WILLEMSTAD – E diferente manifestashonnan ku a tuma lugá últimamente a kosta mas ku 200 mil florin. E plaka akí tabata pa kubri gastunan di Polis, S.K.S. i V.K.C. Debí na e gastunan akí no a sobra sèn pa polis por traha durante tur aktividat di siklismo ku mester tuma lugá e aña akí.
E dos manifestashonnan ku a tuma lugá na Marriott i e diferente medidanan di seguridat ku a tuma na Konseho Insular i Bestuurscollege, a kosta hopi plaka na ofertaim. Durante e manifestashonnan na Marriott, mester a hasi uso di efektivonan di S.K.S. i di V.K.C. pa por a reforsá polisnan. Espesialmente e gastunan pa por pone V.K.C. den akshon tabata haltu, debí ku nan ta un kuerpo boluntario ku sí ta risibí un gratifikashon.. Ta bin aserka, ku na WTC mester a usa espasio pa a ubiká e sentro di komando i tambe pa por a reuní ku tur e timnan ku mester a mantené òrdu públiko.
Debí ku e preparashonnan a kuminsá for di un dia anterior, mester a sòru pa kos di kome i bebe pa esnan ku a traha warda i ku a traha durante henter e dia. Finalmente mester a hür tambe material pa sera kaminda. Tur e kosnan akí a monta un kantidat di plaka. Na dos okashon mester a pone seguridat na tantu Bestuurscollege komo na Konseho Insular. Den e kasonan akí tabatin indikashon ku e manifestantenan lo a bai sea Bestuurscollege òf Konseho Insular pa protestá. Akinan tambe mester a hür material pa sera kaminda i sòru pa kos di kome i bebe pa e personal.

WILLEMSTAD – Un grupo di ménos ku 100 manifestante a rondoná sekretario di estado Ank Bijleveld awe mainta na altura di Katedral di Pietermaai. Na momentu ku e tabata bayendo Konseho Insular, e manifestantenan a rondoná e outo den kua e tabata sintá. Konsekuentemente Bijleveld mester a baha i kana bai Konseho Insular.
Miembronan di partidonan di oposishon a bai Konseho Insular awe mainta pa entregá sekretario di estado Ank Bijleveld un karta. Bijleveld tabatin un enkuentro ku tantu koalishon komo oposishon. Pa e okashon akí a pone relativamente hopi polis i efektivonan di S.K.S. riba pia, pa si akaso e manifestashon lo a eskalá. E partidonan di koalishon a disidí ku nan no ta bai e enkuentro ku Bijleveld debí na nan malkontentu ku e proseso di struktura estatal. E krítika prinsipal di e partidonan ku a forma e Aliansa Patriótiko ta ku, Ulanda ta adaptá e agènda di struktura estatal unilateralmente. Henter oposishon, formando e Aliansa Patriótiko, tabata ousente awe mainta durante e enkuentro. Loke si nan a hasi ta entregá un karta na Bijleveld. Aliansa Patriótiko ta di opinion ku e kambionan den struktura estatal no ta loke pueblo a deseá. Mas aleu nan ta haña ku den 1 ora i mei no por hiba diskushonnan profundo ku Bijleveld.
E manifestantenan ku a reuní na altura di Katedral di Pietermaai ku e karta firmá pa lidernan polítiko di oposishon tabata rumbo pa Ofisina di Representashon Hulanda. Hustamente na e momentunan ei e vehíkulo ku ta transportá e sekretario di estado a yega na e sitio, i a keda rondoná pa e grupo di manifestante. Outoridatnan a disidí pa baha sra. Bijleveld for di e vehíkulo, di manera ku por yega Konseho Insular na pia. Manifestantenan ku gritunan di palabranan bulgar den su direkshon a keda wantá na un distansia di outoridatnan. Na dado momentu un dama a bula dilanti di sekretario di estado, pero ku intervenshon di polis no por a yega mas serka. Komo ku esaki no tabata sufisiente a manda un palabra insolente den direkshon di e sekretario di estado, miéntras ku for di e grupo tambe mas palabra duru a wòrdu lansá.

WILLEMSTAD – Banda di e tremendo resultadonan di 32 medaya komo pais na di 5 lugá i 3 atleta ku a klasifiká pa Mundial di Mexico, un total di 10 rèkòrt di Kòrsou i di Antia di relevo a wòrdu kibrá.
Mucha muhénan 13-14 aña:
Sharonika Mercilia, Tamika Lont, Islelie Silvanie i Karlene Theodora a kibra rèkòrt riba e relevo di 200m estilo liber ku un tempu nobo di 1.58.66. E rèkòrt bieu tabata riba nòmber di Buladó Swimming Club for di dia 13 di desèmber 1997 ku tempu di 1.59.19.
Mucha hòmber 13-14 aña:
Fiorgean Winklaar, Henneley Plantijn, Jourdy Martes i Derrick Bakhuis a kibra dos rèkòrt di relevo.
Riba 800m relevo estilo liber ku un tempu nobo di 8.43.77. E rèkòrt bieu tabata riba nòmber di Sithoc Swim Club for di dia 9 di desèmber 1989.
E di dos rèkòrt ta riba 200m relevo estilo liber ku tempu di 1.44.82. E rèkòrt bieu tabata riba nòmber di Buladó Swimming Club for di 13 di desèmber 1997.
Mucha muhénan 15-17 aña: Christal Loefstok, Kaia Alexander, Zianni Fluonia i Solainy Flounia a kibra kuater rèkòrt di relevo.
Riba 200m relevo estilo liber ku un tempu nobo di 1.55.82. E rèkòrt bieu tabata riba nòmber di Sithoc Swim Club for di 23 di mart 1984.
E di dos rèkòrt ta 400m relevo estilo liber ku un tempu di 4.20.75. E rèkòrt bieu tabata 4.32.90 for di 11 di aprel 1981.

