ORANJESTAD- Durante ultimo siman di Maart a tuma luga na Maracaibo e di 4to Encuentro de Coro “Un Canto En Pascua” organiza pa e Grupo Coral Venezziola di Maracaibo.
Un di participantenan cu a haci e evento un éxito rotundo ta Sra. Mayra Kock-Garrido, e conocido musico cubano/arubano cu tin 12 aña como docente na Instituto Superior de Arte na Cuba y 10 aña dirigiendo e coro “Ars Nova”.
Na Januari e Grupo Coral Venezziola a haci un presentacion na Cas di Cultura cu a wordo ricibi cu hopi entusiasmo. Na e ocasión ey nan a sera conoci cu Mayra Kock-Garrido cu ta dirigi e coro Ars Nova di Aruba. Nan a keda hopi impresiona cu e profesionalismo di Sra. Kock y su conocemento di pedagogia musical y no a tarda mucho cu nan a invit’e pa comparti su conocemento y experiencia den teoria y practico di organización di direccion coral como parti di programa di “Un Canto en Pascua”.
Esaki tabata nifica un gran reto pa Mayra ya cu e tempo tabata cortico pa prepara mas di 10 obra polifonico di e gran maestronan di Renacimiento (siglo XVI).
A participa un total di 11 grupo coral di Maracaibo: Ayaxi Coro de Cámara, Ensemble Vocal Contraluz, Grupo Vocal Ensemble Uno, Coral Filarmónica de Maracaibo, Coral Antiphona, Cuarteto Domini, Schola Gregoriana Gaudete, Ensemble de Música Sacra de la Unica, Voces Blancas Urbe, Octavia Cantorum y e organizadornan Grupo Coral Venezziola.
Según e organizadornan tabata dos dia intensivo, yena cu muziek y compañerismo. Dirigentenan di coro di varios estado di Venezuela a participa. Tabatin representante di Lara, Bolivar, Caracas, Miranda, Aragua, Cojedes y Distrito Capital.

Reconocimento pa Arubianonan na Venezuela

ORANJESTAD- Aruba tin suerte tambe cu Aruba a establece bon relacion cu Venezuela, especialmente cu Maracaibo, riba nivel musical cu ta resultando den desaroyo di nos futuro musiconan y hopi intercambio di artista.
Mayra Kock-Garrido a dicta tayer coral na Maracaibo y na su regreso na Aruba, el a mustra impresiona bisando:
“Tabata un siman intenso, di concertnan y di trabou, un experiencia bunita cu tabata mas cu satisfaccion y exito profesional. Pami, tabata ademas un gran demostracion di calor humano; m’a sintimi util y completo compartiendo mi conocementonan y hopi emociona recibiendo tanto demostracion di gratitud di asina tanto hende di talento”.
E organisadornan ta considera cu e programa tabata un exito y nan compromete nan mes di haci e encuentro na nivel nacional otro aña.
COOPERACION
Aki na Aruba nos tin suerte di tin hendenan di talento manera Mayra. Nos tin suerte tambe cu Aruba a establece bon relacion cu Venezuela, especialmente cu Maracaibo, riba nivel musical cu ta resultando den desaroyo di nos futuro musiconan y hopi intercambio di artista.
Tempo cu Simon Gollo y Ibrahim Abreo a duna un concierto (gratuitamente!) pa yuda Aruba Scholarship Foundation recauda fondo na 2006, nan a dicta diferente tayer na casi cuarenta hoben musico Arubiano. A base di nan recomendacion nos hoben violinista Omar Kock a asisti na diferente ocasion lesnan di violin na Maracaibo como invitado (y huesped na cas) di Gollo.
Di e tempo ey tin cooperacion hopi sera entre Armand Simon (otro talento di Aruba!) cu ta organisa e Festival di Piano aki na Aruba y Simon Gollo cu ta organisado di e Festival Musical Nuevo Mundo (FMNA) na Maracaibo. Aña pasa diferente musico di Venezuela a tuma parti den e festival di Armand, y e aña aki Armand lo acompaña e gran flautista Nicaulis Alliey den un concierto di FMNA na Maracaibo. Esaki lo ta un “repeat performance” ya cu nan a toca hunto den Access Gallery aña pasa.

