ORANJESTAD- Recientemente, UNOCA a firma un contract cu Armand Simon. Desde Mei, e ta bai duna les di piano na Scol di Arte, San Nicolas. E lesnan ta tuma lugar tur diamars atardi.
Lupita Gil, directora di UNOCA, a duna di conoce pa ta hopi contento cu un musico profesional di e caliber aki kier inverti den e desaroyo musical y educacion cultural di San Nicolas.
Diamars 29 di april tin un atardi di inscripcion na Scol di Arte. Entre 2’or y 4’or di atardi lo tin e oportunidad pa sera conoci cu e docente y inscribi pa les di piano. Esnan cu no por ta presente ariba e dia aki por busca un formulario di inscripcion na Scol di Arte. Pa mas informacion por yama 5849168 of 7376797.
Armand Simon
Armand Simon a studia na e conservatorio di Rotterdam, e conservatorio di Utrecht y a sigui master classes serca musiconan internacionalmente reconoci manera Martha Argerich, Udo Reinemann y Earl Wild. Armand Simon a gana diferente premio, entre otro e 3rd prize den e Petrof Competition (1993) y e 1st prize pa mihor interpretacion di un piano concerto di Mozart na Vredenburg (1999).
Como pianista ela presenta entre otro na Hulanda, Belgica, USA, Colombia, Venezuela y Corsow.
Na 1999 Armand a presenta hunto cu e cantante Tania Kross na Concertgebouw di Amsterdam y na 2007 ela wordo invita pa duna un recital den e prestigioso “Festival y Academia del Nuevo Mundo” na Maracaibo. E evento aki ta wordo considera como un di e festivalnan mas importante na Sur-America.
Banda di su actividadnan como docente y musico, Armand Simon ta presidente di Stichting Crescendo. E fundacion aki tin e meta pa stimula y promove actividadnan ariba tereno di musica clasico y pa guia y desaroya talento musical na Aruba.

ORANJESTAD- Diamars ultimo Presidente di Parlamento, drs Mervin Wyatt-Ras a reuni cu Presidente di Banco Central, sr. Mehran, conhuntamente cu representantenan di e banco y tambe griffier. Esaki como parti di e deliberacion periodico cu tin entre Parlamento di Aruba y Banco Central.
Na e ocasion aki esnan di Banco Central a duna un bista di e desaroyonan of trends financiero-economico y di turismo. Na mesun momento ta duna recomendacionnan of consehonan.
Segun Presidente di Parlamento ta importante pa Parlamento tin un bon contacto cu Banco Central. Esaki ta tuma lugar tanto dor di e contacto entre Presidente y e banco como entre e comision financiero-economico di Parlamento y e banco.
Importante alavez ta contacto estrecho entre e banco y Gobierno di Aruba pa asina haci e maneho di Gobierno uno cu ta cuadra cu e realidad financiero-economico.
Presidente cu satisfaccion por a tende cu turismo a bai bon durante ultimo lunanan y ta interesante pa mira con e lo desaroya su mes durante e ‘low season’ siguiente.
Aruba sigur lo tin cu diversifica tanto su turismo como su economia pa asina competi cu e islanan den Caribe. Mirando e recession mundial ta keda un reto pa nos por busca ingresonan di paisnan fuerte economicamente, manera paisnan Europeo.

ORANJESTAD- Departamento di Prevencion di Crimen di Cuerpo Policial di Aruba, ta haci un apelacion na tur doñonan di negoshi y ciudadanonan en general pa tuma nota di lo siguiente.
Mirando e diferente casonan di atraco cu ta tumando lugar ultimamente nos mester cuminsa adapta pa asina proteha nos mes, nos famianan y nos propiedadnan contra ladronicia y muy en particular contra atraco.
Esaki ta trece cune cu nos mester cuminsa:
- tuma medidanan di prevencion cu ta hasi nos cas of negoshi menos atractivo pa ladron of atracador y cu ta evita cu por atracanan facilmente.
- tuma medidanan di seguridad cu ta yuda polis pone man riba atracadornan mas rapidamente.(por ehempel uso di camera apropia)
Cuerpo Policial kier hasi un yamado na tur hende cu mester di informacion con pa hasi sea nan cas of negoshi mas sigur, pa por fabor tuma contacto cu:
Departamento di Prevencion di Crimen di Cuerpo Policial Aruba, situa na
Centro di Husticia na Macuarima.
Telefon 5272975 of 5272976, den siman, durante oranan di oficina (8or pa 4or).
Puntra pa:
Sr. Edwin “Papito” Comenencia of
Sr. John Larmonie
Nos tin brochures cu ta duna informacion riba diferente topico di prevencion, e.o.:
-Con pa preveni atraco
-con pa preveni ladronicia na cas
-Con pa preveni ladronicia di auto
-Con pa papia cu mucha encuanto droga,
-etc,etc.
Tambe por traha un cita pa bishita bo cas of negoshi gratuitamente pa dunabo conseho con pa mehora e situacion di siguridad na bo cas of negoshi GRATIS.