ATLANTA – E hóben picher yu di Kòrsou, Jair Jurrjens lo habri su promé wega pa Atlanta Braves.
Te ainda fanátikonan di Braves tin problema pa pronunsiá su nòmber.
Jurrjens si no tin problema pa bisa “Braves”.
“Djarason mi ta tira mi promé wega pa Braves”, asina el a bisa despues di a tira su último wega di eksibishon den fin di siman.
Jurrjens di 22 aña a lanta komo un gran fanátiko di Atlanta Braves na Kòrsou, pero esaki no pa motibu di Andruw Jones. Dia ku Jones a kuminsá hunga pa Braves, Jurrjens tabatin 11 aña, pero Jair su tata Carl ta un fanátiko di Braves for di dia ku e tabatin 10 aña, promé ku Braves bini Atlanta.
“Un amigu di mi a traha un bate i el a skirbi ariba Hank Aaron”, asina Carl ta bisa via telefon for di Kòrsou. “Asina mi a bira un fanátiko di Milwaukee Braves for di tempu ku mi tabata un mucha”.
Despues ku Jair a keda kambiá pa Braves òktober pasá Carl a bisa: ”Tabata un momento di hopi alegria p’ami. El a bisami, ku mi no mester bira un fanátiko di Detroit Tigers. Mi por keda un fanátiko di Braves”.
Carl Jurrjens lo no bai ta na Turner Field awe nochi. E ta bini mas lat den verano, pero e lo mira e wega na televishon na kas.
Jair a habri e wega di djabièrnè ei na Turner Field.
“Mi a krese mira e parke aki na televishon i awor mi ta picha den dje. Mi ta kere ku lo mi bai disfrutá picha aki”, asina Jair a bisa.

BREDA – E ekipo di NAC Breda por lo pronto no por konta ku e hungadó antiano Tyron Loran. E defensor di 26 aña tin un leshon na su garganta ya ku den e partido di Jong NAC kontra di Jong Willem II, el a haña un kokoti bou di su kachete.
Esaki a pone ku Loran a bin sinti su garganta i esaki a keda molesti’é te ku djaluna e mester a bai hospital. E bosero di e ekipo no por a duna mas detaye di e leshon.

WILLEMSTAD – Ayera mèrdia e èks futbolista di e selekshon di Brazil Romario De Souza Faria a yega Kòrsou ku American Airlines den kompania di su señora i algun amigu futbolista.
Tabatin hopi hende ku a kere ku e notisia aki tabata un “1 aprel mòp’, pero no t’asina.
Romario a yega Kòrsou pa e kompetensia di “Você quer jogar Futebol?” ku lo tuma lugá awe djarason atardi den stadion Ergilio Hato. Esaki ta e final di e kompetensia entre futbolistanan di 13 i 14 aña, kaminda tres futbolista por bai Brazil pa un luna largu praktiká ku e ekipo grandi di Fluminese durante di vakashon grandi na yüli awor.
E tékniko brazilero Clovis de Oliveira t’aki na Kòrsou i a dirigí e kompetensia.
Romario lo ta den SDK for di awe tardi 3’or pa 5’or.
Lo bai tin un wega tambe mañan, pa 8’or, ora ku un ekipo formá di shete hungadó di Brazil hunga kontra di un selekshon di Kòrsou.
Promé ku e partido aki lo bai tin un partido di baby Futbòl.
Karchinan pa e partido aki ta na benta entre otro na: Z-86, Radio Mas, Changes Pro Sport, 4th July Snack i mañan for di 3’or na SDK.
Entrada ta fl5., - general, fl. 15,- bou di dak i fl. 65,- pa VIP, ku ta inkluí snack i drinks.
Miembronan di prensa i fotografnan, tuma kontakto ku sr. Reginald Hato pa por haña un “badge” pa drenta wega.
Buska bo karchi lihé, ya ku ta un oportunidat úniko pa mira Romario den akshon.

WILLEMSTAD – Djadumingu último a tuma lugá den Hòfi Stèrke Yèrke e torneo di Dam Empresarial pa timnan di 5 hungadó.
Un total di nuebe tim a inskribí pa e torneo aki, pero ta shete tim a presentá.
E tim di e negoshi Liveincuracao.com “I See You” a resultá e kampion ganando tur su weganan.
Resultado kompleto di e torneo tabata:
I See You 6-12
Agostinho NV 6-9
Mangusá 6-7
Kombinashon 6-6
Refineria Isla 6-5
DOW 6-3
Aqualectra 6-0

