ORANJESTAD- Un recordatorii ta bai na tur instancia y persona cu dialuna 21 di april, lo ta e ultimo dia pa por entrega nominadonan pa Copa Hubenil Gobernador Felipe B. Tromp.
E ganador di e copa lo ricibi e premio dia 30 di april, Aña di La Reina, for di man di Gobernador Fredis Refunjol. Tambe lo tin dos premio di estimulo.
Pa bin na remarke pa gana e copa e nominado of nominadonan no mag tin mas cu 18 aña y mester entrega un descripcion detaya di e logronan durante e ultimo aña, esta for di 30 di april 2007 te cu 31 di maart 2008.
E logronan por ta ariba tereno deportivo, social, cultural y primeramente mester trata di logronan local. Den caso di un grupo hubenil, anto e miembronan no mag tin mas cu 18 aña, apesar cu e lidernan si por ta hendenan adulto.
Na Aruba tin hopi trabou bunita ta tumando lugar na bienestar di nos hobennan, pero no ta tur ta haya suficiente reconocimento. Specialmente den e temponan dificil aki, unda nos hobennan hopi biaha ta bira victima di violencia, drogadiccion, criminalidad etc. nos mester por reconoce e trabou cu hopi lidernan boluntario ta haci pa guia nos hobennan manera den scouting, parti spiritual, musica, teatro, baile, deporte etc.
Tambe mester reconoce e propio esfuersonan di e hobennan cu ta dedica nan tempo liber na deporte, baile, arte, musica, trabou social, educativo y pastoral. Sin duda cu e apoyo di mayornan ta indispensabel pa nos hobennan por dedica algo di nan tempo na nan desaroyo personal.
Un bes mas ta pidi esnan cu ta traha cu hobennan pa entrega nominadonan pa Copa Hubenil Gobernador Felipe B. Tromp pa mas tarda dialuna 21 di april 2008 na señora Nilda Koolman, Zoutmanstraat 1.

ORANJESTAD- Diamars ultimo Minister President sr. Nelson Oduber y Minister di Salubridad drs. Booshi Wever a ricibi bishita di un delegacion for di India, esta di e compania farmaceutico Emcure Pharmaceuticals Limited, consistiendo di e CEO sr. A.K. Khanna y e Vice President sr. Jaideep Kapoor.
E bishita aki ta un ‘follow up’ riba e Memorandum of Understanding cu Minister President Nelson Oduber y Minister Wever a firma dia 13 di December 2007 cu e compania Emcure.
E acuerdo aki ta encera cu Emcure lo traha hunto cu gobierno y AZV p’asina haci posibel cu e poblacion di Aruba lo por beneficia di remedinan na prijs razonabel cu ta encera rebaho di mas cu 40%.
Alavez Emcure lo explora e posibilidad pa uza Aruba como base pa crea oportunidadnan di negoshi den Caribe y Latino America.
E encuentro tabata uno sumamente fructifero, caminda sr. Khanna a haci entrega di un boeki di India na tanto Minister President Oduber como Minister Booshi Wever.

ORANJESTAD- Manera ta conoci caba aña pasa e cadena hotelero Occidental Hotels & Resorts como un bon ciudadano den e pais aki a dicidi di adopta un school na Aruba y den e caso aki nan a escoge Colegio Laura Wernet-Paskel na Kadushi Largo.
Den transcurso di e ultimo lunanan Occidental Hotel a haci varios trabao valioso pa e school aki, entre otro nan a percura pa e school haña un man di verf completo y den fin di aña nan a organisa un actividad festivo pa e alumnonan.
Awor t’asina leu cu diahuebs mainta e gerencia di Occidental Hotels & Resorts a acudi na e school aki y p’asina haci entrega oficial di 10 computer na e alumnonan cu lo uza esakinan pa nan estudio.
Den presencia di Minister President sr. Nelson Oduber, sr. Andres Pichardo y sr. Cardoso di Occidental Hotels, cabesante sr. Rufo Kelly y maestranan di e school a tuma lugar e ceremonia, caminda den su discurso Minister President sr. Oduber a gradici Occidental Hotel pa e gesto bunita y valioso aki, ya cu nan no ta na Aruba pa solamente haci negoshi, pero ta contribui tambe na e comunidad Arubano. Mas contento ainda e alumnonan di Colegio Laura Wernet-Paskel a keda y nan a demonstra esaki cu un fuerte aplauso.

