WILLEMSTAD - Preis di kuminda na nivel mundial ta subiendo drástikamente rònt mundu i ta formando titularnan grandi den e medionan mas importante na mundu manera New York Times, The Economist i Financial Times. LA PRENSA a publiká diferente artíkulo kaba riba e krísis aki pero ta parse ku outoridatnan lokal ta muda pa loke ta trata e reperkushonnan pa Kòrsou. Aktualmente tin un petishon den konsiderashon pa oumentu di preis di aros ku a subi drástikamente riba merkado mundial. Riba e pòrtrèt por mira un konsumidó hinkando produkto den su garoshi. Por sierto e beibi no tabata na benta den e tienda. (Foto: AP)

WILLEMSTAD – Tur hende ku ta kria kachónan pitbull mester registrá nan promé ku 2 di mei próksimo. E atvertensia akí ta bin, despues ku ayera tabatin un otro insidente, kaminda dos kachó pitbull a morde un hobensitu di 5 aña.
E insidente a tuma lugá ayera nochi tempran, despues ku un otro hobensitu di 5 aña a kaba di hunga na kas di e víktima ku ta su bisiña. Ora esun tabata bai su kas, e víktima a disidí ku e ta bai kuné. Na momentu ku nan a yega na e kas kaminda e kachónan ta, e kachónan a sali riba kaya i morde e hobensitu bisiña. Ku heridanan grave na su kara i lomba, a transport’é pa hòspital, kaminda e ta interná ku entre otro un ‘klaplong’. Su situashon ta serio, pero stabil.
Resientemente gobièrnu a anunsiá, ku e lei ku ta regulá krio di kachónan peligroso a drenta na vigor i ku tur doño di un kachó rasa pitbull mester registrá nan kachó promé ku 2 di mei próksimo. Sin embargo, dor ku e formularionan di registrashon no tabata kla, e registrashon a surgi retraso. E registrashon ta enserá, ku e kachó ta haña un chep implantá den su kueru. E chep ta kontené tur dato di e kachó i e doño. Na mes momentu ku registrá e kachó, mester sterilis’é tambe, pa asina poko poko kaba ku reprodukshon di e rasa. Mas aleu e doño di e kachó mester sòru pa e kachó ta na kadena i bistí ku un bosal ora ta sali kuné riba kaya. Na kas e kachó mester ta será den un kurá ku waya òf muraya haltu, di moda ku e no por sali riba kaya. Tur esakinan ta eksigensianan ku e doño di un pitbull mester kumpli kuné, segun e lei nobo ku a drenta na vigor resientemente.

Skina di Sorti, awe djamars 1 di aprel di 2008, ta kuminsá ku deseá un i tur un bon dia. Tal bes e fecha 1 di aprel, ku ta un dia ku sa dal hende Cuba, òf kue otro kabes abou, ta un dia apropiá pa puntra kon leu nos ta den e proseso estatal. Tur e kontestanan anterior ku kos ta kanando bon i ku ta alkansando ophetivonan òf ku ta “on track”, den lus di e realidat di momentu (kos ta kana tal bes ku spit di morkoi), por ser tuma komo un Cuba.
****
For di seno polítiko ulandes, ta surgi diferente sonido ku ta provoká un aselerashon di parti di gobernantenan ulandes, ku en bes di yuda e kousa lo trese mas problema ainda den futuro. Siñansa ta bisa ku ora bo pèrs kos manda kontra di kultura di un pueblo, tardi òf trempan un eksploshon sosial lo ta e resultado. Den un elekshon òf referèndem, e eksploshon sosial por manifestá su mes den su forma mas pasífiko.
****
Ku desaroyonan global sosio ekonómiko basta preokupante, kalke tenshon sosial por haña un buèlta mas violento. Ami no ta gusta e tendensia di tene kosnan riba kabes di pueblo i krea persepshon di por evitá impakto di desaroyonan global. Bo ta krea un situashon pa desepshon grandi, ku den kombinashon ku e realidat ekonómiko, ta bira un barí di polvo. Kontrali na e reakshon di “sussen, pappen en zoet houden”, e situashon ta pidi pa un transparensia máksimo.
****
Pa bini bèk riba e proseso estatal mi ke hasi e siguiente opservashon. Si ta un proseso pa pueblo, na nòmber di pueblo i konsekuentemente dor di pueblo, anto un dje promé indikadónan pa e proseso su progreso, mester ta e grado di partisipashon i kandor (“belevenis”) den komunidat.