WILLEMSTAD – Den fin di siman tabata aki na Kòrsou e ekipo di basketbòl femenino Dakota Aruba pa hunga algun wega.
E weganan aki tabata bou di ouspisio di CuBaFe.
CuBaFe tabata kier a gradesí tur ku a yuda pa hasi e interkambio aki un éksito i un danki spesial na Sedreko, Lourens Transport, Curaçao Tourism Board i Curaçao Laboratory.
Resultado di e enkuentronan ta:
Djasabra 28 di mart Sithoc Reds Skins ta logra triunfo di 54-36 riba Trotters.
Pa Sithoc e mihó anotadó tabata Enrico Corsen ku 15 punto i pa Trotters Xin Zhou ku 9 punto.
Den e di dos wega di e fecha Dakota Aruba ta sali viktorioso ku skor di 52-22 riba Athene Kòrsou.
Pa Dakota Rishinelle Richardson ku 13 punto. Pa Athene, Corinne Djaoen ku 9 punto.
Djadumingu 29 di mart den e promé partido Dakota Aruba ta logra un viktoria grandi riba Athene Kòrsou di 72-27.
Mylene Maduro tabata e mihó anotadó ku 22 punto i Corinne Djaoen pa Athene ku 6 punto.
Den e último partido Lettermen Bandits ta gana 49-43 den un bon partido di Willemstad Warriors.
Vurney Jansen tabata e mihó anotadó pa Lettermen ku 12 punto i Wilbert Neuman ku 12 punto pa Warrios.

W’STAD/UTRECHT – Resientemente tabatin un bolsa na Utrecht titulá, ‘Second Home’. Esaki ta e di dos bolsa mas grandi di Europa pa esnan ku ke kumpra un di dos kas den eksterior.
Histórikamente paisnan manera Spaña i Fransia semper ta esnan ku ta hala mas atenshon. E biaha aki Antia tambe a haña hopi interes serka e bishitantenan di e bolsa aki. Vários makelar di Kòrsou tabata presente na e bolsa aki pa trata na bende nan kasnan.
E interes haltu pa kumpra un di dos kas serka invershonistanan ta sinta den e hecho, ku awor ta logrando un akuerdo pa sanea e debe nashonal i tin éksito ku kombatimentu di kriminalidat.
Otro faktornan ku ta hunga un ròl ta e ulandesnan tin un bon entrada i e kambio di euro pa dollar/florin ta hopi atraktivo. Esaki ta hasi e preisnan di kas aki na Antia hopi faborabel kompará ku e otro paisnan tradishonal.
Desaroyadónan di proyekto ta hopi alerta na e interes kresiente for di Ulanda. E biaha aki tabatin un kantidat rèkòrt di stènt na ‘Second Home’ di Kòrsou i Boneiru.
Indikashonnan ta, ku Boneiru sigur ta probechando di e eskohensia di laso direkto ku Ulanda. Awor ku ta bon kla ku Den Haag ta responsabel pa seguridat, kuido médiko, enseñansa i infrastruktura, mas hende tin konfiansa pa kumpra un di dos kas na e otro parti di oséano. Esaki ta alkaresé e motibu pakiko tin asina tantu stènt di Boneiru.
E lokual tabata keda ofresé pa loke ta kas na e bolsa aki, tabata varia di kasnan normal te e vilanan mas luhoso den resòrt. E preisnan tabata varia di shen mil te ku un mion florin pa kas.

WILLEMSTAD – E lidernan polítiko di MAN, Forsa Kòrsou, Niun Paso Atras, PLKP i Pueblo Soberano a firma un karta pa sekretario di Estado Ank Bijleveld ku nan lo no presentá pa e reunion di Komishon Sentral. E partidonan ariba menshoná ku ta forma Aliansa Patriótiko i ku tin representashon den Konseho Insular, a disidí ku nan frakshon lo ta den e enkuentronan di Komishon Sentral. E motibu ku e partidonan a formulá e karta aki ta pa e echo ku e trayekto di struktura estatal a pasa i ku no tin masha klaridat riba e posishon aktual. E karta ta mustra, ku pa nan ta imposibel riba e base di preparashon i kòmbersashonnan diametral por sigui profundisá i interkambiá di ideanan.
Nan ta mustra, ku anteriormente kaba a interkambiá den kombersashon pa por yega na un base amplio di ideanan tantu ku Gobièrnu Sentral komo Gobièrnu Ulandes. Finalmente ta mustra, ku nan ta deseá si di tin un kòmbersashon ku sekretario di Estado pa profundisá den pensamentunan ku tin en bes di partisipá den e reunion di Komishon Sentral.

WILLEMSTAD – Delegashon di piskadó a sorprendé delegashon di Marina Real ku denunsia di “Kogelvergiftiging” durante nan reunion ayera. Manera ta konosí un delegashon di piskadó formá pa Sonny Hooi, Carlos Martinez i Erwin Koenze a bishitá Marina Real pa nan enkuentro pa dialogá riba e problemanan ku ta surgi pa motibu di entrenamentu di Marina Real. E reunion aki p’e diálogo a bai den un direkshon den kua piskadónan a pone nan kondishon pa stòp e entrenamentunan ku ta tuma lugá den área di Wacawa. E grupo di piskadó aki ta den representashon di piskadónan Boka Sami, Santa Martha i Westpunt.
Manera ta konosí djasabra último piskadónan den nan seno a deliberá promé ku e reunion ku a tuma lugá ayera pa fiha nan posishon di manera ku lo presentá nan pensamentu dilanti di e kuerpo di Marina Real ku tabata presente. E kuerpo di Marina Real a keda formá pa Hans Schreuder, direktor interino di Warda Kosta i tambe Roderick Gouverneur, relashonista públiko di Warda Kosta. E komandante Peter Lesenlink no por tabata presente debí na ehersisionan ku ta tumando lugá na Sürnam i ku e mester tabata presente pa esakinan. Durante di e diskushonnan riba e problema agudo delikado i serio aki, por a komprendé ku nan tabatin nan reunion promé ku e komandante a sali pa eksterior. Esaki a duna su punto di bista pa bin mesa di diálogo, di kua e piskadónan a rechasá kategórikamente. Den e enkuentro aki naturalmente e tópiko kayente tabata presentashon di e problema relashoná ku tiramentu durante entrenamentu militar fuerte di tera pa laman.

