ORANJESTAD- Diahuebs mainta Minister President sr. Nelson Oduber a ricibi bishita di e Consul General nobo di Venezuela na Aruba, esta sr. Iván Dario Sandoval Colomine. Meta di e bishita ta pa sera conoci cu e promer mandatario Arubano y alavez estrecha e lazonan di amistad y cooperacion entre Aruba y Venezuela.
Na e ocasion aki Minister President Oduber a haci entrega di un moneda conmemorativo di Betico Croes y a desea sr. Colomine tur clase di exito den su funcion nobo.
Tambe tabata presente mr. Agustin Vrolijk, Director di Relacion di Exterior.

ORANJESTAD- Diahuebs mainta a tuma lugar den ballroom di Holiday Inn Hotel e apertura oficial di e conferencia di Caribbean Postal Union y cual conferencia ta hiba como tema ‘Strategizing the future of post in the Caribbean’. Durante varios dia ministernan encarga cu servicio di post den Caribe ta na Aruba pa atende e conferencia aki.
Minister President sr. Nelson Oduber tabata tin e honor pa haci apertura oficial di e conferencia di Caribbean Postal Union y den su discurso a trece entre otro padilanti e cambionan profundo cu a tuma lugar na aña 2004 pa loke ta e sector di post na Aruba, caminda a implementa e strategia di reforma postal. E reforma aki siguramente ta resultando den un exito pa Aruba y pa cual henter comunidad mester ta hopi orguyoso di dje. Alavez el a referi na e di 24 congreso di Universal Post Union cu lo tuma lugar aki 2 luna y caminda lo mester tuma decisionnan importante cu lo tin impacto riba e futuro di servicio postal.

ORANJESTAD - Caminda di Lus ta trata di e diferente aparicionnan di Cristo Hesus, for di su Resureccion te cu binimento di Spirito Santo Pentecoste.
E ta un caminda di alabansa, adoracion, alegria y gratitud. Por favor bisti na color alegre y bini cu un bela den glas. Caminda di Luz ta organisa dor di grupo Luz di Cristo y Totus Tuus.
E caminda di Luz ta pa bario di Dakota y pa tur esnan cu kier asisti. E lo tuma lugar dia 10 di mei dor di un Vigilia di Pentecoste. Esaki lo tuma lugar na parokia Birgen di Fatima na Dakota pa 8'or y mei anochi.

ORANJESTAD - Diadomingo awor ta un dia hopi special pa Iglesia Piedra Plat, pasobra e dia aki nos tin 3 celebracion. E prome ta cu nos ta reconoce e ser mas special cu Dios a traha, nos mama.
Na di dos lugar nos ta recorda e dia di Pentecostes. Cu hopi biaha ta wordo neglisha e ultimo añanan dor di nos mes como cristiannan. Y na di tres lugar nos ta bai celebra cu 2 aña pasa pa e gracia di Dios nos por a cuminsa funciona como un iglesia independiente, despues di por a haña e bendicion di nos iglesia mama cu ta Iglesia Aliansa Oranjestad. Pa e ocasion aki nos ta bai ta na Parke Arawa na Moko # 46-A.
Diadomingo awor 11 di Mei 2008 pa 10:30 di mainta nos lo cuminsa cu un sirbishi special cu canticanan y testimonio di un señora cu a perde su mama den un aksidente di auto ora cu e tabatin 15 aña di edad, un mensahe over pentecostes, y despues ta sigui cu un dia di famia.
Nos ta invita tur nos amigonan y amiganan y tur hende cu tin e deseo den nan curazon pa bin scucha y celebra hunto cu nos e celebracion special aki, y lo bai tin un treat pa tur hende.

