WILLEMSTAD - Hopi t’esnan ku lo rekordá e periodo di 1986-1999, durante kua e deporte di BMX (baiskelkros) a konosé tempunan glorioso aki na Kòrsou.
BMX ku ta para pa Bicycle Moto Cross, a inisiá den final di añanan ‘60 na California (Merka).
Den e temporada ei, e deporte di Motocross a bira popular na Merka.
E vershon motorisá a sirbi komo inspirashon pa kompetensia humano.
Muchanan i tiner ku e deseo, pero sin moda pa partisipá den Motocross, tabata deshogá nan energia dor di kore baiskel riba pista ku nan mes a traha.
E aventureronan aki a kompletá e imitashon dor di bisti unifòrm djesnan ku ta kore motor i asina e nòmber “BMX” a keda a establesé.
Kareda di BMX ta wòrdu tené riba pista di. ± 350 meter i ta inkluí salto, bògt i otro opstákulo.
Ocho koredó ta kompetí den kada manga (buèlta klasifikatorio, kuater final, semi final, final) i e promé kuaternan ta klasifiká pe siguiente buèlta.
E karedanan ta hopi eksitante i ta un deporte ku henter famia (hòmber i muhé) por praktiká, komo ku tin kategoria fo’i 5 aña te 50+.
BMX ta mas konosí na Merka, Oropa i Sur Amérika.
Ekiponan manera: Dynamite Racing Team, Silver Streak, Delta Force i Curaçao Racing Artists i nan integrantenan: Papito Perez, Urvin “Biew” Garmes, Grandly Perez, Rudolf “Lito” Garmes, Anthony de Jesus, Giancarlo (Django) Harel, Michael Jansen, Wenson “Fresh” Prince, Jaime Perestrelo, Lucien, Raimy Lauffer, Argenis “Huerta” Leitoe, Junny Bregita, Zahur Fraai, Rasid Winklaar, Regino “Papa” Tromp, e rumannan Javier “Sausage i Jairo Scharbaai i last but not least Andruw Jones, ta entre e hopinan ku tantu na Kòrsou komo den eksterior a gana numeroso premio representando nos pais.

NAGANO – E antorcha olímpiko a hasi su rekorido na Hapon meimei di medidanan fuerte di seguridat ku por a kontené sin ningun problema e protestanan sporádiko ku a kargadónan a wòrdu konfrontá kuné a lo largu di e ruta.
Un hòmber a trata na interferí ku e rekorido di e antorcha, pero a wòrdu detené inmediatamente. Esaki a produsí un pousa kòrtiku den e rekorido.
E rekorido di e antorcha olímpiko ta blanko di numeroso protesta rònt mundu.
Un hòmber a sali for di e multitut ku e aparente intenshon di kita e antorcha for di e kargadó, pero un grupo di polis a logra detené mesora.
Miles di polis tabatin a lo largu di e ruta, helikòpter tabata bula i vários manifestante a kongregá pa hasi orashon pa Tibet.
Agentenan polisial bistí ku paña atlétiko tabatin e kargadó rondoná i tabata tin tambe 100 polis, seis outo polisial i dos motosaikel.
E salida di e rekorido a wòrdu kambiá na último minüt pa supstituí un tèmpel budista i tabata totalmente sera pa públiko.
Outoridatnan hapones a señalá ku e medidanan di seguridat tabata inevitabel i tabata nesesario pa mantené e poblashon trankil. E presensia polisial a eliminá kualke tinta di selebrashon.
Esaki tabata e di 16 eskala pa loke ta trata e rekorido di e antorcha olímpiko ku a sali for di Gresia.

BARCELONA – Felipe Massa tabatin mester di un viktoria na Bahrein, pa asina rebibá su kampaña den e temporada di Fórmula I i e piloto di Ferrari a logra esaki.
Awor ta Lewis Hamilton ta esun ku ke un bon resultado mañan den e Gran Premio di Spaña.
E piloto di McLaren ta bou di preshon pa rekuperá di dos resultado malu siguí despues di a gana e promé kareda di temporada na Oustralia.
Hamilton tabatin su pió resultado den 20 kareda na Bahrein, unda su outo a para na inisio di e kareda i despues e tabatin un problema tékniko pa kaba na di 14 lugá.
Komo resultado di esaki, Hamilton a sede e liderazgo riba e klasifikashon general na Kimi Raikkonen. E piloto di Ferrari ta enkabesá e tabla di posishon ku 19 punto, tres mas ku e piloto Nick Heidfeld di BMW. E kompañeronan di ekipo di Hamilton ta sigui e ora ei ku 14 punto.
Hamilton kende a enkabesá e tabla di posishon kasi henter temporada di 2007 promé ku pèrdè e título den e último kareda di aña, ta sigurá ku tin tempu pa rekuperá.
“Ainda falta hopi,” e piloto di 23 aña a afirmá. “Nos por a wak kon aña pasá, Kimi a bin di atras i demostrá ku kualke kos por pasa. Pues definitivamente mi no ta deskartá e posibilidat di gana e título e aña aki.”
E koredó britániko ta regresá e pista unda fanátikonan a hasi bofon di dje promé piloto koló skur den historia di Fórmula 1. FIA a presentá un kampaña anti rasial riba e mesun sirkuito aki.

SAN JUAN – E Kampion mundial welter Miguel Cotto no ta deskartá un kombate ku Oscar de la Hoya, pero a atvertí ku e eks kampion mester warda su bùrt.
De la Hoya a bisa, ku despues di su revancha ku Floyd Mayweather, e lo ke retirá di bòkseo ku un pelea kontra di Cotto.
E eks kampion a bisa, ku su último pelea mester ta kontra di un di e mihónan i “despues di Mayweather, esun ku ta sigui ta Cotto.”
Cotto a afirmá, ku di ningun manera e no ta sinti preshon. “Semper nos a enfatisá nos interes pa bringa ku e nòmbernan grandi di e divishon welter. Na e momentunan aki ta pone atenshon riba e pelea ku e mèksikano Antonio Margarito i for di kual nos ta sigur di sali viktorioso. Si de la Hoya ke bringa ku mi, e lo tin ku aserká mi empresa i mi ekipo di trabou. Nos ta aki nan i nos ta preparando fuerte pa enfrentá e mihónan.”
Cotto (32-0 ku 26 nòkout) ainda mester negoshá ku Margarito pa e pelea di 26 di yüli.
De la Hoya (38-5, 30 nòkout) lo bringa Steve Forbes dia 3 di mei i despues tin un pelea programá kontra di Mayweater dia 20 di sèptèmber na Las Vegas.

STO. DOMINGO – E bòksdó dominikano, Joan Guzman ainda no por a biaha pa Eskosia pa su kombate ku Alex Arthur, debí na problema ku visa, loke por provoká un posponementu di e pelea ku su rival pa e título ligero junior di e Organisashon Mundial di Boxeo.
“Mi mester a biaha pa London, pa despues sigui pa Eskosia, pero ainda mi no tin visa,” asina Guzman a bisa.
E kombate di 130 liber ta programá pa 3 di mei. Guzman tin un rèkòrt perfekto di 28-0 i 17 pa via di nòkout den su karera profeshonal. E ta kampion di OMB for di sèptèmber 2006, ora ku el a gana e argentino, Jorge Barrios.
Su mas resiente kombate tabata kontra di Humberto Soto kende el a gana pa desishon unánime.

WILLEMSTAD - E sindikato Horecaf ta rechasá e krítika di VBC ku e dia liber, 2 di mei proklamá pa gobièrnu e aña aki, ta kosta nos komunidat 25 mion florin.
Horecaf ta kompartí sí e opinion di e Asosashon di Komersio i Industria, ku gobièrnu no a atendé e preparashon pa duna 2 di mei liber, korektamente. ‘Gobièrnu mester a atendé na un otro manera’.
Pero pa loke ta trata e kantidat di dianan liber pa aña, inkluso dia 2 di mei awor, e kantidat a keda mesun kos. Esaki konforme e splikashon di Humphrey Mongen, presidente di Horecaf.
‘Ta mesun kantidat di dia di fiesta, ku ta 11 nos a mantené pa aña. Mi no ta komprondé unda VBC ta sali ku e posishon ku e dia liber ta kosta 25 mion’. E presidente di Horecaf a sigui bisa ku ora ku e doño di trabou ta selebrá su fiesta religioso e ta sera su negoshi i ningun hende no ta reklam’é. Ta p’esei segun Mongen, e posishon di VBC ta kompletamente for di lugá, pasobra no mester sali for di punto di bista ku ta pasobra ta dia di Obrero, komunidat ta wòrdu perhudiká, pasobra ora ku ta kumbiní e komersiantenan, nan no ta wak esun di e trahadónan.
E dianan di fiesta ta keda mesun kos ku aña pasá i ku e aña benidero. Nos tin 11 dia fiesta pa aña i ta mesun 11 a keda, Mongen a sigui bisa.
Ademas, segun Humphrey Mongen, e ponensia ku na Kòrsou trahadónan gusta fiesta, tampoko no ta basá riba realidat. Kompará ku otro islanan den Caribe por ehèmpel, na Kòrsou tin ménos dia di fiesta. ‘Trinidad tin 17 dia di fiesta pa aña’, e presidente di Horecaf a remarká enfátikamente, splikando ku e no ta komprondé ta riba kiko e krítika di VBC ta basá.

WILLEMSTAD - No ta imposibel ku e disturbionan di trinta aña pasá entre hobennan i polis, den e barionan di Wishi i Marchena, unda ku un hoben a pèrde su bida por ripití. Kenneth Valpoot, kordinadó general di Komishon di Akshon Wishi i Marchena a bisa ku ainda tin iregularidat ta tuma lugá den e bario, e ta riba un eskala más chikí. E bosero di e Organisashon di Wishi i Marchena a indiká ku polis tin derecho di hasi su trabou i ku e Komishon ta apoyá i sostené e trabou aki esaki. ‘Pero mester e adaptá e forma kon polis ta atendé ku e hóbennan den Marchena, pa evitá ku ta surgi provokashon’. Valpoort a sigui bisa ku den mayoria kaso ta surgi provokashon di parti di polisnan na momentu ku, nan ta aktua kontra di un òf ke otro situashon.
E Komishon di habitantenan di Wishi i Marchena ta hasi un apelashon na e outoridatnan pa redusí e provokashon den e bario. ‘Nos ta kompletamente di akuerdo ku tin e kòntròl, pero nos ta pidi tambe pa evitá provokashon i tambe e menasa ku e habitantenan ta haña komo konsekuensha di ekspreshonnan di e polisnan’, tabata palabranan di Kenneth Valpoort.
Di su parti Komishon Wishi i Marchena ta purba pa mustra e hóbennan riba e hecho ku nan ekspreshonnan mester ta mas moderá. Esaki tambe ta un manera pa evitá provokashon, segun Valpoort. ‘Kompará ku trinta aña pasá, nos tin otro tipo di hóben, i nos deber ta pa informá nan riba e susesonan di trinta aña pasá, pa evitá ku mesun fayonan ta wòrdu kometé’. Ku hopi énfasis Valpoort a bisa ku e habitantenan di Wishi i Marchena ta spera ku nunka mas e disturbionan di trinta pasá ripití den e bario ni tampoko na Kòrsou’.

ARIES: Tur loke bo siña konhuntamente lo ta eksitoso, lagando ganashi i gratifikashon. Buska kompania di esnan ku por interkambiá ideanan. 01,10,39.

TAURO: Hustisia ta yega den bo bida i algun lo ta hopi drástiko. Kontaktonan nobo i e apoyo di amigunan ta yudabu logra bo plan o proyektonan. 08,42,29.

GEMINIS: Pone bo prioridatnan na òrdu i mira ku konfiansa, pensando semper positivamente. Bo aktitut positivo tin hopi ke ver den bo futuro éksitonan. 11,08,05.

KANSER; No eksponébu na rísikonan, sea den deporte, biahe o aktividatnan di riesgo pa un par di dia. Bo mester di mas atenshon di bo parti. 18,37,16.

LEO: Bo bida ta ahustá akontensimentunan nobo ku ta fuera di bo kòntròl. Tur kos ku no ta funshoná ta bòltu pa bo. 26,05,04.

VIRGO: Bo trabou i bo profeshon ta eksigí mas tempu i esfuerso i bo famia ta reklamá tambe tempu di bo. Lo mas importante ta mantené kòntròl emoshonal. 01,28,40.

LIBRA; Eksperensianan bibu ta hibabu na otro nivelnan spiritual i ta hiba bu mas serka Dios. Disfrutá di e kosnan mas ku bo ta gusta hasi. 07,14,01.

SKORPION: Kambio i ahuste ta awor inevitabel. Bo no por skapa di situashonnan unda bo tin desishonnan drástiko i definitivo. 33,07,20.

SAGITARIO: Amornan sekreto ta desaparesé. Bo ta mira ku klaridat i sentido e kosnan ku ta mantenébu konfundí. Konfliktonan i kosnan malu ta aklará pa wòrdu koregí.

WILLEMSTAD – “Promé ku gobièrnu tuma un desishon riba e petishon di UTS pa oumentá e tarifa pa konekshon fiho, UTS mester duna un mihó argumentashon pakiko e ke un oumento, pero partikularmente, pakiko un oumento asina haltu. E argumentunan presentá te ku awor, no ta sufisiente fuerte pa konvensé gobièrnu”.
Esei, di akuerdo ku minister di Telekomunikashon ingeniero Maurice Adriaens.
UTS a entregá un petishon resientemente na Gobièrnu Sentral (lesa: minister di Telekomunikashon ingeniero Maurice Adriaens) pa oumentá e tarifa ku e kompania ta kobrando pa telefon fiho di kas.
E montante aki, ku aktualmente ta 18 florin, lo subi te 38 florin, Paul de Geus a splika.
El a bisa mesora ku e kambio aki ta nesesario, mirando e situashon di kompetensia ku ta hopi fuerte awor aki riba merkado di telekomunikashon.
De Geus a bisa ku tur hende por kòrda ku ta for di tempu e kompania di telefon tabata den man di gobièrnu, e kompania nunka a adaptá su tarifa. Komo ehèmpel ku otronan si a dal bai ku oumento, el a menshoná St. Maarten kaminda e montante ta 45 florin pa abono fiho i na Ulanda kaminda e ta alrededor di 40 florin.
De Geus a bisa mesora, ku e oumento lo bai den dos fase: den promé instansia lo oumentá e tarifa te na 30 florin pa despues subi esaki te na mas o ménos 38 florin.
Minister Adriaens a bisa ku e tin komprenshon kompleto pa e argumento aki di UTS, ku nan tin komo 18 aña sin oumento di tarifa.

WILLEMSTAD - Lider di MAN, Charles Cooper ta konsiderá, ku gobièrnu no mester sukumbí pa e preshon ku Ulanda ta poniendo riba Antia pa haña loke nan ke. Nos ta un pais den Reino ku mester ser tratá ku dignidat, e dirigente polítiko a deklará.
E deklarashon aki di Cooper ta relashoná ku e aktitut di partido VVD na Ulanda. Ulanda ta reprochando Antia ku el a manda pidi sierto informashon fiskal, pero ku te awe e no a risibí esaki.
Johan Remkes, eks minister pa e partido aki a bai asina leu ku el a formulá un moshon den kua e ta proponé ku tanten Antia no kumpli ku esaki, pa no manda niun depchi mas pa e islanan.
Mester bisa ku Remkes, ku ta bosero pa frakshon di VVD den Tweede Kamer pa tur loke ta regardá Antia, último tempu ta basta aktivo i konstantemente ta lansando krítika riba e islanan di Antia.
E posishon aki a kai masha malu aki na Kòrsou. Pa partido MAN, esaki ta nada mas ku chantahe.
“Komo oposishon nos tin nos diferensha di opinion fundamental ku gobièrnu riba e trayekto estatal ku e ta kanando. Pero gobièrnu por konta ku nos sosten pa rechasá e aktitut aki di Ulanda. Esta, si esei ta e posishon anto ku gobièrnu a tuma,” Cooper a bisa.
“Ta inaseptabel ku Ulanda ta kere ku e por bin pone preshon di e forma aki riba nos pa haña informashon ku de fakto ta informashon ku nos por konsiderá un kos interno di nos”, el a agregá.
Cooper a bisa, ku e no tin masha ilushon sinembargo ku e aktual gobièrnu lo para fuerte kontra e ulandesnan.

WILLEMSTAD - Proyektonan ku gobièrnu di Kòrsou ta ehekutando ta tene kuenta awendia ku tantu naturalesa komo e hende na pia. Esaki ta e filosofia moderno ku gobièrnu, atraves di su servisio DOW ta implementando den proyektonan ku e ta ehekutando último añanan.
Esei a bin dilanti durante entrega di e proyekto Caracasbaai ku a tuma lugá djaweps último. Entrega di e proyekto aki a konta ku asistensia di basta invitado.
Loke ta resaltá den e kaso aki, ta e manera ku a diseñá e proyekto, esta a base di un konsepto moderno. Si ripará bon, e kaminda no ta mes hanchu ku loke normalmente nos konosé. E kaminda ta mas smal, pero tòg sufisiente pa dos vehíkulo por pasa banda di otro. Pero si ántes por a kore pasa ku 60 kilometer, bo mester redusí velosidat, pa garantisá ku bo ta kore seif i responsabel. Pero si ta papiando di kaminda mas smal, ta papiando alabes di alsera ku ta mas hanchu.
Alsera mas hanchu, kombiná ku palu i mata kant’i kaminda, ku ta duna e hende na pia mas siguridat. Aparte pues di duna sombra, e ta nifiká tambe mas protekshon.
E lusnan moderno ku a instalá aki, ta duna e proyekto un dimenshon adishonal. Den dia i anochi ta hopi bunita den e área aki.
Esnan ku sa pasa aki banda den oranan di atardi, por a tuma nota di hendenan ta kana, hende ta djòg òf simplemente ta keiru riba e alseranan hanchu aki.
Pa gobièrnu di Kòrsou, e proyekto ta sirbi su meta perfektamente.

WILLEMSTAD – Awe tardi 5or, na altura di Marchena Hardware lo tin un manifestashon den e bario Wishi/Marchena pa rekòrdá e hecho ku awe, 26 di aprel ta nèt 30 aña pasá ku a surgi un disturbio violento den e bario ku a kosta bida di un siudadano.
“Nos ke pone énfasis riba e hecho ku loke a sosodé, hamas tin mag di pasa atrobe”, asina Kenneth Valpoort, presidente di Fundashon Wishi i Marchena a deklará.
Dia 26 di aprel 1978 a surgi un disturbio den kua un kantidat di hóben tabata enbolbí. Reportadamente ta trata aki di un grupo di hóben ku tabata protestá kontra abusu. Valpoort a bisa ku polis a kuminsá usa forsa brutu kontra e hóbennan, kendenan un dado momentu a kuminsá tira kos riba kaya. Tabata nesesario pa sera kaya durante 3 ora. Polis sinembargo a bin bèk mas fuerte armá despues na e sitio, i dado momentu a surgi un tiramentu. Tiru a alkansá un hòmber den su outo mortalmente.
Segun Kenneth Valpoort, e fecha di 26 di aprel a bira un fecha históriko. Algu a sosodé e dia ei, ku nos en todo kaso no ke pa pasa atrobe.
E manifestashon di awe tardi lo kulminá ku desvelo di un monumento pa e víktima ku a kai 30 aña pasá.
Kenneth Valpoort a bisa ku e fecha di awe lo keda un fecha memorabel. E no ta kere ku e situashon di 30 aña pasa lo por ripití, pero tampoko ta ekskluí esei kompletamente.
“Loke si nos por siña komo un lès for di e kos aki ta, ku ounke polis tin derechi di aktua, mester rashonalista i aktuashon di polis mester evitá provokashon,” el a bisa.

AMSTERDAM/ WILLEMSTAD - E organisashon Hells Angels ta preparando kasonan mionario kontra estado ulandes pa e forma ku a trata miembronan di e organisashon aki durante último añanan.
Nan a tuma e desishon aki, awor ku Ministerio Públiko a disidí ku e ta stòp ku persiguishon kontra Hells Angels.
Segun mr. Abram Moszkowicz, abogado di vise presidente di Hells Angels Harry Stoeltie, su kliente so por entregá un kleim kontra estado “di riba un mion euro”.
E abogadonan di e otro miembronan di Hells Angels a anunsiá ku nan ta deliberando kon haltu e kleim kontra estado lo bira.
Abogado mr. Marnix van der Werf, kende ta defendé Daniel Unneputty, presidente di e organisashon, a bisa ku a pinta su kliente komo lider di un kantidat di kriminal pisá.
Ministerio Públiko a disidí e siman aki ku e no ta apelá e kasonan mas.
Di un banda t’asina ku Ministerio Públiko a bin ta pèrdè kaso tras di kaso ku e tabatin den korte, pa prohibí eksistensia di Hells Angels na diferente siudat di Ulanda.
Ministerio Públiko ta sostené ku e Hells Angels ta un organisashon ku un base kriminal, ku ta kulpabel na asesinato i maltrato i ku ta dediká su mes na trafikashon di arma, droga, estafa, menasa i ekstorshon. Pero ta akusashonnan riba papel pasobra kada biaha korte a konkluí ku no por a proba konvinsentemente ku Hells Angels en bèrdat ta un organisashon kriminal manera OM ta insistí.
Ta bin aserka, ku korte a disidí ku hustisia a pèrdè su derechi di persiguishon. Aparentemente a deskubrí diferente relato di kombersashon entre miembronan di Hells Angels i nan abogado ku nan a tap ilegalmente. Korte a indiká ku nan a kometé un piká mortal ku esaki, pasobra e tipo di informashon aki mester keda konfidensial.

 

WILLEMSTAD - Ayera 25 di aprel 2008 durante un seremonia na Warda di Polis na Winston Churchillweg a selebrá hubileo di añanan di servisio na Kuerpo Polisial Kòrsou di dos empleado i tambe a tuma despedida di 3 empleado, kendenan a baha ku penshun. Ta trata di:
- Sra. Zoraida Seferina-Thode, empleá na Grensbewaking na aeropuerto, ku a kumpli 30 aña di servisio;
- Sr. Raymond “Remo” Ras, hefe di Büró T.O.D, kende a kumpli 35 aña di servisio a alabes a baha ku penshun;
- Sra. Mildred Martina
- Sra. Maudrid Lievendag, tur dos empleá na e Sekshon Higiena, kendenan tambe a baha ku penshun.

Prof. dr. Lorito ta yama tur hende un felis djasabra. Masha ambiente a kuminsá forma tur kaminda, pasobra tin hopi hende a tuma liber otro siman. Awor ku minister a duna liber (ku rason òf no) djabièrnè otro siman, hopi hende a konopá un dia siman liber.
****
Lorito a pensa masha den e dianan aki riba Siegfried Rigaud (q.e.p.d) ku semper tabata usa e dicho: Mas brisa mas goddem. Tin hende ta kere ku nan por spanta balente. Nos ta konsehá wak nan kaya masha bon. Ora bo hasi sierto kosnan bo no por kere ku bo ta “get away” kuné tur ora. Ya kaba bo a hasi yen di kos ku a keda ketu pa bo pero e biaha aki prepará pa un bataya duru. A buen entendedor!
****
Gobièrnu a hasi masha bon di duna tur informashon riba e situashon na Dòk. Warda mas tantu lo tabata iresponsabel komo ku ta trata di un situashon masha serio. Asina mester ta: bo mester ta proaktivo i transparente, pasobra di tur manera medionan lo a haña sa tòg.
****
Nos a haña basta reklamo ayera di hendenan ku a bisa nos, ku miéntras ku diputado Eugène tabata papia riba e situashon na Dòk, un kolega di dje tabata sinta hunga ku un telefon. Nan a pidi nos pa bisa ku e kos ei a keda masha malu. Lorito mester bisa ku nos mes no a wak e asuntu aki masha bon.
****
Den e dianan aki nos a repasá korantnan di algun dia pasá i nos a kai riba un komentario ku un komersiante prominente ulandes a hasi den sentido ku e ta kere ku Ulanda mester konfrontá un desaster pa kosnan kambia. Nos a haña su remarkenan masha notabel. E ta argumentá ku un desaster mester ta dje serio ei pa algun dia ku niun hende no por sali for di nan kas. E ta referí na e káos ku tin den tráfiko na Ulanda ku no ta hañando e atenshon nesesario. Segun e empresario aki ta solamente ora tin un desaster posiblemente e tema lo haña atenshon. Su komentario a pone nos kòrda masha diferente desaroyo aki ku tin biaha ta kana mesun kos: ora nan bira problema serio, ta kore bai atendé nan!

MERCELINA
Cresencio Dominico
Mihó konosí komo Boeis
A laga atras su yunan Magdala Aluinrinlda-Mercelina, Nathalie Mercelina, rumannan Jeta Rojer, Monica Bloem, Fred, Boy, Ibert, Astrid, Lourdrid, Shermine Mercelina. Akto di entiero ta wòrdu anunsiá despues

FULLINCK
Simon Abdón
Mihó konosí komo Momon
A laga atras su kasá Carmen Fullinck-de Windt, yunan Carla, Edith, Frencis Fullinck, Gwendoline i Richard Martina-Fullinck, Yvette i Glen Cathalina-Fullinck, Stanley Marselita, Ingrid Paula, Irene Paula, Jeanine Dunker, Frensel i Sharlon Paula, Ishel Saluna, Brigida Josefina, Pòpi Girigorie tur ku nan yunan. Akto di entiero ta djadumingu 27 di aprel 4or for di Bottelier pa santana Bottelier. 3or tin un sirbishi.

DAAL-DE WINDT
Raymondo Guillermina
Mihó konosí komo Duchi
A laga atras su yunan Stella, Astrid, Norwin, Jarman, Elvis de Windt, Arnold Mack, Michel Macaya. Akto di entiero ta djaluna 28 di aprel for di El Tributo pa santana Sta. Maria. Promé ku entiero tin un s.s. di misa, bishita 1or.

COLINA
Gregorio José (90 aña)
Mihó konosí komo Goyito
A laga atras su kasá Elisa Colina-Velásquez, yunan Jacobo Colina i Shamila Eugenia, Rene Colina i Sonia Luciana, Isaac, Roibert, Isabel, Nelis Colina, Amada Cijntje-Colina i Humphrey Cijntje, Marvis Colina i Simone Leewerink. Akto di entiero ta djadumingu 27 aprel for di El Señorial pa misa Steenrijk i despues pa santana Berg Altena. Promé ku entiero tin un s.s. di misa na misa Steenrijk 40r.

WILLEMSTAD – ACU den nan selebrashon di 45 aña di eksistensia a rekòrdá un grupo di persona ku tabatin un ròl importante den desaroyo di e koperativa i tambe tabatin entrega di donashonnan na organisashon. ACU na 1962 a keda fundá pa 5 ámtenar huntu ku pader Amado Römer i awe ta selebrá nan 45 aniversario. E tempu di nan inisio tabata únikamente 44 persona komo miembro i a bin krese pa un total di 12 mil miembro, ademas di 1300 miembro di nan fondo di spar pa hubentut. Un parti di e Fondo pa Hubentut ta keda reservá pa repartí bou di organisashonnan ku ta traha ku hubentut. I ayera tabata un okashon pa entrega di donashon na organisashon tantu di Kòrsou, Boneiru i St. Maarten ku a tuma lugá na Curaçao Marriot Hotel.

WILLEMSTAD – “Mi no ta ekskluí ku na 2001 lo por tabatin un karta pa pidi un investigashon i ku talbes e karta aki tabata unu ku kopia mandá pa e minister”, tabata deklarashon di Carel de Haseth den investigashon ku LA PRENSA ta hasiendo. For di ayera nochi LA PRENSA a kuminsá ku investigashonnan rondó di Freewinds, ya ku den pasado a desmentí informashonnan ku riba e barku aki tin asbèst. Sigur na dos okashon nòmber di Freewinds a kai di e asuntu di asbèst i ku a desmentí esaki kategórikamente. Den un edishon di 2 aprel 2001 tabatin un relato di un investigashon ku un ulandes ta pidi na outoridatnan inkluso sekretario di Estado Gijs de Vries riba e barku Freewinds.
E ulandes aki ta duna di konosé den su karta, ku riba Freewinds tin asbèst i ku ta pidi outoridatnan tene kuenta ku esaki i buska medidanan pa evitá pa e barku no mara den haf di Kòrsou. En bèrdat nada no a bin afó di investigashon aki, ya ku a menshoná di “Blauwe asbest’ ku ta unu sumamente peligroso. E ta bira peligroso na momentu ku un persona mishi ku esaki. Debí ku e nòmber di eks minister Plenipotensiario ta keda menshoná den e artíkulo, a buska kontakto ku Carel de Haseth, kende a splika ku no ta kòrda ku tin un karta ku a keda dirigí na su persona, pero ta afirmá, ku talbes e karta aki ta un kopia, mester a keda mandá di manera pa pone na altura. Di otro banda De Haseth ta mustra ku e no ta e persona responsabel pa e materia aki, pero ta konfirmá ku ora ta trata di asbèst, semper esaki a hala su atenshon.

WILLEMSTAD - Relashoná ku selebrashon di hubileo di oro ayera tardi a yega Kòrsou kardinal Mgr. Adrian Simonis di Hulanda i mgr. Karel Kasteel di Roma. Tur dos outoridat eklesiástiko lo konselebrá e Santu Sakrifisio di Misa Sòlèm djaluna awor 28 di aprel den Stadion Ergilio Hato na Brievengat.
Awe djasabra 26 di aprel kardinal Simonis lo selebrá un Santu Sakrifisio di Misa na Misa di Santa Maria pa 7’or di anochi i djadumingu mainta pa mitar di dies kardinal Simonis lo ta selebrá un Santu Sakrifisio di Misa na Willibrordus.
Mgr. Kasteel lo selebrá un Santu Sakrifisio di Misa mañan djadumingu mainta pa 9’or na Misa di Santa Maria.
Riba e pòtrèt nos ta mira di robes pa drechi mgr. Luis Secco, mgr. Karel Kasteel, kardinal mgr. Adrian Simonis, sr. Erich van der Hoeven i sr. Gerard van den Tweel.

WILLEMSTAD – Aparentemente mas tempran unu ta pa kobra su ònderstant, mas sigur e tin den esaki. For di mitar di sinku di mardugá ya periodistanan di LA PRENSA a pasa i mira moveshon riba tereno di Colon Shopping Center sin por a komprondé ku ta kobradónan di ònderstant ta riba pia. Pa algu despues di 7’or di mainta ya tabatin un fila largu wardando Girobank habri su portanan pa kobra e yudansa di gobièrnu. Na víspera di dianan di fiesta, bankonan a kambia nan dia di pago i esaki a kousa e akumulashon di hendenan pa akudí na Girobank awe mainta na Colon. Entre esnan ku tabata presente, naturalmente tin nan reservanan pa kritiká e situashon aki, ya ku pa ‘kos chikitu’ ku gobièrnu ta duna, mester hasi tantu esfuerso asina. LA PRENSA ta spera ku tur e kobradónan lo sa di por hasi bon uso di e ònderstant aki, apesar ku no ta sufisiente pa kubri tur gastunan.