ORANJESTAD- Awe pa 4’or di atardi, ta tuma lugar inauguracion di e cancha di basketball den e bario di Seroe Patrishi. Despues cu e proyecto di vivienda na Seroe Patrishi a keda finalisa, FCCA a reserva un pida tereno pa por construi un aerea di recreo pa e bario.
Como parti di e plan di FCCA pa eleva e calidad di bida den su complehonan di vivienda, construccion di aereanan pa recreo pa e hobennan cu ta biba den e complehonan aki tambe ta un prioridad. FCCA su meta primordial ta pa construi vivienda pa nos comunidad cu mester di uno. Adicional pa por crea complehonan di vivienda sigur y eleva e calidad di bida, FCCA ta hasi invercion den areanan di recreo. Pa por construi e aereanan aki ta rekeri bastante invercion.
E costonan ta halto en comparacion cu construccion di un vivienda. Sinembargo FCCA ta purba pa crea esakinan na un costo mas abou cu ta posibel, manteniendo e calidad pensando riba termino largo. Ta pesey hopi biaha e proyectonan aki ta tarda, pa e simpel motibo cu ta wordo sondea na un miho producto cu costo abou. Esey ta e factor tambe cu e proyecto di e cancha aki den e compleho di vivienda na Seroe Patrishi a dura asina largo.
Sinembargo awe ta asina leu cu esaki ta cla pa e hobennan di e compleho aki hasi uso di dje. FCCA kier encurasha e hobennan di e bario aki pa hasi bon uso di dje. Nos ta na altura cu tin hobennan cu ta hopi entusiasta te cu nan ta comete destruccion na varios di e aerenan aki. Un meta mester bira pa e otro hobennan den e bario cu si ta agradecido na e gesto aki pa evita cu otronan ta hasi destruccion na nan cancha. Nan mester para fuerte pa cuide. FCCA kier pa nan sa cu e cancha aki su inversion di placa ta basta halto y cu simplemente e la wordo construi na bienestar di e hobennan di e bario aki mes.

ORANJESTAD- Recientemente presidente di Rotary Club of Aruba, Sr. Bert Kamsteeg, a instala un miembro nobo na Rotary Club of Aruba, kende ta Drs Harold G. Hagens, DDS Tandarts.
Sr. Frans Brinkman, miembro di Rotary, a introduci Dentista Hagens durante di e anochi aki y a splica un poco di su carera profesional, su amor pa golf y tambe futbol.
Dentista Hagens a gradua na 1982 na Universidad di VU na Amsterdam y tin 26 aña ta practicando como Dentista na Aruba.
E ta un persona hopi conosi den comunidad y ta Voorzitter di Raad van Toezicht di SVB. Sr. Hagens a keda instala oficialmente pa e presidente di Rotary Club of Aruba, Sr. Bert Kamsteeg, kende a yama Sr. Hagens bon bini na e club di servicio.
Sr. Hagens a trese dilanti cu pa su persona ta un honor pa por sirbi e pueblo di Aruba awor atravez di Rotary Club of Aruba.
El a trece dilanti cu e ta contento di por ta na ora den Rotary y asina yuda den un forma hopi activo mesora cu Fiesta Rotaria.
E ta spera di hasi esaki hopi mas biaha.
E miembronan di Rotary Club of Aruba a yama Dentista Harold Hagens bon bini y a felicite pa esaki.