ST. EUSTATIUS – St. Eustatius Business Association (STEBA) siman pasa a tene un foto relashoná ku reforma konstitushonal pa islanan BES, Boneiru, Saba i St. Eustatius. Pa e okashon aki tabatin vários orador prinsipal, diputado di Asuntunan Konstitushonal di e isla, Julian Woodley, direktor di STEBA, Koos Sneek, direktor Asosia di KPMG, Xavier Blackman, miembro di e Komishon di Supervishon Finansiero, Max Pandt i direktor general di OBNA, Clark Gomes Cassares.
Diputado Woodley a hasi un rekapitulashon di tur lokual a tuma lugá te ainda den e proseso, miéntras ku e direktor di STEBA, ta haña ku e informashon ainda no a yega serka e hòmber komun riba kaya i pa e sektor komersial.
Direktor Koos Sneek tambe a bisa, ku no solamente no tin ningun informashon disponibel, sektor komersial no a wòrdu enbolbí pa nada den e diskushonnan. “Sektor komersial no tabatin nada di bisa den e futuro struktura konstitushonal i sigur lo bai tin konsekuensianan grandi pa e manera ku nos ta kustumbrá di hasi negoshi. E ta spera ku gobièrnu tuma nota di e preokupashonnan ku a keda ekspresá den e foro aki i ku den futuro lo enbolbí e sektor komersial den henter e proseso di toma di desishon.
Sneek a pone atenshon tambe riba e rumornan ku islanan BES a skohe euro komo nan moneda den futuro. “Esaki ta leu for di e bèrdat. Te kaminda ami sa, ta hasiendo un estudio pa determiná tur e pro i kontranan di euro komo moneda pa islanan BES,” asina Sneek a añadí. “Tur hende ta na altura di e efektonan negativo ku euro tabatin komo moneda na St. Martin (parti franses). Mi ta antisipá, ku e resultado di e estudio aki lo demostrá, ku introdukshon di euro komo moneda pa islanan BES lo tin e mesun resultado. Mi opinion ta, ku nos mester studia seriamente e posibilidat pa keda ku florin antiano. E moneda aki huntu ku Banko Sentral di Antia ta un instituto ku a proba di ta fuerte i ku a sirbi nos bon.”

PERU, - Un kadena di oro ku ta data mas ku 4.000 aña pasá, a enkontr’é pegá ku lago Titicaca na Peru, ku a bira e artefakto mas bieu di Amérika trahá ku metal di oro, un ekipo di investigadó a anunsiá ayera.
E kadena ku kralchi di oro a keda trahá mas o ménos 2.100 aña promé ku Kristu, e investigadónan a publiká den revista “Proceedings of the National Academy of Sciences” di Merka.
E antropólogo Mark Aldenderfer, di Arizona University, i su koleganan a deskubrí e kadena huntu ku kráneo di un persona adulto den un graf na Jiskairumoko, un pueblo di yagdó entre 3.300 i 1.500 aña promé ku Kristu.
“Nos a skonde e deskubrimentu pa un tempu pa vários motibu. Un di e motibunan tabata pasobra nos tabata ke hasi un análisis kímiko di e oro”, Aldenferer a splika den entrevista telefóniko.
“I e di dos motibu tabata pasobra nos no tabata ke pa hendenan di e zona òf kualke otro sa di e oro, pasobra nos tabata teme ladronnan”, e antropólogo a añadí.
E temornan aki ya a keda superá.
E kralchinan a keda trahá di oro lokal.
Segun e antropólogonan e deskubrimentu ta mustra ku uso di prendanan di oro pa distinguí hende riku i importante na e region a kuminsá hopi ántes di loke nos a pensa.

Foto: Peru kadena di oro 0104

Pòtrèt emití pa “Proceedings National Academy of Sciences” ta mustra rekonstrukshon di e kadena di oro enkontrá na sùit di Peru.