ORANJESTAD - Bosonan ta corda ainda cu e celebracion di e aña di Hubileo di Diocesis di Willemstad a cuminsa riba fiesta di Cristo Rey, 25 di November 2007?. Tabatin presente un gran cantidad di hende cu a asisti na e celebracion aki riba Plaza Betico Croes, y nos a haña e oportunidad pa manifesta un bes mas nos fe como cristian y nos a uni den oracion.
P’esei awor nos ta bai celebra e Hubileo di Oro di e fundacion di nos Diocesis, cual lo wordo inicia na Curacao dia 28 di april, y despues lo celebra esaki riba cada isla un dia stipula pa cada isla di Antias, Boneiru, San Martin, San Eustacio, Saba, y Aruba, ‘seis isla uni den Cristo.’
Aruba lo celebra e fundacion di nos Diocesis riba diadomingo 4 di mei y lo tuma luga atrobe riba Plaza Betico Croes pa 6’or y mei di atardi durante un Celebracion Eucaristico presidi pa Monseigneur Luis Antonio Secco y co-celebra pa tur Pastor di Aruba. Por fabor tuma bon nota cu lo no tin celebracion Eucaristico riba e dia aki na ningun Parokia atardi.
Pa un compilacion chikito di e fundacion di nos Diocesis nos por referi na e edicion 111 di E Noticia na maart 2008. Den e edicion aki por encontra con e cincuenta aña tabata y a pasa.
Wel laga nos tur bini hunto riba 4 di mei pa gradici Dios pa tur loke nos a ricibi durante e cincuenta aña, “Como catolico, nos tin motibo grandi pa gradici, pa a ricibi un herencia di Fe, Speransa y Amor, pasa pa nos door di nos mayornan, nos sacerdotenan nos religiosonan, nos scolnan, nos gruponan religioso” esaki segun Obispo Luis Antonio Secco den Piskado di luna di januari 2008.

ORANJESTAD - E evento cu sigur hopi hende ta plania pa bishita tur aña ta e famoso Fiesta Rotaria. Rotary Club of Aruba ta cla pa presenta Fiesta Rotaria 2008 mas grandi cu nunca. Tur cos ta cla pa Fiesta Rotaria 2008. Dialuna anochi Rotary Club of Aruba a tene su reunion semanal, na unda cu tur e miembronan di Rotary y nan partners a bini hunto den anticipacion pa cu Fiesta Rotaria 2008.
Durante di un reunion masha ameno tur hende a topa y ta mira cu yen di gana pa e evento di mas grandi di aña di e club di servicio aki.
Tur miembro di Rotary Club of Aruba ta traha masha duro mes tur biaha pa por hasi e evento aki posibel. E Steering Committee y e Chair Persons Committee hunto cu e Presidente di e club, Sr. Bert Kamsteeg, a trese dilanti tur locual cu lo tin pa ofrese e pueblo di Aruba diadomingo awor. Tambe Gerald Luiden, Presidente di e Steering Committee a manda un invitacion pa henter e pueblo di Aruba asisti, pasa un rato agradable cu bo famia y alavez yuda Aruba. Pues no perde, dia 13 di April for di 10’or di mainta te cu 6’or di atardi, dilanti Talk of the town. Lo tin entre otro e seccion di hardware cu muebles y computers. Lo tin paña, mata, comestibel, buki, kids corner, food corner y mucho mas. Lo tin tambe e famoso dunk tank cu personanan conosi den comunidad manera, parlamentarionan, reporteronan, representantenan di companianan grandi ariba nos isla y ministernan. Lo tin ariba escenario Caha di Orgel Nelson Sprok, Pierewietjie, Club di baile Movimiento, steelband, Nico Connor, NBO y Tsunami. No lubida di cumpra e famoso rifa serca e miembronan y durante Fiesta Rotaria mes.

