ORANJESTAD– Recientemente a lansa e campaña “Papiamento, cuid’e!”
E campaña aki ta consisti entre otro di diferente material di promocion y informacion. Na luna di januari a publica un kalender di Papiamento pa aña 2008, cu ta Aña Nacional di Cultura y Aña Internacional di Idioma. E kalender a wordo reparti entre diferente grupo meta pa asina anticipa e atencion cu ta bay duna na nos idioma Papiamento durante aña 2008. E kalender ta contene diferente mensahe, citado, lista di palabra y fechanan importante cu ta wordo celebra na Aruba. E iIlustracionnan den e kalender ta enfoca riba e man, formando asina un conhunto cu e concepto y lema di e campaña: “Nos idioma ta den bo man. Papiamento, cuid’e!”
Tur aña riba 21 di februari ta celebra Dia Internacional di Idioma Materno. Na Aruba tambe nos ta pone atencion na e dia aki. Mirando e hecho cu Papiamento ta e idioma materno di mas o menos 70% di hende na Aruba, Departamento di Enseñansa e aña aki a scoge e fecha importante di 21 di februari pa ofrece un charla na su personal tocante e campaña “Papiamento, cuid’e!”.
Na luna di maart a bay publico cu e campaña, haciendo uzo di promocion den corant, na radio y television. Aki, mescos cu riba e poster cu ta wordo reparti rond di Aruba, profesionalnan den diferente ramo ta mustra cu Papiamento ta nan instrumento di mas importante.
Hunto cu e campaña a lansa tambe e website www.papiamento.aw pa por duna mas informacion tocante nos idioma Papiamento. Pa promove esaki entre e hobennan, pronto ta bay reparti algun material di promocion manera pen y sticker na scol.

ORANJESTAD- Rotary Club of Aruba ta cla pa su di 28 Fiesta Rotaria y henter e pueblo di Aruba ta keda cordialmente invita pa asisti Diadomingo awor dia 13 di April 2008, dilanti Talk of The Town for di 10’or di mainta te cu 6’or di atardi.
Ariba escenario lo tin for di trempan caha di orgel cu Nelson Sprok, sigui cu gruponan di baile, Club di Movimiento, Pierewietjie y 4U2Dance. Tambe lo tin North Star Steelband, NICO CONNOR, RELOAD, NBO y TSUNAMI. Pues no perde e tremendo shownan aki mientras cu bo ta hasi compras pa bo y bo famia.
Den e famoso dunk tank lo tin for di trempan e personan conosi den nos comunidad cu semper ta coopera y ta cai den awa pa yuda Rotary recauda fondo. Tin entre otro, Serge Mansur, Paul Arends, Andin Bikker, Dilma Arends, Kevin van Ommeren, Monica Kock, Mike de Meza, Michael Saladin, Monique Kuiperi, Michell Jansen, Tito Lacle.
Lo tin hopi mata bunita, hopi panja bunita y buki na cantidad. Den Hardware lo tin hopi producto barata, electronico y pa cas. Lo tin muebles bunita y di bon calidad. E di 28 Fiesta Rotaria ta priminti di bira mas grandi ainda cu nunca. Y si ainda bo no a cumpra bo rifa, ainda tin oportunidad pa hasi esaki.
Pa nos muchanan lo tin e famoso kids corner y lo tin hopi ice cream, popcorn etc. Food Corner lo tin variedad grandi di cuminda pa henter famia di Occidental Hotel, Holiday Inn Hotel, Divi Resort y Amaziona Restauant. Prijs barata barata! Barnan lo ta bon surti! Pues no perde Fiesta Rotaria 2008 Diadomingo awor!!!

