Mensahe di fraccion di RED na ocasion di Dia di Obrero

Gabinete Oduber IV ta criminal di kita placa for di salario

ORANJESTAD- Dia di la Reina y Dia di Obrero ta dilanti porta y pueblo lo tin un long weekend cu ta cuminza for di diaranzon y ta apropia pa nos para un rato keto pa pensa riba nos futuro. Nos a caba di celebra Dia di Tera y loke ta resalta ta e hecho cu Aruba a bai for di balanza, a sacrifica nos naturaleza pa beneficio di desaroyo economico.

Mescos ta conta tambe pa e clase trahador, a desaroya Aruba pero e trahador a bai atras.

Prome cu Status Aparte un cas cu dos salario minimo por a biba hopi bon y tabata hopi mas cu loke tabata e canasta basico. Ke men e por hasta biaha cu vakantie pasobra e tabata sobra placa despues di cumpli cu su debernan.

Na e momento aki cu dos salario minimo den cas e trahador no ta alcanza e canasta basico, esaki ya na 2005. Corda awor na 2008 cu a bin aserca e desaster di e BBO cumulativo, hunto cu e subida drastico di prijs di petroleo y di comestibles.

E desigualdad social ta birando cada dia mas grandi. Nos ta mira hotelnan y edificionan luhoso, shopping malls di luho extremo, restaurantnan di luho. Di otro banda e trahador ta sinti den su cartera cu e ta bai atras, cu e luho ey fo cada bez ta bira mas inalcanzabel pe. Hasta lo minimo pa por existi dignamente ta birando dificil pa e trahador. Gasolin, cuminda, awa, coriente, telefon, cable, hypotheek di cas, debe di auto, tur ta birando un peso insoportabel pa e trahador. Na fin di luna e no sa con pa saca su cuenta.

 Thönissen ta riba mercado atrobe

Cu sosten di UNOCA

ORANJESTAD- Cado Cododo ta un storia scirbi pa Jacques Thönissen na Papiamento y Hulandes. E ta trata di un lagadishi blou cu ta bida den mondi di Aruba y tur dia ta bai den mondi pa aventura nobo.

Como cu di esun na Hulandes tur buki ta bendi y constantemente hendenan ta puntra pa e buki aki specialmente scolnan, UNOCA a dicidi di duna su sosten pa imprenta un cierto cantidad un biaha mas.

Por bisa tambe cu a probecha mesora di duna e buki e biaha aki un kaft duro y cambia e color pa bruin/cora pero a mantene tur e mesun bunita illustracionnan di Nigel Matthew. Reaccionnan ricibi ariba e buki aki ya caba ta confirma cu e buki a cai na agrado.

E autor Jacques Thönissen sigur no mester introducion na Aruba ya cu e tabata pa basta aña cabesante di Augustinus College y den pasado a scirbi diferente buki na Papiamento y na Hulandes. Pa adulto y hoben.

Diasabra awor 3 di mei Van Dorp a duna Jacques e honor pa presenta su buki na comunidad Arubano. Tur esnan interesa por cumpra e buki mesora cu firma di Jacques pero alabes ta haya oportunidad di combersa cu Jacques.

ORANJESTAD- Awe dialuna Fundacion Digna Lacle Herrera ta organisa un lectura cu lo trata e efectonan di BBO, inflacion y e necesidad pa un alivio di e peso cu BBO y otro medidanan ta causando.
Na Aruba, mescos cu otro paisnan den nos sercania y rond mundo, prijs di practicamente tur cos a subi. Esaki tin un factor interno y externo. Parti di inflacion ta importa, pero contrario na otro paisnan den nos region (incluyendo islanan manera Curaçao y Bonaire), Aruba a conose un inflacion hopi mas halto. Por constata cu e inflacion halto di Aruba tin un causa lokal cu hopi efecto riba prijsnan. Un causa interno xcu ta resalta ta: BBO. E ultimo aki tabtata tin un "multiplier effect" ariba prijsnan na Aruba.
E inflacion pa aña 2007 a wordo midi na 10,2%; un record den historia moderno na Aruba y tambe den nos region. Drs, Arjen Alberts lo presenta un lectura ariba e topico intresante y importante aki. Drs. Alberts su experticio ta den economia y tabata docente di economia na Universidad di Aruba y tambe ex-presidente di Fundacion Estudionan Social Cristian (FESCA). Sr. Alberts ta responsabel pa varios rapport importante di FESCA y a forma parti esencial den e renobacion cu dirigencia di AVP a duna na FESCA durante e ultimo anjanan aki. Esaki den cuadra di renovacion di politica caminda substancia vision y maneho ta un worde concidera di vital importanci. E lectura lo tuma lugar na Cas di Partido, Dialuna pa 7.30 di anochi. Tur hende ta bon bini.
Den su raport titula “Parlamento di Aruba na caminda pa madures” (De Staten van Aruba op weg naar volwassenheid) e instituto cientifico FESCA a duna un empuhe pa pone henter comunidad refleha riba e funcionamento di democracia parlamentario na Aruba y pa stimula e calidad di e proceso politico, pa amplia esaki ya hasta pa trece esaki riba un nivel mas halto.

Copa pa grupo Rosea Cultural, premio di estimilo pa Alexander Rober y Shanayah Howell

ORANJESTAD- E ganadornan di Copa Hubenil Gobernador Felipe B. Tromp pa aña 2008 ta conoci. Grupo cultural artistisco “Rosea Cultural” cu alumnonan di enseñansa special di Scol Paso pa Futuro a bira ganador di e Copa y e premionan di estimulo a bai pa e atleta Alexander Robert y Shanayah Howell. Tur e ganadornan lo ricibi nan premio diarason 30 di april for di Gobernador Fredis Refunjol durante un ceremonia den Parke Wilhelmina.
Rosea Cultural
Grupo Rosea Cultural a keda funda na 1996 y ta bou direccion di Madelene Kelly, maestra na Scol Paso pa Futuro kende ta dedica su mes na yuda e hobennan cu problema pa intregra den enseñansa regular. E hobennan ta haya formacion special ariba tereno di arte y baile y asina desaroya nan habilidadnan. Otro aspecto importante ta cu nan ta siña trata otro, respeta otro, carga responsabilidad, aumenta nan autoestima y crea un amor special pa nos propio cultura na prome luga.
Alexander Robert
Alexander Robert ta un atleta di 17 aña cu ta practica e deporte di triathlon, esta coremento na pia, core bicicleta y landamento. Durante aña 2007 el a logra diferente premio tanto local como den exterior.
Shanayah Howell
E hobencita aki no ta desconoci pa su logronan tanto na Aruba como den exterior pa e deporte di bmx cu e ta practica. For di su edad di dos aña e ta gusta core bicicleta. Actualmente e tin nuebe aña y ta campeon di Aruba den su categoria y na Estados Unidos e ta number uno tambe den cu categoria, esta “girls 9 years”. Pa dos aña consecutivo e ta campeon mundial den e deporte di BMX.

WILLEMSTAD – Un biaha mas asbèst ta pone nos na kareda. Despues ku anteriormente tabatin insidentenan ku asbèst na un skol den Saliña Abou, un otro skol den Otrobanda i riba e barku Seamaster, un biaha mas tin un insidente ku asbèst riba un barku. Informashonnan ku LA PRENSA a optené ta indiká ku na Kòrsou nos no tin un maneho di asbèst.
LA PRENSA a kombersá ku un eksperto den salubridat i el a bisa ku falta di un maneho ta pone nos na kareda kada bia di nobo. E eksperto a splika ku e departamentu kaminda e ta traha, ta atendé ku personanan ku posiblemente ta afektá ku asbèst. El a splika ku nan tarea ta kuminsá semper despues di e insidente. Loke si nan a hasi den pasado ta, konsehá GGD pa tuma estado di salú di hendenan ku tabata den kontakto ku asbèst i sigui nan durante un periodo di 10 aña. Di e manera akí por haña sa si e kontakto ku asbèst tabatin efekto negativo. Finalmente el a splika ku loke su departamentu sa di asbèst, ta saká for di literatura. Pero pa loke ta trata kasonan spesífiko di asbèst i hendenan ku a muri, no tin ningun dato.
Entretantu na Ulanda e sindikato pa trahadónan, FNV, ta boga pa un registro di asbèst. Esaki FNV ta bisa awe 28 di aprel ku ta ‘Workers Memorial Day’. FNV ta rekòrdá awe tur empleado rònt mundu ku a muri dor di nan trabou. Segun FNV mester bin ku un registro kaminda tur hende ku pregunta tokante e material mortal akí por akudí. Ulanda ya kaba tin e ‘Instituut Asbestslachtoffers’ (IAS) i lo ta bon pa inkorporá e registro di asbèst den e instituto akí, segun FNV. Partnernan sosial, aseguradonan i Gobièrnu ta karga IAS, pero ta intermediá solamente ora ta trata di un kleim di hende ku ‘mesothelioom’ òf famianan di e defuntu.

WILLEMSTAD – E instansia ulandes ku a investigá e muestranan di asbèst ku a haña riba e barku Freewinds, ta papia di un situashon hopi serio riba e barku. Aktualmente ta sumamente peligroso pa subi riba e barku, segun e konklushon di e rapòrt.
E situashon ku a surgi djabièrnè último, ora a haña konfirmashon ku tin asbèst riba e barku Freewinds, ta mas serio ku ta parse. Tin indikashon ku tin skondementu di bèrdat, pa loke ta trata e konosementu ku riba e barku tabatin asbèst. LA PRENSA a kombersá ku Ludwig Alperts ku ta Port Officer pa e barku, pero e no tabata por a duna masha detaye, ya komo ku suseso a okashoná un káos. Alperts a primintí sin embargo ku e lo emití un komunikado den kua Freewinds mes ta reakshoná riba e suseso.
LA PRENSA a komprondé ku tin deklarashonnan kontradiktorio i un situashon konfuso entre funshonarionan haltu di D.O.K. Tin indikashon ku un funshonario, den presensia di diferente hende, a deklará ku el a nenga di subi e barku algun siman pasá, ora el a haña sa ku riba e barku tin asbèst. Entretantu e lo a informá por eskrito ku e no tabata na altura di e situashon riba e barku. Despues ku anteriormente el a konfirmá presensia di asbèst riba e barku, awor e ta nenga di tabata na altura. E parti kontradiktorio ta, ku e direktor sí a aseptá di tabata na altura pareu ku e funshonario haltu ku a nenga awor i asta a pone esaki pretu riba blanku.
LA PRENSA a trata na drenta den kontakto ku direktor interino di DOK, pero e tabata den reunion henter e parti di mainta.

WILLEMSTAD – E ‘vangreel’ akí ta doblá, pasó el a hasi su trabou manera mester ta. El a wanta un vehíkulo i evitá ku esaki a bai resultá riba e otro banda di kaminda. Awor mester drech’é pa e por sigui hasi su trabou. Mester evitá ku e próksimo vehíkulo ku dal den dje, ta bash’é abou kompleto i bai resultá riba e otro un banda di kaminda kousando mas aksidente. Foto Rudney Vrutaal.

Skina di Sorti, awe djaluna 28 di aprel di 2008, ta kuminsá ku deseá un i tur un bon dia. Prensa ta un poder grandi denter di e sistema di gobernashon demokrátiko. E poder ta derivá for di lei (libertat di ekspreshon) i ta haña kontenido den e kapasidat di e respektivo medio pa gana i mantené interes di gruponan den komunidat. Un medio ku no ta generá entrada simplemente no tin kontinuidat.
****
Pa mantené gara den komunidat, sierto grado di populismo ta inevitabel. E populismo por reflehá su mes den e manera ku ta presentá e informashon (entre otro e “opmaak”), pero aki ta bon pa opservá ku e tono di e presentashon mester keda reflehá e konteksto emoshonal di e informashon.
****
Diferente medio ta faya na trese informashon den su konteksto korekto dor di laga estilo dominá riba e balansa ku mester tin entre kontenido i konteksto emoshonal. Otro ta laga opinion di e medio òf periodista dominá riba e informashon ku ta wòrdu presentá. Pa mantené integridat i tòg mantené e gara ku e otro aspektonan hopi medio, rònt mundu, tin diverso kolumna di tendensia sumamente populista. Sarkasmo, chasko, karikatura i chisme bo ta topa den e medionan di mas prestigioso.
****
Korektamente, Lorito ta alerta lektornan, ku si o no ta apresiá e tono sarkástiko, ku chasko i poko di chisme, bo no mester lesa e kolumna. E kolumna su meta ta hustamente e diferensia ku e relatonan klíniko di echonan. Den Skina bo no tin di buska relato di echonan, ni tampoko chisme. Den Skina e propósito ta di poko mas profundidat den ékis insidente, suseso òf desaroyo.

WILLEMSTAD – Djasabra atardi na altura di Marchena Hardware tabatin e manifestashon den e bario Wishi/Marchena pa rekòrdá e hecho, ku tabata nèt 30 aña pasá ku a surgi un disturbio violento den e bario ku a kosta bida di un siudadano.
Na mes momentu a protestá tambe e hecho ku e bario ta sufri di e polushon di Refineria Isla. Fundashon Kuido Humano, SMOC i otronan tabata presente.
Manera LA PRENSA a publiká, dia 26 di aprel 1978 a surgi un disturbio den kua un kantidat di hóben tabata enbolbí. Reportadamente ta trata aki di un grupo di hóben ku tabata protestá kontra abusu. Polis a kuminsá usa forsa brutu i dado momentu a surgi un tiramentu. Tiru a alkansá un hòmber den su outo mortalmente.
E manifestashon di djasabra a kulminá ku desvelo di un monumento pa e víktima ku a kai 30 aña pasá.

I e plan maestro ta sigui funshoná
Na tinu bo no por tuma ni un di e aktual aktornan den maneho di papiamentu na skol na serio siguiendo e desishonnan ku a keda tumá den último añanan ku ta resultá den e intenshon pa bai bèk ku ulandes komo idioma di instrukshon den skolnan básiko.
No tabatin motibu pa reinventá wil. Pa duna lès den un idioma mester di material. Lógiko tòg? Mester tin hendenan adekuá i motivá pa duna lès. Lógiko tòg? Mester tin kliente/mayornan konsiente ku sa kiko ta pasando. Lógiko tòg?

Si e lógika no ta lógiko, anto e ora ei tabatin i tin te ainda un plan maestro ku tur tempu a pone ku ta solamente 10% so di muchanan den nos sistema di enseñansa ta logra drenta enseñansa sekundario di mas haltu. I di nan ta 3% so ta bai sigui studia i di eseinan kasi mitar nunka mas ta bin bèk Kòrsou. Mester tin un plan maestro ku a sòru pa esei i ku ta mantené e konfushon ku ta pone ku nos sistema di enseñansa nunka a duna e resultado ku e por i mester a duna. Ta un bèrgwensa ku awe ta diskutí riba bai bèk.
No a duna e sistema nobo oportunidat pa prueba su mes. Kiko a pasa ku e ingredientenan nesesario pa e mucha: material di skol na papiamentu, maestronan adekuá i motivá i mayornan konsiente? Den tur situashon ora algu no ta bai bon ta buska un salbashon; ta tira un salba bida. Kon bin ku esei no a sosodé (ainda) realmente direktamente i konkretamente pa e mucha ku lo benefisiá di inisiá su formashon den su idioma materno?

WILLEMSTAD – E pueblo a haña un luna i mei pa ahustá riba nan gastunan, miéntras ku preis mundial si a sigui subi. Esaki sigur no ta evitabel, ya ku mester kontinuá ku e preis apesar ku tur intenshon pa evitá un impakto grandi riba e komunidat. Presidente di ABVO Nacho Ignacio ta splika LA PRENSA den un entrevista ku e espasio ku komunidat a haña tabata destiná tambe pa kuminsá ahustá na gastunan un poko i krea un patronchi pa enfrentá kualke subida di preis nobo ku keda introdusí. E periodo di grasia aki no mester a krea e pensamentu ku lo no bai tin subida di preis, pero mas bien mester ta un tempu pa kada siudadano òf empresa analisá na un manera ophetivo nan gastunan.
Ignacio no por kita for di e realidat pa enfrentá e situashon mundial ku ta afektando tur komunidat ku subida di preis di kombustibel. Pa e isla di Kòrsou esaki ta nifiká ku mester yega na un fórmula mas kontrolá despues di analisá e diferente komponentenan ku mester yega na un alternativa kontra kualke subida di preis. E fórmula kontinuo mester kana konhunto pa mira kualke desaroyo i su impakto riba funshonamentu di e komunidat. Ignacio ta afirmá ku ta bon pa e komishonnan keda eksistente pasobra esaki tambe ta yuda e komunidat den un liña di pensamentu, apesar ku kada siudadano òf empresa ta keda responsabel.
E influensia mundial ta keda ku su parti riba e komunidat lokal, komo dependiente di preisnan internashonal. Ademas Ignacio ta kere ku mester presentá esfuerso pa un akshon diario pa evitá un impakto mas grandi. Inkluso ABVO tin un plan den kua huntu ku Gobièrnu i otro instansianan ta kere ku mester kuminsá stimulá plantashon di produktonan di alimentashon.

WIILEMSTAD - Diósesis ta e distrito òf teritorio kristian den kua e tin un outoridat ku ta ehersé hurisdikshon eklesiástiko. E outoridat ta: arsobispu, obispu, etc. E nòmber ta bini di tempunan di romanonan, ya e nòmber di diósesis tabata asigná na divishonnan atministrativo promé ku siglo III. Un tèmpel ta pertenesé na un parokia. Vários parokia agrupá ta forma un dekanato, Tur e parokianan agrupá ta pertenesé na un diósesis. Diósesis por ser agrupá, a su bes, den provinsianan eklesiástiko, den kua na su kabes tin un arkidiósesis.
Ora un diósesis ta karesé di pastor (e obispu), nan ta bisa ku e ta vakante.
E término diósesis ta ser utilisá dor di distinto iglesia kristian, siendo Iglesia Katóliko esun mas ekstendé, kua Kódigo di Derecho Kanóniko ta definié den kanon 369 komo:
“Diósesis ta un porshon di e pueblo de Dios, kua kuido pastoral ta ser enkomendá n’e Obispu ku koperashon di e saserdotenan, di manera ku, uní na su pastor i kongregá dor di djÉ den Spiritu Santu mediante e Evangelio i Eukaristia, ta konstituí un Iglesia partikular, den kua berdaderamente ta presente i ta aktua e Iglesia di Kristu, una, santa, katólika i apostólika.1
E palabra "diósesis" i su derivado "arkidiósesis", ta evidentemente tumá di e sup-divishon di e Imperio Romano i den su mes tabata asosiá na un gran unidat teritorial. E ta bini di Latin dioecesis ku na su turno ta bini di Griego διοίκησις i ku nos ta tradusí komo "atministrashon".

WILLEMSTAD - Ayera djadumingu Mgr. Karel Kasteel ku ta na Kòrsou e dianan aki relashoná ku 50 aña di hubileo di Obispado di Willemstad, a ofisiá un santu sakrifisio di misa na misa di Santa Maria.
Mgr. Karel Kasteel kende su tata tabata Gobernador na Kòrsou den aña 1942-1948 a bini Kòrsou despues di guera na aña 1945 ku 11 aña di edat. Mgr. Kasteel den su predikashi a konta, ku dia e i su mama a yega Kòrsou, e isla aki, tabata un paraiso kompará ku e Ulanda kompletamente distruí dor di Segundo Guera Mundial.
Mgr. Kasteel a bai St. Thomas College i apesar ku e tabata yu’i di un gobernador e tabatin hopi libertat pa e move den pueblo. Asina aki el a siña konosé hopi yu’i di Kòrsou, spesialmente e kurason di e yu’i di tera.
Pa e motibu ei e tabata sinti su mes sumamente felis pa despues di masha hopi aña regresá Kòrsou i bolbe sinti e kalor di e isla ku ta masha yegá na su kurason.
Mgr. Kasteel a enfatisá, ku e mihó manera pa nos bira un mihó hende ta dor di yuda otro. Nos tin ku purba den e bida aki di, NO hasi solamente bon propósito, pero purba di hasi tur e propósitonan aki bira realidat. Nos tur a nase pa bira Santu, pero ta keda na kada unu di nos pa realisá esaki.
Mgr. Kasteel ta un obispu ku a konosé hopi di aserka tur e Papanan di Roma di último 50 aña. Papa Puis 12 ta e Papa ku a duna e pèrmit pa Obispado di Willemstad a wòrdu lantá. Mgr. Kasteel tabatin e privilegio di a resa huntu ku diferente otro saserdote na kama di e Papa aki den su último dianan di su bida. Meskos el a konosé di aserka Papa Juan 23, Papa Pablo 6 i Juan Pablo 1 i Juan Pablo 2.

WILLEMSTAD - Ayera mainta durante un santu sakrifisio di misa, dos eks alumno di e mesun klas a topa otro, esta Mgr. Karel Kasteel i Adelbert de Jesus. Nan dos tabata den “vijfde klas” serka frater Andreas na Sint Thomas College mas ku sesenta aña pasá. Kasi sigur nan a rekordá otro kon bon nan tabata siña na skol, anto tambe algun kos di mala mucha ku no tabata hasi falta.
Riba e pòtrèt nos por mira nan dos kontentu di a topa ku otro, despues di mas ku sesenta aña. Naturalmente Adelbert de Jesus no a keda sin a haña su bendishon spesial serka su amigu bieu di skol. Aki ta un berdaderamente “recordar es vivir”.

WILLEMSTAD- Den kuadro di selebrashon di 50 aña di Diósesis di Willemstad, LA PRENSA ke aportá pa tin mas informashon riba e selebrashon históriko aki. Den un relato kompilá pa pader Morrison La Porte ta presentá lo siguiente:
Obispunan di Iglesia ta duna na nos pa medio di Kristu pa aktua komo wardadó pa nos. Obispunan ta na enkargo di un “Diósesis /obispado” kual normalmente ta un teritorio geográfiko ku ta konsistí di diferente komunidatnan (parokianan) di fielnan. E Obispu ta e superior di tur saserdote (eksepto esnan ku ta pertenesé na un komunidat religioso) den su obispado, e ta tambe e lider spiritual di tur fielnan den su obispado.
Den un arsobispado, e obispu ta risibí un rango honorabel komo arsobispu. E manera usual pa dirigí bo mes ku rèspèt na un arsobispu ta ‘ekselensia’ ( na Ingles ta your grace) i e manera pa dirigí bo mes na un obispu ta: ‘monseigneur’.
Den nos Iglesia moderno no ta tur obispu ta okupá un posishon pastoral komo kabes di un obispado. Tin obispadonan ku ta asina grandi por ehèmpel, ku ta mas mihó nominá òf ordená obispunan pa tuma sierto parti di e obispado den kolegialidat ku esun enkargá, en bes di dividí e obispado. Pues tin hopi obispu ku ta representante Papal, nan ta yama nan diplomátikonan Papal (nunsio). Den área di Karibe nos tin un representante Papal den Karibe ku ta biba na e Nunsiature na Trinidad. Tin hopi Diósesis/Obispado ku tin obispunan ousiliar, pa yuda e obispu enkargá ku e obispado loke nos ta yama e ordinario lokal.

WILLEMSTAD - Direktor tékniko di selekshon nashonal di futbòl a anunsiá awe e 20 selekshonadonan pa e enkuentronan di e selekshon nashonal kontra di Haiti den kuadro di eliminatorio pa Mundial 2010.
Esnan selekshoná ta: Wencho Farrell (1), Raymond Homoet (18), Angelo Cijntje (15), Tyrone Loran (4), Angelo Martha (3), Eugene Martha (14), Shelton Martis (12), Lennox Mauris (2), Djuric Winklaar (5), Giovanni Franken (13), Anton Jongsma (8), Leon Kantelberg (10), Revy Rosalia (7), Angelo Zimmerman (6), Sendley Bito (20), Shanon Carmelia (19), Dyron Daal (16), Benjamin Martha (17), Robin Nelisse (9) i Orlando Smeekes (11).
For di e lista di hungadónan konvoká por mira ku e biaha aki Shelton Martis (12), Robin Nelisse (9) i Leon Kantelberg (10), a keda konvoká bèk den selekshon pa e importante partidonan kontra di Haiti riba 15 i 22 di yüni próksimo.
Manera ta konosí, NAVU ta pendiente di un desishon di FIFA riba unda e partido kontra Haiti ta tuma lugá dia 15 di yüni.
Ta asina ku FIFA a duna Haiti ultimatum te ku dia 30 di aprel pa duna klaridat riba seguridat na Haiti.
Miéntras tantu preparashonnan ta tuma lugá pa e partido di regreso den Stadion Ergilio Hato riba djadumingu 22 di yüni próksimo.
Karchinan pronto lo ta na benta.
For di awor ta rekomendá pa kumpra bo karchi trempan.
Hopi ta esnan ku a lamentá ora ku na último ora nan no a logra haña un karchi di entrada pa e enkuentro kontra Nicaragua.

VIENNA, Austria, - Partinan di e relatonan sekretu di e kaso di Natascha Kampusch ku a lèk a konmové repúblika oustriako.
E akta Nr. 222 UR 59/03-K tin 200.000 página i su kontenido ta eksplosivo i dramátiko.
E akta, tambe konosí bou di inisial “N.K.”, tin detayenan nobo di sekuestro di Natasha Kampusch i resultadonan di e investigashonnan despues ku e dama hóben a logra hui fo’i su koutiverio na ougùstùs 2006.
E akta “N.K.” tin relatonan riba interogatorionan, deklarashonnan di e hóben, detayenan riba e bida seksual perverso di Wolfgang Priklopil, su sekuestradó, i eksistensia di pòtrètnan i videonan ku ta demostrá ku e hóben a keda usá komo katibu seksual pa e hòmber kende a sekuestr’é na 1998, tempu ku e mucha muhé ta’tin 10 aña.
Te ku siman pasá djabièrnè, a mantené kontenido di e akta “N.K.” den sekretu, pero mannan misterioso i interesá a lèk un par di página di e akta na e korant grátis “Heute”, ku a publiká sinku página di relatonan nobo i detayenan hororoso di e sekuestro.
Kontenido di e páginanan no a keda desmentí pa Fiskalia oustriako, pero a provoká un skandal ku por tin konsekuensianan polítiko.
Segun e korant, e pòtrètnan i videonan enkontrá pa polisnan den un archivo elektróniko di Prikopril, nunka ekspertonan a analisá nan, kendenan a risibí, segun korant Heute, òrdunan djariba pa no hasié, i evitá ku esaki bira un skandal polítiko.

PAULINA-FELICIA
Aurelia (88 aña)
Mihó konosí komo Jeje
A laga atras su yunan Julian Dolorita, Irene Bakmeyer, Orlando, Ramona, Morela Felicia, rumannan Jan Felicia, Aida Walle. Akto di entiero ta djabièrnè 2 di mei for di El Consolador pa santana Montaña. Bishita 1or. Promé ku entiero tin un s.s. di misa 4or.

LOURENS
Camilio Confesor
Mihó konosí komo Mushe Cam
A laga atras su kasá rosa Lourens-Rodriguez, yunan Kathlyne Lourens i Corwin Sillie, Audette i Donald Casiniri-Lourens, Regmilio i Mildred Lourens-Rosalia, Joyceline Lourens i Robert Fingal, Sharline Lourens, Marlon, Judrick i Charles Lourens, Nthalie Lourens i Richinel Juliana, Rutsela i Toni Jansen. Akto di entiero ta djamars 29 aprel for di misa Coromoto pa santana Roodeweg. Bishita 1or-4or siguí pa un s.s. di misa.

CAICEDO
German (72 aña)
A laga atras su kasá Maria del Rosario Mazo de Caicedo, yunan Amparo, Yvonne, Leonisa, Monica, Suzy, Rodolfo i German Caicedo. Akto di entiero ta djamars 29 aprel for di El Señorial. Bishita 10or i 11.30or tin un s.s. di misa. Entiero ta 12.15or pa Crematorio Brievengat.

SILVANO
Harold Joseph (69 aña, repentino)
A laga atras su kasá Vicia Silvano-Francisco, yunan Rhyence Silvano i Petra, Jarvis Siulvano i Cynthia, Farley Silvano i Nora, ñetunan Jayden, Riley i Fayah Silvano. Akto di entiero ta djamars 29 aprel for di misa Sta. Maria pa santana Sta. Maria. Bishita 1or. Promé ku entiero tin un s.s. di misa 4or.

Mishon komersial pa Brazil masha eksitoso

WILLEMSTAD - Curaçao International Financial Services Association (CIFA), komo parti di su Plan Stratégiko titulá “Curaçao, the gateway to and from Latin America” i den koperashon estrecho ku Kámara di Komèrsio di Kòrsou, a partisipá na e mishon ekonómiko pa Brazil ku e Ministerio ulandes di Asuntunan Ekonómiko a organisá di dia 13 pa dia 19 di aprel último. E mishon aki tabatin na kabes e sekretario di estado ulandes pa Asuntunan Ekonómiko, señor Frank Heemskerk i alkalde Ivo Opstelten di Rotterdam.
E delegashon di Kòrsou tabata bou di liderato di presidente di Kámara di Komèrsio, señor Ruud Thuis. E tabata konsistí aparte di e presidente di CIFA, señor Herman Behr, di un desena di kompanianan prominente riba tereno di servisio finansiero internashonal.
Meta di e delegashon di Kòrsou tabata pa pone sektor komersial na Sao Paolo i Rio de Janeiro na altura di e hopi oportunidatnan ku Kòrsou ta brinda e merkado aki riba tereno di servisio finansiero internashonal. Den e kuadro aki a organisá na ámbos siudat seminario kaminda a splika Kòrsou su produktonan finansiero mas leu. Mas en partikular E-zone i e ‘Stichting Particulier Fonds’ (SPF) a krea hopi interes i for di e diferente kontaktonan ku a resultá for di e seminarionan sin lugá na duda lo sali enkargonan di trabou.
E delegashon a partisipá ademas na diferente evento ku e delegashon ulandes a organisá pa krea nètwèrk di kontakto. E gruponan di meta pa e delegashon ulandes tabata kompanianan den e sektornan di haf, transporte marítimo doméstiko, konstrukshon di bapor, energia biológiko, transporte i logístika. Den e kuadro aki e delegashon a bishitá tambe e Intermodal South America 2008 na Sao Paolo, e bolsa komersial mas grandi i mas importante di Latino Amérika riba tereno di komèrsio internashonal, transporte i logístika, loke a ofresé un bon oportunidat pa empresanan traha riba nan nètwèrk di kontakto.

 WILLEMSTAD - E echo ku Carmabi a haña e premio di CHATA e aña aki ta indiká ku e organisashon ta hasiendo un trabou balioso pa komunidat. Carmabi a haña e premio a base di su kontribushon kontinuo na desaroyo sostenibel di nos isla. Espesialmente e konsientisashon di nos pueblo pa loke ta trata e balor di nos naturalesa i su posibel impakto ekonómiko i usando esaki pa desaroyo di turismo. E premio ta nifiká un estímulo grandi pa Carmabi sigui ku su trabou pa por logra su meta: pa naturalesa ta haña un lugá mas prominente riba e diferente áreanan di maneho. Solamente dje forma aki nos por sigurá un desaroyo sostenibel.