Blackout0Prome resultado di acuerdo entre 

ORANJESTAD- Na 2005 e companianan di awa AQUALECTRA di Curaçao, W.E.B. Aruba N.V., WEB Bonaire N.V. y G.E.B.E. N.V. di St. Maarten a lanta e Plataforma di Awa Antia y Aruba of WNAA. Meta di e plataforma ta pa reforsa e lasonan y coperacion entre nan. E WNAA ta wordo dirigi pa un grupo piloto consistiendo di e directornan di e companianan di awa. Acopla na WNAA tin un cantidad di grupo di trabou bou cual tin: Seguridad, calidad di Awa, distribucion di Awa, Training, Comunicacion y Tecnologia di produccion di Awa.
Den cuadro di e importancia mas y mas creciente di e disponibilidad di suficiente awa di bebe puro den Mundo, e WNAA a disidi pa crea un “Caribbean Water Technology Research Institute” of CWTRI. E meta ta, mirando e experiencia di mas cu ochenta aña cu desalinacion di awa di lama pa produci awa di bebe na Antia, pa haci di e CWTRI un centro di conosimento di alta calidad pa e area di Caribe y resto di Mundo. Den e centro aki lo haci investigacion na nivel academico halto riba e tereno di produccion, distribucion y calidad di awa di bebe.
COOPERACION
Dia 14 di november 2007 den cuadro di e CWTRI, a firma un acuerdo di coperacion na Delft cu e “Technische Universiteit van Delft” (TU Delft), e “Vereniging van de waterbedrijven in Nederland” –VEWIN y e Universidad di Antia (UNA).
Na januari 2008 na Suriname e mesun acuerdo di coperacion aki a keda firma cu “N.V. Surinaamsche Waterleiding Maatschappij” (SWM). Ta e intencion cu den futuro sercano e Universidad Anton de Kom di Paramaribo tambe lo participa den e acuerdo aki.

ORANJESTAD– April 10, 2008: Durante temporada di campamento a aserca e compania Ecotech pa por yuda cu baki pa por hasi e beach limpi.
Tanto e Polis di Bario Sr. Juancho Peterson hunto cu San Nicolaas Business Association a haci e peticion pa por haci e area limpi. Manera semper, siendo un bon ciudadano corporativo di nos comunidad, Ecotech simper ta asumi su responsabilidad den tipo di situacionnan asina.
Mirando e tamaño di e beach y e cantidad di sushi cu tabatin eynan a dicidi di yuda cu dos baki di 20 yarda cada un. Hecho ta cu no ta solamente e beachnan tabata sushi pasobra tras di e mangelnan a bin descubri un cantidad di sushedad acomula.
Dor di pone e dos bakinan disponibel, e Barrio Regisseur Juancho Peterson por a logra su meta parcialmente, esta di hasi e area di Zwarte Mangel limpi, cual ta un beach masha bunita mes.
Ecotech ta yuda y ta coopera pa Aruba por tin un medio ambiente mas limpi y duradero pero ta keda na cada un di e ciudadanonan cu ta hasi uso di e beachnan pa mantene nan limpi. E bakinan aki a wordo yena den un tempo record y a tuma dos trip pa por a deshasi di mayoria di e desperdicio cu a keda recoge.

ORANJESTAD - Manera nos sa kaba e aña Obispado di Willemstad lo selebrá su hubileo di oro. E selebrashon a kuminsá kaba aña pasá ku di Fiesta di Kristu Rei dia 25 di Novèmber 2007 i lo terminá dia 23 di novèmber 2008 tambe na Fiesta di Kristu Rei.
Un di e partinan mas importante di e selebrashon di e hubileo di oro aki ta e Misa Solèm djaluna 28 di april 2008 i asina konmemorando ku 50 aña pasá esta 28 di april 1958 Papa a halsa "Vicariato Apostolico di Curacao" na e status di Obispado, ku mgr. Holterman komo promé obispu, siguí pa mgr. Ellis i awor mgr. Secco
E Santu Sakrifisio di Misa lo kuminsá pa mitar di shete di anochi kaminda lo tin vários obispu di diferente pais presente.
Kardinal Simonis di Hulanda i mgr. Kasteel lo honra nos ku nan bishita, meskos ku obispunan representantenan di Konferensia Episkopal Latino Amerikano (CELAM) i di Konferensia di Episkopal Karibense.
Un invitashon ta bai na tur nos fielnan katóliko pa asistí masalmente n’e selebrashon aki djaluna 28 di april na Stadion Ergilio Hato na Brievengat. Nos ta warda boso tur i un boka bisa otro.
Pa Aruba Contact persoon pa comishon di hospedahe na Curaçao ta Alex Geerman
Tel. 5851423 despues di 4:00 pm. Of Cel. 5656555 –email : palomapictures@setarnet.aw lo tin algun rumannan den Cristo na Curaçao cu por acomoda hende interesa den nan kas

