ORANJESTAD - Ayera Scouting Aruba a recorda e dia cu Lord Baden-Powell a scohe pa celebra “St. Joris Dag” como nan patrono pa su balentia pa enfrenta e dragon cu tawata un menasa pa tur ser humano.
Awe despues di mas cu 100 aña scouting ta wordo practica tur rond di mundo y Aruba no ta un exception. Tur hende cu un tempo tawata scout por corda con orguyoso nan tawata drenta e cura di scol y/of na trabao cu nan uniform, pasobra ta esaki ta un dia tradicional cu tur scout ta cana henter dia den nan uniform pa demostra mundo henter cu nos ta orguyoso di ta un scout.
Tur scout por corda tambe cu na final di dia nos tin kampvuur y cu entusiasmo ta warda pa tira e flor cora den e candela pa pidi un deseo cu seguridad di lo wordo cumpli.
Un scout cu tur siman ta bin pa siña con pa sobrebibi y prepara nos mes pa enfrenta nos mundo cu seguridad den nos mes y den loke nos kier logra den nos bida, material cu nos fundador Lord Baden-Powell a laga atras pa nos. Nos ta hunga y pasa dushi, mientras nos ta siñando e reglanan di bida pa por scohe e bon caminda cu lo hiba nos di ta un mihor cuidadano pa sirbi nos pais. Cu seguridad sa di rechasa tur loke ta malo pa bo y bo famia y bo comunidad.
Scouting Aruba pa di dos aña ta celebra “St.Joris Dag” ariba e diasabra pa asina por dedica mas tempo na e celebracion, sin stroba e hobennan di por presenta na ora na scol y tambe pa e mayornan cu pa motibo di trabao no por trece e muchanan mainta tempran y yega na trabao na ora.

ORANJESTAD- Diasabra venidero Scouting Aruba lo celebra St. Joris Dag” y pa esaki a hinca un programa den otro.
E aña aki mescos cu aña pasa lo tin e apertura di dia lo ser teni ariba e tereno dilanti di St. Dominicus College. Scouting Aruba ta invita tur Bever, Welp, Verkenner, Explorer cu nan lidernan miembro di Gruponan: Baden-Powell, Madiki patras di Riverplate, bao liderazgo di Hopman Reuben Craigg
Cacique Macuarima, Sta Cruz na Cacique Macuarima school, bao liderazgo di Hopman George Geerman Cascabel, Ayoo na Emmaschool, bao liderazgo di Ouwe baas Fernando Kock Casibari, pariba di Casibari Rock Formation, bao liderazgo di Hopman Patrick Croes , Kimball O’Hara di Piedra Plat den Casi Bari Rock Formation, bao liderazgo di Hopman Hubert Winterdal, Ora Ubao, Tanki Leendert na Colegio Ora Ubao, bao liderazgo di Hopman Candy Boekhoudt, San Dominico Noord, patras di St. Anna/St. Aloysius School, bao liderazgo di Akela Sharlyn Tromp-Farro, San Martin de Porres, Buena Vista, bao liderazgo di Hopman Eddie Maduro
Santanero, Dakota pariba di Rode Kruis, bao liderazgo di Hopman Edward Luckhoo, Sint Paulus Michael, San Nicolaas na Santa Theresita Center, bao liderazgo di Hopman Ralph Croes, Sint Joris, San Nicolaas patras di Dr. Every, bao liderazgo di Baloe Lucaskjo Schmidt Sint Hyacintus, Savaneta na centro Funari, bao liderazgo di Hopman Niel Thijsen, Sonrisa nos grupo special di Pavia, na Centro Sonrisa, bao liderazgo di Hopman Ben Broekman.
Tur ta ser spera den uniform completo pa 8.30 di mainta pa asina nos por cuminsa cu nos celebracion. Nan lo sali cu un parada for di St. Dominicus College, pasa den caya principal y regresa St. Dominicus College. Despues lo tin e ceremonia di pone krans na e monument cu lo termina pa 12.00 di merdia.