Nos comunidad Arubano a conoce hopi di nos hendenan cu a uza nan talento pa sirbi bienestar general. Nan inteligencia ta(bata) ser uza pa haci cosnan util pa nos pueblo.
Un di e Arubianonan cu desde infancia a uza su tempo pa promove nos cultura, folklore y nos lucha pa nos pais ta completamente autonomo, ta awe den feliz memoria sr. August ‘Juchi’ Croes.
Desde fundacion di nos prestigioso partido Movimiento Electoral di Pueblo (MEP) dia 9 di februari 1971 hunto cu nos lider awe den feliz memoria Betico Croes, un di e personanan clave como su consehero ariba tereno estatal, cultural y folklore ta sr. August ‘Juchi’ Croes.
Tur hende mester por sa cuanto lucha a ser hiba pa awe nos pais tin desde 18 di maart 1976 su propio himno y bandera pa cual sr. August ‘Juchi’ Croes a duna su cooperacion. E tabata forma parti di e prome comision Celebracion di Dia di Himno y Bandera na 1976.
Tempo cu nos pais mester a haci su preparacionnan pa nos tin nos propio ortografia, un di e palancanan como consehero di awe den feliz memoria Betico Croes tabata sr. August ‘Juchi’ Croes, unda al final Eilandsraad di nos isla a acepta e ortografia etimologico como manera pa nos skirbi nos Papiamento. E comision cu a haci e trabao aki tabata tin sr. August ‘Juchi’ Croes como miembro. August tabata tin un stimacion hopi grandi pa nos cultura en general y muy en particular e manera di skirbi nos Papiamento. Varios ta e articulonan cu el a publica ariba e topico interesante aki cu a yuda inculcra den nos pueblo amor pa nos propio identidad cu tabata algo sagrado pele.

“Den e matutinonan di dialuna 7 di April 2008, Sr. Paul van Niel, den su calidad di Presidente di OPPA, den un articulo titula “Nos mandatarionan mester tin mas respet pa nos pensionadonan c.q. nos grandinan”, a trece, pa loke ta relevante pa e pensionadonan di Gobierno, lo siguiente pa dilanti. Nos kier cita aki e parti cu ta di interes pa e pensionadonan di Gobierno di loke Sr. Paul van Niel a scirbi den e articulo menciona: “Por a nota tambe cu den e intermediacionnan cu a wordo hiba, semper y cuando nos mandatario, esta nos flagrante Ministro di Finanzas, esta e representante di Gobierno, ta trece condicionnan infactibel y indiscutibel pa e contra partido, mientras cu e mandatario sa bon bon cu esakinan ta responsabilidad completo di Gobierno. Ehempelnan di esaki ta cu segun e mandatario mester kita e “duurtetoeslag” for di e pensioen; bin cu un “franchise” pa esnan cu tin cu baha cu pensioen ainda, pues haci cambio drastico den e ley di pensioen etc etc.”
Como Presidente di OPPA, e organisacion cu ta representa e pensionadonan di Gobierno, Sr. Paul van Niel mester sali na vanguardia y defensa di e pensionadonan aki y no colga na saya di Sra. Magaly Brito. Pa e pensionadonan menciona ta importante tres asunto cu Sr. Van Niel a trece dilanti den su articulo aki den prensa, esta (1) ahuste di nan pensioen na costo di bida; (2) e asina yama “duurtetoeslag” y (3) e asina yama “franchise”. Pa loke ta trata e dos ultimonan aki, esta (2) “duurtetoeslag” y (3) “franchise”, nos di MEP por ta corto. Gobierno NO lo mishi cu esakinan pa loke ta trata e miembronan di OPPA, ni e otro pensionadonan di Gobierno no miembro di OPPA.

NEW YORK, Merka, - “Nunka mi a usa kokaina te dia ku mi a konosé Whitney, Bobby Brown a afirmá den un buki di promé aparishon, kende ta eks esposo di kantante Whitney Houston.
New York Times a publiká algun adelanto.
E outobiografia di e músiko titulá “Bobby Brown: The Truth, The Whole Truth and Nothing But” lo sali riba merkado luna benidero.
E korant neyorkino djaweps último a publiká algun teksto.
Outobiografia di Bobby ta menasá konta tur sekretu di su matrimonio.
Kuminsando ku e deklarashon kuestionabel ku promé di tabata huntu ku Whitney, nunka el purba kokaina.
“Mi a eksperimentá ku algun droga, pero mariwana tabata mi opshon. Den un punto di mi bida mi a usa droga deskontroladamente. Mi tabata usa for di kokaina te heroina”, Bobby a skibi den su buki.
Riba su kontrovertido matrimonio di 15 aña ku e dama ganadó di premio Grammy, Brown a konkluí ku tabata un estupides for di promé momentu.
“Mi ta kere ku nos a kasa ku otro pa motibunan ekiboká. Awor mi a tuma nota ku Whitney ta’tin otro plannan diferente ku esnan di mi ora nos a kasa. Mi ta kere ku e tabata ke limpia su imágen, miéntras ami tabata ke pa stima mi i haña yunan”.
Segun Bobby, promé ku pensa kasa kuné, Whitney tabata bou di preshon enorme.
E medionan di komunikashon tabata akusá Whitney di mantené un relashon homoseksual ku su asistente Robin Crawford.

