ORANJESTAD - Departamento di Asunto Social (DAS) conhuntamente cu Departamento di Labor y Enseñanza pa Empleo ta start e di cinco programa di reintegracion den sector laboral den e distritonan di Aruba entrante 9 di april 2008. Un total di 70 persona ta participa na e programa aki cu tin como meta principal e reintegracion di clientenan cu ta cobra onderstand, den e sector laboral. Ademas ta promove un calidad di bida mas halto dor di evaluacion di motivacion y circumstancianan di bida di e clientenan
Na aña 2004 a inicia cu e programa aki cual ta conta cu un exito rotundo. E efectonan te na e momentonan aki ta asina grandi cu hasta ora cu no logra haya un trabou e participante ta keda activo y ta haci mas esfuerzo pa sali for di bijstand y haña trabou pa asina independientemente sostene nan mes y nan famia. Durante e añanan a sa di evalua y restructura e programa cu e meta pa hisa e calidad y efectividad di e programa den su totalidad.
Un di e cambionan cu a tuma lugar ta e introduccion di workshops den e programa den cual tanto expertonan interno como externo ta duna e participantenan e conocimento y siña abilidadnan relata na motivacion, salud, comunicacion, presupuesto personal, solicitud di empleo y mas. E mayoria di participantenan ta hende muher cual tambe ta refleha e mayoria cu ta ricibi onderstand.
E programa di reintegracion ta promove e balor propio, forza y independecia di e cliente y alavez ta crea un red di sosten bou di e participantenan den cual nan por keda apoya otro. Di e forma aki tambe ta aporta na un reduccion di gastonan pa gobierno dor di baha e cantidad di personanan riba lista di bijstand.

ORANJESTAD - Manera ta conoci, tur aña AHATA comishon di medio ambiente ta organisa un tremendo Competencia di Obra y Arte Recicla! E aña aki e di 7 Competencia di Obra y Arte Recicla, lo tuma lugar dia 12 pa 23 di mei 2008, na Biblioteca Nacional Oranjestad. Apertura lo tuma lugar dia12 di mei pa 4:00 pm y entregamento di premio diabierna 16 di mei 2008 pa 4:00 pm.
Henter pueblo di Aruba especialmente studiantenan di scolnan basico di 1ste te cu 3de klas, 4de te cu 6de klas, scolnan secundario, companianan, individual amateur y individual professional ta haya e oportunidad di participa usando nan creatividad, creando un obra decorativo y alavez util.
Meta ta pa consientisa tur hende riba e tres “r”, Reduci, Reusa, Recicla. Tur esaki reusando foam, bleki, plastic, papel, glas, aluminium of carton y usando adicional verf y lijm. E ultimo dia pa inscribi lo ta dialuna 5 di mei 2008 yamando Anky na AHATA na 582-2607 of mandando un mail na anky@ahata.com.
Lo tin premionan atractivo manera e.o. bustrip, weekend stay, lunch, awards y hopi mas! AHATA comishon di medio ambiente kier invita y motiva tur hende pa participa y asina demostra bo creatividad na e comunidad di Aruba! Pa mas informashon yama Anky na AHATA.

ORANJESTAD – Victoria Bottling Company distribuidor di Nesbitt aki na Aruba ta lansa su campaña “Crea un nomber pa nos lemonade y gana!”.
Victoria Bottling Company pronto lo ta lansando riba mercado un lemonade cu un sabor Arubiano cu ta hopi refrescante y alabes saludabel. E lemonade aki ta wordo traha cu awa di Aruba, lamoenchi pero tambe cu honing y locual ta hasie mas interesante ainda ta cu e no ta contene gas ni tampoco aditivonan!
Pa participa na crea un nomber nobo pa e product refrescante nobo aki ta hopi facil; djis bay na e website: www.arubaslemonade.com y yena bo nomber creativo y unico pa e producto, sigi despues pa bo nomber, fam, e-mail adres, telefoon y despues primi send pa manda bo e-mail pa participa.
E gran premio pa esun cu su nomber resulta e ganador ta un iPod Video y lemonade sabroso y refrescante pa un luna GRATIS!
Victoria Bottling Company ta gradici di antemando un y tur cu participa, e campanja lo termina dia 8 di mei 2008.