WASHINGTON, Merka, - Lider di Kámara di Representante di Kongreso di Merka, Nancy Pelosi, a añadí su bos n’e petishonnan pa un resolushon rápido p’e rivalidat entre Hillary Clinton i Barack Obama pa kandidatura presidensial demókrata.
Den entrevista ku programa di televishon ABC News, Pelosi a bisa ku e karera pa nominashon presidensial di Partido Demókrata mester konkluí rápidamente.
El a indiká ku ta importante pa e demókratanan laga atras un kandidato, si nan ke konkistá Kas Blanku na novèmber.
Anteriormente, Presidente di Partido Demókrata, Howard Dean, a bisa ku e lo gusta mira e karera finalisá na kuminsamentu di yüli, na lugá di sigui su kurso te dia di Konvenshon Nashonal na ougùstùs.
Simpatisantenan di Obama a pidi Clinton p’e bandoná e kampaña, ounke e propio kandidato a bisa ku e eks Promé Dama por kontinuá den e kontienda tur tempu ku e ta deseá.
Clinton a afirmá ku e ke mantené su mes den e karera te ora e 10 elekshonnan primario ku sobra finalisá.
Pronóstikonan a indiká ku Clinton lo gana e benidero elekshon primario ku ta tuma lugá na Pensilvania 22 di aprel.
Sin embargo, segun mayoria enkuesta ta pon’é vários punto abou di Obama den e resultado final.
Tin indikashon ku su kampaña tin problemanan finansiero atrobe, ku miónes di dollar di debenan, periodista di BBC, Sarah Morris, a informá.

WILLEMSTAD – Kuminsando awe nochi lo tin tres anochi di liberashon den santuario Ministerio Mas Bida Abundante den Colon. E tres anochinan aki ta pa kibra kadena i ataduranan spiritual for di bida di hende. Tres anochi den kua e poder di Dios lo manifestá su mes pa kaba ku depreshon, trouma, maldishonnan generashon i hopi otro defekto ku ta stroba e individuo di ta fruktífero.
Pa e okashon aki pastor Olam Mustapha for di Tanzania lo bai ta e orador di e tres anochinan riba invitashon di evangelista/pastor Norwin Josepa. Lo ta tres anochi sin limitashon, ya ku orashon ta pa hende por wòrdu hasí liber for di tur karga i kibra yugonan for di garganta. Ademas lo por spera ku esnan ku bin ku kurason habrí por konosé e boluntat di Dios pa nan bida.
Santuario Ministerio Mas Bida Abundante for dia 15 di mart a habri su portanan pa orashon di 24 ora i na mesun momentu ya a selebrá tres sirbishi ku tabata kargá ku kreyentenan. Un den espasio di 300 m2 ku kapasidat di 400 persona a bin ta selebrá presensia di Dios na un manera grandioso. Plannan pa ku Santuario aki ta grandi, ya ku pronto lo kuminsá habri for di 12’or di mèrdia, kaminda un i tur por pasa pa hasi orashon, miéntras ku riba djabièrnè lo tin sirbishi di alabansa 12’or di mèrdia. Tur esaki ta lòs for di e sekshonnan di estudio di beibel riba djaluna anochi i orashon djarason anochi.
Pronto lo kuminsá ku hubentut riba djabièrnè anochi, miéntras ku e preparashonnan ta wòrdu hasí pa inisio di e sekshon di hubentut djasabra 12 aprel den un forma grandioso. Siman pasá mas ku 120 hende muhé a reuní riba djamars pa un enkuentro femenino i durante kua tabatin sanashon i liberashon ku a tuma lugá. E anochi aki tabata na enkargo di Nelson Amado i promé dama Shermelin Josepa.

