ORANJESTAD- E actuacion di Minister Presidente Nel Oduber ta confirma cu e ta den su ultimo dianan como politico, ya cu ningun politico sensato, cu ta pensa riba su futuro politico, lo haci loke Nel ta hacienda. Den un forma nunca antes bisto, Nel ayera a sigui desafia lidernan sindical y lidernan di otro gremionan den comunidad, dor di invita sindicatonanden accion pa sinta na mesa na su oficina den e edificio di Gobierno, pa despues lanta bai laga tur hende na mesa di supuesto negociacion. Gobierno, esta Nel Oduber, a nenga di acudi na e invitacion cu a ser haci pa Camara di Comercio y otro organizacionnan, pa sinta na mesa di negociacion cu sindicatonan den accion ayera merdia 1’or, pa trata di yega na un acuerdo riba e asuno di indexering, y asina pone un fin na e conflicto aki cu tin cinco siman andando caba. Gobierno a manda informa e grupo cu a ofrece nan mes pa haya e dos gruponan akin a mesa, cu nan lo no presenta pa e reunion akin a Radisson Hotel pa 1’or di merdia, pero cu Gobierno ta invita e lidernan sindical, pa bin reuni na oficina di Gobierno pa 3’or di atardi y asina sigui descuti riba e asunto aki. Pa e sindicatonan esaki no tabata problema pero pa indignacion di e sindicatonan y nan miembronan cu a bai para pafor di edificio di Gobierno pa spera resultado di e reunion, mesun rapido cu e reunion a wordo yama pa gobierno, mesun rapido el a termina tambe. A bin resulta cu Premier Oduber a hinca un plan den otro y ora cu el a haya e sindicatonan na mes, el a bisa nan cu su Gobierno no ta reunion y discuti ningun condicion di trabou, ora cu tin “trekkernan” blokiando trafico dilanti di oficina di Gobiero, loke no a sosode mes henter dia.
ORANJESTAD- Ayera e sindicatonan den accion a bai na medidanan mas drastico y pa banda di 9’or di mainta, varios trekker y otro autonan, a blokia tur entrada pa tereno di waf na Oranjestad y inclusive a blokia tur pasada banda di e turbo retonde cu ta bai direccion di Oranjestad. E accion aki a paralisa tereno di waf por complete y ningun actividad comercial por a sigui su curso ayera y tanto comerciantenan como esnan cu tin tourbus, a keda sin por a haci nada. Polisnan a presenta na e sitionan pero no por a haci mucho cos ya cu fuera cu Cuerpo Policial ta actuando aworaki cu e asina yama “minimale besetting”, polis no tin material pa actua den un caso asina y caminda nan por hala e trucknan grandi aki. Sinembargo mey mey di esnan den accion, por a mira un cantidad di miembronan di Cuerpo Policial di Aruba, cu tambe ta den lucha pa haya indexering, un derecho cu e Gobierno di MEP a vries na 3 anja cu e promesa cu e proceso akilo a dura tres anja, pero ya a pasa shete anja caba. Den waf di Oranjestad tabatin un crucero grandi ayera mainta y tur tour organiza pa esnan riba e barco, no por a sigui ya cu no tabata permiti ningun tourbus pasa bai tereno di waf. Cantidad di turistanan cu a baha for di e barco, a mustra ansha pa e situacion y gran mayoria a regresa e barco mesora, ya cu nan no tabatin nocion di loke tabata pasando serca din an. Un situacion realmente confuse a reina henter mainta y cu a bin colma den e accion di e trahadornan dilanti oficina di Gobierno den oranan di anochi. Awe mainta e sindicatonan lo reuni pa determina kico ta bai haci pa presiona gobierno ainda mas, y no mester exclui e posibilidad cu otro sindicatonan lo uni nan mes na e accion aki, pa sostene e trahadornan di gobierno den nan lucha.
