RIO DE JANEIRO, Brazil, - Epidemia di dengue a afektá 57.000 i a kousa 67 morto na e Estado brasileño di Rio de Janeiro kompletu pa loke ta trata aña 2008, Sekretaría di Salú estatal a informá den último balans riba e enfermedat provoká pa piká di muskita.
Servisionan sanitario ta alertá poblashon pa mantené nan mes leu for di muskitanan ku ta kousa dengue.
E anunsio a konfirmá 13 morto mas for di e último relato di Sekretaría di Salú di Rio emití 26 di mart último, sin embargo no a registrá mas morto pa dengue for di djaluna último.
Ta investigando otro 58 morto pa determiná si nan a keda provoká pa e enfermedat.
Situashon di Rio de Janeiro ta sobresaliente.
Kantidat di kaso di Rio de Janeiro ta kasi tres bia superior di e kasonan registrá aña pasá den e mesun periodo.
E siudat di Rio de Janeiro, kapital di e estado, tabata e siudat ku a registrá mas kaso (36.647), siguí pa munisipionan di Angra dos Reis (3.711), Nova Iguazú (3.643), Campos (2.505), Duque de Caxias (1.405) i Sao Joao de Meriti (1.396).
Kantidat di morto konfirmá na e kapital tambe tabata mayó 44, kontra 23 den interior.
E 67 mortonan konfirmá, 21 tabata pa dengue di tipo “hemorrágico”.
Entre e víktimanan fatal tin 32 menor di 13 aña.
E enfermedat ta konsentrá n’e barionan mas pober, kaminda e habitantenan komo kustumber sa akumulá awa potabel.

CARACAS, Venezuela, - Presidente di Venezuela, Hugo Chávez, ayera a deklará ku su pais ta boga pa unidat na Bolivia i “rèspèt pa Gobièrnu legalmente konstituí pa su kolega Evo Morales, i a kompará e situashon ku esun di Kosovo, Agencia Bolivariana de Noticias a informá.
“E operashon ku ta na marcha na Bolivia ta hopi paresido ku operashon di Kosovo, kier men, parti Bolivia na pida-pida”, e mandatario venezolano a sigurá.
“Nos ta hasi yamada na komunidat internashonal i nos ta boga pa unidat di Bolivia i rèspèt pa Gobièrnu konstituí pa Evo Morales”, Chávez a ratifiká.
E Presidente venezolano a indiká ku el a kòmbersá ku Morales i ku mandatario di Brazil, Luiz Inácio Lula da Silva, i mandatario di Argentina, Cristina Fernández de Kirchner, riba e situashon na Bolivia.
Oposishon boliviano ta sigui ku nan pretenshonnan pa realisá referèndemnan separatista, desoutorisá pa Kongreso i Korte Nashonal Elektoral (CNE).
E departamentonan opositor ku ta promové separatismo ta Beni, Santa Cruz, Pando i Tarija, konosí komo medio luna.

Hugo Chavez 0404

Presidente di Venezuela, Hugo Chávez: “Nos ta boga pa unidat di Bolivia i rèspèt pa Gobièrnu konstituí pa Evo Morales”.

WILLEMSTAD - Durante e wikènt di 4 pa 6 di aprel benidero apròksimadamente 120 piskadó deportivo lo partisipá na e LUHRS 42nd Annual International Blue Marlin Release Tournament organisá pa Curaçao Yacht Club i patrosiná pa LUHRS. E torneo ta lokalmente pero sigur tambe internashonalmente bon konosí anto hopi popular den mundu di piskería deportivo. Despues di e torneo di Puerto Rico e ta esun di mas bieu den region.
Piska riba e Blue Marlin of simplemente yamá BLUE òf Balaú, ta hopi mas ku solamente suerte. Piskadónan kontinuamente ta buska téknika i métodonan nobo pa ta mas sabí ku e Blue. Kada detaye ta importantísimo i ta kos chikitu ta hasi e diferensha ku finalmente ta logra barka e piská si òf no. Pues mester prepará debidamente.
Release Tournament
Peska lo ta di e sistema di ‘Tag & Release’. Esei kier men, ku tur piská kapturá bou di 300 lbs mester wòrdu released. Kier men 'los laga bai'! (E yate mester di saka un pòtrèt pa konfirmá ku nan a laga un Balaú bai.) Esaki pa e motibu ku asina ta laga e bestianan den libertat i no ta menasá nan eksistensia. Bou di e peso aki nan por reprodusí ainda, loke ta pone ku kada unu ku ta ser matá kier men un chèns mas chikitu pa nan reprodusí. E deporte di peska ta otro for di e peska profeshonal. Ta pa evitá ku e piskánan ta wòrdu matá sin ku tin nodi, ta piska mundialmente - pues na Kòrsou tambe - segun sierto reglanan ku ta kuadra ku reglanan internashonal di preservashon di piskánan.

LONDEN – E ekipo ulandes PSV a saka un resultado pa su wega na kas kontra e ekipo Fiorentina, empatando 1-1 na Italia. Pero e ekipo a haña un sla inesperá ku leshon di su kiper Gomes. Ta bin aserka ku e hungadó peruano Jefferson Farfán lo keinta banki e próksimo wega pa akumulashon di karchi hel.
Den otro weganan Cosmin Contra a anotá na di 90 minüt i Getafe di Spaña a logra un meritorio empate di 1-1 kontra Bayern Munchen den e promé partido di kuarto di final pa Kopa UEFA. Fiorentina a empatá 1-1 na kas ku PSV Eindhoven, Zenit di Sint Petersburg a goliá Bayer Leverkusen 4-1 na kas, miéntras ku Sportin Lisboa a empatá sin gol ku Glasgow Rangers den e etapa di 8 mihó ekiponan ku ta na bida ainda den e torneo. E próksimo enkuentronan lo tuma lugá dia10 di aprel awor na Madrid, Eindhoven, Sint Petersburg i Lisboa.
E gol di e rumano Contra na momentu ku ya kaba e wega tabata agonisando a hasi hustisia den markadó di e partido komo ku e klup chikí spañó a dominá Bayern Munchen, e ekipo mas poderoso di Alemania i un gigante na Oropa. Contra a rematá ku un bala suave despues di un seri di robete i rechaso den e área defendé pa e kiper aleman Oliver Khan. E brasileño Lucio i e argentino Martín Demichelis a trata den forma enbano pa detené e bala den su trayektoria pa gol. E italiano Luca Toni a habri e markadó pa Bayern na di 26 minüt di wega, na momentu ku el a kabesá un tiru di skina di Bastian Schweinsteiger. E italiano ta e máksimo goliadó di Kopa UEFA ku 8 gol, e mesun tantu ku e delantero di Zenit Pavel Pogrebnyak tin na e momentunan aki.

LONDEN – E hungadó argentino di Liverpool, Javier Mascherano a haña un suspenshon di dos partido adishonal pa motibu di su reakshon kontra un rèfri ku a ekspuls’é for di un partido kontra Manchester United.
E rèfri Steve Bennett a ekspulsá Mascherano for di wega dia 23 di mart último despues ku e hungadó a kuminsá un pustamentu di boka kuné, pa motibu di un amonestashon ku su kompañero Fernando Torres a hanja. E volante ku na momentu ei ya kaba tabatin karchi hel a haña un karchi mas i mester a bandoná e partido. Mascherano a baha tereno ku masha protesta i na final e direktor tékniko spañó Rafa Benitez mester a sak’é for di tereno i kalm’é.
E Asosashon di Futbòl ingles a bisa ayera ku Mascherano a atmití ku e no a aktua korektamente. El a haña un but di 29.700 dollar i un suspenshon di dos partido.
Mascherano ya kaba a kumpli ku e suspenshon di un partido pa e karchi kòrá, pero a hunga djarason den e enkuentro ku Liverpool a empatá 1-1 ku Arsenal den Champions League. Awor e lo pèrdè e partido di djasabra awor kontra e mesun Arsenal pa Premier League i e partido di dia 13 di aprel kontra Blackburn. Sinembargo e lo por hunga e partido di buèlta kontra Arsenal otro siman den Champions League.

ASUNCION – E Konfederashon Sud-Amerikano di Futbòl a ripití su desishon ayera ku e lo no prohibí partidonan di su torneonan na nivel di klup den suidatnan ku ta hopi haltu riba nivel di laman. “ E komité ehekutivo a reuní i a disidí unánimamente ku Copa Libertadores lo hunga normalmente na La Paz, Quito i Cusco di akuerdo ku reglamentunan vigente i aprobá anteriormente”, asina presidente di Conmebol Nicolás Leoz a bisa den un konferensha di prensa.
FIFA a prohibí disputa di partidonan pa e eliminatorionan mundialista den e suidatnan ku ta mas haltu ku 2750 meter riba nivel di laman, a ménos ku tin periodonan di aklamatisashon. FIFA a rekomendá Conmebol pa hasi mesun kos pa su kampionatonan regional, pero e organismo di futbòl sud-amerikano a rechasá e rekomendashon. “Conmebol ta soberano komo ku e ta un organisashon regional”, asina e paraguayo Leoz a bisa. El a atvertí, ku si den Copa Libertadores kualke ekipo ninga pa kumpli ku nan kompromiso den kualke di e suidatnan ku ta riba 2750 meter riba nivel di laman nan pèrdè punto. Ademas lo imponé un multa i nan lo keda pafó di e torneo pa e próksimo 3 añanan.
Leoz a bisa ku e presidentenan di e asosashonnan di Argentina, Paraguay, Bolivia, Chile, Ecuador, Colombia, Venezuela, Perú i Uruguay a firma un nota pidiendo Conmebol pa eksigí di FIFA ku ta eliminá e prohibishon pa weganan eliminatorio na La Paz (Bolivia) ku ta keda 3600 meter riba nivel di laman i Quito na Ecuador ku ta riba 2820 meter.

WILLEMSTAD - Kòrsou a haña dos representashon den e direktiva di e organisashon nobo ‘Confederación Sindical de Trabajadores de las Americas’. Ta trata di Alcides Cova i Roland ‘Nacho’ Ignacio. Durante di un kongreso grandi ku a tuma lugá na Panamá, algun dia pasá, e dos sentralnan regional, ku ta CLAT i ORIT a wòrdu disolvé. Na su lugá a lanta e konfederashon sindikal nobo ku ta kubri e área kompleto di Amérika te Canada i Argentina.
Kòrsou tabata presente na e kongreso ku un delegashon relativamente grandi. Humphrey Mongen kende tabata miembro di direktiva dje loke ántes tabata CLAT, tambe tabata presente na Panamá. El a bisa LA PRENSA ku na Panamá, tabatin algun reunion hopi importante.
‘A reuní ku representante di tur e área di Karibe, ku ta algu ku no sa sosodé hopi’. Mongen a bisa ku tambe, ta ku satisfakshon, Kòrsou a postulá i logra koloká Alcides Cova i Roland Ignacio den e direktiva grandi di e organisashon nobo.
Mongen: ’Ta algu èkstra ordinario, pasobra a trata di un asistensia di mas ku 800 hende na e kongreso’. I tòg a bira posibel, pa no opstante tur e representantenan di Karibe, inkluí dos hende di Kòrsou den e direktiva, apesar ku nan a bai komo suplente. Ta p’esei e delegashon di Kòrsou, ta konsiderá esaki komo un logro hopi grandi.
Alcides Cova i Roland ‘Nacho’ Ignacio, den e direktiva di ‘Confederación Sindical de Trabajadores de las Americas’, lo traha pa e área di Karibe. Sinembargo, komo yu di Kòrsou por spera ku e dos personanan aki lo representá Kòrsou tambe, Mongen a remarká. Entre otro Kòrsou lo haña atenshon den kuadro di e puntonan di mas importante ku a keda tratá den e kongreso na Panamá, ku entre otro e propósito pa ataká pobresa i duna mas training i edukashon na e miembronan di e sentral nobo.
Pa loke ta trata Humphrey Mongen, el a bira miembro di direktiva den dos fundashon ku e organisashon e konfederashon nobo a lanta, ku Fundashon UTAL i ILACDE. E dos fundashonnan aki lo ta enkargá ku e kordinashon di enseñansa, training i yudansa pa e sindikatonan ku ta den e Koperashon.

Ounke ku Loteria Nashonal ta satisfecho ku e proseso:

WILLEMSTAD - Ounke ku e introdukshon di outomatisashon ainda no a resultá den e oumento deseá di benta di bièchi, Loteria Nashonal ta satisfecho kón e proseso ta desaroyá.
“Pero Landsloterij ta trahando duru pa logra e meta ei”, Asina direktor di Loteria Nashonal, Humphrey Genaro, a splika.
Introdukshon di outomatisashon ku a wòrdu introdusí algun tempu pasá ta fasilitá e trabou di Loteria Nashonal. “Nos por yuda nos klientenan mas mihó”. Entre otro ta posibel pa bestèl i pasa tuma bièchi i pèrdè ménos tempu na bali. Pero, asina, e direktor di Loteria Nashonal a enfatisá, mester tene kuenta ku tur sistema outomatisá por tin problema ku mester tene kuenta kuné. Por trata di por ehèmpel, asuntunan di koriente i liña di telefòn.
Genaro: “Mi no ta ninga ku aki i aya nos tin kosnan ku ta bai ménos bon. Òf ku tin sierto momentu ku ainda mester warda hopi”.
Segun Genaro ta trata aki di asuntunan ku poko poko ta bai kambia, basta ku Loteria Nashonal por konta riba koperashon di e rebendedónan.
E direktor di Loteria Nashonal a indiká ku ya kaba e rebendedónan ta koperá hopi bon, ku eksepshon di algun hende ku mester sigui splika, dikón na sierto momentu e servisio a laga di deseá.
Den kuadro pa mehorá e servisio na komunidat, Loteria Nashonal tin intenshon tambe pa ta alkansabel na más lokalidat. Esaki ta algu ku e outomatisashon ta hasi posibel tambe. “Probablemente esei lo bira un lokalidat den Punda. Di e manera ei nos ta purba di yega más efisientemente serka di e rebendedó i kumpradónan di bièchi ku e servisionan di Loteria Nashonal”.

BOGOTA, Colombia, - Súplikanan di Fransia n’e mayó gueria di Colombia pa entrega inmediato di eks kandidata presidensial Ingrid Betancourt, kende ta gravemente malu, a keda den limbo, despues ku e Hefe rebelde a atvertí ku solamente e dama polítiko por sali liber si tin un akuerdo polítiko.
Anunsio di Hefe di “Fuerzas Armadas Revolucionarias de Colombia” (FARC), Rodrigo Granda, a tuma lugá despues ku un avion ku mishon médiko organisá pa Fransia, ku ta buskando yega te na e selva i atendé e dama sekuestrá, a yega Bogotá den e promé fase di e operashon.
“Solamente komo konsekuensia di un interkambio di presunan, esnan sekuestrá den nos kampamentunan lo sali liber”, Granda a bisa, kende ta dirigente di FARC, ekskarselá pa Gobièrnu di Presidente Alvaro Uribe meimei di aña 2007.
“Lo no bai tin enkuentro Gobièrnu-gueria, por ehèmpel, sin eksistensia di un zona desmilitarisá”, Granda a bisa.
“No ta atmisibel pa pidi nos mas gesto di pas ora, despues di nos boluntat polítiko pa enkontrá salidanan p’e konflikto ta kontestá nos ku infamianan i malefisiensia”, Granda a afirmá den un artíkulo publiká den Agencia Bolivariana de Prensa, ku previamente sa publiká artíkulonan i komunikadonan di FARC.
Granda a referí n’e liberashonnan unilateral di seis rehen, entre nan eks kompañera di fórmula di Betancourt, Clara Rojas, gestonan ku tabata resultado di mediashon di Presidente di Venezuela Hugo Chávez i dama senador colombiano Piedad Córdoba.

ARIES: Solo ta briando den bo kas ku plaka, awor bo no por keha di loke ta faltabu òf di loke bo no tin. Plaka lo no hasibu falta por lo pronto. 25,01,19.

TAURO: Felisidat na tur esnan di signo Tauro. Ta un dia masha spesial pa bo, ya ku solo ta drenta den bo hogar i ta trese energia i splendor. 18,16,11.

GEMINI: Bo ta profundisá den lo mas íntimo di bo ser. Bo ta den un periodo di kambionan interno, masha importante na nivel spiritual. 20,04,41.

KANSER: Tur loke ta trabou en konhunto, ta eksaltá pa bo. Amigu, kompañero di trabou o estudio ta kompartí ku bo, uniendo forsa i esfuersonan. 05,10,32.

LEO: Bo ta den bo mihó momentu pa logra loke bo ta deseá den tur loke ta relashoná direktamente ku bo trabou o profeshon. 06,37,21.

VIRGO: Bo tin awor e suerte di bo parti pa bo por hasi bo aventuranan den e proyekto o plannan ku te awor bo a aplastá pa falta di inisiativa o pa miedu. 33,28,13.

LIBRA: Ta bai yega hopi kambionan importante den bo bida. Ya nada no ta manera ántes, ya ku tur kos por ekspandé, tantu na nivel personal komo profeshonal. 06,30,44.

SKORPIO: Den bo ta lanta e deseo di kompartí, buska pareha si es ku bo no tin. Bo ta hopi kreativo i bo ta gusta eksplorá tur e lokualnan ku ta yama atenshon. 09,49,31.

SAGITARIO: Bo vitalidat, bo forsa físiko ta oumentá tambe bou di influensia positivo. Bo ta kanalisá tur e energia praktikando algun deporte. 40,37,12.

WILLEMSTAD / ORANJESTAD / WASHINGTON - Abogadonan di Beth Twitty, mama di e damita merikano ku a disparsé misteriosamente riba suela di Aruba kasi tres aña pasá, a manda yama tur esnan ku tabata sospechoso òf ku tabatin di aber ku e kaso aki pa nan aparesé den Korte. Esaki, den kuadro di un kaso ku nan ta preparando pa eksigí daño perhuisio pa loke mama di Natalee Holloway a pasa ‘den.
E dos abogadonan ku ta kuido interes di Beth Twitty ta Bram Moskowicz i Rogier Schmidt. Nan ke kuminsá un kaso pa daño pèrhuisio pa e daño mental ku nan kliente a sufri, komo konsekuensia di e aktitut di Joran van der Sloot.
No a menshoná e montante konkretamente, pero reportadamente ta trata aki di un suma supstansial.
Natalee Holloway a disparsé misteriosamente dia 30 di mei 2005 na Aruba, despues ku el a bishitá e isla aki den kuadro di selebrashon di finalisashon di su estudio. E último hende ku supuestamente lo tabata den su kompania tabata Joran van der Sloot.
Joran van der Sloot sinembargo a keda deklará insistentemente ku e no sa nada di desaparishon di Holloway i ku el a bai laga e damita riba playa kaminda nan tabata.
Reportadamente Van der Sloot lo a mata òf a sòru pa kurpa sin bida di Natalee Holloway disparsé. Tabatin vershonnan insistente ku un amigu di dje ku tin un boto a yud’é pa benta e kurpa na laman ganchu.
No opstante un búskeda sin presedente den istoria di Aruba, kaminda Ulanda, Merka i otro paisnan a duna nan yudansa, no opstante ku a gasta miónes di plaka – últimamente ku un barku sonar spesial di investigashon merikano – no tabatin niun resultado. No a haña niun pista di e damita aki.

WILLEMSTAD/ AMSTERDAM - Rita Verdonk, eks minister di Integrashon den e gabinete Balkenende anterior i kende a hasi su mes kontroversial aki na Antia pa su forma radikal di atendé ku antianonan radiká na Ulanda, ayera a presentá su movementu polítiko “Trots op Nederland” ofisialmente. Anto manera por a spera, e no por a keda sin lansa krítika frontal atrobe riba Antia.
“Plaka pa desaroyo ku Ulanda ta pone disponibel pa Antia, ta simplemente plaka tirá afó. For di momentu ku a instituí Statüt, Ulanda a bin ta pone sèn den e bari sin bòm ku yama Antia. Awor ta basta,” ta loke Verdonk a bisa, kosechando basta aplouso pa su deklarashonnan.
Rita Verdonk, manera entretantu ta ampliamente konosí, a kibra ku su partido original VVD pa motibu di diferensha di opinion serio ku su frakshon den Tweede Kamer.
For di e momentu ei a bira konosí ku e lo lanta su mes movementu, ku despues a bira “Trots op Nederland”, TON.
Ayera, dilanti un públiko grandi, el a presentá e programa di akshon.
Verdonk por sierto a aparesé riba krùk ayera dilanti su simpatisantenan pa motibu di un aksidente ku a sosodé kuné algun dia pasá. Verdonk a slep kai den su kas na momentu ku e tabata labando paña. El a lastimá vários múskulo seriamente, di manera ku awor aki e no por para ni sinta pa un periodo demasiado largu. Pero ku òf sin krùk, mi pensamentunan a keda igual, ta loke Verdonk a bisa, kosechando hopi sosten di esnan presente.

WILLEMSTAD - Un reunion importante di Komishon Sentral pa prepará pa tene oudiensia pa asina prepará pa un trayekto ku mester finalisá den konstrukshon di un hospital nobo no por a sigui ayera, pa motibu di e palabra “:hearing” . Nos leinan no konosé e palabra aki i komo tal mester investigá kon ta bai atendé e asuntu aki.
Esei tabata resultado di un enkuentro di kasi un ora ayera mainta den Komishon Sentral di Konseho Insular. E reunion mester a sirbi pa pone e promé paso pa preparashon pa un hospital nobo.
Eugene Cleopa, miembro di frakshon di MAN den Konseho Insular ta hopi desapuntá pa e situashon aki.
Cleopa ta esun ku a tuma e inisiativa pa realisá e seshonnan di informashon aki, kolmo e promé paso den un proseso pa duna un kontribushon pa yega na realisashon di un hospital nobo pa Kòrsou.
Cleopa a splika ku e tin basta tempu kaba ta trahando riba e asuntu aki. E nesesidat pa un hospital nobo pa Kòrsou ta birando dia pa dia mas urgente.
E intenshon di e reunion di ayera tabata pa prepará e prosedura kon ta bai tende tur partido enbolbí den konstrukshon di un hospital nobo, pa asina haña un bon bista di nan pensamentu. O sea, ku e reunion di ayera tabata simplemente un promé paso pa prepará.
For di kuminsamentu e palabra “hearing” tabata un problema, komo ku e no ta aparesé den nos leinan. Pero Cleopa no por kaba di komprondé pakiko e mester bira un opstákulo. Na lugá di e palabra “hearing” por usa otro palabra tòg? El a puntra.

WILLEMSTAD - Oposishon a demostrá ku e ta nada mas ku hende kobarde. Na lugá di sinta den Konseho Insular, mustra ku nan no ta di akuerdo ku sierto kos, nan a skohe pa bai djòin un grupo di manifestante pafó di Konseho Insular. Esaki no por karga nos aprobashon, asina lider di frakshon di Partido Nashonal den Konseho Insular drs. Gimena van der Gen a reakshoná riba loke a sosodé e siman aki.
Partidonan polítiko di oposishon agrupá den Aliansa Patriótiko a skohe pa no bai e enkuentro ku sekretario di Estado, Ank Bijleveld pero pa tene un manifestashon di malkontentu dilanti Katedral di Pietermaai.
Nan no por a yega dilanti sala di Konseho Insular komo ku polis i SKS a pèrkurá pa sera i protehá Ansinghstraat.
E manifestashon a yega na su fin na momentu ku e manifestantenan a entregá un karta na representashon di Ulanda aki na Antia ku sede na Skalo.
Gimena van der Gen, a lamentá e desaroyo aki.
El a bisa, ku ta inaseptabel ku miembronan di Konseho Insular ta neglishá nan responsabilidat di e forma aki.
“Un miembro di Konseho Insular ta na promé lugá un representante di pueblo. E miembro ta ser paga pa e funshoná komo representante di pueblo. Komo tal, e mester asumí su responsabilidat i traha tambe pa komunidat. Ta inkorekto pa un hende ku ta haña pago, no ta traha pa e sèn aki,” segun Van der Gen.
Van der Gen a mustra, ku loke e miembronan en kuestion mester a hasi ta di laga nan simpatisantenan manifestá pafó, pero nan mes mester tabata paden, pa ekspresá nan malkontentu pa e forma ku kosnan a kana.

VENEZUELA, - Kantante Marc Anthony parse ta result’é difísil separá for di su famia maske ta pa algun ora, pasobra el a yega Venezuela den kompania di su esposa e tambe kantante, empresaria i aktris Jennifer López, i nan yunan ohochi resien nasí, Max i Emme.
Marc Antihony lo ofresé dos konsierto na Venezuela, awe 4 di aprel na Valencia, estado Carabobo i un otro mañan na Poliedro de Caracas.
Pa su aktuashon e intérprete a pidi un lista di 39 petishon, entre otro esun ku a destaká ta un suite presidensial na un hotèl di sinku strea, i 10 kamber adishonal riba e mesun piso, vários van ku glasnan skur pa trasladá nan, i disposishon di dòkternan den kaso di algun emergensia.
Relashoná ku e kumindanan, Marc Anthony a pidi pa tur menú mester keda konsultá ku su gerente di produkshon.

WILLEMSTAD – Miéntras ku na Kòrsou te awe no tabatin reakshon riba e zonado kaso di entrada sin base den kas di famia Claret, polis na Ulanda a demostrá kon si mester atendé un kaso asina aki.
Ayera polis na Apeldoorn a drenta den un kas robes i nan a detené un dama inosente. Mando di Polis a bisa, ku e tim a kiboká den porta di entrada di e kas (na Ulanda tur porta di kas por lo general parse mesun kos).
Segun e splikashon, e Tim di Aresto tabatin intenshon di detené un dama di 22 aña di edat ku huntu ku su amigu di 32 aña ta sospechá di ladronisia. Den e kaso di ladronisia aki a bai ku un arma di kandela i munishon. E Tim di Aresto a opservá e kas den kuadro di e investigashon. Na momentu ku un dama a sali for su kas a detené e dama, pero a bin resultá ku ta e bisiña. Despues numa polis a detené e duo sospechoso aki. Pa loke ta trata e dama inosente, polis a manda palabranan di diskulpa p’e i el a haña un bukèt di flor.
Den e kaso di famia Claret, te awe nan no a haña ni un diskulpa, te pa nan haña un bukèt di flor.
E kaso ketu bai no a haña un konklushon. Mando di Polis ta ketu, minister di hustisia ta ketu, Hefe Lokal di Polis ta ketu i awor Ministerio Públiko ta ketu, no opstante ku a entregá un keho ofisial for di dos siman pasá. Famia Claret ta insistí pa haña un klaridat den e kaso aki, ounke esei no a tuma lugá te awe. Kiko ta e problema ku riba un simpel kaso no por duna un klaridat ta un misterio.

WILLEMSTAD – Oposishon ta disgustá pa e hecho, ku Gobièrnu di Kòrsou a kore organisá un reunion pa duna sekretario di Estado Ank Bijleveld tur informashon riba Refineria Isla, pero oposishon mes ku tin algun siman ta pidi pa haña informashon, no a haña oido te awe. Sra. Bijleveld ta bou di preshon enorme di Tweede Kamer pa hasi algu na e situashon di polushon di Refineria Isla.
Konsiderando e desaroyonan aki, e partidonan MAN, Niun Paso Atras, Forsa Kòrsou, Pueblo Soberano i Partido Democraat a pidi un reunion públiko awe riba e tema aki.
Den nan petishon na presidente di Konseho Insular, e partidonan ta bisa ku desaroyonan rondó di maneho general, benta i mantenshon di Refineria di Kòrsou ta al órden di dia den medionan di komunikashon. Algun di nan ta:
• Komishonnan pa hiba kòmbersashonnan ku PDVSA ta keda eliminá, otronan ta keda instalá, sin ta duna rason pa esakinan.
• Miembronan eksperto ta keda retirá i otronan inkorporá, tambe sin duna rason di esakinan.
• Diputado ta duna di konosé, ku presidente komisario ta hasi biahe pa Venezuela pa hiba kombersashon i no ta pone na altura promé ku e biahe di kontenido di e kòmbersashonnan aki.
• Ta menshoná nòmber di diferente kompania ku ke partisipá komo partner stratégiko, kaminda tin diferente indikashonnan di konflikto di interes entre esakinan i esnan ku ta hibando kòmbersashonnan i/òf konsehá Refineria di Kòrsou i/òf Bestuurscollege i Gobièrnu Sentral.

WILLEMSTAD – Den un reunion di evaluashon ayera, Aliansa Patriótiko a trèk orea di lider di DP Norbert George. Manera LA PRENSA a informá e siman aki, George tabata e gran ousente durante entrega di e karta di oposishon pa protestá kontra e desaroyonan estatal. E lidernan di e plataforma di oposishon a kana bai Representashon Ulandes na Kòrsou, pero George no tabata presente. Aparentemente algun lider di e Aliansa no a gusta e aktitut aki i nan a pone George dilanti di e eskoho ku sea e ta den òf e no ta den. “E no por ta karni òf piská pareu. E mester disidí, si e ta sea karni òf piská”, asina un miembro di e Aliansa a bisa awe mainta. Por sierto ku e miembro a bisa, ku no a trata e eksesonan ku tabatin e siman aki durante bishita di sekretario di Estado Ank Bijleveld na Konseho Insular. Un individuo a trata di agredí señora Bijleveld, yam’é p....a i tambe a koba su mama. Otro aktivistanan tambe a papia palabra insolente den direkshon di e mandatario ulandes. “Nos no a tende nada. Por ta nos tabata demasiado leu”, asina e miembro aki a bisa. LA PRENSA si a tende tur kos komo un di e poko medionan ku tabata presente na momentu di e insidente aki.

WILLEMSTAD - E kompania Canada Post International a transferí un suma di 13 mion florin ayera pa Gobièrnu di Antia komo parti di un akuerdo pa terminashon di e kontrakt di hür di 30 aña ku e kompania kanades a terminá despues di apénas 5 aña.
Promé minister Emily de Jongh-Elhage a pone su firma bou di e dokumentunan final pa terminá e relashon kontraktual di Gobièrnu di Antia ku Canada Post International Ltd (CPIL).
Despues di lunanan di negosiashonnan, e partidonan a yega na un akuerdo pa terminá e relashon. E akuerdo ta enserá ku CPIL ta pasa di un banda tur akshon di Post N.V. Nobo pa Gobièrnu di Antia. Di otro banda CPIL a bai di akuerdo pa paga un suma di 13 mion florin pa terminashon di e kontrakt. A base di e transakshon aki Gobièrnu di Antia a bolbe bira doño kompleto di Post na Antia. Gobièrnu di Antia a bisa ku mesora despues ku a firma e dokumentunan CPIL a pasa e suma di 13 mion florin pa Gobièrnu di Antia. Ku esei tambe a kontradesí informashonnan ku tabata sirkulá ku ainda mester bai negoshá un gran kantidat di punto pendiente. Ku e loke a firma awor aki a pone un fin definitivo na loke mester a bira un ehèmpel klásiko di un bunita proseso di privatisashon na Antia. Yegada di Canada Post sinembargo a resultá den resultadonan miksto. Tabatin bon momentunan pa Post N.V. pero tambe momentunan ku no ta tur hende tabata di akuerdo ku e desaroyonan na e kompania. Tabatin diferente akshon por ehèmpel den kua a denunsia no solamente supuesto arogansia di gerensia kanades di e kompania pero tambe e benefisionan ekstraordinario ku nan a haña. Anke ku terminashon di e akuerdo ku Canada Post ta un desapunto, Gobièrnu di Antia ta satisfecho ku e dil ku a sera bilateralmente sin ku tabata nesesario pa akudí na arbitrahe ku lo tabata largu i kostoso.

A-Port proponé komo kandidato pa keda aprobá

WILLEMSTAD – Den e deliberashonnan pa haña un partner nobo, Alterra Partners a presentá A-Port komo potensial kandidato pa kumpra e akshonnan di Curaçao Aiport Partners (CAP). No a konsiderá kandidatura di Schiphol ku den pasado ya kaba a demostrá interes pero un biaha mas a laga e konsorsio ulandes for di e promé eskoho. Schiphol ta aktivo kaba na e aeropuertonan di Aruba i Boneiru i a mustra hopi interes pa aeropuerto di Kòrsou. Aparentemente un di e konsiderashonnan ta ku aeropuerto di Kòrsou kier keda kompetivo den nos region, inkluyendo ku esun di Aruba.
LA PRENSA tin entendí ku e último palabra pa loke ta trata e desishon pa no konsiderá Schiphol no ta bisá ainda. Aparentemente tin un koriente polítiko, entre otro den PAR, ku ta bisa ku si ta papiando di un reino ulandes di kon no duna preferensia na un konsorsio den reino ulandes.
Alterra Partners sinembargo a presentá A-Port komo prospekto pa kumpra e akshonnan di Curaçao Airport Partners (CAP). Den un komunikado Curaçao Airport Holding ta bisa ku den último dianan e promé deliberashonnan a tuma lugá entre gerensia di Curaçao Airport Holding (CAH), Alterra Partners i A-Port. Di gran importansia ta ku e business plan di e grupo interesá ta koinsidí ku e vishon di término largu di Holding i Teritorio Insular pa aeropuerto Hato di Kòrsou, asina e komunikado ta bisa.