Kiwanis Club of Aruba tabata tin como invitado sr. Rob Smith

O’STAD - Recientemente Kiwanis Club of Aruba tabatin e placer di por ta
tin sr. Rob Smith cu ta Director di AHATA. Sr. Smith a duna un splicacion amplio di nos sector turistico.
Aworaki nos competencia, pues otro islanan di Caribe ta gasta hopi mas placa den nan mercadeo, e unico otro isla cu ta gasta menos cu nos ta Antigua, pa hasi mercadeo. Nos tin cu cambia esaki. Pa por tin mihor producto den Caribe, pero si bo no promove e isla hende lo no bin. Si nos crea e fondo aki nos lo tin placa na nos desposicion pa por logra mihor dealnan, cu aworaki nos no por haci pa motibo cu semper nos ta paga laat cu ta pone bo ta paga mas caro pa tur cos, pues bo no ta saca lo maximo for di e tiki cen cu bo ta inverti, tin hopi caminda cu bo ta paga di mas.
Rob Smith ta pensa si turismo ta un pilar asina importante pa nos isla, nos mester hasi lo maximo pa garantisa cu ken cu por ta gobernante di nos pais den futuro, toch e mercadeo di nos isla keda garantisa.
Na Curacao ya caba tin un structura, na unda nan ta pone 50% di e suma di e room tax na Banco Central pa promocion di nan isla.
Kiwanis ta un organisashon global di voluntarionan dedica na cambia e mundo pa via di un mucha y un comunidad cada biaha y tin como lema: sirbiendo e muchanan di mundo. Kiwanis Club of Aruba ta activo den e comunidad Arubano desde 1965. Pa mas informashon di Kiwanis Club of Aruba y of su actividadnan por acudi na www.kiwanisaruba.org. Tambe por bishita e website di kiwanis Internacional na www.kiwanis.org.

O’STAD – Parlamento den un reunion di Dialuna mester a trata e asunto di reunión cu Sindicatonan den Accion. Esaki tabata un reunion cu e partido di oposición AVP a pidi. Sin embargo nan no a haya e partido MEP pa contribui pa Parlamento por tuma un posición y yega na un solucion mas rapido den e welga di empleadonan publico cu tin andando.
Lider di AVP Mike Eman a splica cu tin un carta fecha dia 25 di maart 2008, cu a drenta Parlamento, caminda e gremionan ta pidi atencion di Parlamento, pa cu e situación cu ta tumando lugar. Si t’asina cu ora tin negociacion entre Gobierno y un gremio, ta keda n’e dos partidonan ei pa yega na solucion, pero si no tin solucion, Parlamento mester por haci su trabou tambe.
E proposicion di AVP tabata, mirando cu den e negociacion, e situacion a tranca y mirando cu no tin un solucion na bista, AVP a pidi pa scucha cada fraccion den Parlamento, pa mira si Parlamento tin un rol pa hunga, sigur ora cu mira cu Parlamento mester controla trabou di Gobierno y den e caso aki no ta saliendo for di e situacion di crisis, cual tin implicacionnan nacional pa Aruba.
Pues ta trata di un situacion general di nos pais, y siendo un situacion di crisis, AVP ta kere cu Parlamento mester cai den e asunto aki y pa scucha e partidonan envolvi.
Mike Eman a splica den e conferencia di AVP cu nan kier a scucha e fraccionnan pa determina si nan ta mira cu cada fraccion ta kere cu n’e momento aki tin un responsabilidad pa busca un solucion di crisi. Den esaki tur fraccion di oposicion, MPA, RED, pero fraccion di MEP si no ta mira e momento aki pa Parlamento envolvi su mes den e crisis aki.