ORANJESTAD- No ta loke bo ta haci bon como gobernante ta conta, pero ta loke bo ta haci bon den situacionnan adverso, ta determina grandeza di un lider politico. E siman aki a kda demostra, principalmente ayera tardi, cu Nel Oduber enberdad a bira e lider di partido MEP y lider di pais Aruba despues di morto di e legendario Betico Croes. Pero bou di ningun circumstancia e lo por bira e lider manera Betico Croes tabata den su bida, pa su partido y pa su pueblo. E contraste a keda demostra ayera ora cu mesun departamento di Gobierno, a manda un comunicado di prensa, caminda Nel Oduber ta mei mei di muchanan cu a haya un computer como donacion di un hotel, y por a mira e cara contento di e Prome Minister. E cara feliz aki a transforma su mes den un cara falso y traicionero ayera tardi ora cu e mesun Nel a falta respet pa esnan cu ta forma parti di e pueblo di Aruba, cu ta den accion pa indexering, tratando nan manera cu nan no bal nada. Betico nunca lo a haci e cos aki, ya cu e difunto lider di MEP a admiti na 1985, net despues di eleccion, cu bo no por mishi cu cartera di pueblo, ya cu nan ta bira lomba pabo. Betico a perde e eleccion mas codicia di su bida, net prome cu Status Aparte a bira un hecho, despues cu Lago a sera cu portanan y Aruba a conoce un di e crisis mas grandi den su historia. Ta e cosnan aki Nel no a sinja di Betico, pero semper a aspira pa supera Betico riba tur tereno, pa converti su mes den un lider mas grandi cu Betico, un gobernante immortal manera Betico, pero cosnan cu nunca e lo por logra na supera. Betico nunca lo bira lomba pa su pueblo, nunca lo falta respet na esnan cu ta lucha pa nan derecho, ya cu realmente Betico sa kico ta un lucha, e sa kico ta sacrificio, mientras cu Nel semper a para mira un banda, gozando di e grandeza di su lider, pero awor ta resulta cu nunca el a compronde algo di e homber grandi aki su caracter.
KAZAN, RUSSIA, - Awe tabata komienso di e weganan eliminatorio di Hòki riba tereno den e sekshon Femenino pa Weganan Olímpiko ku lo bai tuma lugá na ougùstùs awor na Beijing, China. E promé partido pa e fecha di awe, Merka a enfrentá Bèlgika. Merka ku tambe ta buskando su klasifikashon pa Weganan Olímpiko a pasa den sustu, pero ta logra un triunfo di 3-2 riba Bèlgika. E di dos partido a bai entre Fransia i Antia Ulandes. E wega aki lo bai keda rekordá pa e vários oportunidatnan ku Antia a haña, pero a benta afó. Nan a faya golnan habrí na tres okashon i hasta a benta un pinalti afó. Den e promé mitar di wega e wega tabata pèrtá i tenso. E wega a hunga mas meimei di tereno. Ámbos tim tabatin problema pa krea oportunidatnan, pero tur kos tabata mustra, ku Antia lo por a kibra e problema aki. Fransia a haña un bon oportunidat, ora ku Charlotte Boyer ku tabatin mas tempu ku el a kere a tira afó. Den di dos mitar e wega a haña mas bida ku Antia dominando for di komienso di e mitar aki te na final. Despues di 2 minüt di deskanso, Maria Hiskens ta faya pa marka e promé gol pa Antia. E tim di Antia ta sigui dominá i tabata Floortje Joosten ku ta marka e promé gol. Antia despues ta haña vários oportunidat, pero no ta anotá. Tabata te na di 65 minüt ora ku Claire Visser ta marka un pinalti pa sigurá e viktoria.
ST. PETERSBURG, FLA., - Evan Longoria a keda firmá dor di Tampa Bay na e kontrakt di mas largu den historia di e frankisia. “E kontrakt aki ta un kos asombroso”, asina Longoria a bisa. “Mi no tabata sa ku Andrew Fieldman, e vise presidente di operashon di beisbòl di Rays i e doño Stu Sternberg, tin asina tantu fe den mi asina tempran den mi karera. Pues esaki lo bai ponemi traha un tiki mas durui drenta batting cage un tiki mas tempran”. Ayera tardi durante di un konferensha di prensa na Tropicana Field, Rays i e tersera base nobato a hasi e anunsio di e akuerdo despues ku Longoria tin un siman ku el a keda promové for di Durham, sukursal AAA pa Liga Grandi. “Esaki opviamente ta un kos úniko”, asina Friedman a bisa. Pero tabata un kos kaminda ámbos partido tabata interesá i nan a papia ariba. Ámbos partido a sede algu pa por a yega te kaminda nos ta awe”. E salario di e promé seis añanan di e akuerdo ta garantisá, ku e tim ku un opshon pa 2014 i supsekuentemente opshonnan pa 2015 i 2016. E kontrakt ta garantisá pa 17.5 mion dollar. Si Rays ehersé ámbos opshon e balor di e akuerdo lo bira 44 mion dollar durante di e bida di nuebe aña. Longoria di 22 aña lo hasi donashon di 750.000 dollar durante di bida di e kontrakt na Rays Baseball Foundation, ku ta e organisashon di karidat di e frankisia ku ta sostené programanan di hubentut i edukashon den region di Tampa Bay. Lonmgoria lo gana 500.000 dollar e temporada aki, 550.000 dollar na 2009, 950.000 dollar na 2010, 2 mion na 2011, un salario ku lo oumentá ku 2.5 mion dollar si e ta eligibel pa arbitrahe salarial. E ta risibí 4.5 mion dollar na 2012 i 6 mion dollar na 2013.