ORANJESTAD- Sindicato di maestronan di scol, SIMAR a emiti un comunicado di prensa ayera tardi, pa mantenE nan miembronan informa di ultimo desaroyonan, incluso e abuso di ayera tardi, ora cu for di oficina di Gobierno, un hende a tira un donderboos riba e manifestantenan.
“Cuater siman di speranza, pero tambe di angustia; di perseverancia y di inseguridad.
Trahadornan a pasa den expresionnan di solidarismo, di confrontacion, di compañarismo, di amistad y comprension pa otro, podiser trahadornan cu nan no tin contacto cu nan riba un base diario. Hopi ta cana rond cu sintimentonan di duda : ki dia e cos aki ta caba?
Trahadornan di Aruba tabata e blanco di intimidacion, di insulto, di engaño. Dialuna atardi trahadornan hasta a wordo bombardea cu donderboos, o algo pio, cu a wordo tira for di e oficina di bestuurskantoor. Danki Dios e señora a lanta for di e stul, pasobra esaki a keda na werki. Ta na unda nos ta bai ??? Ta asina grandi nan desesperacion ta ?
Ta tristo pa constata cu hasta ministernan a baha na e nivel aki, poniendo un banda e importancia di nan funcion y nan propio integridad.
Den e dianan aki Aruba ta pasando den un desaroyo grandi, pasobra hopi di nos a biba kico kier men valor y normanan, decencia, dignidad, respet propio y pa otro. Nos a biba e falta di sentido democratico di parti di gobernante y parlamentarionan. Pero tambe nos a worde confronta cu nos mes: kico ami mes ta para p’e? Mi ta dispuesto pa para hunto cu mi coleganan pa bringa pa logra un futuro mas sigur? Of mi ta scohe pa mi mes na prome lugar?

WILLEMSTAD – Djadumingu anochi den Hotel Marriott den su sala Queen’s Room tabatin elekshon di Deportista i Wes di Aña dor di Curaçao Sport Federatie, CSF.
Tabatin nuebe kategoria pa e elekshon di 2008.
CSF e aña aki a honra dos persona pa nan trabou di hopi aña den deporte.
Señora Monique Maria i señor Apolonio “Lilin” Hersilia, tabata e dos personanan ku a keda honrá.
Un biaha mas Frank Rosina ku Murielle Meyer a sirbi komo maestronan di seremonia i manera ta un kustumber a hasi un gran trabou.
Tabatin aktuashon di Kombinashon Moderno.
Diputado di Deporte, Enseñansa i Kultura, sra. Marilyn Alcalá-Wallé huntu ku srta. Vlijt a hasi entrega di medaya na e deportistanan ku a destaká pa nan federashon.
E ganadónan di nan disiplina tabata lo siguiente:
Deportista Hubenil Femenino:
Karlène Theodora (Natashon).
Deportista Hubenil Maskulino:
Gregory Marchena (Natashon).
Deportista Senir Femenino:
Suliviendra Hooi (Sòftbòl)
Deportista Senior Maskulino:
Hycinth Cijntje (Natashon)
Dirigente Atministrativo:
Stanley Coffy (Futbòl)
Dirigente Tékniko:
Gersley Gijsbertha (Futbòl)
Wes di Aña:
Gladwin De Lanoi (Natashon)
Nobato di Aña:
Kwamedi Valks (Triathlon)
Ekipo di Aña:
Sta. Maria Pirates (Beisbòl)
E premio grandi ku ta Kopa Betto Adriana a bai pa Gregory Marchena di Natashon, loke a pone ku e federashon di Natashon ku a manda mas kandidato a bai ku kasi tur premio tambe e premio grandi.

