ORANJESTAD- Diaranson 26 di Maart 2008 Minister drs. Marisol Lopez-Tromp a ricibi e Buki Sumpi e Wanglo Sabi autografia pa su propio autor Sr. Gino Vrolijk. E buki Sumpi e wanglo a keda ilustra pa Stan Kuiperi y Departamento di Enseñansa Aruba a percura pa e produccion.
Sr. Gino Vrolijk ta un maestro di scol y ta dunando les den un 3de klas na Colegio Hilario Angela. Sr. Vrolijk tin 9 aña como maestro di scol di cual 4 aña e’la traha na seccion Desaroyo di Curiculo tambe relaciona cu innovacion den enseñansa primario.
E storia di e buki e’la scirbi na aña 1999, tempo cu e tabata studiante na IPA. Na aña 2007 Departamento di enseñansa a publica e buki. Sr. Vrolijk ta conta cu su inspiracion a sali di un combinacion di dos cos. Sr. Vrolijk a haya un tarea pa conta un storia na un grupo di alumno anto e alumnonan tabata gusta hunga den cunucu.
Esey a laga Sr. Vrolijk corda riba su mes, tempo e tabata mucha. Paso Sr. Vrolijk mes tabata gusta hunga y cana den su welo su cunucu. Pensando asina Sr. Vrolijk a bini riba e idea di 'wanglo'. Paso e unico cos cu e no tabata gusta di su welo su cunucu, ta ora e tabata trapa riba wanglo.
Minister drs. Marisol Lopez-Tromp ta hopi contento di a ricibi e buki aki. Minister drs. Marisol Lopez-Tromp ta apoya tur autor local cu ta scirbi den nos dushi idioma Papiamento. Nos idioma ta hoben ainda y contribucionnan di tal indole ta yuda grandemente den engrandece nos idioma. Ademas Minister drs. Marisol Lopez-Tromp su yiu muher mayor ta un fanatico di e buki aki. Segun Minister drs. Marisol Lopez-Tromp nos Arubianonan hoben tin interes hopi grandi den nan propio idioma. Pues, Minister drs. Marisol Lopez-Tromp ta splica cu su yiu muher Dominique te hasta ta puntra dicon Aruba ainda no tin comiquita Papiamento.

ORANJESTAD- Diadomingo 20 di april ta bai tin un concierto di e duo di Marianne Hofman, dwarsfluit y Mayra Kock, piano na Cas di Cultura.
E concierto aki ta bow auspicio di Circulo Arubano Pro Arte y lo cuminsa pa 11’or di mainta den e sala grandi.
Marianne ta bini di un famia Hulandes unda hacimento di musica ta un ocupacion di cada dia. Ya for di temprana edad el a siña toca blokfluit pa despues escoge e dwarsfluit. Despues di a completa su estudio “vakleerkracht muziek” pa scolnan basico na Groningen unda el a dirigi coro di mucha y a coordina varios proyecto pa scolnan basico. Marianne ta bibando ya dos aña na Aruba y a lanta un coro di mucha y ta hopi activo den dunamento di les di dwarsfluit.
Desaroyo musical di Mayra Kock a cuminza cu 7 aña cu les di piano na e Conservatorium Guillermo Thomas pa despues pasa pa Amadeo Roldan.
Despues di varios examen el a logra califica pa sigui su estudio na nivel mas halto na e Instituto Superior de Arte na Cuba. Na aña 1982 el a slaag cu diploma di oro na dicho institucion como specialista di coro. Desde e tempo ey el a adkeri hopi experiencia como maestra di musica na Camaguey y despues como profesora na e Instituto Superior de Arte na Havana, unda Mayra a traha durante 12 aña y a luci den musica coral y interpretacion coral. Na Aruba el a funda e Coro Ars Nova y tambe e ta traha como part-time docent na Instituto Pedagogico Arubano.
Marianne y Mayra a monta un bunita progama pa e concierto di mainta aki y lo interpreta obra di e.o. G.F. Handel, W.A. Mozart, J.S. Bach, Schumann, Widor, Pessard.