WILLEMSTAD- Djaluna mainta Banco di Caribe a hasi St. Jozef VSBO den Otrobanda un bishita pa hasi un kontribushon masha balioso na e skol. Den kuadro di maneho Banco di Caribe pa aportá na proyektonan spesialmente pa hubentut Banco di Caribe a aseptá pa kontribuí na e materia ‘téknika general’ di e skol.
E kontribushon balioso aki, lo pèrkurá pa e hóbennan por risibí lès via di sistema oudiovisual. Primeramente direktiva di e skol a opta pa atkerí un laptop i despues sobrá ekiponan nesesario pa e materia tékniko en kuestion.
“Nos ta aportá na unda ku nos por i nos ta hasié ku plaser. Banco di Caribe ta kere firmemente den un desaroyo positivo di e hóben, henter nos sistema di patrosinio ta trahá ku e enfoke pa aportá na proyektonan edukativo. Den e mundu moderno ku nos hóbennan ta krese awendia, e enseñansa via di sistema oudiovisual ta algu esensial ku ta wòrdu hasi rònt mundu, i Kòrsou no ta un eksepshon. Banco di Caribe ta deseá e hóbennan di St. Josef VSBO hopi éksito”, asina representante di Banco di Caribe sra. Marielle Dorand-Lebacks a komentá.
Riba foto por mira direktor di St. Jozef VSBO, sr Cijntje, dosente Bodok i sra. Dorand-Lebacks di Banco di Caribe rondoná pa hóbennan di St. Jozef VSBO.

PADMORE-ANTONIA
Diana Simona
A laga atras su ruman Maureen Antonia, subrino(a)nan Idelberth, Wilberth, Shamir, Jahiara Antonia, Iestika Lutje Schipholl, Djerren Sambo. Akto di entiero ta djaweps 3 di aprel 9or-11or, for di Bottelier pa santana Bottelier.

ALBERTO
Julianita Dorothea
Mihó konosí komo Ula
A laga atras su yu Sigmaira Alberto, ñetu Igabriel Alberto, bisañeta Siyona Martis, rumannan Sabino Alberto, Luquita Raphaëela i nan famia. Akto di entiero ta djarason 2 di aprel for di El Señorial pa santana Barber. Bishita 1or-3.30or. promé ku entiero tin un respòns na El Señorial.

DE LA PAZ
Virgilio Andresito
Mihó konosí komo Vi
A laga atras su yunan Devin de la Paz i Dagmar Hediak, Rocheline i Alexis van Aanholt-de la Paz, Ulrich de la Paz, rumannan Frida Phelipa-de la Paz, Ivonne Leocadia de la Paz, Ruth, Judith, Harold, Gilbert, Anthony de la Paz. Akto di entiero ta djaweps 3 di aprel for di misa Sta. Maria pa santana Sta. Maria. Bishita 1or. Promé ku entiero tin un s.s. di misa 4or.

ROOI
Errol Roberto (54 aña)
A laga atras su partner Ronnie Vermeulen, yunan Orina de Leij, Thaïsha de Leij, David Rooi, rumannan Milto i Emmy Rooi, Elvira Rooi, Edwina i Carolus Antersijn-Rooi, Elfriede i Genaro Jean Louis-Rooi, Edsel i Aluishka Rooi. Akto di entiero ta djarason 2 di aprel na Ulanda.

HORTENCIA
Ismaël Marco
Mihó konosí komo Isma
A laga atras su kasá Judith Hortencia-Paula, yunan Heinrich i Fereal Hortencia, Judeska Hortencia, yunan di kriansa Jaïro i Jerzho Martha, Djureena i Djureeny Peternella, Zaid i Rannick Paula. Akto di entiero ta djarason 2 di aprel for di misa Sta. Famia pa santana