ORANJESTAD- E ganadornan di Rancho Blue Lagoon su di tres torneo di pesca tabata e boto Joselyn di capitan Louis da Silva cu 40 Kilo, di dos luga e boto Jo-Ann di capitan Buchi Briesen cu 36 Kilo y na di tres luga e boto Charisa di capitan Mirto Perez y “Asina ki” cu 26 Kilo.
E corona di rey di Jampau 2008 a bai pa Buchi Briesen cu un Jampau, mayor ehemplar, cu a pisa 8 Kilo. Mayor Mulato a bai pa Alexio Faro di e boto Ay mara cu un bunita ehemplar di mulato cu a pisa e balansa na 10 kilogram. E picuda di mas grandi a bai den man di Hoef Croes di e boto Orca II.
Rancho Blue Lagoon cu sosten Fundacion Centro di Pesca Hadicurari ta gradici tur piscado, pa e tremendo prestacion unda 16 boto a participa treciendo un total di 163 kilo cas.
Danki tambe na e publico cu a asisti masalmente, haciendo e dia uno exitante, exitoso y pasa un dia ameno canto di lama cu nos piscadonan na Rancho Blue Lagoon na Spaans Lagoen.
E comision organisador ta gradici tur e patrocinadornan pa nan asistencia. Danki tambe na prensa pa e bon cooperacion.
Dia 2 di mei proximo lo tin e siguiente torneo di pesca. E biaha aki na Rancho Clemente na Spaans Lagoen.
Lo bai tin un bar bon surti y un cushina cu cuminda crioyo bon prepara, pa asina nos celebra hunto nos himno y bandera na grandi. Tambe lo bai tin un disco pa anima e publico presente. Captains meeting ta dia 29 di april pa 7’or di anochi.

ORANJESTAD – Preparacionnan ta casi cla pa e seminario anual di Quota International of Aruba. Quota ta un organisacion di servicio dedica na mehora calidad di bida di esnan menos afortuna den nos comunidad, especialmente esnan cu problema di oido di habla y hende muher y muchanan den dificultad.
Cada aña e organisacion ta organisa un seminario, cu oradornan internacional. E aña aki a invita dr. Barbara Mackoff y e topico di e seminario ta “Leadership as a Habit of Mind”. Durante e seminario e lo elabora riba e 5 custumbernan mental cu ta caracterisa e bida y e trabow di lidernan exepcional.
El a skibi un boeki tambe riba e topico aki, cu lo ta obtenible durante e seminario. E ta bin prepara pa mustra nos e fuente di nos propio potencial pa lidera. E lo inspira nos y guia nos den nos forma di pensa riba desafionan den nos bida diario y con pa responde na nan.
E seminario lo tuma lugar dia 24 di mei, di 1.00 p.m. pa 6.00 p.m. na Renaissance Conference Center. Ticketnan ta disponible ainda pa un prijs di Afl. 75,00 serca tur miembro di Quota, Giselle Department Store, Antraco Bookstore, Mrs. Minute y T.H. Palm & Co.
E benta di tickets ta bayendo hopi bon, pero ainda tin algun ticket disponible. Aña pasa e seminario tawata “sold out” y hopi hende a keda desapunta. No warda te na ultimo, cumpra bo ticket awor.

ORANJESTAD- Un grupo di maestronan preocupa lo aserca mayornan en particular y comunidad en general pa firma un peticion na minister di Enseñanza pa inform’e , cu nan ta preocupa pa e situacion actual, na unda despues di siete siman di accion ainda no tin solucion na caminda.. Ta pesey nan ta urgi minister pa tuma un rol mas activo, pa asina por yega na un solucion satisfactorio pa ambos banda.
E peticion ta wordo haci tambe pasobra nan ta bou di e impresion cu e dialogo continuamente ta wordo alarga o sea deliberadamente tranca.
Nan ta sigur cu minister, cu ta e prome responsabel pa nos enseñanza, ta comparti nan preocupacion cu e situacion actual y pesey den nomber di tur educador y mayor un biaha mas nan ta pidi minister pa haci lo maximo pa sali for di e impase aki.

WILLEMSTAD – Djarason mainta e grupo Amigunan di Ergilio Hato a bishitá Richardus Huis St. Birgen de Rosario na Sta. Rosa.
T’asina ku Richardus Huis a kumpli 54 aña i e grupo a haña ta bon pa hasi un bishita einan, ya ku tin hopi di e klientenan ei ku tabata konosé i a mira difuntu Ergilio Hato den akshon.
E grupo a bai ku pòtrèt i a pasa un video di un entrevista ku Hermanito a hasi ku Ergilio Hato.
Hopi di e klientenan di e kas aki tabata kòrda “Orilio” i tambe e èks futbòlistanan ku ta forma e grupo di Amigunan di Ergilio Hato.
Grupo Ergilio Hato a bai ku kosnan di pasa boka i tambe algun kos pa refreská e garganta i a tene un sorto di Happy Hour ku e klientenan. Nan a pasa un ratu kontentu kombersando ku e klientenan.
Sigur e grupo Amigunan di Ergilio Hato a keda impreshoná pa e kantidat di hendenan ku nan a pèrdè for di bista ku nan a mira eiden. Tambe e manera servisial ku e personal i lidernan ta trata e klientenan.
Tabata bale la pena i e grupo a keda di bai hasi mas di e bishitanan aki na e otro kasnan tambe.
Un rekomendashon nan tin ta pa famianan bishitá e klientenan den e kas.