MOSKU / ROMA, - Ku okashon di kumpleaño di Benedicto XVI, un kanal públiko ruso pa promé bia lo transmití na televishon un dokumental di e Pontífise.
E momentu kulminante di e dokumental ta diskurso di e Tata Santu, durante kua pa promé bia den historia, e Obispu di Roma ta dirigí na pueblo ruso pa ekspresá su apresio.
E mensahe, pronunsiá parsialmente na ruso, ta dirigí na Su Beatitut Alejo II, patriarka di Mosku, kristiannan òrtodòks, obispunan i kreyentenan katóliko, i tur habitante di Rusia.
Den e diskurso, Benedicto XVI ta suprayá prinsipalmente e nesesidat di diálogo entre kristiannan.
E dokumental, impulsá pa asosiashon katóliko internashonal “Yudansa pa Iglesia Nesesitá” i emití pa Vesti, un kanal estatal di notisia, ta presentá momentunan importante di bida i obra di Joseph Ratzinger, Benedicto XVI, di kende su biografia ainda ta hopi poko konosí entre e rusonan.
Riba e video tambe ta intervení ruman hòmber di Papa Benedicto, monseñor Georg Ratzinger.
E echo ku e Tata Santu ta dirigí su mes personalmente na pueblo ruso, ta motibu di gran alegria i un akontesimentu históriko.
Tambe, ta destaká e bunita gesto ku ta suponé ku e dokumental ta transmití riba e mesun dia di kumpleaño di Benedicto.
Parse, ku e dialogo entre Iglesianan Katóliko i òrtodòks ruso ta avansando.

WASHINGTON, Merka, - For di awe 15 di aprel, e kadenanan i “site” di Internet CNN.com lo reportá tokante reunionnan i aparishonnan públiko di e Pontífise durante su bishita na Merka.
Aktualmente tin 67 mion katóliko na Merka i mas ku un bion di katóliko na nivel mundial.
Pa e motibu aki, e kadenanan di CNN ta uni pa ofresé un siman di kobertura spesial di e promé bishita ofisial di Papa Benedicto VXI na Merka, kuminsando awe te djadumingu 20 di aprel.
CNNenEspañol, CNN International i CNN/USA lo reportá bibu direkto riba e seremonianan i eventonan, inkluyendo entre otro e reunion di Papa ku Presidente di Merka George W. Bush mañan for di Kas Blanku, i su diskurso na Nashonnan Uní djabièrnè awó.
E biahe aki na Merka ta representá e di seis bishita na un otro pais ku Papa Benedicto XVI ta realisá for di dia ku su papado a inisiá na 2005, i ta solamente e di dos bishita ku un Papa ta realisá na Kas Blanku.
E bishita, ademas, ta koinsidí ku 81 kumpleaño di e Pontífise mañan djarason 16 di aprel.
E ekipo di periodista di kadenanan CNNenEspañol, CNN/USA i CNN International for di studionan lo bai presentá insidentenan di yegada di Papa awe.
Durante awe i e dianan siguiente, e kadenanan lo konta ku aporte di periodistanan manera Juan Carlos López i Colleen McEdwards, reportando for di kapital merikano di Washington D.C., i Inés Ferré for di New York.

BRUSELAS – Un grupo internashonal di periodista a pidi outoridatnan chines ayera pa stòp ku lokual nan ta konsiderá komo un interferensha di kobertura di notisianan relashoná ku Weganan Olímpiko na Beijing.
E grupo a señalá, ku periodistanan estranhero a wòrdu menasá pa raportá riba e problemanan durante e rekorido di e antorcha olímpiko na vários suidat na mundu i tambe riba e situashon na Tibet.
E Federashon Internashonal di Periodista a inisiá un bishita di kuater dia na China pa presentá nan keho direktamente. E grupo ku sede na Bruselas lo reuní ku funshonarionan di gobièrnu, representantenan di prensa chines i koresponsalnan estranhero.
“Den último simannan e tenshon polítiko relashoná ku Tibet i Weganan Olímpiko a oumentá i e periodistanan a haña nan meimei di e kayente,” asina Aidan White, sekretario general i lider di e mishon di 10 integrante a bisa.
Den un komunikado e organisashon a señalá, ku algun periodista estranhero a sinti nan mes menasá pa e disgustu di funshonarionan chines riba e kobertura den medionan relashoná ku e disturbionan na Tibet i e rekorido di e antorcha olímpiko.
“Nos ophetivo ta, di laga China kumpli ku e promesanan di pone un fin na e represhon di periodistanan den e pais ei i habri kaminda pa un kobertura independiente di prensa rondó di e weganan,” asina e teksto di e komunikado a sigui bisa.