BALTIMORE – Joba Chamberlain ayera tabta tin bon notisia pa Yankees di su tata. Nan a kita e tata for di e mashin pa hala rosea I e ta bayendo muchu mas mihó asina e picher a bisa den un komunikado ku e tim a saka. “Despues di vários dia difísil, mi tata ta sintiendo muchu mas mihó”, asina Chamberlain ta bisa. “Te ainda e ta den “intensive care”, I nan mester hasi mas tèst kuné, pero e ta hala rosea riba su mes. Kada dia e ta aktuando manera su mes. Hasta e ta pone hende bira tristu pa motibu ku den hospital no ta pasa wega di Yankees”. Mientrastantu mènèdjer Joe Girardi ta bisa, ku Chamberlain na dos okashon a tira bala na Nebraska, esun mas resien tabata djaweps. Chamberlain ta ansioso pa regresá Yankees i gradesí nan pa nan sosten durante di su ousensia.
WILLEMSTAD - Direktiva di UNDEBA ta anunsiá na mayornan den e área di Banda Abou ku tin muchanan entre di 5 te ku 10 aña di edat, ta nifiká muchanan ku a nase na aña 1999 pa aña 2002, ku UNDEBA ta bai reaktivá su sekshonnan di Baby i Super Baby pa partisipá na weganan organisá pa ORFIK. E entrenamentunan lo tuma lugá tur djaluna-djarason-djaweps di 2’or di mèrdia pa mitar di kuater di atardi na e tereno di futbòl na Soto. E muchanan lo wòrdu di trein pa Guillermo (Peng Peng) Zimmerman. E kontribushon pa inskripshon pa bira miembro ta fls. 15,- i pago pa luna ta fls. 5,- pa mucha. Tur hungadó mester entregá 2 pasfoto resien saká i un papel di Kranshi (geboortebewijs). Ta e intenshon pa lanta un komishon di mayor, mayornan di e muchanan, ku huntu ku e direktiva di UNDEBA ta bai ta enkargá ku e dos sekshonnan aki. Por tuma kontakto ku Peng Peng Zimmerman i direktiva di UNDEBA. Ta spera di tende mas pronto posibel di mayornan pa asina UNDEBA por yuda lanta boso yu den deporte.
WILLEMSTAD – Awe mainta a ordená diákono José Guillermo Ortega Fernández komo saserdote den Basílika di Santa Ana. E saserdote ku a nase na Maracaibo, Venezuela, tin un trayektoria amplio su tras. A ordená José Guillermo komo diákono dia 8 di desèmber di 2007, riba Fiesta di Immaculata Konsepshon di Bírgen Maria. Entrante awe e por yama su mes pastor, manera nos ta bisa popularmente. Pastor José Guillermo lo bin traha na Kòrsou i por bisa ku e ta regalu pa Obispado ku di1 28 di aprel awor ta kumpli 50 aña. Nos tin mas detaye di e ordenashon di José Guillermo komo saserdote den nos edishon di awe.
WILLEMSTAD - Ayera tardi na Curaçao Airport riba patio di Cinabbon i Sbarro, a tuma lugá un konferensha di prensa kaminda Curaçao Team Tennis Foundation a duna informashon di nan torneo di e aña aki. Primeramente sr. Elmer Pablo na nòmber di Curaçao Team Tennis Foundation a yama bon biní na e invitadonan i a elaborá riba e echo e aña aki lo bai selebrá e di 10 edishon di Team Tennis ku tur aña di nobo ta hala hopi partisipante i fanátiko. Seguidamente sr. Robert Martis a wòrdu introdusí. El a duna un splikashon di e konsepto di Team Tennis ku básikamente un tim ta konsistí di mínimo 2 hende hòmber i 2 hende muhé i un máksimo di 3 hende hòmber i lo hunga den tres kategoria i e weganan lo tuma lugá na Asiento, CSC i RCC. E fecha di apertura ta djaluna 5 di mei i e torneo lo dura te 24 di mei. Seguidamente sr. Lesley Peterson sekretario di Team Tennis Foundation a trese dilanti algun regla di e torneo i a duna un splikashon di e sekuennsia di weganan ku ta Sensiyo Femenino i Maskulino, Dòbel Femenino i Maskulino i Dòbel Miksto. E ekiponan ta bai na akumulá punto pa ta bon posishoná pa avansá pa e siguiente buèlta. Den e promé buèlta e ekiponan lo hunga den Pul, miéntras ku e último buèlta lo ta hunga segun e sistema di nòkout. Edgar Ribeiro direktor di Sorefan Trading ta sumamente kontentu ku e Fundashon Team Tennis i e aña aki tambe Jumex Sport lo ta presente den Team Tennis.