ORANJESTAD- Un gran cantidad di persona di diferente angulo di nos comunidad y di Antiyas a registra pa participa na e symposio cual lo inicia diaberna awor dia 18 di april bow di e titulo" Dementie update Aruba," a surpasa e limite di e cantidad di persona cu lo por a inscribi.
E 4 specialista-oradornan lo jega di Hulanda diamars awor, entre nan dr Judella Daal cu ta un "klinisch geriator", un psychologo specialisa den hende grandi, anciano y tur locual ta bin cu edad avansa.
Ta obvio cu e topico di dementie, di cual Alzheimer ta un parti, tin interes y tin hopi pregunta al respecto.
Fundacion Cas Marie ta satisfecho cu por a organisa un symposio hunto cu e Fundacion Alzheimer di Hulanda pa asina juda pone esnan responsabel den nos comunidad para keto un rato y pensa cua direccion nos ke bay cu e 'vergrijzing" haltisimo cu Aruba tambe conoce.
E reaccion positivo y e gran cantidad di persona cu a inscribi nan mes ta asina grandi cu Directiva di Fundacion Cas Marie ta conclui cu mester organisa cu mas frequencia e tipo di congresonan aki cu aparentemente ta cubri un bashi den nos comunidad.
sr Boy Escalona, presidente di Fundacion Cas Marie y demas miembrona di directiva ta hanya lastima cu no por accepta mas inscripcion y cu mester a nenga personan interesa pa atende.

Si mira e 6 proposicionnan y e invitacion pa reuni y delibera, hamas por cualifica cu ta gobierno ta terco
Gobierno di MEP cuestionando accion di sindicatonan

ORANJESTAD- “Nos ta bayendo di 4 siman di huelga, unda un lucha cu a aparenta di ta un lucha pa Indexering a bira uno cu ta pa baha gobierno. Desde comienso ora bo a mira cu ningun proposicion di gobierno no tabata ni ser trata den reunion general di cada sindicato den accion, tabata visto cu ta algo politico tabata andando. Realidad a mustra si cu tin sindicato tin miedo di tene reunion general, pasobra fuera cu hopi miembro no lo bin of esnan cu bin mes lo baha e directivanan cu ta hungando politica partidista.
Gobierno for di promer dia di huelga a expresa su disponibilidad pa compensa costo di bida, pasobra e opinion ta cu mester tene cuenta cu e interes general cu e prijs di bleki di salchicha cu a subi pa empleado publico tambe a subi pa e 42 mil empleadonan den sector priva. Gobierno a splica cada momento cu mester tene cuenta cu e aspecto di e situacion financiero precario. Ya for di e momento cu a sinta na mesa cu e sindicatonan di empleadonan publico, gobierno a manda un proposicion pa compensa costo di bida cu un suma igual pa tur ambtenaar di Af. 950,00.
Envez sindicatonan cu mester sa con pa delibera cu gobierno gara e Af. 950,00 cu dos man y bin mesa despues pa mira kico mas nan por saca, nan mucho tempran a recuri na huelga y awor ta bayendo sin rumbo pa stop locual nan mes a cuminsa cu un ‘draaiboek’ yena cu accionnan iresponsabel, manera sera Aeropuerto pa caba cu nos turismo etc. Hopi analista sindical a expresa cu politica a penetra completamente den e huelga, unda Mike Eman y Rudy Lampe a tuma rienda di e huelgistanan over. Visto tabata con AVP y RED a organiza e ocupacion ilegal di nos sala di Parlamento na un forma iresponsabel.