LIMA – Claudio Pizarro a yama e suspenshon di 18 luna ku el a haña “un atropeyo” i el a ninga un biaha mas ku el a bebe i ku e tabata ku algun muhé den un konsentrashon di e ekipo di Perú. E desishon ta nifiká ku 18 luna largu e no por hunga pa selekshon di su pais. Pizarro, goliadó di Chelsea a haña suspenshon huntu ku Jefferson Farfán (PSV Eindhoven, Uanda), Santiago Acasiete (Almería, España) i Andrés Mendoza (Steaua Bucarest, Rumania).
“Mi ta sorprendí pa e sanshon ku a imponé riba mi i mi ta rechas’é. Mi no a kometé ningun indisiplina i mi ta inosente”, asina Pizarro a bisa den un entrevista na telefon ku e programa di televishon Kanal 4.
Pero José Mallqui, miembro di e Komishon Sudafrika 2010 di Federashon di Futbòl di Perú, a bisa ku e deklarashonnan di Pizarro ta ko’i hari. “Na momentu ku mi a skucha e deklarashonnan di Claudio Pizarro bisando ku e ta inosente, mi a pensa ku mi tabata skuchando un programa di chiste. Pizarro mester bira mas serio. Nos ta papiando di kosnan ku a pasa. E komishon ku a investigá e kaso a buska tur informashon promé nos duna un opinion”, asina Mallqui a bisa.
E komishon di hustisia di Federashon di Futbòl di Perú (FPF) a determiná ku e kuater miembronan di selekshon di e pais a partisipá den un benben ku alkohòl i hende muhé den pleno konsentrashon den un hotèl di Lima dia 18 di novèmber último. E motibu di e selebrashon tabata e empate di 1-1 kontra Brazil, pero dos dia despues e selekshon di Perú a pèrdè ku un skor hopi mahos kontra Ecuador na Quito. E investigadónan ta kere, ku ta e eksesonan ku a tuma lugá a pone e selekshon di e pais pèrdè.

WILLEMSTAD – Diputado Zita Leito (Struktura Estatal) a hasi e promesa ku lo ankra Teknologia di Informashon (ICT) den struktura di Pais Kòrsou.
E diputado a hasi e deklarashonnan despues ku a haña e dokumentu di diskushon “Plaats van de ICT in de organisatiestructuur van Pais Kòrsou” for di “Information & Communication Technology Platform” ku lo lanta próksimamente. Minister Adriaens a presentá e dokumentu na e diputado i tambe na minister enkargá ku ICT Roland Duncan.
E ICT Platform ku ta konsistí di Minister Adriaens i Diputado Rhuggenaath (representando Gobièrnunan) ta konta alabes ku representante di diferente gremio manera CICA, VBC, UNA, Stimul-IT, BTP, DEZ. Un di e metanan di e plataforma ta pa siguí establesé i desaroyá uzo di ICT den tur gremio di nos komunidat.
Durante e reunion ku Diputado Jesús-Leito, Minister Adriaens a ilustrá loke e plataforma a konstatá ku aktualmente den ámbos organisashon gubernamental e posishon di ICT ta kasi solamente riba e área operashonal. Esaki a trese kuné ku nunka ICT no a haña e posishon i konsekuentemente e chèns pa desaroyá manera esaki a tuma lugá den paisnan grandi manera Merka, Hulanda, pero tambe na paisnan den nos serkania manera Trinidad i Barbados. Segun Minister Adriaens mester evitá ku ta bolbe kometé e mesun eror hasí den pasado i ta enfoká ku ICT mester wòrdu butá riba e área di maneho. Esaki ta e úniko manera ku bo por saka balor agregá for di ICT manera otro paisnan si ta hasiendo aktualmente.

WILLEMSTAD – Siendo ku Kòrsou (Antia) tabatin e delantero den nos área pa loke ta trata Internet, nos a bai a kai atras enormemente den último añanan. Diripente awor e konsenshi a lanta ku mester hasi algu purá pa kontraarestá e situashon.
Ekspertonan ku LA PRENSA a papia kuné ta bisa, ku na Kòrsou awor aki e máksimo di spit di Internet ku un hende por haña ta 2 megabit. Na otro paisnan ya kaba ta papia di 4 megabit i na preis barata. Na Ulanda ta papia di 10 megabit i den algun kaso hasta di 20 megabit. Ekspertonan a registrá te awor aki e velosidat mas haltu ku ta 40 megabit. E sifranan aki ta djis pa ilustrá kon atras nos a keda.
Pero ta parse ku ta bai bin kambio den e situashon aki. “Kalidat tin ku drecha i preis di internet tin ku baha”, asina minister Maurice Adriaens, un mandatario ku pensamentunan moderno i pionero ta bisa. Despues ku el a firma un akuerdo ku kompanianan di telekomunikashon pa yega na un sistema nobo di interkambio di Internet, e minister a biaha awe pa Miami, kaminda e lo tene un presentashon. “Nos ta sigui dal bai ku tur forsa”, asina e minister a bisa LA PRENSA promé ku su biahe.
Determiná pa drecha kalidat i baha preis di internet, minister Adriaens a invitá kompanianan di telekomunikashon na Antia pa un presentashon enkuanto Internet Exchange. T’asina ku durante su último biahe di trabou na Ulanda, minister Adriaens tabata di bishita na Amsterdam Internet Exchange (AIX), kaminda el a tuma nota di esaki i presentá su vishon enkuanto internet pa Antia. Resultado di e biaha aki tabata ku AIX a mustra mes ora nan disponibilidat pa yuda Antia lanta un Internet Exchange.