LA HABANA, Cuba, - Míles di cubano lo por optené títulonan di propiedat di bibienda ku aktualmente ta di Gobièrnu, segun regulashonnan publiká ayera, un medida ku lo por establesé basenan di reformanan mas amplio den e sektor.
Tabata e promé dekreto legal publiká formalmente fo’i dia ku Raúl Castro a remplasá su ruman Fidel Castro komo Presidente na febrüari último.
Televishon estatal tambe a bisa ku lo bai eliminá tòp salarial, pèrmitiendo empleadonan di e Estado gana tur loke nan por komo insentivo pa produktividat.
E restrikshonnan di bibienda i salarial tabata dos di e kosnan di e sistema sosialista ku mas ta iritá e cubanonan.
E dekreto di bibienda ta stipulá normanan ku ta pèrmití e cubanonan kendenan ta biba den apartamentu di hür òf kas di nan doño estatal ku nan por keda ku e propiedat despues ku nan bandoná nan trabou.
Nan por optené e títulonan di propiedat i inkluso laga esaki pa nan yunan òf famianan.
Míles di cubano lo por probechá di esaki, inkluyendo famianan di e militarnan, trahadónan di suku, trahadónan di konstrukshon, maestronan i dòkternan.
Keda ku kasnan di e Estado inisialmente kreá pa trahadónan spesífiko, tabata un práktika informal pero hopi ekstendé den bida cubano.
Tin un lei di 1987 ku ta stroba traspaso di dicho bibiendanan na su okupantenan, pero e medida nobo lo tin ku aklará su status legal.

PARIS – Riba un gran kantidat di esenarionan rònt mundu, míles di deportista ta hasi nan máksimo esfuerso riba pista, gimnasia i pisina ku un ophetivo komun, kore mas duru, bula mas haltu, dal mas fuerte pa asina por destaká durante Weganan Olímpiko na Beijing.
E pregunta ta, “nan mester lusi ku un sinta di Tibet? Bòikotiá e seremonia inougural? Ignorá e situashon di derechonan humano? Den e kuestion aki ku ta pasa awor pa ta tópiko prinsipal den e weganan ku mas embolbimentu di polítika for di Seul 1998. E deportistanan rònt mundu no ta pensa meskos.
Na un ekstremo tin e divishon entre atletanan ku di un banda ke laga polítika pa polítikonan i ta ninga di ta peonnan den un bataya geopolítiko ku China i di otro banda, esnan ku ta bisa ku atletanan ku konsenshi mester manifestá i no aktua na Beijing manera ku e resiente represhon na Tibet no ta konstituí un preokupashon.
Meimei di esaki nan tin ku no sa mes kon mester reakshoná i otro ku ta sinti nan mes inkómodo ku e situashon.
E tenista number un di mundu, Roger Federer a bisa, ku ainda e no sa muchu di e situashon i no ta kere ku e lo protestá. “Mi no sa ki medida nos komo deportista mester involukrá nos mes kuné. Esaki mester ta un selebrashon di deporte i no us’é komo un motibu polítiko.”
Segun reglanan Olímpiko, ningun atleta no ta permití pa manifestá òf propaganda polítiko, religioso, rasial na ningun sitio olímpiko. A kaso ku hasi esaki tòg, e atleta por keda ekspulsá.

BEJING – E organisadónan di e rekorido di e antorcha olímpiko na Beijing, ta bai oumentá e medidanan di seguridat durante e último etapanan ku ta awor ta bai kompañá ku kontratempu.
Liu Qi, hefe di e komishon organisadó na Beijing a reuní ayera ku funshonarionan di e Komité Olímpiko Internashonal (KOI) den un intento pa kalma e inkietutnan rondó di e medidanan nobo ku ta trata na prevení protestanan manera a tuma lugá na San Franisco, Paris i London.
“E komité organisadó di Beijing a pone bon kla, ku nan a tuma tur medida nesesario pa sigurá di kualke riesgo, a kaso ku tin esaki, ta wòrdu redusí i nos ta konfia i nos ta di akuerdo ku nan,” asina e bosero di KOI, Giselle Davies a bisa.
“Awor ta kuestion di sigurá e hunta di direktiva ku nan tin tur kos bou di kontrol.”
E rekorido di e antorcha na Beijing a kombertí den un desaster den materia di relashonnan públiko pa outoridatnan chines kende nan a spera ku esaki lo tabata un selebrashon alegre ku lo a sirbi komo antesala pa e weganan ku mester wòrdu realisá di 8 pa 24 di ougùstùs próksimo.



Bosero di KOI, Giselle Davies

BEJING – Komité Olímpiko Internashonal (KOI) a bisa ayera ku nan lo no krusa e frontera polítiko pa preshoná China pa resolvé e situashon na Tibet. Esaki apesar di protestanan di gruponan di oposishon di polítika chines den e region ku a afektá e relevo di e antorcha olímpiko.
E presidente di KOI, Jacques Rogge a reiterá su postura ku e organisashon lo no preshon China pa habri un diálogo riba Tibet, derechinan humano i otro asuntunan polítiko.
“Esei ta un liña ku nos no mester krusa,” asina Rogge a bisa durante un konferensha di prensa despues di dos dia di reunion di e hunta di KOI. “KOI a ekspresá su punto di bista na e promé minister riba e preparashon pa Weganan Olímpiko.”
Riba e pregunta si nan lo trata na promové pa Chiba habri un diálogo ku Tibet, Rogge a kontestá ku esei ta un asuntu polítiko den kual KOI no ta mete. “Ta un asuntu di soberania di China ku China mester disidí.”
Rogge a deskribí su kombersashon ku promé minister Wen Jiabao komo útil, franko i habrí. “Definitivamente tabata un bon reunion pa preparashon pa Weganan Olímpiko.”
“Mi no tin un bola di kristal, pero mi ta optimista ku e weganan lo ta un gran éksito.”

WILLEMSTAD - Sekretario di Estado pa Relashon den Reino Ank Bijleveld, ta studiando un senario nobo den e trayekto di kambio estatal aki na Antia.
Ulanda ta kontemplando e posibilidat pa introdusí e kambionan estatal den fase, asina Bijleveld a bisa, despues di un debate di su partido ku a tuma lugá e siman aki na Utrecht. Ta trata di un debate, despues di un presentashon di Ank Bijleveld pa e asina yama Wetenschappelijk Instituut di e partido.
Bijleveld a manifestá su preokupashon na e okashon aki ku kosnan ta kanando hopi lento i ku mester por kuminsá kana mas lihé.
Un dje puntonan di preokupashon di vários isla di Antia – sigur di e islanan mas chikitu – ta e hecho ku miéntras ku nan ta avansando den nan kaminda pa kambio estatal, nan ta haña nan ta warda, pa motibu ku ni Kòrsou ni St. Maarten, ainda no ta kanando rápido ku nan aktividatnan.
Den e dianan ku a pasa por a tende e gritu aki di entre otro Ramonsito Booi di Boneiru, pero tambe di Clyde van Putten di Statia. Analistanan ta tene kuenta ku e punto aki por bira un fuente di iritashon den futuro, si no haña un solushon pa esaki.
Sekretario di Estado Ank Bijleveld a bisa den entrevista ku Desiree Martis di Radio Nederland Wereldomroep ku el a aserká Raad van State pa dun’é un konseho riba e posibilidat pa introdusí e reforma estatal na Antia den fase.
“Ta bisto ku nos no ta bai logra mas pa anunsiá e kambionan aki ku un fiesta grandi di 15 di desèmber awor. Gobièrnu Sentral pues lo sigui eksistí pa un ratu mas. E trayekto di e islanan mas chikitu ta kanando mas lihé i di mi parti, mi ta bisa ku Ulanda mester por kuminsá tuma sierto tarea over for di Gobièrnu Sentral,” segun Bijleveld a trese dilanti.

ARIES: Dediká tempu pa e kosnan ku eksaltá bo kreatividat. Ekspresá loke bo tin den bo kurason. Bo ta traha hopi i ta dunábu hopi pa los demas. 09,12,10.

TAURO: Bo ke hasi hopi ku poko tempu i bo ke dividí bo persona den otro tres pa bo por tene tur manera bo ke. Delegá responsabilidatnan den esnan ku bo ta konfia.

GEMINIS: No hinka bo energia den trabounan ku no ta nesesario, ser práktiko i pa awor deskansá. Na e momentunan aki gosa di hasi e kosnan na bo manera. 09,54,33.

KANSER: E bon ta yega awor di e bondat i amistat di otronan ku ta apresiá i ku ta stimabu. Aseptá tur loke universo ta regalábu. 32,12,56.

LEO: No hasi e kosnan na lo ekstremo. Pone mayor interes pa bo salú i bo bienestar en general. Bo ta okupá mas di bo trabou i di tur proyekto ku bo tin pendiente. 26,14,29.

VIRGO: No hasi trabou di otronan, siña delegá. Aire liber i ehersisionan lo ta ekselente pa bo salú. No laga ku tantu obligashonnan ta sakabu for di bo ekilibrio.

LIBRA: Bo por yuda otronan den nan asuntunan ekonómiko dunando bon konsehonan ku ta lagabu prosperá. Lo pashonal ta eksaltá. 07,17,09.

SKORPION: Bo spiritualidat ta enfatisá i lo ta hopi deboto di bo kreensianan. Kualkier biahe pa estranheria ku bo tin lo ta di hopi satisfakshon. 16,10,05.

SAGITARIO: Tin hopi kos di hasi i hopi ta buskando bo ayudo i apoyo. Bo no ke hasi tur i komplasé tur, konsentrá den lo mas importante di bo bida. 22,07,25.

WILLEMSTAD - Kana di Schoon Milieu op Curacao, SMOC a yena. Esaki simplemente no por mas, asina presidente dje fundashon, Paul van Leeuwen a afirmá, despues di e problema serio ku a surgi e siman aki na Refineria Isla.
Komo konsekuensia di problemanan tékniko na BOO, Refineria Isla a stòp di funshoná ku konsekuensha ku mester a kuminsá “fakkel” mesora.
Esaki a produsí un kantidat di huma i rut ku a baha riba e barionan pabou di e instalashonnan di Refineria Isla. Un berdadero desaster, asina Van Leeuwen a kalifiká e situashon.
Den entrevista pa Radio Nederland Wereldomroep, Van Leeuwen a bisa ku ta un kantidat basta grandi di huma tabatin durante e promé oranan di e insidente. El a desbaratá e alegashonnan di bosero di Refineria Isla Kenneth Gijsbertha, den sentido ku e huma ku a sali for di e chimenea di e refineria no ta venenoso i dañino pa salu di hende.
“Definitivamente tabatin holó malu, tabatin gas ku elementonan venenoso ku a bai den aire. SMOC ta eksigí akshon di parti di Ulanda awor si,”asina Van Leeuwen a sostené.
El a bisa ku no ta pòrnada tampoko, ku a evakuá dos skol ku ta situá pabou di e refineria. Tabatin mucha i maestro di skol ku nan wowo tabata kore awa. E kos aki ta un indikashon di polushon serio, asina el a agregá.
Van Leeuwen a bisa, ku e servisio di gobièrnu ku mester atendé ku polushon, Servisio Ambiental, tampoko ta na altura, pasobra ta parse ku nan no tin e ekipo adekuá pa midi.

AMSTERDAM / WILLEMSTAD - Korte di Apelashon na Amsterdam a konkluí ku no tin base pa prohibí eksistensia di e organisashon Hells Angels na Amsterdam. Komo tal, el a rechasá e petishon di Ministerio Públiko pa hasi esaki. Esei ta loke e ofisina di abogado di Hells Angels a anunsiá.
Korte di Apelashon a konkluí ku no tin base pa bisa ku Hells Angels ta un organisashon kriminal. Tampoko a keda probá ku nan lo ta hasi nan mes kulpabel na labamentu di plaka, manera un dje akusashonnan tabata bisa.
Segun abogado di Hells Angels Marnix van der Werf, Korte di Apelashon ta mas konvensí ainda ku korte den promé instansia, ku Ministerio Públiko ta kompletamente robes den e kaso aki.
Entretantu t’asina ku diferente korte den promé instansia i korte di apelashon a kuminsá ku tratamentu di kasonan sivil kontra eksistensha di Hells Angels.
Aparte di e kaso kontra e kapítulo di Hells Angels na Amsterdam – konsiderá komo esun ku ta liderá Hells Angels rònt Ulanda – tabatin mas kaba kontra e kapítulo na Limburg i na Friesland. Den tur e kasonan aki, Ministerio Publiko a pèrdè.
Van der Werf ta kere ku chèns ta grandi ku Ministerio Públiko, mirando e resultado di e kasonan ku ya kaba ta tras di lomba, lo legumai e otro kasonan ku awor aki ta pendiente.
“E kaso kontra Hells Angels Amsterdam tabata e kaso modelo. Awor ku OM a kai chikitu atrobe, tur kos ta mustra ku e kaso kontra e otro siudatnan ta básikamente pèrdí,” asina Van der Werf a bisa.

