ORANJESTAD- Diadomingo 20 di april 2008 tabata un dia historico pa e pueblo di Paraguay. Despues di mas di seis decada di gobernacion dor di e mesun partido politico, por fin a bin cambio.
E candidato di e Alianza Patriotico pa e Cambio, ex-obispo Fernando Lugo a gana e eleccion y ta bira presidente di Paraguay y hefe di su gabinete. Mi a manda de inmediato palabra di felicitacion, mirando e contacto personal cu mi tin cu Fernando Lugo.
Fernando Lugo a nace 30 di mei 1951 na Paraguay, despues di studia teologia e a keda ordena sacerdote na 1977. Despues e a studia sociologia na Roma y na 1994 e a keda ordena Obispo den e region di mas pober di Paraguay.
Dia 8 di December 2006 e a oficia misa pa ultimo biaha, pa motibo di su decision di drenta politica. Den e predicashi di su ultimo misa e a bias: “Mi catedral awor lo ta mi pais”.
Vaticano a nenga di acepta su renuncia di su funcion sacerdotal y a pidi Mons. Lugo pa e no desobedece e ley canonigo cu ta stipula cu un sacerdote no mag eherce funcion di minister of parlamentario of presidente. Fernando Lugo a desobedece e ley canonigo y a postula su mes toch como candidato pa presidente di Paraguay.
For di e momento ey pueblo a cuminza mira den dje un speranza pa cambio. Su campaña contra corupcion y contra pobreza a keda bon risibi. Papa di Roma a reacciona y a impone riba su persona e ‘suspensio a divinis’, es decir cu e no mag di celebra ningun sacramento mas,, pero e a keda cu e titulo di obispo y sacerdote.
Su contricantenan a start un campaña sushi contra su persona. Na television y radio nan tabata jame pa traidor, mentiroso patologico, diablo, satanas etc.

ORANJESTAD- Diahuebs cu a pasa, e di cinco rond den torneo di ajedrez “ECCO-2008” a wordo hunga.
Den e buelta aki Juste a enfrenta Alvin Howell. Juste sabiendo kico Alvin lo bai hunga, a prepara algun variant. Alvin a hunga un wega activo, pero no por a evita cu e lo perde e calidad. E resto tabata facil pa Juste.
Hernan Viafara cu tabata na cabez dos rond pasa, awor a perde su di dos wega tras di otro. E biaha aki ta contra Ferry Gerard. Jose Pesqueira a enfrenta e hoben Osh Lopez.
E wega tabata den balance, pero Jose a gasta tur su tempo durante e wega y na final ta algun minuut a rest’e. Ora Jose a mira cu no tin chens mas pa haya bentaha decisivo, ela ofrece tabla. Osh a rechasa esaki, keriendo cu Jose no tin tempo pa studia tur e variantenan den e tiki tempo cu a resta.
Pero e la ekiboca su mes. Jose a haya tur e zetnan corecto, y hasta a keda un poco mas mihor para. Pero debi na su tempo, nan dos a bai di acuerdo pa un tabla.
John da Silva a wordo sorpresa dor di Willem den apertura. Willem a scohe pa e defensa scandinava cu ta masha poco usa. John a eligi pa no drenta den variante mayor. Pero aparentemente e no conoce e variante cu el a scohe tampoco. Willem a haya bentaha di posicion. Despues a cambia esaki pa un ventaha di un peon, pa despues gana e partido cu e peon aki.
Andre Arends a enfrenta Paul Bouts. Manera ta di spera, Andre a haya bentaha di posicion riba Paul. Pero pa un descuido (blunder), ela laga su loper en prise. Paul no a perde tempo, y a coi e loper aki. Awor ta Andre mester a bringa pa un tabla. Paul sabiendo cu Andre ta un bon hungador a ofrece tabla tambe. Andre a tuma esaki cu dos man.