PUERTO RICO, - E kantante portorikeño Chayanne lo regresá televishon komo aktor, despues di 7 aña di ousensia, pa interpretá e ròl di vampiro den mini seri “Gabriel” di 10 kapítulo, ku MegaTV lo transmití.
Chayanne, kende no a aktua na televishon for di aña 2001, ora el a protagonisá e telenovela argentino “Provócame”, lo bai interpretá “Gabriel”, un vampiro kontrali na tur loke e personahe aki ta karakteristiká.
“E vampiro aki lo bai tin kualidatnan hopi humano”, e intérprete portorikeño a destaká na revista ‘People en Español’ riba su página digital.
“E ta un vampiro ku tin fe den Dios, ku ta kana den lus, ku por drenta un Iglesia. E ta odia di ta inmortal, pasobra e ke bai shelu pa reuní ku su gran amor”, e kantante i aktor di Puerto Rico a bisa.
Chayanne a komentá ku ounke otro kadenanan di televishon a ofresé diferente proyekto di aktuashon, niun proposishon a kai serka dje asina bon manera esaki.
El a splika ku el a aseptá e proposishon di Mega TV, pasobra e tabata ke un proyekto segun plaso kòrtiku despues di a kulminá su gira internashonal di konsiertonan di “Mi Tiempo”, ku a kuminsá na 2006 i a konkluí na mart di e aña aki.

Foto: Chayanne 2404

Chayanne na Hollywood riba pòtrèt di archivo 10 di aprel 2008.

WASHINGTON, Merka, - E prekandidata demókrata pa Kas Blanku, Hillary Clinton, ta spera rekoudá 10 mion dollar riba Internet, komando di su kampaña a informá, un dia despues di su viktoria na Pennsylvania riba su rival Barack Obama.
“Fo’i ora a deklará Hillary Clinton komo ganadó ayera, te dia di awe, nos a rekoudá, kere òf no, 10 mion dollar riba Internet, e mayó kantidat optené!”, Presidente di e kampaña di Clinton, Terry McAuliffe, a bisa.
“A logra esaki ku 50 mil donante, ku ta nobo pa nos kampaña. E donantenan a gusta loke nan a mira den Hillary Clinton. Ta ku basenan chikitu, nan a duna 10, 20, 30, 40, 50 dollar”, McAuliffe a señalá den deklarashonnan na kadena MSNBC.
El a agregá ku e organisadónan di e kampaña tin konfiansa pa logra e rekursonan nesesario pa e próksimo kontiendanan elektoral pendiente, inkluyendo 6 di mei na Indiana i Nort Carolina, ku ta e estadonan mas chikitu ku Pennsylvania.
E Hefe di kampaña a ninga e krítikanan di korant The New Yort Times, ku a indiká ayera den un editorial ku Clinton mester asumí su responsabilidat pa un “negatividat” ku no solamente ta perhudik’é òf Obama, sino e demókratanan.
Partikularmente, e korant a kuestioná ku Clinton a hasi menshon den su propaganda na Pennsylvania e atentadonan di 11 di sèptèmber 2001, imágennan di Osama bin Laden, e kolapso di Bolsa di New York na 1929 i e krísis di misilnan na Cuba.