AMSTERDAM/ WILLEMSTAD - Tres hospital grandi na Ulanda a anunsiá ku nan a haña un forma nobo di duna terapia kontra e malesa kanser. Esaki mester nifiká un adelanto den lucha kontra kanser. Básikamente e forma nobo ta enserá un sistema otro pa duna kimoterapia, kaminda e partinan ku ta salú di e pashènt, ta sufri ménos daño durante e tratamentu.
Ademas, e efektonan negativo di e proseso di kimoterapia ta ménos ku den pasado.
Un portabos di Nederlands Kanker Instituut - Antoni van Leeuwenhoek (NKL-AVL) a konfirmá e vershon aki.
Segun Marcel Verheij, hefe di e sekshon di radioterapia di NKL-AVL, mas o ménos 8000 di e 45 mil pashèntnan di kanser ku ta haña tratamentu di kimoterapia, por probechá di e desaroyo nobo aki.
Ekspertonan ta tene kuenta ku por kuminsá hasi uso di e método nobo aki riba pashèntnan di kanser na aña 2010 òf 2011.
E método nobo por ser usá prinsipalmente pa kanser na garganta i kanser na pulmon.
Posiblemente, lo por usa e mesun método aki pa kanser na stoma, kanser na prostat i kanser na pechu.
Ademas por usa e mesun método tambe pa tumor na kabes i na wowo. Un otro bentaha ku e tipo di tratamentu aki ta, ku por trata tumor ku un dósis mas haltu di kimoterapia, sin ku e efektonan negativo tambe ta oumentá. Esaki ta nifiká, ku e chèns di sobrebibensia ta bira tambe mas grandi.

WILLEMSTAD - Kada pidi infrastruktura nobo ku DOW realisá, ta un adelanto pa komunidat. E ta trese un satisfakshon enorme, no solamente pa nos, pero tambe pa gobièrnu i pa komunidat mes.
Esaki ta loke hefe interino di DOW Urvin Batta a trese dilanti, durante entrega e proyekto Pater Euwensweg Oost djaweps último. E entrega aki a bai den un forma festivo ku hopi ambiente.
Urvin Batta a bisa ku e proyekto aki ta e lastu fase di e programa “Infrastructuur Molenplein en Brionplein”. E promé parti tabata Molenplein mes, e di dos tabata e área di Sebastopol i e di tres ta Pater Euwensweg Oost ku a entrega e siman aki.
Batta a gradisí Gobièrnu di Kòrsou pa e konfiansa ku a duna DOW pa por a ehekutá e proyekto aki. Miéntras ku tambe el a gradisí ministerio di Binnenlandse Zaken di Ulanda ku via Sona i Usona a sòru pa e finansiamentu
E proyekto a bira posibel tambe, segun el a bisa, danki tambe na tur e otro servisionan manera DROV, Secretariaat Stadsvernieuwing, Transporte Públiko, ABC Busbedrijf, SKS i Polis.
“Ku un plaser nos ta kompartí e entrega aki awe ku bosnan. E pregunta lo ta dikon? Pasobra nos sa ku kada proyekto di infrastruktura ku keda realisá ta trese satisfakshon pa nos komunidat, gobièrnu, otro instansia i gruponan. I pa nos komo servisio enkargá ku desaroyo i mantenshon di infrastruktura, kada pida infrastruktura nobo ku keda realisá ta un adelanto pa e servisio ku nos ta brinda na komunidat,”asina e hefe interino di DOW a trese dilanti.

