O’STAD - Diabetis ta cambia bo bida. Bo mester siña con pa laga diabetis forma parti di bo bida diario. Cu e curso, Wit Gele Kruis kier duna bo persona informacion y ‘tips’ pa asina maneha e malesa aki na un manera saludabel y responsabel !
E curso ta consisti di 4 anochinan cu diferente topico y oradornan: docter di cas (kico ta diabetis y con e ta wordo trata); dietista (cuminda saludabel); dentista (cuido di diente); pedicure (cuido di e pianan)y un cardiologo(diabetis y bo corazon).
E curso ta pa hende cu tin diabetis (y nan famia !). Bo ta bonbini si diabetis a wordo descubri recien, pero tambe ora cu bo tin diabetis caba hopi tempo y bo kier mas informacion. Na April e curso ta tuma lugar na Centro Kibrahacha y ta cuminsa 16 di April. Pa mas informacion y pa inscribi por yama Wit Gele Kruis na 5824444.

ORANJESTAD- Minister drs. Marisol Lopez-Tromp a haya bishita di cuantro studiante di IPA. E studiantenan a bini cerca Minister drs. Marisol Lopez-Tromp pa haci un entrevista pa un proyecto di scol. Tanto Minister drs. Marisol Lopez-Tromp como e studiantenan tabata tin e oportunidad pa intercambia opinion riba diferente asunto cu ta toca nan interes, manera situacion di enseñansa na Aruba y proyectonan di scol.
Minister drs. Marisol Lopez-Tromp ta desea e studiantenan aki hopi exito cu nan proyecto y tambe cu nan estudio na IPA. Pues Aruba tin un necesidad grandi pa maestronan cu ta dedica na e estudio cu pasion. Minister drs. Marisol Lopez-Tromp ta convenci cu un di e factornan mas importante pa garantisa exito pa un studiante ta un maestro cu ta haci su trabao cu pasion.

Asesinato cruel a ser cometi ayera nochi na Macuaria, Santa Cruz 

ORANJESTAD- Henter comunidad a keda conmovi ayera nochi, ora cu noticia a drenta primeramente, cu tres hende lo a muri den un candela di cas na Santa Cruz.
Sinembargo na e sitio e berdad a resulta di ta completamente otro na e cas situa na Macuarima 27-B na Santa Cruz, ora cu a bin Sali na cla cu ta un caso di asesinato a tuma lugar caminda a mata tres miembro di famia Lampe.
Na e sitio di crimen, La Prensa Aruba a wordo informa cu e tres victimanan tabata e conocido sr Juan Lampe, kende ta traha na Banco di Caribe y mihor conoci como Colai of Juancho di 60 anja, su esposa Aura Lampe-Geerman di 57 anja y nan jiu homber Edvard Lampe di 30 anja, kende ta masha conoci como locutor di Radio TOP FM di Santa Cruz.
Tur tres a ser haya morto riba vloer den un di e cambernan di e cas, cu herida y slanan fuerte na cabez mientras cu riba nan curpa, polisnan a bin haya carbon cu ta ser usa pa bbq, mientras cu nan curpa y den e camber tabata hole liquido pa sende bbq.
Pues tur cos tabata indica cu e autornan di e crimen horendo aki, lo a trata di sende e restonan mortal na candela, caminda un di e curpanan ya caba tabata mustra quemadura parcial.
Na e sitio di crimen tabata presente e otro jiu homber di e famia, esta Eugene Lampe, kende ta un conoci di polis y tame conoci di ta un drogadicto, y kende aparentemente mesora a avisa autoridadnan, cu ta su persona a comete e acto cruel aki cu su famia.
GRAN INTERES
Mesora cu e noticia bira conoci, centenares di curioso a tuma rumbo pa e adres menciona, tratando di confirma si e horendo noticia aki tabata berdad of no, y a bin resulta cu enberdad Aruba a sera conoci c’un caso conoci como multiple asesinato.