BARCELONA – Tur dos promé wega di e semi final di Champions League a kaba den un empate. Despues ku anteriormente djamars Liverpool i Chelsea a empatá dramátikamente, ayera den Stadion Nou Camp Manchester United no a yega masha leu i a saka un empate komo bishitante. E oportunidat mas kla di e enkuentro di ayera tabata na di tres minüt na momentu ku Cristiano Ronaldo, e goliadó te awor di e torneo a kobra un pinalti, pero e bala a bai dal kontra pal’i gol. Manchester a haña e pinalti despues ku e bala a bai dal den man di defensor argentino Gabriel Milito den e área penal. E empate di ayera no a laga masha konklushon pa e próksimo partido ku lo tuma lugá djamars awor na Inglatera, ounke Barcelona tin un bentaha komo ku e no a pèrmití gol di su kontrinkante den su kancha. E próksimo partido lo tuma lugá na e kancha di Manchester na Old Trafford. “Mi no a anotá, pero esei no ta un problema. Lo mi anotá na Manchester”, asina Cristiano Ronaldo a bisa.
Despues di e fayo di Cristiano Ronaldo, Manchester a kai den un lòk i a ekshibí poko di e potensia ofensiva ku e ta demostrá siman tras di siman den Premier League, kaminda e ta lider di e torneo di e aña aki i na punto di bira kampion un biaha mas. E klup ingles a bai kai bèk den defensa i a laga e inisiativa di Barcelona ku sinembargo no a generá masha peliger di gol.
E hungadó di Barcelona Xavi a bisa ku Barcelona a hasi tur loke tin pa gana, no opstante e pinalti. “Nos a dominá 90 minüt i nos a hasi tur loke nos tabata por i e hendenan a bai kas kontentu. Nos ta kontentu pa loke nos a pone riba kancha, pero no ku e resultado”, asina Xavi a bisa. Lionel Messi, regresando tereno for di despues ku el a haña un leshon serio, a bai bin na banda drechi di kancha, pero e no a logra krea peliger den e defensa será di Manchester United. Andrés Iniesta a drenta den e área ingles na di 10 minüt di wega, pero su paso retrasá no a enkontrá kompañero. Kontra un United tabata defendé tur ku tin i a laga Wayne Rooney i Cristiano Ronaldo dilanti pa e kontragolpi. Barcelona a buska tur manera pa krea peliger di gol, pero no tabatin e kontundensia pa pone e gol di Manchester defendé pa e kiper ulandes Edwin van der Sar na peliger. Na di 21 minüt di wega Van der Sar a wanta un kabesaso sin masha peliger di e mèksikano Rafael Márquez. Marquez a haña un tarheta hel ayera i e no por hunga den e partido na Inglatera pa motibu di akumulashon di karchi hel. Pero Barcelona lo por konta ku Carles Puyol ku ayera no a hunga pa motibu di suspenshon di un wega.

JOHANNESBURG – Joel Santana a haña nombramentu ofisialmente ayera komo direktor tékniko nobo di Suráfrika. E lo ta susesor di Carlos Alberto Parreira ku a anunsiá su retiro e siman aki pa motibunan familiar. E Asosashon di Futbòl di Suráfrika a bisa, ku a aseptá e nombramentu riba rekomendashon di Parreira i despues ku Santana a bai di akuerdo ku e kondishonnan. Ta antisipá, ku Santana lo yega e pais dia 9 di mei awor.
Santana a bisa, ku e hecho ku e ta na enkargo di Suráfrika siendo ku e pais ta sede di e Mundial di 201o ta un bendishon. “Mi tin konfiansa riba e trabou ku mi ta bai realisá. Mi eksperensia ku diferente klup kampion lo sirbi pa mi traha riba un ekipo ku tin ku konfrontá e reto su dilanti”, asina Santana a bisa.
Santana a bisa, ku e lo kuminsá su trabou despues di e último partido di e ekipo brasileño Flamenco kontra Botafogo pa e kampionato di Rio de Janeiro dia 4 di mei awor. Santana, ku a dirigí Flamenco na kuater okashon, a saka e popular klup for di zona di degradashon e aña aki.
E notisia riba renunsia di Parreira a provoká alarma den e selekshon di e pais dos aña promé ku e kampionato mundial. Parreira a hiba Brazil na e kampionato di mundu na 1994. Despues di un aña i mei di esfuerso el a rebibá e selekshon surafrikano ku tabata tambaliá. El a traha riba un ekipo hóben sin masha eksperensia ku tabatin algun resultado pober na kuminsamentu, pero despues a kuminsá bria.