ORANJESTAD- Recientemente e clas di diseño di scol di architectura na Miami Dada College a tene un concurso entre su studiantenan.
Prome reto tabata pa explora movemento den espacio, pa volumen, segun lineanan y nivelnan y crea un cubo cu por para riba cada un di su seis bandanan.
E di dos reto tabata pa diseña “un luga pa conbersa pa un arborista y un trahado di mapa” tumando den consideracion e bista, paisahe y naturalesa di e campus di Florida Intenational University na Biscayne Bay.
Pa esaki e studiantenan mester a extrae lineanan di obra di Alex Gracchi, un artista di Miami y di obranan di tribu indigeno Marajoara di Brazil.
Tur dos maquet di Zaïra a wordu selecta entre e mihonan y a wordo inclui den un exhibicion di Miami Dade College. Adhunto foto di e obranan di Zaïra y e fuentenan di su exploracion.
Aruba Scholarship Foundation ta felicita Zaïra y su mama pa e bunita logro. Nos ta sumamente contento di por yuda soño di Zaïra bira realidad. Zaïra a gradua di Avond Havo na aña 2007.

ORANJESTAD- Terorismo, vandalismo y anarchismo a yega na su limite ora cu diabierna ultimo den oranan di marduga un grupito di huelgista cu supuestamente ta luchando pa Indexering a comete actonan di terorismo contra e edificio di gobierno, esta Bestuurskantoor.
Entre otro:
1. Nan a blokea e trafico dilanti di Bestuurskantoor door di sinta y drumi riba caminda
2. Nan a kima tire riba caminda y stroba auto di bombero pasa pa acudi na un accidente serio
3. Nan a kibra bentana di Parlamento
4. Nan a tira webo putri riba e porta di Bestuurskantoor, kibra man di e porta y a laga un enorme sushedad atras
5. Nan a trata di bula cu explosivo ‘Devastation’ e transformatorhuis (Hoogspanning – Levensgevaar) pega na Bestuurskantoor y pa despues e teroristanan aki kima tire dilanti porta principal di Bestuurskantoor, cu e intencion serio pa kima henter e edificio aki.
E fotonan cu ta wordo manda adhunto ta papia pa nan mes.
Tur e actonan di terorismo aki tabata posibel pa motibo cu e sindicalista Magaly Brito - kende for di oranan di merdia tabata bon na altura cu hopi alcohol tabata wordo consumi door di e huelgistanan - no tabata tin e habilidad di lider pa contene su hendenan, esta pa manda nan cas y p’asina nan por sosega nan curpa.
Al contrario e mesun Magaly Brito aki mediante di portofoon y via e radio comprometi di AVP tabata roga su miembronan pa nan trece nan familiarnan na e sitio di bochincha y te hasta el a pidi nan pa nan bin cu nan ‘slaapzak’ p’asina nan por pasa henter anochi drumi riba caminda dilanti Bestuurskantoor.

WILLEMSTAD - Djaweps próksimo, pa ta eksakto 24 di aprel 2008 pa 07:40am e Ekipo di Relevo 4x100m di Atletismo ta sali riba un mishon pa klasifiká pa Weganan Olímpiko 2008 na Beijing, China i lo regresá dia 27 di aprel 2008.
Skema di Buelo ta: salida Cur-Mia-Philadelphia.
Regreso :Phi-Mia-Cur.
Na Philadelphia e delegashon lo hospedá den Philadelphia Downtown Marriott
1201 Market Street, Philadelphia, PA 19107
Telephone: 001-215 625-2900
E delegashon ta konsistí di:
Anthony Stephens (H.Delegashon)
Wendell Prince (H.Coach)
Robert Koffie (Mental Coach)
Angelique Verhelst (Physical Coach )
Atletanan: Brian Mariano, Prince Kwidama, Churandy Martina, Geronimo Goeloe, i Curtis Kock.
E atleta Chalton Rafaela ta leshoná aktualmente pa e motibu ei e no por forma parti di e delegashon.
E ekipo nashonal ta bai kompetí den Penn Relays na Philadelphia (USA), einan lo bai all out, pa por logra lo máksimo, paso despues di Penn Relay a sobra un oportunidat mas pa por alkansá e tempu definitivo pa por klasifiká pa Beijing 2008.
Despues di Penn Relays a sobra Grand prix di Ponce, Puerto Rico pa por klasifiká.
E ekipo tin e dos oportunidatnan ei, pasombra den kombinashon ku NAOC a tuma e desishon pa duna e ekipo oportunidat te ku Ponce pa klasifiká i si no logra lo “cut off” e programa i e atletanan ta sigui ku nan programa individual te ougùstùs 2008.
Regla di IAAF ta bisa bo por klasifiká te ku 16 di yüli 2008 pa Beijing 2008:

WILLEMSTAD - Ku sumo honor i orguyo, Organisashon di Personal di Breezes Curaçao Resort, Spa & Casino, ta risibí for di man di nan Gerente General, sra. Jeanette Bonet, representando Breezes Resort komo spònser mayó, e unifòrm nobo na e tim di sòftbòl formá pa empleadonan.
Un alegria i orguyo na e momentu di entrega pa e tim ku ta mira kon nan lo presentá nan futuro kompetensianan den un forma presentabel i digno.
Palabra di elogio i felisitashon ta wòrdu ekstendé di parti di Management i Staf na e tim di sòftbòl maskulino.

JERUSALEM, - Eks Presidente di Merka, Jimmy Carter, a bisa awe ku lidernan di Hamas, ku kendenan el a reuní na Damasco dianan anterior, a bis’é ku nan lo aseptá un akuerdo di pas ku Israel negoshá pa Presidente palestino, Mahmoud Abbas (Abu Mazen), si e palestinonan aseptá esaki mediante un referèndem.
“E lidernan di Hamas a bisa mi ku nan lo aseptá un Estado palestino ku fronteranan di 1967 si palestinonan aprob’é, ounke por tin diferensia di opinion riba algun klóusula di e akuerdo”, Carter a señalá.
“E dirigentenan di Hamas ta dispuesto aseptá un Estado palestino si e palestinonan aprobá i aseptá derecho di Israel pa biba na pas komo bisiña”, Carter a afirmá den Konferensia di Prensa.
Carter a papia ku Hefe di Hamas den eksilio, Khaled Mashaal, djasabra último na Damasco.
“Esaki ta nifiká ku Hamas lo no sabotiá e esfuersonan di Abu Mazen di negoshá un akuerdo, ku e kondishon basta si e palestinonan aprobá e akuerdo ku voto liber”, e eks mandatario merikano a añadí.
Relashoná ku e posishon negativo di Israel i di Merka riba nan reunionnan na Damasco ku Khaled Mashaal, Hefe di Ofisina Polítika di Hamas, Carter a afirmá ku “problema” no ta su desishon di reuní ku hefenan di e movementu islámiko, sino rechaso di ámbos pais òf kualke kontakto ku Hamas, konsiderá komo organisashon terorista.

WILLEMSTAD - E desaroyonan rondó di e di dos torneo Chippie Polar Cup ta a la karga.
Mester bisa ku interes ta enorme pa e weganan ku ta bai tuma lugá den luna di mei pa ta eksakto dianan 21 i 24 di mei, kaminda lo bai tin partisipashon di 4 ekipo ku ta selekshon di Sürnam, FC. Groningen, Flamengo Esporte Club Brazil i e selekshon di Antia.
Pa loke ta trata e selekshon di Antia e biaha aki lo tin dos refuerso den personanan di rumannan Nelson i Nyron Wau ku lo t’ei sin duda.
Nan tambe lo ta bon prepará pa duna gala di futbòl i defendé e kolónan di e bandera di Antia pa dje forma aki logra gana e torneo.
Manera ta konosí, ya kaba tin basta interes pa lokual ta trata Chippie Polar Cup. Meskos ku tabata e kaso aña pasá ta asina ku kada dia lo tin dos wega.
Project Support NV kier a anunsiá ku e entradanan ta lo siguiente: Karchinan lòs pa mucha te ku 12 aña di edat ta kosta 10 florin pa anochi.
Den promé instante tabata e intenshon pa bende paketenan di dos dia.
Pa karchinan bou di dak e entrada ta 30 florin pa persona. Karchinan patras di gol e entradanan ta kosta 20 florin. Bou di dak enfrente di Tribuna di Honor ta kosta 25 florin pa persona.
P’e sekshon di VIP e karchinan los pa kada dia lo kosta 150 florin, miéntras ku pakete pa tantu 21 komo 24 di mei ta solamente 250 florin. Den kaso di e karchinan di VIP esakinan lo ta optenibel solamente via di sra. Mijanou Bolivar na telefon 569-1969. Karchinan pa e tremendo kuadrangular aki ta optenibel na Boekhandel Mensing Caminada, Beep Beep Rio Canario, Beep Beep Brievengat, Koko Loko Punda, Koko Loko Brievengat, Tik Tak, SDK, Kusters Trading, Albert Heijn Supermarket, Wereld Stage i 4th of July Snack na Barber.