ORANJESTAD- Un delegacion di Hulanda, consistiendo di miembronan di e Directie Cultureel Erfgoed di Ministerie Onderwijs, Cultuur en Wetenschap, a haci un bishita di trabou na Aruba den cuadro di trabounan di restauracion di monumento. Den e edificio monumental recien restaura door di e fondo di monumento Aruba, unda Ministerio di Labor, Cultura y Deporte ta ubica na Wilhelminastraat 6, e bishitantenan a haya un oportunidad di mira pa nan mes con edificionan monumental ta ser restaura na Aruba, te cu nan ta ser poni den servicio di forma optimal como oficina.
Tabata sra. Doreen van Elst, afdelingshoofd, sr. Jan de Jong, projectleider modernisering monumentenzorg y sr. Jan van de Voorde, hoofd sector regioservice, acompaña pa sr. Maarten van Rossum, di VNO Aruba kende a topa cu srs. Ralph Croes, presidente, Ramsay Acosta, secretario, Byron Boekhoudt, tesorero y Renato Petrochi, administrado di despacho di Stiching Monumentenfonds Aruba. Durante un interacambio ameno a dialoga riba e posibilidadnan pa traha mas di estrecho cu madre patria y haci uso di fondonan manera restauratiefonds di Hulanda.
Monumentenfonds Aruba, ta un organisacion hoben cu dies aña di existencia, durante cual periodo a financia restauracion di varios edificio monumental, mantencion y administracion di monumento. Entre e monumentonan por menciona, Stadhuis y Censo, Ministerio di Cultura, Huisje Wild, Museo di Placa. Mientras tin planes pa mas restauracion e fondonan ta keda limita.
Monumentenfonds su fuentenan di entrada ta principalmente subsidio di gobierno di Aruba como tambe huur di edificionan restaura y benta di e calender di monumento. Ademas di algun donacion di sector priva pa produccion di e calendar, e contribucion di sector priva den restauracion y mantencion di monumento, ta minimal te na e momento aki.

WILLEMSTAD - Un komienso di temporada di Biyar espektakular Federashon di Biyar Kòrsou tabatin. Un total di 56 biyardista a partisipá den e promé evento ku tabata e no. 1 di Tour Bola 8.
FeBiKo ta sumamente orguyoso di e adelanto ku a keda demostrá durante di e torneo i mester ser masha sinsero ku no por papia di sorpresa i o suerte.
E nivel di wega a subi.
Vários enkuentro ku a tuma lugá den e promé buèltanan hala atenshon i naturalmente e derotanan di e faboritonan.
Grandinan ku a kai ku a demostrá ku no por sigui papia sigur den Bola 8 ku tin diferensha di nivel entre biyardistanan.
Ata algun di e viktoria i derotanan ku a hala atenshon: Joshua Harkelijn ta gana Rafael Flores 6 pa 5, William Ochoa ta gana e no. 1 hubenil Anthony Wever 6 - 4, Joaquin Virginie ta manda e tòp, number unu di tur tempu, Johnny Hellmund buèlta di pèrdèdó ku un viktoria di 6 pa 3. Bryan Landskind ta gana Raymond Magdalena 6 - 2. Badi Nahzat ta kue un viktoria importante riba e aktual kampion antiano di Bola 9, Michael Arvelo , ku skor di 6 pa 3.
Riba e último dia a konosé algun kara nobo den e último 8 hungadónan i esaki ta e satisfakshon di un direktiva ku ta traha duru pa hisa e nivel di e deporte.
Biyardistanan ku sigur a sobresalí tabata Evandro Hooi ku a finalisá na puesto 7. Juan van Doorn ku a keda na puesto 5 i Badi Nahzat ku a logra su mihó posishon te ku awor na puesto 3.
E veterano Raymond Magdalena kual su wega faborito ta Bola 8 despues di e derota na man di Landskind ta hasi un kòmbèk i demostrá ku mester tene kuenta kuné semper den e disiplina aki.

BRASILIA, Brazil, - Brazil lo hasi donashon di 14 tòn di alimento na Haiti komo kontesta p’e petishon di Gobièrnu haitiano di asistensia humanitario alimentario, Ministerio di Relashonnan Eksterior brasileño a anunsiá den un komunikado ayera.
E donashon lo bai keda mandá djabièrnè awó den un avion Hercules di Forsa Aéreo Brasileño (FAB).
Den e komunikado, e Kansieria a komentá ku Gobièrnu brasileño ta preokupá p’e resiente konsekuensianan di e situashon na Haiti.
“P’esei e mishon di Brazil lo organisá awe un reunion ku e meta ku Programa Mundial di Alimento ku urgensia ta kontribuí mandamentu di alimentonan di promé nesesidat pa Haiti”, e komunikado a ekspresá.
“Gobièrnu brasileño ta konsiderá fundamental ku komunidat internashonal ta kumpli ku e kompromiso di promové mehoría di kondishonnan di bida di poblashon haitiano i stabilidat na Haiti.
“Brazil lo sigui kontribuí den e esfuerso aki”, e komunikado a kulminá.