ORANJESTAD- E organisadornan di Funwalk/run di Maria College ta haci un suplica pa tur studiante di Maria College Mavo pa pasa scol.
Tambe ta haci un suplica na tur mayor pa manda e muchanan scol pa e ticketsnan of e placa di e funwalk/run di dia 27 di april 2008.
Ta falta solamente 10 dia y no a ricibi hopi reaccion di parti alumnonan pa e dicho evento. Ta pidi tur alumno pa trece e placa of e tickets nan bek pa por calcula cuanto persona of tickets ya ta bendi.
Ta spera di tende di e alumnonan lo mas pronto posibel.
Pa cualkier informacion tocante alumnonan por yama scol 582-1590 puntra pa Meneer Solagnier of 564-8632 puntra pa Ricky.
Si tin cualkier persona interesa pa cumpra tickets por contact 582-1590 of 564-8632 pa tickets.

ORANJESTAD- Recientemente, UNOCA a firma un contract cu Armand Simon. Desde Mei, e ta bai duna les di piano na Scol di Arte, San Nicolas. E lesnan ta tuma lugar tur diamars atardi.
Lupita Gil, directora di UNOCA, a duna di conoce pa ta hopi contento cu un musico profesional di e caliber aki kier inverti den e desaroyo musical y educacion cultural di San Nicolas.
Diamars 29 di april tin un atardi di inscripcion na Scol di Arte. Entre 2’or y 4’or di atardi lo tin e oportunidad pa sera conoci cu e docente y inscribi pa les di piano. Esnan cu no por ta presente ariba e dia aki por busca un formulario di inscripcion na Scol di Arte. Pa mas informacion por yama 5849168 of 7376797.
Armand Simon
Armand Simon a studia na e conservatorio di Rotterdam, e conservatorio di Utrecht y a sigui master classes serca musiconan internacionalmente reconoci manera Martha Argerich, Udo Reinemann y Earl Wild. Armand Simon a gana diferente premio, entre otro e 3rd prize den e Petrof Competition (1993) y e 1st prize pa mihor interpretacion di un piano concerto di Mozart na Vredenburg (1999).
Como pianista ela presenta entre otro na Hulanda, Belgica, USA, Colombia, Venezuela y Corsow.
Na 1999 Armand a presenta hunto cu e cantante Tania Kross na Concertgebouw di Amsterdam y na 2007 ela wordo invita pa duna un recital den e prestigioso “Festival y Academia del Nuevo Mundo” na Maracaibo. E evento aki ta wordo considera como un di e festivalnan mas importante na Sur-America.
Banda di su actividadnan como docente y musico, Armand Simon ta presidente di Stichting Crescendo. E fundacion aki tin e meta pa stimula y promove actividadnan ariba tereno di musica clasico y pa guia y desaroya talento musical na Aruba.

