ORANJESTAD- Dia 30 di april Iglesia Famia di Dios ta organisa un festival di Cuminda y bendemento di bolo y cos dushi. Ta bai tin diferente tipo di cuminda bon prepara manera: Galiña stoba, Bami, Carni stoba ,Piska y hopi mas.
Ta bai tin tambe diferente sorto di bolo.Pa hendenan cu gusta vlooienmarkt nos ta bai tin un mini vlooienmarkt cu bendemento di mata,artikulonan di cas y hopi mas.
Pesei bin pa contrubi pa un bon cousa.Lugar: Edificio di F.T.A 2do piso. Net na entrada di San Nicolas Ora: 10or am pa 3or pm Dia: Diaranson 30 april 2008
Bini uno,bini tur y Dios bendishona nos dushi Aruba.

Gobernantenan actual no por core pa nan responsibilidad

ORANJESTAD- “Ya ta siete (7) aña consecutivo cu e mesun gobernantenan ta na mando pero keto bai por tuma nota cu e gobierno actual no ta asumi su responsabilidad,” Mike de Meza di partido AVP ta mustra den un comunicado di prensa.
E gobierno actual ya pa añanan a trata di goberna dor di crea un cultura di miedo den comunidad y a purba indoctrina cu e falta di loke ta sosede na Aruba semper ta falta di tur otro y no di e gobierno actual. Sin embargo, e problema mayor na Aruba ta cu tin un Gobierno cu no tin un nocion con pa maneha e pais, Mike de Meza Parlamentario di AVP ta duna di conoce.
“Imaginabo cu e gobierno actual ya pa 7 aña nunca a pone un maneho planifica riba mesa. E unico maneho cu e gobierno aki a conoce ta uno adhoc sin un vision. Esaki ta trece cune cu e gobierno actual hamas por tin un base real pa soluciona e crisis den finansa publico cu nan mes a crea. Mas tristo ta cu Conseho di Minister actual, consistiendo di 8 minister (incl. esun na Hulanda), conhuntamente tin mas di 125 aña di “experencia” den politica y sinembargo e pais aki ta den incertidumbre riba diferente aspecto fundamental”, de Meza ta duna di conoce.
Aki e ta menciona cu na Aruba na e momentonan aki tin un “morele verpaupering” enorme y hamas bisto cu ta e consecuencia di e “maneho” deficiente y intransigente di e gobernantenan actual. Un caida den norma, balor y moralidad den gobernacion actual ta laga su rastronan tur dia den comunidad. Esaki ta bisto tur dia mas y mas. Awe por encontra tanto problema social den comunidad y na mes momento ta haci falta di un maneho directo di parti di e gobierno actual.

ORANJESTAD- Mike de Meza di fraccion di AVP ta mustra den un comunicado di prensa cu e actual Gobierno, durante e ultimo 7 aña a ricibi mas cu 700 miyon florin extra cu cualkier otro gobierno den historia di Aruba, tambe a fia mas cu mil miyon.
Apesar di esaki, keto bai tin un nesecidad grandi pa mas entrada serca e gobierno, pero di otro banda pueblo ta harta di medida y ta puntra su mes ta kico a pasa cu tur e placa cu e gobierno a sa di ranca for di pueblo.
E situacion pesimo den e ramo di educacion y un falta di maneho sincero, realistico y alcaso di e gobernantenan responsabel den educacion ta un desafio enorme pa cada mayor na Aruba pa por ofrece un educacion adecuado pa nan yiunan.
Awe gobierno ta ofrece e comunidad un educacion mediocre a consecuencia di un sistema caminda tin falta di material di calidad y infrastructura corecto. Tambe gobierno a frusta gran cantidad di maestronan cu mester percura pa duna un educacion adecuado na nos muchanan.
E situacion di criminalidad, ladronicia y desorden hudicial a bira intolerabel na Aruba. Esaki ta resultado di un incapacidad total di gobierno pa crea un maneho riba e tereno di husticia cu ta specifico, realistico y alcansabel pa ehecuta.
Storianan bunita of “sterke verhalen” di e gobernantenan actual sin base cu argumento infunda tambe no a yuda comunidad di Aruba cu nada bon.
E derecho di estado democratico di Aruba por wordo garantisa solamente si tin un sistema hudicial funcionabel y caminda e nivel di progreso di e pais lo ta ancra den e grado di desaroyo di e sistema hudicial.