ORANJESTAD- Den e siman nos dilanti e compania publicitario STRADIUS den nomber di W.E.B. Aruba N.V. ta tene un encuesta telefonico bou di e clientela di nos empresa. Meta di e encuesta ta pa yega na mas informacion riba opinion di e cliente di W.E.B. Aruba N.V.
E encuesta ta bay dura algo mas cu dos siman y publico lo por spera yamada na cas di e compania Stradius. Di parti di W.E.B. Aruba N.V. ta pidi publico pa copera cu e compania pa asina por yega na informacion valioso pa e maneho di cliente di nos empresa.
Ta cu e tipo di encuestanan aki W.E.B. Aruba N.V. ta traha na optimalisa e servicio y comunicacion cu publico en general.

ORANJESTAD - Diahuebs ultimo, dia 3 di april 2008, alrededor di 5:35’or atardi tawata tin un interupcion den e suministro di electricidad pa e areanan di Sabana Liber y Alto Vista. Lineanan aereo di tension halto (12000 volt) ta suheto na diferente riesgo, por ehempel lamper (bliksem), pa cual motibo nos tin na diferente posicion «lightning arrester», como tambe « fuse » pa limita e riesgo di danjo, como tambe limita interupcion pa nos consumidornan. E motibo di e interupcion na e areanan ariba menciona tawata door di fuse bulá ariba dos poste di lus di tension halto (12000 volt), ocasiona door di un corto circuito ariba un « lightning arrester » ariba un poste di lus di tension halto banda di Sabana Liber 23 A. Na momento cu nos personal a detecta e origen di e interupcion, e « lightning arrester » a wordo desconecta y asina a restablece e suministro na e areanan afecta alrededor di 7:15’or diahuebs anochi.

Alrededor di 7:35’or anochi atrobe tawata tin un interupcion den e suministro di electricidad pa e area di Sabana Liber y Alto Vista, pero e biaha aki tambe pa un parti di Noord, Kudawecha, Seroe Janchi y Calabas. Un otro posibilidad (riesgo) pa lineanan aereo ta corto circuito ocasiona door di un obheto y/of animal, cu despues di a ocasiona e corto circuito no ta wordo encontra. Un parha por ehempel por ocasiona un corto circuito y nunca mas ta hanje. E manera di atende interupcion den lineanan aereo ta busca ariba full e lineanan e danjo cu e corto circuito por a ocasiona. Hopi biaha, manera tawata e caso ariba menciona, ta nos comsumidornan den e vecindario mes ta atende nos cu nan a mira un « flash » of a scucha algo ariba un poste. Den a caso aki, ariba diahuebs anochi, nos no a hanja ningun informacion y nos techniconan a core full e linea den tur e areanan ariba menciona. Esaki a tuma su tempo, y despues cu no a constata nada a tuma e desicion di pone e lineanan bek den servicio, cual a sosode alrededor di 10:45’or anochi. E motibo exacto a keda desconoci, pero e posibilidad cu tawata un obheto of animal ta muy probabel.

ORANJESTAD- E sospechoso principal di e triple asesinato di famia Lampe diabierna ultimo, esta Eugene Lampe di 29 aña, a usa un biga 2x4 pa golpia su mama, tata y ruman te matanan.
Autopsia efectua ayera mainta a saca afor cu Eugene a bati su ruman homber Edvard cu e biga den su cabez varios bes, caminda inicialmente e victima lo a trata di wanta algun di e slanan aki cu su dos brazanan, pero e slanan fuerte a kibra e craneo di e ruman por completo, ocasionando su morto rapidamente.
Tur cos ta indica cu e tata, esta Juan Lampe, a wordo golpia ora cu el a regresa cas den oranan di mainta, un rato despues cu Eugene a caba di mata su ruman homber, y el a golpia e tata tambe sin misericordia, habriendo su cabez for di otro, matando e pober homber indefenso al inistante.
Ta ser pensa cu tur esaki a sosode den oranan di mainta, y e mama, esta señora Ina Lampe, a bai traha y no tabata na cas pero for di su trabou a drenta informe cu el a bai cas algo despues di 1’or di merdia, dunando indicacion cu e asesino Eugene, a sinta den e cas cu e otro dos victimanan morto, spera su mama yega cas.
Ora c u e señora a drenta tambe el a ataca e mama cu e biga aki, golpiando e señora asina fuerte den su cabez, cu el a ocasiona su morto tambe al instante. E fractura di e mama tabata menos serio cu e dos otronan pero si slanan mortal.
TRANKILIDAD
Fiscal mr Mos a mustra ayera cu pa banda di 2’or di merdia, tur tres persona ya a wordo asesina, confirmando asina cu e mama a ser mata asina cu el a drenta e cas ora cu el a regresa for di trabou.

WILLEMSTAD - Ku un asistensia di mas ku 100 mucha a tuma lugá e fin di siman ku ta tras di lomba e Kampionato Eskolar di Ahedres 2008 organisá pa Fundashon Sedreko.
E kompetensia eskolar bou di guia di Gran Maestro Alvin Smith a tuma lugá den Sentro di Bario Janwe.
Nakul Paricharak di Radulphus College a kampionisá den e kategoria di Skolnan Avansá, Daniel Kanhai di Römerschool a bira kampion di Skolnan Básiko i kampion dje “Grupo Estímulo” a bai pa Nashira Bito di Marnix College.
E resultadonan ofisial:
Skolnan Avansá:
1) Nakul Paricharak, Radulphus College.
2) Clifford Felipa, Feffik.
3) Kingsley Elisa, Radulphus College.
Skolnan Básiko:
1) Daniel Kanhai, Römer School.
2) Shreesh Najak, International School.
3) Nadiusha Mercelina, Vigdis Jonkheer-Mensing College.
Grupo Estímulo:
1) Nashira Bito, Marnix College.
2) Farrell Mayer, Kolegio San Martinus de Porres.
3) Nathaniel Kooman, C.A.P.S.

MEDELLIN, Colombia, - Ayera nochi riba òrdu di Korte Supremo di Hustisia dentro di un gran proseso hudisial pa vínkulo di polítikonan ku paramilitarnan, a deten’é senador opositor colombiano, Guillermo León Gaviria Zapata, Fiskalia a informá.
Gaviria, senador pa opositor partido Liberal, agentenan di Fiskalia a kaptur’é den su kas den un sektor eksklusivo di siudat di Medellín (nortwèst).
Ta akusá e senador di enrikesimentu ilegal.
E kongresista a bisa ku e no sa motibu di su detenshon, ounke el a sigurá ku e ta “aseptá desishonnan di hustisia”, den deklarashonnan na telenotisiero RCN, despues di su kaptura.
Kaptura di Gaviria ta un desaroyo nobo di e proseso, denominá na Colombia komo skandal di “parapolítica”, ku te ku awor aki preventivamente a hinka 27 kongresista den prizòn.
Investigashon di Korte Supremo i di Fiskalia ku ta realisando mas ku un aña, a develá vínkulonan entre dirigentenan polítiko rekonosé i paramilitarnan di “Autodefensas Unidas de Colombia” (AUC), ku na aprel 2006 a konkluí desarme di 32.000 hòmber despues di dos dékada di lucha kontra guerianan.
60 Polítiko, inkluyendo 27 kongresista den ehersisio, tabata vinkulá ku paramilitarnan, segun e investigashonnan.

PARIS – E vlam Olímpiko mester a wòrdu pagá na dos okashon ayera, pa motibu di protestanan fuerte kontra di China durante e relevo atraves di Paris.
Apesar di un gran presensia di kasi 3000 agente di seguridat, por lo ménos dos manifestante a logra aserká e vlam promé ku nan por a ser wantá.
Polis a tira vários manifestante abou i a arestá un di e aktivistanan ku a tira awa riba e antorcha, ounke ku e no por a paga esaki. Tambe polis mester a los gas lakrimógeno pa plama e manifestantenan ku a blòkiá e ruta.
E vlam mester a wòrdu transportá den un bus, pa por alehá for di e manifestantenan. Un atleta den ròlstul tabata transportá e antorcha, ora ku el a sali for di un tùnel, el a keda para pa manifestantenan ku tabata grita ‘Tibet, Tibet’. Tabata e di dos biaha den algun minüt ku polis a duna òrdu pa paga e vlam.
Den un otro insidente, un hòmber identifiká komo aktivista di Partido Bèrdè, mester a wòrdu wantá pa funshonarionan di seguridat ora ku el a trata na yega serka di Stephane Diaga, e eks kampion di 400 meter, ora ku el a kuminsá ku su relevo for di e promé piso di Eiffel Toren.
Djadumingu na London tambe e vlam Olímpiko a kousa basta káos den e suidat aki. Polis a keda konfrontá ku manifestantenan ku tabata protestá kontra di e abusu di derechonan humano na China i e resiente represhon na Tibet. Un manifestante a trata di kita e antorcha i otro a trata na paga esaki. A informá di por lo ménos 37 aresto.

SANTIAGO DE CHILE – Apesar di e mal temporada ku e tenista chileno, Nicolas Massu ta pasando aden, Chile lo tin’é den su ekipo pa e seri di Kopa Davis kontra di Canada.
“E sorteo ta djaweps, ounke ku e determinashon ta mas òf ménos kla kaba. Den balansa, Nicco tin mas eksperensia den Kopa Davis. Ta un wega kompliká kontra di Canada. Nos ta obligá na gana,” asina e kapitan di e ekipo, Hans Gildemeister a bisa.
Massu, e ganadó di medaya di otro durante Weganan Olímpiko na Atenas kuater aña pasá, ta den un racha negativo. Aña pasá i e aña aki tabata desastroso pa Massu i ta okupá e puesto 111 riba e klasifikashon mundial i Paul Capdeville a remplas’é komo e di dos mihó tenista di Chile.
Sinembargo e kapitan di e ekipo di Copa Davis di Chile no a selektá Capdeville pa hunga.
Di su parti, Massu a defendé su derechi pa partisipá. “Na e momentunan aki mi ta sinti mi kapasitá pa lucha den weganan di Kopa Davis i esei ta importante. Unu por pèrdè wega, pero esei no ta nifiká ku ta hungando malu.”
E mihó tenista chileno, Fernando Gonzalez, pero tambe no ta den su mihó temporada a entrená ku e Ekipo di Kopa Davis.
E seri kontra di Canada ta importante pa Chile por hunga na sèptèmber den e grupo Mundial, unda nan a keda degradá despues di a pèrdè kontra Israel aña pasá.

NEWPORT BEACH, CALIF., - Ayera Scott Spiezio a deklará su mes kulpabel na korementu di outo fuma i un kaso di “hit-and-run” na desèmber den Orange County.
Spiezio su abogado a bai di akuerdo ku un areglo di fiskal, asina e bosero di fiskalia di e kondado, Farrah Emami a bisa.
Spiezio a risibí un kastigu di tres aña di prueba, mester bai un programa di alkohòl di tres luna, tambe mester bai dos enkuentro di Alcoholics Anonymous i tambe mester traha 80 ora den servisio di komunidat. Tambe e mester paga 1700 dollar na multa i mester paga 839 dollar na daño di e outo ku el a dal aden.
Den luna di febrüari St. Louis Cardinals a laga Spiezio den libertat i dia 31 di mart el a firma un kontrakt di Liga Menor ku Braves.
“E kastigu ta hustu. Awor Scott por sigui dilanti ku su karera”, asina e abogado di Spiezio, Paul S. Meyer a bisa den un komunikado. “Scott a apresiá e oportunidat pa su buena fe i su kompromiso pa un temporada eksitoso”.
Spiezio a bira kampion ku Anaheim Angels na 2002 i ku St. Louis na 2006 durante di su 12 temporada den Liga Grandi.

WILLEMSTAD – Federashon di Tènis di Antia Ulandes tin na su enkargo organisashon di e di seis Kopa Davis riba suela di Kòrsou.
Dianan 11, 12, i 13 di aprel próksimo lo tuma lugá riba kanchanan di SOV Asiento na Rust & Burgh, enkuentronan bálido pa Kopa Davis entre ekiponan di Antia i Bolivia.
E enkuentronan ta bálido pa e ronda di playoff di Kopa Davis Grupo-2 di Zona di Amérika.
Despues di a pèrdè den e promé buèlta di e fuerte ekipo di Ecuador den luna di febrüari último, awor e ekipo di Antia lo tin e fuerte kompromiso pa gana di Bolivia, pa asina mantené su mes den Grupo 2.
E pèrdèdó lo degradá pa Grupo 3 den 2009 i esei sigur lo no ta deseo di e ekipo di Antia.
E hungadónan den representashon di Antia Ulandes ta Alexander Blom, Nick van Rosberg, Romano Tatuhey kende últimamente a laga masha on impreshon atras ganando su kontrinkante di Ecuador i Martijn van Haasteren kende ta un ekselente hungadó den Double.
Kapitan di e ekipo pa e buèlta aki atrobe lo ta Kevin Jonckheer kende ta un èks hungadó di Kopa Davis di Antia.
E ekipo di Bolivia ta yega Kòrsou den e dianan aki i lo hospedá na hotel Holiday Beach.
Ámbos ekipo lo train durante di siman aki tantu mainta komo atardi riba e kanchanan di SOV Asiento.
E enkuentronan ta primintí di bira interesante, ya ku ámbos tim tin di bini fuerte pa asina keda den Grupo 2 di e Zona Amérika di Kopa Davis.

WILLEMSTAD – E último buèlta di e final di e Kampionato di Dam Junior, a tuma lugá den e wikènt tras di lomba i manera a premirá algun siman pasá kaba e título a bai pa e dos hungadónan mas konsistente den e kampionato.
Den e grupo di mucha muhé Vivian Troncon ganando tur su weganan a logra prolongá su título di un manera hopi konvinsente, miéntras ku Quincy Lopez a logra un resultado idéntiko den e grupo di mucha hòmber.
E kampionato aki tabata unu klasifikatorio pa e kampionato di Dam Junior Pan Amerikano ku lo tuma lugá den yüli na Sürnam.
Den kada grupo e partisipantenan a kompetí pa e promé kuater puestonan ku ta duna e derechi pa bai representá Kòrsou na yüli.
E tabla di posishon di e promé kuater puestonan ta:
Mucha Hòmber:
-Quincy Lopez (kampion)
-Benjamin Martis
-Heorgerig Hans
-Ramsey Martina
Mucha Muhé:
-Vivian Troncon (kampion)
-Rishaira Giterson
-Turani Lodriguez
-Tamar de Windt
Un pabien ta bai pa tur e 20 hóbennan ku a partisipá den e final di e kampionato i un danki na Fundashon Sedreko, SSK/CFW i Nico Cornelisse pa nan sosten na e kampionato.

WILLEMSTAD – Direktiva di Atletiek Vereniging Sparta huntu ku nan spònser Girobank ta organisá un Dia di Deporte Eskolar den Atletismo huntu ku Oinki.
Esaki ta un proyekto piloto ku Atletiek Vereniging Sparta ta organisando huntu ku su spònser.
E aktividat aki lo tuma lugá na SDK djasabra 12 di aprel próksimo for di 10’or te ku 2’or di mèrdia. E dia aki lo konta ku kuater skol ku lo bai kompetí ku otro.
E skolnan ta: Santa Claraschool, A.E. Goilo school, Mgr. Nieuwindt College i Coromoto College.
Nan lo partisipá den tres disiplina ku ta Kareda Kòrtiku, Tira Bala, Bula Leu i Relevo 4x50m
E kategorianan ta pa mucha hómber/muhé di 6-7 aña, 8-9 aña, 10-11 aña, i 12-13 aña.
Mirando ku Girobank NV tin e hóbennan i enseñansa na pechu, e tin komo premio di estímulo pa e skol ganadó fl. 2000,-.
E dia di Atletismo ku Oinki lo konta ku partisipashon di e muchanan di klas I te ku maestronan di skol.

LIMA, Peru, - Den un video ineditá durante e huisio ku eks Presidente di Perú Alberto Fujimori ta konfrontando pa abusunan di derechonan humano a duna di konosé ku eks lider di grupo Colina (eskuadron militar di morto), Santiago Martín Rivas, a splika e manera di traha di inteligensia kontra “terorismo” na Perú, basá, segun el a afirmá, den polítika di Merka.
Segun Martín Rivas, den e plannan elaborá pa Gobièrnu i Forsanan Armá pa kombatí terorismo, a destaká e ophetivonan di eliminá e rebeldenan di manera mas rápido i definitivo.
“Pa apliká esaki, promé mester di “e konforme” di alto mando di Fuerzas Armadas, i di dos, “òrdu” di e mas alto outoridat di Estado i Komandante Hefe Supremo di Forsanan Armá. Kier men, Presidente di e repúblika”, Martín Rivas a enfatisá den e video.
Fujimori, kende a goberná Perú entre 1990 i 2000 despues ku el a keda destituí pa un skandal di korupshon relashoná ku su eks asesor di inteligensia, Vladimiro Montesinos, a rechasá e akusashon ayera.
Fujimori, akusá di matansanan di Barrios Altos i La Cantuta, durante kua agentenan di estado a ehekutá 25 persona bou di sospecho di ta pertenesé na gueria maoísta di Sendero Luminoso, a afirmá ku nunka el a duna òrdu di ehekushonnan i ku grupo Colina a aktua den sombra.

Foto: Alberto Fujimori 0804

PORT-AU-PRINCE, Haiti, - E represhon di manifestashonnan kontra pobresa i e kosto haltu di bida ayera a kousa un morto na siudat haitiano di Cayes, ku a pone ku kantidat di víktima morto a oumentá i bira sinku fo’i inisio di e protestanan 3 di aprel último.
Durante e protesta, gruponan di manifestante a alkansá sentro di kapital haitiano, Port-Au-Prince, pa ekspresá nan rechaso p’e deterioro di poder, un fenómeno ku ta gòlpia kapanan amplio di e poblashon fo’i kabamentu di 2007.
Na lokalidat di Cayes, situá 190 kilometer sùit di e kapital, míles di persona a sali riba kayanan pa protestá dilanti kas di un parlamentario.
Miéntras, na Port-Au-Prince, mas ku un sentenar di persona a reuní alrededor di Palasio Nashonal, sede di Presidensia di Haiti i dilanti Parlamento, pa protestá i eksigí pa baha preis di e alimentonan.
Despues di un deskanso durante fin di siman, e manifestantenan a bolbe subi kayanan di Cayes, e di tres siudat mas grandi di Haiti.
E marcha a kuminsá den e barionan mas pober di Cayes.
“Tur kos ta demasiado karu. Nos a subi kayanan pa pidi Gobièrnu pa kambia kondishonnan di bida di e hendenan. Esakinan no ta bon. Ta e bida karu, ta pone ku nos ta subi kayanan”, e militante sosial, Simeón Yves Marseilles, a ekspresá na TeleSUR.
Siman pasá, e manifestantenan a invadí base di e mishon di pas di Nashonnan Uní.
E bia aki, nan blanko tabata kas di senador di oposishon, Gabriel Fortune, kende a akusá e protestanan di ta impulsá pa narkotrafikantenan.

ARIES: Balorá e kosnan bon ku bo ta poseé i saka mayor probecho di nan mes. No teme pa frakaso i utilisá inteligentemente e rekursonan o bo tin na man. 20,08,12.

TAURO: Kuminsá e dia perdonando falta o erornan di otro persona. Un situashon algu konfuso o kompliká por desaroyá den transkurso di dia den bo kas. 08,15,03.

GEMINIS: Evitá di ta den kompania di personanan problemátiko o negativo ya ku bo ta rekogiendo di e ambiente tantu den bon o malu. 30,04,25.

KANSER: Probechá al máksimo bo talentonan kreativo. No pone límite i proyektá sin dimenshon, liber, apsoluto. Permití ku bo imaginashon ta pasa libremente. 16,49,24.

LEO: Ounke bo mente ta den dibertimentu, lo ta bo responsabel pa pone e dia den bo trabou, bo kuenta, bo debe i bo korespondensia. 14,05,36.

VIRGO: No koloká un hende ku no ta meresé riba un pedestal. Pone bo mes den kontakto ku loke realmente ta bale la pena den bida. 04,26,18.

LIBRA: Mustra bo mes mas komunikativo pa ku otronan. Hasi bo palabra dushi. E atenshon den amor ku bo ta duna otro persona, ta e mihó regalo ku bo por ofresé.

SKORPION: Bo ta sumamente solisitá durante dia. Kuida bo mes pa bo no lanta yalusí, espesialmente den bo pareha. Sobra energia pa logra loke bo ta deseá. 50,43,20.

SAGITARIO: Amor ta resplandesé na bo banda, pero bo duda o yalusí por kaba ku bo. Remplasá miedu i inseguridat pa amor i konfiansa. 05,13,22.

WILLEMSTAD – “A yega momentu pa hala un strepi bou di nombramentunan polítiko manera nos pais a bin ta konosé durante hopi tempu. E nombramentunan aki no ta kumbiní pais. E no ta kuadra tampoko ku prinsipionan di bon gobernashon”, asina diputado enkargá ku Asuntunan di Personal Zita Jesus-Leito a reakshoná riba e último desaroyonan rondó di nombramentu di e polítiko Gerrit Schotte na e servisio DROV.
Schotte ta kleim un puesto, hefe di e departamentu Facilitaire Zaken na DROV, indikando ku el a haña un nombramentu pa esei.
Un otro empleado públiko ku ta traha na DROV Sharine Zimmerman pa basta tempu kaba sinembargo a bisa, ku el a haña promesa ku e lo haña e funshon ei, ku ta nifiká un promoshon pa su persona.
Esei a trese sierto frikshon ku a pone ku e funshonario a entamá e kaso den korte ku mester bisa, ya kaba a bai diferente seshon.
Den un di e seshonnan aki a bin dilanti ku gobièrnu no a tuma un desishon ofisial riba nombramentu di Schotte na e puesto en kuestion, pero despues esaki a ser desmentí atrobe.
Gerrit Schotte aktualmente ta miembro di Konseho Insular pa frakshon di MAN. Komo tal, de fakto e no ta ehersiendo e trabou na e departamentu menshoná.
Korte, durante tratamentu di e kaso siman pasá a disidí ku gobièrnu di Kòrsou tin 3 siman di tempu pa tuma un desishon ku e ta nombra eks diputado i aktualmente miembro di Konseho Insular Gerrit Schotte na un otro puesto den e servisio DROV. Si gobièrnu no hasi esei, korte lo dikta sentensia.

WILLEMSTAD - For di 2003 e Bestuurscollege di e tempu ei a adoptá un maneho ku ta bisa, ku tur funshonario ku tabata kolaboradó di un mandatario, ta haña un funshon den gobièrnu. Esei ta algu lógiko tambe, sino di otro manera bo ta destruí karera di e persona ei, asina eks diputado i eks kolaboradó di diputado Charles Cooper Gerrit Schotte a reakshoná riba e konmoshon ku a surgi rondó di su nombramentu na servisio DROV.
Schotte ta tópiko di kombersashon último dianan, sigur despues di e último seshon den korte, kaminda Schotte a presentá un alternativa pa su nombramentu komo hefe di Facilitaire Zaken na DROV. Schotte a anunsiá, ku e ta dispuesto pa konsiderá un otro funshon, si e funshon ya menshoná ta formando asina tantu problema. Pa Schotte, di e forma aki el a krea un apertura pa e situashon di impase ku a surgi den e kaso aki.
Pero diputado Zita Jesus-Leito, kende a tuma nota di esaki, a bisa ku e no ta na fabor pa nombra Schotte mes den gobièrnu. P’esei mes e no por komprondé e defensa dje abogado di gobièrnu, ku reportadamente a bai di akuerdo ku e proposishon pa buska un trabou alternativo pa e polítiko di MAN.
Jesus-Leito ta kere, ku mester yega un fin na e tipo di nombramentunan aki ku tin un karakter, manera el a bisa, netamente polítiko.
Gerrit Schotte a rechasá e ponensia aki.
“Ta bon pa rekòrdá, ku nos ta papiando aki di un diputado ku den pasado resien a firma un dokumento, bou di e pretenshon ku e tin outorisashon di gezaghèber a hasi esaki, siendo despues a resultá ku niun ora so esei no tabata e kaso.

WILLEMSTAD - Miembro di frakshon di Partij voor de Arbeid den parlamentu ulandes John Leerdam ta preokupá pa e informe ku Kòrsou no tin plaka pa kumpli ku beka na studiantenan ku ta studiando na Ulanda. Keda sin kumpli ku e studiantenan aki por tin konsekuensia serio pa nan futuro estudio, asina Leerdam a bisa den un reakshon riba e último desaroyonan.
Siman pasá – manera LA PRENSA a informá ampliamente kaba – a bira konosí ku no tin sèn pa paga beka na e studiantenan. Fundashon Finansiamentu di Estudio (SSC) ta pasando na e momentu aki den un proseso di reorganisashon. Algun tempu pasá a instituí un komishon ku mester a studia e situashon i bin ku rekomendashon pa fin di mart ku a pasa, pero e komishon no a keda kla i a pidi dos siman mas di tempu.
Pa SSC esaki ta ferfelu pasobra antisipando riba e informe di e komishon di eksperto aki, a kuminsá kaba na kòrta den presupuesto di e instituto.
Esei a kondusí un situashon kritiko ku pa fin di aprel awor, lo no tin e fondonan nesesario pa kumpli ku e studiantenan. Diputado Marilyn Alcalá- Wallé enkargá ku Enseñansa tin un biahe planiá pa Ulanda próksimamente pa diskutí ku su kolega ulandes riba e problemátika aki.
John Leerdam a ekspresá su preokupashon pa e desaroyo aki.
“Kisas mundu polítiko ulandes no ta realisá esei, pero e asuntu di beka aki ta di vital importansia pa e islanan. Nos konosé e realidat, ku si e studiantenan aki no sigui haña e plaka nan kontinuá ku nan estudio, e chèns t’ei ku nan ta stòp. Ku tur konsekuensia ku esei por tin, Leerdam a atvertí.

WILLEMSTAD - Kiko ta pasando atrobe ku e kòntròl 100 porshentu na Schiphol. Di kon e reklamonan ta sigui drenta ku asina tantu insistensha?
Preguntanan ku e miembro di Socialistische Partij Harry van Bommel den Tweede Kamer a hasi na gobièrnu algun dia pasá.
Harry van Bommel a basa su karta riba un karta di protesta ku presidente di Sürnam Ronald Venetiaan a skibi promé minister di Ulanda Peter Jan Balkenende al respekto.
Venetiaan tabata hopi rabiá ku ainda tin siudadanonan di su pais ku ta pasando den momentunan di humiashon ora nan yega Schiphol, pasobra funshonarionan di siguridat ta ehersé un kòntròl sin presedente riba nan.
Esaki, no opstante ku un grupo di Sürnam a gana un kaso den korte i kaminda gobièrnu ulandes a anunsiá ku nan lo pone un fin na e tipo di práktika aki.
E kòntròl 100 porshentu ta enserá ku ta listra e avion, ta listra maleta di e pasahero, su ekipahe di man i ta listra e pasahero mes tambe. Hustamente esaki tabata motibu di hopi indignashon, partikularmente pa e forma ku outoridatnan tabata hasi esaki den pasado. A presentá algun aña pasá un bòdiskèn, pero e práktika di listramentu na kurpa di hende aparentemente ta kontinuando tòg.
“Nos a kere tur tempu ku kos ta bayendo bon. No muchu tempu pasá minister Maxime Verhagen a anunsiá ku kehonan a baha, pero tambe ku e kantidat di bolitero ku ta transportá bolita pa Ulanda tambe a bira konsiderablemente ménos.