Presidente di Parlamento ta lamenta invasion y ocupacion

ORANJESTAD- Presidente di Parlamento di Aruba pa medio di e comunicado aki ta aclarea encuanto diformacion di informacion pa loke ta trata invasion y ocupacion di Parlamento.
Presidente di Parlamento ta lamenta cu cierto miembro di prensa di color politico a pinta persona di Presidente di Parlamento na un manera cu no ta cuadra cu realidad.
Ta asina cu lidernan sindical y nan miembronan cu invitacion di miembronan di fraccion di AVP a drenta Parlamento diaranzon dia 9 di april 2008. Ariba un canal di television pueblo por a mira un banda di e medaya con Mike E. a habri porta di Parlamento pa e lidernan sindical y nan siguidornan riba e dia aki.
Presente tabata integrantenan di AVP, Rudy L. y Monica K. Despues a sigui discursonan dor di politiconan Mike E., Rudy L. y Monica K. Nos pueblo culto a defini e acto aki como uno politico.
Segun e lidernan sindical ta un carta nan kier a entrega na Presidente.
Segun Presidente di Parlamento ta hopi ta esnan cu ta trece post pe y no ta drenta asina Parlamento of ta keda campa den Parlamento. Si ta bon pa aclarea cu sindicatonan a manda un carta dia 15 di maart 2008 pa Parlamento cu a ser trata manera usual den e punto di agenda di documentonan cu a drenta Parlamento.
Aki Parlamento a dicidi cu ta tuma conocimento di e carta . En bista cu henter e welga aki ta basa ariba un discucion entre sindicatonan y gobierno, Parlamento no a haya prudente pa trata e carta den fase aki ainda.
CARTA
Lidernan sindical ora a drenta Parlamento a uza argumento cu nan kier a haya contesta ariba un otro carta fecha dia 8 di april 2008, cu ni a drenta Parlamento. Despues cu lidernan sindical a invadi Parlamento nan a fax un carta fecha dia 9 di april 2008 pa pidi contesta ariba e carta di 8 di april cu te na e momento ey no a drenta Parlamento. Tecnicamente mira a drenta buscando contesta ariba pregunta cu no a ser haci na Parlamento. Ta e ora ey sindicatonan a entrega e carta di dia 8 di april.
Lamentabel ta cu activistanan bou di cual cuerpo policial a traha y/of tolera pamfleta cu foto Presidente di Parlamento, exponiendo esaki pafor di Parlamento indicando cu cu nan kier Presidente bibo of morto. Esaki ta contra di balor y norma existente den nos comunidad y segun Presidente ta parse of ta indica un menasa contra di su persona?
E hecho cu Presidente no a presenta mesora no tin di haber cu loke cierto miembronan di prensa na un forma eroneo kier a malinforma pueblo.
Con por a spera cu Presidente por bin papia cu lidernan sindical cu sin respet pa regla di Parlamento y cu participacion di cierto miembro di cuerpo policial, cu ta suppose di mantene ordon, a invadi, ocupa Parlamento y hasta haci actonan cu ta indica menasa contra di su persona.
Den prensa por a tende gritonan cu demostrantenan por haci kico nan kier den Parlamento pasobra esaki ta cas di pueblo. Esaki ta un falta di respet pa nos pueblo. Presidente ke bisa aki con un grupo di 100 hende cu ta un percentahe chikito di e total di nos poblacion di 110.000 persona por pensa esaki?
Ademas ta falta respet tambe pa nos pueblo dor di pensa cu ta pasobra Parlamento ta cas di pueblo e lo no tin reglanan y proceduranan mescos cu tur cas.
Apesar di tur esaki Presidente di Parlamento a keda professional y a soro conhuntamente cu Grifiernan pa e personal di Parlamento por a atende e demostrantenan debidamente.
E hecho cu por a nota na televison cu activistanan tabata toca y balia den sala di Parlamento no ta malo pa imagen di Parlamento riba su mes, sino pa cada un di e personanan aki y e ehempel cu nan lo duna pa nan futuro generacion.
E politiconan Mike E., Monica K. y Rudy L. cu a uza demostrantenan pa nan metanan individual a hala un banda manera yo no fui y laga tur responsabilidad ariba e demostrantenan pa nan comportacion.
Presidente di Parlamento kier bisa aki cu tur hende ta bonbini den Parlamento, pero si segun reglanan cu ta conta mescos cu na bo propio cas.
Natural ora cu fiesta a caba mester a pidi e lidernan sindical pa nan demostrantenan sali for di Parlamento. Pueblo mester por compronde cu den un situacion caminda bo tin welgistanan cu a indica cierto menasa hasta di morto contra Presidente e mester a busca un persona manera sr. Mos y Korpschef di Cuerpo policial pa ta presente.
Presidente di Parlamento cu tin respet pa lucha di trahador, aunke ela ser uza na un forma politico, a keda professional un biaha mas y pa medio di un carta a invita sindicatonan pa un seniorenconvent cu lidernan di Fraccion. Promer cu esaki ela reuni cu e lidernan di fraccion pa entre otro mustra nan ariba na irresponsabilidad den e caso aki.
Tin cu bisa cu den e situacion aki Parlamento ta e poder legislativo y di control y gobierno esun ejecutivo. Gobierno como organo ejecutivo tin e responsabilidad pa conhuntamente cu e lidernan sindical yega na un solucion razonable y responsible.Lidernan di fraccion ta spera cu e deliberacionnan entre gobierno y sindicatonan lo continua pa asina por sali pronto for di e impasse aki.