LAK
Griselda Elisabeth (86 aña)
A laga atras su yunan Airene, Viola, Cicilia, Glenda, Alvise Lak, Cecil i Charisse Lak-de Jongh, Claudette Lak i Rene Abath, Errol Lak i Milady Alexander, Solange i Daf Adames-Lak, Sunilda i Emery Pengel-Lak. Akto di entiero ta djasabra 5 aprel for di misa Sta. Famia pa santana Roodeweg. Bishita 1or. Promé ku entiero tin un s.s. di misa 4or.

MARTINA
Rafelito Mateo (trágiko 26 aña)
Mihó konosí komo Ito òf Rafa
A laga atras su mama Rose-Marie Luciana, yunan Rylainsos Martina, Ryliantha Johanna, rumannan Jessica Martina i Rouven Brigitha, Rofarly i Sudaily Martina, na nòmber di Emilen Johanna, Vyrnalies Thodé. Akto dientiero ta djasabra 5 di aprel 3.30or for di El Señorial pa santana Barber. Bishita 1or. Promé ku entiero tin un s.s. di misa na misa Barber. Trahe alegre.

RICARDO
Anbtonio Nestor
Mihó konosí komo Toni
A laga atras su kasá Aura Ricardo-Olaria, yunan Anthony Marshall, Austra-Ricardo, rumannan Cecilia, Rosmary, Gabriel, Oscar Ricardo tur ku nan famia. Akto di entiero ta djabièrnè for di El Señorial pa santana Memorial Park. Bshita 1or-3.30or. Promé ku entiero tin un respòns.

KROONSADT
Marvel Roderick (trágiko)
Mihó konosí komo Mafy òf Mafia
A laga atras su mama Corrine Kroonstadt i Milton Aniceto, tata Michael i Carla Janga, mama sin doló Inka Sparen i famia, yu ZLakisha Hooi, rumannan Eugene i Adriane Kroonstad, Dayanarrah Kroonstadt, Sharlon Kroonstadt, Jennifer i André Janga, wela Simona Janga. Akto di entiero ta djasabra 5 di aprel for di El Consolador pa santana Roodeweg. Bishita 1or. Promé ku entiero tin un rèspòns 3.30or na El Consolador.

BENOIT
Derick Woltan
Mihó konosí komo Deringo
A laga atras su kasá Pauline Benoit-Peltier, yunan Walton Benoit i Gerda, Rosetta Benoit, Jessel Benoit i Percy Melfor, Joan Benoit i Frans Bosman, Faina. Akto di entiero ta djaweps 3 aprel for di El Consolador pa santana Sta. Maria. Bishita 9or. Promé ku entiero tin un respòns 10.30or na El Consolador.

MARTINA-DA COSTA Gomez
Maida Eusevia (repentino)
Mihó konosí komo Maida ku tabata kose
A laga atras su kasá Stanley Martina, yu Darlene i Jeritson Cleopa-Martina, ruman Edsel da Costa Gomez, ñetunan Jeedany Cleopa, Farienne Ignacio. Akto di entiero ta djabièrnè 4 di aprel for di El Consolador pa santana Sta. Maria. Bishita 1or. Promé ku entiero tin un s.s. di misa 4or na misa Sta. Maria.

MARIA
Silvino Eulalio Siegfried
Mihó konosí komo Fifi magazijnmeester di Arti Supermarket
A laga atras su partner Aina Regales, yu Stephanie Maria, rumannan Merlin i Franco Obispo-Maria, Vayo i Frans de Deugd-Maria, suegra Edorita Inees. Akto di entiero ta djabièrnè 4 di aprel for di misa Sta. Famia pa santana Sta. Maria. Bishita 1or. KOPRA-JANO

Olga
A laga atras su yunan Rodney i Shirley Jano, Ludson i Miriam Kopra, Elmiro, Shubert, Harison Kopra, Nihaila i Oswin Rijke. Akto di entiero ta djabièrnè 4 aprel 3.30or for di El Consolador pa santana Willibrodus. Bishita 1or. Promé ku entiero tin un s.s. di misa na misa Willibroruds.

VINCK
Franklin Edward
A laga atras su kasá Geraldine Vinck-Cathlin, yunan Carl i Marielies Vinck, Kristie Vinck, Gerald Vinck, Chester Vinck, yunan di kriansa Carjenne Cathlin, Gercival Cathlin, mama Melba Vinck-Santine, rumannan Marshall Vinck, Harold i nan famia, suegra Hubertina Cathlin-Rietwijk. Akto di entiero ta djabièrnè 4 aprel for di misa Janwe pa santana Berg Altena. Bishita 9or. Promé ku entiero tin un s.s. di misa 11or.