WILLEMSTAD – E dos billboardnan estilo pantaya di televishon na altura di e lusnan di tráfiko na Biesheuvel a sende atrobe. Despues ku Asosashon Tráfiko Sigur Kòrsou a mustra riba e peligernan di e billboardnan, a duna òrdu pa paga nan, pasó nan no tabatin pèrmit. Entretantu un di nan (esun ku tabata promé) a haña pèrmit miéntras e otro ku a bin despues ta sendé pero ta ainda ilegal. Segun DROV, e ta poné muchu serka kant’i kaminda. (foto Rudney Vrutaal)

WILLEMSTAD – Djasabra awor 19 di aprel 2008, pa 6’or di atardi lo tin kaminata organisá pa hende grandi dor di minister di Salú, sra. Omayra Leeflang i SVB.
Motibu di e kaminata ta pa e hende grandinan move un tiki. Ta konosí ku si bo dal mas o ménos 8000 paso pa dia ku esei ta yuda mantené bo sano.
Tur hende ku partisipá na e kaminata lo haña un stappenteller di regalo ku instrukshon kon usa esaki.
Un invitashon ta bai pa tur hende grandi akudí na e kaminata aki.

WILLEMSTAD – E anual Torneo di Dam ABC ku e aña aki a selebrá su promé lustro, a tuma lugá den wikènt ku a kaba.
E weganan ku a tuma lugá den e edifisio di SSK a mustra ku e timnan di Aruba i Boneiru a progresá hopi, pero no sufisiente pa stroba Kòrsou di gana e torneo pa e di sinku biaha konsekutivo.
E tim di Kòrsou formá pa Firoz Orie, Gedion van Eiken, Mijail Eisden i Quincy Lopez, simplemente tabata un wesu muchu duru pa e kontrinkantenan di Aruba i Boneiru.
E próksimo aña e fórmula di e torneo lo wòrdu kambiá i lo wòrdu ampliá ku un hungadó femenino den kada tim.
Pues Kòrsou kampion, Boneiru sup kampion i Aruba na e terser puesto.
Firoz Orie a sali e Hungadó Mas Balioso, miéntras ku Aruba a risibí un plakat di apresio pa e hecho ku ta nan a inisiá ku e Torneo di Dam ABC.

PHILADELPHIA – Resientemente e gerente general di Houston Astros, Ed Wade a keda informá, ku Miguel Tejada tin mas edat ku loke e tin. Tejada a nase dia 25 di mei 1974 i no 25 di mei 1976 manera ta pará den e “media guide”. E shortstop tin 33 aña rumbo pa 34.
“Durante di entrevista ku prensa a bin sali na kla, ku T ku e edat ku nos tin di Tejada, no ta korekto”, asina Wade a bisa. “Su greencard, su reibeweis, tur kos ku e ta usa personalmente tin pará ku el a nase na 1974. Den e “media guide” tin pará ku el a nase na 1976. Nos a bisa Miguel ku nos lo bai trese kambio den esaki. Pero e kos ta, ku e ta hungando manera un hóben di 25 aña”.
Wade i Tejada a bini dilanti ku e revelashon aki despues ku nan a bin haña sa, ku ESPN tin informashon di e edat aktual di Tejada.
Di akuerdo ku un reportahe riba ESPN.com di e korespondiente Tom Farrey su kolumna “E:60”, durante di un entrevista ku Tejada na Citizens Bank Park, esaki a mustra Tejada un kopia di un papel di nasementu ku su tata a entregá na Bani, Repúblika Dominikana ku ta mustra ku Tejada a nase na 1974.
E dokumento, di akuerdo ku ESPN.com a keda a atkerí dor di un kantor di abogado ku a keda kontratá dor di ESPN despues ku trahadónan na Kranshi na Bani a bisa ku e informashonnan ei ta konfidensial.
“E:60” ta un programa investigativo di un ora na ESPN, ku ta planiá di pasa un programa riba Tejada dia 22 di aprel.
Durante di e entrevista ku Tejada, Farrey ta puntra Tejada kuantu aña e tin i esaki ta kontestá 32 aña. Farrey e ora ei ta mustra Tejada kopia di e papel di nasementu i ta puntr’é si esaki ta esun bon. Tejada a bisa ku probablemente i mesora a tèrminá e entrevista, bisando ku ta algu personal.