Nan tin hamber y sed pa poder pero mas bien ta hamber y sed pa famia

ORANJESTAD- Gobierno di MEP pa medio di un comunicado di prensa, a dal e clabo riba su cabez, esta cu sindicatonan ta “muriendo di hamber y sed.”
Segun Gobierno ta hamber y sed pa poder pero en realidad e palabranan usa pa Gobierno, ta cuadra net den e lucha cu e sindicatonan ta hibando, esta cu placa no ta yega y cu nan ta luchando pa hamber y poder.
“Tin cierto mal elemento cu nunca a haci algo positivo pa e pais aki y ta contra tur cos bon pa e pueblo Arubano. Nan ta biba di instiga y manipula otro hende cu e unico meta pa distrui economia di nos pais. No lubida cu te awe esnan cu mester a investiga con e placa di SEPPA a ser malgasta, nan tur a ser saca for di e sindicato, algo similar manera tempo a cumpra e rancho pa masha hopi placa sin cu nunca a duna cuenta na e miembronan. Laga nos no papia mes con a anda cu e credit union di SEPPA cu hasta Banco Central mester a interveni pa e manera iresponsabel di anda cu placa di e miembronan.
E manipulacionnan cu a tuma lugar pa haci un hende cu no ta ambtenaar bira Presidente di SEPPA ta algo serio, unda e manera cu a core cu e Presidente e tempo ey ta algo di e mente di esun cu ta tras di e huelga actual y tambe e plan diabolico pa perhudica henter un pais su economia cu seramento di nos Aeropuerto.
Kico comunidad por spera di un dirigente di SEPPA cu den e ultimo eleccion a perde tur clase di credibilidad como politico, ya cu su partido PPT a obtene apenas 131 voto y su persona como lider di e partido aki 57 miserable voto riba su nomber? Con un Arubiano cu nunca a haci algo bon pa nos economia por coopera pa trata cu ningun avion baha 6 ora largo pa dia durante ‘peak hours’ na Aeropuerto ta, pasobra e ta odia e 42.000 otro empleadonan den nos hotelnan, taxistanan, carrentals, restaurantnan, companianan di watersport, companianan di transporte, e ‘sea and air package’ di viaha cu avion pa despues bay cu trip ariba crusero, ta muestra di un mal elemento frustra cu no ta importele e consecuencianan. Cuanto aña largo henter comunidad y gobierno a traha pa trece turista nos isla pa den un paar di dia nos laga hendenan iresponsable caba cu tur cos. E manera di uza Cuerpo di Bombero pa huelga pa laga Aeropuerto casi sin hende pa cumpli cu e condicionnan di I.C.A.O. ta condenable. Cu abo cu pensioen di gobierno como ambtenaar y pensioen di viejez kier huelga ta bo bon derecho, pero ora cu esaki tin metanan pa caba cu nos pais ta algo hopi peligroso.

WILLEMSTAD – “Ken ku ta haña ku Hòspital a faya ku nan famia, mester entregá un keho serka Inspekshon di Salú. Inspekshon lo investigá e kaso i ta manda e resultado pa e famianan. Minister di Salubridat Públiko mes no ta mete den asuntunan personal di niun pashènt.” Esaki ta loke Minister Omayra Leeflang a bisa LA PRENSA awe relashoná ku e kaso di un dama ku a muri den Hòspital i ku ta den publisidat último dianan.
Minister Leeflang a splika mas aleu, ku ora un famia no ta kontentu ku e trato ku un miembro di nan famia a haña, nan tin ku entregá un keho serka Inspekshon di Salú. Inspekshon di Salú na su turno ta investigá e kaso profundamente i a base di e resultadonan di e investigashon, Inspekshon ta disidí si tin ku tuma medida. “Un pashènt su kuido ta responsabilidat di Hòspital i Hòspital no tin nada di papia ku e minister di Salubridat ni ku prensa, sino e ta violá su ‘geheimhoudingsplicht’ i tambe e privasidat di e pashènt”, Leeflang a bisa.
“Otro ta, por ehèmpel, den e kaso di CEMS últimamente kaminda e servisio di ambulans mes, komo instansia tabata den diskushon, relashoná ku transporte di pashèntnan sikiátriko. Den e kaso ei mi a laga hasi un investigashon riba e aspekto di responsabilidat. Mi kier a sa ta ken ta responsabel pa transportashon di pashèntnan sikiátriko. Den e kaso akí tambe institutonan nan maneho tabata den diskushon i no un pashènt”, e minister a bisa.

WILLEMSTAD – Awe dia 10 di aprel, e ekipo di beisbòl Wildcats ta kumpli 42 aña di eksistensia.
Tabata riba un dia manera awe na 1966, ku kuater ekipo di beisbòl a forma un solo ekipo.
Tabata trata aki di BBC Sugar Kings, BBC Koraal Specht, BBC Red Birds i BBC Altamira Braves.
Un echo notabel tambe ta ku tur e hungadónan tabata prosedente di barionan di Dominguito, Janwe, Koraal Specht Korporaal, Marie Pampoen, Steenrijk i besindario.
Despues ku e ekipo a hunga sinku aña den Klase A, na 1971 BBC Wildcats a promové pa klase AA ku un historia ku ta papia pa su mes.
E hazañanan di BBC Wildcats a kuminsá na aña 1974, despues ku e ekipo a sali na di dos lugá.
E interes di públiko pa loke ta trata weganan di BBC Wildcats a oumentá i e organisashon a sigui krese.
E ekipo di beisbòl aki tabatin su propio agrupashon musikal ku tabata toka na su weganan.
Na 1975 e ekipo di Wildcats a sa di pone fin, pa loke ta kampionato di Kòrsou, na Royal Scorpions, konkistando e título máksimo di beisbòl lokal.
Tambe hopi ta kòrda e weganan memorabel pa loke ta trata Kopa Antiano ora ku BBC Wildcats tabata topa ku ekiponan di Aruba, sigur un ekipo manera Marlboro, kaminda tabata hunga serinan aki na Kòrsou i Aruba.
E aña aki BBC Wildcats ta hasi no ménos ku 37 aña den beisbòl AA i den e 36 añanan anterior, BBC Wildcats a titulá kampion di Kòrsou na 13 okashon ku ta un rekòrt den era moderno di beisbòl lokal.