WILLEMSTAD – E último emishon di bono na nòmber di Teritorio Insular di Kòrsou a generá un suma mas haltu ku tabata e intenshon: 77.9 mion florin. Teritorio Insular di Kòrsou sinembargo tabatin mester di 59.9 mion florin. Di tur manera, e emishon di bono no ta e mesun spektakular ku esun di Gobièrnu di Antia ku a generá hopi mas tantu ku a pidi luna pasá, pero e ta un indikashon di e konfiansa ku tin den e maneho aktual. Aña pasá por ehèmpel, Teritorio Insular di Kòrsou den e promé lunanan no por a yena e emishon di bono.
Loke ta remarkabel di e emishon di bono ta, ku e rendimentu efektivo ta 5.77 porshento, un porsentahe hopi mas abou ku esun di luna pasá di Gobièrnu di Antia. Algun sektor, entre nan VBC i Kámara di Komersio a kuestioná e altura di e interes di luna pasá.

WILLEMSTAD – Direktor di Turismo Evita Nita a atvertí, ku lo ta un eror kostoso pensa ku komo ku ya kaba turismo ta bayendo bon por baha fondonan di merkadeo. “Kòrsou mester sigui keda den mente di e turista i merkadeo ta e instrumento pa logra esei”, asina sra. Nita a bisa na radio relashoná ku e sifranan impreshonante ku Kòrsou a registrá pa loke ta trata febrüari 2008.
Sra. Nita a bisa ku en bèrdat kisas por surgi awor e pensamentu ku Kòrsou ya kaba ta eksitoso riba e tereno aki i por baha òf hasta stòp fondonan pa promoshon di turismo. Den seno di turismo tin preokupashon enorme pa e anunsio ku lo baha fondonan pa promoshon di turismo ku 7.5 mion florin e aña aki den kuadro di e esfuersonan pa balansa presupuesto di Gobièrnu di Kòrsou. Sra. Nita a bisa ku baha fondonan di promoshon ta un idea eróneo. “Kòrsou mester keda den mente di e turista i no mester laga e kos aki slèk”, asina el a bisa. El a ripití ku sektor di turismo ta mira e petishon pa baha gastunan di promoshon di turismo ku masha preokupashon. Mester tene kuenta, ku nos ta bai haña mas kamber di hotèl i esei lo rekerí pa nos sigui kòrda e turista ku Kòrsou ta un opshon atraktivo. Ta bin aserka ku promoshon na Oropa awor aki mester di mas fondo komo ku balor di euro ta subiendo mas i mas versus di florin antiano, asina sra. Nita a bisa.
Ayera Ofisina di Turismo a anunsiá ku Kòrsou a risibí bishita di 33.653 turista na luna di febrüari 2008, pues un total di kasi 12 mil turista mas a bishitá Kòrsou kompará ku 21.787 turista den e mesun luna na 2007, kual ta marka un subida di 54.5%. E kantidat di turista krusero tambe a subi ku 16% kompará ku e mesun temporada aña pasá. E kresementu rekòrt aki tambe ta debí na e kantidat grandi di turista Venezolano ku a bin ta bishita Kòrsou último lunanan. En total tabatin 11.201 venezolano di bishita na Kòrsou den luna di febrüari kompará ku 1.823 venezolano den luna di febrüari di 2007. Kontakto ku operatornan di Tour i agensianan di biahe na Venezuela a revelá ku e manera mas importante pa logra bentaha riba tèrmino largu di nan interes kresiente pa e isla di Kòrsou ta di mantené nos promesa di sigui brinda nos produkto turístiko di bon kalidat, servisio i amabilidat pa ku e turista venezolano. Venezolanonan a redeskubrí Kòrsou; reservashonnan delantá ta proba nos esei i tur kos ta mustra ku nos lo sigui mantené e kresementu den e siguiente lunanan.

WILLEMSTAD - Ayera Curaçao Airport Partners (CAP) a anunsiá ku entrante awe dia promé di aprel nan lo bai introdusí un sistema outomatisá ku ta kontestá yamadanan ku drenta via nan number di telefon 839-1000 ku ta e number sentral.
E persona ku yama e number ariba menshoná tin e opshon di skucha e grabashon na Papiamentu òf Ingles. Despues di e skohe pa e idioma e por skohe pa un konekshon direkto ku sea kompanianan di aviashon, kompanianan di hür outo i òf pa informashon di buelo.
CAP ta sigui hasi esfuersonan pa sigui mehorá aun mas e servisio ku e ta brinda na e pasahero en partikular i públiko en general.

WILLEMSTAD – Dia 29 di mart último, Albert Heijn Supermarket Zeelandia a selebrá su promé aniversario aki na Kòrsou. Den fin di siman tras di lomba e supermerkado a yama danki na pueblo di Kòrsou den ku un selebrashon total.
Albert Heijn Supermarket ta é supermerkado di tantu grandi komo chikí. Ta p’esei a sera su fin di siman di selebrashon ku un bunita gesto na nos grandinan di Huize Habaai. Nos grandinan di Habaai a keda invitá dor di Albert Heijn Supermarket pa un mainta riba kual nan a risibí te, kòfi, bolo i tèrt komo pasaboka. Tambe Albert Heijn a regalá Huize Habaai un garoshi yená ku komestibel i produktonan di uso diario ku e grandinan tabata tin riba nan propio lista di kompra.
Ta interesante pa menshoná ku e grandinan aki huntu ta representá un kantidat di 1177 aña di bida! Nan a keda masha kontentu i agradesido ku e gesto aki. Tabata un mainta masha plasentero riba kual e grandinan di Habaai a kombersá ku dirigentenan di Albert Heijn i tambe a yama danki den forma di un kanto spesial.
Riba e kombinashon di e foto por apresiá e grandinan di Huize Habaai disfrutando di e gesto brindá dor di Albert Heijn Supermarket i tambe e momentu den kual dirigentenan di e supermerkado a hasi entrega di e garoshi yená ku komestibel.

WILLEMSTAD – Laura de Haseth Meddens i Wagner ku ta su kachó spesial di guia, ta bai konsientisá hóbennan na International School of Curaçao djamars dia 8 di aprel próksimo. Esaki komo parti di esfuersonan di e Fundashon Laura i Wagner (LWF) pa lanta konsiensia tokante di e papel di kachó di guia i di asistensia ku t’ei pa yuda hendenan ku desabilidat pa logra mas libertat di moveshon i independensia.
Laura, ku ta fundadó i vise presidente di e fundashon, huntu ku presidente Reyna Joe, lo konsientisá e hóbennan di e kampaña di LWF pa logra un lei di derechi di akseso igual. E lei aki mester pèrmití hendenan ku tin di hasi uso di un kachó di guia pa nan por bai ku nan kachó spesial, tur kaminda den Antia ku hende ku ta wak normal tambe por bai. Lo presentá e hóbennan un video riba historia di kachónan di guia i lo duna un demostrashon tambe di kon Wagner ta funshoná. Wagner ta un kachó di rasa ‘golden retriever’ ku a haña su entrenamentu na e organisashon ‘The Seeing Eye’ na Morristown, New Jersey na Merka. Wagner ta funshoná komo wowonan di Laura, kende a pèrdè su bista na edat di 28 aña.
Lo indiká e hóbennan tambe ku ora un hende tin un desabilidat, no ke men ku bo desaroyo personal a kaba ni ku bo por tin logronan personal.
Laura mes ta bisa ku: “Bo ta keda mesun hende ku bo tabata promé ku e desabilidat. I ku e fundashon nos ta hasi hende konsiente i pa logra haña rekurso, inkluyendo kachónan di guia, kual nan por yuda pa logra metanan, espesialmente pa esnan ku mester keda isolá den kas pa motibu di ekspektativanan di hendenan rondó di nan i e bèrgwensa ku kulturalmente nos tin pa ku desabilidat en general.