WILLEMSTAD - Ayera 8 di aprel, e momentu a yega pa firma e akuerdo entre minister di Enseñansa i Kultura i NAOC pa por disponé di Fondo Churandy.
Tin dos motibu pa kua firmamentu di e akuerdo aki ta unu importante.
Nos ta orguyoso di a realisá nos mes a logra pone fl. 300.000, - disponibel pa sostené Churandy, e deportista olímpiko ku a klasifiká.
NAAU mes ta afirmá, ku esaki ta promé biaha den historia ku Atletismo a risibí un sosten asina grandi.
Nos kier kompartí e kontenido di palabrashon estrikto pa uzo di e fondonan.
E palabrashon pa uzo di e fondo a keda trahá den kuadro ku Churandy, NAOC i NAAU.
A base di e palabrashon aki e fondo por wòrdu uza pa e siguiente komponentenan:
-Fl. 10.000, tur luna pa sostené Churandy..
-Fl. 28.200, pa sosten téknika di e deporte.
-fl. 67.500,- pa análisis Biomekanika.
-fl. 30.000,- pa sosten nutrishon deportivo
-fl, 35.845,- pa sosten médiko deportivo.
Fl. 118.455,- pa kubri gastunan partisipashon na kompetensianan internashonal.
-fl. 10,000,- pa gastunan personal durante di Weganan Olímpiko.
Responsabilashon
Gobièrnu tin eksperensia hopi positivo ku e forma di responsabilisá uzo di supsidio.
Pa uzo di e Fondo di Churandy, e akuerdo ta stipulá ku lo tin un evaluashon intermedio.
Tin un stipulashon ku ta bisa: “....brengt de NAOC over het in dit adendum bepaalde tussentijds verslaguit. Dit verslag geeft een goed overzicht van tot dat moment gedne uitgaven, bestedingnen, aangegane verplichtingen en dergelijke die ten laste komen van di in di addendum vastgelegde subsidiebedrag”.

BEIJING – E Komité Olímpiko Internashonal (KOI) lo por suspendé e rekorido internashonal di e antorcha olímpiko komo konsekuensia di e protestanan kontra gobièrnu chines.
“Esaki opviamente lo keda tratá pa e Komité Ehekutivo,” asina e Presidente di KOI, Jacques Rogge a bisa Associated Press. Ora ku Rogge a ser aserká ku e pregunta si e antorcha mester sigui ku su rekorido internashonal, el a kontestá, ku e no por ni si ni no. “Lo tin un diskushon di e komishon ehekutivo riba e tópiko aki, pero mi no ta duna ningun kontesta awor aki.”
E relevo di e antorcha a wòrdu interumpí kaba na Gresia, Estanbul, London i Paris pa sektornan ku ta oponé e polítika chines pa loke ta derechonan humano i Tibet. Ta spera mas problema awe ora ku e vlam olímpiko yega San Francisco, e úniko eskala na Merka.
“Definitivamente nos ta preokupá pa loke a sosodé tantu na London komo na Paris,” asina Rogge a deklará. “Mi ta hopi tristu, pasobra un símbolo importante a wòrdu ataká. Nos ta rekonosé e derechi di hendenan pa protestá i ekspresá nan punto di bista, pero esaki no mester ta den un forma violento. Nos ta tristu pa e atletanan i e personanan ku tabata warda asina tantu riba e rekorido i awor a pèrdè tur nan smak.”
Djaluna mester a kanselá i di tres etapa di e rekorido den Paris ya ku e manifestantenan tabata tira awa riba e vlam pa trata na paga esaki i tambe a ataká esnan ku tabata karga e antorcha. E ekipo di seguridat ku ta protehá e antorcha mester a paga e vlam na dos okashon a lo largo di e ruta i retirá pa buska seguridat den un bus. Sinembargo, e vlam a keda sendí si na un lantèrna ku ta riba e mesun ruta.