ORANJESTAD - Aruba lo hanja bishita di e autor Karel Josefa cu ta un artista for di Curacao cu a skierbi e buki cu ta titula “Djaluna 6 di november 1967”.
E buki aki a wordo traha pa recorda e suseso cu a pasa tempo cu e brug Juliana di Curacao a cai, cu hopi amor Sr Karel Josefa a skierbi e buki di Djaluna 6 di November 1967.
E iniciativa pa skirbi e buki aki ta debi cu na momento cu e brug a kai Karel Josefa tabata un hoben cu a biba e momentonan di e accidente y tristesa na momento cu e brug a cai Sr Karel Josefa tabata un hoben cu a wordo cria den e bario di Fleur de Marie na Skarlo na cas di su abuelo nan y na unda cu e cas di su abuelo ta keda solamente 500 meter leu for di e brug y dia cu brug a cai ta riba 6 di november 1967 pa 7.50.
Karel Josefa tabata un hoben di solamente 8 anja di edad cu tabata baiendo skol di Sint Albertus College den pietermaai na momento cu e brug a cai Karel Josefa ta un persona cu a biba e momento bibo ora cu e brug di Juliana a kai na Curacao y na unda cu tabatin hendenan cu a muri na e momento di e descracia ta pesey mes Karel Josefa a dicidi di skirbi un buki y tambe kier a comparti cu tur hende loke e a pasa aden na momento cu e brug a kai na Curacao
Karel Josefa lo bishita Aruba di a 9 mei y na unda cu lo e ta bay ta presente na Van Dorp diasabra 10 mei entre 11’or pa 1’or y na Antraco lo e ta bai ta diadumingo entre 9’or pa 1or unda cu tur hende por pasa bishite y mira su buki y tambe ta dispuesto pa firma su bukinan pa esnan cu ta deseya.

WILLEMSTAD – “Aliansa Patriótiko ta kontemplando ki akshon por tuma, i lo reuní den fin di siman despues di a tuma nota ku gobièrnu a anunsiá oumento di preis di diesel i gasolin”, asina Nelson Navarro a duna di konosé. A tuma nota ku ya algun sindikato ta prepará pa un akshon i a bisa kaba ku e oumentonan anunsiá ta inaseptabel. Navarro a bisa di ta konsiente ku den henter mundu petrolero a subi i su influensia, algu ku nos no tin den nos man. “Mester chek e preisnan energétiko, kaminda lokalmente por atendé di manera ku no ta afektá konsumidónan di mas, algu ku nos mester hasi.” Komo Aliansa Patriótiko ta bai mira kiko por hasi pa aliviá e asuntu i ta bai mira ki por hasi pa atendé e punto aki.
E proposishon ku Gobièrnu di Kòrsou kier aserká Gobièrnu Sentral kuné pa redusí akseins riba produktonan derivá di petroli i komestibel di promé nesesidat, ta un proposishon ku Forsa Kòrsou a yega di hasi den pasado. Mester por baha e akseins riba e produktonan menshoná, pero mester kompensá e falta di entrada pa por kubri otro kaminda pa no krea un otro défisit ku lo tin influensia riba presupuesto di Gobièrnu Sentral. Tur eseinan ta kosnan ku mester sosodé. Forsa Kòrsou ta pro e proposishon asina i lo sostené sigur den Parlamento.
E komishon di energia a bini ku diferente proposishon. Un punto ku sin mas mester atendé ta energia alternativa, mester atendé mas rápido posibel kuné. Nos tin tur e elementonan pa hasi uso di esei. Solo, laman, i bientu ku mundialmente konosí komo fuente di energia alternativa. “Ya ta pa añanan ta papiando riba esakinan. Mester buska manera pa hasi uso di esaki i duna un alivio. Gobièrnu mester hasi muchu mas den e direkshon aki,” asina Navarro a konkluí. Por sierto ku e grupo sindikal den komishon di energia a haña bastante krítika for di ayera tardi ku a anunsiá e oumentonan, prinsipalmente e manera ku e representante a defendé su posishon. Tabatin gritunan pa trahadónan no solamente mobilisá individualmente, pero tambe pa kita nan miembresia for di sindikalismo, ya ku nan no a sirbi e kousa. Tabatin problema ku e posishon di sindikato for di kuminsamentu ora a forma e komishon i hasta t’asina ku tabatin sindikato ku a distansiá for di e komishon i a mustra nan malkontentu abiertamente.

BEIRUT, Lebanon, - Konfrontashonnan fuerte a sakudí Beirut despues ku grupo Hezbollah, apoyá pa Iran, a bisa ku Gobièrnu libanes respaldá pa Merka a deklará guera ora a trata desmantelá su ret di telekomunikashon militar.
Fuentenan di seguridat a bisa ku 11 persona a muri i otro 30 a resultá heridá den e kombatenan.
Durante ayera nochi por a skucha sonido di eksploshonnan di granatnan i tirunan di armanan outomátiko di e pió konfrontashonnan interno for di tempu di e guera sivil di 1975 pa 1990.
E lider di koalishon gobernante, Saad al Hariri, a proponé un akuerdo pa terminá e krísis, bou di kua e desishon di e Gobièrnu ku a pone Hezbollah bira furioso, lo bai keda konsiderá komo “un mal entendimentu”.
Despues lo manda e desishonnan pa Ehérsito libanes, ku a keda neutral den e kombatenan, loke lo duna e komandante di forsanan armá, general Michel Suleiman, e opshon di suspendé su implementashon.
Pero e kanal di televishon al-Manar di Hezbollah posteriormente a sita un fuente di oposishon kende a rechasá kualke idea pa pone fin n’e konflikto, òf mester ta proposishon di lider di e grupo, Sayed Hasan Nasralah, ku a keda presentá ayera.
Nasralah a eksigí ku e medidanan ku e Gobièrnu a adoptá e siman aki, mester anulá nan.
Konseho di Seguridat di Nashonnan Uní a pidi “kalma i moderashon”, urgiendo tur parti pa regresá na diálogo pasífiko.

WILLEMSTAD - Den korant LA PRENSA, rumannan Martha, por a tuma nota di un komunikado deportivo bou di e kabes “BMX ta BIBU”.
Den e relato aki ta splika e historia di e orígen i nifikashon dje deporte.
Despues por tuma nota kon e deporte a nase na Kòrsou, e timnan, dirigentenan, e partisipantenan i nan éksitonan.
Fo’i kuna di e deporte BMX nos dos tabata deportista hopi dediká na e deporte di BMX i hopi bes ku éksito i ta p’esei nos a lamentá ku den e seri di nòmbernan di partisipantenan nos nòmber no ta aparesé.
Fo’i 1990 nos a forma parti dje tim Dynamite Racing Team bou di guia di Papito Perez i August Fraai.
Na 1991 nos a kuminsá kompetí na nivel internashonal i intercontinental na diferente pais.
E paisnan ku nos a partisipá tabata entre otro na Venezuela, Colombia ( Rubensz, 7 lugá), Brazil, selekshoná pa kore na Argentina i Merka, Ulanda, Mexico (Rubensz 6 lugá) den e kategoria “Cruiser” i 2 lugá den e kareda internashonal.
Na 1994 nos a kambia di tim i bai forma parti di Curaçao Racing Artists bou di guia di August Fraai i señor Leito.
Den e periodo menshoná nos a kai hopi den premio na Kòrsou i Aruba (Rubensz di 3 lugá all around).
Nos ta kere ku nos èks kompañero i amigu, Giano Chirino, su nòmber tambe meresé di wòrdu publiká komo eks partisipante di BMX.
Despues nos a emigrá pa Ulanda pa sigui estudio avansá. Na Ulanda nos tur dos, Rubensz i Roen a kambia di ramo di deporte i ta aktivo den e deporte Basketbòl. Maske nos a bai dediká nos mes na e deporte di Basketbòl, semper nos a keda sigui aktividatnan di nos eks kompañeronan di BMX, prinsipalmente di nos amigu Junny Bregita ku a keda konstante aktivo den e deporte i resultado ta ke ta hasiendo un bon trabou na Ulanda i na nivel internashonal.

LA PAZ, Bolivia, - Kongreso di Bolivia ayera a aprobá un lei proponé pa Presidente di Bolivia Evo Morales pa konvoká den un plaso di 90 dia un referèndem revokatorio di mandato di e Presidente boliviano, tambe e Vise Presidente i nuebe gobernador di e pais, Senado boliviano a informá.
Esaki kier men, ku den tres luna lo bai tin referèndem revokatorio na Bolivia pa outoridatnan di Poder Ehekutivo.
E mandato di Morales i Alvaro García Linera, ku ta konkluí na yanüari 2011, lo por keda revoká si e votonan risibí pa ámbos, superá e plancha den e elekshonnan di desèmber 2005, ku tabata 53,74%.
Lo apliká e mesun lógika pa revokashon di e gobernadornan di e estadonan di Bolivia.
E Senado, dominá pa oposishon, a sanshoná e proposishon realisá pa e mandatario na kuminsamentu di desèmber último i aprobá despues sin mayó trámite pa Kámara di Diputado, kontrolá pa ofisialismo.
Bolivia ta den un krísis profundo fo’i novèmber último, ora partido di Evo Morales den Asamblea Konstituyente a aprobá e proyekto di Konstitushon sin presensia di oposishon.
Komo reakshon p’e akto polítiko aki, lidernan di kuater region di Bolivia a disidí konvoká un referèndem pa aprobá nan statutonan outonómiko.
Gobièrnu a trata desaktivá e referèndemnan aki ku mediashon di Iglesia Katóliko, tambe di Organisashon di Estadonan Amerikano (OEA) i di grupo di paisnan amigu di Bolivia, pero sin logra eksito den su meta.

CARACAS, Venezuela, - Den presentashon di resultadonan di promé reunion ministerial di Konseho Energétiko di Nashonnan Suramerikano di Kumbre di Unasur, for di salon Joaquín Crespo di Palasio di Miraflores, Presidente di Venezuela Hugo Chávez a atvertí ku “Venezuela no ta bai keda ku brasanan krusá” den kaso si presentá agreshonnan na Bolivia.
Chávez a referí na e statutonan outonómiko na Bolivia, i a responsabilisá Merka di esakinan.
“E plan kontra Bolivia ta faktura merikano”, e lider venezolano a sigurá.
“Akusá mi di inherensia. Mi ta deklará mi mes kulpabel for di awor aki mes!”, Chávez a deklará.
E promé mandatario venezolano a pronostiká ku si ataká e region, lo por kuminsá “un Vietnam, dos Vietnam, òf tres Vietnam na Amérika Latina!”
El a sigurá ku e referèndem organisá djadumingu último na e region boliviano di Santa Cruz ta “un plan kontra Suramérika” ku ta pasa pa Ecuador i Venezuela, kaminda, segun Chávez, lo eksistí tambe intentonan separatista similar.
Relashoná ku e supuesto plan seseshonista na Zulia, e lider venezolano a bisa: “Ya a presentá un plan di seseshon na estado di Zulia, e gobernador di einan, algun diputado, i konseho legislativo di einan. Buska un Ehérsito i ranka kita, si boso por, un pida di nos patria. Boso no ta bai logra!”

WILLEMSTAD – Siman pasá na banda Abou durante di e promé di sinku kareda ku mester keda koré pa e klasifikashon di tempu ku ta hiba di nòmber Trustmore Mr. Chrono Competetion.
Tabata un lucha emoshonante den tur e kategorianan. E partisipantenan mester a marka un tempu den un kareda individual di 24km riba un parcours basta difísil, kaminda nan a kuminsá na Kas di Palu di Maishi entre Dokterstuin i Barber.
E organisashon a marka tres buèlta di ocho kilometer, kaminda tabatin algun seru tambe. Esaki a pone pa e partisipantenan tambe tabata difísil pa haña un ritmo di kareda.
E ganadá serka e kabayeronan riba Mountain Bike a bira Perry van der Wolde i e kabayeronan riba Racefiets esaki tabata Barry Bakker.
Serka e damanan tabata Gerda Fokker ku a gana den e kategoria Racefiets. No tabatin un kategoria spesial pa damas riba Mountain Bike.
En total tabatin 17 kategoria ku klasenan apart pa tantu damas komo kabayero, repartí den vários kategoria di edat.
Por haña e resultadonan kompleto di e Trustmore Mr. Chrono Competetion riba e wepsait www.teamendurancecuracao.com i tambe riba www.curacaocycling.com
Tambe tin fechanan pa e siguiente karedanan pará.
E siguiente kareda riba tempu i tambe duo riba tempu, lo bini dilanti mas lat.
Ya kaba un 35 pareha a inskribí.
Inskripshon pa duo riba tempu por keda hasi ainda na Dasia Sport i Vista Bike.

WILLEMSTAD – Plataforma Sindikal, ta kontra dje medidanan ku gobièrnu a anunsiá ayera, relashoná ku e oumento di kosto di bida. Sidney Justiana, kende na nòmber di Plataforma Sindikal, ta representá den e Komishon Miksto di Energia, tabata esun ku a hasi e deklarashon aki.
“Nos a forma parti di e komishon i mi mester bisa, ku e komishon a hasi su trabou na un forma magnífiko. E meta tabata pa suavisá e sla ku e oumentonan aki ta trese kuné,’’ Justiana a bisa. Sinembargo segun e lider sindikal, finalmente ta Bestuurscollege ta esun ku ta tuma e desishon. “Nos por a skohe, pa keda den e komishon òf pa legumai partisipashon na e proseso”, Sidney Justiana, a indiká. “Pero sindikalismo ta opiná ku a kuminsá un kos huntu i mester kamin’é konhuntamente”.
Posishon sindikal
E posishon sindikal ta enserá, ku e komishon a hasi un trabou kaminda ku e sindikatonan a purba, mirando e realidat ku tin un desaroyo internashonal, ku no por kontrolá, pa krea un situashon unda por aliviá esnan den nos komunidat ku tin mas nesesidat.
“Ta p’esei nos a disidí di keda den e Komishon Miksto di Energia. Pasobra bo tin mester di un òf otro forma krea e kolchon aki’.
Bicho Justiana a bisa di ta fèrwagt ku lo akusá Plataforma Sindikal di no a hasi sufisiente esfuerso. “Pero den bida ora hasi un eskoho mester karga kuné i hecho ta ku gobièrnunan di turno, durante último seis añanan, no a tende e pensamentu sindikal.”

WILLEMSTAD - Apesar ku sindikalismo no ta di akuerdo ku medidanan ku gobièrnu a tuma, relashoná ku e oumento internashonal di preis di kombustibel, e no ta retirá for di e Komishon tri-Partite.
Sidney Justiana, representante di Kámara Sindikal den e Komishon Tri-Partite, a splika, ku e desaroyo i tambe e manera ku nos ta desaroyá den e komunidat, lo pone ku na dado momento nos ta bai pega. Di tur manera sindikalismo, lo mantené su liña di pensamentu. ‘Den e komishon, tantu VBC, Kámara di Komersio, Sindikalismo i tambe sobrá miembronan di e Komishon, a traha bon balansá. No tabatin diskushonnan fundamental. Hecho ta, ku e komishon a hasi su trabou i gobièrnu a keda ku e outoridat pa tuma e desishon’.
Sindikalismo lo keda forma parti di e Komishon Tri-partite di Energia, Sidney Justiana, a splika ku esaki ta nesesario, pa sindikalismo perkurá pa e asina yamá ‘kolchon sosial’, pa komunidat. Esaki ta enserá ku for di supsidio pa transporte públiko, supsidio pa shofùrnan ku ta transportá muchanan di skol i kaminda ta nesesario instituí kòntròl pa evitá spekulashon.
Hotline
Kámara Sindikal en todo kaso ta sostené e intenshon pa lanta un asina yamá Hot-Line. Sidney Justiana, a indiká ku mester determiná ainda si e hot-line lo ta na SSK òf na un otro sede sindikal. Meta dje hot-line ta, pa hendenan por duna informashon di komersiantenan di mala fe ku ta spekulá ku preis. Ta posibel pa hendenan por yama riba e number aki a duna e informashon. Na su turno, sindikalismo lo perkurá pa pasa e informashon na e komersiantenan pa krea e balansa nesesario.

ARIES: Bo ta sigur di loke ta kumbiníbu i te na unda bo ke yega. Tuma na kuenta loke bo hasi i hasi hopi bon amistatnan. Ta momentu di pone bo plannan na marcha. 19,06,10.

TAURO: Bo ta kousa hopi bon impreshon na otronan. Eventonan sosial ta ponébu den kontakto ku persona romántiko ku ta envolví bo ambiente. 30,15,44.

GEMINIS: Tur lokual ku ta strobabu den bo kaminda ta kaba na nada. Bo mente positivo ta superá tur opstákulo. Bo ta kargá di energia positivo. 49,03,18.

KANSER: No permití ku nan ta manipulábu pa medio di kompashon. Alehábu di e personanan kargá di kosnan negativo, deklará bo independensia. 07,10,14.

LEO: Saturá bo alma di infinito amor. Dios ta kuidabu konstantemente. Kuminsá na skucha bo bos interior. Ta komo si e ambiente ku ta rondonábu ta kargá di misterio. 16,01,23.

VIRGO: Bo por mira awor e kosnan desde otro punto di bista, logrando establesé e balansa emoshonal ku bo a deseá pa bo. 10,04,13.

LIBRA: Kuida e dia di awe tantu riba plannan físiko komo personal. Duna prioridat na bo plannan personal i saka tempu pa meditá. 08,13,02.

SKORPION: Ta aserká oportunidatnan pa biaha, gana plaka òf topa ku e pareha ideal. Bo palabra tin poder manera nunka ántes. 08,10,25.

SAGITARIO: Bo intuishon lo ta awor bo mihó arma pa optené éksito. Bo pareha ta mas atento na tur loke bo bisa. Ekspresá ku kuidou i hopi táktiko pa bo no heridá sentimentu di otro. 39.

WILLEMSTAD - A yega momentu ku berdaderamente tur hende mester hala faha mara. Preis di energia den nos pais lo bai subi den un forma sin presedente. Preis di awa, koriente, gasolin i diesel lo subi komo konsekuensia di e hecho ku preis di krudo, ku ta e materia prima pa produsí e produktonan aki ta subiendo den forma bárbaro riba merkado mundial. Preis di krudo e siman aki a yega kaba 122 dollar i mei pa barí, ku ta un nivel nunka bisto den istoria.
Durante un enkuentro ku prensa ayera tardi, diputado enkargá ku e kòlòm di energia Humphrey Davelaar, diputado pa Asuntunan Ekonómiko Eugène Rhuggenaath i hefe di e kompanianan di energia i utilidat a informá prensa, ku despues di un análisis rígido, no a keda otro rekurso, sino di oumentá preis di awa, koriente, gasolin i diesel.
Manera ta konosí, último dianan Bestuurscollege a tene un buèlta di kombersashon ku diferente instansia ku ta liga ku mundu di energia.
Tambe a papia ku e Komishon di Energia na diferente okashon den e periodo tras di lomba. E komishon aki a studia alternativa i a presentá gobièrnu un pakete di sugerensia ku mester sirbi pa weta si alternativa pa un preis mas abou di energia ta posibel. Entre e ideanan ku a subi mesa, ta pa forma un delegashon pa bai papia ku gobièrnu venezolano òf ku e multinashonal PDVSA pa weta si por haña un preis preferenshal pa krudo for di e pais aki.
Sidney Justiana, kende a representá e komishon ayera tardi, a bisa ku posishon sindikal en todo kaso ta, ku no por introdusí oumento di energia sin mas: un oumento mester ta kompañá pa un maneho sosial prinsipalmente pa esnan di ménos rekurso.

WILLEMSTAD - Tal manera LA PRENSA a antisipá kaba den su edishon di ayera, dia 15 di desèmber den futuro lo bira Dia di Reino. Lo ta un dia liber i un dia di fiesta. Dia 15 di desèmber – ku den pasado tabata ser selebrá kaba komo Dia di Statüt, un dia di fiesta – awor lo remplasá Dia di Antia, ku nos a bin ta selebrá tur aña dia 21 di òktober.
Parlamentu di Antia a bai di akuerdo ku e proposishon di lei aki, pero mester bisa ku tabatin hopi diskushon rondó di e intenshon.
Miéntras ku frakshon di Frente Obrero, pa medio di su lider di frakshon, Mirna Louisa-Godett sin mas a anunsiá di ta sostené e proyekto di lei aki, tabatin otronan ku tabata mas krítiko.
Jacqueline Spencer (PAR) a aploudí e lei. El a rekòrdá ku algun aña pasá, tur isla di Antia, pa medio di un referèndem demokrátiko a papia palabra kla. E islanan no tabata ke keda mas den Antia, pero si a vota na fabor pa keda den Reino. PAR, komo tal ta aploudí e lei, pero tòg tin un preokupashon, el a bisa.
Nos mester evitá ku e lei aki ta bira un lei, kaminda ta simplemente dekretá un dia di fiesta, ku ta bira un dia liber komun i koriente.
El a bisa, ku mester hasi tur loke ta posibel pa duna e dia kontenido real pa asina evitá ku e dia mes lo bira un simpel dia liber.
“Dia a instituí Dia di Antia, a hasi esaki ku sierto meta. E dekreto ta bisa ku mester stimulá mas tantu posibel e sintimentu di solidaridat entre pueblonan.

WILLEMSTAD – “En bes di dediká atenshon na desmantelashon di Antia, na realisashon di deseo di pueblo pa un pais outónomo den Reino, un Gobièrnu Sentral ta bai laga su ekspertonan dediká nan tempu ku un lei pa regla un dia ku ta un dia di fiesta”, asina Eunice Eisden di frakshon di MAN den parlamentu a deklará. E pensamentu aki di e parlamentario, defakto a reflehá pensamentu di otro manera un partido Forsa Kòrsou, ku tambe a bisa ku no tin nada di bai selebrá.
Parlamentu – manera LA PRENSA ta relatá den Un otro artíkulo – finalmente a bai di akuerdo ku e proposishon di lei pa instituí Dia di Reino dia 15 di desèmber. Pero partidonan di oposishon klaramente tin otro pensamentu.
Segun Eunice Eisden no tin nada di selebrá. “Tanten ku nos no rekonosé e pasado, e pasado manchá pa kontrabanda di hende i hòrtamentu di pais, no tin nada pa selebrá”, el a bisa.
El a para ketu ekstensamente na último desaroyonan kaminda Ulanda ta menasando ku un areglo di ekspulshon, kaminda Ulanda ke introdusí un registrashon pa spesífikamente antianonan, e asina yamá VIA i kaminda no tin rèspèt ètòl pa Antia.
Aparentemente nos tin un gobièrnu ku ta preferá di traha riba “kosnan leuk”, na lugá di atendé kosnan mas serio promé.
Segun Eisden, ta inaseptabel ku ta papia di selebrashon di Dia di Reino, anto no ta atendé ku deseo di pueblo pa haña su outonomia den Reino.

SCHIPHOL/ WILLEMSTAD - Un situashon berdaderamente ferfelu ta reina for di awe mainta na aeropuerto internashonal Schiphol na Ulanda, komo konsekuensia di un wèlga di parti di e personal. Ta trata aki di personal di Menzies, e kompania ku ta enkargá ku despacho di maleta.
E trahadónan aki a disidí di pone trabou abou, pasobra negosiashon pa un kontrakt kolektivo nobo a pega formalmente i no tin indikashon kon ta bai sigui.
Personal ta eksigí un oumento di salario di 3.5 porshento, pero e kompania Menzies no ke duna mas ku 1.5 porshento. Korte a disidí ayera na Utrecht ku trahadónan ku ke drenta akshon, tin derechi di hasi uso di nan derechi di wèlga den e kaso aki.
Korte a bisa ku e ta konsiente ku e akshon lo nifiká molèster na e aeropuerto en kuestion, pero ku e molèster lo no ta di tal índole ku e ta inaseptabel, manera gerensia di e kompania a bin ta insistí.
Mester bisa di otro banda, ku no ta henter e kompania ta den wèlga. Solamente un parti di e trahadónan a disidí di pone trabou abou. Rene Windhouwer, hefe di Asuntu di Personal na Menzies a bisa, ku esnan ku si ta traha, ta funshonando bon i ku tin bon ambiente di trabou.
Schiphol ta ferwagt di atendé ku 145 mil pasahero awe, ku un portabos a kalifiká komo “un dia hopi drùk”.
Gerensia di aeropuerto mes a bisa, ku e no ta kere ta nesesario te ainda, pa tuma medida adishonal.
Menzies tin pa awe un total di 17 buelo ku e mester despachá.

WILLEMSTAD - Awe mainta tabatin e akto di firmamentu di kontrakt entre Insel Air i Federashon di Beisbòl di Antia Ulandes, NaBaFe. E kompania di aviashon Insel Air for di e siman aki a yuda trese hungadónan di Sint Maarten di moda ku nan por entrená e fin di siman aki. Tambe lo tin un biahe pa Aruba pa fin di luna di yüni benidero. Riba e foto por mira e firmamentu dor di sr. Armin Konket pa NabaFe i sr. Edward Heerenveen pa Insel Air.