ORANJESTAD- Otro situacion cu ta bira dia pa dia e graf real pa e comunidad di Aruba, segun Mike de Meza di fraccion di AVO, ta e situacion di AZV.
Aki por papia cu enfasis di un maneho caotico y intransigente cu falta profesionalismo y dedicacion real.
Aki ta haci un falta enorme di capacidad pa soluciona realmente e problemanan den salubridad publico.
Para grita cu tur hende ta corupto y di mala fe ta un muestra indiscutibel di un incapacidad di e propio gobernante pa crea e posibel solucionan den e ramo di salubridad publico.
Locual ta necesario ta un gobierno cu realmente sa con pa soluciona problema cu ta biba den comunidad y cuminsa na maneha Aruba segun un plan total pa enfrenta y contraresta e problemanan local y mundial cu ta afectando e comunidad Arubano.
Mester di un gobierno cu un team prepara y profesional cu por ehucuta un plan bon studia, balansa y argumenta.
“Pueblo por ta sigura cu na momento cu AVP drenta gobierno nos lo ta prepara pa trece Aruba bek den tur normalidad pa por sigui progresa a base di un vision bon prepara, discuti y argumenta caminda hopi contribucion di tur gremio, sectornan y pueblo ta envolvi”, Mike de Meza a finaliza bisando.

ATLANTA – Andruw Jones ku na komienso di e temporada aki ta den un tremendo slump ta kere, ku e ta bini bèk meskos ku el a hasi den temporada 2005.
Despues ku el a firma un kòntrakt di dos aña pa 36.2 mion dollar ku Dodgers den offseason, Jones tin solamente un promedio di .159, ku 1 honron den 19 wega te ku djaluna. El a poncha na 22 okashon den 63 turno na bate. El a dal solamente un hit pa e banda kontrali di tereno, kual tabata un tripel kontra di Pirates dia 14 di aprel.
Djadumingu mainta dos ora i mei promé ku e wega kontra di Dodgers, Jones tabata den e “batting cage” bishitante na Turner Field.
E ta kansá di kontestá preguntanan tokante di su komienso lento.
“Dos òf ta tres temporada pasá na 2005 tambe mi a kuminsá lento manera e temporada aki. Kiko a pasa? Buska e informashon aki”, asina Jones a bisa.
Na 2005 el a kuminsá ku promedio di .185 den e promé 18 weganan i a bin terminá ku 51 honron i a sali na di dos lugá den votashon pa MVP di Liga Nashonal.
“Mi ta tratando di haña mi swing bèk. Mi mester tin pasenshi. Mi ta muchu ansioso i ta trata di hasi muchu kos mesora. Mi ta hañando hopi lansamentunan “off-speed, hopi bala for di zona di strike. Ora bo bai un tim nobo, bo kier impreshoná mesora i bati kuater honron den un turno. Bo mester tuma loke nan ta dunabu. Mi mester ta mas selektivo”, asina Jones a bisa.
Defensivamente Jones te ainda ta un di e mihó defensornan. Apesar ku tin preguntanan riba su peso ku a subi serka di 250 liber. E tabata hunga ku peso di 235 pa 240 pa Braves.

DOMINGUITO – Djamars 15 di aprel último RKSV Centro Dominguito Aqualectra, a tene su reunion general statutario pa e periodo 2008/2009.
Despues ku e direktiva saliente a duna relato ekstenso di e trabounan desplegá den e periodo ku a pasa i miembresia a duna deskargo na e tesorero i direktiva aki pa e maneho finansiero hiba, den e reunion general aki miembronan unánimamente a eligí un direktiva nobo pa e periodo 2008/2009.
E direktiva nobo aki lo keda presidí pa sr. Udemar “Shon Ma” Isidora.
E direktiva nobo inmediatamente a konvoká i tene djaluna 21 di aprel su promé reunion pa planiá e trabounan ku tin ku bai hasi i repartí e tareanan.
E direktiva nobo ta konsistí di señornan Udemar “Shon Ma” Isidora (presidente), Rutger Blanken (vise presidente), Dwigno Puriel (sekretario), Huxley “Yubi” Basilio (tesorero), Jeroen Jansen (2do sekretario), Fabian Daou (2do tesorero) i Edmond “Chika” Franciska, Luis da Silva i Roy Recao komo komisario.
E direktiva nobo di Centro Dominguito, meskos ku esun saliente, lo sigui traha pa realisá e vishon di e organisashon. Esta di realisá un organisashon deportivo, spesialmente pa e habitantenan di Dominguito, Koral Specht, Janwe, Steenmijn, Salinja i besindario, kaminda miembronan i nan famia ta sinti nan mes na kas, ta duna oportunidat na hóbennan pa desaroyá nan mes sosialmente i ku semper tin e ambishon pa tambe logra lo máksimo deportivamente.
Score: 0.0, Votes: 0

