ORANJESTAD- Biblioteca ta celebra tur aña, Aña di la Reina d grandi. Ultimo añanan esaki ta un dobel celebracion pasobra ta organisa un mercado di buki y mercado di purga y tambe e ta un dia cu miembronan por entrega buki sin paga but. E aña aki e celebracion di La Reina ta riba diarason, 30 di april.
Mercado di buki
Pa tur persona cu ta buscando bukinan segunda mano esaki ta un bon oportunidad. Tin un gran variacion di buki na benta, tanto pa adulto como pa mucha y hobeny na hopi bon prijs. Ya for di nueb'or di mainta por disfruta di e dushi ambiente cu musica y un cushina y bar bon surti. Tambe lo tin un gran variedad di articulo manera mata, coi hunga y mucho mas na prijs hopi hopi abao.
No ta cobra but
Tur miembro di biblioteca por entrega e bukinan cu a fia sin paga but pasobra biblioteca lo no cobra but riba e dia aki. No ta importa si e bukinan ta lat un siman, un luna of kizas mas. En especial biblioteca ta spera tur studiante di Mavo/Havo/VWO pa entrega nan bukinan pa otro alumno tambe por lesa nan.
Biblioteca ta hasi un accion tremendo pa por haya tur buki bek pa asina por sigui brinda nos comunidad e servicio di prestamo di buki na esnan cu mester di informacion.
Biblioteca ta spera di por conta riba e cooperacion di tur su miembronan pa bin entrega buki diarason dia 30 di april, Aña di la Reina.
Publico ta bon bini pa pasa na biblioteca na Playa den George Madurostraat for di 9’or di mainta te 2’or di atardi.

ORANJESTAD- Ayera anochi a tuma lugar e di 8 rond di campeonato di dam pa aña 2008. Un total di 14 hungador a inscirbi pa e torneo aki.
Den nan tin 3 hoben y dos di nan, esta Annelaine Jacobs y Jose Antoine Bastien, ta participando pa prome biaha na un campeonato di Aruba.
E tercer hoben Albert Arends a jega di participa caba.
Resultadonan di e di 8 rond ta como lo siguiente:
E dos hobennan Jose Antoine y Annelaine Jacobs a topa otro tras di borchi di dam.
A resulta cu Annelaine ta dominando e wega aki mihor cu Jose Antoine. Annelaine a gana e wega aki.
Clifton Agatha a enfrenta Ireno Nicolaas. Clifton a gana e partido aki dor cu tempo a caba cu Ireno. Pero e final tabata perdi tambe pa Ireno.
Henri Knepa a gana di Cesar Marquez. Despues di e wega, e posicion criticio a wordo analisa. A resulta cu si Cesar a hunga e zet corecto, Ceasr lo por a haya por lo menos un tabla sino ta mas. Pero Cesar no a mira tur e posibilidadnan aki, ora e tabata hungando.
Albert Arends a gana di Octavio Croes, pero Octavio tabata tin e wega full domina y ta wardando riba e ultimo zetnan cu Albert ainda tin, pa bay cu e victoria. Pero tabata tin un combinacion scondi den final cu Octavio a “overlook” En bez di gana e partido, Albert a drenta dam y gana e wega.
Veterano Joseph Deschamps ta sigui cu su ratcha di victoria. Awor ta Rolin Croes ta e dupe. E bista superior di Joseph ta haci e diferencia.
Delbert Alexander y Jose Bastien a hunga nan wega adelanta pa e di dos buelta. Den e prome encuentro e wega a caba na un tabla. E biaha aki, Jose a gana e partida.

ORANJESTAD- Gobierno di MEP a emiti un comunicado di prensa ayera tardi cu ta asombroso a lo menos, esta cu gobierno a descubri un plan “diabolico” di partido AVP, pa retira 1500 trahador publico.
Sinembargo haciendo e acusacion aki, e mesun gobierno di MEP ta acusa Minister Presidente Nel Oduber, di ta un “diabel”, ya cu ta e propio Premier a declara recientemente, cu si su Gobierno bai di acuerdo pa paga trahadornan indexering, lo tin cu retira 1500 trahador for di servicio.
Es mas, ta Gobierno di MEP a manda a presenta e argumento na sindicatonan, cu si bai over na cumpli cu pago di indexering, dentro di dos aña lo tin cu retira cantidad di trahador for di servicio, lagando e proceso aki pa un proximo gobierno.E comunicado di gobierno di MEP ta bisa lo siguiente:
“Ya ta for di algun aña caba partido AVP y su lidercito ta anuncia y menasa cu si e yega un dia den Gobierno, e lo bay elimina 1500 ambtenaar! Pasobra e y su partido AVP si ta kere den un cuerpo di ambtenaar mas chikito! Durante varios tratamento di presupuesto den Parlamento sr. Eman a vocifera e plan aki di AVP! Un di e argumentonan cu sr. Eman ta usa semper ta cu mayoria ambtenaar ta nombra politicamente y tambe cu mayoria lo ta MEP! Y ta pesey si un dia e yega den Gobierno e lo sa di ehecuta e plan macabro aki! No ta pasa un ocasion cu sr. Eman a demonstra su rabia ariba e cuerpo di ambtenaar cualificando nan di ta inepto y cu mayoria ta nombra politicamente y segun e nan no tin e educacion necesario y cu nan ta wordo paga hasta di mas! Kico partido MEP a ripara ultimo tempo ta cu net cu sr. Eman y partido AVP e Sindicatonan den Accion a dicidi di tene man! Ta parse cu e Sindicatonan den Accion no tin un nocion di kico ta spera nan miembronan den futuro si pa desgracia e pueblo aki yuda AVP drenta cualkier gobernacion!

Gobierno di MEP ta hibando oposicion siendo den gobierno
AVP no por tin plan si e no ta gobernando

ORANJESTAD- Gobierno di MEP a emiti un comunicado cu ta un tiki controversial, acusando partido di oposicion AVP, di kier ehecuta un plan di maneho pa retira 1500 trahador publico.
Sinembargo ta dificil pa kere c’un partido cu ta den oposicion manera AVP pa ultimo 7 aña, por tin un plan pa ehecuta, ya cu e mandato pa goberna e pais, ultimo 7 añanan ta den man di partido MEP, y ningun hende mas.
AVP no por retira ningun hende, corda pa retira 1500 trahador y aki un biaha mas Gobierno di MEP ta trata di culpa otro na lugar di carga responsabilidad cu el a ricibi na dos occasion pa goberna drechi.
Gobierno di ME P a presenta e lista di puntonan den cual e ta acusa AVP di dje:
“1. Lo ehecuta e principionan di e ‘Kerntakenanalyse’ den cual lo elimina un hala di departamentonan existente y lo incorpora diferente diensten den otro por lo cual lo tin mester di menos ambtenaar!
2. Consecuencia di esaki ta cu den prome instante hopi ambtenaar lo wordo manda cas cu pago!
3. Lo ofrece e ambtenaarnan na cas un trabao, a base di un acuerdo cu sector priva, un trabao den sector priva bao e condicion cu Gobierno pa un tempo determina lo sigui paga e ambtenaar e diferencia di salario mas su beneficionan manera vakantieuitkering, bashipremie, kindertoelage etc.
4. Lo introduci un wachtgeldregeling obligatorio, pa un tempo defini p.e. 3 aña, pa esnan cu no tuma e trabao den sector priva of cu despues di tempo no ta interesa pa keda den sector priva! Corda cu e Dienst no ta existi mas of si e ta existi no tin vacatura!

ORANJESTAD- “Den e plan macabro di AVP e miembronan di SIMAR, esta e maestronan di school, lo ta e ultimonan pa perde trabao pasobra semper ta keda necesidad di maestronan di school!
Esaki ta conta pa polisnan tambe! Pero hustamente e dirigentenan di SIMAR a haña e tarea pa ‘no matter what’ keda tranca cos! Y pa wak pa no yega na mesa cu Gobierno y asina no yega den un posicion pa negosha!
Fuentenan cerca di e dirigentenan di SEPPA ta indica cu Sindicatonan den Accion un dado momento lo kier laga nan exigencia cay pa cu Gobierno mester presenta un oferta acceptable pa bay sinta na mesa cu Gobierno!
Basta cu nan por saca algo mas pa e aña aki y yega na compromiso pa e añanan nos dilanti! Pero ta hustamente dirigentenan di SIMAR y tambe SPA ta insisti y cada bes ta ‘overrule’ e dirigentanan di SEPPA y otronan!
Asina cumpli tambe cu e palabracion haci cu Mike Eman y partido AVP! Ta pesey mes nos di partido MEP ta pidi cada miembro pa pensa bon y reflecciona! Puntra bo mes pakico bo ta luchando!
Realmente pa indexering of pa un lucha politico pa yuda AVP, DR, RED y MPA? Mayan abo mes lo por ta victima di e plan macabro di Mike Eman y partido AVP!
Ora bo ta protesta tira bista rond di bo kendenan realmente ta cana cu bo!
Na cada reunion di Sindicato ta e activistanan di AVP, DR, RED y MPA ta bati man y ta haci mas desorden!
Huzga pa bo mes!”