STATIUS
Edmundo Leopoldo
Mihó konosí komo Blanku
A laga atras su rumannan Simon i Lelia Statius, Johanita Jamanika, Rosa i Willy Djaoen, Ricardo i Evelina Statius, Luperio i Aura Statius, Karel Vrutaal. Akto di entiero ta djaweps 3 di aprel 3.30or for di El Tributo pa santana Soto. Promé ku entiero tin un s.s. di misa na misa Soto. Bishita 12or.

PADMORE-ANTONIA
Diana Simona
A laga atras su ruman Maureen Antonia, subrino(a)nan Idelberth, Wilberth, Shamir, Jahiara Antonia, Iestika Lutje Schipholl, Djerren Sambo. Akto di entiero ta djaweps 3 di aprel 9or-11or, for di Bottelier pa santana Bottelier.

ALBERTO
Julianita Dorothea
Mihó konosí komo Ula
A laga atras su yu Sigmaira Alberto, ñetu Igabriel Alberto, bisañeta Siyona Martis, rumannan Sabino Alberto, Luquita Raphaëela i nan famia. Akto di entiero ta djarason 2 di aprel for di El Señorial pa santana Barber. Bishita 1or-3.30or. promé ku entiero tin un respòns na El Señorial.

DE LA PAZ
Virgilio Andresito
Mihó konosí komo Vi
A laga atras su yunan Devin de la Paz i Dagmar Hediak, Rocheline i Alexis van Aanholt-de la Paz, Ulrich de la Paz, rumannan Frida Phelipa-de la Paz, Ivonne Leocadia de la Paz, Ruth, Judith, Harold, Gilbert, Anthony de la Paz. Akto di entiero ta djaweps 3 di aprel for di misa Sta. Maria pa santana Sta. Maria. Bishita 1or. Promé ku entiero tin un s.s. di misa 4or.

ROOI
Errol Roberto (54 aña)
A laga atras su partner Ronnie Vermeulen, yunan Orina de Leij, Thaïsha de Leij, David Rooi, rumannan Milto i Emmy Rooi, Elvira Rooi, Edwina i Carolus Antersijn-Rooi, Elfriede i Genaro Jean Louis-Rooi, Edsel i Aluishka Rooi. Akto di entiero ta djarason 2 di aprel na Ulanda.

HORTENCIA
Ismaël Marco
Mihó konosí komo Isma
A laga atras su kasá Judith Hortencia-Paula, yunan Heinrich i Fereal Hortencia, Judeska Hortencia, yunan di kriansa Jaïro i Jerzho Martha, Djureena i Djureeny Peternella, Zaid i Rannick Paula. Akto di entiero ta djarason 2 di aprel for di misa Sta. Famia pa santana
Roodeweg. Bishita 1or. Promé ku entiero tin un s.s. di misa 4or.

NIVILLAC
Victorino Theodulio
Mihó konosí komo Theo
A laga atras su kasá Irena Nivillac-Manuel, yunan Axel Valentyn, Germine Niessne-Nivillac, Edsel Nivillac, Arthur Nivillac, roland Kock, Farrida da Costa Gomez. Akto di entiero ta djaweps 3 di aprel 4or for di misa Brievengat pa santana Betania. Bishita 1or. Promé ku entiero tin un s.s. di misa 4or.

HIJGEMANN
Johannes H.
Mihó konosí komo Jan
Akto di entiero ta wòrdu anunsiá despues

LEITO-FRANSISKA
Justina
Mihó konosí komo Tina
Akto di entiero ta wòrdu anunsiá despues

BAROMEO
Jozef Antonio
Mihó konosí komo Buis
Akto di entiero ta wòrdu anunsiá despues

BODOK-VIUDA
Fransikita de Asis
Akto di entiero ta wòrdu anunsiá despues

MARTINA-DA COSTA
DE WINDT
Julian Obispo (repentino)
Akto di entiero ta wòrdu anunsiá despues

LA PRENSA ta manda kondolensia na famianan

Skina di Sorti, awe djarason 2 di aprel di 2008, ta kuminsá ku deseá tur hende un bon dia. Miembronan di Tweede Kamer i gobernantenan ulandes, entre kual sekretario di Estado enkargá ku Asuntunan Antiano, drs. Anke Bijleveld, aparentemente ta siegu pa asuntu ku ta prioridat real di e respektivo komunidatnan antiano. Prizònnan, seramentu di refineria i e dòlfeinnan ku ta atraé turista pa Kòrsou, ta puntonan di prioridat di “de politiek” ulandes, pero no ta ni remotamente lokual tin nivel di bida di gran parti di komunidat, na e nivel di mediokresidat ku e ta.
****
Ta bèrdat ku segun kriterionan oropeo (òf mihó bisa ulandes) nivel di bida denter di prizònnan antiano ta laga di deseá. Pero prezunan, den nos pais no ta entre esnan mas vulnerabel. Nan ta kome kuminda di kalidat, na ora, i sufisiente, miéntras tin muchanan inosente ku no ta kome ni sufisiente, ni na ora i tampoko sufisiente. Tin sifranan ku ta mes òf te hasta mas lihé asesibel pa “de politiek” ulandes ku lokual nan ta akshoná riba dje pa asuntunan den i rondó di prizòn.
****
Embaraso hubenil, entre kual di muchanan ku ta bai skol i muchanan menor di 13 aña, segun notanan di atvertensia di instansianan konserní ta oumentando den forma aselerá. Malesanan venériko bou di hóbennan, apesar di e programanan di atvertensia i konsientisashon, a bolbe kue direkshon di kresementu aselerá.
****
Partisipashon di hóbennan den trafikashon di droga i adikshon na droga i alkohòl tambe ta ku tin instansianan konserní basta preokupá. Presidente di Sitek, Bicho Justiana na diferente okashon, riba diferente foro a bini ta ekspresá su preokupashon pa e violensia grave ku a drenta plenchi i klas di skol.