WILLEMSTAD - Sosiedat di Komersiante di Otrobanda ta spera ku gobièrnu, riba término kòrtiku lo haña un solushon pa e stèntnan riba Plasa Brion ku ta bende artíkulo ku turista. E stentnan aki mester bai bèk na nan lugá, esta na e parti na pia di brùg, pegá ku bahia di Sta. Ana.
Florida Daflaar, presidente di Sosiedat di Komersiante d Otrobanda, ayera nochi a boga pa un solushon pa e situashon aki, ku ta un estorbo den bista di hopi hende.
Daflaar a hiba palabra na okashon di entrega di e proyekto di rekonstrukshon di Pater Euwensweg Oost. El a bisa ku gobièrnu por ta sigur ku SKO ta karga e proyekto aki ku entusiasmo i ta duna tur sosten pa mantené i kuida esaki. Pero, asina el a bisa, ta bon si pa tene kuenta ku un aspekto ku ta di prekupashon pa komersio den Otrobanda.
Ta trata aki di e stèntnan di heru ku komersiantenan ta arma kada biaha ku tin barku di turista i kaminda nan ta bende entre otro flanèl i otro artíkulonan netamente turístiko. E problema ta ku e stèntnan aki ta duna un mahos bista riba Plasa Brion.
Un tempu e stèntnan aki tabata kaba pega ku e waf na e bahia di Sta. Ana, na pia di brùg di ponton.
Ku trabounan di rekonstrukshon di e área, a trasladá nan i te awe nan ta riba Plasa Brion.
Ku finalisashon di e rekonstrukshon di Pater Euwensweg Oost, e nesesidat pa hasi algu na e situashon aki a bira mas agudo.
Mi ta spera ku gobièrnu lo atendé e asuntu aki mas lihé posibel, asina Florida Daflaar a agregá.

RAMAZAN
Runny Rosa
Mihó konosí komo Rudy òf Bareto
A laga atras su yunan Nazira, Rully, Mishaira, Rodien i Rudion Ramazan, rumannan Moizes i Teresita Mariana, Astrid Ramazan i Angel Eustatia, Eveline Ramazan i nan famia, na nòmber di Glenda Koots i famia. Akto di entiero ta djaluna 14 di aprel, for di misa Montaña pa santana Montaña. Bishita 1or. Promé ku entiero tin un s.s. di misa 4or.

ESTRIDGE-JACOBUS
Aura Genara (81 aña)
Mihó konosí komo Auchi ku tabata traha na El Ideal i Casa Leon/Tempo
A laga atras su yunan Nadeska Estridge i Michael Isenia, Maikel Estridge i Johanna Estridge-Bats, ñetunan Mikhail Isenia, Maikel i Mayra Estridge, Anita Bats, Shargionny Cristina, rumannan Marcial, Edgar, Sinalda Jacobus, Mortimer i Elva Jcobus-Albertus, Ilva i Siro Jansen-Jacobus, Swinda Jacobus-Ricardo, Shirley Plantein-Carey. Akto di entiero ta djadumingu 13 aprel 3.30or for di El Tributo pa santana Sta. Maria. Bishita 12or. Promé ku entiero tin un s.s. di misa 4or na misa Sta. Maria.

FRANCA
Ronarvey Tadeo Claridat (29 aña, trágiko)
A laga atras su mama Jacintha Franca, tata Ronnie Delanooi, tata di kriansa Anthony Firma i famia, señora Mireille Spratt, yunan Rowendy, Rafelito, Safinjo St. Jago, Tishandra, Tiffany, Rowensley i Ronarvey Spratt, Ranaftely Franca, Darvilenys Josepha, yu di kriansa Poienti de Jesus, rumannan Judeska Franca, Steven Bishop, Siliska Franca i nan yunan, wela Silvia Toppenberg-Franca. Akto di entiero ta djamars 15 aprel for di El Consolador pa santana Roodeweg. Bishita 12or den Sala Celeste. Promé ku entiero tin un s.s. di misa 3.30or na misa Sta. Famia. Trahe alegre.

BC a bai di akuerdo ku algun adaptashon den tráfiko marítimo 

WILLEMSTAD - Gobièrnu di Kòrsou ta partisipá na komunidat ku Kolegio Ehekutivo di teritorio insular di Kòrsou, den nan reunion semanal di dia 9 di aprel último, a bai di akuerdo ku algun adaptashon ku a keda proponé den “Binnenvaartverordening”, ku ta reglamentá leinan ku tin di haber ku tráfiko marítimo na bahia i playanan. E último adaptashon riba e lei akí ta data di 10 di desèmber 1976.
E kambionan proponé ta a konsekuensia di desaroyonan ku a bini ta tuma lugá den e mundu di nabegashon.
Si komunidat ta kòrda, na vários okashon a yega di surgi aksidente i/òf molèster, okashoná pa vehíkulo motorisá ku ta nabegá riba laman. No tabata eksistí ningun tipo di regla pa ku komportashon di e nabegante (konduktor) di e tipo di vehíkulonan di plaser akí.
Mirando e kresementu eksplosivo di e tipo di vehíkulonan aki i tambe komportashon di sierto nabegante, a bira urgente i nesesario pa trese kambio i reglanan, ku a kondusí na adaptashon di e leinan ku tin di haber ku tráfiko motorisá riba laman.
Den e kambio i reglanan proponé, énfasis ta prinsipalmente riba e tipo di vehíkulonan akí, manera skuter di awa, ku ta nabegá den serkania di playa i bahianan di Kòrsou.
Kolegio Ehekutivo a stipulá e siguiente reglanan:

Skina di Sorti, awe djasabra 12 di aprel di 2008, ta kuminsá ku deseá tur hende un bon dia. Riba e lokual a tuma lugá den Konseho Insular entre lider polítiko di DP, Norbert George i lider polítiko di NPA, Nelson Pierre, mi no ta gasta muchu palabra. E ta nada mas ku indikashon di lokual por fèrwagt di un proseso di deterioro denter di nos práktika polítiko ku no a kuminsá serka Nelson Pierre ni Norbert George. Nan ta mas bien otro víktima di un proseso sosio kultural di sostené i apoyá kanibalismo moderno.
****
Ta basta tempu kaba e polítikonan ku tabata forsa nan mes pa hiba un aserkamentu mas kulto, metódiko i di kontenido tabata wòrdu desprestigiá na fabor di práktika di poko preparashon i hopi teater, manipulashon di informashon i agreshon verbal. Den prensa mes tin diferente hende ku a kontribuí na e proseso degenerativo aki. Tantu Norbert George di DP komo Nelson Pierre di DP a entrega demasiado na e presentashon dramátiko i a bandoná e profilamente riba kontenido distintivo.
****
Mi ke rekomendá tantu Nelson Pierre, lider polítiko di NPA i Norbert George, lider polítiko di DP, pa reflehá riba e lokual ta nan “core competence” , retorná na hasi uso di e kalidat distintivo ku nan tin i laga e dramatisashon teatral pa esnan ku no t’asina dotá. Pais tin un sobre populashon di polítiko ku no tin e “bagage” pa ser un balor agregá. Si esnan ku por hasi un diferensia entregá nan mes na e mesun aserkamentu, kambio i kambio ta lokual mester, hamas i nunka ta tuma lugá. Pues, señores “cut the .... and get back to business”.

WILLEMSTAD – Ku introdukshon di e asina yamá ‘puntenrijbewijs’, tur outomobilista na Ulanda ta kore riesgo di pèrdè su reibeweis ora e pèrdè 3 di su sinku puntonan. Kada bia ku e outomobilista kometé un infrakshon e ta pèrdè 1 punto. Na e momentunan akí ta solamente esnan ku a kaba di haña nan reibeweis por a pèrdè punto.
Fiskal di tráfiko Koos Spee, di e departamentu di tráfiko di Ministerio Públiko (BVOM), a bisa ku e ‘puntenrijbewijs’, pa esnan ku a kaba di slag pa nan eksamen ta un éksito rotundo. E ta un ‘stok achter de deur’ i p’esei mester duna tur outomobilista un reibeweis asina. For di mart 2002 a introdusí e reibeweis di punto ku ta konosí tambe komo ‘beginnersrijbewijs’. Tur ulandes ku pa promé bia haña un reibeweis ta kai den e kategoria di ‘beginnende bestuurder’ i ta haña un reibeweis di punto durante 5 aña. Den e periodo akí e reglanan di tráfiko ta konta mas severo pa e persona akí. Kada un infrakshon ku e kometé e ta pèrdè 1 di e 5 puntonan ku e reibeweis tin. Ora e pèrdè e di 3 punto ta kita e reibeweis for di dje. E outomobilista mester someté su mes na un investigashon ku ta evaluá su habilidat di stür. Esaki ta konsistí di un parti teóriko i un parti práktiko. Si resultá ku e ‘outomobilista nobato’ no ta apto pa manehá un vehíkulo, e ta pèrdè su reibeweis di punto.