ORANJESTAD- Ministerio di Salubridad Publico, Medio Ambiente, Asuntonan Adminitrativo y di Stranhero a mustra den un comunicaco cu den su articulo, sra. Monica Kock ta duna di conoce cu Minister Booshi Wever lo no ta tuma ningun accion entorno di e problematica di drogadiccion.
Specificamente sra. Monica Kock ta puntra dicon no ta usa e ley di “ondercuratele” pa sera e adictonan y kitanan for di riba caya.
Mi kier un biaha mas trata di splica sra. Kock y mi ta spera cu e biaha aki si e compronde. Contrario na loke sra. Monica Kock ta pretende, Aruba TIN un instituto unda adictonan ta wordo interna obligatoriamente; desde maart 2000 Centro Dakota a ricibi su prome cliënte.
Desde 1998 e ley di curatela a bin na vigor y na maart 2000 Centro Dakota a ricibi su promer cliënte y te cu 2008 tin 135 sentencia for di cual 84 ya a wordo ehecuta, cu ta mas cu mitar. Mescos cu tur otro instituto, e instituto NO por admiti tur cliënte sin limite. Ora e centro ta yen, ta yen e ta!
Na e momento aki Ministerio di Salubridad ta den tramite pa expande e capacidad y servicionan. Riba e tereno di Centro Dakota e edificio di Huis van Bewaring lo ser hasi funcional pa e asina yama double trouble (pues hendenan cu aparte di ta un adicto, ta alaves un patient psychiatrico).
E seccion aki lo admiti 16 cliënte. E cuido pa e patiënt aki, cu by the way, ta creciendo, por ser trata e ora ey mas dirigi y eficiente. E ora ey Centro Dakota lo ser usa solamente pa cuido di adictonan (cliëntenan single trouble) cu ta bou di curatela.
Mescos 10 aña pasa mi a sostene e ley cu ta regla e “onder curatele stelling”, awe mi ta sostene 100% ehecucion di e ley. Mi kier remarca si cu e ley aki ta ser aplica tanto pa esnan cu ta cay bou e asina yama “double trouble” como e cliënte “single trouble”. Mirando e echo cu tin hopi mas “double trouble”, no tin mucho lugar mas pa e cliënte “single trouble”. Sinembargo manera ya mi a informa sra. Kock, pronto nos lo bay aumenta e capacidad den Centro Dakota.

WASHINGTON, Merka, - E aspirante demókrata pa presidensia di Merka, Barack Obama, i su esposa Michelle, a gana 4.2 mion dollar aña pasá, segun datonan di su deklarashon di impuesto distribuí pa su kampaña.
E inmenso mayoria di e sèn aki, kuater mion dollar, ta di entradanan optené pa derechonan di outor di su bukinan “Dreams From My Father” i “The Audacity of Hope”.
Sobrá di su entradanan, 260.765 dollar, ta di salario di e pareha.
Komo senador merikano, Obama ta risibí 157.102 dollar anual, miéntras ku su esposa ta haña 103.633 pa su trabou den Fakultat di Medisina di Chicago University.
Di e entradanan brutu, matrimonio Obama a paga impuestonan pa balor di 1.4 mion dollar i a hasi donashon na organisashonnan karitativo un total di 240.370 dollar.
Entre e donashonnan aki ta figurá 26.270 dollar duná na Iglesia Trinity United Church of Christ, kaminda pastor reverendo Jeremiah Wright ta, e mentor spiritual di e senador i di kende su sermonnan polémiko a krea problemanan pa Obama den su kampaña elektoral.
Kontrali, su rival pa kandidatura demókrata pa presidensia, Hillary Clinton, i su esposo, eks Presidente merikano Bill Clinton, a gana 20.4 mion dollar na 2007, segun datonan emití dianan anterior.
Mas o ménos mitar di e sèn aki ta di entradanan di Bill Clinton pa pronunsiá diskursonan.
Fo’i dia ku nan a bandoná Kas Blanku na 2001, famia Clinton a gana kasi 109 mion dollar.