Skina di Sorti, awe djasabra 19 di aprel di 2008, ta kuminsá ku deseá tur hende un bon dia. Na Ulanda drs. Alexander Pechtold, lider polítiko di D66, a tuma e partido ku e tendensia elektoral di un “stervende zwaan” i awor tin’é den un kresementu aselerá espektakular, kaminda segun último sondeonan D66 awor ta na 10 pa 11 asiento. Pues un diferensia di 8 asiento for di resultado di e último elekshon. E manera ku e kambio espektakular aki a sosodé, no ta nada milagroso, pero simplemente resultado di un aserkamentu stratégiko asertá. **** Laga mi splika e lokual a pasa ku D66, bou di liderazgo di drs. Alexander Pechtold, segun e modelonan ku mi a bini ta usa pa analisá prosesonan polítiko. Mi a splika na vários okashon ku den e kuadro polítiko tin 4 grupo di influensia banda di e rivalidat entre partidonan polítiko ku ta impaktá posishon elektoral di kada partisipante na un elekshon i nan respektivo posibilidat pa hiba un gobernashon efektivo pa pais. **** E grupo ku naturalmente tin mas peso ta elektorado. E promé kos ku drs. Alexander Pechtold a kambia den forma fundamental ta e agènda polítiko di D66. En bes di asuntunan ku ta poko leu for di e prioridatnan dje elektorado, manera kambio dje organisashon demokrátiko ulandes, D66 awor ta tuma posishon den un forma pronunsiá riba temanan ku elektorado ta konsiderá puntonan di su prioridat. **** E estilo den kual e ta presentá e puntonan ta populista, pero ku kontenido. E ta mustrando kontenido i komo ku gobernantenan i koleganan di Tweede Kamer ta tum’é na serio, poko pero sigur D66 ta wòrdu konsiderá, un alternativo di gobernashon. E rèspèt ku promé minister dr. Jan Peter Balkenende a ekspresá pa e aserkamentu di drs. Alexander Pechtold, durante di tratamentu dje presupuesto ulandes, ta un dje momentunan krusial den e surgimentu dje strea di e lider polítiko nobo di D66.
WILLEMSTAD - Pa basta tempu nos komunidat a konosé eskritornan grandi. Eskritornan ku a hasi uso di kombinashon di letranan, formando palabra, kreando obranan ku a i ta enrikesiendo nos literatura. Eskritornan manera Ellis Juliana, Pierre Lauffer, Roland Colastica, Ruth Zefrin i hopi mas. Eskritornan ku a publiká vários buki for di kual hopi di nos a siña masha. Bukinan ku aparte di informá, a rekreá i forma hopi di nos. Di nan nos por a lesa nan trabou, sinti nan emoshonnan grabá riba papel. Por a gara nan rosea teniendo nan buki den nos man. Nan aparte di sa kiko i kon mantené nan derechinan, tabatin e suerte di vários buki por a publiká. Sin embargo tin vários otro mas di mes un edat, ku nunka nan trabou no a wòrdu publiká. Ku tur loke nos a hasi te awor ta sinti nan bos resoná, skuchando nan trabou nos orea karisiá. Esaki no ke men, ku ménos outor ku esnan publiká nan ta! Tambe tin e grupo ku a yuda hopi outor nan trabounan e.o. editá i tradusí. Nan a usa otro parti importante di nan talento pa awe di vários publikashon nos por disfrutá. Kada un di e personanan aki, sea ku ta nan e obra a inventá, koregí òf editá, a hasi un tremendo trabou ku awe nos Kòrsou di bon bukinan por disfrutá. I kada un di nan meresé e rèspèt pa loke nan a empeñá. Kada un ta outornan ku a yuda pa nos komunidat por ser entretené i influensiá. Publiká, tras di kortina, fantasma òf no, outor nan tur ta i komo tal mester wòrdu balorá!
WILLEMSTAD – Maduro & Curiel’s Bank NV su departamentu di Fiansa Personal i Hipotek i Curaçao Car Dealer’s Association a selebrá apertura di e 12 edishon di Autoshow. Tabata un apertura kolorido ku diskurso di gerensia di MCB, Ron Gomez Casseres i tambe Kenneth Isidora ku a mustra riba e importansia di e ekshibishon di vehíkulonan nobo. Ademas tabata un anochi kargá ku sorpresa, ya ku e agensianan di outo a presentá nan modelonan nobo i ofertanan spesial pa e okashon aki. Tur aña di nobo ta presentá ku sorpresanan huntu ku e ofertanan pa e tremendo shou di outo. E agensianan a bira ta dediká mas tantu na presentashon aki. For di ayera tuma nota di e interes grandi ku ta biba bou di e pueblo pa bishitá e grandioso eksposishon di Autoshow 2008. E kombinashon di foto ta mustra e promé anochi di Autoshow 2008.
LA CROES-NICOLAAS Marcelia Juana (91 aña) Mihó konosí komo Celia A laga atras su yunan Ivy i Andreo Frans-la Croes, Noris Bram, Airien i Jan, Eric, Wenco i Dolly, Hèlen i yunan, ruman Jozef Nicolaas. Akto di entiero ta djamars 22 di aprel for di El Señorial pa misa Sta. Famia i despues pa santana Roodeweg. Bishita 12or i 4or tin un s.s. di misa na misa Sta. Famia.