Lorito ta yama tur hende un felis djarason. Basta hende a kai den e trampa di 1 di aprel. Tabatin diferente informashon ku ta pone hende pensa kon tin hende por kere sierto kosnan. Esun di Extra pa loke ta trata e kaha di morto na kandela tabata bon pensá i masha hende a koment’é. Hasta den eksterior nan a papia riba e kaso aki i ya kaba tabatin hende a reservá pasashi pa bin wak e fenómeno.
****
Un otro chiste ku a hala atenshon tabata e retiro di Jean Fransisca for di NAVU pa diferensia di opinion den futbòl. Ta ken por kere ku Jean lo laga un puesto asina atraktivo bai? Tabatin esun di detenshon di e reportero A.M. ku nos a ripará mesora ku no por ta pasobra A.M. ta hende serio. Esun mas serio tabata ku Sint Maarten a pidi Merka pa e bira estado asosiá. Un korant kolega a poné riba promé página! Na Ulanda Antillenhuis a kue e informashon mand’é pa tur hende sin buska drechi ku ta un chiste di promé di aprel.
****
Por sierto ku Antillenhuis tabata ariba abou awe mainta na momentu ku a parse manera kos ku tabatin asbèst den un di e edifisionan. Mester a desalohá un parti i manda diferente hende kas pasobra e otro edifisio (Antillenhuis tin dos edifisio) no por a akapará tur hende. Despues di un tèst a determiná ku tabata un alarma falsu. Mañan tur hende lo bin traha bèk.
****
Pluvius mes a disidí ku tin un kos ku no ta bon ku e selebrashon di 70 aña di Staten na Alameda. E mes a disidí di tuma medida. Awa a basha bin abou. Pluvius lo a pensa ku un kos di pueblo i pa pueblo na flus ta un poko raro. Ademas Pluvius a spanta di tur e kosnan ku el a tende, sigur ora un hende duna kátedra i e mes no a duna e mihó ehèmpel. Doktor a pidi pa tur hende bai studia pero a pidi tur hende tambe pa bin yuda nan pais! Algun hende a hasié den forma kontrali: nan a bai studia i bai traha pa otro hende. Otronan a bin traha aki pa nan mes interes i den algun kaso hasta a hinka sèn den nan mes saku! Hesus Doktor lo ta bòltu den su graf!

WILLEMSTAD – Eks minister i eks parlamentario Marco de Castro, a pidi presidente di Staten Pedro Atacho atenshon pa e tenshon kresiente den nos área. E eks dirigente ta bisa, ku no mester pèrmití pa usa suela di Antia pa ataká otro paisnan. E ta referí na publikashonnan na Venezuela den sentido ku usa avionnan di Merka stashoná na Kòrsou (na e base FOL) pa lokalisá i bombardiá e movementu gueriero FARC na Ecuador.
Den un karta pa presidente di Staten, De Castro ta bisa, ku últimamente tin un tenshon kresiente spesífikamente entre e maneho di presidente Chávez di nos pais bisiña, esun di Colombia i esun di presidente Bush di Merka. “E último konfrontashon tabata na frontera di Ecuador, kaminda Colombia, e gran aliado di Merka a bombardiá algun rebelde riba teritorio di nan bisiña, sin pèrmit di e presidente di Ecuador, un gran aliado di presidente Chávez i otro paisnan bisiña di Colombia. Nos tur sa kuantu tenshon e kos aki a kousa den nos region te dia a yega na un bon final na Sto. Domingo. Sinembargo ainda tenshonnan no a kaba. Segun prensa awor ta resultá ku Colombia lo a rekonosé ku e bombardeo a tuma lugá, ku apoyo formal di Merka i su avionnan sofistiká. Loke awor tin Ecuador i Venezuela masha preokupá i loke mester ta un gran preokupashon pa nos tambe, awor ku presidente Chávez ta sospechá ku ta avionnan merikano stashoná na e F.O.L. na Kòrsou lo a ser usá pa lokalisá i bombardiá e miembronan di FARC riba tereno di Ecuador. Esaki ta hinka nos pueblo den un skina ku nos ningun no a deseá nunka. Kòrsou i Venezuela tin un historia masha largu di amistat, familiar, komersial i hasta di refugio pa venezolanonan. Ku Merka tambe nos tin un historia largu di masha bon relashon, komersial i di amistat, etc.”, asina De Castro ta bisa.