WILLEMSTAD – Inspekshon di Salú no a risibí ningun keho di famianan di un dama ku resientemente a muri den Hòspital. E morto di e dama a kousa basta intrankilidat den komunidat, ora un karta a kuminsá sirkulá riba Internèt, indikando ku e dama a drenta Hòspital ku doló di kabes, pa finalmente e muri dor di ‘vocht’ den su pulmonnan.
LA PRENSA a kombersá awe mainta ku hefe di Inspekshon di Salú dr. Theo Braeken i el a deklará, ku te na e momentunan akí e no a risibí ningun keho di e famianan. “Mi ta kere ku nan ta atendiendo ku nan tristesa, i ku despues ku nan ta mas trankil, nan lo tuma kualke paso si esaki ta nesesario. Nos ta warda trankil riba nan desishon.” Mas aleu Braeken a splika, ku semper nan ta warda pa famianan mes tuma e inisiativa pa entregá un keho. “Si akaso tempu pasa i niun hende no entregá un keho, nos mes ta kuminsá ku un investigashon. Pero mester ta un kaso ku ta indiká mes ora ku algu a bai robes. Hopi bia hende sa drenta hòspital hopi malu i ta muri mes ora. Den e kasonan ei nos no ta hasi investigashon. Pero si tin indikashon ku algu no ta kuadra, nos mes ta inisiá ku un investigashon.”
Anteriormente fuentenan ligá ku Hòspital a deklará na LA PRENSA, ku Hòspital ta skohe semper pa respetá privasidat di su pashèntnan i nunka ta sali den prensa ku un reakshon.
E direktor médiko di hospital drs. Douglas Pinedo, den e programa Perspektiva djabièrnè último na Z-86, no a drenta den detaye riba e kaso aki, kumpliendo ku e punto di bista estrikto ku no ta papia riba kasonan individual den públiko. “SEHOS ta respetá privasidat di e pashènt”, asina dr. Pinedo a bisa.

WILLEMSTAD/ ORANJESTAD – E dos prostitutanan ku a muri resientemente tras di otro na St. Eustatius, a muri di kousanan natural. Den promé instante tabatin sospecho, ku tin algu ku no ta normal den e kasonan akí. Sin embargo a resultá ku no ta trata di krímen.
E dos prostitutanan a muri den e mesun siman, entretantu dos siman pasá. E promé dama a muri di un komplikashon selebral. Tin indikashon ku ta trata di un ‘hersenvliesontsteking’. E di dos dama a muri di problemanan ku su kurason. Konosínan di e dama a deklará, ku nan tabata na altura ku e dama a bai traha na St. Eustatius pa e sera sèn pa hasi un operashon di ‘by pass’. Sin embargo manera el a yega e isla el a fayesé.
Polis a kuminsá un investigashon, pero no a haña ningun indikashon ku lo tabata trata di un krímen. Konsekuentemente a hasi outopsia pa saka afó e kousa di e morto di e damanan. Tabatin un preokupashon ku lo por tabatin un maniak ku ta mata e prostitutanan. A asta pensa ku e lo tabata pone venenu den nan bebida pa asina asesiná nan. Afortunadamente esaki no a resultá di ta e kaso.

WILLEMSTAD – Un grupo di bombero mal kontentu a bai Bestuurscollege awe mainta pa entregá Gezaghèber un karta. Loke nan a eksigí ta, pa inkorporá un kompensashon den nan penshun. Ta trata di e asina yamá ‘meeruren toelage’.
E kompensashon MUT akí ta un kompensashon ku bomberonan ta haña pa motibu ku nan ta traha mas ku 8 ora pa dia i konsekuentemente mas ku 40 ora pa siman. E kompensashon ta sòru ku tur luna nan salario ta mas haltu ku e salario a base di ku nan lo haña nan penshun finalmente. LA PRENSA a komprondé ku ta basta tempu kaba e bomberonan a pidi pa atendé ku e asuntu akí.
E bomberonan ku a akshoná awe mainta parse ta bomberonan ku tabata liber. Nan a hiba un karta pa Gezaghèber na Bestuurscollege i despues nan a bai na e ofisina di ABVO na Brievengat kaminda nan a papia ku nan representantenan.

