real aki na Kòrsou.
E delegashon di VKC lo hasi un bishita di kortesia tambe na Gerensia di KLM pa estrechá e lasonan di amistat i di trabou ku ta eksistí entre di e dos identidatnan aki.
VKC kier a yama danki na Gerensia di KLM na Schiphol ku a hasi e biahe aki posibel.

WILLEMSTAD - Manera sa kaba, e aña aki,Obispado di Willemstad lo selebrá su hubileo di oro. E selebrashon a kuminsá kaba aña pasá ku Fiesta di Kristu Rei dia 25 di novèmber 2007 i lo terminá dia 23 di novèmber 2008 tambe na Fiesta di Kristu Rei.
Un di partinan mas importante di e selebrashon di e hubileo di oro aki ta e Misa Solèm djaluna 28 di aprel i asina konmemorando ku 50 aña pasá esta 28 di aprel 1958 Papa a halsa "Vicariato Apostólico di Curaçao" na e status di Obispado, ku Mgr. Holterman komo promé obispu, siguí pa Mgr. Ellis i awor Mgr. Secco
E santu sakrifisio di misa lo kuminsá pa mitar di shete di anochi, kaminda lo tin vários obispu di diferente pais presente.
Kardinal Simonis di Ulanda i Mgr. Kasteel lo honra Kòrsou ku nan bishita, meskos ku obispunan representantenan di Konferensha Episkopal Latino Amerikano (CELAM) i di Konferensha di Episkopal Karibense.
Un invitashon ta bai na tur fielnan katóliko, pa asistí masalmente n’e selebrashon aki djaluna 28 di aprel na Stadion Ergilio Hato na Brievengat. Nos ta warda boso tur i un boka bisa otro.

WILLEMSTAD / DEN HAAG – Kambiamentu di zeta di outo no ta nesesario. E vehíkulo por keda kore pa semper ku e mesun zeta, basta pone zeta aserka ora tin mester. Esaki ta segun e èks direktor di Castrol, Henk de Groot.
De Groot a sali den publisidat ku e notisia akí basta aña pasá kaba. Na e okashon ei el a splika ku no tin sentido pa kambia e zeta di outo despues di 10 mil, 20 mil òf asta 30 mil kilometer. Tabatin hopi interes i e èks tòp di Castrol a demostrá ku vehíkulonan di klientenan, ku a kore 300 mil kilometer promé ku nan mester a kambia na zeta, ku kambiamentu di zeta ta estafa. Ku un ‘pènchi pa midi’ e outomobilistanan ku no tabata kambia nan zeta por a kontrolá e kalidat di e zeta. E vershon nobo di e ‘pènchi’ tin asta un chep ku ta alarmá ora e detektá algu robes ku e nivel di zür òf salu den e zeta.
Pero mannan largu di e industria di outo ta poderoso i e ‘lòbi di zeta’ ta un ‘worldplayer’, segun de Groot. “P’esei nan a sera mi boka, e interesnan ta muchu grandi. Asta laboratorionan ta bou di kòntròl di empresanan di zeta ku ta risibí pago i pues ta dominá. Akí ta trata di sentenar di mion di euro pa aña na desperdisio i un daño na medio ambiente ku no por interpretá den plaka. De Groot ta hiba un krusada kontra loke e ta yama e ‘mafia di kambiamentu di zeta’. Segun de Groot, ta fòrsa outomobilistanan, koredónan di motosaikel i trùk innesesariamente den gastu, pasó ku gran regularidat nan ta kambia nan zeta. Pasó ta esei garashinan i fabrikantenan ta preskribí. I ta ken ke kore e riesgo ku e garantia riba e vehíkulo ta kore peliger? “Mi outo a kore kaba 350 mil kilometer ku e mesun zeta di motor. Ku esaki mi ta spar mi pòtmòni i medio ambiente.”