ORANJESTAD- Desde prome di April bo por cumpra bo ticket pa bay mira pelicula na the cinemas sea na Paseo Herencia of na Renaissance Mall awor na mashinnan di Celltar cu ta intala den diferente establecimento tur rond di nos isla.
Manera trafico a bira mas congestiona y bo ta tarda mas pa yega tur caminda, technologia ta duna un man na haci bida di tur hende mas facil. Celltar ta conoci pa benta automatisa di carchinan di telefoon prepaga pero awor ta introduci tambe e sistema nobo aki di cumpra bo carchi pa The Cinemas mas cerca unda cu bo bo por ta.
Celltar tin mashinnan instala na : Valero Essoville, Valero Blvd, Valero Santa Cruz, Valero Palmbeach, Setar Palm Beach, Setar Airport, Hospital Deli, Bright Bakery Noord , Hong Kong Supercenter, El Fogon, Prikichi Food Center, Johnson Supermarket na San Nicolas, Fusion Deli, 24 store den Havenstraat , RITZ, Welcome Snack , Bus Stop Oranjestad y den diferente hotelnan di nos isla tambe.
Den hotelnan trahadornan por haci uso di e mashinnan pa compra di nan carchi di telefoon rapido pero tambe awor pa nan ticket pa bay mira nan pelicula preferi.
Cu e servicio nobo aki no tin mester di core duro y pura pa yega na tempo promer cu carchi caba of para den rij.
Bo por djies pasa nan un di e establecimientonan menciona y cumpra bo ticket, core bo auto trankiel y cana pasa drenta paden pa mira bo pelicula.

SAN DIEGO – Hiroki Kuroda tabata tin un debut briante ayera nochi, ora ku el a tira shete ining, permitiendo solamente tres koredó embasá pa duna Los Angeles Dodgers un viktoria di 7-1 riba San Diego Padres.
E tabata tin solamente tres konteo di tres bola i a tira 53 di su 77 lansamentunan pa strike.
“Hopi impreshonante. E no a parse di tabata nervioso at all”, asina mènedjer Joe Torre a bisa.
E úniko kareda ku el a permití tabata un homerun solitario di Brian Giles den di seis ining.
Otro resultadonan:
Brewers-Giants 13-4
Astros-Cubs 4-3
DBacks-Rockies 8-1
Phillies-Reds 8-4
Marlins-Pirates 5-4
Cards-Nationals 5-4
Mets-Braves posponé pa awaseru.
Liga Amerikana
WSox-Tigers 8-5
Orioles-Mariners 7-4
Rays-Yankees 13-4
BJays-RSox 6-3
Twins-Ryals 4-3
Rangers-Angels 11-6
Indians-A’s 6-3

WILLEMSTAD – Fundashon Era Nobo huntu ku Oranje Fonds en Kinderpostzegel a organisá un torneo di Bolas Criollas den bario di Penstraat, na Boka Simon.
E torneo aki ta pa trese e hóbennan den besindario di Penstraat, Nieuw Nederland, Monteverde i Koronet huntu.
E torneo aki tabata hopi tremendo
Hóbennan a gosa un mundu. E weganan tabata hopi tremendo.
Asina aki Fundashon Era Nobo ta funshoná den barionan di Kòrsou.
E meta ta pa trese e hóbennan huntu i hisa kalidat den bario nan di Kòrsou.
E resultadonan di e weganan tabata lo siguiente:
Hubenil:
Promé premio a bai pa Boca Boys, e di dos premio pa Plein Boys i e di tres premio pa Destiny Kids.
Femenino:
E promé premio Jolly Girls, e di dos premio a bai pa Union Stars i e di tres premio pa Sex Soldiers.
Maskulino:
E promé premio a bai pa Twister i e di dos premio pa Surprise Boys i e di tres premio pa L.A.

PITTSBURGH – E closer di Pittsburgh Pirates Matt Capps ayera a firma un kontrakt di dos aña pa 2.85 mion dòler ku ta kore te ku 2009 i ta kubri su promé aña di arbitrahe salarial.
Pirates i Capps a diskutí un kontrakt di mas aña durante di spring training, pero no por a yega na un akuerdo. Anteriormente Capps a risibí un salario di 435.500 dòler pa e temporada aki, pero e kontrakt aki ta kubri esun ei.
E ta haña 250.000 dòler pa firma, 500.000 dòler e aña aki i 2.3 mion dòler pa 2009.
Capps por gana 150.000 dòler den bono pa aktuashon pa 2009, kual ta 50.000 dòler si e terminá 50, 55 i 60 wega.
“E kontrakt aki ta duna Capps protekshon finansiero i ta permití Pirates evitá arbitrahe salarial e siguiente temporada”, asina e gerente general Neal Huntington a bisa.
Capps di 24 aña a salba 18 di e 20 oportunidatnan ku el a risibí despues ku el a bira e closer di Pirates dia 1 di yüni.
El a terminá temporada ku rekòrt di 4-7 ku un era di 2.28 den 76 partido.

TORONTO – E outfielder Alex Rios a finalisá un kontrakt di shete aña ku Toronto Blue Jays ku ta garantis’e 69.8 mion dòler i e segunda base Aaron Hill a haña un kontrakt di kuater aña pa 12 mion polar.
Toronto a anunsiá e akuerdonan promé ku e partido entre di Boston RSox i BJays ayera.
E gerente general J.P. Ricciardi a bisa ku ta importante pa tene e estreanan di e organisashon na e atmósfera familiar.
“Nos tin un bon grupo di hungadó aktualmente i den kamerin tambe”, asina Ricciardi a bisa.
Rios a evitá arbitrahe salarial dia 5 di febrüari último dor di yega na un akuerdo di un aña di 4.8 mion dòler ku ta inkluí un bono pa firma di 3.5 mion dòler ku a keda paga dia 1 di mart último i un salario di 1.3 mion dòler.
E dil nobo ta baha su salario pa e aña aki na 735.000 dòler, kaminda 600.000 dòler lo keda paga mas den futuro i ta garantisá 65 mion dòler na un kontrakt nobo.
Rios lo gana 5.9 mion dòler na 2009, 9.7 mion na 2010, 12 mion na 2011 i 2012, i 12.5 mion na 2013 i 2014. Toronto tin un opshon di 13.5 mion dòler pa 2015 i un “buyout” di 1 mion dòler.
E kontrakt di Rios ta e di dos mas karu den historia di Toronto tras di e dil di Vernon Wells di 126 mion dòler pa shete aña ku el a risibí na 2006.
“Ta great ku nos por a bini kla ku e kos aki. Te ainda mi no por kere e kos aki. Nunka mi no a kere ku lo mi gana tantu plaka asina” Rios a komentá.

MINNEAPOLIS – E manera ku Francisco Liriano a tira den su promé salida den Liga Menor no tabata loke Twins a spera di mira.
Pero e reportahe ku mènedjer Ron Gardenhire a haña di e picher tabata faborabel.
Liriano a tira 5-1/3 di ining, permití seis hit, kuater kareda limpi, regalá dos base por bola i a poncha ocho, tirando 82 lansamentu.
E eks gerente general di Twins, Terry Ryan tabata presente pa mira Liriano tira i a duna Gardenhire tur “breakdown” detayenan di e lansamentunan.
“Terry a bisa ku básikamente el a hasi e trabou. No tabata e kos di mas bunita. Pero su fastball tabata entre 91mph i 93mph. Su slider de bes en kuando tabata kibra bon. El a tira hopi change-up lokual ku e tabata trahando ariba. Pues el a pasa e tèst”, asina Ryan a bisa.
Despues di e salida aki Liriano a biaha pa Miami pa por ta huntu ku su kasa Johana, ku tin di duna lus. Segun dòkternan ayera e mester a duna lus.
Gardenire a bisa ku esaki lo por tabata un distraishon pa e picher.
E plan ta pa Liriano habri e wega di djamars na Norfolk, Pa., pa Rochester, sukursal AAA.
Despues di e salida ei Twins lo determiná si e ta kla pa Liga Grandi òf e tin di keda un par di dia mas.

WILLEMSTAD - Djasabra último e Point Series 2008 di Street Legal a sigui dilanti un bon públiko.
Pa e anochi aki a petishon di e koredornan di tantu Heavy Bracket komo motosaikel FAC a laba e pista i despues a trata e pista ku 50% traction compound i 50% methanol.
Tur esaki pa evitá spinmentu i slepmentu riba e pista ora e koredornan ta bai abou.
Den e “Challenge di Kaya” Rijunior Eugenio ku su BMW M3 a kore dos biaha lès di Farlon Raphael ku su Mazda RX-8.
Den kategoria di Outo di Kaya ta yen tabata e profesor Jursie Rodriguez ku a duna su alumno Julien Bonifasio un bon lès.
Kategoria di Street Bracket ku ta kore di 18.00 sekònde pa 13.00.
E resultado ta lo siguiente:
1] Jursie Rodriguez Toyota Starlet Dial In. 17.10 E.T. 17.118
MPH 67.74 R.T. .050
2] Julien “Andy” Bonifasio Toyota Starlet Dial In. 14.43 E.T. 14.455
MPH 61.58 R.T. .109
3] Johnny Dickens Toyota Starlet
Mihó Elapsed Time a bai pa Javier Augusta ku su Toyota Starlet turbo a kore E.T. 13.146 sekònde.
Mihó Miles Per Hour a bai pa Roy Huggins ku su Mazda RX-7 turbo ku un 106.59 mia pa ora.
Mihó Reaction Time na lus a bai pa Jayne Botman ku su Honda Integra ku .004.
Lidernan di e kampionato 2008: Jursie Rodriguez i Otmar Conradus ta empatá na promé lugá ku 210 punto. Na di tres lugá Johnny “Juni Mondi” Dickens ku 200 punto.
Den motosaikel ta tin vários koredor tantu veterano komo nobo ku a presentá pa e aña nobo. Den e klase aki ta Ulrich Malasia a hasi historia koriendo tantu den buèlta un komo buèlta dos ku reakshon perfekto na lus di .000. Roderick “Flaco” Trinidad kampion 2007 ta bèk na kabes.

Skina di Sorti, awe djasabra 5 di aprel di 2008, ta kuminsá ku deseá tur hende un bon dia. Segun siñansa, goberná ta nifiká mira dilanti. Konsekuentemente asina ku un gobièrnu ta kore tras di echo, ta reakshoná enbes di ta akshoná den kuadro di un plan, mester kalifiká e maneho ei den e parti di eskala denominá komo mediokre pa defisiente. Ku serka nos e maneho ta kai den e parti ei di e eskala no mester wòrdu atribuí na e kalidat òf intenshon di esnan di turno, pero na un kultura polítiko eratiko.
Ta masha difísil pa un aktor òf un grupito den e totalidat, kibra ku e kultura koriente, pasobra e “ruling majority” sea ta trèk bo bèk den e kuadro ku nan ta dikta (ambishon al final di kuenta ta tene e mayoria den liña) òf nan ta esforsá na hasi bo bida un invierno. Kambio den direkshon kultural no ta tuma lugá den forma pasífiko. E mester bai den forma drástiko pa medio di un revolushon (no nesesariamente unu akompañá ku violensia).
Surgimentu di respektivamente MAN i PAR mester wòrdu konsiderá komo revolushon. E kultura polítiko ku den inisio e respektivo organisashon polítikonan aki a presentá, tabata representá kambio supstansial den e direkshon ku práktika polítiko tabata tin. MAN Limpi den gobernashon i Ruime op de Boel, básikamente a pretendé e mesun kos. Implementashon di un kultura di gobernashon diferente.

WILLEMSTAD - E eksperto rekonosé mundialmente riba e tereno di pronóstiko di Orkan, William Gray di Colorado State University, a bisa ku e próksimo temporada lo ta mas drùk ku normal. Tur kos ta indiká ku e lo bai subi su pronóstiko pa temporada 2008 na 13 tormenta tropikal i shete orkan.
Segun Gray, e kondishonnan di laman mas friu okashoná pa La Niña den Pasífiko i temperaturanan mas haltu na superfisie di laman den Atlántiko ta kontribuyendo pa hasi e kondishonnan mas faborabel pa aktividat di orkan.
“Nos ta spera un temporada mas aktivo ku normalmente,” asina Gray a deklará. “E pregunta grandi ta si nos ta bai oumentá e sifra di lokual nos a pronostiká na desèmber. Nos lo por hasi esaki. En todo kaso nos lo no bai redusí e numbernan.”
Un temporada normal di orkan di seis luna ta produsí normalmente seis orkan i 10 tormenta tropikal. Na 2005 a generá un total rèkòrt di 15 orkan ku a inkluí entre otro Katrina i Rita i a okashoná biónes di dollar na daño i a mata alrededor di 1500 hende.
Temporada 2007 a produsí 14 tormenta tropikal di kual seis a haña forsa di orkan.
E ekipo di Colorado State University ta hasi nan pronóstikonan na vários okashon durante di aña. Na desèmber nan a pronostiká ku e temporada 2008 ku ta kuminsá 1 di yüni lo produsí 13 tormenta tropikal di kual shete lo bira orkan i tres lo ta di kategoria pisá ku bientunan di mas ku 178 kilometer pa ora.

 WILLEMSTAD - Fundashon Era Nobo den su afan pa sigui traha na bienestar di habitantenan di bario i sigui stimulá e desaroyo personal i profeshonal di e individuo ta brinda kursonan ku karakter formativo. For di ougùstùs 2007 te ku febrüari 2008 un kurso di kòmpiuter pa personanan ku ta traha pero no tin e konosementu di kòmpiuter a ser duná.
Durante e kurso aki alrededor di 60 persona a sigui e kurso ku tabata repartí den 5 modulo kual ta, MS Windows XP Basic, MS Word Basic i Intermediate, MS Excel Basic i Intermediate. Na final di kada modulo e kursistanan mester a pasa un eksamen. E kurso di kòmpiuter a ser duná den 3 área na Kòrsou, Banda Bou, Stadsdistrict i Rooi Santu. Reda Sosial a supsidiá e kurso aki i tabata na enkargo di diferente dosente profeshonal.
Djarason 2 aprel último, den un ambiente ameno na Skaloko, Fundashon Era Nobo a hasi entrega di sertifikado na e diferente kursistanan ku a partisipá na e kurso.
Fundashon Era Nobo lo sigui organisá i sostené tipo di aktividatnan asina’ki.
Fundashon Era Nobo ta wòrdu di spònser pa Samenwerkende Fondsen Nederlandse Antillen en Aruba; ku ta konsistí di Skan Fonds, Oranje Fonds i Stichting Kinderpostzegels.
Fundashon Era Nobo hisando kalidat di bida den barionan di Kòrsou.

WILLEMSTAD – “Fatum Pensioen & Bedrijven Dag” tabata kompletamente den esfera di e desaroyo di rekursonan humano (Human Capital) komo instrumento pa konstruí un bon struktura ekonómiko”, asina Steven Martina, gerente direktor di Fatum Caribbean, a bisa.
T’esei ta e faktor tantu importante den produkshon i produktividat. Sin un tim di empleado bon motivá kompanianan kasi no por funshoná ku éksito. Ta e hende ta sentral den e proseso i ta e hende ta esun ku lo hasi e diferensia, loke ta pone ku mester keda i sigui inbertí den hende. Invershonnan den sentido di training, edukashon, areglo di penshun lo tin efektonan sinergétiko. Ta ku invershonnan den rekurso humano lo por engrandesé e forsa di empleo pa asina influensiá ekonomia na un manera duradero. Invershon den hende ku benefisionan grandi pa tantu e individual komo e kompania lo sirbi interesnan general.
Naturalmente e tópiko di areglo di penshun ta sentral. Den e seminario tabatin hopi atenshon pa desaroyonan demográfiko engeneral pero spesífikamente tambe e kambionan i konsekuensianan pa penshun i tambe seguronan médiko den kaso ku no tuma akshon konkreto. Ekspertonan riba tereno di sistema di penshun a elaborá riba e materia i a sugerí direkshonnan pa un futuro sano pa loke ta trata penshun.
Lo no tabata kompleto si e struktura estatal nobo lo no wòrdu inkorporá den e tópikonan di e seminario di Fatum. E struktura estatal nobo pa e pais indudablemente tin konsekuensianan pa invershonistanan, tantu individual komo pa kompanianan. Den esfera di seguridat i ambiente di trabou faborabel tambe lo tin hopi posibilidat pa inbertí den e personal, pues den Human Capital. Mas aleu a dediká atenshon na e desaroyonan den e sektor di turismo ta mustra invershonnan kuantioso ku ta sumamente importante den e ekonomia. Mas invershon den e sektor aki kemen mas kamber, loke tin komo konsekuensia hopi mas kupo di trabou. Tantu hotèlnan individual komo e organisashon di CHATA tin ròl krusial den e sektor i den invershonnan riba tereno di Human Capital.

WILLEMSTAD – Djaweps Licores Maduro a hasi entrega di premio na e 10 ganadónan di kampana “Kanta Bingo ku Blinko” ku Dewars White Label i The Store pa e luna di mart. Tur e 10 ganadónan a risibí artíkulonan di kushina di e marka renombrá Cuisinart, opsekio di Mementos NV. Dos di e ganadónan (ku t-shirt di Dewars White Label) tambe a gana e oportunidat pa partisipá den e sorteo di Kanta Bingo ku Blinko na TeleCuracao.
Tur luna partisipando na e kampaña Kanta Bingo ku Blinko, huntu ku The Store i Dewar’s White Label bo tin e oportunidat pa gana diferente premionan masha atraktivo. Licores Maduro i Mementos ta felisitá e ganadónan.

BOGOTA, Colombia, - Miles di colombiano a manifestá ayera n’e pais pa libertat pa mas ku 2.800 persona sekuestrá, bou di lema: “Nos tur ta Ingrid Betancourt”, kende ta den poder di gueria di FARC ya pa seis aña.
Pòtrètnan, frasenan i kantikanan di misa p’e eks kandidata presidensial a hala atenshon di e protesta nobo durante kua e colombianonan a hasi yamada pa libertat di esnan sekuestrá en general.
“Salba Ingrid Betancourt!”, por a lesa riba un pankarta enorme instalá na fachada di alkaldia di Bogotá, ubiká na Plaza de Bolívar, kaminda ta’tin mas o ménos 5.000 persona, apesar di áwaseru, segun kalkulashon di polisnan.
Na mesun ora, otro míles di manifestante, di akuerdo ku e organisadónan, a rekoré vários karetera prinsipal di e kapital colombiano i ademas personanan a sali na bentananan gritando, i tabata zuai lensunan blanku pidiendo “libertat, libertat, libertat” pa Betancourt i sobrá rehennan.
Betancourt tambe tabata presente riba imágen di T-shirtnan, pankartanan, posternan, kartonnan.
Imágen di Ingrid ku su kabes abou i hopi flaku publiká fin di aña pasá komo último prueba di bida, a dominá e marchanan.
N’e marchanan a uni Gloria Polanco, Clara Rojas i Jorge Eduardo Gechem, tres di seis rehen di FARC, librá na kuminsamentu di e aña’ki pa un desishon unilateral di e rebeldenan komo gesto pa Presidente venezolano Hugo Chávez.

Prof. Lorito Trua Trua mihó konosí komo Lorito ku su boka no sa para, ta yama tur hende un felis djasabra. Lorito ta di skohe pa e kaso ku a tuma lugá na Aruba kaminda un hòmber a mata su tata, mama i ruman. Un kaso ku sigur a kousa konsternashon na Aruba i mester pone hopi hende na Aruba para ketu pa loke ta tumando lugá realmente den sosiedat di isla.
****
Lorito ku sa di kiko e ta papia a tuma nota kaba ku pa basta aña e isla ta skondiendo su problemanan sosial serio. Lorito a atvertí nan na diferente okashon pa tuma nota di loke ta pasando, entre otro ku e fenómeno di chòler. Pero manera semper mester warda kosnan mas serio pasa pa despues tuma medida. Awor nos a haña un ehèmpel ku baka a hoga na pos. Forsa na komunidat di e isla i forsa na e famianan pa karga ku e tragedia aki.
****
Papiando di baka ku ta hoga na pos, ketu bai nos no a tende nada mas kiko ta bai hasi ku e asuntu di preis di kuminda. Aparentemente ta warda e krísis dal nos mata pa ora tin poko sobrebibiente e ora ei numa kore bai wak kiko ta bai hasi. Ta mesun kos a pasa ku e asuntu di preis di energia. Nos a warda, warda, supsidiá, warda i awor nos ta na kareda. Remarkabel ta ku e miembro sindikal di e komishon ta bisando direpente ku no a bisa ku por wanta preis. Di tur manera ta e impreshon ei sindikalismo a krea si ku su ultimatum!
****
Ban wak si e siman ku ta bin ta bai tin moveshon pa loke ta trata e nesesidat pa atendé e asuntu di oumentu di preis mas pronto posibel. Kere nos ku e ta un bòm bou di nos desaroyo. Lorito kier bisa bon kla ku nos no ta eksagerá aki nan pero nos sa mira kosnan hopi adelantá. Warda e Lorito aki pa futuro i lo mira ku nos tabatin rason. Tuma nota ku na Haiti ya kaba a kuminsá bringamentu pa kuminda i hasta tin hende a muri!

ORANJESTAD / WILLEMSTAD – Aruba a lanta awe ku un di e krímennan mas kruel di su historia despues ku a resultá ku un hóben a mata su mama, tata i ruman. E kaso a kousa konsternashon riba e isla. E tata ta e konosido Juan Lampe ku ta traha na Banco di Caribe, miéntras ku e yu asesiná ta un lokutor na e konosido emisora di radio di Santa Cruz Top 95 FM. Segun e promé informashonnan, e hóben ku a mata su famia ta un drogadikto molestoso (chòler).
Outoridatnan tin e sospecho ku e asesinato a tuma lugá for di den oranan di mèrdia. Pero ta ayera nochi numa nan a bin tuma nota di e kaso na momentu ku huma a kuminsá sali for di e kas. P’esei den promé instansha tabatin e impreshon ku e hendenan a muri komo konsekuensia di e kandela pero esei no a resultá di ta e kaso. Un investigashon na e sitio a determiná ku e víktimanan a muri asesiná. A haña e víktimanan riba flur di e kambernan di e kas ku herida i slanan fuerte na kabes. Den e kas polis a haña tambe karbon pa hasi BBQ i tabata hole tambe e líkido ku ta usa pa sende BBQ. Esei, segun e investigadornan ta un indikashon, ku e sospechoso (nan) a trata di sende e víktimanan i e kas na kandela. Un di e kurpanan tabata duna indikashon di kemaduranan parsial.
Despues ku e notisia a plama ta masha hende a bai na e lugá kaminda e kaso a tuma lugá. Prinsipalmente e hechu ku tabata djabièrnè anochi a añadí na e kantidat di hende ku a aglomerá na e sitio.

Desaroyonan na Ulanda un menasa pa Kòrsou

WILLEMSTAD – Partido MAN a atvertí e siman aki ku e kresementu di partidonan (ultra) derechista na Ulanda lo pone ku bida den reino lo no ta dòrná ku pas i amor. “Kòrsou mester ta prepará pa un periodo di opreshon i ofensa kontinuo”, asina e partido ta bisa relashoná ku e desaroyonan na Ulanda kaminda e partido nobo di Rita Verdonk “Trots op Nederland” a presentá e siman aki i tabatin palabranan krítiko den direkshon di Antia. Banda di esei tin e fenómeno Geert Wilders ku a ofendé musulmannan ku su pelíkula FITNA. Wilders, lider di e partido na kua Hero Brinkman tambe ta pertenesé, tambe ta hopi krítiko di e desaroyonan na Antia.
Enkuestanan na Ulanda ta indiká ku e partido nobo di Verdonk por konta ku por lo ménos 25 asiento si tabatin elekshon awe. Den algun sírkulo ta menshonando ku Verdonk lo por ta e próksimo promé minister di Ulanda. Por sierto e mes no ta rechasá e posibilidat. E próksimo elekshon general na Ulanda ta na 2010 pero semper ta keda e posibilidat di un krísis polítiko ku por antisipá elekshon.
Partido MAN ta bisa ku el a bini ta tumando nota di un intoleransia kresiente na Ulanda kontra stranheronan no Europeo. Bou di grupo ta kai tambe e mas di 100.000 antiano i yunan di Kòrsou na Ulanda ku segun un rapòrt di Union Europeo deliberadamente ta keda diskriminá na Ulanda den tur ámbito di bida, pa nan koló i desendensia no ulandes-europeo. E intoleransia aki ta ekspresá su mes den profilashon polítiko di forsanan derechista i konservador na Ulanda ku a lanta nan mes partido ku tendensianan fasista kamuflá ku a eksistí na Europa promé i durante di dos guera mundial. Ta trata aki di e partidonan P.V.V. di Geert Wilders i Hero Brinkman i Trots op Nederland di Rita Verdonk ku tin te hasta hopi chèns di forma parti di e siguiente Gobièrnu di Ulanda i ku esei di reino. “Mirando e hecho ku e profilamentu aki ta tuma lugá den partidonan di otro tendensianan tambe ta puru naividat di esnan ku ta kere i en partikular partido PAR, ku nos bida den reino lo ta dòrná ku pas i amor. Ta puru naividat di kere ku Ulanda lo brasa i stima nos. Mas real ta pa nos prepará pa un relashon entre e partnernan di Reino ku tin mes un karakterístika ku e manera ku ta trata Antianonan na Ulanda. Mas realístiko lo ta di prepará pa un relashon di opreshon i ofensa kontinuo. Mas realístiko lo ta pa prepará pa un periodo di lucha kontinuo ku Ulanda. E deklarashon final i e manera ku aktualmente Ulanda i no Kòrsou, ta yena e proseso di struktura estatal, ta forma un preludio pa loke nos por spera”, asina MAN ta bisa den su análisis.

Maltrato di mucha; Nan por informá instanshanan konserní:

WILLEMSTAD – Un tayer ku tabatin resientemente a duna maestronan informashon ku dil ku e señalnan ku ta indiká ku a maltratá un mucha. E fenómeno ta kresiendo mas i mas pero te awor aki maestronan no por a hasi anda ku e informashon, hasta si haña sierto indikashonnan. For di aña pasa, e maestro tin outoridat pa informá e instanshanan konserní. P’esei a tene resientemente un tayer ku e tema “Dunami Amor i no kousami Doló” ku a atendé e fenómeno di Maltrato di Mucha. E tayer tabata ouspisiá pa Direktiva di Skolnan Katóliko.
Maltrato di mucha ta un problema serio den nos komunidat ku te rekerí nos atenshon. Na promé lugá pa e seriedat di e problema pa e mucha. Maltrato di mucha ta stroba un desaroyo salú i ta kondusí na daño permanente . Banda di esei, e fenómeno aki ta eksigí atenshon permanente.
Lamentablemente e mucha ta eksponé demasiado na maltrato i abuso. Na skolnan bo por detektá ku maltrato(òf e sospecho ku tin maltrato) di mucha ta tuma lugá. E maestro ta pasa hopi tempu ku e mucha, e ta krea un relashon di konfiansa i asina por señalá ku lo por tin maltrato di e mucha. Den práktika ta resultá ku pa bo dil ku e señalnan akí no t’asina fásil i ta kousa inseguridat. E trabou di skol pa ku maltrato di mucha ta pa señalá i informá instansianan konserní. Pa motibu di e inseguridat tokante maltrato di mucha esaki no ta sosodé manera mester ta, pero ta masha importante.