LIMA – E kapitan di e selekshon di Perú, Claudio Pizarro a haña outorisashon di FIFA pa eventualmente bai un tribunal deportivo internashonal una bes ku tur posibilidat interno agotá pa e apelá e sanshon fuerte ku a imponé kontra dje pa falta di disiplina. Pizarro no por hunga durante 18 luna pa selekshon di Perú despues ku e Komishon di Hustisia di Federashon Peruano di Futbòl a determiná ku e i tres otro hungadó a kometé un falta grandi di disiplina, na momentu ku nan tabatin un fiesta ku alkohòl i muhé durante un konsentrashon di selekshon di e pais na novèmber último.
Pizarro ku ta hunga pa Chelsea ta e úniko ku a apelá e sanshon. E otro tres miembronan di selekshon ku a haña suspenshon Santiago Acasiete di Almería (Spaña), Jefferson Farfán di PSV Eindhoven (Ulanda), i Andrés Mendoza, di Steaua Bucarest (Rumania) a aseptá e sanshon ounke nan ta konsiderá e kastigu unu masha severo.
E representante di Pizarro Carlos Delgado a bisa ayera na radio, ku FIFA a manda un karta p’e djamars den kua FIFA ta duna outorisashon pa hiba e kaso dilanti di e Tribunal di Arbitrahe Deportivo ku sede na Suisa. Delgado a bisa, ku a risibí e karta aki ku masha alegria, komo ku e ta un meta ku Pizarro tabatin su dilanti. “E karta ta duna nos garantia ku nos por saka e proseso aki for di man di Federashon Peruano di Futbòl, pasobra nan no por a duna nos garantia ainda di ophetividat. Ademas Pizarro tin chèns pa defendé su mes internashonalmente ku wesnan ku ta leu for di e ambiente lokal di Perú”, asina el a bisa. Segun e karta, si un di e dos partidonan no ta di akuerdo ku e desishon di apelashon na Perú, nan por akudí na e tribunal internashonal. E desishon di e tribunal na Suisa sinembargo ta e último posibilidat i kada banda mester respetá e desishon.

WILLEMSTAD - Minister Maurice Adriaens a duna instrukshon na ABVO pa kuminsá tan pronto posibel ku e negosiashonnan pa prolongashon di un kontrato kolektivo pa trahadónan di Post.
Siman pasá djárason tabatin traspaso di e propiedat di Post, dor di e kanadesnan pa Gobièrnu Sentral. Tambe gobièrnu a retirá e hunta di komisario kanades i tambe e gerensia kanades i dos komisario a wòrdu nombrá banda di Gobièrnu Sentral.
Mesora, minister Maurice Adriaens di Tráfiko, Transporte i Komunikashon, a asumí su responsabilidat i el a invitá ABVO pa papia riba futuro di Post. Durante di e reunion a diskutí diferente punto. Entre otro e status di e trahadónan.A surgi e pregunta, si e trahadónan ta bira ámtenar si òf no. Gobièrnu a splika, ku Post ta keda den un NV i ku no ta e intenshon pa e bira un servisio di gobièrnu atrobe.Ta p’esei e trahadónan lo no bira ámtenar, pero nan lo keda trahadónan di un NV. Adriaens a splika, ku tabatin diferente punto ku a keda drumí durante último lunanan den Post. E motibu di esaki ta, pasobra ku e kanadesnan no kier a tuma ningun desishon despues ku a tuma e desishon pa bandoná Post. Un di e kosnan ku ta wantá, ta prolongashon di e kontrato kolektivo. Tambe tin algun invershon ku mester tuma lugá. Ta trata di entre otro invershon den e flete di vehíkulo di e kompania. Durante di sinku aña largu no tabatin invershon den e flete di outo. E direktor di Post, a haña instrukshon pa tan pronto posibel traha riba e asuntu aki tambe. Invershon den ICT, computer i netwerk, tambe mester tuma lugá. ‘E wagenpark tin hopi urgensia, pasobra esei lo influensiá e servisio ku Post por duna na nos komunidat’, minister Adriaens, a remarká.

WILLEMSTAD - Trahadónan di Wit Gele Kruis a keda satisfecho ku e splikashon ku nan a risibí durante di e reunion e siman aki ku Direktiva di e fundashon.
Algun dia pasá e trahadónan a akshoná, despues ku nan a sinti ku entre otro nan seguridat di trabou ta na peliger. Riba insistensia di e sindikato di personal di enfermeria, CBV, Wit Gele Kruis a manda yama e trahadónan pa un reunion.
Meta di e enkuentro tabata pa tene trahadónan trankil, loke e direktiva a logra tambe. Johnny Augusta, miembro di direktiva di CBV, a splika ku e sindikato ta satisfecho ku e informashon ku su miembronan a haña serka direktiva Fundashon Wit Gele Kruis.
Sin ku el a bai spesífikamente riba kontenido dje informashon ‘trankilisante’ ku e trahadónan a risibí, Augusta a referí en general na e puntonan di atenshon ku tabatin den direktiva diario i tambe serka Konseho di Supervishon. ‘Mi ta kere ku internamente tabatin problema ku a kousa preokupashon grandi serka e trahadónan’. E preokupashon aki tabata relashoná ku nan doño di trabou i desaroyo di nan trabou’, Augusta a splika.
CBV sinembargo ta kontentu ku e desaroyo positivo di e siman aki unda e trahadónan a haña e splikashon deseá. Konseho di Supervishon i direktiva di Wit Gele Kruis i e trahadónan a keda kontentu.
Enkuanto e temor pa puestonan di trabou, ku tabata reina serka e trahadónan, okashoná dor di e proyekto di Wit Gele Kruis pa konsentrá riba servisio pa turistanan, Augusta a splika ku e empleadonan a haña e splikashon relashoná ku e asuntu aki tambe i ku nan keda trankil. ‘Mi ta kere ku e trahadónan a keda satisfecho ku e informashonnan ku nan a haña serka direktiva diario i Konseho di Supervishon’, Augusta a ripití enfátikamente.

WILLEMSTAD- Nashonnan Uní ta bai hala atenshon di Ulanda relashoná ku e shen porshento kòntròl na Schiphol i lo pone preshon pa stòp ku e forma aki di kontrolá biahero aki. E Plataforma Nashonal Ulandes pa Historia di Sklabitut, ta konvensí ku esaki ta loke ku ta bai pasa.
Manera ta konosí biaheronan for di Antia i Aruba ku yega Schiphol tambe ketu ta someté na e kòntròl intensivo aki.
Awe Plataforma Nashonal Ulandes pa Historia di Sklabitut a entregá ofisialmente un keho kontra dje kòntròl aki.
Aktualmente e presidente di e Plataforma Ulandes, Iwan Leeuwin ta asistí na e Konferensha Derbin Review, na Geneve. Ta trata di preparashon di e konferensha ku ta tuma lugá na 2009. Leeuwin a pone na atenshon di e Konferensha e tan diskutí asuntu di e shen porshento kòntròl na Schiphol.
Durante dje konferensha internashonal aki, tin asistensia tambe di vários partisipante di desendensia afrikano. Serka e hendenan aki tambe e fenómeno di kòntròl shen porshento ta konosí. Ta resultá segun Leeuwin, ku den vários pais europeo, entre kua esnan afrikano e kòntròl shen porshento ta wòrdu apliká. ‘Pues no ta Ulanda so ta apliká e sistema aki’. Biaheronan prosedente di prinsipalmente Afrika ta someté na e kòntròl rigoroso i ofensivo. E kòntròlnan aki segun Leeuwin ta diskriminatorio, pasobra ku nan ta wòrdu konsentrá riba prinsipalmente afrikanonan di koló. ‘Ta trata debidamente di un forma di diskriminashon’, Leeuwin a enfatisá.

WILLEMSTAD - Diputado di enseñansa, Marilyn Alcala-Wallé, a keda parsialmente sorprendí pa e desishon di Direktiva di Skol pa re-introdusí hulandes komo idioma di instrukshon. Regularmente e diputado tabata informá su mes, pa medio di enkuentronan mensual ku e Direktiva di Skol Katóliko, enkuanto e puntonan di atenshon den enseñansa di fundeshi. E hecho ku e deliberashonnan riba e asuntu aki a kue un rumbo un tiki mas rápido hustamente na e momentu ku e diputado tabata hasi un bishita di trabou na Hulanda, a kousa e strañesa. “For di un distansia tabata hopi ferfelu pa sigui atendé ku e asuntu aki”.
Segun Alcala-Walle, e hecho ku direktiva di Skol Katóliko a disidí ku e ta bai bèk na hulandes komo idioma di instrukshon, ta indiká ku e tin motibunan hustifiká pa tuma e desishon aki. “Nos tur ta konsiente ku e edukashon pa e muchanan den nan idioma materna, ta esun di mas mihó pa nan”. Segun e diputado e tin e informashon ku no ta e intenshon pa bai bèk kompletamente na e sistema anterior, pero ku e lo wòrdu adaptá. “RK Schoolbestuur tambe ta konsiente ku e mucha por haña enseñansa i formashon, ta den su propio idioma”.
Ta e intenshon di e diputado pa den konsulta ku su kolega, minister di enseñansa, disidí kon ta bai asumí nan responsabilidat den e desaroyo ku a surgi na direktiva di Skol Katóliko enkuanto e idioma di instrukshon i disidí kon ta bai sigui.

CARACAS, Venezuela, - Un kumbre di emergensia di paisnan ku ta integrá “Alternativa Bolivariana para las Américas” (ALBA) a ekspresá na Caracas su respaldo pa Gobièrnu di Presidente boliviano Evo Morales i a rechasá e referèndem ku lo bai tuma lugá 4 di mei, pa konsiderá esaki ilegal i atentatorio kontra unidat di Bolivia.
E deklarashon di e aliadonan polítiko di Presidente Morales a provoká un mayó distansia entre e Hefe di Estado i oposishon, ku a determiná manda un emisario na Colombia i Mexico pa informá, for di otro perspektiva, loke ta okurí na Bolivia.
E enkargado di e labor aki lo bai ta Presidente Senado, Oscar Ortiz (Partido Podemos), kende awe lo reuní ku outoridatnan colombiano i djaluna ku esnan di Mexico, asina a keda informá durante un Konferensia di Prensa durante kua a pidi komunidat internashonal manda na Bolivia mishonnan humanitario p’e riesgo di konfrontashonnan na mei.
E kumbre di ALBA, na kua ademas di Morales i Presidente venezolano Hugo Chávez a partisipá Presidente di Nicaragua Daniel Ortega i Vise Presidente di Cuba Carlos Lage, kendenan a aprobá un deklarashon ku ta denunsiá un “intento separatista ku ta atentá kontra Bolivia, atrabes di un pretendido referèndem konvoká den violashon di Konstitushon i e leinan bolivariano”.
E referensia ta e referèndem ku lo bai realisá apesar ku Gobièrnu i Korte Nashonal Elektoral a bai kontra e proseso aki, pa ta ilegal.

ARIES: Bo bida sentimental ta tuma awor un giro nobo. Bo a krese atraves di eksperensianan den bida i lo ta hopi difísil ku bo ta bolbe wòrdu engañá. 27,10,08.

TAURO: Kosnan nobo, o diferente ta imponé. Ta tempu di manifestá bo kreatividat. Bo tin awor e poder di bo bida i sigui dilanti sin mira atras. 13,50,47.

GEMINIS: Ekspresá ku e bèrdat, no gaña. Pone di una bes, e punto final na un konflikto familiar bisando e bèrdat, ounke lo e molestiá algun persona. 02,11,16.

KANSER: E konsehonan ku bo ta ofresé na otronan lo ta di gran ayudo. Pa mas chikitu ku e kosnan por ta, ta kontribuí na hasi e mundu unu mihó. 05,33,12.

LEO: Proyekto i plannan ta kobra forsa pa wòrdu realisá awor. Matrimonio, union, kompromisonan ta wòrdu uní riba e dia aki. 16,06,09.

VIRGO: No sakrifiká e lokual ku tantu bo ta kere ku ta kosnan material. Buska e tesoronan ku ta skondí i riska na tuma desishonnan. 39,01,51.

LIBRA: Lo relashoná ku trabou, estudio o negoshinan ta faborablemente pa bo. Probechá tur oportunidat pa progresá i inkrementá bo ingreso. 20,33,07.

SKORPION: Bo bon sentido di humor ta durante dia. Un persona ku ta pertenesé na bo pasado tin ku atmití e bèrdat i aseptá ku su tempu na bo tèrmino. 31,06,43.

SAGITARIO: Bo komunikashon ta hopi bon aspektá, utilisá na bo fabor. Bo tin lus bèrdè pa tuma inisiativa den asuntunan di amor. 39,04,25.