MIAMI – Mènèdjer di Braves Bobby Cox a tene un reunion di tim, algu ku masha poko e sa tene. Pero promé ku e último wega di e seri final kontra di Florida Marlins, e “skipper” veterano a disidí di trese su hungadónan huntu pa tin sigur ku nan ta keda di focus durante di e racha malu aki.
“Solamente e tabata kier a rekòrdá nos pa sigui traha duru i sigui purba”, asina Chipper Jones a bisa.”E wega aki no ta fásil i ta un temporada largu”.
For di dia ku Chipper Jones a subi Liga Grandi pa keda na 1995, ta solamente na un par di okashon Cox a tene reunionnan di tim promé ku un wega. Pero ta despues di a pèrdè seis di e último ocho weganan. Braves tabata den un di e rachanan di mas malu. Huntu ku e derotanan riba tereno, Braves a pèrdè tambe dos di nan mihó relevistanan ku ta riba DL, ku ta Rafael Soriano i Peter Moylan. Tom Glavine tambe a leshoná su hamstring, I ta spera di por ta bon di salú pa tira djasabra. Tim Hudson ta spera ku e bahada di su velosidat djarason último no ta pa motibu di un problema físiko.
Tur e kosnan ku a bai malu aki a pone ku Cox a yama un reunion di sinku minüt, kaminda e tabata mustra hopi kalmu.
“Tabatin algu ku mester a keda bisá”, asina Jones a bisa. Nos ta bon. Solamente nos no ta bati e lansamentunan e kaminda korekto i esei ta mata nos. Ora nos dal un bala bon ta nèt riba un hende”.

WILLEMSTAD – E dos billboardnan estilo pantaya di televishon na altura di e lusnan di tráfiko na Biesheuvel a sende atrobe. Despues ku Asosashon Tráfiko Sigur Kòrsou a mustra riba e peligernan di e billboardnan, a duna òrdu pa paga nan, pasó nan no tabatin pèrmit. Entretantu un di nan (esun ku tabata promé) a haña pèrmit miéntras e otro ku a bin despues ta sendé pero ta ainda ilegal. Segun DROV, e ta poné muchu serka kant’i kaminda. (foto Rudney Vrutaal)

Skina di Sorti, awe djabièrnè 18 di aprel di 2008, ta kuminsá ku deseá tur hende un bon dia. Nivel di ambishon sano (lokual nan ta yama den literatura “need for achieve”) kontrali na deseo pa meramente poder, ta provoká mehoramentu kontinuo. E ta provoká hende pa surpasá kompai buriku, den sentido ku miéntras kompai buriku por stot su pia mas ku un bia (pero nunka no na e mesun piedra, na e mesun kaminda), e hende ta evitá stotmentu di pia despues di a konosé e sensashon desagradabel ei.
****
E preshon konstante pa “score” riba tèrmino korto (pa kolmo pa keda alsá den bista di tersera), ta revelá un nivel basta abou di ambishon sano serka hopi aktor den e kontigente di polítiko di turno. Tantu oposishon komo koalishon no ta mustrando mehoramentu den nan prestashon. Ku algun eksepshon, ripitishon di fayo ta demasiado i mas ku tur kos, konsistensha den direkshon ta laga di deseá.
****
Ora bo ta den oposishon i koalishon ta maniobrá su mes for di kosnan chikitu, no tin sentido pa keda mantené e mesun aserkamentu di reakshon riba kasi tur moska ku bula. Na di promé lugá bo ta frustra bo mes, bo ta krea e persepshon di impotensia i te hasta ta kousa iritashon. Hende ta konsiderá bo un “zeur”.
****
Si bo fiha ophetivonan pa bo alkansá den bo akshonamentu polítiko, bo por midi kon bo ta para ante e ophetivonan i por hasi e korekshon nesesario den bo aserkamentu. Último sondeo ku a sirkulá ta mustra ku virtualmente oposishon a bai mas atras den nan posishon ante un dje gruponan mas relevante den e kuadro polítiko ku ta elektorado. Tòg e aserkamentu ta keda unu di “more of the same”.