ORANJESTAD- Aña di la Reina ta un dia cu miembronan por entrega buki sin paga but. E aña aki e celebracion di La Reina ta riba diarason, 30 di april.
No ta cobra but
Tur miembro di biblioteca por entrega e bukinan cu a fia sin paga but pasobra biblioteca lo no cobra but riba e dia aki.
No ta importa si e bukinan ta lat un siman, un luna of kizas mas. En especial biblioteca ta spera tur studiante di Mavo/Havo/VWO pa entrega nan bukinan pa otro alumno tambe por lesa nan.
Biblioteca ta hasi un accion tremendo pa por haya tur buki bek pa asina por sigui brinda nos comunidad e servicio di prestamo di buki na esnan cu mester di informacion. Biblioteca ta spera di por conta riba e cooperacion di tur su miembronan pa bin entrega buki diarason dia 30 di april, Aña di la Reina.
Mercado di buki
Pa tur persona cu ta buscando bukinan segunda mano esaki ta un bon oportunidad. Tin un gran variacion di buki na benta, tanto pa adulto como pa mucha y hoben y na hopi bon prijs.
Ya for di nueb'or di mainta por disfruta di e dushi ambiente cu musica y un cushina y bar bon surti. Tambe lo tin un gran variedad di articulo manera, coi hunga y mucho mas na prijs hopi hopi abao.
Publico ta bonbini pa pasa na biblioteca na Playa den George Madurostraat for di 9’or di mainta te 2’or di atardi.

ORANJESTAD - Ministerio di Husticia y Instituto Alarma y Seguridad Aruba (I.A.S.A.) ta anuncia e resumen di Maart 2008 pa seccion di Guarda Nos Costa (GNC), Imigracion na aeropuerto y nos wafnan.
GUARDA NOS COSTA
Pa luna di Maart, personal di GNC a logra trece aden un total di 63 persona pa controlnan administrativo pasobra cu na momento di control rutinario nan no por a presenta documentonan valido pa traha legal aki na Aruba.
Di e cantidad aki a resulta cu 13 a wordo laga den libertad dor cu despues di trabou administrativo a resulta of nan por a prueba cu nan tawatin un permiso di estadia legal pa permanece na Aruba.
Un total di 50 persona a wordo traslada pa CDI wardando pa nan deportacion. Despues di investigacionan ariba e total di e personanan controla, a resulta cu 12 di nan a drenta clandestino (cu boto) y 51 a drenta cu avion y a dicidi di keda atras ilegal y intencionalmente.
E resumen di deportadonan pa e luna di Maart 2008 ta cu 50 stranhero a wordo pasa over na Imigracion pa ehecusion di e orden di deportacion.
E top 5 nacionalidadnan di e personanan cu a drenta of a keda ilegal ta: 16 Colombiano, 12 Ecuatoriano, 10 Venezolano, 3 Dominicano, 3 Chines y 6 tawata di otro paisnan.
E sexonan di e deportadonan ta 40 masculino y 10 femenino.

E cantidad di personanan cu no a wordo permiti entrada pa medio di nos wafnan a suma un total di 74 (landingsverbod), di cual 59 tawata di nacionalidad Colombiano y 9 Dominicano.
E razon cu e 71 hombernan y e 3 muhernan aki no a wordo permiti entrada ta cu 70 no tawata tin visa pa drenta Aruba y 4 no tawata tin documento valido pa biaha. Adicionalmente, tawata tin 3 caso unda pasaheronan di barco crusero mester a keda Aruba pa motibonan medico, y otro 3 tripulante mester a wordo transporta pa hospital pa razonan medico.

WILLEMSTAD – Den ménos ku 24 ora tabatin dos kaso serio di tiroteo na Kòrsou, kaminda e kriminalnan a usa arma di kandela. Despues ku djarason anochi deskonosínan a asesiná un hòmber na Veeris, ayera nochi tabatin un otro kaso di tiroteo den Kaya Aragua. E víktima ta grave.
Tabata den kareda di 22.00’or ku polis a risibí e notifikashon di e kaso. Segun vershonnan preliminar, tabatin un bashamentu di bala den e kaya i konsekuentemente un hòmber lo a resultá heridá na su kabes. Amigunan di e víktima mes a hib’é hòspital kaminda na su yegada e tabata na tinu ainda. E víktima a duna un deklarashon i bisa tambe ken a tir’é. No ta konosí kon su estado ta na e momentunan akí.
Un biaha mas ta resultá ku poseshon ilegal di arma di kandela na Kòrsou ta un problema hopi serio. Banda di e 6 personanan ku a muri asesiná e aña akí, despues ku nan atversarionan a tira nan ku arma di kandela, e aña akí tabatin diferente otro víktima di tiroteo ku a skapa despues di tabata envolví den tiroteo.