PENNSYLVANIA, Merka, - Hillary Clinton ayera a vense su rival Barack Obama den e elekshonnan primario na Pennsylvania, ku esaki el a prolongá e karera presidensial demókrata, ku a bira kada bia mas negativo, i ta manteniendo bibu e tiki speransanan di yega Kas Blanku.
Clinton a optené 55% di votonan frente 45% di Obama, un resultado sólido pero kisas no sufisiente pa kòrta bentaha di Obama den kantidat di delegado, kendenan ta eligí e kandidato di e partido den konvenshon di ougùstùs.
Sin embargo, e dama senador di New York a sobrebibí un fuerte kampaña publisitario di Obama, kende a gasta mas ku dòbel kuné den e elekshonnan primario demókrata den seis siman, i lo por sirbié pa optené dividendonan den kampaña di rekoudashon di fondonan.
Pa Obama, e viktoria di Clinton no tabata sorpresa. P’esei no ta un koinsidensia ku el a disidí bai Indiana ayera, kaminda ta bai realisá e siguiente etapa di e elekshonnan primario.
“Algun persona ta konsiderá mi pafó, i nan a bisa mi pa mi sali for di e karera, pero e pueblo merikano no ta entregá i nan meresé un Presidente kende tampoko ta entregá!”, Clinton a bisa su partidarionan na Philadelphia.
Meimei di gritunan i aplousonan, e dama senador a konsentrá su mensahe pa deliniá plannan ku e tin pa e pais, si e yega Kas Blanku i kontrali loke a pasa den dianan promé ku e elekshonnan primario, na niun momentu e no a kritiká su rival Barack Obama.

LIVERPOOL – E norwechi John Arne Riise a hinka un outogol den e último minüt di deskuento pa Chelsea empatá 1-1 na kas ku Liverpool den e promé wega di semi final di Champions League. Riise a trata di manda e bala pafó di tereno ku un kabesaso despues di un sentro di Salomon Kalou, pero pa sorpresa di e kiper spañó Pepe Reina, e bala a bai kai den nèt. Inmediatamente despues di e outogol di e defensor ku a kai manera un baño di awa friu riba e fanátikonan di Liverpool den stadion Anfield, rèfri a flùit pa final di e wega. Pa Chelsea e gol aki tin balor di oro komo ku e ta konta dòbel den kaso di un empate otro siman na kas. “Tabata un gol di suerte pero hustu. Nunka nos a entregá i esei tabata e premio”, asina Petr Cech, e kiper di Chelsea a bisa. Dirk Kuyt a anotá pa Liverpool na di 42 minüt di wega ku un hungadó di suerte. John Terry a bai despehá e bala ku a keda serka ei i e ulandes a rematá. E partido di buèlta lo tuma lugá dia 30 di aprel awor na Stamford Bridge.
E tékniko di Liverpool, Rafa Benítez tabata furioso despues di e wega. El a bisa ku e rèfri oustriako Konrad Plautz no tabatin kriterionan establesé pa duna minütnan di deskuento. Den e promé parti el a duna un minüt i den e di dos parti kuater minüt, asina Benítez a bisa. E direktor tékniko a bisa mas aleu, ku Liverpool a meresé gana, pasobra e ekipo a krea mihó posibilidat di gol. Liverpool ta buskando su di tres final di Champions League den último kuater añanan. Den e dos edishonnan anterior e ekipo a eliminá Chelsea den semi final.