WILLEMSTAD – Ayera tardi Fundashon Autosport Curaçao a tene un rueda di prensa pa trese algu di e tradishonal kareda internashonal di Drag Race.
E kareda di e aña aki ta e di 37 edishon di e kareda i lo hiba komo título “International Drag Race Battle of Speed”.
Lo bai tin outonan for di Merka, Puerto Rico, Venezuela, Aruba, Boneiru i Kòrsou. Tambe lo bai tin karedanan di motosaikel.
Lo bai tin un atrakshon spesial pa hóbennan ku ta un wheelstander di nòmber “Chevy Rebellion”. Esaki ta un pickup VW ku motor di Chevrolet den baki patras i ku ta bai hòp henter e pista. Un 20 aña pasá tabatin un vehíkulo similar aki na Kòrsou.
Lo bai tin tambe dos “tuner” famoso aki na Kòrsou pa e kareda aki. Ta trata aki di Sonny Leonard ku lo traha riba e outo “Berlyn Express” ku ta un Chevrolet Corvette 1963 di Puerto Rico. Tambe lo tei Pat Musi, ku lo “tune” i manehá e Dodge Avenger “King Kong 4”.
Lo bai tin alrededor di 14 outo for di Venezuela, for di Aruba tambe ta bini basta outo, un total di 10 i di Boneiru i Merka lo bini un outo.
Lo bai tin motosaikelnan for di Boneiru tambe. No ta konosí ku lo bini motosaikelnan for di Aruba tambe.
Di Kòrsou lo bai tin Merite Racing ku a hasi historia. Alden Merite ku su motosaikel a registrá Pro E.T. mas rápido den Karibe ku un tempu di 7.864 sekònde i ta bai purba di kibra esaki.
E fechanan importante pa e dianan ku ta bini:

Skina di Sorti, awe djaweps 10 di aprel di 2008, ta kuminsá ku deseá tur hende un bon dia. E úniko aserkamentu polítiko, ku ta kondusí na sosten duradero, ta esun kaminda ta profilá komo un alternativa real di gobernashon. Tur lokual bini aserka ta nada mas ku lokual nan ta yama atributonan relashoná ku rivalidat. Den merkadeo nan ta papia di e “core product”, ku ta esensia dje produkto i “augmented product” ku ta e produkto manera e ta wòrdu presentá na e potensial kliente.
****
Diverso produkto, al final di kuenta ta wòrdu kumpra pa sirbi un propósito ku ta basta leu for di e lokual su funshon esensial ta. Fragansia por ehèmpel, den e kompetensia entre rivalnan den un segmento di merkado, ta wòrdu presentá komo un atributo pa mehorá e “self esteem”. Pa por partisipá den e kontienda e lokual ta wòrdu presentá mester hole. Despues ta bini kestion di marka i empake.
****
Den kestion di gobernashon, esensia di e produkto ta keda solushon di inkomodidat di miembronan di komunidat. Meskos ku den merkadeo komersial, bo por bai pa un nesesidat general òf por bai pa un sierto sektor òf un grupo di sektor. Den strategia komersial nan ta papia di karga un surtido amplio (hopi sorto di produkto) i surtido profundo (tur produkto pa un nesesidat spesífiko). Den polítika tambe bo por spesialisá òf bai pa kubri tur disiplina.
****
E diferensia entre polítika i e kuadro komersial ta ku kaminda den e kuadro komersial e forsanan ku ta influensiá e prosesonan ta mas suheto na influensianan sosio sikológiko. Rivalidat entre partido i denter di partido, fasilitadornan, elektorado, mobilisadornan no polítiko i eventual aktornan nobo, tur ta ménos kalkuladó den nan motivashon ku den e kuadro komersial.

LIMA, Perú, - Sinku turista franses a muri ayera na Perú, ora e avioneta den kua nan tabata biaha pa bula riba e lineanan famoso di Nazca a kai, unidat di bombero i polisnan a informá.
E avioneta, di kua e pilot tabata e úniko sobrebibiente, tabata regresá Aeropuerto di Nazca, i pa un fayo mekániko a dal kontra muraya di un edifisio den konstrukshon pegá ku e terminal, segun polisnan.
“Tin sinku víktima franses”, un agente di polis di karetera di Nazca a bisa Reuters.
“A informá ku efektivamente sinku franses a muri. Kuater dama i un hende hòmber”, Angela Soser a bisa di su banda, kende ta asistente di gerensia AeroIca, empresa propietario di e avioneta, ku plachi di number OB-1266, ku a kai riba tera.
Na kabamentu di mart di e aña aki, un otro avioneta ku sinku turista franses a realisá aterisahe di emergensia na Nazca, sin kousa víktima, segun polisnan.
“Nos tin informashon ku e pilot di e avioneta, identifiká komo Carlos Bartra, ta na Hospital di Nazca, kaminda e ta rekuperando”, Sonia Vega a bisa di su banda, kende ta supteniente di unidat di bombero di Nazca, na region di Ica, situá sùit di e pais.
E echo a okurí na altura di kilómetro 453 di Panamericana Sur na Palpa, i n’e lugá a yega personal spesialisá di “Corporación Peruana de Aeropuertos y Aviación Comercial” (CORPAC) pa investigá motibunan ku a motivá e aksidente.