MONTEVIDEO, Uruguay, - “Biba bandera di Uruguay!”, Minister di Krio di Bestia, Ernesto Agazzi, ayera a grita dilanti 23.000 persona, minütnan despues ku a haña sa ku Uruguay a logra rèkòrt Guinness di karni hasá mas grandi di mundu.
Representante di Guinness, e britániko Danny Girton, a anunsiá e veredikto na Rural del Prado, kaminda ta’tin 1.254 hasadó i 1.500 meter di paría, realisá ku 13.000 tòn di heru.
E hit aki a superá e marka optené pa Mexico na 2006, ku e tempu ei a kushiná 8.000 kilo di karni den 1.290 meter di paría.
“Nos ta konsumidó di karni i produktor”, Juan Ramos a bisa, kende ta un di e 20.000 personanan ku a presensiá e evento i a purba e karni hasá uruguayo.
Sin embargo, no tur uruguayo ta kompartí alegria di esnan presente ayera n’e evento.
E organisashon no gubernamental di defensa di animalnan “Anima Naturalis” a realisá un protesta na entrada di e evento.
“Outoridatnan no ta tene kuenta ku nan ta promoviendo algu ku ta trese konsekuensianan grave pa salú!” El a sita estudionan ku a demostrá ku vegetarianonan tin ménos riesgo di muri pa motibu di enfermedatnan di kurason i kanser.
Na Uruguay tin kuater baka pa habitante i kada persona ta konsumí 53 kilo di karni pa aña, sifra solamente superá pa Argentina ku 67 kilo.
Vürwèrk tabata bai laira for di esenario kaminda Minister Agazzi tabata, tambe Presidente di “Instituto Nacional de Carne”, Alfredo Fratti, Danny Girton, i organisadónan di e evento Mariano López, Jorge Piñeyrúa, i Karina Vignola.

ORANJESTAD – Apénas Aruba a rekuperá di e shòk di un hòmber ku a mata su mama, tata i ruman, outoridatnan a haña un otro kaso mas pa investigá. A deskubrí un kaso kaminda aparentemente nan a hiba un ser humano den un kas na Fontein (den e área di pista di Palu Margo) i a sende e restunan mortal na kandela. No por a saka afó mesora si ta trata di un hende hòmber òf un hende muhé. E kaso ta den investigashon. Nos tin mas detaye di e kaso aki den e sekshon di Aruba di nos edishon di awe.

Skina di Sorti, awe djaluna 14 di aprel di 2008, ta kuminsá ku deseá un i tur un bon dia. Den asuntu di maneho, sigur ora ku bo ta den e fase di formulá alternativa, bo tin di evitá di kai den un dje trampanan mas grandi den proyektamentu di bo senarionan. Un di e fayonan tradishonal den seno di nos gobernashon ta e lokual nos ta yama “thinking things through” (profundidat den proyekshon di un proseso). E tendensia tei pa stòp na e promé kontratempu òf opta asina ku topa e promé benefisio. Nos ta midi nos mes un nanishi chikitu i nos no ta wak mas leu ku e nanishi ei.
****
E insistensia di Bestuurscollege den redukshon di impuesto pa kontrarestá oumento global den kosto di energia i komestibel, tantu polítikamente komo “bestuurlijk” no por ta otro ku “blindstaren” riba benefisio polítiko riba término korto. Ta kere di tene elektorado trankil i tal bes ta spera ku desaroyonan global lo kambia pa bon.
****
Un dje paradigmanan di maneho ta ku bo ta plania pa atendé ku e senario mas malu i ta spera pa lo mehor. Aparentemente nos gobernashon ta sigui ku su propio filosofia (erátiko) di tuma desishon basá riba lo mehor (speransa) i ta adoptá e ideologia dje abestrus pa e realidat (hinka kabes den santu pa no mira).
****
Laga mi mustra ta dikon e pretenshon di Bestuurscollege “bestuurlijk” ta karesé di sentido i te hasta ta iresponsabel. Si e desaroyo den kosto global ta unu di mas oumento (direkshon) i e dinámika por ta di kresementu aselerá i e dimenshon grandi (materia prima, finansa, logístika), e sorto di medida ku bo ta tuma ta esnan ku bo por ripití. Pues bo no ta reseta un remedi ku bo no por ripití ora e malesa ta unu ku ta produsí e mesun síntomanan. Bo tin di wak den direkshon di algu ku bo por keda ripití.

Segun eks minister Leo Chance na selebrashon di 70 aña Parlamentu 

PHILISBURG – Hopi tabata e krítika i reklamo i asta baimentu di vários invitadonan pa motibu di tardansa di kasi un ora na inisio di e selebrashon di 70 aña Parlamentu na St. Maarten. Un evento ku mester tabata un selebrashon históriko tabata kompañá pa hopi kara rabiá.
Na e okashon aki e eks polítiko, eks minister i eks parlamentario, Leo Chance a hiba palabra. Chance a duna un lès di historia na parlamentarionan i tambe lidernan presente.
El a yama nan presente afó pa laga Gobièrnu di Ulanda para tras di nan palabra na Nashonnan Uní ku e islanan di Antia, ya kaba tin nan derechi di outo determinashon.
Leo Chance ku tabata e orador prinsipal durante e seremonianan di 70 aña, a bisa ku si e islanan tabatin e derechi di outo determinashon, nan por a pone bon kla ku 15 di desèmber lo mester keda mantené sin nada di bisa òf interferensha di parti di Ulanda.
Su ponensianan fuerte a wòrdu risibí ku aplouso pa esnan presente, ya ku tur hende ta na altura di e plannan di Ulanda pa bai bèk riba palabrashon di e fecha fihá di 15 desèmber 2008, usando e kriteria ku algun punto no ta kedando kla, pues e islanan lo no ta kla pa e status konstitushonal nobo.