GIRIGORIE Alex Rosendo Mihó konosí komo Lècho A laga atras su rumannan Rignald Girigorie, Richard Girigorie i demas rumannan, yunan Astrid Halmund, Mildred Jones i rumannan. Akto di entiero ta djamars 22 di aprel for di El Señorial pa santana Janwe. Bishita 9or.
ENGEL Jord (27 aña) A laga atras tur su koleganan di Econcern, Evelop, Ecofys i den Caribe.
IJK-SCHOTBORG Nolda Crecencia Mihó konosí komo Noldeis Kapiteis A laga atras su kasá Wilfred Dijk, yunan Richard i Yvonne Schotborg-Nijverman, Orlando Schotborg i Maria Wilders, Digna Dijk i Michanoe Sirvania, Willem Dijk, rumannan Idelgo i Bernadina Schotborg, Hubert i Anna Schotborg, Laura i Ronny Scharbaai tur ku nan famia. Akto di entiero ta djaluna 21 di aprel for di misa Koraal Specht pa santana Janwe. Bishita 1or. Promé ku entiero tin un s.s. di misa. Trahe alegre.
OTTO Edwin Valente Confesor (repentino) Mihó konosí komo Otto A laga atras su kasá Ermine Otto-Richardson, yunan Geneitha Otto, Sharine i Gregory Zimmerman-Otto, Kurtwin Otto, ñetu Guilliard Zimmerman, rumannan Claudio i Vivianne Otto-Angela, Glenda i Rudsel Jansen-Otto. Akto di entiero ta djaluna 21 di aprel for di the Methodist Church na Abraham de Veerstraat pa santana Sta. Maria. Bishita 12.30or-3or tin un s.s. di misa.
Lorito ta yama tur hende un felis djasabra. Djasabra tin su kosnan partikular kuné. Einan mes e ta un dia mas lento, pero di otro banda korant ta pone masha preshon riba tempu! ********* Ku rèspèt pa tur hende, algun dia a pasa sin ku nos sa te awe ken ta Cayco. Nos no a haña sa kuantu sèn nan tin, ken ta representá nan, kiko ta nan plannan konkreto, kua patu a brui nan (sòri pa e formulashon!), unda nan ofisina prinsipal ta etc. etc. ta masha pregunta tin habrí den e kaso aki! ********* Nos tin e impreshon ku Nini ta keriendo demasiado ku e ta un tipo di minister. Pa refreská su memoria, nada no por pasa si un mayoria den Bestuurscollege no ta na altura te pa nan ta di akuerdo. Asuntu di kere ku bo por yega bou di brasa ku dokumentunan pa haña aprobashon ta maneho di ántes (di kouchi boulo). Duna nos tur informashon pa nos mes huzga. I pidi Cayco pa stòp di usa satélitenan. Nos kier wak ken nan ta! ********* E artíkulo ku LA PRENSA a publiká e siman aki riba e polítiko prominente ku a trata di kue seguro kabes abou ta komentario tur kaminda. A base di informashon ku nos tin aki ta trata di un kaso masha serio. E polítiko mester stòp di usa su satélitenan pa manda yen di mensahe i atendé e kaso aki ku por result’é masha karu. Ora bo hasi e tipo di kosnan aki, en realidat bo ta violando lei. Ojo! ********* Ademas nos no ta kere ku e kompania tin ningun interes pa no paga e polítiko-kliente, ku ta kliente meskos ku tur otro hende. E kompania mester tene kuenta ku su stipulashon i regulashonnan i no por benefisiá niun hende mas kon popular bo ta!