WILLEMSTAD – Kooyman a introdusí produktonan di Wavin smartFIX komo sistema inovativo pa pipa dia awa (leiding) di PE-X/AI estilo ‘push-fit’. Wavin smartFIX ta e promé sistema estilo ‘push-fit’ kompletamente di plèstik pa papia di awa di PE-X/AI, ku kua e uso di hèrmènt adishonal te innesesario. E fasilidat di instalashon di e sistema di konekshon (fitting) kompakto, lihé den peso i super inovativo aki ta demostrá su mes prinsipalmente na e lugánan èkstra difísil pa yega na dje, manera tras di un labamentu, tras di muraya òf bou di un flur.
E diseño di e konekshonnan di Wavin smartFIX ta basa riba e teknologianan mas nobo di pipa di awa di plèstik, i ta konektá di un manera inteligente pensá i super ‘high tech’, ku uso di un asina yamá “O-ring” nobo i seku. Esaki ta eksigí hopi ménos forsa i ta prevení atrakshon di sushi i stof. Via di un bentana den e konekshon por kontrolá fásilmente si e pipa di PE-X/AL a wòrdu pushá aden sufisientemente. Si esaki ta e kaso, e konekshon ta sigur, lo no los i ta e prueba di awa sin mester bai ningun akshon adishonal.
E surtido di Wavin smartFIX ta konsistí di un variedat di diferente konekshon estilo ‘push fit’ (pa transisshon) den diameter 16 te ku 25 mm, ku kual den un solo akshon bo por hasi un konekshon profeshonal. Simplemente ku Wavin smartFIX bo ta traha konekshonnan fásil, lihé i 100% konfiabel.

WILLEMSTAD – Unity i Grupo Fuego lo ta e dos gruponan di alabansa ku lo animá e enkuentro spiritual grandi djasabra awor den Colon. Manera ta konosí ku alrededor di 400 hóben a keda invitá pa partisipá den e programa “Hóben para pa bo futuro” organisá pa Ministerio Bida Abundante. Un enkuentro grandi den kua for di 5’or di atardi e hóbennan lo reuní pa alabá e Kristu Hesus kompañá pa e formashon spiritual Unity. E atardi aki ta unu spesial, ya ku ta e promé enkuentro pa hubentut ku e ministerio ta organisá pa asina duna inisio na enkuentronan di hubentut ku lo sigui tuma lugá semanal den e santuario úbika den e di dos piso di Colon Shopping Center.
“Hóben para pa bo futuro” ta un programa di formashon spiritual i motivashon pa ekselensia den kua e hóbennan tur siman lo risibí for di e palabra di Dios i tambe un preparashon pa ekselensia. E parti di formashon spiritual ta basa riba e palabra di Dios i promesanan ku Señor tin pa e hubentut. Meskos tambe e ekshortashon kompañá pa siñansa berdadero pa ku hóbennan pa biba un bida di puresa pa Dios. E parti di e parashon pa ekselensia ta dirigí pa e hóbennan por risibí tur ingrediente pa skohe pa su futuro i pa ta disidí pa eredá un pais próspero.
Futuro no mester ta den man solamente di grandinan, pero ku partisipashon di hóbennan lo por alkansá futuro metanan ku ideanan agresivo i progresivo. E dedikashon na hóbennan ta un forma pa den un término ku ta permití pa trese personahenan den komunidat pa motivá e hóbennan pa ekselensia. Personahenan ku ta okupá puestonan importante den komunidat di manera ku e personahenan aki pa medio di nan eksperensia pa duna e hóbennan e kurashi pa para pa futuro sin mester entregá ora kualke situashon presentá.

BRUG-GUMBS HODGE
Mabel Cecilia (87 aña)
Mihó konosí komo Sila òf Mother
A laga atras su yunan Leonel, Marius, Yvonne, Oscar, Lesley, David, Sidney Brug, Bernaditha Henriquezs-Brug, Crisma Sambo, ruman Countess Rey. Akto di entiero ta djadumingu 13 di aprel for di El Señorial pa santana Memorial Park. Bishita 9or-11or. Promé ku entiero tin un respòns na El Señorial.

BALENTINA-FLEMING
Louvina (94 aña)
A laga atras su yunan Norma Fleming, Rina i Sergio Martina, rumannan Doradine Fleming, Gloria Grinuva Fleming, Alhonse Richardson, yunan di kriansa Lelia i Kachèpè Balentina i rumannan. Akto di entiero ta djasabra 12 di aprel for di misa Sta. Maria pa santana Sta. Maria. Bishita 1or. Promé ku entiero tin un s.s. di misa 4or.

FLORIDAS0MOURITIA
Maria Erótida (91 aña)
A laga atras su yunan Leo Floridas i Natasha v/d Dijs, yu di kriansa Maureen Wolf, ñetunan Ruard Floridas, Norbert Apolina, Chandrika Floridas, Jursa Alexander-Apolina tur ku nan famia. Akto di entiero ta djasabra 12 di aprel 11.30or for di misa Steenrijk pa santana Janwe-Pietermaai. Bishita 9.30or.