WILLEMSTAD - Miembro di Tweede Kamer pa partido VVD Johan Remkes ta preokupá pa e direkshon ku a tuma pa lanta kuerponan polisial riba e islanan di Antia, unabes ku e kambionan estatal bira un hecho. Remkes a formulá pregunta na gobièrnu riba su preokupashon.
Remkes ta basa su mes riba e rapòrt ku a sali riba funshonamentu di kuerpo polisial ku ta devastador pa e kuerpo. Un “dodelijk rapport”, ta e manera ku Remkes a deskribí esaki.
El a bisa, ku tin vários pasashi den e rapòrt ku ta pinta un situashon mas serio ku e mes a kere. Mi ta kere ku klaramente tin un diferensha di persepshon, el a añadí.
“Loke e rapòrt ta konstatá ta, ku e kuerpo ta funshoná bou di nivel, e kalidat ta malu, e parti di hasi investigashon a keda atras den desaroyo, e organisashon físiko di e kuerpo ta laga hopi di deseá. Pa kolmo, polis na islanan abou no ta dominá ulandes na drechi, miéntras ku na Islariba no ta dominá ingles sufisiente.
Evidentemente e problemanan no ta data di awor aki, pero ta resultado di un maneho defisiente di hopi aña largu”.
Johan Remkes, manera ta konosí, tabata minister di Asuntunan Interior na Ulanda na kuminsamentu di añanan nobenta.
Sinembargo, e no ta konsiderá ku e tambe tabata responsabel pa esaki. Esun promé responsabel ta e mandatario enkargá ku Antia, el a bisa, referiendo na e hecho ku ta sea e minister òf sekretario di Estado enkargá ku relashon den Reino ta responsabel.

WILLEMSTAD - Parlamentu antiano, ayera nochi a aprobá presupuestonan di Landsloterij di 2000 te ku 2003. Un kos insólito, asina tantu parlamentu komo gobièrnu a koinsidí. Hustamente p’esei mes, riba proposishon di prinsipalmente parlamentario mr. Faroe Metry, pero tambe di ingeniero Dwigno Puriel, lo bai studia e posibilidat pa den futuro presupuestonan di parlamentu no tin nodi di bini parlamentu mas pa aprobashon.
E presupuestonan ku Staten a haña ayera pa trata ta, di añanan 2000 te ku 2003, ke men 4 aña huntu.
“Honestamente mi ta puntra mi mes, kiko mester hasi ku e presupuestonan aki”, asina Faroe Metry a bisa.
El a mustra ku e situashon aki no ta algu normal, ya ku un presupuesto mester ser aprobá promé ku e aña fiskal pa kua e ta konta.
“En realidat nos mester tabata tratando kuentanan anual di e añanan menshoná awor aki. Awor, si presupuesto mes ta lat asin’aki, ta ki dia nos lo por haña e kuentanan anual?” Metry a puntra.
Pero pa Metry, e kos ta mas fundamental. E parlamentario a mustra, ku klaramente ta tratando aki di un lei antikuá, ku no ta kuadra mas ku nos tempu moderno.
“Pakiko presupuesto di Landsloterij mester bin parlamentu mes? Pakiko presupuesto di Landsloterij mester haña aprobashon di Staten i esun di por ehèmpel Fondo di Penshun APNA, di SVB i di Banko Sentral no? Es mas: e entidatnan aki tin muchu mas tantu plaka ta manehá, ku Landsloterij,” Metry a trese dilanti.

WILLEMSTAD - Lei ta bisa ku mester aprobá presupuesto den e aña promé ku e aña na kua e presupuesto ta referí. Ta esei ta balor di un presupuesto, pa bo sa adelantá kuantu sèn bo tin pa gasta i kon bo ta bai gast’é. Kon por ta posibel ku Landsloterij a drei ocho aña largu sin un presupuesto aprobá? Ta kon e kos aki a bai anto? Ta asin’aki nos ke drenta e status di pais outonomo den Reino?
Preguntanan skèrpi di parlamentario ingeniero Dwigno Puriel, durante tratamentu ayera nochi di presupuestonan di 2000 te ku 2003 den sala di parlamentu.
Puriel a bisa ku den sierto sentido por a papia di un dia históriko ayera. Históriko, pasobra porfin a trata e presupuestonan aki. Pero históriko tambe, pasobra ta un desepshon grandi ku un parlamentu mester trata presupuestonan asina bieu. Aki nos ta haña un dualismo grandi.
“Kon esaki por ta posibel? Unda e papel ku parlamentu mester hunga den e kaso aki a keda? Trata presupuesto dje bieu aki ta algu opsoleto, e ta manera ulandes ta bisa mosterd na de maaltijd. E kos aki ta superfluho,” Puriel a duna di konosé.
Segun e parlamentario, tur e presupuestonan a keda entregá demasiado lat. Konsekuentemente, nan a yega parlamentu lat tambe.
“Mi ta puntra mi mes si gobièrnu no tabata kapas pa atendé e asuntu aki na un manera diligente i entregá e presupuestonan aki na tempu.
Nos sa tende hopi biaha ku parlamentu ta tarda kos. Mi ta kere ku e biaha aki klaramente esei no tabata e kaso,” di akuerdo ku e parlamentario di frakshon di MAN.