WILLEMSTAD – Segun informashon ku ta sirkulá na St. Maarten, negosiashonnan pa un Banko Sentral pa St. Maarten i Kòrsou ta mal pegá. E miembro di Konseho Insular na St. Maarten pa National Alliance, Frans Richardson ta sumamente mal kontentu, ku e manera ku e proseso di kambio konstitushonal ta kanando na e isla aki.
Tabata durante un reunion di Konseho Insular di St. Maarten, ku Richardson a bisa, ku e ta haña sumamente straño ku no a bisa nada mas tokante establesé un Banko Sentral konhunto.
“Nos a komprondé, ku siman pasá tabatin diskushon ku a tuma lugá relashoná ku e tópiko di un Banko Sentral i a yega na un akuerdo i a atmití ku esaki lo no bai funshoná, pasobra Kòrsou lo no ta di akuerdo ku algun punto. Kiko e status ta porfin, un Banko Sentral konhunto òf di nos mes?,” asina Richardson a puntra.

WASHINGTON / NEW YORK, - Papa Benedicto XVI ta inisiá mañan su promé bishita na Merka. Su agènda ta inkluí Washington i New York.
E Pontífise lo hiba mensahe di pas durante un bishita di seis dia, ku ta kuminsá mañan, pero e resiente akusashonnan di Osama bin Laden kontra e lider katóliko a pone funshonarionan di seguridat den alèrta.
Outoridatnan di Inteligensia di Merka i funshonarionan di Iglesia a bisa ku no tin menasanan kreibel i spesífiko pendiente riba e promé bishita papal fo’i dia di atakenan di 11 di sèptèmber 2001.
Pero nan ta konsiente ku e lider di Al Qaida na mart último a akusá Benedicto XVI di ta forma parti di “un krusada nobo” kontra musulmannan, loke a kousa preokupashonnan pa posibel atakenan.
E seguridat den bishita papal na Washington i New York ta mas intenso ku e biahenan previo papal, funshonarionan a bisa.
Otro militantenan islámiko anteriormente a menasá Benedicto XVI pa su sita na 2006 di un teksto medieval ku ta kondená profeta Mahoma i e forma ku ta propagá Islam.
“Nos tin ku tuma loke lidernan di Al Qaida ta bisa ku seriedat. No ta solamente retórika”, Charles Allen a bisa, kende ta supsekretario di Seguridat Nashonal di Inteligensia i Análisis di Merka.
E agensia a ninga spesifiká e medidanan di seguridat.
Komisario di Polis di New York, Raymond Kelly, a manifestá ku lo inkluí míles di polis den kayanan, sambuyadónan na East River, detektor di radiashon i restrikshonnan di buelo.

PENSILVANIA, Merka, - Aspirante demókrata pa Kas Blanku, Barack Obama, kende a keda kritiká pa su resiente komentario tokante estado di ánimo di e votantenan di klase trahadó merikano, a kontestá su rival Hillary Clinton i kandidato republikano John McCain.
Durante aktonan di kampaña ayera, na estado di Pensilvania, Obama a bisa ku Clinton i McCain ta deskonektá si nan no ta pensa ku e elektorado ta sinti su mes frustrá pa estado di ekonomia di e pais.
Den reunion privá ku a okurí e luna aki na San Francisco, Obama a bisa ku pèrdida di empleo i otro preokupashonnan ekonómiko a pone hopi votante den estado di frustrashon i amargura, i malkontentu ku partidonan polítiko prinsipal di e status.
Clinton i McCain a denunsiá komentarionan di Obama i a akus’é di elitista.

WILLEMSTAD – Durante henter aña 2008 Fun Miles ta selebrá su di dos lustro poniendo tur sorto di kosnan ‘fun’ ainda mas serka na alkanse di e mas di 90.000 personanan doño di un karchi Fun Miles rònt Antia Hulandes i Aruba.
Despues ku na luna di febrüari Fun Miles a kulminá su eksitoso kampaña ‘Swipe, Scratch & Win’ ku broche di oro sakando un mionario nobo tantu na Kòrsou komo Boneiru, Fun Miles a sigui ku ofertanan pa algun konsierto memorabel.
Drentando e di dos kuartal di 2008 Fun Miles ta lansá su logo, jingle i komersial pa televishon nobo pa ilustrá e aña di hubileo i pa kompartí e ambiente festivo ku e komunidat di Kòrsou en general i tur e spardónan di Fun Miles en partikular.
Segun e aña ta transkurí lo sigui hopi promoshon, aktividat i ofertanan atraktivo. Wak avisonan den korant, skucha radio i mira televishon pa keda al tantu di e tantísimo kosnan ‘fun’ ku Fun Miles ta bai pone na bo alkanse.
Fun Miles di bèrdat a presentá ku ofertanan tambe den konsiertonan pa asina duna posibilidat pa hopi di e doñonan di tarheta por disfrutá. Ademas e konsepto aki ta sigui amplia i ta duna muchu mas na tur esnan ku tin un Fun Miles. E logo nobo aki lo bai ta visibel rònt Kòrsou i ku ta anunsiá e selebrashon grandioso di 10 aniversario di Fun Miles.

Kasinonan di Holiday Beach i Kura Hulanda ta e dosnan ku ta kumpli:

WILLEMSTAD – Kasinonan di Kura Hulanda i Holiday Beach lo por skapa di e akshonnan ku lo bai tuma lugá pa falta di kumplimentu di reglamento stipulá pa Gaming Control Board. Tabata siman pasá den un komunikado di Gaming Control Board (GCB) ku a mustra riba e falta di kumplimentu di doñonan di kasino pa haña nan lisensia nobo. Ya e lisensia ku a keda otorgá den pasado tabata pa 6 luna ku entre tantu ya e tempu a pasa.
Den e komunikado di prensa vários punto a bin dilanti i ku e dosnan ku sigur a pisa ta e echo ku mester por kumpli ku programa pa kombatí labamentu di plaka i tambe seguridat kontra terorismo. Esaki ta algun di e puntonan ku a bin dilanti i ku e kasino di Kura Hulanda i Holiday Beach Hotel ta e úniko dos kasinonan ku por mustra ku nan ta kumpli ku e lista di kondishon implementá pa GCB.
Den kòmbersashon ku Reynold Nivillac di GCB a afirmá ku tur kasino a haña nan tempu pa kumpli ku e reglamentu, di manera ku nan por haña nan lisensia di operashon. E dos kasinonan ariba menshoná ya a risibí nan lisensia pa tres aña. Despues ku aña pasá a manda un karta pa kada gerensia di kasino, a duna oportunidat na yanüari/febrüari pa bolbe manda un karta pa mira si por logra un moveshon bou di kasino.
Nivillac ta indiká ku parse ku e kasinonan no ta kumpliendo ku tur e reglamentunan stipulá. Inkluso e doñonan nobo di e kasino di Holiday Beach a pone énfasis pa nan kumplimentu na e leinan establesé pa operashon di kasinonan. Nivillac ta lamentá ku e asuntu aki tin 9 aña kaba andando i ku sigur ku bai tuma akshon huntu ku Ministerio Públiko lo tin gritunan. No ta kuestion ku lo tene kuenta ku trahadónan, pero e doñonan di kasino tambe mester kumpli ku kondishonnan. Seis luna ta sufisiente pa e doñonan di kasino por atendé e asuntu di lisensia aki debidamente.

WILLEMSTAD – E robo di mas grandi ku Sentro di Bario Brievengat a konosé ta e último den kua a bai ku tur e kòmpiuternan. Pa algun luna kaba Sentro di Bario Brievengat tin un sentro di kòmpiuter, pa asina e muchanan di e bario traha riba kòmpiuter. Esaki ta otro fórmula ku ta usa pa tene e muchanan for di kaya.
E sentro di formashon aki a bin ta risibí muchanan di diferente edat, pa asina traha riba kòmpiuter i konstantemente e lèsnan tabata yen. Tabata mas o ménos siman pasá ku ladronnan a kibra drenta pa bai ku tur e kòmpiuternan aki lagando e sala di kòmpiuter kompletamente bashí. Esaki naturalmente ta perhudikando e muchanan den e área aki.
Den kombersashon ku miembro di e sentro aki, Ibi Schoop ta splika ku hasiendo denunsia, outoridatnan tampoko no tin kontesta riba e robo aki. Ta sperando ku lo tin solushon di e kaso aki, ya ku e muchanan mester por sigui den e desaroyo aki. Schoop ta manifestá, ku e robo aki ta unu ku ainda nan mes no por komprondé, ya ku e forma ku e ladronnan a kibra ta nifiká, ku nan a tuma nan tempu pa hasi esaki.
Segun Schoop ta konta, ku a kibra e hèkwèrk i e porta duru di heru pa por a penetrá den e sala di kòmpiuter. Anteriormente pa motibu di e robo ku a yega di tuma lugá, a bin pa fortifiká e sentro di bario, pero no por sigui hasi invershonnan grandi asina mas. Despues ku gobièrnu a mustra ku no por kumpli ku pago di beheerder, esaki ta un di e forma ku ladronnan ta haña mas chèns pa operá.