Sarah Wescot-Williams (Sint Maarten):

WILLEMSTAD – Lider di DP-Sint Maarten ku ta alabes diputado di Struktura Estatal Sarah Wescot-Williams, a lamentá ku no a sigui e palabrashon ku promé ku tuma un desishon riba eventual posponementu di e fecha di 15 di desèmber pa desmantelashon di Antia, a diskutí e asuntu aki polítikamente promé. Meskos ku na Kòrsou, na Sint Maarten tambe e karta ku sekretario di Estado Ank Bijleveld a kousa un sorpresa kompleto.
Un di esnan sorprendé ta sra. Wescot-Williams ku por sierto tabata na Kòrsou ayera i awe. Ayera el a papia ku promé minister Emily de Jongh-Elhage i diputado Zita Leito, miéntras ku awe el a keda di papia ku sra. Bijleveld ku ta hasiendo un bishita informal na Kòrsou.
E dirigente polítiko a bisa, ku tabata konosí ku e ekspertonan tékniko ulandes a bisa, ku nan no ta kere ku e fecha di 15 di desèmber ta alkansabel. “Pero a palabrá, ku lo hasi un planifikashon realístiko i ahustá, pero nos no a haña un chèns pa hasi esei”, asina sra. Wescot-Williams a bisa. Di tur manera, mester papia riba un fecha pa realisashon di desmantelashon di Antia, segun e diputado.
Pa loke ta trata e diskushon riba puntonan ku a bin dilanti ku ta kondishonnan fuerte pa e isla haña su status Outónomo den Reino, sra. Wescot-Williams a bisa, ku por atendé e puntonan aki despues di e fecha di 15 di desèmber. Ku otro palabra, e no ta kere ku mester a hala e fecha, pasobra lo no keda kla ku tur kos. Loke mester a pasa ta, ku mester krea un mekanismo pa asuntunan ku no keda kla. Den e situashon nobo ku lo surgi despues di 15 di desèmber, e ora ei e mekanismo aki lo mester a sigui atendé e puntonan pendiente, asina sra. Wescot-Willliams a bisa. Su ponensianan ta parse sinembargo di a bin un poko lat, komo ku ya e fecha di 15 di desèmber no ta parse masha relevante mas.

WILLEMSTAD – E restorashon di Bolo di Batrei, un di e edifisionan mas remarkabel di Willemstad, a eksigí hopi estudio i preparashon. Asina sra. Nolda Römer-Kenepa, direktor di Archivo Nashonal, a bisa ayera na Firmamentu di Kontrato pa Renobashon di e edifisio.
Sra. Römer-Kenepa a bisa ku tabatin dos motibu pa atendé e asuntu aki ku e koutela nesesario. Na promé lugá e edifisio ta den un estado prekario, ya a hasi vários “noodherstel”, pero mester di restorashon integral i profundo awor. E edifisio aki ta un monumento, ora ta bai restorá mester kumpli ku tur e reglanan i leinan vigente tokante renovashon di monumento, tantu esnan lokal komo esnan internashonal. Mester tene kuenta ku e reglanan aki, pasobra Bolo di Batrei no ta solamente nos patrimonio pero e ta forma parti di e patrimonio di mundu henter, ya ku e ta un di e edifisionan monumental den nos pais, ku ta kontribuí pa nos kapital ta riba e lista prestigioso mundial di patrimonio di UNESCO. E ta un di nos edifisionan di mas bunita i ta un atrakshon tantu pa nos mes komo tambe pa strañeronan, ku ta gusta bin saka nan pòtrètnan. Nos tur ta anhelá pa mira e edifisio aki pronto bèk manera e tabata den su tempunan di gloria, pa nos mes por ta orguyoso di dje, pa garantisá nos posishon riba e lista di patrimonio mundial di UNESCO i pa e por sigui sirbi pa promoshon turístiko, lokual ta importante pa nos ekonomia.
Na di dos lugá Bolo di Batrei mester sirbi tambe komo edifisio pa Archivo Nashonal por kumpli ku su tareanan. Konstrukshon di un edifisio di archivo ta reglá pa lei di Archivo di Antia. P’esei mester tene kuenta ku sierto norma i eksigensianan nesesario pa preservá dokumentunan i tambe pa por duna e servisio na públiko, ku e meresé.

WILLEMSTAD - Djaluna dia 31 di mart Hospital St. Elisabeth a honra su hubilarionan ku a kumpli 12½, 25, 35 i 40 aña di servisio den e promé kuartal di 2008. E aktividat a tuma lugá den Sala di Hunta di Supervishon di Hospital mes, den un ambiente ameno ku famia, i kolega di e hubilarionan.
Miembronan di Hunta di Supervishon i Hunta di Direktiva a entregá e ènvelòp ku kontenido na hubilarionan, un feneta ku emblema di hospital i un ramo di flor. E hefe di servisio di e respektivo hubilarionan a dirigí algun palabra.
Sr. Eric Garcia, Presidente di Hunta di Supervishon, a hiba un diskurso elokuente den kua el a ekspresá gratitut na e hubilarionan i nan famia, pa nan dedikashon durante nan añanan di servisio i nan amor pa sirbi nan próhimo. Hunta di Supervishon i Hunta di Direktiva di Hospital St. Elisabeth ta satisfecho pa e labor ku e hubilarionan a ehersé durante en total 245 aña, i na nòmber di tur ku ta pertenesé na e instituto di kuido médiko aki, ta yama nan masha danki pa nan lealtat i kuido duna na e pashènt.
Athunto potrèt ku miembronan di Hunta di Supervishon, Hunta di Direktiva i e hubilarionan ku nan respektivo añanan di servisio i e Departamentu kaminda nan ta traha.
Por mira di robes pa drechi sr. drs. Sidney Ricardo direktor Ekonómiko Finansiero interino, sr. mr. Elco Karel miembro di Hunta di Supervishon, sra. Shirley Martis-Treurniet Msc miembro di Hunta di Supervishon, sra. Eveline Ocalia-Archangel 35 aña ‘Kinderafdeling’, sra. Carline Victoria 12½ aña ‘Interne Vrouwen’, sra. Ilonia Vrutaal 35 aña ‘Centrale Keuken’, sra. Anna de Palm 25 aña ‘Anna Paviljoen’, sra. Carla Antersijn 40 aña Radiologia, sra. Solemma Emanuel 25 aña ‘Centrale Sterilisatie’, sra. Sharlien Martina 12½ aña ‘Huishouding’ sr. Eric Garcia presidente di Hunta di Supervishon, sr. ir. Norbert Chaclin miembro di Hunta di Supervishon i sinta di robes pa drechi sr. Johnny Mauricia 35 aña ‘Centrale Sterilisatie’, sr. Roderic Alberto 12½ aña Radiotherapia i sr. dr. Sirving Keli 12½ aña Stafbureau Planning Epidemiologie en Biostatistiek.