WILLEMSTAD – Kontrali na e persepshon ku diputado di Infrastruktura Anthony Godett a duna e siman aki, Bestuurscollege ta leu for di duna lus bèrdè pa e proyekto Cayco. Ta resultá ku PAR i PNP tin duda serio riba e proyekto. Diputado Godett a trata di pasa e proyekto komo “nagekomen stuk” djarason último. El a drenta reunion di Bestuurscollege ku e dokumentunan bou di su brasa i trata di haña aprobashon di su koleganan pa e proyekto. E diputadonan di PAR a pidi pa wanta ku e tratamentu te ora tin mas klaridat riba e proyekto. Lider polítiko di PAR Emily de Jongh-Elhage a manda instrukshonnan estrikto pa e diputadonan di su partido kon pa atendé e asuntu aki. E dirigente polítiko ta preferá pa e asuntu aki bira punto di diskushon den e lidernan di koalishon promé. Dia a forma e gobièrnu nobo entre PAR, PNP i Frente a palabrá ku no ta sorprendé otro ku intenshon i/òf desishonnan. A disidí tambe, ku puntonan ku no tin klaridat riba nan òf por bira un problema, ta bai e plataforma di lider polítiko. Pa loke ta trata Partido Nashonal, e partido no tabata representá den e reunion di djarason último komo ku su úniko diputado (Humphrey Davelaar) a hisa bela bai Ulanda. Informashonnan ku LA PRENSA a haña ta indiká, ku PAR a warda yegada di diputado Eugène Rhuggenaath for di Costa Rica djaweps último pa atendé e asuntu aki internamente. Diputado Godett a bisa den su konferensha di prensa di djaweps último, ku su kolega diputado di Asuntunan Ekonómiko i Turismo ta na altura di e interes di Cayco. Durante e reunion di PAR a disidí ku pa awor aki e proyekto Cayco lo no konta ku sosten, sino te ora tin un presentashon ofisial i haña sa mas konkretamente kiko e proyekto ta kome i bebe. Diputado Godett a informá PAR, ku kada bes ku ta su proyektonan ta manera tin opheshon kontra nan, pero el a haña komo kontesta, ku proyektonan mester kana e kaminda korekto i sigur transparente, algu ku PAR a bin ta prediká pa hopi aña.
WILLEMSTAD – Obispu di Willemstad, Mgr. Luis Secco, ta bisa ku e kantidat di fiel ku ta pèrdiendo e kaminda di fe ta birando dia pa dia mas grandi. Esei ta hasi e tarea di saserdotenan mas difísil. Saserdotenan mester kumpli ku nan mishon i no gosa di e prestigio so ku e mishon di ta saserdote ta duna nan. Segun Obispu Secco, nan mester mantené e fielnan huntu. “E tarea mas importante di un saserdote (wardadó), ta esun di buska e karnénan ku a pèrdè e kaminda, ku a alehá for di e kaminda, ku ta den peliger di pèrdè nan bida. E tarea aki awendia ta mas urgente ku nunka, pasobra no ta solamente un karné òf un grupo chikitu ku a pèrdè, sino hopi, i ta parse ku e kantidat ta birando mas grandi dia pa dia”, asina e prelado a bisa awe mainta na ordenashon di José Guillermo Ortega komo saserdote den Basílika Santa Ana. “Ami ta e bon wardadó; e bon wardadó ta entregá su bida pa e karnénan (Hn 10,11). Den e tempu di Pasku aki i despues di e djadumingu di e Bon Wardadó, nos tin e legria di selebrá e ordenashon presbiteral di nos ruman Guillermo, den un konteksto litúrgiko asina yen di mensahe profundo di e Palabra di Dios i di e tradishon di Iglesia. E komparashon di e bon wardadó ta duna nos e oportunidat pa kompartí su nifikashon un biaha mas i aplik’é na e mishon di nos futuro saserdote. Den e tradishon kristian e bon wardadó ta keda representá bou di tres aspekto: e ta karga riba su skouder e karné pèrdí; e ta guia e karnénan pa nan haña alimento, yerba bèrdè i awa fresku, i ku su baston e ta reuní i ta defendé nan kontra tur peliger. Nos tur tin presente un dje promé representashon di Hesus den e ikonografia kristian ku ta mustra un wardadó ku ta karga un karné riba su skouder i e tin un baston na su man. E ta indiká ku un tarea importante, si no esun mas importante di e wardadó/ saserdote, ta esun di buska e karnénan ku a pèrdè e kaminda, ku a alehá for di e kaminda, ku ta den peliger di pèrdè nan bida. E tarea aki awendia ta mas urgente ku nunka, pasobra no ta solamente un karné òf un grupo chikitu ku a pèrdè, sino hopi, i ta parse ku e kantidat ta birando mas grandi dia pa dia. E bon wardadó ta guia e karnénan pa duna nan alimento i awa; esaki ta nifiká e tarea di evangelisá, di alimentá nan ku e Palabra di Dios i ku e sakramentunan di Iglesia, na un manera partikular ku e Santa Eukaristia. E bon wardadó ta reuní i defendé e karnénan kontra tur peliger: e gran mishon di e wardadó ta pa mantené e karnénan huntu, mantené e unidat, forma e komunidat, i tambe loke ta un tarea poko agradabel, di spièrta i koregí ku amor e karnénan ku a desviá for di e bèrdat di Hesukristu i di su Palabra”, asina Mgr. Secco a bisa. Mas aleu Obispu a bisa ku den e dokumentunan i predikashon di e último papanan, por nota ku e figura di e bon wardadó ta fuente di hopi inspirashon i ta manera e imágen ku no ta pèrdè nunka su forsa i aktualidat pastoral. “Den e dos Eksortashon Apostóliko postsinodal “Pastores dabo vobis” i “Pastores gregis”, Papa Huan Pablo II, ta animá e pastornan i obispunan riba e vokashon i e mishon di kada un ku tin e responsabilidat den Iglesia pa guia i duna speransa na e karnénan ku Iglesia a konfia na nan. E palabra di Profeta Ezekiel, den e promé lektura, ta invitá nos pa hasi un saminamentu di konsenshi riba e solisitut pastoral di e wardadónan di e tempu ei i di nos tambe awendia. Den e liturgia di Horanan di e siman 24 i 25 di aña litúrgiko, San Agustin ta komentá e kapítulo aki di profeta Ezekiel, i e ta hala e atenshon na un manera fuerte kontra e wardadónan ku no ta kuida e karnénan, ma nan ta sòru solamente pa nan mes: “Boso ta bebe e lechi, uza e lana pa boso pañanan ... boso no a kura e karnénan ku tabata malu,... boso no a bai buska e karnénan pèrdí... boso a goberná sin tene duele,... mi karnénan tabata sin wardadó i a plama den diferente direkshon i nan a bira víktima di e bestianan feros. (Ez 34,3-5). Sin keda den e parti negativo, San Agustin ta bisa ku tin tambe hopi bon wardadó den kunuku di Señor; i tur e bon wardadónan mester identifiká nan mes ku e úniko Wardadó ku ta Hesukristu! Papa San Gregorio (siglo VI) a yega di bisa ku “mundu ta yen di saserdotenan, pero ku ta hopi difísil pa haña un trahadó pa e kunuku di Señor; pasobra nos a risibí e ministerio saserdotal, pero nos no ta kumpli ku e debernan di e ministerio aki... nos ta deskuidá fásilmente e ministerio di predikashon... nos ta disfrutá dje prestigio ku e ministerio aki ta otorgá nos, pero nos no ta poseé e birtut ku e nòmber aki ta eksigí”, asina Mgr. Secco a bisa.
WILLEMSTAD – “Partido Nashonal di Pueblo t’ei pa keda”. Asina lider di e partido Ersilia de Lannooy a bisa relashoná ku 60 aniversario di e partido awe. Segun De Lannooy, no tin niun kas na Kòrsou kaminda e rais di Partido Nashonal no ta planta. Ta esei ta éksito di e partido ku tabata asina fundamental den emansipashon di nos pueblo. Un grupo di persona ku tabata afiliá promé na Katholieke Volkspartij (KVP) a funda Partido Nashonal di Pueblo dia 19 aprel 1948. E grupo aki na sierto momento no tabata satisfecho mas ku e polítika konservador i tolerante pa ku e sistema kolonial di e tempu ei, ku e partido aki tabata hiba i nan a tuma nan mes inisiativa. Despues ku Partido Democraat a gana e elekshon di novèmber 1945 na un manera aplastante, kasi un aña despues ku e partido aki a keda lantá (desèmber 1944), riba instrukshon di Mr. Dr. Moises Frumencio da Costa Gomez, un grupo di persona ku ainda tabata forma parti di KVP, manera un George Lodowicka-Beltram, Nene Davelaar, Jul Cratsz, Frank “Spin” de Lannoy, Hendrik Pieters Kwiers i Anibal Visceiza i algun otro, a kuminsá ku nan lucha “under-ground” den tur skina di Kòrsou, pero prinsipalmente den barionan fuera di stat pa haña sosten pa e idea pa a lanta un partido polítiko, komo un alternativa pa KVP i DP! Na 19 di aprel 1948, a yega asina leu ku “Nationale Volks-Partij” (NVP) a keda lantá i e promé direktiva di e partido tabata konsistí di, Mr. Dr. Moises Frumencio “Dòktor” da Costa Gomez (Presidente), Hendrik Pieters Kwiers (vise-presidente), i komo miembronan, Efi Newton, Nene Davelaar, Jan Eleonora, Carlos Celestina, Eddy Broos, William Rufus Plantz i Anibal Visceiza, e último aki ta e úniko ku te ku dia di awe ta na bida.