DENVER – Brian Fuentes lo tuma e enkargo di closer over for di Matt Corpas pa Colorado Rockies, despues ku Corpas a faya pa salba wega dos dia konsekutivo.
“Ta tres wega den un siman i kuater for di ocho oportunidat”, asina mènèdjer Clint Hurdle di Rockies a bisa.
Hurdle a papia ku Corpas i Fuentes promé ku e wega di ayera konta di Cubs. Hurdle a bisa ku Corpas a pèrdè velosidat riba su lansamentunan.
“Nos ta mirando hopi inkonsistensia. Mester buska un manera pa yud’é”, asina Hurdle a bisa.
Corpas tin rèkòrt di 0-1 ku un efektividat di 7.50 despues di na komienso di temporada el a salba tres di kuater oportunidat.
“Mi ta pasando den un mal momentu”, asina Corpas a bisa via di un intérprete despues di e wega di djarason.
Fuentes tabata closer di Rockies durante di tres aña i a bin pèrdè su puesto meimei di temporada pasá. E tabata e closer di Rockies for di 2005 ora ku el a salba 30 wega, despues el a salba 31 wega na 2006. Despues di a faya den kuater wega konsekutivo na yüni pasá Corpas a bira e closer na komienso di yüli.

BOSTON – E kamiseta di Boston Red Sox ku tabata sekretamente derá den Yankee Stadium nobo, ayera a keda bendé na findishi pa 175.000 dollar pa karidat.
E oferta di Kevin Meehan, doño di Imperialcar.com, di Medon, Mass., tabata esun di mas haltu di 282 otro oferta pa e kamiseta tur kibrá di David Ortiz.
“Mi a pensa ku e kamiseta lo ser bendé pa mas plaka”, asina Meehan a bisa kende su oferta a bini na último momentu di e findishi riba e-Bay ku a dura un siman a tèrminá pa 12:30pm ayera. “Mi tin tres yu hóben ku mi ta bai mira wega kuné i nan lo a matami si mi no a kumpra e kamiseta ei”.
Despues ku Yankees a saka e kamisetanan a duna esaki na The Jimmy Fund, ku ta e organisashon di karidat di RSox, ku ta afiliá na Dana-Farber Cancer Institute.
Mike Andrews, un eks segunda base di RSox ku ta presidente di The Jimmy Fund a bisa ku nan ta sumamente kontentu.
“Nos ta masha agradesido ku e generoso oferta i nos ta manda nos agradesimentu na Yankees i RSox pa bini huntu den e lucha kontra di kanser”, asina el a bisa den un komunikado.

WILLEMSTAD - Universidat Nashonal di Antia a selebrá apertura ofisial di nan vèlt di futbòl nobo durante un torneo di futbòl ku a keda organisá pa e miembronan di “Campusraad”.
Durante di e atardi aki diferente persona a hiba palabra, e.o.: sr. Eric Fraay, vise presidente di e Federashon di Spòrt Pa Studiante, ku a fungi tambe komo MC e atardi aki. Sr. Arthur Eliza, presidente di e Federashon di Spòrt i sr. Leendert Pengel, mènedjer di e “Facilitaire Dienst” di UNA.
Komo último a bin na palabra Rector Magnificus di UNA sra. Jeanne de Bruijn ku a realisá e promé sake di bala pa asina duna apertura ofisial na e torneo.

Skina di Sorti, awe djabièrnè 25 di aprel di 2008, ta kuminsá ku deseá tur hende un bon dia. Ambishon sano ta keda reflehá den e pretenshon (bo ta kere ku bo ta hasiendo e kosnan bon), intenshon (bo tin e disposishon mental), i esfuerso (bo ta akshoná pa realisá nan) pa hasi lokual tin di wòrdu hasí, den e manera ku e tin di wòrdu hasí (“doing the right things right”). Kon efektivo bo ta den realisashon di e pretenshon, intenshon i esfuerso ta dependé di bo talento nato pa visualisá algu, bo struktura di personalidat (disposishon mental i tenasidat) i sirkunstansianan ku presentá na kaminda.
****
Ami ta floho pa kere ku nos komunidat no tin sufisiente hendenan talentoso. Mi ta inkliná na atribuí e inefektividat di maneho na e aspektonan mental. Tin un tendensia molestioso pa skohe e kaminda di ménos resistensia. Kosnan di tur dia ta determiná akshonamentu gubernamental i en bes di alkansá e potensial ku nos rekursonan por duna, tin desperdisio ku e konsekuensia ku nos ta kai mas atras en bes di progresá.
****
Pa por elevá bo mes for di e nivel di bida general, bo no por laga e situashon di momentu propulsá bo akshonnan. Bo tin di fiha ophetivonan ambisioso i trasa un plan pa alkansá nan. Mi a repasá diferente dje petishonnan pa reunionnan di e diverso kuerponan representativo i kasi tur ta nada mas ku reakshon riba insidente ( “gevolg geven aan”) ku base den un suseso lokal (preshon interno), òf for di Ulanda (preshon eksterno).

DAMASCO, Siria, - Funshonarionan di Gobièrnu di Siria a rechasá kategórikamente akusashonnan di Merka, ku nan pais ta konstruyendo un planta nuklear ku respaldo nortkoreano, kalifiká pa Organismo Internashonal di Energia Atómiko (OIEA) komo “serio”.
E Embahador sirio na Reino Uní, Sami Al-Kiyami, a afirmá ku “e akusashonnan aki ta ridíkulo!”
“Nos ta kustumbrá ku e tipo di alegashonnan aki for di dia ku Merka a invadí Irak. Nan lo rekòrdá e presentashonnan teatral riba e armanan di destrukshon masivo irakí”, e diplomátiko a señalá den deklarashonnan na agensia di notisia BBC.
Merka ayera a akusá Nort Korea di ta asistí Damasco den konstrukshon di un planta nuklear “ku no tin metanan pasífiko”.
E edifisio, sospechosamente paresido na esun na Nort Korea, di akuerdo ku Inteligensia merikano, a keda bombardiá pa Israel na sèptèmber 2007.
Despues ku CIA a presentá ayera e “pruebanan” na miembronan di Kongreso, Kas Blanku a akusá Siria, i a bisa ku e pais aki mester aklará detayenan di su programa nuklear.
Den un komunikado, Gobièrnu merikano a afirmá ku na Siria e régimen respaldá pa terorismo, ta tuma desishonnan pa desestabilisá Lebanon, ta pèrmití entrada di kombatientenan estranhero na Irak, i ta reprimí su hendenan.
“Mester pone fin na esaki!”, Gobièrnu di Merka a bisa den e komunikado.