TOKIO – Hapon lo no pèrmití ku agentenan di seguridat di China kompañá e antorcha olímpiko ora ku esaki hasi su rekorido den kayanan di Nagano. Esaki ta lokual e hefe di komishon di seguridat públiko di Nipon a duna di konosé.
“Nos no mester violá e prinsipio ku polis hapones mes por mantené seguridat,” asina Shinya Izumi a bisa durante un rueda di prensa. “Nos lo no aseptá ku nan lo kore na Hapon manera nan a hasi na otro paisnan.”
E antorcha ta yega na e suidat hapones Nagano dia 26 di aprel.
Ofisialnan di seguridat chines, bistí na kamisa blou, a kompañá e kargadónan di e antorcha na London i Paris, unda tabatin protestanan kaótiko ku a interumpí e relevo.
E integrantenan di e unidat a wòrdu selekshoná di e unidatnan spesial di polis di China.
Beijing a bisa, ku e mishon di e unidat ta pa protehá e vlam olímpiko.


Riba e foto aki por mira e kuerpo di seguridat chines ku ta kompañá e kargadó di e antorcha olímpiko.

ATLANTIC CITY – Miguel Cotto a gana di Alfonso Gomez pa via di nòkout tékniko den di sinku rònt i asina retené su título ku relativamente fasilidat. E pelea aki a tuma lugá djasabra anochi pa e titulo wèlter di Asosashon Mundial di Bòkseo (AMB).
Awor por bin un pelea ku e kampion nobo di FIB Antonio Margarito.
Cotto tabatin un pelea fásil pa asina mehorá su marka na 32 viktoria, 26 pa via di nòkout, sin ningun derota.
E retadó mèksikano, Gomez a kai pa di tres biaha den e di sinku rònt promé ku rèfri a para e pelea.
Cotto a defendé su título pa di kuater biaha. El a gana esaki na desèmber di 2006 ku un viktoria riba su kompatriota portorikeño, Carlos Quintana.
Cotto a superá Gomez abrumadoramente den e kantidat di gòlpinan konektá, 108 kontra 23. “Semper bo ta yega un pelea ku preokupashon,” asina entrenadó di Cotto a komentá. “Nos tabata sa si, ku nos tabatin un pugil superior. Tabata un berdadero palisa.”
Esaki por ta e divishon mas di bòksdónan mas fuerte. E kampion di Konseho Mundial di Bòkseo ta Floyd Maryweather.
Den e otro pelea pa título den e mesun divishon aki, pero pa Federashon Internashonal di Bòkseo, Margarito a kita e título for di Kermit Cintron. “Nan a primintí mi Cotto, mi ta spera ku nan kumpli awor,” asina Margarito a bisa despues di su pelea. E tin un rèkòrt di 36-5 ku 25 nòkout.

WILLEMSTAD - E Kampionato di Dominó Liga 50+ a kontinuá djabièrnè 11 di aprel na stadion Odulio Willems na Suffisant.
Tabatin e siguiente resultadonan:
Nos bandera ta gana di Alaska 2-1
Real Dominó 2-0 riba Meeting Friends
Los Veteranos pèrtá 1-0 riba Red Dog.
Robba tambe ta pasa riba Dominó Outéntiko 2-1.
Streanan Uní ta dal Divi-Divi 3-2.
Wto Stars tambe ta dal Vesta 2-1.
Un Famia Uní sin problema riba Destroyer 5-0.
E siguiente fecha di e kampionato ta 18 di aprel próksimo.