GUATEMALA – No ta masha kla si NAVU òf e direkshon tékniko di Antia a manda un òf mas opservador mira e partido di mañan entre Haiti i Guatemala na Guatemala. Haiti ta e próksimo rival di Antia Ulandes den e eliminatorionan mundialista.
E tékniko hondureño di Guatemala, Ramón Maradiaga, lo dirigí su promé enkuentro for di dia ku el a tuma rienda di selekshon di Guatemala. Den e enkuentro di mañan Maradiaga lo eksperimentá ku hungadónan ku el a selekshoná for di despues ku el a regresá na timon di e selekshon. Maradiaga a trata sin masha éksito pa klasifiká Guatemala pa e Mundial 2006 na Alemania.
Guatemala ta debutá den e eliminatorionan mundialista dia 14 di yüli awor kontra St. Lucia. Haiti lo topa Antia posiblemente na Haiti, ounke tin vershonnan insistente ta sirkulá ku e enkuentro aki lo ta na Miami.

 

YAKARTA – E relevo di e antorcha olímpiko na Indonesia a keda efektuá ayera kasi ku porta será, esaki riba petishon di China, outoridatnan lokal a limitá e kantidat di persona ku invitashon spesial pa drenta den e stadion unda e vlam a wòrdu traspasá.
Polis a detené vários manifestante ku a forma un multitut pafó di e stadion ku bandera i pankartanan pro Tibet.
Ta trata aki di e kontratempu mas resien di e relevo mundial ku a inisiá na Beijing i kual China a kere ku lo a bai promové nan positivamente.
Vários di e paisnan den Asia mester a kambia e ruta i pone muchu mas seguridat. Na Indonesia un kantidat di 3 mil polis a wòrdu poné riba pia pa e evento aki den e kapital di e pais. Ainda ta spekulá ku lo bai tin hopi protesta na Oustralia i Sur Korea, e próksimo dos paradanan di e relevo.
E akto na Yakarta ni a wòrdu transmití bibu na televishon, ya ku ningun kanal no kier a paga pa e derechinan.
Mayoria di e 5 mil invitadonan tabata funshonarionan di gobièrnu, chinesnan bibá na Indonesia, studiante i spònsernan.
Na Indonesia no tin masha interes pa Weganan Olímpiko, nan tabata e úniko pais na mundu na 2004 ku no a pasa e weganan na televishon.
Algun ora promé ku e yegada di e antorcha, vários persona tabata protestá i a wòrdu detené brevemente pa polis, entre nan un ulandes.

WILLEMSTAD – Den e eliminatorio di Hòki riba vèlt pa Weganan Olímpiko ku ta tumando lugá na Kazan, Russia, e selekshon Femenino di Antia Ulandes, a hunga ayera su di tres partido.
Tabata un wega kontra di e doñonan di kas Russia, ku Antia ta logra gana ku skor di 3-1.
Ku e viktoria aki Antia i Merka ta e dos ekiponan ku ta invikto te ainda despues di tres partido.
Ya for di e di dos minüt Antia ta logra habri e skor, ora ku Pauline Roels a terminá un bon atake pa pone Antia dilanti 1-0.
Esaki a mustra, ku Antia lo a bai gana fásil i pa skor grandi. Pero nada di esaki no tabata bèrdat, ya ku Russia a hunga su mihó wega di e torneo te ainda.
Na di 13 minüt Antia ta bai dilanti 2-0 mediante di un gol di Sanne Van Donk, pero pa restu di e promé mitar no tabata por a hasi nada mas.
Na di 25 minüt Irina Kuzmina ta marka un gol pa Russia, loke a pone ku e asistensia a lanta for di soño.
Sinembargo e klase di Antia tabata muchu kla i sigur tabata hopi kla ku un ora pa otro por a kai mas gol pa Antia.
Na di 52 minüt Floortje Joosten a hinka un pinalti pa pone e skor final na 3-1.
Russia a traha duru pa evitá mas gol. Awe ta un dia di sosiegu.
Awor Antia lo tin dos wega tòf nan dilanti.
Nan mester enfrentá Bèlgika mañan djaweps den e promé wega di e fecha aki i despues e último fecha djabièrnè e promé wega kontra di Merka.