PONCE – E portorikeño Juan Manuel ‘Juanma’ Lopez lo enfrentá Daniel Ponce de Leon pa e titulo super gallo di e Organisashon Mundial di Bòkseo (OMB).
E pelea di 12 rònt lo tuma lugá dia 7 di yüni na Atlantic City den un kartelera ku e pelea estelar ta pa e titulo mediano entre Kelly Pavlik i e ingles Gary Locket.
“Esaki lo ta mi promé pelea pa un título mundial, pero mi sa ku mi ta preparando pa e kombate aki,” asina Lopez a bisa durante un konferensha di prensa. “For di seis pa ocho luna pasá mi a bin ta bisa, ku mi ke un pelea ku Ponce de Leon.”
Lopez kende ta invikto den 21 pelea di kual 19 pa via di nòkout lo enfrentá Leon, kende ta un bòksdó ku tin slanan duru i lo hasi su di seis defensa di su título ku el a gana for di 2005.
E mèksikano Leon a bisa, ku e ta spera di ta den ekselente kondishon físiko pa e kombate pa e faha. “Nos ta spera ku esaki ta un gran kombate,” asina el a bisa. Den su último pelea na desèmber, Leon a gana pa desishon di su kompatriota Eduardo Escobedo. E mèksikano tin 34 viktoria di kual 30 ta pa nòkout.
Lopez ta e kampion latino di OMB i e promé retadó di e mèksikano.

Juan Manuel ‘Juanma’ Lopez

MIAMI – E Tòp 10 di e klasifikashon mundial di tènis femenino (WTA) a sufri un kambio so ku ingreso di e tenista ruso Elena Dementieva kende a bula for di 11 puesto pa awor okupá e di ocho puesto. Esaki despues ku Dementieva a yega te kuart final durante e torneo na Miami.
Serene Williams, kende a gana e título durante e torneo aki, ta na e di nuebe lugá riba e tabla di posishon tras di Jelene Jankovic ku ta na di tres lugá. Williams a gana di Jankovic pa bai ku e título.
Klasifikashon WTA:
1. Justine Henin (BEL) 6.105 punto
2. Ana Ivanovic (SRB) 4.216
3. Jelena Jankovic (SRB) 4.095
4. Svetlana Kuznetzova (RUS) 3.905
5. Maria Sharapova (RUS) 3.601
6. Anna Chakvetazde (RUS) 2.665
7. Venus Williams (USA) 2.771
8. Elena Dementieva (RUS) 2.305
9. Serena Williams (USA) 2.297
10. Daniela Hantuchova (SVK) 2.257

WILLEMSTAD - Por lo pronto e kampaña grandi di konsientisashon ku Asosashon di Tráfiko Sigur Kòrsou, ASTK, tabatin planeá pa e aña aki, ta wantá. E kompanianan ku Asosashon di Tráfiko Sigur Kòrsou, ASTK, a aserká pa un kontribushon finansiero, di manera ku por ehekutá e proyekto aki, no a duna sufisiente respòns.
ASTK a anunsiá algun tempu pasá ku e ta sinti e nesesidat pa bin ku un kampaña pa konsientisá henter pueblo di Kòrsou. Sinembargo e organisashon ku ta boga pa seguridat den tráfiko, no ta deseá mas pa hiba un kampaña kòrtiku di algun dia òf un siman. ‘Nos ke un kampaña struktural ku ta dura sigur kuater luna’. Asina e presidente di ASTK, Rignald Christina a splika i tambe el a splika ku un kampaña dje intensidat aki i bon strukturá ta kostoso. “Esei ta un kapital ku nos sigur no tin”, señor Christina a remarká. E presidente di ASTK, a splika ku e organisashon a aserká vários instansia ku e petishon ku e petishon pa nan duna un kontribushon pa sera e presupuesto pa realisá e proyekto informativo. Pero e intentonan aki no a duna resultado positivo, segun Christina, pasobra lástimamente e kompanianan no a mustra interes.
‘Nos no a alkansá e montante ku nos a pensa di por spera pa realisá e proyekto’. Christina: “Ta p’esei pueblo por ripará ku e kampaña di konsientisashon ku nos ta pendiente pa bin kuné ta wantá”. E intenshon di ASTK, ta keda sinembargo pa riba un dia realisá e proyekto aki, pasobra e asosashon ta keda buska e manera pa haña finansiamentu pa e proyekto. ‘E plan no a muri, pero ta un realidat ku e ta dependé di donashon di instansianan partikular’.

PORT-AU-PRINCE, Haiti, - Situashon ta sigui tenso na Haiti awe, despues di sinku dia di protesta pa motibu di kosto haltu di alimentonan i akshonnan represivo desplegá kontra movementu sosial.
Miéntras tantu miembronan di Mishon di Nashonnan Uní pa Stabilisashon di Haiti ta kustodiá sede presidensial.
Ayera, mas ku shen manifestante a trata ataká Palasio presidensial na Port-Au-Prince, kapital di Haiti.
“Nos tin hamber!”, e multitut tabata grita, kendenan ayera a trata drenta Palasio presidensial.
Múltiple negoshi ta será i labornan na e kapital Port-Au-Prince ta sigui paralisá.
Ayera, kaskonan blou a lansa balanan di rùber i gasnan lakrimógeno kontra manifestantenan pa plama nan for di otro i a kousa heridanan na dos periodista: un fotograf i un kamarógrafo.
Tambe otro kuater persona a resultá heridá, di akuerdo ku registronan di hospital públiko di Port-Au-Prince.
E manifestantenan a tira piedranan kontra edifisio di Gobièrnu i ta’tin tirunan ku armanan di kandela, konfrontashonnan i intentonan di vários hóben pa tumba bareranan di entrada di e Palasio presidensial.
Funshonarionan a hasi yamada na e habitantenan pa mantené trankilidat, miéntras e personanan ku ta protestá a eksigí renunsia di Presidente haitiano René Preval.
Presidente Preval a yega na poder dos aña pasá ku e promesa di restourá pas den un pais ku ta sufri di violensia di e lucha entre gruponan rival.

ARIES: Bo komunikashon pa ku otronan ta faborabel. No ta importá e tema ku nan ta toka ku bo i bo ta sintibu awor dispuesto na papia òf kòmbersá. 39,27,15.

TAURO: Hasi un reorganisashon di loke ta bo kosnan di balor i esei ta inkluí no solamente plaka i kosnan material, sino tambe bo mundu spiritual. 43,12,16.

GEMINIS: Bo konosé bo mes komo individuo i loke bo ta deseá bo ta logra den bida. Ta tempu tambe pa enbolbí bo mes den aktividatnan sosial. 04,36,20.

KANSER: Bo ta mas uní ku esnan ku tin mester di ayudo i ta ofresébu e mesun nan sin kondishonnan. Na bo banda no ta falta ken ta sirbi di maestro spiritual. 08,42,47.

LEO: Aktividatnan den grupo ta enfatisá, spesialmente esnan ku ta relashoná ku bo trabou. Bo amistatnan lo ta di gran ayudo na momentu ku bo tin mester di nan. 36,19,07.

VIRGO: Awor bo ta hasi tur lo posibel pa logra un lugá di prestigio i bo ta logrando. Tur esfuerso ku bo hasi ta lagábu alkansá bo ophetivonan den bida. 10,03,22.

LIBRA: Ta presentá hopi bon oportunidatnan pa biaha, asina tambe posishon di por eduká òf siña otro personanan. 49,18,06.

SKORPION: Bo ta benefisiá awor di suerte di otro persona. Ta tempu di uni forsa i di hasi negoshi en konhunto. Si bo mester pidi un fiansa na banko, hasié awor. 33,12,47.

SAGITARIO: Si bo mester ayudo personal, no duda pa busk’é, ya ku bo ta benefisiá grandemente di bo mes. 18,09,01.

WILLEMSTAD - Diputado di Enseñansa Marilyn Alcalá-Wallé tin mester di sigur dos siman di tempu pa kontestá tur e preguntanan ku miembronan di Konseho Insular a lansa ayera, durante e reunion públiko di Konseho Insular ku a trata inovashon di enseñansa.
Komo tal, gezaghèber interino Magaly Jacoba a posponé e reunion despues di promé tanda te dia 23 di aprel awor pa 2’or di mèrdia.
Parti di e kontestanan, segun e mandatario, e por duna dia 23 awor, sobrá kontestanan e lo duna despues di e konferensha grandi di enseñansa ku ta programá pa dia 23 di mei próksimo, asina Alcalá-Wallé a agregá.
Motibu di e reunion públiko di ayera, pidi pa Partido Pueblo Soberano i partido Demokrat ta sierto deklarashonnan ku diputado Alcalá-Wallé a hasi algun dia pasá riba inovashon den enseñansa.
Alcalá-Wallé a indiká, ku tin sierto parti di inovashon ku no a duna e resultado deseá i ku mester bai kambia esaki. Hopi ta esnan ku a interpretá e palabranan aki ku gobièrnu tin pensá pa para e proseso di inovashon den enseñansa, loke e mandatario despues a rechasá kategórikamente. Mi ta para shen porshento tras di inovashon. Loke a pasa ta, ku implementashon di e inovashon no a kana manera mester ta, el a aklará.
Esei tabata punto sentral tambe di e diskushonnan di ayera.
Miembronan di Konseho Insular ayera a presentá un avalancha di pregunta na gobièrnu riba e tema aki.

WILLEMSTAD - Ta imposibel inová bo sistema di enseñansa, si bo no inová bo sosiedat, si bo no krea oportunidat igual pa tur hende. Manera e situashon ta awor aki, ta un farse kompleto, Nelson Pierre, lider di frakshon di Lista Niun Paso Atras a bisa ayera den Konseho Insular di Kòrsou durante e reunion públiko pa papia riba inovashon di nos enseñansa.
Pierre, manera kasi semper ta e kaso, a aserká e problemanan ku ta manifestando den e proseso di inovashon den enseñansa for di un punto di bista filosófiko.
Pierre a bisa, ku istórikamente situashon a krese den mayoria parti den mundu, ku ta papia di igualdat pa tur hende – tambe den enseñansa – siendo ku den práktika esei no ta e kaso.
Tur tempu a papia di krea oportunidat igual pa tur hende subi riba e trapi di progreso den bida. Pero den práktika, nos ta weta otro kos ta sosodé. Mundu a krese basá riba e sistema aki.
Ta p’esei por ehèmpel movementu iskierdista ta kresiendo na Fransia. Pero na Ulanda nos ta weta un otro tendensia. Un figura ultra derechista ku ta kere ku e por trapa derechi di siudadanonan igual den mesun Reino, ta hañando dia pa dia mas popularidat. Ulandesnan ta mal hende. Mal hende mes, Nelson Pierre a enfatisá.
Ta un hecho segun Pierre, ku e tendensia neo liberal ketu bai ta sigui dominá den mundu.
Si nos analisá nos enseñansa, nos ta weta ku no tin un ehèmpel mas klásiko di desigualdat.
“Na skol e maestro ta bisa e mucha kòrda bin skol na tempu, sino nos ta sera porta di skol. Ku kua sèn e mucha ta paga bus bin skol? Kòrda hinka rudia i resa anochi den kamber. E mucha no tin ni kas, kòrda kamber. Kòrda ku e informashon ku bo mester pa traha bo tarea, bo ta hañ’é riba Internèt. E mucha no tin ni kòmpiuter, te pa e tin Internèt.

WILLEMSTAD - Mi ta kontentu pa un kos: tin tur indikashon awor ku komunidat ta konsiente ku nos ta bibando den un krísis energétiko, kaminda tur hende mester duna un man pa nos sali afó.
Esei ta reakshon di diputado di Asuntunan Ekonómiko Eugène Rhuggenaath, riba último desaroyonan den e sektor aki.
Gobièrnu di Kòrsou a posponé introdukshon di un oumento di preis di gasolin – por sierto e di dos den dos luna di tempu – ku 11 sèn pa liter.
A posponé esaki, pa duna un plataforma di sindikato, komersio i gobièrnu mes chèns di presentá alternativa riba e oumento aki.
E komishon a reuní durante último simannan i pa mas tardá mañan djaweps mester entregá nan relato final na gobièrnu.
Ayera, e komishon den forma verbal a duna un indikashon kaba den ki direkshon nan ta pensando ku nan alternativanan. Muchu detaye di e rekomendashonnan aki sinembargo te ainda no ta konosí.
Pero banda di e komishon aki, Partido Niun Paso Atras tambe a entregá un análisis ku el a hasi riba e situashon di preis di energia na Kòrsou.
E partido, presidí pa Carlos Monk a konkluí ku debidamente tin espasio pa mantené e preis di kombustibel na e nivel aktual, basta tuma paso riba kuater área di atenshon, ku ta entre otro e área sosio ekonómiko i e área di legislashon.
E grupo ta proponé entre otro pa evaluá un restrukturashon di Curoil komo distribuidor di kombustibel. Den e restrukturashon aki no ta mishi ni ku rentabilidat, ni ku puestonan di e trabou di e kompania, segun Monk a sigurá.

WILLEMSTAD - E moshon ku parlamentu ulandes a aseptá siman pasá, ta un kos ku fásilmente por kondusí na aktuashon ilegal di parti di gobièrnu ulandes. Si ehekutá e moshon aki, gobièrnu ta haña un base pa ekspulsá antianonan for di un pais den Reino, loke ta kompletamente ilegal. P’esei MAAPP lo vigilá e desaroyo aki djaserka, presidente dje organisashon ku ta agrupá organisashonnan ku ta sali na defensa di antianonan na Ulanda Rub Severina a sigurá.
Severina tabata referí aki na e moshon ku Tweede Kamer a aprobá ku un mayoria grandi.
E moshon ku ta boga pa manda hóbennan antiano, ku no tin niun klase di perspektiva den nan bida, pero ku en kambio ta formando problema serio riba teritorio ulandes, bèk Antia.
Parlamentu ulandes a aprobá e moshon aki ku un sosten amplio di partidonan polítiko, inkluso di partidonan manera Partij voor de Vrijheid ku tur tempu tabata na fabor di un medida asin’aki.
E moshon ta basa riba e punto di salida, ku tur mucha ku ainda ta bayendo skol i tur mucha ku ta kai bou di e proyekto Formashon Sosial Obligatorio lo no por drenta Ulanda. Lo hasi eksepshon solamente serka hóbennan ku ke establesé na Ulanda pa sigui studia òf ku nan famia kompleto a muda pa e pais friu.
Ku esaki, a habri kaminda pa tòg introdusí un lei den futuro, ku ta hasi posibel ekspulsá hóbennan antiano, un deseo ku ta biba na Ulanda ya pa basta tempu kaba, asina Ruben Severina a atmití.

WILLEMSTAD - Siman pasá embahadornan di Reino den e hemisferio aki a tene nan reunion anual na Kòrsou. Honor a toka na Minister Presidènt señora Emily de Jongh- Elhage pa na nòmber di Minister di Relashon Eksterior di Reino habri e konferensha aki.
Na final di e Konferensha e embahadornan a hasi uso di e okashon, pa saka un foto di e grupo huntu ku Minister Presidènt.
Riba e foto Minister Presidènt di Antia señora Emily de Jongh-Elhage den kompania e embahadornan.

WILLEMSTAD - Parke Kristof ta selebrá su di 30 aña di eksistensia den 2008 huntu ku tur amante di naturalesa riba nos dushi isla. Den luna di aprel tambe lo tin diferente aktividat.
Djadumingu 13 di aprel ta brinda un i tur e oportunidat úniko pa por mira nos binánan den nos parke nashonal den oranan tempran di mainta.
Lo kore den e parti Nort di Parke. Kaminda ta purba di haña mas bista di e binánan.
Guianan amabel di Christoffelpark i profeshonal lo duna tur informashon tokante nos biná i paranan den nos parke.
Tur kos t’ei pa un mainta úniko i speshal, p’esei no pèrdè e oportunidat aki pa disfrutá di un mainta dushi!!!
Spesial pa selebrashon di 30 aña di eksistensia di nos parke nos ta ofresé e tour pa Nafl. 15,- p.p. ku ta inkluí ko’i bebe i fruta.
Reservashon ta nesesario pa motibu ku e grupo lo keda chikitu. (max 20 persona).