WILLEMSTAD - Djasabra 12 di aprel den sala di eksibishon di International Trade Center (ITC) e Torneo Internashonal di Esgrima “Coupe Curaçao” a kontinuá ku su siguiente evento den e programa di promoshon di Esgrima. Tabata toka turno awor na esgrimistanan pa bringa riba e armanan di Florete Femenino i Sabel Maskulino.
Florete femenino
Komo ku a presentá solamente tres veterano femenino internashonal organisadónan a disidí di integrá e pul ku dos esgrimista kampion i sup kampion di Kòrsou i di Antia di edat mas hóben, pero sin ku nan lo risibí e premionan destiná pa e veteranonan.
E buèltanan klasifikatorio di Florete Femenino a produsí 4 semi finalista i e siguiente tabla di posishon 1. Ellen O’Leary (USA); 2. Patricia Lutton (USA); 3. Mieke de Graaf-Stoel (HOL); 4. Marivia Tuast (AHO); 5. Chantal Sprock (AHO).
A bringa e partido di eliminashon direkto entre Marivia Tuast (AHO) i Chantal Sprock (AHO) pa determiná ken ta klasifiká pa semi final. Tabata e kampion di Kòrsou i di Antia Marivia Tuast ku a gana e enkuentro ku skor di 10-3.
Den semi final Marivia Tuast mester a enfrentá Ellen O’Leary (USA) ku a mantené su mes na promé lugá riba tabla di posishon dor di gana di Marivia ku skor di 10-5.
E otro partido di semi final a bai entre Mieke de Graaf-Stoel (HOL) i Patricia Lutton di USA. Mieke de Graaf-Stoel e aktual kampion veterano di Ulanda riba Florete Femenino a bai e tempu kompleto di dos biaha 3 minüt pa gana e partido ku skor di 9-4.

WILLEMSTAD – “Eks minister pa Asuntunan Interior di partido VVD Johan Remkes ta haña ku mester konsiderá seriamente pa Kòrsou i St. Maarten bandoná e idea pa bira un pais outónomo den Reino i drenta un mankomunidat ku Ulanda. Esei lo tin bentaha pa e islanan mes”, asina Remkes a bisa den un reakshon riba desaroyo di último simannan.
Remkes a bisa, ku a yega momentu pa evaluá e status aktual di Kòrsou i St. Maarten. “Ta bon pa kuminsá pensa riba alternativa”, asina el a bisa.
Tantu Kòrsou komo St. Maarten ta trahando awor aki pa bira un pais outónomo den Reino. “Te ainda” – di akuerdo ku diputado Zita Jesus-Leito – “e fecha pa logra esei ta keda 15 di desèmber 2008”.
Pero tin bastante difikultat den e kantidat di trabou ku ainda mester tuma lugá i konsekuentemente e fecha aki ta na duda. Ta papiando awor aki asta di 2010.
“Si e proseso no tin sufisiente progreso, si tin problema den e trayekto aki, anto Ulanda mester asumí su responsabilidat. Si ta nesesario, mi ta haña asta ku e mester intervení. Anto mester pensa kiko ta bai hasi,” Remkes a bisa.
Siman pasá tabatin e enkuentro entre sekretario di Estado Ank Bijleveld i parlamentu di Ulanda.
“Nos mester a komprondé di e mandatario ulandes, ku kosnan ta tardando. Ainda tin hopi problema pa solushoná. Nos ta skuchando ademas sonidonan ku ta bini tambe for di Antia ku no ta eksaktamente muestra di alegria,” asina Remkes a agregá.