WILLEMSTAD - Diputado di Infrastruktura Anthony Godett a disidí ku e ta kanselá e reunion ku e tabatin ku e invershonista Eduardo de Veer di META Corporation. E motibu, ta deklarashonnan ku De Veer lo a hasi na Aruba ku a kai den masha mal tempu serka e mandatario.
Ta parse ku e tenshon ku pa basta dia kaba ta reina pa motibu di e desaroyonan na Rif, a rementá ayera.
Tantu Meta Corporation komo un grupo ku ta yama su mes Grupo Cayco, ke haña e tereno na Rif pa desaroyá un proyekto turístiko mionario.
E problema ku a bin ta manifestá sinembargo ta, ku den seno di Bestuurscollege tin pensamentu diferente ken lo mester haña e derechi pa desaroyá e área.
Reportadamente partidonan PAR i PNP lo ta na fabor di e grupo Meta Corporation ku ta konstruyendo kaba Hotel Renaissance den e mesun área aki, miéntras ku Frente Obrero a ekspresá sosten pa grupo Cayco, un grupo venezolano ku tambe aparentemente ta finansieramente hopi fuerte i ku ta kla pa kuminsá mesora, manera nan mes a indiká.
“Mi pensamentu ta bon kla. Grupo Cayco ta fuerte, e ta konfiabel i e ta karga mi aprobashon. Tur konseho te ainda ku mi a haña di e grupo aki di mi servisio i konseheronan ta positivo. Mi no tin niun motibu pa duda den e posishon ku mi a tuma,” asina Anthony Godett a bisa.
El a bisa, ku ta sorpresa, pero alabes ku desgustu el a tuma nota kon ayera Eduardo de Veer di Meta Corporation a saka informashon robes na Aruba.
“De Veer ke hasi komo si fuera gobièrnu no tin nada di bisa. Den un pais, ta gobièrnu ta dirigí i disidí. Mi ke anunsiá for di awor, ku mi ta kanselá e reunion ku mi tabatin pendiente ku Eduardo de Veer pa e siman aki. Si esei tin konsekuensia pa gobernashon, anto lag’é ta asina,” Anthony Godett a sostené.

WILLEMSTAD - E proseso pa balorá propiedat i alabes determiná debe ku Antia tin, no ta finalisá ainda. Loke tin riba mesa ta un rapòrt provishonal. Di akuerdo ku e sifranan provishonal aki, balor di tur propiedat di Antia ta mustra un suma negativo di 1.3 mil mion florin. Pero ainda falta diferente komponente pa keda balorá, manera entre otro ophetonan di arte. O sea, ku tur kos den dje por kambia ainda, asina a sali na kla ayera tardi, durante un reunion di Komishon Sentral di Staten.
Na e okashon aki, parlamentu a haña un presentashon di Komishon Repartishon di Bienes di Antia.
E komishon a haña tres tarea: na promé lugá, inventarisá tur propiedat di Antia, na di dos lugá balorá e propiedatnan aki i na di tres lugá presentá gobièrnu un proposishon kon por repartí e propiedatnan aki entre e islanan di Antia.
Presidente di e komishon aki Alberto “Chos” Romero a splika ku a usa e ehèmpel di Aruba komo punto di salida, kombiná ku e balans di propiedat di gobièrnu di 2005.
Ta bon pa bisa mesora, ku a usa 2005 komo punto di salida pa determiná tantu propiedat komo debe. A base di esei, a yega na e konklushon temporal ku propiedat di Gobièrnu Sentral awor aki ta 1.4 mil mion florin, miéntras ku e debe ta 2.8 mil mion florin.
Romero a mustra den mesun rosea sinembargo, ku tin algun entidat ku ainda no a kaba di balorá. Ta trata aki di Banko di Seguro Sosial (SVB), Fondo di Penshun di Antia (APNA) i tambe Banko Sentral di Antia (BNA). Ku otro palabra, ainda mester konta balor di e tres entidatnan aki aserka.