WINKLAAR
Edward Prudencio
Mihó konosí komo Eddy, Winki, Wikli, Eddy Murfje, Viejo
A laga atras su kasá Ann Winklaar-Richardson, yunan Brualio Winklaar i Sharlene Martina, Rowena Winklaar i Marius Ship, Surandy Winklaar i Kimberly Pauletta, Suhandy Winklaar i Giovanka Molenaar. Akto di entiero ta djaluna 14 di aprel for di misa Gr. Kwartier pa santana Gr. Kwartier. Bishita 1or. 3.30or tin un s.s. di misa.

MADURO-WAWOE
Nilca Johanna (repentino)
Mihó konosí komo Shoni
A laga atras su kasá Elvio Maduro, yunan Mirelvio maduro, Hagith Maduro, yu sin doló Jurriaan Carbiere, mama Genoveva Wawoe. Akto di entiero ta djasabra 12 di aprel for di El Consolador pa santana Barber. Bishita 9or. Promé ku entiero tin un respòns na El Consolador.

WILSON
Amaria Filomena
Mihó konosí komo Marchi
A laga atras su rumannan Veronica Landsmark, Thomas Wilson, Ilona Warner-Wilson, Ingrid de Jesus-Wilson, Jacqueline Warner, John Gario, Jeff Gario. Akto di entiero ta djabièrnè 11 aprel. Bishita 9or na El Tributo, siguí 10.30or pa un respòns.

MARTINA-GERTRUIDA
Juliana Raimunda (repentino)
Mihó konosí komo Ana
A laga atras su kasá komo aña
A laga atras su kasá Vi Martina, yunan Shirley Martina, Norine i Winston Bel, Hensley Martina i Eugenie Petronia, Lesley Martina i Irene Knepa, Ruthline Martina, Mildred i Michael Ogenia. Akto di entiero ta djabièrnè 11 aprel for di misa Sta. Rosa pa santana Sta. Rosa. Bishita 1or. Promé ku entiero tin un s.s. di misa 4or.

OPHEIJ
Karel Dirk Anton (54 aña)
A laga atras Claire Opheij-Sprock, Danuta Opheij, Henny Opheij-Manders, Hendrina Opheij, Milca Sprock-faulborn. Kremashon ta tuma lugá djabièrnè 11 di aprel na Ulanda.

GAARI
Edward Eduvigis
Mihó konosí komo Wotty
A laga atras su kasá Gladys Gaari-Azor, yu Eduard i Veronica Gaari, ñetunan Bryan, Andy i Xavier, rumannan Gloria Magdalena-Gaari, Sybil Schoop-Gaari, Emita, Gustavo, Norma, Ivy, Lilian Gaari, Marita da Silva-Gaari. Akto di entiero ta djabièrnè 11 aprel for di misa Brievengat pa santana Bethania. Bishita 1or. Promé ku entiero tin un respòns 3.30or.

SALSBACH-DONGEN
Aida Rovina Dirkje (65 aña)
A laga atras su kasá Angel Salsbach, mama Roselien Dongen-van Dijk, rumannan Reina i Imro Schoonhoven-Dongen, Edward Dongen i Greta Virginia, Astrid Dongen, Carla Dongen. Akto di entiero ta djasabra 9or-11or. Bishita promé ku kremashon na Crefona.

ZIMMERMAN-FRANCISCA
Elvinia Emilia
Mihó konosí komo Vin
A laga atras su yunan Kenneth, Jeannette, Joyceline, Carine Zimmerman, Monique Zimmerman i Erick Richardson, Moises Zimmerman i Hertha Brazil. Akto di entiero ta djaweps 10 di aprel for di misa Jandoret pa santana Jandoret. Bishita 12or. Promé ku entiero 4or tin un respòns.

DE MEY
Wilbert Salustiano
Mihó konosí komo Papa
A laga atras su mama Lucita Liberia-de Mey, rumannan Alfred, Rubiela, Nivelyn de Mey, Sherwin Rosalie. Akto di entiero ta djaweps 10 di aprel 3.30or for di misa Wishi pa santana Sta. Maria. Bishita 1or. Promé ku entiero tin un s.s. di misa.

ANDERSON
Hector Jozef Hacinto (79 aña)
A laga atras su yunan Glenda Anderson, Miriam Joseph-Aanderson, Imelva Anderson, Egbert Anderson tur ku nan famia. Akto di entiero ta djaweps 10 di aprel for di El Consolador pa parke El Consolador. Bishita 1or. Promé ku entiero tin un respòns 3.30or na El Consolador.

DORAN
Greta Paulina
A laga atras su mama Lunita Doran, tata Mario Koeiman, rumannan Irma, Marcel, Kerwin Doran, Rina Jonge-Doran, yunan di kriansa Jonathan i Gino Soleana. Akto di entiero ta djaweps 10 di aprel 3.30or for di El Tributo pa santana Barber. Bishita 1or. Promé ku entiero tin un s.s. di misa na misa Barber.

LA PRENSA ta manda kondolensia na famianan

Prof. Lorito ta yama tur hende un felis djaweps. Kurpa ta manera mariá awe, pero no tin moda di hasi: Lorito tin ku sigui bula. Tur kaminda e ta bula.
*********
Tin biaha tin sierto kosnan ku nos no ta komprondé. Direktiva di BZV ta haña un zonzá den korte i ta keda na su posishon normalmente. Monk mester bai bèk. Si bo a hasi e asuntu di Monk un asuntu di prinsipio, anto e kos mas mihó ku bo por hasi ta saka bo konklushon.
*********
Mesun kos ta konta pa Direktiva di Skolnan Katóliko ku a haña un derota fulminante den korte pa retiro di Doc Hernandez. Direktiva einan tambe a keda sinta normalmente. Einan tambe ta konta e pregunta kon bin si bo pèrdè un kaso dje mahos ei manera RK a pèrdè, ta di kon e direktiva ta sigui na e puesto normalmente. Asina nos por menshoná diferente ehèmpel mas. Nos kier pa hasi un distinshon si riba desishonnan grandi i di prinsipio i no pa chinchan un desishon.
*********
Nos a tuma nota di e siguiente komunikado di Gabinete di Gobernador via di RVD. De Gouverneur van de Nederlandse Antillen, Z.E. mr. F.M. d.l.S. Goedgedrag brengt op 8 en 9 maart 2008, een werkbezoek aan de Bovenwindse Eilanden en Saba.....Curaçao, 8 april 2008. Tin dos kos ku ta erornan grandi den e partisipashon aki. E fecha ta robes i mester ta 8 i 9 di aprel. E kos mas serio ta ku konstelashon di Islariba a kambia sin ku nos sa mes? Awendia bo tin Isla Riba i Saba. Ta ki dia Will Johnson a saka Saba for di Isla Riba anto?
*********

WILLEMSTAD – Preisnan a subi ku 0,4 na mart último kompará ku febrüari. Anke ku ta parse ku preisnan di kuminda a subi drástikamente e sifra final no ta reflehá esei no opstante ku preisnan di kuminda a subi remarkabelmente. Loke ta pasa ta ku e sifra final di 0,4 porshento ta resultado di diferente komponente di kua algun a subi i otronan a baha.
Ofisina Sentral di Estadístika (CBS) a bisa ku kompará ku e periodo di e último 12 luna ku e periodo promé ku esei ta resultá ku preisnan a subi ku 3,6 porshento.
Meskos ku último lunanan komestibelnan tabata esun ku a subi mas haltu den preis (+1,9%). Tur e gruponan di komestibel a kontribuí na e subida aki, pero e grupo di manteka i zeta (+4,8%) i di produktonan di lechi (+4,4%) a subi konsiderablemente. Manteka dushi a subi ku 10 porshento mas ku na febrüari, lechi puiru ku 9 porshento i keshi kasi ku 4 porshento. Karni i piská ku un subida di preis di 2,7 porshentu tambe a subi konsiderablemente, prinsipalmente subida di preis di piská a yama atenshon. Preisnan di batata, berdura i fruta (+1,9%) i di sobrá komestibel (+1,7%) tambe a subi debidamente. Sobrá gruponan di komestibel tabatin un subida di entre 0,2 i 1,1 porshento.
Bibida i sigaria a subi na mart ku 1,2 porshento, esaki a ser okashoná prinsipalmente dor di subida di preis di sigaria (+3,2%). Preisnan di rekreashon i desaroyo a subi ku 0,7 porshento, prinsipalmente pa motibu di subida di preis di lèsnan di korementu di outo (+9,5%), kosnan di hunga (+7,5%) i bukinan di estudio (+2,8%). Otro bukinan si a baha (-0,4%). E kategoria di sobrá a subi ku 0,5 porshento, pa motibu ku kuminda di bestia a subi. Preisnan di salubridat (+0,4%), muebel, aparato- i artíkulonan doméstiko (+0,2%) i di bibienda (+0,1%) a subi na mart. Preisnan di paña i sapatu i di transporte i komunikashon a keda igual ku na febrüari.

Awor ku wes a duna eks-klientenan Money Plan rason

WILLEMSTAD -- Awor ku wes a duna eks-klientenan di Money Plan rason den e kaso ku nan a entamá kontra Ennia, henter e asuntu di klientenan ku a invertí na Kadushi Cliffs tambe a bolbe lanta kabes. Diferente di e hendenan ku a invertí a yama LA PRENSA e siman aki indikando ku te awe nan no a haña un klaridat den e kaso aki. “Probablemente nos lo no haña nos sèn mas, pero nos kier sa kiko a pasa. Te awe niun hende no a bisa nos nada”, asina un di nan a bisa.
Un otro a atmití ku doló na su kurason, manera e mes a bisa, ku el a pèrdè mas ku 100 mil florin den e aventura aki. “Bo por imaginábo ku 100 mil florin ta hopi sèn ku mi por a hinka otro kaminda”, asina e maestro di skol aki a bisa. Algun di e otronan a pèrdè ménos pero nan ta insistí ku e kaso a keda un misterio pa nan te awe. Un di nan a bisa ku e ta kere ku e kaso no a haña klaridat nunka pa motibu di e konekshonnan polítiko di e desaroyadó(nan). Esmas, segun el a bisa, hasta tin hende den prensa a sali perhudiká pero nan no a denunsiá e kaso aki komo ku nan tin bon konekshon ku tantu e desaroyadónan komo nan partido.
E kaso di Kadushi Cliffs realmente no a haña un klaridat nunka. Loke nos sa ta ku e proyekto ambisioso a kosta hopi sèn, promové entre otro pa George Curiel (eks-direktor di Departamentu di Desaroyo di Antia). Despues ku e proyekto a haña problema finansiero, e proyekto a haña un fiansa adishonal di mas ku 30 mion florin ku un garantia di Gobièrnu di Kòrsou. Gobièrnu di Kòrsou a paga e garantia bèk ku hopi doló.
E proyekto ta eksistí ainda pero awor aki ta den man di Jacob Dekker ku a desaroyá e proyekto den loke nos konosé awe komo Kura Ulanda Lodge. Dekker a bisa dia ku el a asumí responsabilidat pa e proyekto ku e no por komprondé kon a gasta asina tantu sèn na e proyekto aki. “Mi no ta mira e invershon bèk den e proyekto aki”, asina Dekker a bisa e tempu ei.
LA PRENSA a puntra esnan ku a sali perhudiká di kon nan no ta reuní pa ainda wak kiko por hasi. Nan a splika ku tabatin diferente reunion, despues a keda di atendé un ke otro pero te awe no a tende nada mas. Loke LA PRENSA por a destilá for di e puntonan di bista ku a bin dilanti ta ku e kaso a laga un smak masha marga atras, den algun kaso un renkor fuerte pa e simpel hechu ku no a duna sufisiente splikashon. LA PRENSA a keda ku e pregunta ta kon lo tabata si e mesun kos a pasa den un proyekto asina grandi ku garantia di Gobièrnu den e tempu aki.

WILLLEMSTAD – Partido Nashonal di Pueblo lo bai pusha pa kana e trayekto estatal di Kòrsou lòs for di Sint Maarten. Banda di esei e partido lo bai boga pa un oumento di sueldo mínimo, maske ku tin sektor ku ta kontra. Asina dirigentenan di e partido bèrdè a bisa e siman aki, anunsiando puntonan importante ku e partido lo bai atendé den gobernashon di nos pais. E partido a anunsiá tambe su programa pa selebrashon di su dia 60 aniversario.
Durante un enkuentro ku prensa, dirigensia di e partido a bisa, ku na Partido Nashonal lo sigui duna un aporte konstruktivo, pero krítiko pa realisá e pais Kòrsou outónomo ku pueblo a pidi p’e for di referèndem 2005. “Pa evitá tardansa, PNP ta di opinion, ku Kòrsou mester kuminsá kana su trayekto di struktura estatal lòs for di St. Maarten. Segun PNP, Kòrsou mester determiná pa su mes kiko e por logra pa 15 di desèmber próksimo i traha duru pa logra esakinan. Tambe mester inventarisá kiko lo kaba despues i spesifiká ki dia pa asina formulá un plan di implementashon”, asina presidente di e partido Faroe Metry a bisa.
Pa loke ta trata e trayekto di struktura estatal, e partido a informá ku su lider sra. Ersilia de Lannooy ta trahando hopi duru pa atendé tur aspekto di e parti finansiero. “Pa loke ta trata e trayekto di repartishon di bienes, esta boedelscheiding, PNP lo para hopi fuerte pa Kòrsou no pèrdè nèt nèt nada. Tambe PNP lo sigui traha inkansabel pa Kòrsou por haña e alivio finansiero manera a palabra ku Ulanda. Dikon, pasobra ora Ulanda paga gran parti di nos debe esaki lo krea un espasio finansiero riba nos mes presupuesto pa invertí den edukashon, den salubridat i tambe den e parti sosial. Esaki riba plaso largu lo perkurá pa un nivel di bida haltu pa tur hende ku ta biba na Kòrsou”.

WILLEMSTAD – “E maneho pa kombatí kriminalidat tambe mester haña atenshon durante e proseso pa yega na un Pais Outónomo den Reino. Awor ku Antia ta bai stòp di eksistí, ta trahando riba diferente frontera na strukturanan pa e islanan, pero no ta bon kla si maneho di kriminalidat ta hañando sufisiente atenshon”. Esaki ta loke éks hefe di polis Johan Oldenboom ta skibi den un komunikado.
Segun Oldenboom, aktualmente ta trata entre otro maneho di pais, ekonomia, saneamentu di debe, enseñansa i turismo. No ta bon kla si ta pone sufisiente atenshon na maneho di kriminalidat i sigur den un área tumultoso manera Caribe. “Djis atraé un grupo chikí di polis militar pa un temporada kòrtiku, i sin mas tuma ofer métodonan ulandes, lo no benefisiá maneho di kriminalidat riba nos islanan riba tèrmino largu”, segun Oldenboom.
Mas aleu Oldenboom ta bisa ku nos mester konsultá tambe paisnan Caricom kaminda kriminalidat tin e komunidatnan den su gara. “Den kaso di un maneho di kriminalidat suak riba nos islanan, kriminalidat lo oumentá ku tur su konsekuensianan. Kriminalidat ta forma un menasa permanente pa integridat di e komunidat komo tal, nashonal- i internashonalmente. Polis i hustisia mester ta kontinuamente alèrta pa e desaroyonan akí i invertí keda na altura di nan òf preferiblemente adelantá nan.”
Finalmente Oldenboom ta bisa ku ta e pregunta si e kapasidat di polis na e momentu akí ta sufisiente pa duna e gruponan kriminal e atenshon deseá. “Mester pone hopi atenshon na krímen relatá na droga, froude, violensia, trafikashon humano i di arma. E nesesidat pa reforsá e ekspertisio no ta konta solamente pa e aspekto finansiero. Investigashonnan pa yega na detenshon ta bira mas i mas kompliká debí na internashonalisashon di kriminalidat. P’esei mester di mas personal altamente kualifiká. Esaki mester buska tambe riba e nivel apropiá. Pa tin kòntròl riba kriminalidat mester invertí espesialmente den prevenshon, suministrashon di informashon, uso di teknologianan nobo, konosementu i rekurso humano.”

WILLEMSTAD – Esun ku unabes ta pober, mas i mas tin chèns di keda pober tambe. Espesialmente hende muhé, hóbennan i esnan ku un preparashon di nivel abou ta pober. Esaki ta resultado di un investigashon di e sosiólogonan di Rotterdam Peter Achterberg i Erik Snel.
Nan ta konkluí ku den añanan 80 pobresa tabata un fenómeno temporal. Hendenan ku tabata pober, tabata pober durante un temporada kòrtiko. Pero for di añanan 90 mas i mas hende ta keda kologá den pobresa. Si na aña 1984 1/3 parti di pobernan tabata pober durante 4 aña òf mas, na 2002 esaki tabata konta pa mas ku 60% di nan. Den e mesun periodo e porsentahe di pobresa duradero den henter Ulanda a subi di 0,8 te ku 5,5%.
Por papia di pobresa ora un kas no ta disponé di mas ku 60% di e ‘entrada pa kas’ mediano. Segun e midí relativo akí semper tin pobresa, e investigadó Achterberg ta rekonosé. Pa e yega na e konklushonnan di e investigashon, e sosiólogonan a hasi uso di datonan di e ‘Sociaal-Economisch Panel’, ku anualmente entre 1984 i 2002 a hasi enkuesta bou di 5000 kas di famia.

Pobresa na Kòrsou

LA PRENSA ta bai presentá den un próksimo relato otro siman, e situashon di pobresa akí na Kòrsou. Na e momentunan akí e Büró Sentral pa Statistik (CBS) ta preparando pa Senso 2010. Ku e resultadonan di e senso akí por kompará e datonan ku a kompilá durante e último senso na 2001. Ta e intenshon tambe pa yega na un ‘bestaansminimum’ pa asina por disidí kiko ta e mínimo na entrada ku un kas di famia mester pa por hiba un bida humano.

Periodo di toleransia pa pèrmit ta kabando

WILLEMSTAD – Pa evitá ku kasinonan ta kore e riesgo ku lo no konvertí nan pèrmit temporal den un nobo pa tres aña, próksimamente tur 11 kasino den operashon na Kòrsou mester kumpli ku e reglanan legal. E kolegio di supervishon Gaming Control Board (GCB) a pone Gobièrnu di Kòrsou na altura ku dentro di poko e maneho di toleransia lo yega su fin.
Na 1999 Konseho Insular a stipulá den lei ku ta bin un sistema nobo di pèrmit pa kasino i ku GCB ta bai supervisá esaki. Esei ta enserá instrukshon pa hiba un maneho transparente i adekuá den kasino. E proseso pa realisá e sistema nobo a resultá difikultoso i trabahoso, pero awor si e ta yegando su fin.
Fase di transishon
Te awor Gobièrnu di Kòrsou i GCB a mustra un posishon sumamente fleksibel den e fase di transishon, pero esei lo kaba pronto. Kumpliendo ku palabrashonnan hasí den konteksto internashonal tokante kòntròl riba e fluhonan di kapital, e kasinonan na Kòrsou tambe mester kumpli ku e reglanan mas severo relatá na kombatimentu di labamentu di plaka i finansiamentu di terorismo. Den kuadro di un investigashon pa determiná e mihó forma (‘best practice’) pa supervishon di e gremio di kasinonan, Deloitte & Touche a formulá e asina yamá MICS (Minimal Internal Control Standards). E pèrmit nobo ta stipulá komo kondishon ku e kasino mester kumpli ku e MICS.

WILLEMSTAD - Entrante e temporada di invierno 2008/2009 Martinair ta brinda un ekspanshon grandi di su kantidat di buelo pa área di Karibe. E skema di buelo interkontinental ta kore di dia 28 di òktober 2008 te i ku dia 28 di mart 2009.
For di invierno awor Martinair lo bula shete biaha pa siman pa Kòrsou di kua tres biaha den kombinashon ku Aruba. Ku e buelo diario pa Kòrsou Martinair ta ehersé tres buelo pa siman mas kompará ku verano binidero; pa Aruba lo bula un biaha pa siman mas.
Entrante invierno binidero tur e destinashonnan di Martinair ta keda den ‘Greater Caribbean’. Den esei e asento ta riba e buelo diario for di Amsterdam pa Miami i sigui ku American Airlines pa Costa Rica (San José), sinku biaha pa Mexico (Cancun) i Cuba (Havana i Varadero) i tres biaha pa Repúblika Dominikano (Punta Cana i Puerto Plata). Martinair ta keda bula dos biaha pa siman pa Sürnam (Paramaribo).
Ku e skema nobo di invierno Martinair a logra pa realisá e ophetivonan planiá pa gran parti. E foko den esaki ta riba un repartishon mas efisiente di e ret, sirbiendo e destinashonnan ku un frekuensia mas haltu i nònstòp.