WILLEMSTAD - Parlamentu antiano ta kuminsá su selebrashon di 70 aña di eksistensia awe nochi, huntu ku pueblo. Ta nos manera di selebrá 70 aña di demokrasia parlamentario, asina Pedro Atacho, aktual presidente di parlamentu a enfatisá.
LA PRENSA a informá for di algun siman anterior di e selebrashon aki, ku mester bira un kos grandi, segun dirigentenan polítiko mes a bisa.
Parlamentu di Antia ta kumpli 70 aña di eksistensia djasabra awor dia 5 di aprel. Pa selebrá esaki, un komishon presidí pa Getmar Caldera (FOL) a hinka un programa den otro ku un karakter solèm.
Pedro Atacho a splika ku komishon doméstiko di parlamentu a reuní algun tempu pasá riba e asuntu aki pa weta den ki forma ta bai atendé. A disidí den e komishon aki pa lanta un komishon spesial di parlamentu, ku lo keda enkargá ku preparashon di e selebrashon.
Durante un reunion di parlamentu a ratifiká e desishon pa lanta e komishon aki ku ta presidí pa ingeniero Getmar Caldera.
Den e komishon tin ademas e miembronan mr. Nelson Navarro, Dudley Lucia i tambe Eunice Eisden. Tur tabata presente ayera durante e konferensha di prensa kaminda a anunsiá e selebrashon ku ta kuminsá 7’or di anochi i ta kaba den kareda di 10’or di anochi.
E selebrashon lo bai kompañá ku algun aktividat, manera reunion solèm riba kada isla di Antia, un charla i tambe un resepshon, asina Getmar Caldera a splika.
El a anunsiá ku awe nochi 1 di aprel lo tin un selebrashon ku ta kuminsá ku un enkuentro eukuméniko 7’or di anochi. Lo tin despues un diskurso di dr. Rutsel Martha i despues tambe un diskurso di eks presidente di parlamentu Rufus McWilliam. Rutsel Martha lo papia riba kon engrandesé demokrasia miéntras ku Rufus McWilliam lo papia mas tantu riba su periodo komo parlamentario.

SCHIPHOL / WILLEMSTAD - Si no outomatisá i bin ku sistema moderno pa ehersé kòntròl di pasahero na aeropuerto Schiphol, kos ta bai pega formalmente den futuro.
E mensahe aki Minze Beuving, komandante saliente di e kuerpo di Marechaussee a duna algun dia pasa den un entrevista ku el a duna e korant ulandes De Telegraaf.
Segun Beuving, aeropuerto Schiphol ta koriendo hopi atras si kompará e aeropuerto aki ku esun por ehèmpel di JFK Airport na New York i Heathrow di Londen.
Na aeropuerto Schiphol ainda tin e sistema ku tur kontrol di Duana ta tuma lugá den forma manual, en bes di hasi uso di téknikanan moderno manera e sistema outomatisá di tuma “fingerprints”, “irisscan” i tambe e sistema di rekonosé kara di hende.
Awor aki aeropuerto Schiphol tin un kantidat di 46 pa 47 mion pasahero tur aña.
Aki un par di aña, segun pronóstikonan ta indiká, e kantidat di pasahero lo por alkansá e sifra di 60 mion. Anto si bo kere ku bo por sigui kontrolá 60 mion hende pa aña segun e sistema manual, kos ta bai pega sigur, ta loke Beuving a pronostiká.
Marechaussee tin komo 1800 hende ta traha na aeropuerto. Di e kantidat aki, 525 ta den e sekshon di kòntròl di pasaporte.
Físikamente nos a alkansá e máksimo, Minze Beuving a agregá.