MANCHESTER, Inglatera – Dick Advocaat tabata e piesa klave di un temporada di tres título di Rangers na 1999. Nada malu pa su debut.
Pero e ulandes no ke pa Walter Smith, e treiner aktual di e tim eskoses, ta pone e logro ei un banda. Smith ta bai pa kuater título den temporada i su chèns grandi ta presentá djarason den e final di Kopa UEFA kontra e tim Zenit di Advocaat.
Advocaat a bai di Rangers na 2001 i e ta dilanti e posibilidat di daña e ilushonnan di su eks ekipo.
“Lo sera un sírkulo”, Advocaat a bisa. M’a bisa for di komienso ku lo mi ke enfrentá Rangers den e final i parsemi fantástiko ku lo ta asina”.
Zenit ta un ekipo ruso ku a perkurá pa e sorpresa grandi di laga na kaminda e todopoderoso Bayern Munich den semi final.
“Nos a superá atversarionan mas fuerte ku Rangers”, Advocaat a trese dilanti. “I nan a derotá rivalnan mas importante ku Zenit. Na e alturanan aki ya bo no por ta sinti bo mes nervioso. Bo mester sali pa hunga i pa gana”.
Zenit, buskando su promé trofeo europeo, a konta ku yudansa di outoridatnan di futbòl ruso ku a aplasá nan kompromisonan den liga lokal ku bista riba e final.
Advocaat por a hiba e ekipo pa su Ulanda natal, kaminda djasabra nan a empatá 2-2 ku AZ Alkmaar den un wega amistoso.
E otro banda dje medaya ta bini di Rangers, ku a risibí un trato hostil di parti di Liga Premier eskoses. Rangers mester a hunga djasabra kontra Dundee United, ademas di un otro wega promé ku djarason.

ROMA – Parma a anunsiá ofisialmente djaluna e retiro di e treiner argentino Hector Cúper, bispu di e wega desisivo i último di e kampionato ku Inter, kaminda lo disidí si e ta keda den Seri A.
Den un komunikado kòrtiku publiká riba su página di Internèt, e klup a informá dje retiro di e treiner i di su asistente Gustavo Siviero, na kendenan nan a dirigí e gradisimentunan di rigor “pa nan kompetensia i seriedat”.
Andrea Manzo, treiner di e divishonnan hubenil, lo tuma enkargo di e tim den e próksimo wega di djadumingu ku Inter. E klup di Milan tin mester di e viktoria pa e koroná su mes kampion.
E anunsio a tuma lugá despues ku medionan lokal, sitando fuentenan yegá di Parma, a informá ku e presidente Tommaso Ghirardi lo a konfirmá e konfiansa na e treiner. E retiro a ser tumá komo sigur djadumingu atardi pa motibu di no a salba Parma di bai abou delantá.
El a tuma direkshon di e ekipo 12 di mart, ora el a hañ’é na e puesto unu promé ku e penúltimo puesto, e mesun posishon kaminda nan ta awor aki.
E tres últimonan riba e tabla lo degradá pa Seri B. Parma mester gana riba e último fecha i ku Catania, ku tin dos punto di diferensha riba dje, lo pèrdè komo lokal kontra Roma.
Cúper a firma un kontrakt te 30 di yüni 2008, kende, segun prensa, lo por gana 460.000 dòler pa restu di e diesun fechanan ku falta pa kaba kampionato. Lo el a risibi un premio importante si e salba e ekipo di bai abou.

ORANJESTAD- Tur cas cu ta cliente di SETAR a ricibi nan sticker di SETAR di BO TAMBE! Hunto cu nan ultimo cobranza di telefon.
Pronto lo bin posternan tambe cu lo bin na e diferente casnan na Aruba cu e habitantenan y clientenan por pone riba nan cas, auto of tienda y asina participa pa gana durante e proximo lunanan cu ta bin.
Pronto tambe e bus di SETAR di BO TAMBE! Lo cuminsa bishita e barionan di Aruba.
Desde temporada di Carnaval na Januari 2008, SETAR su flanelnan tabatin riba nan: SETAR di BO TAMBE! Keda Pendiente!
E temporada cu ta bin den e proximo simannan lo anuncia e bario y e dia cu SETAR lo pasa den e pueblo di Aruba cu hopi premionan manera Yamadanan Gratis y premionan manera celularnan, Wireless Broadband, DSL etc.
Tur cliente di SETAR sea di telefon fiho como celular a ricibi den nan cobranza di e luna aki stickernan cu nan por pone riba nan cas na un caminda visto cu por mira di leu y asina participa pa gana na momento cu SETAR drenta e bario. Tambe por pone e sticker riba bo auto y participa pa gana premionan atractivo.
Tur luna SETAR lo anuncia kico ta e ofertanan cu lo tin pa cu SETAR di bo tambe!
Pa e clientenan cu no a haya sticker por pasa cualkier Teleshop y busca nan sticker. Tambe den medionan di comunicacion lo sali e poster cu tambe por usa pa pega riba cas of na auto.
Esaki ta un forma den cual SETAR N.V. ta desea di demostra aprecio na comunidad di Aruba y tur su clientenan cu ta e fundeshi y estimulo pa e compania di Aruba aki continua cu e empeño pa tene Aruba al dia cu lo ultimo riba tereno di Telecomunicacion.

ORANJESTAD – Diasabra otro siman, 24 di mei, Quota International of Aruba ta organisa su seminario anual, cu e tema “Leadership as a habit of mind” cu dr. Barbara Mackoff. Barbara Mackoff, autor di diferente boeki, y alaves un coach riba tereno di liderazgo, lo elabora riba con pa pensa y actua como lider den tur situación.
Mas y mas nos tur ta bira mas conciente di e necesidad di liderazgo den nos bida personal y profesional. Esaki ta importante den companíanan, gobernación, na nos scolnan, den nos hogarnan y pa nos mes.
Diferente companianan, tambe na Aruba, ta mira tipo di seminario nan asina como un posibilidad pa brinda un training na empleadonan. Barbara Mackoff ta duna trainingnan di liderazgo na diferente organisacion rond mundo, incluyendo IBM, AT&T, PepsiCo, Dupont, Boeing y Nintendo.
Mirando esaki hopi hende ta hasiendo uso di e oportunidad aki cu Quota ta brinda na Aruba.
E seminario no ta solamente pa esnan cu ta trahando den posición di lider actualmente. Tur hende ta lidera na un of otro momento, den famia, den organisacionan, den gruponan deportivo, etc. Barbara Mackoff lo papia tocante 5 habito of custumber mental cu ta caracterisa e bida y trabow di lidernan exepcional.
E ta bin prepara pa mustra nos e fuente di nos propio potencial pa liderá. E lo inspira nos na un manera cu lo guya nos den e manera cu nos ta pensa y responde na nos desafionan den nos bida diario.
E seminario lo tuma lugar otro siman dia 24 di mei 2008, di 1.00 p.m. te 6.00 p.m. na Renaissance Conference Center. Ticketnan ta na benta serca miembronan di Quota, y na Giselle Department Store, Antraco Bookstore, Mrs. Minute y T.H. Palm & Co. pa Afl. 75,00.

ORANJESTAD- En conneccion cu e celebracion di Dia Internacional di Museo, Museo Historico, situa den Fort Zoutman y bou di Willem III Toren ta pone extra atencion riba hubentud.
Dia 18 di mei proximo, esta diadomingo awor, Museo lo ta habri di 10 or di mainta pa pa 2 or di merdia. Muchila Creativo a uni cu Museo Historico pa e dia specialo aki y lo pone atencion na Hubentud y Historia di Aruba.
Cualke persona cu tin algo di balor historico y interesante di comparti cu nos hubentud ta mas cu bonbini. Microfono lo ta habri. Entrada pa tur hende lo ta gratis. Lo tin rondleiding cu splicacion den museo como algo extra pa accentrua e dia di celebra existencia di museo den mundo y n'Aruba.
Tambe diadomingo awor, dia 18 di mei ta sirbi como un dia pa entrega na Museo tur locual cu bo ta kere ta bale la pena pa warda pa e generacionnan cu ta sigui nos. Artefacto, potret historico, documentonan valioso, instrumentonan di musica di antes. E curatornan di Museo lo evalua locual a worde entrega riba nan merito historico, folklorico of di informacion importante.
Museo Historico lo ta habri for di 10 or te cu 2 or di merdia, lo tin musica, e bar y cushina cu tradicionalmente ta bon surti.

ORANJESTAD- E aumento di adictonan ambulante y domestico a conose un aumento dramatico, caminda dia tras dia famianan ta wordo afecta na un forma doloroso.
Mayornan cu ta mira nan yuinan cu a bira esclavonan di droga cu ta kibra y horta pa asina nan satisface nan bisio.
Tata nan y mama nan cu ta bandona cas pa dia nan largo y drumi den un chollerhouse.
Esposo nan cu ta maltrata nan esposa pa motibo di nesecidad pa placa pa cumpra droga y alcohol.
Yui nan cu ta sufri trauma nan cu tin efecto ariba nan pa bida largo.
Tin hopi famia nan cu a experimenta cu nan sernan keri cu después di a pasa den centro nan di rehabilitación a cai back na diferente ocacion den adiccion.
Hopi biaha nos a lubida cu Dios ta esun cu tin e poder y autoridad pa hasi un adicto liber di su tormento cu e y su famia ta biba.
E necesidad pa envolvi iglesianan Cristian den un maneho di rehabilitación di e adictonan
ta altamente necesario.
Esaki ta un trabouw hopi mas profundo cu simplemente manda un persona un centro di rehabilitación of crea un shelter pa laga adictonan banja y come sin ningun tipo di speransa di rehabilitación y re- integración den comunidad.
Pa esaki por sosode mester bin un union den e iglesianan, Catolico, Evangelico, Pentecostal, Metodista, Adventista, Bautista, Protestante, Anglicano etc.
Pues tur cu ta kere den e poder di liberación di Jesús, kende a bin aki na mundu no pa condena sino pa rescata loke tabata bayendo perdi y hasi catibonan (adictonan ) liber y tambe sana enfermonan fisicamente y spiritualmente.

WILLEMSTAD – Polis a detené un shofùr di bùs awe mainta, na momentu ku e tabata bayendo Konseho Insular huntu ku otro shofùrnan di bùs. E presidente di e bònt di shofùrnan di bùs, Andres Everitz, a bisa LA PRENSA ku e shofùr tabata kumpliendo ku un derecho pa bishitá un reunion públiko. Polis ta bisa ku el a opstakulisá tráfiko.
E shofùrnan di bùs awe mainta lat a disidí ku nan ta bai Konseho Insular kaminda tabatin un reunion públiko ta tumando lugá. E reunion tabata pa atendé e destinashon di e área di Rif. Everitz a bisa ku nan a bai Konseho Insular pa informá kon ta pará ku e tópiko oumento di kombustibel, pasó nan ta haña ku e tópiko akí mester ta riba agènda pa atendé ku urgensia. “Nos a bai awe mainta pasó nos ke sa ki dia ta atendé e punto akí. Ta nos derechi komo shofùr di bùs pa informá ki dia nos problema ta haña atenshon. Ta p’esei nos a bai Konseho Insular. Na momentu ku nos a yega den e área di Pietermaai, ya polis a sera kasi tur entrada pa drenta Punda. Tantu e kaya di Bestuurscollege i esun di Konseho Insular tabata blòkiá i diferente polis i funshonario di SKS tabata pará na e blokeo.
Pa motibunan te ainda deskonosí, polis a detené un miembro di direktiva di STU, bisando ku el a stroba tráfiko.”
Everitz a bisa ku ya a yama tur otro shofùr di bùs pa nan tambe bin na e sitio, pasó miéntras polis no laga nan kolega den libertat nan lo no bai for di kaminda nan ta. E malkontentu bou di e shofùrnan ta pa motibu ku Gobièrnu a oumentá e tarifa di bùs sin ku e shofùrnan a pidi esaki. E shofùrnan ta alegá ku di e manera akí Gobièrnu ta instigá pueblo kontra shofùrnan di bùs dor di oumentá e tarifa sin ku e shofùrnan a pidi pa e oumento. Finalmente Everitz a bisa ku nan tabatin otro alternativanan ku por a suavisá e subida di disel. Entre otro por a nivelá e tarifa di plachi di number. Segun Everitz, un vehíkulo ku ta usa gasolin ta paga ménos pa number di outo ku un vehíkulo ku ta usa disel. Tambe e seguro pa un bùs ku ta usa disel ta 4 mil i piku florin pa aña kompará ku un 300 i piku florin pa un vehíkulo ku ta usa gasolin.

WILLEMSTAD – Tin diferente bòrchi di tráfiko destruí último dianan. Ounke ku e fenómeno akí ta konosí riba kareteranan di Kòrsou, último dianan e bòrchinan destruí a bolbe hala atenshon. Riba e portada di LA PRENSA di ayera nos a pone atenshon kaba na e fenómeno akí.
No ta promé bia ku tin diferente bòrchi di tráfiko destruí na mes momentu. Regularmente por nota e bòrchinan akí na diferente sitio rònt Kòrsou. Sin embargo den e último dianan esaki a hala èkstra atenshon. Den hopi kaso e bòrchinan akí ta kibra ora outomobilistanan dal den nan. Tin kaso tambe kaminda vandalismo ta kousa di e destrukshon. Pero no opstante e kousa, DOW ku ta responsabel pa e bòrchinan akí, ta tarda hopi pa drecha e daño i remplasá e bòrchi destruí.
Lei ta stipulá ku esun ku destruí e bòrchi ku su vehíkulo, ta responsabel pa e daño kousá na e mobilario di kaya. Den e kaso akí polis tin ku traha un prosèsverbal, loke lástimamente kasi nunka ta sosodé. Outomobilistanan ku okashoná e daño, den kasi tur kaso ta kore bai. Ora ta trata di vandalismo, naturalmente nunka no tin polis den serkania. Malechornan ta wak ora kosta ta liber pa nan kometé nan fechoria.
Di tur manera ta bon pa DOW ta mas atento ora deskonosínan destruí e bòrchinan i sòru pa drecha esakinan mes ora. Falta di un bòrchi fásilmente por kousa un aksidente, ya ku e outomobilista ku no konosé e sitio no ta haña e atvertensia ku e bòrchi tin ku duna. No mester lubidá ku tin hopi turista ku ta hür outo i kore rònt na sitionan ku nunka ántes nan a kore. Pa e hendenan akí ta importante pa tin e bòrchinan di tráfiko pa indiká situashonnan di preferensia òf krusadanan peligroso.

WILLEMSTAD – Un grupo representando Plataforma Otrobanda, a reuní awe mainta dilanti di e edifisio di Konseho Insular. Pa ekspresá nan malkontentu ku e manera ku gobièrnu ta atendiendo ku nan Plan Mayó, nan a parti foyeto riba kua nan a ekspresá nan malkontentu.
E grupo a bai na e sala di reunion di Konseho Insular kaminda awe mainta diputado Anthony Godett mester a kontestá preguntanan relashoná ku e proyektonan di de Veer i Cayco. E dos proyektonan akí ta punto di diskushon últimamente, ya ku tur e dos partidonan tin un plan pa desaroyá e área di Rif. De Veer ta bisa, ku el a entregá su plan for di novèmber aña pasá, miéntras tin indikashon ku diputado Godett a negoshá ku Cayco i ku e negosiashonnan akí a konkluí entretantu. Di otro un banda tin e gruponan di Otrobanda ku a presentá un Plan Mayó for di aña 2000 i nunka a risibí un kontesta.
Riba e foyeto ku nan a parti awe mainta nan ta bisa: “Tereno di gobièrnu ta propiedat di pueblo i ku desaroyo di tereno di gobièrnu mester benefisiá pueblo. Esei ta posibel usando ingredientenan simpel manera 1). Krea espasio i oportunidat pa tantu e desaroyadó grandi komo invershonista chikí, pero tambe pa e bendedó humilde di kaya i tur otro gremio di komunidat. Laga tur partisipá den e posibilidatnan pa krea trabou i entrada ku e área ta ofresé: un ekonomia partisipativo.
2). Krea un ambiente di siudat ameno den un desaroyo abierto kaminda tur hende, tantu lokal komo turista, por sirkulá libremente. Ke mèn un área sin muraya será: un siudat habrí.

WILLEMSTAD – Un grupo di akshon Bèlga ta eksigí pa prohibí plantamentu di palu kantu di kaminda. E eksigensia a bin despues di e morto trágiko di e futbolista Francois Sterchele. Sterchele a dal ku su outo den un palu riba e kaminda E34.
E grupo di akshon ta eksigí pa kita e palunan for di kantu di kaminda òf pa pone nan patras di ‘vangreel’. Esaki lo evitá hopi morto den tráfiko. “Un palu di 15 cm diki lo no kibra fásil ora un vehíkulo dal den dje. Konsekuentemente esaki lo kousa daño konsiderabel na e vehíkulo i den sierto kaso morto di esnan den e vehíkulo”, e grupo di akshon a skibi den un komunikado.
Pa loke ta trata kareteranan nobo, e grupo ta eksigí pa prohibí plantamentu di palu kantu di e kareteranan akí. Finalmente, gobièrnu mester laga kap e palunan ku ya ta plantá kantu kaminda riba otro kareteranan, òf kita nan i planta nan di nobo tras di ‘vangreel’, segun e grupo. E kustumber pa planta palu kantu di kaminda ta data for di tempu di Romanonan. E palunan mester a sòru pa sombra i fresku pa e sòldánan ku tabata kana den desfile. Na Ulanda no ta eksistí un diskushon enkuanto palunan plantá kantu di kaminda. Al kontrario: Rijkswaterstaat a laga planta diferente sorto di palu kantu di e kaminda prinsipal A50, pa asina midi kua di nan ta saka mas tantu ‘fijnstof’ i CO2 for di airu.

Kòrsou

Akí na Kòrsou no tabatin morto den tráfiko último añanan, kaminda palunan kantu di kaminda a hunga un ròl. Loke si a kousa diferente morto tabata kuránan di kas trahá di blòki. Den terminologianan di siensia di tráfiko ta papia di ‘fixed hazardous objects’. Esakinan ta ophetonan duru kantu di kaminda ku por forma un peliger pa outomobilistanan den kaso di un aksidente.

Skina di Sorti, awe djamars 13 di mei di 2008, ta kuminsá ku deseá un i tur un bon dia. Den bida, ounke por dura poko, bo ta paga pa e desapuntonan ku bo ta kousa. Den polítika, keda sin kumpli ku e persepshon ku bo krea serka di elektorado ta resultá den rechaso. E aktual koalishon su kaida den popularidat ta ser kamuflá pa presensia di un lider di tendensia karismátiko manera ta e kaso ku Emily de Jongh-Elhage.
****
PAR a kai den un “trance” di defendé lokual ta wòrdu hasí en bes di sòru di hasi lokual partido i lider polítiko di PAR en partikular a primintí e komunidat. Nivel di bida no ta mehorá (no por kulpa PAR pa e impakto di desaroyo global, pero bon maneho ta enserá mira padilanti i esei no a sosodé) i kalidat di gobernashon ta kuestionabel.
****
PNP na nivel insular ta sinta ku konsekuensia di mal eskoho di kartera i despues un mal aserkamentu stratégiko pa e karteranan skohe. Diputado Humphrey Davelaar a sali ku demasiado pretenshon riba kosnan (nombramentu na Selikor) ku internamente koalishon ta vulnerabel riba dje.
****
FOL di su parti no a asumí e papel den sombra ku ta korespondé un partido ku a haña sla formal di elektorado. FOL a hasi mal uso di su posishon klave denter di koalishon dor di e rivalidat insano entre MAN i PAR. Un rivalidat ku riba término korto a duna FOL un posishon di poder denter di koalishon.
****
Den un koalishon ku pretenshon distintivo (di kalidat i no kantidat), bo ta fèrwagt proksimidat pa lokual ta kantidat di akshon i ekselensia pa lokual ta e manera ku ta akshoná i nivel di lokual keda produsí. Efektividat (ménos akshon, pero mihó resultado) i efisiensia (ménos desperdisio) mester ta e lokual mester reflehá den e lokual ta wòrdu hasí.

ALVES
Matilde Veira
A laga atras su yunan Jose Albes Cabral i esposa, Manuel Agostinho Cabral, ñetunan Maria Jose de Andrade Pereira, Bernadeta de Quintal, Jose da Silva Coista, Fatima da Silva, Luis Silva da Costa, Alondra Manuel Cabral tur ku nan famia. Akto di entiero ta djarason 14 mei for di misa Montaña pa santana Montaña. Bishita 9or-10or siguí pa un s.s. di misa. Trahe alegre.

BLIJDEN
Mildred Rosita
Mihó konosí komo Chichi
A laga atras su kompañero Demeterio Eduardo, yunan Humfry Eduardo i Minerva Soerka, Marelva Eduardo i Frensel Regina, Eduard Eduardo, Minouska Eduardo i Eugene Steba, Shulmar Eduardo. Akto di entiero ta djarason 14 mei for di El Consolador pa santana Gr. Kwartier. Bishita 9or. Promé ku entiero tin un s.s. di misa 11or. Trahe alegre.

WIEL
Julia Erita
Mihó konosí komo Yuya
A laga atras su ruman Max Keyzer, subrino(a)nan Sidney, Otmar, Meredith, Roussel, urvin Alexander, Loudrid Ortega-Alexander, Eric, Ruthmila, Majelin Wiel, Shermun Graña, Sharlies Rietveld-Bernabela, Giblert Bernabela i tur sobrá subrino(a)nan. Akto di entiero ta djaweps 15 mei for di misa Montaña pa santana Montaña. Bishita 1or. Promé ku entiero tin un s.s. di misa 3.30or.

ALBERTO
Adriaan Emiliano
Mihó konosí komo Pietje
A laga atras su ruman Michel Alberto i Violeta Phelipa, primu(a)nan Bequita Alberto, Ibi West i Signa Alberto, Edgar Muzo. Akto di entiero ta djarason 14 mei 11or for di El Tributo pa santana Westpunt. Bishita 9or.

Prof. Dr. Mr. Ir. Ing. Drs. Lorito (MA, MBA, MSc. MURP. SLURP. WHATEVER.) ta yama tur hende un felis djamars. Awe ta dia 13, por lo general konsiderá pa diferente hende komo un dia di suerte. Otronan ta konsider’é un dia di mala suerte. Laga nos sa kiko bo ta pensa!
*********
Nos a kòrda riba masha hende ku nos a atvertí pa no atendé ku sierto figuranan, pasobra nan ta pega ku nan breu. Bicho tambe a haña i otronan tambe ta na kaminda pa haña. Tin hende masha kobarde ku tin boka masha grandi, pero ora bo konfrontá nan, nan ta baha nan kara. Awor nan ta kana bisa ku Bicho a subi preis. Bicho a kontestá nan bèk: mi no ta doño di niun pòmp!
*********
Lorito ta pronostiká for di awor aki, ku pronto e próksimo figura lo haña su lès. E lo haña su lès, pasobra Lorito si ta kere ku rosea di un grupo kolektivo ku bo ta hasi daño, sigur si nan no por defendé nan mes, lo gara bo tambe. Loke nos ta atvertí tambe ta, pa no laga tin un interkambio físiko den e kaso aki. Tin hende ku no ta tuma i nan tin nan mes manera pa atendé nan asuntunan. Ojo!
**********
Na Saba ayera mainta ta via via tur hende a tende ku preis di produktonan petrolero a subi drástikamente. Einan no tabatin asuntu di konsultá ni nada di komishon. Ora e hendenan a lanta nan a tende ku preis a subi. Nos ta menshoná e asuntu aki djis pa hende komprondé, ku nos ta bendishoná ku aki nan sikiera por papia riba e asuntunan aki promé. Asina mes tin hende ta reklamá! Por sierto ku preis di gasolin a subi te na 2.41 sèn pa liter, miéntras ku preis di gasoil a subi te na 2.30 pa liter. E isla ta sklama, pero nan no tin Komishon di Energia!

WILLEMSTAD – Diputado di Infrastruktura Anthony Godett a sigurá awe mainta ku tur konseho ta kla pa desaroyo di e área di Rif. “Nos tin e konsehonan di e servisionan korespondiente, den e kaso aki di Domein, DROV i AJZ”, asina e diputado a bisa.
E diputado a anunsiá ku e lo biaha pa Aruba e siman aki pa bishitá Meta Corp. i mira di serka e desaroyonan. Na Aruba e lo topa tambe ku representantenan di Grupo Cayco, segun el a informá den Konseho Insular. E diputado a bisa ku e no tin ningun problema ku Meta Corporation. Ya kaba e tabatin kontakto ku Eduardo de Veer, presidente di e Grupo ku ta desaroyando parti di e área di Rif. “E kontakto ku De Veer tabata ameno. Den 17 aña den polítika ta di dos bes ku mi tabatin kontakto ku De Veer. Pa bisa ku mi ta kontra De Veer no tin base”, asina diputado Godett a bisa.
E diputado a rechasá tambe alegashonnan, den sentido ku tin kosnan straño rondó di e grupo Cayco. “Ora ta trata di un proyekto di 150 mion dollar i un polítiko di pueblo i ku ta traha pa pueblo bin ku un idea semper ta bin ku kuestionamentu. Ta di kon mester ta asina?”, asina diputado Godett a puntra.
E diputado tabatin krítika fuerte riba sierto medionan di prensa pa e manera ku nan a bin ta publiká riba e kaso aki. Prinsipalmente e manera ku algun medio a hinka e proyekto di Cayco den un ambiente “dudoso” a pone ku e mandatario a kunsumí masha. El a bisa bon kla, ku e no ta bai aseptá e tipo di kosnan aki mas. “Mi a bisa for di desèmber, ku mi no ta aseptá mas ku ta mancha mi nòmber. Esun ku hasi esei mester karga e konsekuensianan”, asina e diputado a bisa.

WILLEMSTAD – Ámbos Gobièrnu a ekspresá satisfakshon ayera despues ku un delegashon ministerial di Antia a topa ku un delegashon ministerial di Aruba pa atendé diferente punto pendiente. Ta e promé reunion ku ta tene na nivel di e Konseho di Koperashon Ministerial for di febrüari 2006. Diferente motibu a pone ku no por a reuní, anke e Areglo di Koperashon ta bisa bon kla ku e dos Gobièrnunan mester reuní kada 6 luna.
P’esei no ta nada straño ku e agènda di ayera a konsistí di 19 punto.
Promé minister di Antia Emily de Jongh-Elhage a bisa ku e hechu ku Aruba a bin ku 5 minister ta un indikashon di e seriedat di e enkuentronan aki i puntonan ku ta pendiente pa atendé. Segun e mandatario, por konkluí ku e relashonnan entre e dos paisnan ta kordial i tur dos a ekspresá e deseo pa atendé puntonan di atenshon den forma mutuo i den konsulta ku otro. E relashonnan a bira ménos bon resientemente despues ku un mandatario antiano a ekspresá krítika kontra Gobièrnu di Aruba. Aruba no a gusta e remarkenan i a kanselá e sita anterior. Pa awor aki ta parse ku tur kos a plakia. “Despues di e reunion aki no por konkluí ku nos relashonnan ta kordial. Esei no por ta otro si konsiderá e lasonan kultural i familiar históriko ku tin entre e dos paisnan”, asina e mandatario antiano a bisa.
Pa loke ta trata e puntonan ku a deliberá riba nan, e dos mandatarionan a bisa ku lo duna sosten na otro pa loke ta trata e kambionan estatal ku ta na kaminda. Promé minister Nelson Oduber a anunsiá ku pa otro aña Antia no por konta mas ku sosten finansiero di Aruba pa Fondo di Solidaridat. Esei ta relashoná ku e hechu ku otro aña Aruba no por konta mas ku yudansa finansiero ulandes. Promé minister Oduber a bisa ku for di 1986, Aruba a kontribuí ku mas ku 100 mion den e fondo aki ku a establesé na 1986, tempu ku Aruba a haña status outónomo pa yuda e islanan mas chikitu di Antia.

WILLEMSTAD – Fundashon pa Konsumidó a konstatá ku preisnan pa periodo di risibimentu ta varia di supermerkado pa supermerkado. Algun kaminda e diferensianan ta sustansial, asina Fundashon pa Konsumidó a konstatá den su último investigashon. Un biaha mas a bai e petishon na komunidat pa wak tur artíkulo di serka promé, kompará preis pa despues numa kumpra.
Pa e temporada di risibimentu aki Fundashon pa Konsumidó a hasi un komparashon di preis di e produktonan for di e makutu di risibimentu. For di e investigashon aki a resultá ku Mangusa Rio i Mangusa Seru tabatin mayoria produkto na un preis mas barata, miéntras ku Alves Supermarket a resultá e supermerkado mas mihó surtí. Manera ta kustumber Fundashon pa Konsumidó a pidi Servisio pa Asuntunan Ekonómiko, hasi e kòntròl di preis riba produktonan den nos makutu. E produktonan ku a ser kontrolá mayoria ta ingredientenan òf produktonan ku no ta kai bou di preis máksimo stipulá dor di Gobièrnu. Fundashon pa Konsumidó na su turno a analisá e resultado di e investigashon i a pone tur e preisnan den un tabèl. Durante e investigashon aki a hasi un komparashon di preis i no a tene kuenta ku e kalidat di e produkto. Ta p’esei Fundashon pa Konsumidó ta hasi un apelashon na tur konsumidó pa wak bon promé ku nan kumpra. Konsumidó, e situashon aktual ta eksihí pa bo bira mas konsiente. E kòntròl di preis aki ta yuda bo usa bo sèn na manera mas efisiente. Kompará preis i kalidat, kòrda wak por ehèmpel fecha di vensementu di e produkto i tambe si e no ta daña promé ku kumpra. E aktividat di kòntròl a tuma lugá di 10 pa 24 di aprel 2008. Na e okashon aki Servisio pa Asuntunan Ekonómiko a bishitá 21 diferente establesimentu. A kontrolá preis di un kantidat di 134 produkto ku nos a pone den e makutu di produktonan pa risibimentu. Tambe a kontrolá sierto bebida. E kategoria di e produktonan ta: suku brùin, tarwemeel, baking powder, cacao, aroma, ingredientenan pa bolo pretu, suku pa blancha bolo i bebida.

 

Ta studiando posibilidat pa usa kachó tambe na Bon Futuro


WILLEMSTAD – Resientemente minister di Hustisia di Antia David Dick a risibí un presentashon di e agentenan i kachónan ku Duana di Antia Ulandes a entrená, spesialmente pa detektá arma, droga, plaka i tambe eksplosivo. Duana a ofresé un treining di 13 siman na kual dos miembro di Kuerpo Polisial di Aruba i unu di Sürnam tambe a partisipá. Esaki den kuadro di e koperashon ku ta eksistí entre Ministerio di Hustisia di Antia Ulandes, Aruba i Sürnam, na kual koperashon Duana di Antia tambe ta duna sosten.
Kada 6 luna e Ministernan di Hustisia di e respektivo paisnan ta bini huntu den un asina yamá “Tripartite” pa repasá akshonnan ku ta resultado di e akuerdo di koperashon ku nan a firma i asina profundisá i amplia e koperashon aki. Durante e enkuentro aki, diferente aspekto tantu riba tereno operashonal komo tereno di maneho ta keda diskutí, ta analisá desaroyonan ku a tuma lugá durante e último lunanan i ta traha palabrashonnan nobo. E siguiente Tripartite ta tuma lugá na Sürnam na kuminsamentu di yüni próksimo.
Duana ta kai bou di e Ministerio di Finansa i tin un ròl di kontrolá tur traspaso di nos fronteranan di produkto legal i ilegal, prinsipalmente na hafnan i aeropuertonan di Antia. Ademas Duana ta investigá esnan ku ta hasi nan mes kulpabel na aktonan kriminal riba e tereno di importashon, eksportashon i trafikashon di entre otro produktonan ilegal manera arma, droga, plaka i eksplosivo. Pa tal motibu su sosten na e koperashon ministerial aki ta di sumo importansia. Duana pa basta aña huntu ku entre otro Kuerpo Polisial, Warda Kosta, KMAR i otro instansianan ta koperando pa redusí e tipo di krímennan menshoná.

WILLEMSTAD - Resientemente un funshonario di FBI di Barbados a hasi un bishitá di trabou na Landelijk Politie Opleidingsinstituut. E bishita tabata despues ku funshonarionan di LPO a bishitá Barbados den luna di desèmber na e konferensia ‘Association of Caribbean Commissioners of Police’ (ACCP)
Alto inspektor Hefe di Opleiding Spesialisá, sr. Sillé, a tene un reunion ku sr. Samuel Bryant di Barbados i a kombersá tokante trainingnan spesialisá na Estádos Unidos, training pa dosentenan, training pa loke ta trata investigashon tékniko spesialisá, opleiding tékniko spesialisá digital hasiendo uso di teknologianan moderno di kòmpiuter, training anti terorista i vários otro training den kuadro di kombatimentu di kriminalidat ku FBI ta duna.
E intenshon ta, pa LPO manda miembronan di KPNA pa tuma parti na e kursonan ariba menshoná.
LPO ta un instituto profeshonal ku ta dunando trainingnan riba nivel haltu. “Nos ta desaroyá kurso, training i workshop pa servisio i organisashonnan enkargá ku orden públiko i seguridat na Antia, Aruba i pronto den region segun plannan.”
LPO lo sigui ku proyektonan pa edukashon i formashon di miembronan di Kuerpo Polisial den kuardo kombatimentu di kriminalidat ku efisiensia i un mihó komunidat.
Riba e foto e dosente di Estudionan Spesialisá Inspektor Elrick Ruiter, sr. Samuel Bryan di FBI Barbados i Hefe di Estudionan Spesialisá Alto Inspektor Marlon Sillé despues di lunch na Kantine di Landelijk Politie Opleidingsinstituut.

WILLEMSTAD - E situashon na Myanmar-Brima ta hopi kríiko. E kantidat di mortonan ta sigui subi i ta eksistí un nesesidat grandi pa yudansa direkto. E área na kosta ta esun ku mas a wòrdu afektá kaminda 95% di e pueblonan na kosta a wòrdu destruí. Di e kasi 50 mion di poblashon di Myanmar-Birma 24 mion ta bida den área afektá pa e orkan ku asotá e pais.
E víktimanan tin nesesidat urgente di yudansa. Tèntnan, remedinan, tablètnan pa purifiká awa pa bebe, kuminda i “mosketero”. Aksesibilidat na awa limpi pa bebe práktikamente no t’ei i kuminda tambe kasi no tin. Ademas gran parti di área ainda ta bou di awa. Komo tal ta eksistí e chèns real di brote di epidemianan. Awa dushi para morto ta un foko ideal pa sangura por brui.
Yudansa ta hopi slou pa yega. Pa esei Krus Kòrá ta hasiendo su esfuerso pa brinda yudansa via e paisnan bisiña i prepará kampamentunan pa e refugiadonan.
Krus Kòrá un biaha mas ta pone su kuentanan na banko disponibel pa kualke kontribushon òf donashon hasiendo menshon di “Myanmar-Birma”.
Bankrekeningen/ Kuentanan na Banko
MCB 2004
Giro 482838
RBTT 1232584
SFT 545455-001
Banco di Caribe 01.509.230707.01
ORCO 101968-420