JOHNSTOWN, Merka, - Dos dia promé ku e votashon krusial den karera presidensial di Merka, e aspirantenan demókrata a krusa krítikanan ayera, ku Hillary Clinton atakando Barack Obama pa bisa ku e republikano John McCain lo ta mihó pa e pais ku George W. Bush.
Obama a bisa durante un enkuentro polítiko na Reading (Pensilvania) ku McCain lo ta mihó, relashoná ku George W. Bush, un komentario parse ta laga atras su mensahe anterior di eligí McCain, ta mesun kos ku duna e aktual Presidente un di tres mandato.
“Tin un berdadero posibilidat di eligí den e elekshon aki. Demókratanan lo ta mihó ku John McCain. I kualke un di nos lo ta mihó ku Bush”, Obama a bisa.
Hillary Clinton, kende luchando ku Obama pa optené kandidatura demókrata i konfrontá McCain den elekshonnan presidensial di 4 di novèmber, a kritiká e deklarashonnan aki.
“Nos tin mester di un nominado ku ta konfrontá McCain, no felisitá McCain”, e eks Promé Dama a bisa den un akto na Johnstown.
Ámbos kandidato a krusa akusashonnan, ku kara p’e elekshonnan primario di mañan na Pensilvania, ku a bira un tèst importante den e karera pa optené kandidatura demókrata.
Clinton, kende tin mester di un viktoria na e estado aki pa mantené su aspirashonnan na bida, ta enkabesá sondeonan, pero, Obama, kende te n’e momentu aki tin kantidat mayó di delegado p’e konvenshon di e partido na verano, a kòrta e distansia ku ta separ’é fo’i e dama senador pa New York.

BEIJING – E sorteo di ayera pa loke ta trata e torneo di futbòl maskulino i femenino na Weganan Olímpiko a kondusí na gruponan fuerte den ámbos kategoria. E kampion mundial Argentina lo topa Oustralia, Kosta di Marfil i Serbia segun e sorteo ku a tuma lugá ayera. E argentinonan ku na Atenas 2004 a kologá pa promé bes oro olímpiko ta den grupo A.
Ulanda a keda na kabes di grupo B ku ta kompletá pa Nigeria, Hapon i Merka.
Brasil ku ta en buska di e úniko título importante ku falta den su vitrinanan yen lo ta den grupo C huntu ku China, New Zealand i Bèlgika. Ulanda ku ta kabes di grupo D ta forma pa Honduras, Italia, Camerun i Sur-Korea.
E torneo na Beijing lo mantené e mesun formato di kuater grupo di kuater ekipo den kua e dos proménan lo avansá pa e kuarto final.
Den e torneo femenino lo tin tres grupo. China lo topa Argentina, Canada i Suesia.
Den e di dos grupo a keda Argentina i Brazil, aktual kampion i sup kampeon mundial, huntu ku Nord-Korea i Nigeria. Merka ku a keda na di tres lugá den e mundial di aña pasá, lo tin den e último grupo ku ta konsistí ademas di Norwega, Hapon i Nueva Zeelandia. Brazil a klasifiká apénas djasabra último despues di a gana un repechahe ku e ekipo di Ghana 5-1. Den e kaso di e kompetensia femenino, e dos promé selekshonnan di kada seri ta avansá pa e kuarto final huntu ku e dos mihó number tresnan.
Tur dos torneo ta ranka sali mesun dia ku Weganan Olímpiko kuminsá dia 8 di ougùstùs awor. Weganan Olímpiko lo kaba dia 24 di ougùstùs.

AMSTERDAM – PSV Einhoven a bira ayera kampion di Eredivisie, e máksimo kategoria di futbòl di Ulanda, pa di kuater aña siguí. PSV a gana e ekipo Vitesse Arnhem ku un gol di Danko Lazovic riba un paso di e delantero e peruano Jefferson Forfán na di 46 minüt di wega.
PSV tin awor 21 titulo den historia di futbòl ulandes, 8 ménos ku Ajax ku a keda na di dos lugá. Ajax a yega e último fecha ku e speransa ku desplasá PSV for di e título. E ekipo di Amsterdam a vense Heracles den kousa pèrdí 5-1.
PSV a klasifiká direktamente pa e próksimo Champions League ku 72 punto.
Ajax huntu ku NAC Breda (63), Twente (62) i Heerenveen (60) lo mester tene un repechahe pa wak ken ta e otro representante di Ulanda den Champions League.
E hungadó di Ajax Klaas-Jan Huntelaar a bira e MVP di futbòl ulandes e aña aki. Huntelaar tabata topscorer ku 33 gol i el a asistí den 8 anotashon pa un total di 41 punto. Na di dos lugá a sali Luis Suárez ku a haña 31 punto i e danes Kenneth Perez na di tres lugá ku 18 punto.


Spaña

Na Spaña Real Madrid ta karisiando e titulo di Liga Spañó. E próksimo fin di siman ya kaba Real Madrid por ta e kampion nobo di Spaña. Ayera e ekipo a gana Racing di Santander 2-0. Si Real Madrid superá riba e próksimo fecha Athletico di Bilbao i Villareal no gana Betis, e ekipo di e kapital spañó por yama su mes kampion faltando 4 fecha pa hunga.

MONTEGI – Ayera e piloto Danica Patrick a kombertí den e promé dama den historia pa gana un kareda di Indy konkistando e Gran Premio di Hapon, despues ku su kompetidornan prinsipal a haña nan ta pasa pit pa tuma gasolin den e último buèlta.
E merikano a kaba e kareda 5.85 sekònde dilanti di e brazilero Helio Castroneves kende tabata na kabes ora e kareda a ranka sali na Motegi, un sirkuito di 2.41 kilometer.
Ora ku tabata falta sinku buèlta mas pa e kareda finalisá, e lider na e momentu ei, Scott Dixon mester a drenta pit i a bin finalisá asina na di tres lugá, siguí pa e britániko Dan Wheldon i su tras e brazilero, Tony Kanaan.
“Despues di hopi tempu finalmente mi ta gana un kareda,” asina Patrick a bisa despues di a gana. “Tabata un kareda ku strategia di kombustibel, pero mi ekipo a hasi un tremendo trabou. Mi sa ku mi tabatin e mesun strategia ku Helio i ora mi a pas’é pa tuma e liderazgo, mi no por a kere. Esaki ta fabuloso.”
Patrick di 29 aña di edat a gana su promé kareda despues di su di 50 kompetensia kual e ta partisipá na dje.
“Danica ta fantástiko i ta duna mi un plaser ku su suerte a kambia,” asina Michael Andretti a bisa, ko propietario di e ekipo Andretti Green Racing. “Nos tur a kere den dje i awe el a demostrá, ku e ta un kampion. Mi ta kere ku esaki ta e promé viktoria den hopi pa sigui.
“Mi tabata sa ku tabatin un bon rason pa mi bin Hapon. Mi ke duna danki na tur ku a apoyá mi,” asina Patrick a sigui bisa.

WILLEMSTAD - E presidente di Sindikato di Transporte Uní, STU, ta biaha mañan pa Cuba i Colombia, pa personalmente pone su mes na altura di e struktura di transporte públiko den e paisnan aki. Andres Everitz, presidente di STU, a splika ku su bishita lo ta konsentrá prinsipalmente na Cuba. Everitz tin kontakto poné kaba, den e paísnan latinoamerikano i ta e intenshon ademas pa risibí e informashon kon na prinsipalmente Cuba e transporte públiko ta funshoná. Ta interesante pa determiná, segun e representante dje shofùrnan di bùs lokal, ta kua ta e informashonnan ku por wòrdu apliká na Kòrsou. Everitz mes a finansiá su biahe pa eksterior. “E sindikato no ta den posishon pa paga pa mas hende biaha i mi direktiva ta sostené mi kompletamente”.
E informashon ku Everitz akumulá na Cuba i tambe posiblemente Colombia, lo e trese pa diskutié ku Gobièrnu.
Segun Everitz, su sindikato no ta kontentu kon diputado Godett ta atendé e asuntu di reorganisá transporte públiko. Everitz a reklamá ku diputado Godett no ta envolví e shofùrnan di bùs den su intenshonnan pa reorganisá transporte públiko. Segun Everitz, ku e diputado anterior tabatin e palabrashon ku e shofùrnan di bùsnan lo haña mas partisipashon, den e direkshon nobo ku lo duna na e sektor aki. “Nos tabatin palabrashon ku e Gobièrnu anterior pa huntu bishitá Colombia, pa tuma nota dje situashon di transporte públiko. Pero diputado Godett a bishitá Hulanda anto sin konsultá ku nos”.

KAZAN, RUSSIA, - Antia Ulandes djadumingu a logra un ekselente resultado riba un di e pre-faboritonan di e torneo i a bin gana den un wega pèrtá 2-1 di India.
Ku e resultado aki Antia awor tin dos viktoria den nan promé dos weganan despues ku djasabra nan a gana 2-0 di Fransia. E viktoria di ayera ta pone nan na kaminda pa posibilidat di yega e final di e klasifikashon aki.
India di su parti no ta afó ainda ya ku tres viktoria den nan tres weganan ku nan falta tambe por hinka nan aden ainda.
E wega di India kontra di Antia tabata unu basta pareu ku ámbos ekipo kreando bon posibilidatnan, pero e wega tabatin mester di un gol pa pone kosnan bira mas efektivo.
Esaki a bini despues di un “penalty corner” pa India, pero no tabata India ku a bin anotá.
E “penalty corner” aki a keda ehekutá i Antia a sali for di esaki ku un atake velos na di 31 minüt i a bin tèrminá ku Clair Visser manda un tiru violento te den e huki abou di gol. Un tremendo gol den e promé mitar di e wega.
Den e di dos mitar na di 42 minüt Rani Devi, e estrea di India, ta bin empatá e skor ku un bon tiru for di e banda robes di kancha te den e huki abou di gol. E fanátikonan di India a selebrá e gol aki.
Pero djis despues Antia ta bai dilanti na di 54 minüt ora ku riba un pase di Anika de Haas, Maria Hinskins ta desviá esaki i ta anotá e di dos gol di Antia.
India a sali en buska di e gol di empate, pero e defensa di Antia a wanta duru, apesar ku Ernestina Schreuder i Jolanda Clemens a haña karchi hel i a keda ekspulsá.

ARIES: Bo bida sosial ta stimulá i bo por disfrutá di hopi bon kompania. Bo ta mustra mas sinsero, bo ta mas sigur di bo mes. 12,33,05.

TAURO: Bo ta superá awor mas di bo salú si di bèrdat bo ta buska loke ta korekto pa bo hiba bo bida. Alimentá bo mes mihó i ku un rutina di ehersisio. 01,08,03.

GEMINIS: Bo ta den un romanse tremendo e dia di awe i lo bo disfrutá di dje na bo antoho. Sigui fortalesé bo mes. 15,05,17.

KANSER: Bo kas ta kombertí awor den e lugá di reunion i fiesta. Saka tempu pa kompartí tempu pasivo ku bo famia. Nan tin mester di bo i abo di nan. 07,12,22.

LEO: Bo ta dispuesto awor pa komplasé lo demas kon tal di disfrutá di e kompania di bo sernan stimá. Boga pa union familiar. 16,29,41.

VIRGO: Bo dulsura i bo sensibilidat lo ta e ingredientenan ku ta dunabu e toke spesial na bo persona. Kontrolá tur asuntunan di yalusí. Pone mas atenshon na bo aparensia. 04.

LIBRA: Bo no tin ku pidi nada awor na bo pareha, ya ku lo tin hopi bon komunikashon entre bosnan. Ta bai tin resultado masha armonioso na ora di hasi plannan huntu. 08,13.

SKORPION: Laga ku kada hende ta tuma e kaminda ku ta korespondé nan. Abo so por konsehá, pero no forsa, ounke esei lo ta mihó pa nan. 05,15,32.

SAGITARIO: Loke ta sosodiendo den bo bida na e momentunan aki, ta hasi ku bo a madurá i ku ta bini kambionan den loke bo ta mira bida. 33,14,09.

KAPRIKORNIO: Bo ta riska tur kos i lo bo ke proba tur kos tambe. Bo inisiativa ta balente i den hopi kaso asertá den adelanto di tur kos. 09,13,04.

WILLEMSTAD – “Loke Komishon di Energia a logra ta simplemente un bèrgwensa. Un bèrgwensa ku un komishon a tuma 4 siman largu pa bin bisa nos loke nos tabata sa kaba”, asina presidente di partido Niun Paso Atras Carlos Monk a reakshoná.
Monk a bisa, ku ta inkreibel ku un komishon ta tuma 4 siman largu, despues ku anteriormente a pretendé ku tin alternativa pa e oumento di preis di kombustibel, pa awor presentá loke nan a presentá.
Pió ainda: kaminda ta pidi mas tempu pa kaba e trabou.
Carlos Monk a mustra, ku niun di e rekomendashonnan ku e komishon a presentá no ta representá algu ku ta berdaderamente nobo.
Asuntu di bai Venezuela pa negoshá un mihó preis ta kos ku nos tin añanan ta papia riba dje kaba.
Redukshon òf eliminá di OB i akseins riba gasolin ta aparesé riba e lista di proposishon ku diputado Eugène Rhuggenaath a bin kuné algun tempu pasá.
I tur hende ta enfatisando e importansha di un kampaña di konsientisashon. Realmente, nada nobo, segun Monk a mustra.
El a bisa, ku el a sinti falta di otro posibilidatnan manera por ehèmpel kon atendé ku e kompanianan di energia Curoil i Aqualectra.
“Tin por ehèmpel un problema ku e desperdisio na Aqualectra. Esaki ta un faktor serio ku mester ser atendé”, segun Carlos Monk.
“Tin mas posibilidat kaminda ta atendé e krísis di energia na un forma mas profundo. Pero nos no a weta nada di e kosnan aki den e rekomendashon di e komishon”, di akuerdo ku presidente di Niun Paso Atras.

WILLEMSTAD – “Ulanda ta un partner konfiabel. Tin masha kos ku polítikonan di oposishon ta bisa di Ulanda, pero no ta parse ku tin e disposishon pa sinta na mesa i papia”, sekretario di Estado pa Relashon den Reino Ank Bijleveld a deklará.
Bijleveld a hasi e deklarashon aki despues di un diskushon – basta fruktífero – ku e tabatin ku hóbennan antiano, organisá pa Vereniging Antilliaans Netwerk (VAN) na Ulanda.
Sekretario di Estado Ank Bijleveld a duna un relato amplio di e desaroyonan rondó di e trayekto di restrukturashon estatal ku ta tumando lugá na Antia.
Tabata un enkuentro fruktífero, pero kaminda tabatin hopi krítika tambe riba e aktitut di polítikonan ulandes kontra Antia.
Ekspreshonnan manera esnan di Hero Brinkman i Geert Wilders a subi mesa i a konfrontá e sekretario di Estado ku nan.
“Mi no ta kere ku mi ta bisando algu nobo, si mi bisa ku e ekspreshonnan aki no ta karga aprobashon di gobièrnu ulandes. No ta punto di bista di gobièrnu nan ta. Tin hopi polítiko ku ta hasi deklarashon fo’i sla. Pa ami, ta simplemente ko’i kèns esakinan ta. Onzin. Kletskoek,” asina Bijleveld a afirmá.
Bijleveld a bisa ku e ta duna mas importansia na un diskushon entre polítikonan ulandes i esnan di Antia. Nos mester start e diskushon aki.
“Oposishon na Kòrsou ta grita pafó di sala, pero no ta dispuesto pa sinta papia,” Bijleveld a bisa.
E tabata referí aki opviamente na e susesonan durante su bishita di mas resien na Kòrsou, kaminda partidonan di oposishon a blòkiá e outo den kua e mester a bai Konseho Insular. Esaki a sosodé dilanti katedral di Pietermaai.

WILLEMSTAD – Manera ta konosí, resientemente medionan di komunikashon a publiká artíkulonan den prensa relashoná ku e konfushon ku a surgi durante e rueda de prensa di UTS djarason 16 di aprel último.
Durante e rueda de prensa aki, a surgi un konfushon tokante e nesesidat di un liña di telefon pa un konekshon di ADSL. Riba esaki sr. Paul de Geus a bisa, ku no ta nesesario pa tin un liña di telefon pa un konekshon di ADSL.
Esaki ainda no ta posibel riba e infrastruktura di UTS, debí ku téknikamente mester di un liña di telefon pa un konekshon di ADSL.
Basá riba lokual tin aki ariba menshoná, UTS ta afirmá ku pa motibunan tékniko tin mester di un liña di telefon pa un konekshon di ADSL.
UTS ke kòrda ku pa kada kliente nobo ku apliká pa un konekshon di ADSL den luna di mei i yüni, lo risibí e instalashon di Telefasil òf telefon fiho postpago kompletamente grátis. Sí e klientenan lo tin ku paga e gastunan mensual relashoná ku e konekshon di e liña fiho aki.
E kostonan mensual pa un konekshon di ADSL ta lo siguiente:
• 1 megabit Naf. 99,-
• 2 megabit Naf. 149,-
I naturalmente tin tambe 512 kb ku ta kosta Naf. 85,- mensual.
Pues UTS ke enkurashá tur nan klientenan pa hasi uso di e oferta aki i asina disfrutá di tur e benefishinan di OneNet broadband internèt (spit haltu).

WILLEMSTAD - Despues di e wikènt ku a pasa First Caribbean International Bank ta atrobe “ First den seguridat industrial”. Tur empleado asigná komo enkargado pa presta asistensia i promé ousilio den empresa (BHVer Bedrijfs HulpVerlening) a keda entrená i eksaminá den e dianan ku a pasa aki pa Dutch Caribbean Training Centrum DCTC, tantu den asistensia di promé ousilio komo den prevenshon di kandela i evakuashon di edifisio. Tur ku a pasa nan pruebanan a keda sertifiká segun e norma international di NIBHV.
DCTC lo asistí i guia tur empresa riba Kòrsou, pero tambe riba e otro islanan, den e training nan ku eksigensianan di alto nivel den normanan di seguridat. Denter di korto tempu DCTC lo ta dunando training nan di seguridat na Sint Eustatius tambe.

WILLEMSTAD – Ora un buraku den kaminda, un tapa di riol òf kualke otro situashon okashoná daño na un vehíkulo, e outomobilista mester keda na e sitio te ora polis, CRS òf SKS yega na e sitio. Pa DOW por kubri e daño kousá, semper e outomobilista mester di un prosèsverbal.
Esaki ta loke A.T.S.K. ta informá tur outomobilista. E asosashon ta risibiendo hopi yamada telefóniko di outomobilistanan ku ta reklamá, ku pa motibu di mal estado di kaya nan vehíkulo a sufri daño. Tambe tin diferente outomobilista ku ta akudí personalmente na ofisina di A.T.S.K. pa por entregá un petishon kompañá ku resibu di e daño okashoná na e vehíkulo.
Relashoná ku esaki A.T.S.K. ta haña ku ta na su lugá pa trese lo siguiente dilanti: A.T.S.K. ta konsiente ku tin kayanan aki na Kòrsou ku ta den hopi mal estado. Pero A.T.S.K. ta konsiente tambe ku resientemente Diputado Anthony Godett a anunsiá ku el a duna D.O.W. ya kaba enkargo pa drenta den barionan i kuminsá yena e burakunan ku tin riba kaya, i kaminda esaki ta nesesario ta drecha e infrastruktura tambe. A.T.S.K. a tuma nota ku yenamentu di e burakunan ta tumando lugá. Esaki ta nifiká ku e trabounan pa drecha kareteranan ta kanando i no ta tur bario ta asina leu.
Mas aleu e asosashon ta informá, ku si riba e kareteranan ku esaki no a tuma lugá ainda, un vehíkulo sufri daño pa motibu di mal estado di e kaminda, i e outomobilista por prueba esaki, A.T.S.K. ta supliká pa hasi lo siguiente: