ORANJESTAD- Huez Roovers awe mainta a manda su decision den e caso sumario cu Gobierno a entabla contra sindicatonan den accion, pa tur partido envolvi.
Resaltante di e decision di Corte, ta e hecho cu ta Sali for di e punto di bista cu mester salvaguardia e derecho sagrado di un comunidad, pa su seguridad no ta wordo neglisha.
Tambe e hecho cu Corte a determina cu accion di sindicatonan tin cu wordo anticipa, ta laga algun pregunta serio atras, ya cu e decision aki ta anula gran parti di e presion cu e sindicatonan kier pone riba Gobierno, pa yega na un solucion.
Mas serio ainda ta e hecho cu Corte awor a traha un “schema” con sindicatonan por bai den accion, cuanto dia si y cuanto dia no, influenciando asina henter e accionnan sindical.
E decision tambe ta un tiki controversial, ya cu mientras cu Corte kier pa cierto departamentonan no bai den accion pa motibo cu nan tin cu salvaguardia seguridad nacional, pero di otro banda esnan den accion, luchando pa nan derecho riba indexering, tambe ta esnan cu Corte ta pidi comprension y ta obliga nan di sigui eherce nan obligacion neglishando nan lucha pa indexering.
Esaki ta conta mesun cos pa e personal di Cuerpo di Bombero, personal di KIA, personal di Cuerpo Especial Arubano y di departamento di imigracion.
E decision di Corte ta prohibi e sindicatonan KPA, KIA, CEA y IASA, hunto cu Cuerpo di Bombero y di Douane, di bai den accion pa tempo indefini y si dado caso e sindicatonan tuma e decision di bai den accion, nan ta obliga pa avisa Gobierno di e plan aki 48 ora prome cu e accion tuma lugar.

ORANJESTAD- E maneho nobo encuanto bandanan di afo ta stipula cu ora di cambio di artista, fecha y/o lugar y no tin motibo hustifica, lo revoca e permiso preliminario, y lo habri e posibilidad back pa entrega di peticionnan nobo.
Di acuerdo cu e maneho aki a revoca e permiso preliminario duna pa 30 di april 2008.
En bista di esaki, lo habri e posibilidad atrobe pa entrega di peticionnan nobo pa e luna di april 2008.
Mirando cu e tempo ta cortico, e condicion di 40 dia di anticipacion, NO ta aplicabel y SÍ ta keda e punta di salida en principio “first in, first out”.
Ministerio di Salud Publico, Medio Ambiente, Asuntonan Administrativo y di Stranhero kier a enfatisa cu ora ta hasi propaganda pa concierto y/o fiesta sin cu tin e permisonan necesario, no ta importa na unda, sea den stadion, club of hotel, ta corre pa esnan cu ta hasi esaki.
Pues pa tur artista cu bin di afo pa actua aki na Aruba mester di un permiso.

ORANJESTAD - Ayera, diarason 2 di april, a tuma lugar e rifa di Colegio Arubano. Notario Taekema-Rodriguez, cu ayudo di 3 chikitin, a saca e 6 ganadornan di e rifa aki, conoci como e rifa di Colegio Arubano.
E rifa aki ta, como ya tur hende sa, pa yuda crea fondo pa e alumnonan di Havo4 bai Merida pa nan viahe estudio y pa V5 bai Puerto Rico, tambe pa nan viahe estudio.
Na tur cu di un forma of otro a yuda haci e rifa aki un exito un gran danki di parti di Colegio Arubano. Un danki di curazon na tur esnan, cu pa yuda, a cumpra un o mas ticket. Boso aporte ta hopi aprecia pa tur e alumnonan di Havo 4 y di VWO 5. E ganadornan ta:
1) Auto Suzuki Swift pa Marcia Ellis, icket nr.: H 21605
2) Sharp 42 inch LCD HDTV, Jairo La Rotta, ticket nr.: H 10125
3) Compag Laptop F730, Michael, ticket nr. V 127233
4) Sony Playstation 3, José da Silva, ticket nr. H 42488
5) Apple Ipo (80GB), Eldrick Vis, ticket nr. H 79406
6) 2 holoshi Skagen His and Hers, Donata, ticket nr. V 101325

 Drs. Hans Blankert a elabora riba e exito di e sistema aki na Hulanda

ORANJESTAD- “Hopi satisfecho mes” esey tabata e prome impresion di Juan David Yrausquin, e Presidente electo di ATIA despues di e evento. E comerciante cu Dialuna anochi a keda re-eligi pa 1 aña mas den e puesto di Presidente di ATIA por mira atras na un reunion anual bon atendi y cu un presentacion exitoso cu a sigui su tras. “Cu e evento aki nos kier demostra na nos miembronan y na e comunidad di Aruba en general cu nos no ta papia solamente tocante e asercamiento cu mester tin entre gobierno, gremio comercial y gremio sindical pero nos ta haci algo pa logre tambe. Pesey nos a invita e ex-Presidente di e organisacion comercial di mas grandi na Hulanda, Presidente di Stichting van de Arbeid y Vice Presidente di Sociaal Economische Raad pa bin duna nos algun tips riba con nos por logra comunica cu otro y yega na acuerdonan comun na un forma mas eficiente”, asina Juan David Yrausquin a enfatisa.
ATIA a logra haya un cantidad di su miembronan cu for di 6’or di atardi a presenta pa e reunion di e asosacion di comercio di mas grandi di nos pais y a elabora riba aña 2007, a repasa nan cifranan anual y na mes momento a elabora riba nan plannan pa e aña aki. E miembronan den un forma unanime a accepta e cuentanan anual di aña pasa y a vota na fabor pa e mesun directiva sigui cu nan trabaonan pa dos aña mas.
Despues di e reunion interno cu a tuma lugar den Renaissance Convention Center, e miembronan a pasa pa un sala mas grandi pa asina topa cu invitadonan na e presentacion di Drs. Hans Blankert. Prome cu presentacion di e experto Hulandes riba e materia di “polder-model”, Juan David Yrausquin den su calidad di Presidente di ATIA a hiba palabra y a boga pa nos tambe na Aruba yega na un situacion similar na unda nos ta delibera cu otro na mesa y no cu nos mester haci di tur cos un discusion of problema.

ORANJESTAD- Otmar Oduber, miembro di Parlamento di partido AVP elaborando riba e medidanan cu lo bai wordo introduci riba pueblo pa cu AZV, ta bisa cu esaki sigur lo coba e graf di pueblo mas hundo ainda, un graf cu esnan di partido MEP den gobierno a bin ta cobando pa 7 aña largo caba.
Tur e medidanan cu MEP a bin ta impone riba nos comunidad pa asina por haya placa, no pa inversionnan of desaroyo di nos isla, sino pa duna friends & family ta matando nos hendenan. A bin ya caba cu aumento di prima di AZV, aumento ridiculamente halto di e servicionan di gobierno, aumento di invoerrechten, aumento di accijns riba gasolin, BBO y awor nan kier bin cu mas medida pa cu AZV.
Minister Nilo Swaen a bisa diamars cu e no lo duna mas placa pa indexering pasobra e no kier coba e graf di Pais Aruba, pero ta parse cu e ta bibando na otro pais of mihor bisa na otro mundo, pasobra e graf di Pais Aruba a wordo coba hopi tempo pasa caba y en bes di purba rebiba nos hendenan, nan ta coband’e mas hundo ainda pa asina evita cu nan por sali.
Otmar Oduber ta puntra Nilo Swaen y Booshi Wever( kende mientras tanto a duna indicacion cu e medidanan lo bin), ta con nan kier pa p.e. un mama soltera cu dos yiu y salario minimo paga huur di cas, awa, coriente, gasolin, cuminda, transporte, scol, paña, etc y riba dje si un di nan bira malo tover 10 florin di eigenbijdrage pa dokter di cas, sigui pa tover un otro 5 florin pa cada remedi cu e dokter a manda y esey si nan tin suerte cu e remedi ta cai den e lista positivo di Booshi Wever.
Mescos e ta mustra ta con e hendenan aki lo kier pa un persona grandi cu lo mester wordo manda pa exterior pa operacion biaha su so, pasobra AZV no lo cubri gastonan di acompañante mas. Si algo pasa cu e pacient aki den exterior ta ken lo tey pa yude?

ORANJESTAD- Pa loke ta e categoria pa e coredornan Elite di Aruba, espectativa ta grandi. E distancia di e ruta aki ta 5 km y tur participante lo duna nan maximo pa termina den e top 3 best runners of Aruba. Lo tin premio special pa e ganadornan den e categoria aki!
Esnan cu inscribi como un e coredo Elite no por gana den e siguiente categorianan, 14 & under, 14-19, 20-24, 25-29, 30-34, 35-39, 40-44, 45-49, 50-54, 55-59, 60+
E careda di 5 km ta dia 5 di april y ta cuminsa 5:30pm na Costa Linda direccion bai panord te banda di Aruba Phoenix Hotel y despues bira riba e caminda paralelo direccion bek pazuid te unda e evento ta terminda.
Caminata
Den categoria di canamento lo tin premio pa e promer 20 participantenan cu crusa e liña final. Inscripcion ta Afl.5,00 pa persona na IDEFRE entre7:30 - 16:30 y diasabra di 9:00 -13:00 pa mas informacion por yama Jacky Ponson Van Putten na IDEFRE tel. 582-4987.
Comite Olimpico Arubano ta invita tur organisacion deportivo femenino di softball, futbol, basketball, volleyball etc. pa bin participa y mustra cu bo tambe ta den condicion y bira un di e mihornan di Aruba.

Skina di Sorti, awe djaweps 3 di aprel di 2008, ta kuminsá ku deseá tur hende un bon dia. Nos dirigentenan polítiko (no nan so, pero nan en partikular) tin ku siña distinguí entre kiko ta personal (e persona komo individuo ta e asuntu) i kiko ta meramente e funshon (kende ta okupa e funshon ta irelevante) òf un asuntu riba su mes (unda i bou di kende e asuntu a presentá no ta relevante). E tendensia di personifiká delaster un kos, ta nulifiká un dje prosesonan vital di maneho ku ta e aspekto di kòntròl.
****
Sin “feed back”, ku ta e informashon ku ta bini for di evaluashon krítiko dor di tersera, e probabilidat di mira i skucha lokual bo ta deseá, ta mas grandi. Kalidat di e proseso di kòntròl ta hopi mas haltu ora ku tin reseptividat pa e “input” real di tersera. Pues no di “pleasers” ku ta bisa e lokual nan ta kere e otro ke tende òf e lokual no ta provoká reakshon atverso serka e otro.
****
E fenómeno di konseho i òf kontesta pa komplasé (“politiek correcte antwoorden en conclusies”) ta mal, pero mal pegá den seno di nos gobernashon (irespekto e konstelashon i e peso di poder polítiko). A yega asina leu ku te hasta institutonan haltu, entre kual esnan di kòntròl, tin formulashon di konklushon òf rekomendashon ku ta “politiek correct” pero insignifikante pa e proseso di “feedback” i korekshon.
****
Gobernantenan ta hasi nan mes mal fabor ku apuntamentu di un kontigente di “gelijkdenkenden” i “pleasers”. Un hende di konfiansa, ta esun ku ta alerta su hefe di riesgonan i benefisio di senarionan ku e por kontra i ta duna un rekomendashon pa e lokual e ta konsiderá e mihó kurso di akshon. Si e hefe skohe un otro kurso di akshon e persona di konfiansa ta mustra riba e benefisio i riesgonan di e eskoho i no ta bini bèk na e konseho original.

WILLEMSTAD – Djadumingu 30 di mart, vèlt di Ser`i Domi tabata esenario pa e tremendo final di e torneo di futbòl, kaminda e tim invikto di Rif a sa di sali kampion.
Na kuminsamentu di mart 2008 e torneo di futbòl a start sali.
Un torneo ku e hóben Randall Rekondie a organisá i ku a konta ku timnan di diferente bario manera: Veeris, Bonam, Koraal Specht, Domi, Ser`i Domi, Kas Chikitu i Rif.
E hóbennan ku e tim di Rif ta konsistí di dje ta: Heavenly Martina, Kishan Vivas, Roderick Fraai (Wesu), Baldemar Felisia, Everon Martis (Nene), Sherwin Felisia, Haylie Trinidad, Clay Thomasa, Allen Rast, Emiron Epistola, Humphrey Plantijn, Shur, Glendjomar Josepha, Day i Willy Raphaela.
Un gradisimentu pa nan spònser Pelikan Hotèl & Casino, sra. Jaqueline Leon i famia ku semper a kere den nan i tambe tabata un apoyo pa nan.
Mare tin mas di e empresanan asin’aki ku ta kere den nos hóbennan.
Un pabien di kurason na nos hóbennan di Rif ku nan tremendo viktoria.

BUCAREST, Rumania, - Presidente di Merka, George W. Bush, a sufri un dòbel revés durante e promé dia di kumbre di “Organisashon di Tratado di Atlántiko Nort” (OTAN) ku ta realisando na Bucarest, Rumania.
Bush su idea di habri porta pa dos eks repúblika soviétiko Georgia i Ukrania pa aliansa militar di Oksidente, a keda rechasá pa miembronan di e organisashon durante sena di trabou ku a habri e kumbre.
Oposishon prinsipal a bini di parti di Kansier di Alemania, Angela Merkel, kende a bisa ku e medida ta prematuro teniendo na kuenta ku apoyo popular pa OTAN dentro di Ukrania ta ménos ku 30% i ku Georgia no ta kontrolá su teritorio kompletu debí na konfliktonan ku separatistanan.
Fransia a respaldá opinion di Alemania, ounke vários Hefe di Estado i di Gobièrnu reuní na Bucarest a insistí ku no ta trata si Georgia i Ukrania afiliá na OTAN, sino ki dia.
Sin embargo, un alto diplomátiko georgiano a bisa ku “no” pa Georgia n’e momentu aki, lo por keda interpretá komo viktoria pa Mosku, ku ta mira ku preokupashon ku OTAN por ekspandé te na su fronteranan.
Gresia a dal otro gòlpi kontra aspirashonnan di Bush dor di oponé entrada di Macedonia n’e aliansa, debí na disputa riba nòmber di e eks repúblika yugoslavo, ku ta koinsidí ku provinsia griego.
Analistanan ta konsiderá ku blokeo kontra Macedonia lo por desestabilisá region di Balkannan, ounke si OTAN rekonosé Kroasia i Albania p’e Plan di Akshon pa Afiliashon (MAP, abreviashon na ingles), e etapa preliminar pa pleno entrada n’e organisashon.

WASHINGTON, Merka, - Osama bin Laden, Hefe di al Qaida, tin bon salú, su man drechi Ayman al Zawahiri a afirmá den mensahe emití ayera, segun grupo IntelCenter.
“Sheik Osama bin Laden tin bon salú pa grasia di Alá”, Zawahiri a bisa na arabir den mensahe di oudio divulgá pa brasa di komunikashon di Al Qaida, As-Sahab, di akuerdo ku IntelCenter.
“Esnan ku ta kontra nos, tur dia ta trata emití rumornan falsu riba e echo ku Osama ta malu”, Zawahiri a indiká.
“Ounke Osama bin Laden no ta malu, algun dia e lo muri, pero religion di Alá lo keda i heredá Tera i tur loke tin riba dje”, Zawahiri a señalá.
Deklarashon di number dos di Al Qaida tabata kontesta riba mas o ménos 100 pregunta pon’é riba Internet.

WASHINGTON, Merka, - Senador Barack Obama, aspirante pa kandidatura presidensial demókrata pa elekshonnan di novèmber, a bisa ku eks Vise Presidente Al Gore por bira miembro di su Gabinete.
Su tarea prinsipal lo bai ta enkabesá e lucha kontra kalentamentu global, tema di Al Gore.
Al Gore a keda derotá pa aktual Presidente George W. Bush den elekshonnan di 2000.
“Lo mi hasié!”, Obama a manifestá na Pensilvania ora a puntr’é si e lo konsiderá Al Gore pa forma parti di su Gabinete i dirigí e kampaña kontra kalentamentu global.
Pensilvania dia 22 di aprel lo bai ta esenario di elekshonnan primario konsiderá krusial den e lucha di Obama i senador Hillary Clinton pa kandidatura presidensial demókrata.
Fo’i dia ku el a gana Premio Nobel di Pas na 2007 pa su lucha kontra kalentamentu global i pa su pelíkula “An Inconvenient Truth”, Gore a mantené su mes na márgen di kampaña elektoral na Merka.
Di e mesun forma, e eks Vise Presidente merikano a apstené bisa si e ta na fabor di kandidatura di Obama òf Clinton.

WILLEMSTAD – Delegashon di piskadó a sorprendé delegashon di Marina Real ku denunsia di “Kogelvergiftiging” durante nan reunion djamars. Manera ta konosí, un delegashon di piskadó formá pa Sonny Hooi, Carlos Martinez i Erwin Koenze a bishitá Marina Real pa nan enkuentro pa dialogá riba e problemanan ku ta surgi pa motibu di entrenamentu di Marina Real. E reunion aki p’e diálogo a bai den un direkshon den kua piskadónan a pone nan kondishon pa stòp e entrenamentunan ku ta tuma lugá den área di Wacawa. E grupo di piskadó aki ta den representashon di piskadónan Boka Sami, Santa Martha i Westpunt.
Manera ta konosí, djasabra último piskadónan den nan seno, a deliberá promé ku e reunion ku a tuma lugá djamars pa fiha nan posishon, di manera ku lo presentá nan pensamentu dilanti di e kuerpo di Marina Real ku tabata presente. E kuerpo di Marina Real a keda formá pa Hans Schreuder, direktor interino di Warda Kosta i tambe Roderick Gouverneur, relashonista públiko di Warda Kosta. E komandante Peter Lesenlink no por tabata presente, debí na ehersisionan ku ta tumando lugá na Sürnam i ku e mester tabata presente pa esakinan. Durante di e diskushonnan riba e problema agudo delikado i serio aki, por a komprendé ku nan tabatin nan reunion promé ku e komandante a sali pa eksterior. Esaki a duna su punto di bista pa bin mesa di diálogo, di kua e piskadónan a rechasá kategórikamente. Den e enkuentro aki naturalmente e tópiko kayente tabata presentashon di e problema relashoná ku tiramentu durante entrenamentu militar fuerte di tera pa laman.

WILLEMSTAD - “Falta di diplomasia i arogansia pa e manera kon a atendé anunsio di kambio di fecha 15 desèmber 2008. No mester a hasi esaki na Hulanda, pero lo tabata bon pa sekretario di estado sra. Ank Bijleveld por a komuniká ku e partnernan den e negosiashon”, tabata deklarashon di Lionel “Paps” Capriles den entrevista ku LA PRENSA.
Segun Paps Capriles e ta di akuerdo ku no mester hasi algu purá purá, pa no resultá robes, pero e kambiamentu di fecha ta kibra speransa i pone ku hende ta pensa ku kos no ta kanando bon. Ademas si mester keda kambia, asina lo por pone hende fada di e trayekto di kòmbersashonnan ku ta tumando lugá riba futuro struktura estatal di Kòrsou. E impreshon ku a bin dilanti ku ‘sòpi purá ta salu” enbèrdat ta un echo, pero e forma ku esaki a keda atendé pa e sekretario di estado mester a enbolbí esnan di e islanan, enbes di anunsiá esaki na Hulanda pa despues e sali den publisidat manera ta e kaso.
Awor mester yega na bon entendimentu promé ku bai nombra otro fecha. E próksimo fecha mester ta unu sigur, ya ku no mester tin kambio na kaminda. Ta bon pa sinta huntu palabrá e trayekto di kòmbersashonnan nobo di manera ku por evitá ku ta bin un kambio den e di tres fecha ku mester keda anunsiá. Mirando ku awor a kambia e fecha pa di dos biaha ta duna indikashon na otronan ku a dura hopi i ku por tin hende kompletamente di akuerdo ku e forma purá lo tin su konsekuensianan.

WILLEMSTAD - Djabièrnè 28 di mart sra. Geraldine Dania-Martina, kolaborador di Kas di Kultura huntu ku koleganan, eks koleganan famia i konosí a rekordá e hecho ku 30 aña pasá el a drenta den servisio di gobièrnu. Durante selebrashon, diputado di Kultura sra. Marilyn Alcalá– Wallé a hasi entrega di e ènvelòp kustumbrá. Señora Dania-Martina ta aktualmente kolaboradó di asuntunan di personal na Kas di Kultura.
E ta konosí komo un persona alegre i gustá pa su koleganan.

WILLEMSTAD - Direktiva di NABAFE ta kontentu di por partisipá ku e proseso pa sanea e situashon finansiero di NABAFE ta kana den bon direkshon.
Manera ta konosí t’asina ku e direktiva aktual a heredá un debe di alrededor di 390 mil florin repartí riba 24 instansia.
Den simannan ku ta tras di lomba sr. Thakai Doran, na nòmber di direktiva, a kuminsá ku aserkamentu pa papia ku e instansianan aki di e situashon.
Direktiva ta rekonosé ku ta un proseso fèrfelu kaminda sr. Doran mester atendé ku e frustrashon di persona i instansianan ku ta sinti nan mes mal tratá pa NABAFE.
E instansianan aki ta desepshoná pa e motibu ku nan no a keda aserká nunka pa atendé e debe òf promesanan a keda hasí na nan sin ku a kumpli ku e promesanan aki.
Direktiva ku satisfakshon por partisipá ku hopi di e instansianan aki ta rekonosé ku e direktiva aktual ta asumiendo responsabilidat i ta trahando duru na interes di beisbòl en general di moda ku e pelotero al final por tin satisfakshon den e deporte. P’esei nan ta dispuesto pa koperá pa krea e kondishonnan pa direktiva di NABAFE por sigui ku su trabou.
Den e kuadro aki direktiva ta gradisí e siguiente instansianan ku a disidí di duna e direktiva aktual di NABAFE e konfiansa i espasio pa por sigui traha na interes di beisbòl en general.
Ta trata di:
• Franky Rentals;
• Stacey Embrodery ;
• Isla Printing;
• Rudy Haakmat;

WEBSTER
Lionel Rupert (53 aña)
Mihó konosí komo Lio
A laga atras su kasá Patricia Webster-Creque, yunan Litecia Webster, Leandro Webster, yunan di kriansa Debora, Carolina, Ruendy Creque. Akto di entiero ta djaluna 7 di aprel na Ulanda.

BAROMEO
Jozef Antonio
Mihó konosí komo Boeis
A laga atras su kasá Clarita Baromeo-Maria, yunan Margriet i Franklin Rosinda, Frnaklin, Nilva, Filomena, Roisemarie, Hensley Baromeo, Miralda Alejo, Stanley i Cheradin Baromeo. Akto di entiero ta djasabra 5 di aprel 1or-4or for di El Señorial pa santana Sta. Maria. Bishita 1or.

HIJGEMANN
Johannes H.
Mihó konosí komo Jan
A laga atras su partner Editha Francisca i Charissa Pandt-Barzy, yunan ton, hans, Marijke i Peter Hijgemann. Akto di entiero ta djabièrnè 4 aprel for di misa Sta. Maria pa santana Sta. Maria. Bishita 1or.

MARTEN-HERNÁNDEZ
Ivolaine Elkiane Marie (45 aña)
A laga atras su mama Sylvia Hernández-Rogers, kasá Frencis Marten, yu Yitsvah Marten, rumannan Randall i Elda Hernández-Fernandes, Terry i Corry Hernández-Roijakkers, Walter i Amarilys Hernández-Sánchez. Akto di entiero ta djasabra 5 di aprel pa santana Janwe. Bishita 9or-11or na misa di Steenrijk siguí pa un s.s. di misa.

LEITO-FRANCISCA
Justina Josefita
A laga atras su yunan Angela thomas-Leitoe, Maria, Robert, Celsa, Edsel, Raymond Leitoe, Norma Trinidad-Leitoe, Mercedes Leito, Maydai Raymundo Martina, Noris i Hubert Weert, Frank i Maura Leitoe, Siegfried i Sharline Leito, Elfried i Luduska Leitoe, Anthony i Jasmin Leito. Akto di entiero ta djasabra 5 di aprel 4or for di El Tributo pa santana Barber. Bishita 1or. Promé ku entiero tin un sirbishi 3.30or.

Lorito ta yama tur hende un felis djaweps. Awe Lorito a skibi, skibi i skibi. Nos patanan a keda hasi masha doló. Tin dia t’asina, pasobra ta skibiendo nos ta duna tur informashon.
*********
Entrante awe nos no kier pa yama nos Lorito mas, pero Profesor Lorito. Ora nos a tende ku den Korte un abogado a bisa ku un polítiko ku a haña nombramentu polítiko tin un “denkvermogen” masha haltu, siendo ku nos no a ripará esei, anto no a keda nada otro di outoproklamá nos mes komo Prof. Dr. Mr. Ir. Lorito! Lagami!
*********
Komo ku awor nos ta doctor “honoris causa autoproclamarum” nos por disidí hopi kos pa nos mes. Hende no por konta nos kiko ku ta kiko mas. Nos ta kuminsá ku Don Hugo na TeleKòrsou ku a bin ku un storia ku sigur nos no a kumpra. Kontrali na loke Don Hugo a deklará, Tele-8 a pèrdè den e kaso di Marazul. Konstantemente nan a insistí ku pa nan ta 1 ganadó so tin antó esei ta Joella. Ayera sin embargo tòg Tele-8 a paga Ratan ‘un montante’ ku nan a palabrá di lo no divulgá. Fo’i ora bo lòt un kas, antó un hende gan’é, pero na final bo tin ku paga ‘un montante’ èkstra no na un, pero na dos ganadó, bo a pèrdè pa definishon. Ademas nos tin gana di sa ta ken ta bai paga e gastu èkstra aki!
*********
Nos a haña straño ku awe a kuminsá un konferensha ku embahadornan di nos área i ku Maxime Verhagen no a bin. A anunsiá ku masha fanfare aña pasá ku minister Verhagen (e minister di Relashonnan Eksterior di Reino) mes lo ta presente. E kaso ta demostrá un biaha mas, ku Ulanda no ta masha interesá den nos kosnan. Probablemente Verhagen a haña un reunion di NATO mas importante! No wòri, nos mes ta sigui atendé nos problemanan, pero ora tin problema den nos área, no reklamá!

PARAMARIBO – Den un aksidente aéreo den e parti ost di Sürnam, por lo ménos 19 persona a muri, asina medionan di komunikashon a informá na Sürnam algu promé ku mèrdia. E avion tabata hasiendo un buelo di Paramaribo pa Benzdorp, kaminda e avion a haña problema na aterisahe. E avion ta di e kompania di Sürnam Blue Wing Airlines (BWA), un kompania di aviashon chikí, ku ta establesé na aeropuerto Zorg en Hoop na Paramaribo. E kompania ta eksistí for di 2002 i tin un flota di 10 avion chikí, tantu di pasahero komo di karga ku por aterisá na aeropuertonan ku un pista di aterisahe kòrtiku.
E kompania tabata riba un “black list” di Union Oropeo te na novèmber último.

WILLEMSTAD – E proseso di inventarisashon na Las Almas ta kasi kompleto, asina Gobièrnu di Kòrsou a informá awe. Dianan 20 i 22 di mart último gobièrnu a duna oportunidat pa habitantenan di Las Almas registrá e tereno i òf konstrukshon ilegal ku nan a okupá. Apesar di esaki Domeinbeheer i DROV no a yega na final di e inventarisashon, pasobra ainda falta algun bibienda ku no a registrá.
Pa e motibu aki, djabièrnè 4 di aprel próksimo, trahadónan di Domeinbeheer lo kana henter dia den e bario di Las Almas pa nan pasa kas pa kas i asina e habitante ta haña oportunidat di registrá. Un biaha mas ta ripití, ku registrashon no ta nifiká ku outomátikamente e okupashon i konstrukshon ta bira legal, pero si e ta yuda duna un bista amplio riba e situashon di Las Almas.
P’esei un apelashon ta bai na tur habitante ku ainda no a registrá, pa tene kuenta ku trahadónan di Domeinbeheer lo aserká esnan ku no a bin registrá ainda djabièrnè dia 4 di aprel. Pues, sòru pa un hende ta presente na e bibienda ku e dokumentunan konserní.
Si akaso no haña niun hende na e bibienda, lo laga un karta i e habitante por akudí por último djaluna dia 7 di aprel durante oranan di ofisina na ofisina di Domeinbeheer na Klipstraat den Otrobanda. Gobièrnu ta fasilitá e habitantenan di Las Almas ku e delaster oportunidat aki, pues hasi uso di dje.

WILLEMSTAD – Awe mainta a disidí ku sindikatonan ku ta preshonando Gobièrnu di Aruba por drenta den akshon, basta esei no ta afektá servisionan básiko importante pa e isla. Den e kaso aki wes a traha un tipo di skèdjel bou di kua kondishon diferente di e sindikatonan di e Plataforma Sindikal di Aruba por tene nan akshon. Den algun kaso nan mester duna anunsio di nan akshon algun ora promé i den fin di siman hasta ku mas antisipashon.
Den sierto sentido por bisa, ku wes no tabata ni karni ni piská den e kaso aki, pero despues di algun siman di akshon sin konklushon, e ta haña ku e mester sali na defensa di komunidat, prinsipalmente pa motibu di servisionan básiko ku ta masha importante pa un sosiedat, manera polis i brantwer.
No tabata masha kla mesora ki reperkushon e anunsio lo tin, ounke ku anteriormente ya kaba e sindikatonan a informá ku nan lo sigui den akshon. E sindikatonan den sektor públiko ta hibando un lucha di algun siman pa preshoná Gobièrnu di Aruba pa ahustá nan salario na oumento di kosto di bida. Gobièrnu di Aruba a ninga di kumpli te awor, indikando ku un ahuste lo nifiká gastunan adishonal haltu pa presupuesto di Aruba di den kareda di 150 mion florin. Nos tin mas detaye den nos sekshon di Aruba di awe.