Pronto lo hiba kòmbersashon ku Komishon Oropeo

WILLEMSTAD - Antia Ulandes pronto lo manda un delegashon Oropa pa papia ku representantenan di Komishon Oropeo. Ta trata aki kòmbersashonnan ku e Direktorado General di Belasting di Komishon Oropeo tokante di e hecho ku nos pais ta aparesé riba lista pretu fiskal di algun pais di Union Oropeo.
E kombersashon ku Komishon Oropeo ta resultado di un petishon ku Sekretario di Estado di Finansa, sr. Alex Rosaria, a hasi algu mas ku un aña pasá na e Ministerio di Finansa Ulandes.
“Loke ku Antia lo hasi ta kombensé Komishon Oropeo ku nos régimen fiskal debidamente ta kuadra ku reglanan internashonal i Oropeo. Una bes nos logra esaki, Antia lo pidi i ferwagt ku Komishon Oropeo lo hasi tur ku ta na su alkanse pa eliminá nos pais for di e listanan negativo aki”, segun sr. Rosaria a splika.
E kitamentu di nos pais for di e listanan anteriormente menshoná ta un prioridat di e maneho ku Gobièrnu a bin ta hiba pa loke ta trata e sektor finansiero internashonal. Na vários okashon sr. Rosaria a trese dilanti su malkontentu ku e hecho ku no ta eksistí reglanan internashonal i transparente pa pone paisnan riba lista pretu. Den práktika esaki ta nifiká ku tur pais ta liber ta pone un otro pais riba su lista pretu.
Te leu ku Gobièrnu ta na altura, nos pais ta aparesé riba mas o ménos 14 lista pretu, inkluyendo e paisnan di Union Oropeo Polonia, Italia i Gresia.
Aña pasá Antia ku éksito a logra di keda kitá for di e lista pretu di Mexico. Pa loke ta trata esfuersonan pa keda eliminá for di lista pretu di Brazil, sekretario di Estado Rosaria, tin programá pa durante un bishita huntu ku CIFA na e pais suramerikano aki den aprel, papia ku outoridatnan brasileño di e tema aki.

Pa proyekto 'di Lèter pa Palabra' ;

WILLEMSTAD - E organisadónan di e proyekto, Selikor, Banco di Caribe, Fundashon Kòrsou Limpi Bunita i NRG ta satisfecho di e forma kon e skolnan, ku a inskribí, ta prepará kada alumno pa nan kompetí i deletrá pa asina hasi bon uso di nos idioma Papiamentu.
E skolnan ku den e último dos simannan a organisá e kompetensia ta Skol Cola Debrot, Skol St. Famia, Skol Mirna Dovale, Kolegio San Hose, CML Maduroschool, Kolegio Don Sarto, Adventschool, St. Franciscus College i Skol Alablanka. Nan tambe tin nan finalistanan ku lo bai prepará pa e di dos tanda pa nan tambe por broma ku nan idioma. Ta di apresiá kon e dosentenan i mayornan ta sostené tur e partisipantenan.
E siman aki e kompetensha na skolnan ta sigui tanten ku e finalistanan lo bai sigui prepará pa e di dos tanda ku lo tuma lugá riba e dianan 24 i 25 di mei próksimo. E último bloke di skolnan ku lo bai organisá e promé tanda ta Kolegio Dodo Palm, San Martin de Porres, Angela Jessurun, Marieta Alberto, Skol St. Maria, Oranjeschool, St. Paulus College, Prins Bernardschool, Prinses Magrietschool, Kennedy School, St. Joris School, Skol Imanuel, Kolegio Chaya Willems, Kolegio San Dominico, Skol MC Piar, Skol Nelly Winkel, Laura Hartschool, A.E. Goiloschool, Mgr. Nieuwindt College, Bellefaas Martis i Van Houtenschool. Despues di e grupo aki tur e finalistanan ku ta pasa pa e di dos tanda ta konosí.
E tim organisadó ‘di Lèter pa Palabra’ ta felisitá tur e finalistanan i ta deseá éksito na tur e alumnonan ku ta preparando pa e kompetensia. Sigui hasi boso esfuerso i sea un bon ehèmpel na e komunidat di Kòrsou kompleto kon boso ta desaroyá e talento i kapasidat di deletrá riba un nivel haltu den nos idioma papiamentu. Nos ta deletrá ku siguransa i bisa: