ORANJESTAD- E gran eguipo di veterano di Dakota “ROMA” bow mando di Jenny Loefstok y Amado Rosina, a titula Campeon 50- Plus di 2008, ora cu e amariyonan di Dakota, a supera Inter di RCA cu anotacion minimo di 1-0, den tempo adicional, despues cu e partido regular a termina den un empate di 0-0.
Un gol di e Hulandes, Jacobus Schreiber, a bin resulta e gol decisivo den un partido cu ambos ekipo a lucha formalmente cu otro pa bai cu e titulo.
Esaki ta di tres biaha caba cu Roma ta titula campeon di e divison aki sin a perde un wega durante e campeonato regular, pues Campeon invicto.
Directiva di Fedeveta ta manda un pabien grandi pa Roma cu su titulo di campeon y tambe un pabien ta bai pa Inter, cu e titulo di Sub-campeon.
E hungador mas valioso a keda den nomber di Robby Simon, cual ta hungando como keeper di Roma.
Manera ya conoci e trofeo di e topscorer a bai pa Juan Sevillano Tello, di e eguipo di Deportivo Nacional.
Pa di tres lugar a keda SCA di Paradera cu a vence Deportivo Nacional cu anotacion di 4 - 2, caminda Nacional a keda pues na number cuater.
Copa-5 a bai pa Phoenix Santos cu den e ultimo wega a vence Teachers United cu anotacion di 4 - 0.
Refereenan cu a coopera pa tur cos a bai na ordo tawata Victor Ridderstap,
Erwin Helder y Ernst Mohamed.

ORANJESTAD- Despues di pasa dos aña na University of Tampa, Sayenne a discubri cu e por reduci gastonan di su studio drasticamente cu e Latin America/Caribbean (LAC) Scholarship Program na UCF cu Aruba Scholarship Foundation ta administra.
Na aña 2006 Sayenne a drenta UCF y cu su GPA suficiente halto el a wordo aproba pa participa den LAC program. Como reconocimento di su logronan scolastico The National Scholars Honor Society a haci Sayenne miembro na aña 2007.
Siman pasa Sayenne a gradua como e unico studiante cu un B.S.B.A. Business Economics, cu enfasis den Financial Economics. Sayenne su GPA pa su añanan na UCF ta nada menos cu 3.840!
Sayenne ta pensa di haci uso di e OPT program cu ta permiti’e traha un aña na Merca pa haya experiencia y despues drenta UCF atrobe pa busca su Masters Degee.
Sayenne ta jiu di Sidney y Diana Flanegin di Pos Abao #53. Aruba Scholarship Foundation ta felicita Sayenne y su mayornan pa e gran logro aki y ta desea Sayenne hopi exito den su aña di OPT.
Nos ta orguyoso di por a yuda Sayenne realiza su soño y nos ta spera cu na aña 2009 nos lo por yud’e atrobe ora cu e drenta Graduate School na UCF.

ORANJESTAD- “E cambionan den e Ley di Admision y Deportacion di Extranheronan (LTU), cu Gobierno a introduci dia Prome di Juli 2006, a percura pa consternacion grandi den hopi sector di comunidad. E fraccion di AVP den Parlamento, a vota contra e cambio den LTU e tempo ey pasobra e tabata inhusto pa cu esnan cu ta depende di permiso y no ta funciona pa esnan cu ta depende di empleadonan di exterior.
Pesey Fraccion di AVP a presenta mocionnan pa gobierno cambia e aplicacion di e ley mientras cu ta traha ariba un concepto di Ley pa revisa e loke Gobierno a introduci na 2006.
Un grupo di trabao di AVP a keda encarga cu e iniciativa di Ley pa cambia e Ley actual. Awor por mira cu gobierno a cuminsa realisa su eror y DIMAS a anuncia cu lo no pone e fecha aki mas pa esnan cu tin permiso promer cu 2002. Pero ainda ta keda cu esnan despues di 2002 li haya e fecha inhusto aki di 2009 den nan permiso.
Mike Eman ta splica cu e asunto cu permiso por worde renoba unicamente te cu 2009 a causa hopi danjo pa esnan cu ta depende di un permiso.
E Lider di oposicion ta mustra cu hopi no por haya finaza pa e motibo aki y otronan a worde perhudica den haya pasaporte, pasobra maske nan tin mas cu 10 anja bibando na Aruba e fecha fatal di 2009 ta scirbi den nan permiso.
Hopi veredicto a mustra cu e cambionan cu Gabinete Oduber a bini cune den LTU ta en pugna cu derechonan adkiri di esnan riba permiso y ta enpugna cu tratadonan internacional. Pesey e mocion di AVP a pidi pa gobierno aplica e ley y maneho di LTU conforme e veredictonan di huez y conforme tratadonan di derecho humano.

ORANJESTAD- Partido de la Liberación Dominicana, PLD, di actual President Leonel Fernandez a manda un invitacion personal pa miembro di Parlamento pa fraccion di AVP, Otmar Oduber pa asina e forma parti di e grupo di observadornan internacional den e proximo eleccionnan presidencial cu lo tuma lugar 16 di mei awor.
Ta masha poco hende ta haya e honor aki y Otmar Oduber a sinti su mes orguyoso y privilegia di a haya e invitacion aki directamente for di PLD.
E ta considera esaki como un reconocemento na su trabou cu el a bin ta haciendo na Aruba, caminda entre otro e ta promove hunto cu AVP e ideanan cristian democrata den un pais democratico.
Otmar Oduber a comenta cu semper el a sinti un aprecio masha grandi mes pa Republica Dominicana y su hendenan, kende el a bin ta conoce na Aruba, mustrando di ta personanan honesto y semper buscando un mihor porvenir pa nan mes y pa e pais caminda nan ta biba.
Tambe Otmar a duna di conoce cu ultimo biaha cu el a bai Republica Dominicana el a keda asombra pa mira e desaroyo cu e pais aki ta pasando aden, y awor cu el lo bai atrobe, e biaha aki den un rol hopi importante pa e desaroyo democratico di e pais, e ta sigur cu el lo por trese mas ideanan cu adaptando esakinan pa Aruba lo por contribui na e desaroyo turistico di Aruba.
Mester corda cu ultimo biaha cu Otmar Oduber a bai Republica Dominicana, hunto cu su colega di partido y di Parlamento, Mike de Meza, nan a concentra riba e parti di adictonan problematico, caminda cu na e pais ey nan a bin ta haciendo un tremendo trabou pa cu esaki, cual sigur ta dunando su frutanan tambe.

BEIJING, China, - Direktor di Büró Estatal di Sismologia di China, Yang Wei, a afirmá awe ku no tin niun señal ku por realisá un ripitishon di e temblor registrá na kapital chines awe.
“E rumornan n’e siudat ku lo por bai tin un ripitishon di temblor di entre 2 i 6 grado riba eskala di Richter na Beijing ku por okurí awe nochi simplemente no ta bèrdat”, Yang a deklará.
“No ta probabel ku un temblor ku konsekuensia destruktivo por okurí pegá ku e kapital den un futuro serkano”, el a añadí.
Un temblor di 3.9 grado awe a asotá e distrito di Tongzhou, situá ost di Beijing.
Te n’e momentu aki no a informá riba víktima òf dañonan material komo konsekuensia di e temblor.

WILLEMSTAD - Den fin di siman tras di lomba, selekshon di beisbòl antiano a risibí bishita di shete hungadó for di St.Maarten.
Durante e práktikanan di djabièrnè, djasabra i djadumingu bo por a mira ku e ekipo tin hopi talento, disiplina i hambrá pa ku loke nan a bin hasi.
Tur atleta ta konsiente ku ningun hende no ta estrea den e selekshon aki i ku nan trabou durante training i otro kriterionan ta e pasashi pa por ta den selekshon.
E téknikonan di St. Maarten i Kòrsou tambe a keda impreshoná di e hungadónan di ámbos isla tin ta prepará pa bai Aruba i despues Ulanda.
E biahe di Aruba lo bai tuma lugá durante e wikènt di 6, 7 i 8 di yüni 2008 próksimo.
E delegashon aki lo bai konsistí di bintidos (22) hungadó, dos empayer, un masahista i un ekipo tékniko.
Hinter e delegashon aki lo biaha ku Insel Air den oranan di mainta pa perkurá ku e atletanan ta yega na tempu i por sosegá promé ku e promé wega ku lo tuma lugá den oranan di anochi.
Por último tambe NaBaFe ta informá ku djasabra último na Tio Daou a kombersá ku tata di Juan Carlos Sulbaran kende ta hibando un rekòrt di dies wega ganá i sero pèrdí na “college” di Merka.
E tata di Juan Carlos a bishitá e training pa por kombersá ku NaBaFe i alabes wak konta ku e preparashon di selekshon i prepará pa yegada di e su yu pelotero.

PEKIN, China, - Agensia ofisial di notisia Xinhua a bisa ku 5.000 persona a pèrdè nan bida den un solo distrito.
E esun agensia a indiká ku mas o ménos 900 studiante por ta derá bou di ruinanan di un skol sekundario na provinsia di Sichuan.
Un temblor di magnitut di 7,5 kalkulá riba eskala di Richter awe a sakudí provinsia chines di Sichuan, Sentro Geológiko di Merka a informá, i por a sinti e temblor n’e kapital tailandes, situá mas o ménos 3.300 kilometer di e episentro.
E Instituto Sismológiko di Pekin a elevá e temblor asta 8 grado di magnitut.
Ta kalkulá ku kasi 900 studiante ta bou di ruinanan n’e provinsia di Suchuan, agensia estatal Xinhua a informá.
Promé a bisa ku e sifra ofisial di morto ta 107 persona i 34 hende a resultá heridá.
Den prinsipio agensia estatal di notisia Xinhua a konfirmá di morto di 4 mucha eskolar ora dos skol a kai den otro pa motibu di e temblor n’e poblashon di Chongqing (sùitwèst di China), na provinsia di Sichuan, situá mas o ménos 300 kilometer di episentro di e temblor.
E mesun agensia di notisia a informá ku a manda trupanan n’e zona afektá.
Tambe a anunsiá ku Promé Minister, Wen Jiab, lo biaha bai n’e área.
Dos skol primario n’e lokalidat, na distrito di Liangping, a kai den otro komo konsekuensia di e temblor, un di esnan mas fuerte ku a okurí n’e pais asiátiko den 30 aña.

CARACAS, Venezuela, - E Presidente di Venezuela, Hugo Chávez, ayera a akusá Gobièrnu colombiano di ta trata di provoká un guera ku e meta di hustifiká un intervenshon armá di parti di Merka.
“Gobièrnu di Colombia ta kapas, asina mi ta bisa, e ta kapas di provoká un guera kontra Venezuela pa trata hustifiká intervenshon di Merka na Venezuela”, e mandatario a ekspresá den su mensahe di kustumber di djadumingu.
Den e programa “Aló Presidente”, Chávez a eksigí su kolega colombiano Alvaro Uribe, kende a presentá berdadero dokumentonan den su kontra, dor di referí n’e supuesto archivonan ku ta involukr’é ku gueria iskierdista di “Fuerzas Armadas Revolucionarias de Colombia” (FARC).
Gobièrnu colombiano a sigurá ku e archivonan tabata den kòmpiuternan konfiská na e kampamentu kaminda bosero di FARC, Raúl Reyes, a muri, durante un inkurshon militar colombiano na Ecuador, na mart último.

Foto: Hugo Chavez 1206

Presidente venezolano Hugo Chávez ayera ta papia durante su programa semanal “Aló Presidente”.

 

WILLEMSTAD- E desaroyonan rondó di e torneo di Chippie Polar Cup ta moviendo ku hopi positivisimo.
Kòrsou ta sperando un bankete di futbòl i hopi ta e fanátikonan ku ta buskando nan karchinan pa e partidonan ku tin di tuma lugá dianan 21 i 24 di mei próksimo den Stadion Ergilio Hato.
Mester bisa ku ta masha hopi interes tin pa e karchinan bou di dak i manera e trein ta moviendo awor aki ta antisipá ku e karchinan aki lo kaba pronto.
Project Support N.V. ta rekordá, ku e karchinan aki ta kosta 30 florin i mas ku klaro esaki ta nifiká ku esnan ku yega promé lo bebe awa limpi.
Karchinan patras di gol e entradanan ta kosta 20 florin. P’e sekshon di VIP e karchinan lòs pa kada dia lo kosta 150 florin, miéntras ku pakete pa tantu 21 komo 24 di mei ta solamente 250 florin.
Den kaso di e karchinan di VIP esakinan lo ta optenibel solamente via di sra. Mijanou Bolivar na number di telefon 569-1969.
Karchinan pa e tremendo kuadrangular aki ta optenibel na Boekhandel Mensing Caminada, Beep Beep Rio Canario, Beep Beep Brievengat, Koko Loko Punda, Koko Loko Brievengat, Tik Tak, SDK, Kusters Trading, Albert Heijn Supermarket, Wereld Stage i 4th of July Snack na Barber.
Hasi purá buska esun di bo si abo kier sinta bou di dak pa bo no keda desapuntá.
Djis kòrda kuantu hende a keda for di SDK p’e enkuentro entre Antia i Nicaragua i ta p’esei lo ta rekomendabel buska karchinan for di tempran pa Chippie Polar Cup ku sigur lo ta mas grandi ainda.

 

WEST VIRGINIA, Merka, - E karera presidensial demókrata mañan lo bai tene elekshonnan primario na West Virginia.
Ku solamente 28 delegado den wega, e estado chikitu aki situá wèst di siudat di Washington tin tiki di disidí den e lucha presidensial.
I muchu ménos ku e karera kasi resolvé na fabor di senador Barack Obama.
Fo’i dia e elekshonnan primario di siman pasá djamars na Indiana i Nort Carolina, ekspertonan, analistanan i medionan di komunikashon a pronostiká ku Obama lo bai ta ganadó di e karera.
Revista TIME inkluso a saka riba su portada un pòtrèt di e senador pa Illinois ku e título:” “And the winner is....” (I e ganadó ta......).
Hillary Clinton, sin embargo, a insistí na okashonnan ripití ku e lo keda den e karera, manera ademas su siguidónan a pidi.
“Naturalmente mi ta sigui!”, Clinton a sigurá djasabra último entre aplousonan di mas ku shen atmiradó na Shephardstown.
“Pakiko mi ta sigui? Pasobra mi tin ku sigui!”, Clinton a sigurá na un otro evento.
Obama, di su banda, tampoko ta hasiendo esfuersonan pa pusha su rival for di e karera, ounke ya e ta preparando kaminda.
Den entrevista ku kadena di televishon Fox News, inkluso el a deskartá yuda ku parti di sèn di su kampaña pa Clinton sali for di debenan.
“Mi ta gusta di por tin ku senador Clinton un amplio diskushon kon ami lo por lag’é sinti mihó riba e proseso, i di tin’é den ekipo mirando padilanti”, Obama a kontestá.

 

WILLEMSTAD - Durante un reunion di Ombudsmannan di Cairbe, ku a tuma lugá resientemente na Bermuda, Defensor di Pueblo, Fred Wiel tambe a asistí. Esaki a tuma lugá durante di un biahe di trabou na Bermuda ku a dura mas o ménos un siman.
Tur e islanan di Caribe ku tin un ombudsman, a topa ku otro na Bermuda. Einan a tuma lugá deliberashonnan interesante tokante di e trabou ku e defensor di pueblo ta desplegá. Tambe workshopnan a wòrdu organisá i ekspertonan konosí mundialmente a tene lekturanan interesante. ‘A trata di tópikonan, ku pa e defensornan di pueblo tabata interesante’, asina defensor di pueblo di Kòrsou, Fred Wiel, a splika. Entre esnan presente tabata e ombudsman nashonal di Ulanda i e defensor di pueblo di Sur Afrika.
Ademas di e defensornan di pueblo, tabata presente algun representante di e institutonan di derecho humano di Sentral Amérika. ‘E tabata un gezelschap miksto ku a enserá un manera pa kompartí ku otro, e eksperensianan di e trabou. E reunion aki ta tuma lugá kada dos aña, e defensornan di pueblo di region di Karibe, ta tene ku otro.
Fred Wiel kende ta miembro di direktiva, di e Asosashon Karibense di Defensor di Pueblo, a sigui splika, ku na e enkuentronan aki, ta invitá oradónan renombrá mundialmente, ku ta duna nan kontribushon pa ilustrá kon ta e manera di mas mihó pa ehersé e trabou di defensor di pueblo.
Na yüni awor, e desishon lo kai na unda e próksimo enkuentro di e defensornan di pueblo ta tuma lugá. No ta imposibel ku un enkuentro asina lo por tuma lugá na Kòrsou, pero esaki lo eksigí un koperashon di parti di entre otro gobièrnu di Kòrsou. Asina defensor di pueblo, Fred Wiel a splika, indikando ku lo e investigá e posibilidat aki. Segun señor Wiel, un reunion internashonal di defensornan di pueblo na Kòrsou lo faboresé nos isla i tambe nos ofisina di ombudsman.

WILLEMSTAD - Belasting Accountant Büró, BAB, no ta organisá e eksitoso Show di Dia di Mama mas. ‘E aña aki ta e último bes ku BAB ta organis’é’. Asina Sherwin Casper, direktor di BAB a bisa.
E aña aki atrobe tin masha bon reakshon riba e show di Dia di Mama, pero esaki tabata e último bia ku el a wòrdu organisá di e forma aki.
Segun Casper, e ta bai hinka su energia den un otro fundashon pa realisá e Show di Dia di Mama, ku a bira asina popular. Casper ta duna su kontribushon pa evitá ku e Show ta para. Komo motibu pa BAB stòp ku organisashon di e show di Mama, Casper a bisa, ku tin sierto reklamo ku Belasting Accountant Büró ta esun ku ta kontrolá i ku nan ta sinti nan mes obligá pa kumpra karchi pa e show. ‘Ami ta bisa ku un hende ku no tin nada di skonde, ni tampoko nada di pèrdè, no por tin miedu di kòntròl’. Casper: ‘Pero respetando e krítikanan aki, BAB a disidí ku e ta stòp ku organisashon di e Show”.
Refiriendo na e reklamonan ku tin, Casper a sigui bisa, ku tumando na kuenta ku nos ta biba den pais demokrátiko i tambe saliendo for di e punta di bista di su funshon, e ta respetá opinion di minoria. Pa medio di un fundashon nobo, lo kontinuá tòg ku e show, pasobra un grupito di hende no por para algu ku ta bon. “Si BAB tabata di mi, lo m’a bisa mesora BAB ta hasié, pero BAB ta di gobièrnu, di kua mi ta un direktor.’ Ta p’esei mi ta bai hinka e organisashon den un fundashon i nos ta organis’é mesun kos. Esaki ketu bai ku e intenshon, pa sigui yuda e muchanan di ménos rekurso. Si nos haña krítika, esei lo bin pa ami i no pa un organisashon ku mi no ta doño di dje’.

ARIES: Kambionan fundamental den bo sirkulo familiar ta aserkando i lo ser aseptá pa bo ku komprenshon. Tin amistatnan nobo ku ta habri bo wowonan pa eksperensianan nobo. 06.

TAURO: Bo intuishon super desaroyá ta guiabu manera nunka ántes. Disfrutá mas di bo bida dunando mas importansia na bo famia. 08,10,03.

GEMINIS: Plaka ta yega di un manera inesperá. Angelnan wardadó ta protehá tur loke bo ta balorá. Kere den bo rekursonan interno, den bo sabiduria natural. 07,44,29.

KANSER: Felisitá bo mes pa por a vense guera, tragedianan personal i frustrashonnan. Bo mente tin ideanan nobo i eksitante. 33,02,17.

LEO: Kontrolá bo impulsividat. Bo tin mayor takto pa no heridá sentimentunan aheno, en espesial bo famia òf bo pareha. 15,36,16.

VIRGO: Analisá bo momentu aktual, visualisá eksaktamente loke bo ta deseá, tin e balor di ser honesto ku bo mes. Libertat, independensia ekonómiko tin tur apoyo. 51,20.

LIBRA: A yega bo momentu pa realisá soñonan i ambishonnan. Bo ta obligá na ekspandé, kibrando fronteranan, riska pa realisá loke ántes a temorisábu. 12,15,22.

SKORPION: Bo ta kambia tur loke ta strobabu di traha den bo desaroyo intelektual i spiritual i ta preparábu pa tur loke bai na presentá. 20,11,35.

SAGITARIO: Bo ta deskubrí tur kos. Nada ta paralisábu, nada ta stanká bu i nada ta strobabu. Lesa klaramente den kurason di tur hende. Interpretá silensio. 02,39,10.

WILLEMSTAD - Pa djadumingu awor, por spera un manifestashon grandi riba Plasa Brion. Esei ta un dje desishonnan ku Aliansa Patriótiko a tuma despues di e enkuentro di djasabra último.
Djasabra, Aliansa Patriótiko a tene un enkuentro na Hòfi Barbolina den kua a invitá tur hende pa diskutí último desaroyonan.
E enkuentro a sirbi komo un forma pa desahogo pa hopi hende.
Loke a kore manera un liña kòrá den e enkuentro tabata – lógikamente – e oumento di preis di energia, esta tantu gasolin, diesel i pronto tambe awa i koriente.
Un dje kosnan ku mas ta molestiá hopi hende ta e forma ku gobièrnu a tuma e desishon pa oumentá tarifa. Hopi ta konsiderá ku tabata na su lugá pa gobièrnu a presentá alternativa kon pa dil ku e oumento di preis di energia i no djis simplemente pasa e oumento di preis di krudo pa e konsumidó.
“Nos a spera un maneho di parti di gobièrnu. Nos a kere ku gobièrnu lo a bin ku ideanan kon pa atendé ku e oumento di preis. Ami a kere semper ku un gobièrnu ta konsistí di hende ku ta pensa mas leu ku mi mes, ku ta bin ku pensamentunan inovativo. Pero kiko nos a haña? Un gobièrnu ku simplemente a pasa e oumento di preis pa nos. Tur pais na mundu ta bezig ta wak kon pa atendé ku e asuntu aki,” asina un partisipante na e enkuentro a bisa LA PRENSA.
Gobièrnu a demostrá ku e no sa kon atendé ku esnan di ménos rekurso, kon atendé ku krísis i tampoko kon atendé ku problemanan ku presentá. E pakete di medida anunsiá pa gobièrnu den fin di siman, pa e aliansa no ta sufisiente. Mester di muchu mas pa mitigá efektonan di e oumento devastador di preis di energia, segun nan ta argumentá.

WILLEMSTAD – “Kompanianan grandi ku ta gana hopi plaka na Antia, mester realisá, ku nan mester kontribuí na pais. Nan no por sigui gana tur plaka di mundu, miéntras ku situashon sosial na Antia ta motibu di hopi preokupashon”.
Esei ta loke Ronald van Raak, bosero pa Antia di Socialistische Partij a anunsiá.
Van Raak a denunsiá loke el a kalifiká komo eksistensia di paraisonan fiskal ku ketu bai ta eksistí na Antia.
Mi a komprondé ku tin mas di 300 kompania grandi ku ta ganando hopi plaka den e pais aki, pero ku no ta dunando nada bèk na pais.
E kos aki simplemente no por. No por t’asina ku e islanan ta pasando momentunan difísil anto otronan ta disfrutá di sirkunstansianan hopi faborabel, segun Van Raak.
Un ehèmpel konkreto segun el a menshoná, ta e kaso di eksistensia di e kompania Valero na Statia. E kompania no ta pagando kasi nada na belasting, pa kolmo e no ta empleá kasi niun siudadano di e isla tampoko den su empresa, segun Van Raak.
Van Raak a mustra, ku e ta hasi un investigashon pa determiná si e kompanianan aki ta kontribuí den otro forma ku e parti sosial di nan komunidat, “pero mi tin miedu ku esei tampoko ta e kaso,” el a bisa.
E bosero di SP a bisa, ku e no ta kere ku si e islanan aki haña nan obligá ta paga algu na belasting, ku nan lo bandoná e isla. Nan ta gana sufisiente pa kontribuí, sin ku esei ta afektá nan posishon finansiero, el a agregá.

WILLEMSTAD – “Ni maske eliminá Curoil, preis di energia ta keda haltu. E diferensha ta, ku e oumento ta dal e konsumidó den forma direkto. Curoil en realidat ta fungi awor aki komo un tipo di “buffer”. Ademas, bo mester keda ku un kompania ku ta hasi distribushon. Curoil t’ei pa yuda komunidat i e tin potensial pa krese sigur un 5 biaha e volúmen ku e ta awor aki”, asina Gensley Capella, direktor di e kompania aki a enfatisá den enkuentro ku prensa.
Pa hopi tempu tin komentarionan insistente ku ta bisa ku Curoil ta un dje faktornan ku ta pone ku preis di kombustibel ta keda haltu. Curoil ta kobra su parti pa distribuí kombustibel. Si merkado por a haña e kombustibel den forma direkto for di e produktor, anto esei lo skapa gastu i redusí e tarifa, di akuerdo ku e vershonnan ku por a tende. No mas ku ayera, por a tende e komentario aki atrobe, despues dje anunsio ku preis di gasolin, diesel, awa i koriente ta bai subi drástikamente.
Direktor di Curoil, Gensley Capella sinembargo a desbaratá e ponensia aki. El a bisa, ku pa basta aña kaba, Curoil ta pre finanshando preis di energia pa Kòrsou. Ta kalkulá ku e montante ei entretantu a yega 100 mion florin.
En realidat, asta ku e promé oumento ku ta drenta na vigor awe djaluna, ainda Curoil ta sigui prefinansiá preis di kombustibel, pasobra ainda e no a yega e nivel di merkado. Awor aki por ehèmpel, preis di gasolin en realidat ta 46 mas haltu i di diesel, 78 sèn mas karu. Komunidat lo mester a paga e preis mesora ku e suministrado ta kobra, segun Capella.

ROMA – Inter no a logra konkistá e scudetto djadumingu ora el a yega solamente na un empate i a permití pa Roma aserk’é pa promé bia na solamente un punto riba e penúltimo fecha di kampionato.
Inter a empatá 2-2 ku Siena dilanti mas di 70 mil tifoso ku a yena stadion San Siro pa selebrá e título nobo, miéntras ku Roma a gana Atalanta 2-1.
E ekipo milanés a keda ku 82 punto i Roma ku 81, di manera ku tur kos lo keda disidí den e próksimo i último fecha di kampionato italiano. Si nan kaba empatá, e título lo bai pa Inter, pasobra e resultadonan direkto entre nan dos ta favoresé.
Inter tabata den bentaha dos bia i Siena a logra empatá mes tantu bia. Na di 78 minüt, e defensa di Inter Marco Materazzi tabatin e oportunidat grandi di anotá e gol di triunfo ku lo a duna su tim e título, pero e kiper a kue e pinalti.
Inter a bai ariba ku un gol di kabes di e defensa franses Patrick Vieira na di 11, pero Massimo Maccarone a duna Siena e empate na di 30. E hóben Mario Bolatelli a bolbe manda Inter ariba ku un gol di kabes na di 45.
Despues, na di 70, manera un baño di awa friu a bini e empate atrobe di Siena ku un gol di e hungadó franses Houssine Kharja na di 70.
Ta e di dos bia ku Inter ta faya ku e gol desisivo, pues riba e fecha promé el a pèrdè 2-1 ku Milan.
Tur kos lo keda disidí ora Inter bai hunga ku Parma di su eks treiner, e argentino Hector Cúper, i Roma ta bai Catania pa e di 38 fecha.

Durante di konferensha di paisnan LGO Karibense:

WILLEMSTAD – Paisnan di Karibe mester sòru pa mas tantu posibel partisipá den ekonomia global ku ta un refleho di nan nesesidatnan i prioridatnan. Esaki tabata e mensahe sentral di e diskurso di Sekretario di Estado di Finansa, sr. Alex Rosaria, durante di un konferensha tokante di koperashon entre paisnan LGO Karibense organisá pa e Servisio enkargá ku Koperashon pa Desaroyo (DOS).
Pa siglonan largu e struktura ekonómiko mas bien ta un refleho di nesesidatnan di otronan en bes di esnan di nos mes. “A bira tempu pa kambia e strukturanan ekonómiko pa asina esakinan ta realmente un refleho di nos posibilidatnan, nos propio nesesidatnan i prioridatnan,” segun e Sekretario di Estado.
Mester surpasá e mentalidat di dependensia ku ta reflehá su mes den kerensia ku ta Gobièrnu mester hasi tur kos i stèns riba “bondat” di otro pais pa hasi lokual nos mes mester hasi. “Pa por tin éksito den ekonomia internashonal, bo mester ta eksitoso na kas promé. Nos mester tin e kurashi pa fleksibilisá nos merkadonan di labor i kapital i sòru pa un maneho ku ta stimulá kompetensia sano i eliminá práktikanan indebido di komersiantenan,” segun Rosaria a trese dilanti den su diskurso.
Banda di esaki, nos paisnan mester eksigí un partisipashon real den foronan internashonal ku ta trata temanan di komersio internashonal. Tambe ta importante pa nos paisnan chikí hasi mihó uso di konosementu di nos diáspora, esta nos poblashonnan ku a disidí di forma nan bida den otro pais. Finalmente Rosaria ta boga pa mas koperashon di nos paisnan den Karibe sitando e famoso poeta Cubano, José Martí, ku a bisa “Si no trabajamos juntos, juntos desaparecemos”.

WILLEMSTAD - Djabièrnè SVB a organisá un eksitoso simposio huntu ku minister di Salubridat Omayra Leeflang titulá ‘Stapnan pa Salú’ kaminda tabatin mas di 400 partisipante. Mester a usa un sala adishonal banda di ouditorium pa akomodá e kantidat èkstra di partisipante.
Oradornan di turno a enfatisá e importansia di moveshon pa nos salu. Den su maneho di salubridat úinister Leeflang a kuminsá konsientisá diferente grupo. E biaha aki a toka turno na dunadónan di trabou.
Obesitas ta un malesa króniko ku ta duna komplikashonnan den diferente órgano i sistema. E tratamentu ideal ta multi disiplinario i permanente. Moveshon ta partikularmente importante den prevenshon di obesitas, pero tambe den mantenshon di pèrdida di peso durante tratamentu.
Tabatin diferente oradornan entre otro fisioterapista R. de Wit, dietista i biólogo van Eijndhoven, enfermera Voogsgeerd, drs. Ross-van Dorp, spesialista di beweging Jacqueline Hol i dòkter Oosterhof. Minister Leeflang i sr. Calmes tabata na enkargo di introdukshon.
Un punto importante ku tambe a bini dilanti ku e kuminda adekuá pa e persona adekuá ta sòru pa un bon peso, ménos absensia na trabou i un aktitut di trabou mas aktivo.

WILLEMSTAD – E asesinato di djasabra último, kaminda deskonosínan a hinka e hòmber Melvin Kopra (42), ta e di tres den un periodo di 4 siman. Kopra a muri den Yuconweg den Marchena kaminda e drama a tuma lugá. E ta e di 8 víktima di asesinato pa e aña akí.
Vershonnan no konfirmá pa polis ta indiká ku e víktima a kaba di sali será un dia promé. Ora el a bai buska su outo ku el a laga na un garashi, promé ku el a kai será, a resultá ku ladronnan a hòrta piesa for di e outo. E víktima lo a agredí e mekániko di tal forma, ku amigunan di e mekániko a bai regla kuenta ku e víktima. Tin vershonnan ta sirkulá tambe, ku e víktima lo a maltratá un hende grandi djis despues ku el a sali liber. Polis ta investigando tur e vershonnan akí pa asina trata na solushoná e kaso.
Despues ku den luna di yanüari tabatin 5 kaso di asesinato, luna di febrüari i mart tabata trankil. Sin embargo aprel a kuminsá ku un asesinato ku a tuma lugá dia 6 i un ku a tuma lugá dia 23. Di e 8 asesinatonan di e aña akí, na dos okashon e agresornan a usa arma blanku. Na 6 okashon nan a usa arma di kandela i na 1 okashon e agresor a usa un piki.