WILLEMSTAD - “15 di desèmber 2008 ta keda para komo fecha riba kua Kòrsou mester haña e status di pais outónomo den Reino. Nos no tabatin niun palabrashon ku Ulanda ku ta kambia e fecha aki. Palabrashon ku nos a hasi ta, ku nos ta warda resultado di e inventarisashon ku e regiegroep ta hasiendo pa weta kuantu trabou mas falta, pa weta kon ta sigui,” asina diputado enkargá ku Struktura Estatal Zita Jesus-Leito a ripití den sala di Konseho Insular ayera tardi, riba pregunta i preokupashon di miembronan di Konseho Insular relashoná ku e tema aki.
Partidonan di oposishon Forsa Kòrsou, Partido Demokrat i tambe Niun Paso Atras a pidi e reunion públiko aki, despues di e último desaroyonan riba tereno estatal.
Sekretario di Estado ulandes pa Relashon den Reino, Ank Bijleveld a informá Tweede Kamer algun siman pasá, ku e no ta weta e fecha 15 di desèmber benidero, akordá anteriormente komo e fecha riba kua e kambionan estatal mester bira un hecho, komo un fecha alkansabel.
Ainda falta demasiado kos, di akuerdo ku e mandatario ulandes.
Partidonan di oposishon a konsiderá ku mester bin klaridat, partikularmente despues ku diputado Zita Jesus-Leito a sali i bisa ku Ulanda no por kambia fecha unilateralmente i ku p’e, no tin kambio. “Kòrsou ta sigui mantené e fecha aki”, el a bisa.
Den reunion di Konseho Insular ayera, el a ripití e posishon aki.
Jesus-Leito a bisa, ku loke el a konstatá ku a kore manera un liña kòrá den e reunion di ayera, ta e alegashon di partidonan di oposishon, ku ta Ulanda ta disidí pa Antia i pa Kòrsou i ku tur loke Kòrsou ta hasi ta guli manda abou.

WILLEMSTAD - Hyatt Regency Hotel, e hotèl grandi di 350 kamber ku ta den konstrukshon na Sta. Barbara na e momentu aki, ta konfrontando un problema serio: e no por haña sufisiente hende kapasitá pa traha den e hotèl.
Esaki, di akuerdo ku un publikashon ku a sali den e edishon di awe di e korant ulandes De Telegraaf.
Hyatt Regency ta un dje kadenanan grandi ku ta den konstrukshon awor aki. Manera ta konosí, turismo tin algun aña kaba ku e ta kanando hopi bon i komo konsekuensia di esaki, tin un interes enorme pa sigui konstruí hotèl riba nos isla.
Renaissance Hotel, por ehèmpel, ta un dje hotèlnan grandi den konstrukshon na Rif ku ta spera di habri su portanan mas den kabamentu di e aña aki.
Pero tin mas hotèl den konstrukshon i tin hotèlnan eksistente ku ta ekspandiendo nan kantidat di kamber. Segun e korant NRC Next, ta konstruyendo hotèl na gran eskala awor aki na Kòrsou.
Kòrsou tin 137 mil habitante di kua 10 porshentu ta sin trabou di akuerdo ku e publikashon den e korant ulandes.
Gerente di proyekto di Hyatt ta hopi preokupá. El a bisa, ku pa loke ta trahadó pa konstrukshon, esei por a haña net-net ainda, pero pa loke ta personal ku mester bai traha den e hotèl mes, un total kalkulá di 800 hende, no por haña personal ku e kualifikashon nesesario, segun Reinen.
Aña pasá Kòrsou a konosé un kantidat di 650 mil turista. E intenshon ta pa oumentá e kantidat di kamber di 3000 ku e ta awor aki pa 7000 na aña 2011.

WILLEMSTAD - Gobièrnu di Kòrsou ta spera di anunsiá e siman aki un proyekto grandi na Rif. “Un magno proyekto. E proyekto aki lo bira un atrakshon turístiko mas pa nos isla,” asina diputado di Infrastruktura Anthony Godett a deklará. “Ta trata aki di un proyekto ku lo bin na altura e stadion di Rif”, asina Godett a agregá, sin kier a bai den muchu detaye di e proyekto.
Di loke LA PRENSA por a saka ‘fo for di su palabranan sinembargo, por konkluí ku ta trata aki di un proyekto di dibertishon.
Algun aña pasá, tabatin un diskushon rondó di un proyekto ku algun invershonista kier a bin kuné hustamente den e área aki. Tabata trata di un proyekto estilo “Madurodam” ku nos konosé na Ulanda. Un sorto di siudat den miniatura ku, en todo kaso na Ulanda, a resultá un éksito kompleto. Por sierto ku algun dia pasá a nombra un alkalde nobo pa Madurodam, den persona di un damita di kua su tata ta yu di Kòrsou.
E proyekto ku e invershonistanan – entre otro Frank Elstak – kier a konstruí na e sitio en kuestion sinembargo a dòl, pa motibu di masha hopi diskushon ku a surgi riba destino di e pida tereno aki.
Ta konosí, ku tin un grupo den komunidat ku no ke weta stadion di Rif disparsé. Pa a konstruí e proyekto, esei sinembargo tabata un kondishon sin mas.
Ta hustamente e tempu ei tabatin diskushon tambe rondó di konstrukshon di un stadion ku e legendario Andruw Jones kier a pone komo regalo pa Kòrsou. Debí na hopi diskushon, e proyekto aki tambe a kaba na aros i koko. Awor ta parse ku tin ideanan konkreto atrobe, pa bin ku un atrakshon grandi na e sitio ya menshoná.