WILLEMSTAD – “Partido Demokrat no ta forma parti mas di Aliansa Patriótiko. Es mas: promé ku Aliansa Patriótiko a pone un ultimatum pa e partido kòrá, e partido a disidí kaba ku e ta bula for di e aliansa”, asina lider polítiko di e partido aki Norbert George a konfirmá ayera tardi.
“Nos no por aseptá terorismo polítiko”, tabata reakshon di presidente di e partido Raymond Bentoera.
Ta konosí ku durante un enkuentro ku prensa djaluna atardi, bosero di Aliansa Patriótiko, e aliansa di partidonan di oposishon den Konseho Insular di Kòrsou a duna Partido Demokrat 2 biaha 24 ora pa disidí si e ta sigui ku e aliansa òf e ta bula’fo.
“Si Demokrat ke sigui, anto e mester soda meskos ku nos tur aki ta hasi”, asina Charles Cooper a anunsiá na nòmber di e aliansa.
Pa basta dia kaba tin loke por ser kalifiká komo frikshon entre e partido kòrá i sobrá partidonan di oposishon. Tabatin vários insidente último tempu ku no a promové un mihó relashon tampoko. No mucha dia pasá tabatin e insidente entre Norbert George i lider di Niun Paso Atras Nelson Pierre. Pierre, iritá aparentemente pa e aktitut di George, dado momentu a pasa George un wanta. Pierre a pidi dispensa despues, pero e kaso a laga un smak hopi marga atras. Banda di esei, tabatin un karta ku partidonan di oposishon a skibi pa sekretario di Estado Ank Bijleveld den kua nan ta ekspresá nan malkontentu pa e forma ku e mandatario ulandes ta trata oposishon, karta ku no a konta ku sosten di e partido dirigí pa Norbert George. George ta sostené ku ora a present’é e karta pa firma, e kontenido no tabata igual ku loke a palabrá anteriormente. El a bisa, ku por sierto no ta promé biaha ku e kos ei ta sosodé. E mesun kos a sosodé tambe den pasado ku un proklamashon di partidonan di oposishon.

WILLEMSTAD - E menasa di Sindikato di Transporte Uní ku si pa djaweps e no haña un kontesta di gobièrnu riba e karta ku el a entregá ayera, ta for di mesa. Esaki, despues ku STU a sinta na mesa ayera tardi ku diputado responsabel pa transporte Anthony Godett.
“Falta di informashon”, asina e mandatario a splika e kambio sorprendente di shofùrnan di bus.
E shofùrnan ayera a tene un akshon morkoi durante kua nan a bai entregá un karta na gezaghèber Magali Jacoba. Den e karta, nan ta bisa ku na dos okashon kaba nan a buska un apertura serka Bestuurscollege, pero sin resultado.
Si pa djaweps awor nos no tende nada, nos lo tuma desishon kiko nos ta hasi, ta loke bosero Andres Everitz a deklará.
Manera LA PRENSA a informá for di ayera kaba, gezaghèber Jacoba a bisa, ku e no ta dispuesto pa aseptá niun sorto di preshon.
“Mi ta lamentá ku ta bou di e sirkunstansianan aki nos mester atendé problema den e pais aki”, el a añadí.
El a primintí e sindikato STU di lo tuma kontakto bèk, pero ku di ke laga e asuntu mas tantu posibel den man di diputado di Anthony Godett ku ta esun responsabel pa transporte públiko.
Ayera tardi mes, partidonan a sinta na mesa.
Diputado Godett a splika e delegashon di STU, ku e dokumento di vishon pa un transporte públiko nobo mester pasa reunion i haña aprobashon di Bestuurscollege promé ku e bira un dokumento públiko.
Komo tal, no por repartí e dokumento ni papia riba dje ainda ku partidonan enbolbí.

WILLEMSTAD - Kiko ta maneho di gobièrnu, ora resultá ku mas ku un invershonista mustra interes pa e mesun pida área pa desaroyá proyekto? Kon ta atendé ku nan? Kiko ta e kriterionan ku ta usa pa determiná finalmente ken ta haña e tereno?
Preguntanan ku vários miembro a hasi ayera tardi, na momentu ku Konseho Insular a bini huntu den un reunion públiko pa diskutí e desaroyonan rondó di e área di Rif. E reunion aki tabata pidí pa partidonan di oposishon.
E motibu ta konosí pa tur hende: tin dos grupo ku ta interesá pa ehekutá un proyekto grandi mionario na e sitio aki, pero tin un diskushon ta ken lo mester haña preferensha.
E proyekto ta un proyekto ku karakter turístiko, ku mester forma parti di desaroyo ku ta tumando lugá den e área. E ta nifiká alabes ku e fasilidatnan deportivo ku tin awor aki riba Rif lo disparsé.
E problema sinembargo ta, ku den seno di Bestuurscollege (koalishon), tin pensamentu diferente ken lo mester haña e derechi pa desaroyá e área.
Reportadamente partidonan PAR i PNP lo ta na fabor di e grupo Meta Corporation ku ta konstruyendo kaba Hotel Renaissance den e mesun área aki, miéntras ku Frente Obrero a ekspresá sosten pa grupo Cayco, un grupo venezolano ku tambe aparentemente ta finansieramente hopi fuerte i ku ta kla pa kuminsá mesora, manera nan mes a indiká.
E reunion di ayera – manera por a spera – a konsentrá su mes riba e preguntanan ku tin rondó di e desaroyo aki na Rif.

WILLEMSTAD - Pa e echo ku ta bai tin vários dia liber, kuminsando Aña di La Reina, koleganan di e brènchnan na Saliña i Otrabanda di nan propio inisiativa, a disidí ku nan ke pa habri e brènchnan ariba menshoná pa nan tambe por duna servisio na klientenan di Bo Banko Amigu riba djasabra 3 di mei.
Alabes e koleganan di brènchnan na Saliña i Otrabanda ke yuda nan koleganan di e otro brènchnan ku tradishonalmente ta habrí riba djasabra di 8or di mainta pa 12or di mèrdia pa klientenan ku ke hasi transakshonnan personal.
Esaki ta nifiká, ku djasabra 3 di mei Maduro & Curiel's Bank lo tin un total di 5 brènch habrí entre 8or di mainta pa 12or di mèrdia pa duna servisio ekstraordinario; Bloempot, Saliña, Punda, Sta. Maria i Hato.
Esaki ta otro prueba ku empleadonan di Bo Banko Amigu ta empleadonan ekstraordinario. Biba nos empleadonan, biba nos klientenan i biba nos Banko!

Minister di Salubridat Omayra Leeflang: 

WILLEMSTAD – Un pregunta interesante ta vislumbrando ta ken mester paga pa e gastunan di kuido médiko di ilegalnan den nos pais, prinsipalmente esnan ku ta bai Sint Elisabeth Hospital (SEHOS). E suma di aña pasá ku ketu bai ta habrí ta 3.4 mion florin loke ta pone un preshon riba operashon di SEHOS. Pa haña un klaridat, SEHOS a disidí di kuminsá un kaso den korte tantu kontra Gobièrnu di Kòrsou komo Gobièrnu di Antia.
Den e situashon ku tin aktualmente, SEHOS no por ninga di duna un pashènt trato médiko. Maske ki situashon e ilegal ta den, e mester kumpli ku e parti di kuido (zorgplicht). Esei ta pone un preshon enorme riba e instituto, komo ku e ta duna kuido, tin biaha hopi spesialisá, sin garantia ku e ta haña pago pa e trato aki.
“Nos ta bisa bon kla, ku ta Gobièrnu di Kòrsou mester paga”, asina minister Leeflang a bisa LA PRENSA den un entrevista riba e situashon aki. Segun e minister, e lei di atmishon i ekspulshon di stranhero ta en bèrdat un lei sentral. Pero e maneho riba kòntròl di stranhero ta un outoridat di Gobièrnu di Kòrsou (Gezaghèber). Komo ku no ta kontrolá den forma efisiente ta kousando e problema aki. Ta kaminda e outoridat ta, einan e responsabilidat ta”, asina e minister a bisa, referiendo na e situashon ku tin awor aki ku ta Gobièrnu di Kòrsou, den e kaso aki Gezaghèber, ta enkargá ku e aspekto di dunamentu di pèrmit di estadia. Si mester ekspulsá hende for di un teritorio, esei ta tarea di Gobièrnu di Kòrsou, asina e minister a bisa.