WILLEMSTAD – Union Oropeo ta hopi interesá pa sa kon e kambionan estatal na Antia lo bai desaroyá i kiko lo ta nan impakto pa e e relashonnan di e islanan den futuro ku Union Oropeo. E siman aki un delegashon di Union Europeo, konsistiendo di Geert Heikens (Hefe di delegashon di Union Europeo na Guyana) i sra. Lut Fabert Goossens (Hefe di sektor OCT di Union Europeo ku sede prinsipal na Bruselas/Bèlgika), kompañá pa nan kolaboradornan Ewout Sandker i Manfred Brant, a reuní ku tur isla di Antia i Gobièrnu Antiano. Na Kòrsou a reuní ku diputado di Finansa di Kòrsou, Mike Willem. Diputado Willem a presentá ku hefe di Servisio di Finansa di Teritorio Insular di Kòrsou Ivan Kuster i algun otro funshonario públiko. Gobièrnu di Kòrsou a bisa, ku durante di e reunion aki, na kua a asistí tambe ir. Ralph James di e Departamentu pa Koperashon di desaroyo (DOS), a sera konosí ku e alto funshonarionan di Union Europeo. A trata tambe asuntunan ku ta regardá e programanan di e Fondo di Desaroyo Europeo, otro sektornan di atenshon i tambe identifikashon di proyektonan den kuadro di e kompromiso global pa prevenshon i preparashon kontra desaster. Finalmente a dediká atenshon tambe na e futuro relashon di Union Europeo ku paisnan i Teritorionan Ultra Mar, den kuadro di sensibilisashon i informashon respekto e asina yamá “green paper”. Anteriormente ya kaba e delegashon a bishitá tur isla di Antia i sede di Gobièrnu di Antia den Forti. Gobièrnu di Antia a bisa ku meta di e bishita aki tabata pa sr. Heikens sera konosí i alabes diskutí ku outoridatnan di tur Isla riba e progreso den e preparashon i ehekushon di e diferente programa i proyektonan i aktividatnan ku ta tumando lugá i ku ta finansiá ku fondo di e asina yamá di 10 Fondo di Desaroyo Europeo (10th European Development Fund). Mas aleu a diskutí riba e kambionan riba tereno di Struktura Estatal ku lo bai tuma lugá na Antia i su impakto riba e relashon ku Union Europeo.
WILLEMSTAD – “Gobièrnu di Kòrsou i Antia huntu tin un défisit akumulá di kasi 300 mion florin, komo konsekuensia di e situashon nobo ku a presentá awor ku e proseso di saneamentu no por kuminsá mas na e momentu ku a palabra. Gobièrnu di Kòrsou, kombiná ku gobièrnu antiano lo mester subi merkado di kapital awor pa weta si por haña e montante aki fia. Nos a atvertí pa e kos aki, pero un biaha mas, no kier a skucha nos”, asina mr. Nelson Navarro, miembro di frakshon di Forsa Kòrsou den Staten a denunsiá. “Tal manera nos a informá anteriormente, Gobièrnu di Kòrsou lo mester subi e plafònt ku a fiha anteriormente pasobra Kòrsou mester por fia pa kubri e défisit ku a surgi riba presupuesto 2008”. Esei di akuerdo ku diputado di Finansa Mike Willem. Esaki, komo konsekuensia di e hecho ku e panorama finansiero a kambia, awor ku 15 di desèmber 2008 no ta alkansabel mas. Dia teritorio insular di Kòrsou a formulá su presupuesto pa 2008, el a sali for di punto di bista ku un parti di e défisit, pa e montante di mas o ménos 66 mion florin lo bira e parti di défisit ku e mes ta kubri. Pa esei, mester a bin un plan kon ta kubri esaki, e asina yamá “dekkingsplan”. Pero banda di esei, ta keda un défisit di 103 mion florin, ku Ulanda a keda di kubri. Esaki, basá riba e akuerdo ku Kòrsou a sera ku Ulanda, ku Kòrsou lo no fia mas ku e plafònt ku a fiha pa e isla hasi fiansa. Awor ku no tin akuerdo, konsekuentemente no por konkretisá e saneamentu di debe tampoko, mester subi merkado di kapital atrobe, pa bolbe fia. Esei lógikamente lo surpasá e plafònt palabrá ku Ulanda.
WILLEMSTAD – “Postspaarbank no tei pa wak solamente maksimalisashon di su ganashi. Ganashi ta importante, pero importante ta tambe kon bo ta yuda bo komunidat”, asina minister Maurice Adriaens, polítikamente responsabel pa e banko aki a duna di konosé. E mandatario tabata referí aki na e hecho ku Postspaarbank (PSB) a pone un liña di krédito disponibel di 2.5 mion pa Stichting Studiefinanciering Curaçao (SSC) por kumpli ku studiantenan fin di e luna aki. Ta trata aki di un yudansa di emergensia, miéntras SSC ta sigui buska solushon mas duradero pa su problemanan. E minister a bisa ku e mes a keda sorprendí pa e rapides ku kua e banko a atendé e asuntu, ounke ku el a indiká klaramente ku ta trata di un situashon di emergensia. Segun minister Adriaens, tarea i responsabilidat di entidatnan manera PSB ta bai mas leu ku simplemente wak e aspekto komersial finansiero so. Nos ta papiando aki di un entidat ku tin su responsabilidat tambe komo empresa pa yuda kaminda esaki ta nesesario. Den e kaso aki PSB a mira urgensia di e kaso di SSC i a saka un man pa yuda, segun e minister. Ta bon pa bisa ku PSB tin mas plan pa yuda komunidat den e tempunan benidero, asina minister Adriaens a anunsiá. E no kier a divulgá ainda kiko e plannan aki ta. “Ku tempu nos lo anunsiá nan”, asina el a agregá.