WILLEMSTAD - Fundashon Penshonado Kòrsou ke sinta urgentemente na mesa ku gobièrnu di Kòrsou pa diskutí e asuntu di 100 florin èkstra pa penshonadonan. Ku e meta aki, e fundashon a manda un karta pa tantu Gezaghèber di Kòrsou, mr. Lizanne Dindial komo diputado di Salú Públiko, Humphrey Davelaar.
“Te awor aki nos no a haña un reakshon”, asina presidente dje fundashon Elvio Carmela a konfirmá. Turesten, e fundashon a konvoká un reunion general pa su miembronan pa mañan djarason mainta na edifisio di Inisiativa Partikular Kòrsou, IPK.
“Penshonadonan ta hopi desgustá pa e situashon aktual”, asina Elvio Carmela, presidente di Fundashon pa Grandinan di Kòrsou a bisa.
Elvio Carmela a splika ku te awe, no ta tur penshonado ku tin derechi riba e oumento di 100 florin ku gobièrnu a introdusí algun aña pasá pa esnan ku ta kobra solamente penshun di behes, a risibí esaki.
E fundashon ku Carmela ta presidí, ta hasiendo un inventarisashon di e situashon aki pa asina kaba di atendé e asuntu aki ku gobièrnu.
Pero e problema di mas serio ta e hecho, ku e diputado di Asuntu Sosial anterior (esta promé ku diputado Humphrey Davelaar) a kambia e dekreto ku ta stipulá ku e penshonado tin derechi riba e 100 florin èkstra aki for di 2005.
Esei a pone ku e penshonado ku no a risibí e 100 florin èkstra ainda, lo no kobra esaki ku forsa retro aktivo.

Tráfiko di pasahero di mart 2008 tabata esun di mas haltu den historia 

WILLEMSTAD - Curaçao Airport Partners (CAP) a anunsiá, ku den luna di mart 2008, e kantidat di pasaheronan, tantu ku a yega komo pasaheronan i ku a sali for di Kòrsou, tabata esun di mas haltu (3.055). Esaki ta debí na e echo ku vuelonan di KLM pa Amsterdam tabata trese pasaheronan di tránsito for di Aruba i St. Maarten. Awor esaki no ta e kaso mas, pasó KLM ta bula direktamente pa Amsterdam.
Durante mart di 2008 pasaheronan ku ta yega a subi ku 40.35% i pasaheronan ku a sali a subi ku 38.26% kompará ku e mesun temporada di aña 2007. Un total di 57.914 pasahero a yega Kòrsou den mart 2008 i 56.914 pasahero a sali for di Kòrsou den mart 2008. CAP ta informá, ku 65% di e subida di pasaheronan ta atribuí na e merkado venesolano ku a oumentá su servisionan pa Kòrsou.
E merkadonan ku a konosé un subida den e kantidat di pasaheronan ku a sali for di Kòrsou ta inkluí Amsterdam 6% (2.483), Aruba 15% (2.039), Bogotá 66% (1.931), Boneiru 4% (790), Caracas 206% (10,737), Newark 12% (151), Las Piedras 139% (650), Maracaibo 265% (1.543), Montego Bay 47% (1.044), Miami 18% ( 3.001), Port of Spain 2% (84), St. Maarten 23% (1.502), Valencia 441% (11.360) i Toronto 6% (149).
Durante e promé kuartal di 2008 un total di 359.728 pasahero a pasa dor di aeropuerto Hato kompará ku 289.536 den e promé kuartal di 2007. Esaki ta representá un subida di 24%.

WILLEMSTAD - Curaçao Airport Partners (CAP) ta trahando sin stòp riba e área di seguridat pa loke ta trata su pasaheronan i ta organisando huntu ku US FOL stashoná na Aeropuerto un ehersisio di emergensia ku e tema: Hato Crashex 2008.
Dia 16 di aprel 2008 un ehersisio di emergensia lo wòrdu tené na Aeropuerto Hato konhuntanente ku US FOL. E ophetivo di e emergensia aki ta pa tèst e plan di alarma di e diferente organisashonan ku ta envolví den kaso ku sosodé un emergensia na Aeropuerto Hato. Durante di e ehersisio aki lo tèst tambe e responsabilidat i manera di operá di outoridatnan lokal i servisio médiko, entre otro CEMS.
E senario lo ta lo siguiente:
Pa aproksimadamente 9:00 or di mainta un avion military USAF C-130 i un avion di Kadushi Airline ta dal den otro i tur dos ta pega na kandela. E kandela ta produsí hopi huma den tur dos avion.
Lo tin 17 pasahero den e avion di Kadushi Airline i 2 miembro di kabina. Den e avion militar lo tin 5 miembro di kabina.
Instansianan envolví den e ehersisio lo ta:
CEMS
Brantwer di Aeropuerto, Brantwer di FOL i Brantwer Kòrsou
Personal di CAP
Personal di Rode Kruis
Personal di FOL na Aeropuerto
Médiko di Aeropuerto
Guarda Kosta i
Otro institushonnan Gubernamental.
Durante e ehersisio aki, públiko lo ripará ambulansnan, outonan di polis i trùknan di paga kandela ku ta partisipá na e ehersisio aki, usando nan sirena bayendo den direkshon di Aeropuerto.

WILLEMSTAD - Maduro & Curiel's Bank i Lito, e amiguitu spardó, ta sigui duna muchanan ku ta bishitá Skolnan Básiko (Skol di Fundeshi) oportunidat pa hasi algu bèk pa nan skol. Den kuadro di e proyekto di Lito “Kuida Bo skol i stima Bo skol”, muchanan ku ta bishitá klas 5 di tur Skol Básiko na Kòrsou por partisipá den e kompetensia di “Lesa pa Bo skol” i gana premio pa nan skol.
Na sèptèmber 2007 Lito a start ku su proyekto “Kuida Bo skol i stima Bo skol” ku e kompetensia di “Demostrá talento pa Bo skol”. Na novèmber Lito a sigui ku e kompetensia “Kore pa Bo skol” i na yanüari 2008, den temporada di karnaval tabata tin e kompetensia “Kanta Tumba pa Bo skol”.
Na luna di mei próksimo Sentro pa Guia Edukashonal ta organisá pa di 10 biaha nan “Voorleeswedstrijd” entre Skolnan Básiko. E “Voorleeswedstrijd” ta start dianan 7, 8 i 9 di mei i e gran final ta dia 31 di mei. Lito, e amiguitu Spardó, tambe ke yuda konsientisá muchanan di e importansia di lesamentu i pa e motibu aki a djòin Sentro di Guia Edukashonal i hasi e kompetensia aki parti di e proyekto “Kuida Bo skol i stima Bo skol”. Alabes Lito ta kontribuí ku su granito yuda nos muchanan stima tur loke ta di balor pa nan, pa nan famia, pa nan skol i pa Kòrsou. Komo apresio na e echo ku e muchanan ta kompetí pa nan skol, Lito ta pone disponibel premio pa e skolnan di e muchanan ku lesa i gana. Tur mucha ku pasa pa e fecha final lo risibí un gift cheque pa nan mes na balor di Naf. 75,-- i e mucha ku lesa mas mihó i sali number 1, su skol ta risibí un cheque na balor di Naf. 5.000,--. E mucha ku sali na di dos lugá su skol ta risibí un cheque na balor di Naf. 3.500,-- i e mucha ku sali na terser lugá su skol ta risibí un cheque na balor di Naf. 2.500,--. Aparte di e premionan pa esnan ku lesa mas mihó, tambe Lito lo duna e skol di e muchanan ku animá nan representante mas mihó pa via di un “yèll” riba e fecha final di e kompetensia ta risibí un cheque na balor di Naf. 1.000,--.