PHILADELPHIA, Pensilvania, Merka, - E krusial debate durante kua e kandidatonan pa nominashon presidensial demókrata, senador Hillary Clinton i senador Barack Obama, tabata dominá pa erornan ku ámbos a kometé den último lunanan.
Durante di e debate di ayera nochi, ku tabata un debate krusial pasobra ta esun último realisá promé ku e elekshonnan primario di estado di Pensilvania, a trata e relashon di Obama ku un kontrovertido pastor, tambe e vershon straño ku Hillary Clinton a bisa di un biahe na Bosnia.
E elekshonnan primario di e siman entrante lo por determiná si Clinton mester bandoná òf no su karera pa Presidensia di Merka.
Òf kisas, esun di ayera, por ta e último debate di e eks Promé Dama.
Tenshon
E tono general di e debate di ayera tabata tenso, ounke ámbos lider a koinsidí ku e merikanonan ke un kambio i nan a mustra konfiá ku kualke di nan dos lo por konfrontá kandidato republikano John McCain den e elekshonnan general di 4 di novèmber.
E promé 45 minüt di e debate tabata konsentrá den e erornan mas resiente di e kandidatonan.
Clinton a bolbe kritiká e komentario ku Obama a hasi resientemente, ku den tempu difísil e klase obrero ta pegá ku armanan i religion “pasobra nan ta amargá”.
Clinton a tacha e komentario komo “insultante” i Obama a defendé su mes dor di bisa ku a saka su komentario for di konteksto.

AMSTERDAM – Ajax ketu bai por bira kampion di Ulanda. Di tur manera lo disidí riba e título di Eredivisie riba e último dia di e kampionato ulandes. Pa basta siman kaba tabata parse ku nada lo stroba PSV pa bira kampion un biaha mas, pero ayera Ajax a disidí ku e ta manten’é e preshon riba e ekipo di Eindhoven.
Ku un viktoria di 2-1 na Groningen ainda e titulo no ta definí. Ajax, faltando un wega mas pa hunga djadumingu awor, tin tres punto di diferensha riba PSV. PSV ku un empate djadumingu awor lo por disidí e título. Di otro banda si Ajax gana i PSV pèrdè lo por surgi un situashon masha interesante komo ku Ajax tin un mihó diferensha di gol.
Partido di ayera tabata kontinuashon di e partido di djadumingu den Euroborg ku KNVB a kanselá, despues ku fanátikonan a sende mas di 12 ròl di papel di wc na kandela.
Groningen a kuminsá e partido di ayera fuerte, pero mas e partido a avansá, mas Ajax a kuminsá dominá e wega. P’esei no ta straño ku Ajax a hinka e promé gol. Rasmus Lindgren ku Ajax por sierto a tuma for di Groningen a kòp e bala den gol. Nèt promé ku sosiegu, Matías Cahais e empatá e partido ku un kabesaso.
Den e di dos mitar, tur e dos ekiponan a trata di gana e partido. Groningen tabata serka di gol na momentu ku un kabesaso di Marnix Kolder a dal den lata. Pero tabata Ajax ku a hasi e wega 2-1 ku un gol di Luiz Suárez, irónikamente tambe un eks-FC Groningen. Ounke na e momentu ei Ajax por a bai traha mas riba su defensa, tabatin diferente chèns di FC Groningen pa empatá e partido. Finalmente e partido a bai kaba 2-1.

AMSTERDAM – Tabatin diferente vershon den último añanan, di kon Johan Cruijff a gradisí pa e kampionato mundial di 1978 na Argentina. Ulanda a pèrdè e final den prolongashon ku skor di 3-1. Tur hende ta kòrda kon Mario Kempes a derotá e ekipo ulandes ku tabatin un presentashon asina sobresaliente ku dos gol den e fase final. Tur hende ta kòrda tambe kon Rob Rensenbrink a dal a bala kontra pal’i gol. Sinembargo no tabatin kontesta nunka di kon Johan Cruijff no tabat’ei. Algun hende a bisa, ku su kasá Danny tabata manda demasiado riba dje, otronan ta bisa ku e insidente den kua a haña hungadónan di selekshon di Ulanda ku diferente muhé sunú a pone ku Cruijff a gradisí pa selekshon. Hasta a bisa ku e tabata kontra e régimen militar brutal pisá ku tabata na mando e tempu na Argentina.
E siman aki Cruijff mes a disidí pa revelá ta kiko a pasa. Den un entrevista ku e stashon di radio di Catalunia, Cruijff a bisa, ku ta e mes a tuma e desishon. “Tin momentu ku tin kosnan mas importante den bida. Tabatin hopi tenshon den nos famia komo konsekuensia di un atrako riba nos famia, aparentemente ku e idea pa sekuestrá un di nos”, asina e eks futbolista a bisa. Cruijff a bisa, ku e hendenan ku a drenta den su kas e tempu ei a pone un pistol na su kabes i nan a mara e i su kasá riba un stul. E yunan tambe tabata na kas e momentu ei. Despues di e atrako ku tabatin un fin felis, e muchanan a bai lunanan largu skol ku vigilansia, tabata vigilá nan kas konstantemente i Cruijff mester a bai tur partido ku agentenan di seguridat. “Tin momentunan ku bo tin ku skohe pa ménos. E temporada ei mi mester a hasi esei”, asina Cruijff a bisa.

MADRID – Den un temporada di desapunto pa desapunto, e selebrashon ayera di e hungadónan di Valencia tabata kompletamente hustifiká. E ekipo, dirigí pa e ulandes Ronald Koeman a gana Copa del Rey ku ta habri kaminda pa partisipashon den futbòl oropeo. Ademas ta e pregunta si e viktoria lo yuda kousa di Koeman ku segun prensa spesialisá lo haña su retiro for di e klup.
Pa awor aki sinembargo Koeman i su hendenan no ta pensando riba esei, pero nan ta den pleno selebrashon. Valencia a gana e ekipo Getafe 3-1 i a bira kampion di Copa del Rey.
Juan Manuel Mata i Alexis Ruano a pone Valencia den bentaha na di 4 i 11 minüt di wega, despues Esteban Granero a deskontá pa Getafe nèt promé ku sosiegu. Fernando Morientes a seya viktoria di Valencia na di 84 minüt ku un kabesaso.
Getafe a kaba e partido tambe ku un hòmber ménos na momentu ku rèfri a duna Fabio Celestini un karchi kòrá na di 90 minüt di wega pa motibu di un entrada fuerte riba David Silva. E triunfo ta duna Valencia un karchi pa partisipá den e próksimo Kopa UEFA i ta un alivio pa e klup ku bou di e tékniko ulandes a bai di malu pa pió.
E ekipo ta na di 16 lugá riba e tabla di posishon di e kampionato regular ku apénas 39 punto den 32 partido, 30 ménos ku e lider Real Madrid i na di dos lugá for di degradashon. Valencia a logra apénas 18 punto den e 21 partidonan ku nan a hunga bou di direkshon di Koeman.
Valanecia a eliminá Barcelona den e semi final, miéntras ku Getafe a superá Racing di Santander. Getafe ta sera un siman no masha bon. Djaweps último e ekipo a keda eliminá den pitu for di Kopa UEFA ku un derota den último 5 minüt di tempu èkstra kontra Bayern Munchen. Tabata e di dos presentashon konsekutivo di Getafe den final di Copa del Rey. Aña pasá e ekipo a pèrdè kontra Sevilla. Getafe ta dirigí pa e eks internashonal danes Micheal Laudrup.

ROMA – E landadó merikano, Michael Phelps, ganadó di ocho medaya olímpiko, na su 22 aña di edat, a rekonosé ku e trahenan di baño nobo di Speedo, a influensiá ku algun landadó por a kibra rèkòrtnan den último lunanan. “Nan a pèrmití di kita algun sentésimo di sekònde. No tin duda den esei, pero sin e trabou duru no ta sufisiente.”
Ku tur esei, Phelps no ta kere ku ta trata di un privilegio ku solamente algun landadó ta gosa di dje ya ku e trahe ta na disposishon di kualke ku ke us’é.
E Federashon Internashonal di Natashon (FINA) a konfirmá siman pasá ku e trahenan nobo di Speedo ta kumpli ku e normanan i a duna aprobashon pa wòrdu utilisá.
Tin un polémika aktualmente rondó di e trahenan ku ta wòrdu trahá di un material ku ta repelá e awa. Algun deportista i tékniko a reklamá ku esaki ta e motibu ku tantu rèkòrt asina a wòrdu kibrá últimamente.
Pa loke ta trata un bòikòt olímpiko, Phelps a limitá su mes bisando ku aki ta trata di un akontesimentu magnífiko. “Mundu ta reuní, e kombibensia na Vila Olímpiko ku atletanan di otro kultura. Mi no sa di bisa nada otro,” el a indiká.
En kuantu su forma, Phelps a bisa ku e ta sinti su mes mas relahá kompará ku promé ku Weganan Olímpiko 2004 na Atenas. “Mi sa kiko ta warda mi na Beijing i kon lo mi reakshoná i e atenshon ku mi ta haña serka prensa. Kiko e esfuersonan mester ta den pisina i e preshon.”

BUENOS AIRES – E tenista merikano, Pete Sampras, e eks number un di mundu i un di e mihó tenistanan di tur tempu, lo tin un agènda kargá otro luna. E lo hasi un bishita kòrtiku na Argentina otro luna i ademas lo partisipá na e etapa di San Pablo i e Master di Black Rock Champions Tour.
Sampras lo yega Argentina pa hunga un wega di ekshibishon kontra di e mihó tenista argentino, David Nalbandian ku ta number shete aktualmente riba e klasifikashon mundial.
Sampras ta yega Argentina dia 19 di mei i lo duna un klínika privá. Tambe e lo tin un akshon benéfiko pa un instituto di lucha kontra kanser infantil.

ROMA – Un pènel di eksperto a eksonerá ayera e siklista italiano, Danilo Di Luca di akusashonnan di dopahe ku tabatin kontra di dje.
E Komité olímpiko Italiano (KONI) a hasi un petishon pa suspendé Di Luca pa dos aña despues ku su tèst a sali positivo durante un prueba den Giro de Italia kual el a gana aña pasá.
E resultado di e tèst di Di Luca a revelá un montante di hormona ku normalmente ta korespondé na lokual un mucha tin. Den e tèst no a bin haña ningun supstansia prohibí.
Defensa di Di Luca a argumentá, ku e siklista a bebe asina tantu awa despues di e etapa ku su nivel di harmon a disminuí. E desishon di ayera por wòrdu apelá pa KONI.

PRAGA – E promé minister cheko, Mirek Topolanek lo no asistí na e seremonia di inougurashon di Weganan Olímpiko pa motibu di e represhon chines na Tibet, asina un bosero di e gobièrnu a duna di konosé.
E promé minister sinembargo ta kere, ku e atletanan cheko mester partisipá na e weganan.
Miembronan di e gabinete a insistí pa Topolanek apstené di bai e seremonia. E situashon na Tibet tambe a influensia su desishon.
E kansiyer cheko, Karel Schwarzenberg a pone preshon riba polítikonan di Union Europeo siman pasá pa nan bòikotiá e seremonia inougural “den un pais ku a bolbe demostrá ku ta un diktadura.”
E presidente cheko, Vaclav Klaus a bisa, ku e tampoko lo no asistí, debí ku e mester hasi un operashon.
E promé minister britániko, Gordon Brown i e kansier aleman, Angela Merkel tambe a deskartá nan partisipashon, pero a bisa ku nan desishon no ta relashoná ku e eksigensianan ku e defensornan di Tibet a hasi na lidernan estranhero.

WILLEMSTAD - E komishon reaktivá di Seru di Otrobanda, tin intenshon serio di rebibá e aktividatnan sosial den e bario. Den pasado tabatin Komishon Seru di Otrobanda ku tabata aktivo i tabata kai e tempu ei kai bou di Federashon di Otrobanda. Na momentu ku Kurt Schoop, miembro di Komishon a bira habitante di Seru di Otrobanda, el a tuma e inisiativa pa reuní ku algun habitante ku ta bibá hopi tempu i ku tambe último tempu a bai biba den Otrobanda.
E miembronan a reuní riba e dos puntonan di mas importante pa traha riba dje mesora, Kurt Schoop, a splika. Unánimamente a resultá ku mester krea mas posibilidat di rekreo pa hóbennan, prinsipalmente despues di skol. E tópiko di limpiesa di e bario tambe a haña atenshon. ’E bario mester wòrdu limpiá i mester mantené limpi’.
Schoop a remarká ku na Seru di Otrobanda, tin sierto área, di terenonan privá, ku durante último añanan a bira un kustumber ku debí ku vários habitante ku a pèrdè nan kònteiner, nan ta tira sushi riba un plenchi. Den koperashon ku Selikor, e Komishon a solushoná e problema aki permanentemente. ‘E ta un situashon á-higiéniko ku ademas no ta duna un bista na e bario’.
Djadumingu último e promé aktividat pa e hóbennan a tuma lugá. Kurt Schoop, di Komishon di Seru di Otrobanda a splika, ku a traha i subi fli ku e hóbennan. 27 Hóben a asistí na un tayer di trahamentu di fli, for di 5 te ku 17 aña. Durante e enkuentro aki, segun Schoop, a diskutí ku e hóbennan, ku a duna di konosé, ku nan ta deseá di hasi mas deporte. Entre otro nan ke disponé di un sitio, unda ku nan por hasi deporte. Tambe e posibilidat pa por siña toka un instrumento di músika, ta figurá entre dje deseo dje hóbennan di Seru di Otrobanda. Relashoná ku e kombersashon ku e Komishon a hiba ku e hóbennan, a disidí ku ta bai duna atenshon na e puntonan aki, segun señor Schoop.

WILLEMSTAD - E desmantelashon di Antia, ta menasá di bira un frakaso. E pais ta wòrdu desmantelá, pero no tin speransa ku e ta wòrdu remplasá pa algu más mihó. Asina Hubert Maduro, kende na nòmber di Aruba, ta miembro di Raad van State. Ta trata aki di e órgano di konseho di más importante di Reino. E ideanan pa e reformanan struktural ta wòrdu hinká den un bachi hurídiko, pero nó tin e vishon kon mester sigui despues dje restrukturashon, segun Maduro. E hurista arubano ta opiná tambe ku Hulanda ta reakshoná sin sufisiente atenshon riba e restrukturashon estatal. Mas aleu Maduro ta indiká ku Aruba nó mester keda sin reakshoná i mester atendé mas tantu ku e restrukturashon estatal di Antia. Mas aleu, Maduro ta di opinion ku polítikonan na Hulanda, ta konsiderá Antia i Aruba muchu komo kasonan problemátiko.
“Aworakí nos a resultá den un estado di desmantelashon. No solamente Antia gradualmente ta wòrdu kibrá, pero tampoko no tin speransa ku lo surgi algu mas mihó, ku solamente kibramentu”, esei tabata e splikashon di Hubert Maduro. E estado bieu dje seis islanan antiano, ta den un ruina, Maduro a remarká. I esaki ta konsekuensia dje forma kon Hulanda ta atendé ku e islanan aki, segun e miembro di Raad van State. Di un banda, semper Hulanda a referí na e islanan komo outónomo, ku mester regla nan propio asuntunan. Miéntras ku ora algu no bai bon, ta traha un dossier nobo òf ta konsultá e dossier bieu. “No ta trata di komunidatnan, pero ta trata di diferente problema”. No ta hustu ku Antia ta wòrdu tratá di e forma aki, miéntras ku pa siglonan kaba, nos ta hulandes. Mester surgi solushon, nó pa e dossiernan, pero mester ta posibel ku ta atendé hende ku otro manera.

ARIES: E momentu awor ta apropiá pa ahustá bo presupuesto. Un persona serka di bo ta hasi algu ku ta desepshonábu. Definí bo gustunan i interes. 29,16,37.

TAURO: No sigui siendo esklabo di nada ni di niun hende. Sali di tur loke ta paralisá bo potensial komo ser humano. Programá bo mes pa ser tur un triunfadó. 16,20,08.

GEMINIS: Na bo banda tin personanan fuerte, sigur di nan mes, stabil i hopi spiritual ku ta sirbi di inspirashon pa bo sigui dilanti den bida. 15,25,47.

KANSER: Ta un ekselente momentu pa koregí erornan di bo pasado ku ta sigui afektando. Orashon i fe ta arma hopi poderoso. 21,19,06.

LEO: Ponebu den kontakto, komuniká ku e sernan kerí ku pa algun rason ta leu. Skirbi e karta, koreo elektróniko òf manda nan un nota. 26,10,35.

VIRGO: Pone bo trabounan i obligashonnan un ratu un banda pa bo rekargá bo baterianan, tantu físiko komo emoshonal. 01,45,32.

LIBRA: Ser mas eksigente ku loke bo ta konsiderá ta bo derechonan. No konformábu ku poko, ya ku bo ta lo mihó. Manehá bo plaka sabí, pa bo por multipliká den korto tempu. 29.

SKORPION: Bo ta den posishon di eskohé entre dos persona. Ahustábu mas na e realidat di e momentu aktual i mira bo plannan materialisá. 13,04,44.

SAGITARIO: Terminá tur asuntu pendiente pa bo traha espasio pa komiensonan nobo. No pone na duda pa bo vense bo plannan. 17,02,11.

KAPRIKORNIO: Un persona mayor ta dependé awor di bo komo nunka ántes. Bo toleransia, komprenshon i pasenshi ta indespensabel. 46,03,14.

WILLEMSTAD - United Telecommunication Services (UTS) ta bai aserká minister di Telekomunikashon ingeniero, Maurice Adriaens ku e petishon pa oumentá e tarifa ku e kompania ta kobrando pa telefon fiho di kas.
E montante aki, ku aktualmente ta 18 florin, lo subi te 38 florin, asina Paul de Geus, direktor di e kompania di telekomunikashon a anunsiá ayera tardi.
El a bisa mesora, ku e kambio aki ta nesesario, mirando e situashon di kompetensia ku ta hopi fuerte awor aki riba merkado di telekomunikashon.
De Geus a bisa, ku tur hende por kòrda ku ta for di tempu e kompania di telefon tabata den man di gobièrnu bou di e nòmber Telefoondienst, e montante aki tabata asina.
Despues Telefoondienst a bira Setel N.V. pa finalmente awor aki e karga e nòmber UTS.
Den e periodo ei gastunan a sigui subi, pero e kompania nunka a adaptá su tarifa, segun de Geus. Komo ehèmpel ku otronan si a dal bai ku oumento, el a menshoná St. Maarten, kaminda e montante ta 45 florin pa abono fiho i na Ulanda kaminda e ta alrededor di 40 florin.
De Geus a bisa mesora, ku e oumento lo bai den dos fase: den promé instansia lo oumentá e tarifa te na 30 florin pa despues subi esaki te na mas o ménos 38 florin.
Banda di esei, ta intenshon tambe pa introdusí un tarifa fiho pa Telefásil. De Geus a splika, ku nunka a kobra pa Telefásil, ku ta un servisio ku UTS a bin ta duna pa algun tempu kaba, pero ku ta kosta plaka. Hustamente komo ku no ta kobra, e tarifa di Telefásil ta un tiki mas haltu ku e tarifa normal di abono. Di otro banda t’asina, ku pa instalashon di un Telefásil nos ta papiando di entre 1000 pa 1500 florin, el a bisa.

WILLEMSTAD - Trahadónan di Curaçao Port Services a reanudá trabou ayera, despues ku nan sindikato CBH OVP a yega na un entendimentu ku gerensia di CPS.
“E akuerdo ta enserá, ku gerensia ta drei bèk e desishon di a retené prima di AOV sin previo konsulta, pero e ta enserá di otro banda tambe ku e desishon di “no work, no pay” ta keda riba mesa. E sindikato, respetando e desishon aki, a palabrá ku en bes di kita plaka, lo kita un dia for di fakansi di e trahadónan”, asina Monique St. Jago, presidente di e sindikato CBH OVP a konfirmá.
Trahadónan di CPS a drenta akshon djamars mainta den forma di un reunion general bou di ora di trabou. E problema ta e hecho, ku prima di AOV a subi i sin konsultá promé, gerensia a kita e oumento aki for di salario di e trahadó.
E trahadónan a eksigí durante e reunion djamars mainta pa gerensia bin splika nan desishon, gerensia a mustra ku e ta dispuesto pa sinta ku un delegashon di trahadó, pero e trahadónan a keda para riba nan punto di bista.
Esei a pone ku no tabatin trabou djamars henter dia.
Den kurso di djamars anochi partidonan a haña otro, ora gerensia a disidí ku ta drei bèk e desishon ku el a tuma. A palabrá, ku pa mas tardá djabièrnè otro siman, lo depositá e plaka retené, bèk riba salario di e trahadónan. Pero a keda e punto di esun dia di trabou ku e trahadónan tabata den akshon.

WILLEMSTAD – “Awor ku servisio di pòst ta bèk den man di Gobièrnu Sentral, lo mester sinta analisá kon ta bai sigui manehá e kompania aki. En realidat tur opshon ta habri”, asina minister di Telekomunikashon ingeniero Maurice Adriaens a deklará ayera.
Pa algun aña, servisio di pòst tabata den man di Canadian Post International, ku a sera un kombenio komo partner stratégiko ku Antia pa manehá e servisio. Pero e situashon no a desaroyá den bon direkshon di manera ku Antia a eksigí pa haña e negoshi bèk.
Pero durante deliberashonnan pa haña servisio di pòst bèk, a surgi sierto komplikashon i reportadamente Canadian Post lo no tabata masha inkliná pa traspasá e montante ku a kumbiní di 13 mion.
Promé minister di Antia Emily de Jongh-Elhage a deklará ayera tardi, ku ofisialmente servisio di pòst ta den man di Gobièrnu Sentral atrobe.
E kanadesnan a kumpli tambe ku loke nan a primintí, esta traspaso di e montante di 13 mion florin.
E 13 mion florin aki, segun el a bisa, ta konsistí por parte di e suma di konseshon, e ta inkluí e montante ku Antia a negoshá pa haña e empresa bèk i vários otro komponente mas.
“Mi ta kontentu i orguyoso alabes di e tim ku a yuda gobièrnu negoshá e asuntu aki. Ta un grupo di profeshonal ku a hasi un tremendo trabou,” asina e promé minister a agregá.

WILLEMSTAD - Fundashon Kuido Humano ta hasiendo trámitenan pa entamá un kaso na nòmber di habitantenan den área di Wishi, Marchena i tur e áreanan afektá, pa daño perhuisio kontra Refineria Isla.
“Nos ke tuma akshon konkreto awor”, asina Norbert George, presidente di Fundashon Kuido Humano a deklará.
Djabièrnè awor, entre 6’or di atardi pa 8’or di anochi lo tin posibilidat pa tur habitante entregá keho. Esaki lo sosodé den Sentro di Bario Wishi/Marchena.
Tur habitante ku a ser afektá pa e konsekuensianan negativo di Refineria Isla por pasa i hasi nan denunsia.
“E por ta daño kontra nan salú, e por ta daño na nan kas i e por ta daño na kualke propiedat, manera por ehèmpel outo. E intenshon ta pa nos hasi un inventarisashon di e daño pa asina weta den ki forma nos ta kuminsá e kaso pa eksigí kompensashon pa e daño aki,” di akuerdo ku Norbert George.
E akshon aki ta indusí pa e último desaroyonan rondó di Refineria Isla ku a okashoná bastante daño i molèster na salú i propiedat di esnan ku ta biba pabou di e instalashonnan di Refineria Isla.
Problema den e planta di koriente BOO a pone ku Refineria Isla a keda paralisá. Konsekuensia di esaki tabata ku e refineria mester a kuminsá fakel, loke a produsí un vlam enorme ku a produsí masha hopi huma pretu, diki, kankan di rut.
Mester a sera algun skol den e área pabou di e refineria, pasobra tantu maestro komo mucha a kuminsá sinti kimamentu di wowo i garganta.