WILLEMSTAD - Awe mainta tantu na Ulanda komo na Antia i Aruba lo tin e repartishonnan anual di kondekorashonnan. Un total di 48 persona lo keda kondekorá den e parti di Reino aki i dos persona ku laso estrecho ku Antia, pero bibá na Ulanda tambe a risibí nan kondekorashon Real.
E repartishon di e Kondekorashon Real ku a tuma lugá awe mainta den Palasio di Gobernador aki na Kòrsou a bai asina aki:
*Officier in de Orde van Oranje-Nassau: drs. C.N. Winkel
*Ridder in de Orde van Oranje-Nassau: R.M. Breus-ers. G.M. Coffi. D.S. Corsen. E.L. Garcia, sra. J.R. Haile, sra. P.V. de Haseth-Bolivar, dr. J.B. Haviser, R.L.J. de Lannoy, E.P. Lauf. D.J. Lopes. C.E. Schoonhoven-Muntslag, B.D. Soemanta, I.H. van Wilgen, I.P. de Windt.
*Lid in de Orde van Oranje-Nassau: Sra. Z.T.F. Gaarie, sra. M.T. de Lan-noy, H.A.M. van Maarschalkerwaart, L.S. Martina, O.G.B. Martina, inspecteur Korps Politie Nederlandse Antillen, M.C. Rooi, S.R. Salcedo.
For di Ulanda a drenta e informashon tambe ku dos persona ku tin lasonan estrecho ku Antia a risibí nan Kondekorashon Real awe. Ta trata di Desiree da Costa Gomez i Wim Na-gelkerken.

WILLEMSTAD – Ayera tardi na Bottelier tabatin apertura ofisial di e showroom Bottelier Kitchen & Bath ku tin tur e produktonan di Kohler.
Manera ta konosí e produktonan Kohler ta bini di e famia Kohler ku ta ekstendé mas aleu den Kushina i Baño. Kohler a ser nombrá, e lider mundial den produktonan di túberia. Diseño i inovashon a kondusí na un ekspanshon den e liña i negoshinan Kohler, ku por sierto awor ta operá den 6 kontinente. Awe, famia Kohler i nan negoshinan ta krea produktonan den kushina, baño, kashinan i mosaiko pa hotèl, resorts, rekreashon i kasnan ku ta guia e kaminda di diseño, ofresiendo asina kalidat pa diferente gustu.
Resientemente Bottelier Kitchen and Bad a keda skohé pa e kadena Hyatt pa hasi uso di su diseñonan pa nan hotèl nobo aki na Kòrsou.
E empresa aki di Kohler, ta bou di maneho di sr. Eugene Thomas, un amerikano ku a kambia su residensia di Merka pa Kòrsou i a enamorá nos isla mirando tur e potensial ku Kòrsou por brinda na dje i na su negoshi.
Sr. Thomas a trese “The Bold look of Kohler” Kòrsou, ku yudansa di SFT Bank, Korpodeko i Hands on Solution.
Un pabien ta bai na e empresario aki i hopi éksito ku su negoshi nobo. Un i tur ku ke bishita e showroom nobo i moderno aki por pasa na e sitio na Carawaraweg 78 òf pa mas informashon por yama 461-2707.

WILLEMSTAD – Gerensia di e pisina na SDK i Pisina Bennie Leito ta partisipá ku for di 3 di mei 2008, kurso pa siña landa lo kuminsá atrobe.
E kurso ta pa mucha for di 5 aña i adulto.
Por inskribí pa e siguiente kurso:
-Pa diploma A i B, for di 5 aña ta dura 3 luna.
-Pa diploma C, for di 8 aña, ta dura 4 luna.
-Pa diploma D i E, for di 10 aña, ta dura 4 luna
-Pa diploma F, for di 12 aña, ta dura 4 luna.
Treinen pa kondishon, for di 5 te ku 8 aña i adulto ta dura 4 luna.
Dia di lès pa mucha ta riba djaluna i djaweps, djamars ku djabièrnè i djasabra i djadumingu.
Pa adulto ta riba djamars ku djaweps i djasabra ku djadumingu.
Inskripshon pa e kursonan a habri kaba.
Pa mas informashon tokante ora, preis i pa inskripshon por yama na SDK, telefon 737-6620, ba PBL telefon 462-6714 òf tambe por tuma kontakto ku Vernon Toré na telefon 529-6586.

WILLEMSTAD - Un total di 48 persona a risibí Kondekorashon Real den Palasio di Su Ekselensia Gobernador mr. Frits Goedgedrag. E repartishon di e Kondekorashon Real ku a tuma lugá ta den órden di Officier in de Orde van Oranje-Nassau, Ridder in de Orde van Oranje-Nassau i Lid in de Orde van Oranje-Nassau. Entre e 48 personanan tabatin e konosido Oswin “Tins” Martina ku a risibí kondekorashon pa su 40 aña trahando den Kuerpo Polisial. “Tins” Martina ta risibí Kondekorashon Real den Lid in de Orde van Oranje-Nassau. Di parti di LA PRENSA palabra di felisitashon na tur e 48 personanan ku a risibí nan Kondekorashon Real.

WILLEMSTAD – Federashon di Otrabanda huntu ku Sosiedat di Komersiantenan di Otrabanda (SKO) for di ayera anochi a kuminsá ku jornada di aserkamentu ku instansia i personanan di e área di Otrabanda, pa yega na mobilisashon pa proyekto Rif. Un aserkamentu ku ta tumando lugá den sekreto ku e meta pa logra haña mas tantu koperashon pa sali na interes di e área i habitantenan di Otrabanda. Manera ta konosí ku e proyekto grupo Cayco ku diputado Anthony Godett ta purba di trèk, ta kousando sierto inkietut bou di organisashonnan di Otrabanda, meskos serka otronan ku ta sinti ku tin kosnan ku no a bai den bon direkshon.
Inkluso e siman, oposishon a yama un reunion públiko riba e materia aki, i ku sobrá di koalishon tambe no ta riba mesun liña ku e diputado. Segun informashon ku LA PRENSA a risibí ta indika ku tin un jornada di aserkamentu ku a kuminsá for di ayera, den kua organisashonnan manera Federashon di Otrabanda, SKO tambe ta forma parti huntu ku algun grupo di persona. Ta mobilisando pa mira si en bèrdat ta e loke ta deseo di habitantenan lo keda konstruí den e área aki.
For di un prinsipio den e kaso tambe ku Meta Corp, Federashon di Otrabanda a pidi pa no laga e área aki ta den man di un solo persona, pero pa e área aki keda desaroyá den un proyekto partisipativo.
Federashon di Otrabanda a mustra riba e Plan Mayó ku a keda presentá na gobièrnu añanan atras na diferente okashon i ku nan ta kere ku mester buska bienestar pa empresarionan por haña oportunidat pa hasi negoshi den e área aki. Plan Mayó na diferente okashon a keda presentá na diferente gobièrnu ku a primintí nan koperashon na e organisashonnan. Kada biaha ku kambio di gobièrnu e proseso ta keda impedí, di manera ku tempu a bai i awor tin otro desishon ku diputado Godett a tuma i ku ta buskando aprobashon di e BC pa duna derechi na un grupo pa desaroyá e área aki.

 

PYONGYANG, Nort Korea, - E akusashonnan di Merka di ku Nort Korea a yuda Siria konstruí un planta nuklear, ta okurí nèt awor ku e potensianan mundial ta tratando konvensé Pyongyang frena e posponementu di desarme nuklear, analistanan a bisa awe.
Merka ayera a publiká imágennan ku ta vinkulá Nort Korea ku un planta nuklear di plutonio ku ta konstruyendo na Siria, den un esfuerso pa pone preshon riba Pyongyang pa konfesá ku ta desaroyando teknologia nuklear.
Nort Korea, ku ta konsiderá Siria un aliado, ainda tin ku komentá riba e akusashon di Merka, pero a ninga e proliferashon i a kalifiká sospechonan di su konekshon nuklear ku Siria komo “fiktisio”.
E Promé Minister hapones, Yasuo Fukuda, a bisa ku un posibel koperashon entre Nort Korea i Siria por añadí mas problema p’e intentonan di frena e proliferashon, miéntras ku un responsabel di Gobièrnu di Sur Korea a trata minimisá e akusashon, dor di bisa ku esaki no ta kaba ku e kòmbersashonnan internashonal pa pone fin n’e programa nuklear di Nort Korea.
Daniel Pinkston, di Grupo Internashonal di Krísis na Seul, a bisa ku e akusashon ta alimentá preshon riba Pyongyang.
Merka tambe por ta bisa e pober Nort Korea ku si e trata optené sèn atrabes di benta di armanan i teknologia, Washington lo enkontrá formanan pa bergonsá su sosionan di negoshi.
“Nos ta drentando den un fase krítiko i esei lo por resultá bastante difísil i esaki por bira fin di e kòmbersashonnan di e seis nashonnan”, Pinkston a bisa.

WILLEMSTAD – Den un karta ku FIFA a manda pa e Federashon di Futbòl di Haiti, FIFA a pone un ultimatum pa e Federashon di Futbòl di Haiti bin ku un plan pa garantisá seguridat rondó i durante di e wega pa eliminatorio Mundial 2010 dia 15 di yüni próksimo na Haiti.
Manera ta ampliamente konosí, nos selekshon nashonal mester enfrentá esun di Haiti na Haiti dia 15 di yüni próksimo.
E situashon na Haiti aktualmente ta tenso i tin preokupashon pa e seguridat den e pais. Pa e motibu aki NAVU a manda un karta pa FIFA kaminda NAVU ta ekspresá su preokupashon pa e siguridat general na Haiti en bista di e partido ku mester tuma lugá dia 15 di yüni na Haiti.
Den su kontesta riba e karta di NAVU, FIFA a partisipá na NAVU ku el a manda un karta pa Federashon di Futbòl di Haiti dia 24 di aprel, kaminda FIFA a duna e federashon di futbòl di Haiti ultimatum pa te ku dia 30 di aprel próksimo bini ku un plan kon nan lo garantisá seguridat tantu rondó komo durante di e enkuentro entre di e dos selekshonnan.
E plan aki mester ta karga aprobashon di e Gobièrnu di Haiti.
NAVU ta keda pendiente di e desaroyonan aki.
Miéntras tantu e preparashon di nos selekshon nashonal ta kontinuá na kaminda pa e enkuentro dia 15 di yüni próksimo na Haiti i 22 di yüni den nos propio Stadion Ergilio Hato.
Pronto lo kuminsá ku benta di karchi pa e importantísimo kompromiso di nos selekshon na kaminda pa Mundial 2010.

WOODS
Constantia Beatrice (85 aña)
Mihó konosí komo Bea òf Mamai
A laga atras su yunan Brontey Cathlin i Reginald Macaay, Ena i Victor Balentien-Cathlin, Jeannette Cathlin, Jaime i Lupita Cathlin-Barton, Jane, Rudsel, Rodolfo Cathlin. Akto di entiero ta djabièrnè 25 di aprel for di misa Gr. Kwartier pa santana Janwe. Bishita 1or-3.30or siguí pa un s.s. di misa.

COLINA
Gregorio José (90 aña)
Mihó konosí komo Goyito
A laga atras su kasá Elisa Colina-Velásquez, yunan Jacobo Colina i Shamila Eugenia, Rene Colina i Sonia Luciana, Isaac, Roibert, Isabel, Nelis Colina, Amada Cijntje-Colina i Humphrey Cijntje, Marvis Colina i Simone Leewerink. Akto di entiero ta djadumingu 27 aprel for di El Señorial pa misa Steenrijk i despues pa santana Berg Altena. Promé ku entiero tin un s.s. di misa na misa Steenrijk 40r.

FRANCISCA
Edsel L. (repentino)
Mihó konosí komo Echi
A laga atras su mama Vilma Francisca, yunan, ñetunan, rumannan. Akto di entiero ta djasabra 26 aprel na Ulanda.

CRUMP
Rosemellie St. Clyer T. Crump (56 aña)
Mihó konosí komo Clay
A laga atras su mama Wilsena James-Hodge, yu Mairon Rombley, tata Ernest Crump. Akto di entiero ta for di El Señorial pa santana protestant Oranjestraat. Bishita 1or-3or. Sirbishi 3.30or.

COCO
Mychenou Idelberta
A laga atras su tata Stanley ignacio, yunan Rashid, Razhmelyne, Magdalena, Michelangela, Reshently, Reshentery Coco, wela Thelma Ignacio, kompañero Richently Hersilia i famia. Akto di entiero ta djasabra 26 aprel for di El Consolador pa santana Roodeweg. Bishita 1or. Promé ku entiero tin un s.s. di misa 4or na misa Sta. Famia. Trahe alegre.

Prof. Dr. Lorito ta yama tur hende un felis djabièrnè. Ya kaba nos ta yegando otro fin di luna i nos lo pone 33 1/3 parti di 2008 nos tras. Kon a para di tur e bon deseonan pa 2008?
*********
Den e reunion di ayera riba SEI, tabatin un miembro ku tabata kontra (ku su derechi) ku a inventá yen di palabra nobo. Nos no sa ta kiko ta su intenshon, pero un kos ta sigur: e ta yenando vokabulario di papiamentu ku masha disparati! Papiando normal pa tur hende komprondé ta mas mihó! Korektamente Gimena a mustr’é riba e hecho, ku e ta trata di bon ku yen di palabra karu i inventá pa sigui impreshoná e hendenan bobo ku ta sigui su tras (esei ta palabranan di Gimena, no di Lorito).
*********
Gimena a bisa bon kla tambe, ku ora e kana bario, yen di hende ta pidi poko poko pa niun otro hende tende pa no laga e hendenan ei drenta den gobièrnu. Ke men di un banda e polítiko ta bisa, ku gobièrnu mester bai kas, pasobra den pueblo gobièrnu no ta bon mirá (mas) pero di otro banda e mesun pueblo ta bisa pa no laga oposishon drenta gobièrnu. Polítika ta un tutu!
*********
Nos a tuma nota tambe, ku diputado Willem a bisa Norbert bon kla ku si e ta kontra SEI ta kiko ta su alternativa anto? Realmente ora Lorito pèrdè su tempu skucha e reunionnan ta sali na kla ku tin hopi krítika, pero poko alternativa di parti di esnan ku ta kritiká. Nos ta kere ku polítika en general lo hasi su mes un fabor si ora e ta kritiká, e bisa mesora tambe kiko e lo hasi diferente!

WILLEMSTAD – Un ‘kadena di radar’ ku ta konsistí di 8 ‘radarsites’, instalá na tantu Aruba, Boneiru komo Kòrsou, lo tin ku sòru pa interseptá botonan ku ta transportá droga i ilegal. E sistema ta sòru tambe pa vigilansia di frontera i pa akshonnan di reskate riba awa.
Ayera riba Tafelberg tabatin entrega ofisial di e sistema di radar. E komandante di Wardakosta di Antia i Aruba huntu ku Kòmandùr di Marina na Kòrsou, Peter Lenselink, a risibí e simbólikamente e sistema for di man di representantenan di e empresa merikano Raytheon i representantenan di Holland Institute Traffic Tochnology.
E òrdu pa traha e sistema a bin for di Wardakosta i Marina Real, despues di estudionan di e instituto independiente ulandes TNO i despues di un destaho públiko. E sistema di 8 ‘radarsites’ partí riba e tres islanan, por operá for di e Rescue & Coordination Centre di wardakosta ku ta ubiká na Parera. E radar por opservá perfektamente tur moveshon den awanan rondó di e tres islanan. Ku e informashon akí Wardakosta por traha mas efisiente ora e mester pone den uso su material pa entre otro operashonnan di reskate, supervishon di medio ambiente i peska.