WILLEMSTAD – Mas di 350 hóben a bini huntu pa debatí ku diputado Zita Leito riba futuro di nan pais. E asistensia a surpasá tur espektativa, pero mas ainda ku e preguntanan ku a bin dilanti pa e diputado Leito kontestá.
Manera ta konosí, ku djasabra último tabatin e promé enkuentro pa hubentut na iglesia Ministerio Bida Abundante den Colon. I a prepará pa risibí 400 hóben i di kua mas ku 350 hóben a akudí. Tabata un enkuentro spiritual, den kua tabatin dos agrupashon gospel di hubentut Unity i Fuego, miéntras ku e diputado tabata presente pa splika riba futuro estatal.
Den su presentashon diputado Zita Leito a duna informashon riba e motibu pa skohe komo pais outónomo den Reino, meskos tambe e desaroyo ku tin aktualmente di e negosiashonnan. Diferente pregunta a bin dilanti i ku tambe riba e forma di gobernashon i loke gobernante tin derechi riba dje. Ademas preguntanan pa e forma di enseñansa a bin dilanti, ya ku hóbennan ta sinti nan mes insigur pa e sistema di enseñansa ku tin pa ofresé nan. E grupo di hóbennan a pone énfasis pa mas klaridat riba e rumbo i kiko enseñansa tin pa ofresé nan den e Kòrsou nobo.
Diputado Zita Leito naturalmente a bai basta leu, pero a vosiferá pa un próksimo enkuentro den kua su otro koleganan tambe lo bai ta presente pa kontestá riba inkietut di e hóbennan. E grupo di mas di 350 hóben tabata for di áreanan di Kurá Piedra, Ser’i Papaya (Seri Fortuna), Banda Abou, Otrobanda, Jandoret, Roi Santu i otro barionan di Kòrsou.

WILLEMSTAD - Djasabra 12 di aprel, Komité Olímpiko di Antia (NAOC) a yama un reunion ku e 6 federashonnan di deporte, ku ta riba e programa di Weganan di Reino 2009.
E evento aki lo tuma lugá na Aruba, den e periodo 25-31 di yüli 2009.
E reunion a tuma lugá den e oranan di mainta na e edifisio TDC di partner Olímpiko UTS na Jan Noorduynweg.
E seis (6) deportenan selektá tur tabata representá dor di 1 te hasta 3 representante. E deportenan ku a wòrdu anunsiá for di yanüari ta Futbòl, Beisbòl, Sòftbòl, Natashon (speed i sinkronisá), Taekwondo i Atletismo.
Di parti di NAOC tabata presente sra. Kathleen Anthony i Remco Tevreden.
Tevreden a duna un presentashon di Powerpoint, kaminda el a remarká ku tur edishonnan di Weganan di Reino ku el a eksperensiá, ni un biaha Antia a alkansá di kue puesto number 1 overall.
Mester rekonosé ku Antia tin sufisiente talento, pues e motibu di e hecho lamentabel aki tin ku wòrdu buská den otro área.
Aña pasá, kaminda NAOC tambe tabata enkargá ku tantu e preparashon komo e partisipashon di tur e atletanan, ya kaba NAOC a disidí di apliká un otro fórmula.
Fuera di hinka fondonan di NAOC su spònser nashonal i internashonal, NAOC tambe mes a hasi tèstnan di kondishon.
Esaki ta konosí aktualmente komo e famoso tèst di beep (shuttle run test).
Tevreden a duna un splikashon amplio kon e struktura di e Weganan di Reino ta hinka den otro for di 1995. Al kontrali na otro eventonan olímpiko, e evento Weganan di Reino ta un evento inisiá dor di polítikonan.