WILLEMSTAD – Na e islanan di Antia i na Aruba tin e tradishon, ku ora un hende muri ta der’é huntu ku su kondekorashon (nan) real. Esei ta kontra reglanan establesé, asina e programa NOVA na televishon ulandes a rekòrdá ayera. Un investigashon ku LA PRENSA a hasi awe riba e situashon na Kòrsou a saka afó, ku aki niun hende no sa mes di e regla. Masha hende a bai derá kaba ku nan kondekorashon, siendo ku esei ta kontra lei.
E programa NOVA a mustra ku na Ulanda mes hopi hende ta lubidá riba e regla ku e kondekorashon ta un kos temporal te ora e hende muri. Es mas, hopi hende a haña rel ora e programa a revelá, ku ora e hende muri i entregá e kondekorashonnan bèk, tin biaha nan ta re-prosesá nan i bolbe entregá nan di nobo, dependiendo di kondishon físiko di e kondekorashon.
Na Ulanda ora un hende ku a haña kondekorashon muri, mesora nan ta haña un karta di Kanselerij der Nederlandse Orden, kaminda ta traha i atministrá e kondekorashonnan pa nan entregá nan bèk. Tin algun hende na Ulanda ku no a kumpli, pasobra miéntras tantu nan a dera e hende ku e kondekorashon. Por habri un graf solamente ku outorisashon di Ministerio Públiko. Otronan no a reakshoná mes, pasobra nan no por imaginá nan mes ku ta pidi e kondekorashonnan aki bèk. “Ta un regalu tòg i bo no ta duna un regalu bèk”, asina kasá di Wim Duisenberg, eks presidente di Banko Sentral di Ulanda i di Oropa a bisa e programa NOVA. Sra. Duisenberg a mustra yen di kondekorashon ku su kasá a haña di diferente pais i ta na Ulanda so tin e regla ku mester entregá e kondekorashon bèk. E viuda a bisa, ku si nan mester eksigí pa e manda e kondekorashon ulandes bèk, e lo paga pa esei. Ta posibel pa paga pa e kondekorashon. Mas altu e distinshon ta, mas haltu e preis ta. Den parlamentu ulandes tin miembronan ku no ta di akuerdo ku e situashon aktual. Nan kier kambia lei di tal forma, ku e kondekorashon ta bira propiedat di esnan ku ta keda atras.

Lorito ta yama tur hende un felis djarason. E desishon di DP i su Lider pa banda Aliansa Patriótiko sigur ta un desishon lat, pero asertá. DP no por hasi otro ku defendé su lider, ounke opviamente ku Norbert no ta sali liber for di e provokashon ku a tuma lugá i ku a kost’é un wanta. Pero bou di ningun sirkunstansia por aseptá un kos asina aki. Bo’n ripará ku for di despues di e insidente aki Nelson Boroto a bai skonde. Ta fin di luna, tempu pa bai kobra. Por ta nos lo tende di dje den e dianan aki.
*********
Nos a tuma nota di e deklarashonnan di Nelson Navarro indikando ku e kaso George-Pierre ta un kaso entre e dos partidonan i no di Aliansa Patriótiko. Nos ta desapuntá den e ponensia aki, pasobra no ta pidiendo Aliansa Patriótiko pa duna un opinion riba e kaso (ounke esei no ta mal idea), pero ta pidi polítikonan en general pa duna nan punto di bista riba un agreshon verbal i físiko ku a tuma lugá kontra un kolega polítiko i representante di pueblo. Bo no mester ta den niun Aliansa pa bo duna opinion. Nos ta spera ku komo lider polítiko ku ta promové norma i balor (den polítika tambe!) ku tur esnan ku ta stima desensia i bon kondukta ta tuma posishon. Nelson a desapuntá nos den e sentido aki.
*********
Nos a spera un opinion tambe di MAN, ku semper nos tabatin komo un partido di desensia i órden. Pero MAN tambe a keda ketu i no a duna opinion. Un kos por ta tur importante ku tin, pero si pa yega na e kousa noble aki, tin desórden anto mihó no kuminsá mes. Nos a bisa Charles i otronan den MAN na diferente okashon, pa no atendé ku breu, pasobra breu ta pega na bo! Di e otronan bo no por spera otro i p’esei nos no ta komentá nan mes!