WILLEMSTAD- Fundashon Sedreko ta partisipá na mayornan di muchanan di entre 6 pa 18 aña di barionan di: Marie Pampoen, Koral Specht, Steenrijk i besindario ku ainda tin lugá pa práktika e deportenan di:
Pin Pon, Dam i Ahedres na Sentro Rekreo Marie Pampoen na Balaoestraat 23.
Tur e aktividatnan aki ta kompletamente grátis.
E lèsnan ku ta wòrdu duná ta na enkargo di hendenan responsabel.
Pin Pon ta riba djaluna i djabièrnè di 3’or pa 5’or.
Dam riba djarason: 4.30 pm pa 6.30 pm.
Ahedres riba djaweps 3’or pa 5’or di atardi.
Mayornan por inskribí nan yunan na Balaoestraat 23 riba dianan ku tin aktividat.
Tur partisipashon ta grátis.
Únikamente ta eksigí rèspèt i disiplina.

Lechi di Mama e úniko base korekto pa desaroyo di yu 

WILLEMSTAD – E minister di Salú Públiko na Ulanda Ab Klink a haña hopi publisidat e siman aki ku su idea pa establesé pa lei ku tur mama mester duna lechi di pechu durante 6 luna largu. E mandatario ulandes ta di opinion, ku konsiderando ku lechi di mama ta e mihó protekshon pa un yu i ku mester obligá mayornan pa hasi esaki tambe. Lechi di mama ta e úniko alimento natural ku ta kontené e protekshonnan pa e yu kontra di diarea, alergia i infekshonnan di pulmon i kanal di urina. Otro bentahanan di dunamentu di lechi di mama ta ku e ta fortifiká konfiansa di e mucha den su mes, e ta forma un bon laso i protekshon entre mama i yu i e ta mas barata, pasobra no mester kumpra lechi pa e yu. Pa e hende muhé mes dunamentu di lechi di pechu su bentaha ta ku su riesgo riba kanser na pechu promé ku su menopousa ta mas chikitu i e ta protehá kontra di biramentu bros di wesunan di e hende muhé despues di menopousa. Na Ulanda 80% di mamanan ku ta duna lus ta kuminsá na duna lechi di mama. Despues tin 54% di yunan ku nase ku ta haña un luna di lechi di pechu. I entre 20 pa 25% ta sigui haña seis luna largu.

Kon e situashon ta na Kòrsou?

E situashon na Kòrsou ta ku kasi tur mama ku duna lusa na hospitalnan òf den klínika maternal ta haña apoyo i sosten pa duna lechi di mama. Pero ora ku nan bai kas i ku nan no tin e sosten profeshonal ta keda solamente 12 pa 13% di yu ku ta keda haña lechi di mama seis luna òf mas. Esaki segun informashonnan di Fundashon Lechi di Mama Kòrsou. E fundashon ku a lanta na 1981 konstantemente a duna informashon i guia na profeshonalnan ku ta traha ku mamanan i nan yunan resien nasí i tambe na mamanan mes pa asina ei konsientisá di kon ta importante pa komunidat kompleto pa duna yunan lechi di mama. Fundashon Lechi di Mama Kòrsou tambe a organisá diferente aktividat pa duna informashon i a hasi esaki invitando tambe profeshonalnan i organisashonnan internashonal pa a bin Kòrsou bin duna informashon.

Mayornan mester bira mas mayor i karga nan responsabilidat!

WILLEMSTAD – Sitek ta kere, ku mayornan mester stòp di pone karga riba nan yunan, ya ku esaki ta hasi ku nan no por funshoná debidamente na skol. Tin muchu problemanan na kas ku mayornan ta laga riba nan yunan ku ta hasi ku nan ta bira agresivo. Den kombersashon ku presidente di Sitek, Bicho Justiana ta opiná, ku mayornan no ta preokupá awendia si nan yunan ta tene relashon seksual si òf no. Tampoko no ta tene kuenta ku nan yunan ku ta keda den sentro di siudat te 7’or di anochi den nan unifòrm di skol. Despues ku outoridatnan a bisa ku nan lo kore ku tur mucha ku tin unifòrm di skol, ta hasi ku e yunan ta hinka t-shirt den nan tas i kambia esaki, di manera ku no por kore ku nan for di kaya.
Sitek ta kere, ku e muchanan lo por dibertí, pero e forma ku e muchanan ke dibertí ta unu for di regla. Mayornan na momentu ku polisnan intervení, semper ta lanta kontra outoridatnan. P’esei awe tin muchanan ku nan 32 aña ya ta wela, ku sigur ta apsurdo pa ku e edat aki tin hende ku ta wela. E mesun situashon aki ta bira un sirkulo visioso den famia, pa despues tin ku kritiká gobièrnu, polis, komunidat, en bes di asumí nan responsabilidat.
Na vários okashon tin diskushon riba e konsepto spiritual i ku ta basa esaki ku regla. Segun Justiana, regla mester ta algu for di kas, ya ku no t’asina ku misa ta pone regla. Meskos ku ora ta trata di regla, hopi ta konsiderá e reglanan aki komo ‘chapo’. Den misa nunka tin regla, pero bèrdat ta, ku mester duna muchanan formashon. Tin hopi ta kere, ku ora bo ta den misa tambe e reglanan ku mester biba kuné ta ‘chapo’, ya ku e muchanan ke biba ku pensamentu liberal. Tambe mester kaba ku e pensamentunan anarkista i kuminsá komportá nan mes ku rèspèt.

WILLEMSTAD – E reserva di 9 ton euro ku Ulanda tin reserva pa Antia i Aruba pa finansiamentu di estudio lo keda repartí pa e islanan pa atendé finansiamentu di studiantenan. Den e bishita ku diputado di Enseñansa, Marelyn Alcalá-Wallé ta realisando na Ulanda tin logronan positivo for di e promé dia. Na e mesa di kombersashon ku ministerio di enseñansa ulandes tin logronan importante pa benefisio di enseñansa di e islanan. Den kombersashon ku diputado Alcalá-Wallé ku a yega na palabrashonnan ku e ministerio pa e plaka ku tin reserva por keda repartí di manera ku por logra atendé e kompromisonan.
Ulanda tin 900.000 euro reserva ku ta alrededor i 2.7 mion florin ku lo mester keda repartí riba e isla. Apesar ku e palabrashon aki ta ku Gobièrnu Sentral, pero den un sistema nobo a palabrá pa repartí di e suma aki bou di e islanan. Asina ku e islanan ku e sistema aki ta kla i ratifiká e akuerdo pa repartí e suma reserva aki. Diputado Alcalá-Wallé ta indiká, ku tin un komishon ku e maneho kla i ku lo bai atendé den un forma kompleto pa mira kiko ta disponibel pa e kantidat di studiantenan ku ta keda kubri.
Durante e reunion tambe Ulanda a mira ku loke ta tumando lugá ku nan ta satisfecho i ku aparte di e atendé ku e parti di finansiero, tambe e trayektoria di estudio i tambe e nombramentu di direktor nobo di SSC. A deliberá profundamente riba e draft ku tin trahá pa ku enseñansa i duna direkshon pa enfrentá un proseso nobo. A diskutí ayera riba e puntonan debil, den kua tambe mester analisá e posishon di Boneiru ku a pidi pa nan ta munisipio di Ulanda. Esaki mester keda atendé riba su kurpa, debí ku semper ora ku ta bin asuntu di beka pa studiantenan e islanan tabata kana pareu.

DIJK-SCHOTBORG
Nolda Crecencia
Mihó konosí komo Noldeis Kapiteis
A laga atras su kasá Wilfred Dijk, yunan Richard i Yvonne Schotborg-Nijverman, Orlando Schotborg i Maria Wilders, Digna Dijk i Michanoe Sirvania, Willem Dijk. Rumannan Idelgo i Bernadina Schotborg, Hubert i Anna Schotborg, Laura i Ronny Scharbaai tur ku nan famia. Akto di entiero ta djaluna 21 di aprel for di misa Koraal Specht pa santana Janwe. Bishita 1or. Promé ku entiero tin un s.s. di misa. Trahe alegre.

OTTO
Edwin Valente Confesor (repentino)
Mihó konosí komo Otto
A laga atras su kasá Ermine Otto-Richardson, yunan Geneitha Otto, Sharine i Gregory Zimmerman-Otto, Kurtwin Otto, ñetu Guilliard Zimmerman, rumannan Claudio i Vivianne Otto-Angela, Glenda i Rudsel Jansen-Otto. Akto di entiero ta djaluna 21 di aprel for di the Methodist Church na Abraham de Veerstraat pa santana Sta. Maria. Bishita 12.30or-3or tin un s.s. di misa.

ELISABETH
Henry Victor
Mihó konosí komo Robby
A laga atras su yunan Sintia i Hesus Elisabeth-Fornorino, Curdniy Elisabeth, ñetunan Jewrzhinio, Shavalley, Terrence, Jaydricka, Sharissa, rumannan Rudy Ramazan, Marcelo Maria, Oscar Troeman, Presilia Mathilda, Bubu Ursulita i rumannan. Akto di entiero ta djasabra 19 aprel for di El Señorial pa santana Memorial Park. Bishita 9or-11or. Promé ku entiero tin un respòns 9.30or na El Señorial.

SERBONY
Robert Felix
Mihó konosí komo Noble òf Rijkseenheids blvd.

Prof. Dr. Lorito, katedrátiko emeritus di informashon relativo ta yama tur hende un felis djabièrnè. Siman a bolbe pasa lihé. Ta kon ta hasi?
****
Tur kaminda ta komentá kon Nini a atendé ku e invershonistanan di Renaissance. Nos tambe ta kere ku su tirada den nan direkshon no tabata korekto. Nos ta respetá e opinion di Nini pa tin un otro pensamentu riba desaroyo di e área di Rif. Pero ora bo tin ku defendé un proyekto (ku niun hende no sa di dje), anto bo no tin ku skòp kontra esnan ku tei kaba i a demostrá ku nan por i ku nan mes sèn.
****
Tin algun kos inkorekto tambe ku nos ta kere ku Nini mester rektifiká. Un di nan ta kaminda el a bisa ku e invershonistanan ta bendiendo e hotèl. Esei sigur no ta korekto. Pa un mandatario bisa un kos asina, esei sigur no ta na su lugá. Ademas e asuntu di “kue” un plan di DROV tambe no ta korekto. E invershonistanan a haña partisipashon den e proseso komo “stakeholder”. Ku otro palabra no ta via di porta patras nan a drenta “kue” nada, pero nan tabata partisipante den e deliberashonnan.
****
Por lo demas, nos ta laga e situashon pa Nini i su koleganan tuma e desishon ku nan ta konsiderá mas korekto. E úniko kos ku nos kier a hasi ta koregí algun ekspreshon inkorekto den e kaso aki. Nos ta spera ku sano huisio lo prevalesé i ku lo tuma e desishon mas korekto i ku ta sirbi interes general mas mihó.
****
Nos a tende e deklarashonnan ku Papa Benedikto 16 a hasi ayera na Merka. Nan a zona meskos ku un konseho di voto pa Barack Obama. E pontífise a bisa latinonan i hendenan di koló ku mihó tempu ta nan dilanti den e pais di oportunidat ku yama Merka. Papa a zona hopi “Obamaísta”.

WILLEMSTAD – Minister di Asuntunan Ekonómiko i di Labor Elvis Tjin A Sjoe a bisa LA PRENSA awe mainta ku e lo ta pará den e promé rei pa defendé e desishon pa duna dia 2 di mei awor liber. “E desishon ta hustifiká”, asina e minister a bisa.
LA PRENSA a informá riba nos portada awe ku e desishon no a kumpli ku e rekisitonan konstitushonal. Ta awor numa, despues di e anunsio, a pidi SER i Raad van Advies pa duna nan opinion riba e desishon.
Minister Tjin A Sjoe a deklará awe mainta pa LA PRENSA ku lei aktual ta bisa ku si Dia di Labor ta kai riba djadumingu, e dia siguiente ta duna liber. Si dia promé di mei ta kai riba un otro dia, manera den e kaso di Asuncion, lei no ta duna espasio pa esei. P’esei a hasi un kambio den lei. Pero pa hasi e kambio aki, tempu ta muchu kòrtiku. P’esei a pasa e desishon i e teksto di e aviso den prensa den Konseho di Minister pendiente e proseso ku mester tuma lugá. E teksto den korant ta papia di pendiente aprobashon di e kambio.
E minister a bisa ku e no ta masha kontentu ku den promé instansha VBC a pidi pa anunsiá e kambio mas tempran posibel pa sektor privá por tene kuenta ku e desishon. Awor ku a anunsiá e desishon, Gobièrnu di Antia a haña un karta ku ta papia di un desishon ku ta mas bien oportunista (“gelegenheidswetgeving). Segun VBC, e tipo di desishonnan aki ta kosta komersio hopi plaka. “Mi ta kere ku tin hende tin derechi pa haña e dia aki liber. Ta un selebrashon internashonal. Na Bèlgika nan a usa e mesun konstrukshon. Nos no a hasi nada straño i nos no por kere ku tin hende kontra”, asina el a bisa.

WILLEMSTAD – Gobièrnu di Antia a pega un barku formal, awor ku el a anunsiá ofisialmente, ku dia 2 di mei ta liber, pero no a sigui e prosedura korekto. No a skucha opinion di Konseho Soshal-ekonómiko (SER) ni Raad van Advies riba e asuntu aki manera Staatsregeling (nos konstitushon ta bisa). Minister di Asuntunan Ekonómiko i Labor Elvis Tjin A Sjoe (UPB) despues di a haña konseho di su Direktorado di Labor, a bai Konseho di Minister ku e proposishon pa duna dia 2 di mei liber. El a haña sosten kompleto di gabinete pa e desishon. Inkluso e aviso ku ta saliendo den e dianan aki pa anunsiá e desishon, a haña aprobashon unánime di Konseho di Minister. Algun minister (di Kòrsou) awor a ekspresá duda, prinsipalmente pa motibu di e prosedura ku a sigui. Un karta fuerte di VBC den direkshon di gobièrnu a añadí na e duda aki.
Miéntras tantu, awe mainta SER a tene un seshon urgente pa wak si ainda e por duna un opinion riba e desishon. Pero den seno di e organisashon nan ta malkontentu ku e prosedura ku a sigui. Es mas, si nan no duna aprobashon na e desishon di e minister, loke ta un opshon, lo por krea e impreshon ku ta SER ta kontra di un dia liber pa komunidat. Di otro banda, Raad van Advies tambe a haña un karta di e minister pa koregí e situashon, pero Raad van Advies si no ta reuní awor aki, pero te dia 5 di mei awor.
LA PRENSA a informá ku karakter di primisia, ku Gobièrnu di Antia lo duna dia 2 di mei liber komo kompensashon pa e hecho, ku dia 1 di mei ta kai riba Asuncion ku ta un dia liber kaba. Den pasado tabatin un regla ku ta bisa, ku ora Dia di Trabou ta kai riba un dia ofisialmente liber, ta duna liber e siguiente dia. E último biaha ku esei a pasa pa loke ta Dia di Trabou tabata na 1913.