Scol preparatorio, basico y avansa competiendo den varios deporte

ORANJESTAD- Olimpiada Escolar Betico Croes 2008 lo tuma lugar entre 30 di mei pa te cu 14 di juni proximo.
Tur nivel di scol, for di preparatorio, basico te cu avansa, lo competi riba tereno deportivo pa e maximo titulo di deporte escolar. IDEFRE en cooperacion cu Lotto pa Deporte y Ministerio di Labor, Cultura y Deporte, ta den pleno preparacion pa e maximo evento deportivo escolar aki.
E apertura y clausura lo ta na Stadion Guillermo Trindidad na Dakota, mientras cu e competencianan ta tuma lugar na 15 facilidad deportivo rond Aruba. No menos cu 2000 deportista studiante lo ta participando, cualnan seguramente lo trece nan coleganan studiante, fanaticada, maestro, mayor y amigonan bin apoya.
Un total di 11 deporte ta riba programa, incluyendo: futbol mucha homber, futbol pa mucha muher, volleyball, basketball, softball, landamento, Atletismo, 4 kamp, 3-kamp y handbal mixto. E aña aki, tin ahedres y dam tambe como parti di e competencia entre scolnan.
Mester gradici, sin duda alguno, Fundacion Lotto pa Deporte cu ta carga e gastonan operacional pa olimpiada escolar aki casi completamente cada aña.
Ademas di algun patrocinador particular mandera CMB cu ta contribui den varios forma, e aporte di Lotto ta esencial.
Ta pa es motibo nos mester sigui sostene nos Lotto Nacional pa por sigui haci proyectonan grandi y util pa nos comunidad.
Ta invita tur scol avansa, basico y preparatorio y nan directornan, rectornan pa inscribi nan scol, pa asina engrandese nos Olimpiada Escolar Betico Croes 2008 cu ta cuminsa 30 di mei proximo. Pa mas information por tuma contacto cu IDEFRE na tel, 582-4987

ORANJESTAD- E servicionan di Cable TV of Aruba ta obtenibel na San Nicolas entrante diamars dia 13 di mei 2008 na e Teleshop di SETAR situa na entrada di e caya principal di San Nicolas.
Esaki sigur ta un bon noticia pa esnan cu ta residencia na San Nicolas pero tambe esnan cu ta biba y traha den cercania. SETAR a dicidi hunto cu e compania di Cable TV di Aruba pa trece e servicio y productonan den San Nicolas tambe.
Tur cliente di Cable TV of Aruba awor en adelante lo por haci tur nan pagonan, peticion pa instalacion nobo of upgrading di nan servicionan actual tanto pa Cable / Digital Cable y Cablenet den e pueblo di San Nicolas y tur otro servicionan tambe!
5 aña trahando como NV treciendo cambionan pa mehora
Cu celebracion di 5 aña como un compania SETAR por mira atras con den un forma hopi acelera diferente proyecto, servicio y cambionan a concretisa nan mes den e compania den su formato nobo.
Den e ultimo 5 aña pasa, SETAR a demostra di ta un compania continuamente inovativo, moderno y cu no ta riña pa cambionan cu ta bin den su direccion.
E clientenan por a nota e cambio y inovacion aki di inmediato na momento cu a tuma e forma di NV. A implementa e ONE STOP SHOPPING cu ta ensera cu tur producto y servicio ta obtenibel na tur Teleshop pa facilita e cliente tur servicio bou di un dak. A haci cambionan interno hopi drastico y por a mira esaki refleha den e sistema cu e trato tanto telefonico como personal cu e cliente.
Satisfacion di e clientenan na momento cu nan ta haya un calidad di producto excelente, bon servicio y na un bon prijs. Na momento cu a adkeri Cable TV of Aruba, SETAR a facilita y accelera e inovacion den e servicionan di Cable TV cual a culmina den e servicionan di Digital Cable y CableNet.

Digicel a yuda contribui na cancha di bolas crioyas pa Special Olympics

ORANJESTAD- Despues di henter un siman di eventonan specialmente dedica nos nos atletanan special, den weekend a inaugura e cancha nobo di Bolas Crioyas riba e tereno di SVGA na Piedra Plat.
E cancha nobo aki ta traha net banda di e facilidadnan di Bibito Pin na Piedra Plat y ta bini como un opcion mas pa nos hendenan special por tin un lugar pa recrea y haci deporte.
Digicel Group ta bon conoci pa ta un di e patrosinadornan principal di tur e ekiponan di Special Olympics den tur mercado unda e ta operando. Aki na Aruba esaki no ta un excepcion, es mas, Digicel Aruba a cuminsa patrosina Special Olympics hasta prome cu nan a cuminsa opera oficialmente, demostrando asina nan compromiso serio y sincero cu e grupo aki.
For di aña 2003, tur aña atrobe Special Olympics Aruba ta forma un parti importante di e presupuesto anual di patrosinio. Y den esaki e plan pa construi un cancha di Bolas Crioyas, tabata den mente di e organisacion for di basta tempo, pero mester a traha segun nan lista di prioridadnan.
E compania di celular cu mas ta creciendo na Antiyas, den Caribe y awor tambe den Centro America ta sinti su mes masha honra di por ta forma parti di e grupo cu tur aña ta yuda e organisacion aki cu nan meta asina noble, esta di duna nos hendenan special un chens mas den bida, awor hasta atravez di deporte.
Den weekend a tuma lugar un evento special riba e cancha nobo aki di Bolas Crioyas y riba e fotonan adhunto por aprecia momento cu Srta. Elaine Singh di e departamento di mercadeo di Digicel Aruba ta para den compania di e directiva di SVGA na momento di celebra apertura di nan cancha nobo-nobo pa hunga Bolas Crioyas.

Presidente di Parlamento ta informa

ORANJESTAD- Ayera a keda aproba den sala di Parlamento conseho di seniorenconventa di diabierna dia 9 di mei, den cual ta institui un petite comitee pa asina yega na un voordracht pa e Presidencia di un organo importante pa nos pais, esta Contraloria General. Esaki basa ariba e hecho cu e candidatonan cu a ser presenta dor di Contraloria General incialmento no a carga mayoria den Parlamento.
Aki a surgi discucion. Pa sali for di e impasse aki a tene un seniorenconvent den cual a discuti den forma habri encuanto e forma pa atende cu e candidatura pa Presidencia y miembro di Contraloria General.
Despues a sigui un reunion di Comision Central y ayera un Reunion Publico pa asina fiha un comision di caracter particular(bijzondere commissie) cu e tarea pa dentro di 2 siman yega na nombracion di e candidatonan.
A formalisa cu e comision lo consisti di 4 fraccion, sinembargo Fraccion di RED a pone explixitamente cu e no lo participa den e comision.
Alavez ayera tabatin tratamento di e ley di aviacion den Reunion Publico. Esaki tabata na encargo di ministro di Turismo, sr. Edison Briesen. E ley aki cu ta di importancia pa nos posicion cu nos tin mundial pa loke ta trate reglamentacionnan.
Aki por bisa cu recientemente tabatin un audit di ICAO (International Civil Aviation Organisation) unda Aruba a haya un evaluacion positivo. Cu e aprobacion di e ley aki esaki lo ta den beneficio di Aruba.
Mas den siman, esta diahuebs dia 15 y diabierna dia 16 di mei lo tin reunion di diferente comision di Parlatino. Esta e comisionnnan di Seguridad Ciudadana, Narcotrafico y Crimen Organizado, Comison de Pueblos Indigenas y Etnias y e Comision de Energia y Minas. Representantenan di diferente pais lo ta na Aruba, entre otro Argentina, Bolivia, Chili, Mexico, Paraguay, Uruguay y Venezuela.

ORANJESTAD- E reunion di hunta di directiva di Petrobras na Rio de Janeiro dialuna ultimo, no a tuma un decision ainda riba compra di e refineria di Valero na Aruba.
E decision aki a wordo suspendi y lo wordo trata den futuro pero Alberto Guyimaraes, CEO di Petrobras, no kier a duna mucho detaye riba e decision aki y solamente a informa cu a reunion a termina sin cu tin decision definitivo ainda.
Hecho ta cu Petrobras lo kier e refineria den su condicion prome cu e explosion cu a tuma lugar algun luna atras y kier mira e parti di e planta aki bek den funcion, prome cu acepta pa cumpra e refineria di Aruba.
No tin fecha nobo stipula pa un decision wordo tuma, Guimaraes a confirma den un entrevista na telefon.
Na mes momento ainda Valero no por confirma ki dia e lo keda cla cu e trabounan den e planta y con e ta bai regla otro asuntonan pa yega na un acuerdo cu Petrobras.
Otro punto di discusion ta e asunto di pago di BBO cu tin andando entre e refineria y Gobierno di Aruba y riba cual un decision lo bai cai den proximo siman of lunanan.
Pues te ainda Petrobras no a tuma decision pa compra di e refineria, cu mester a keda conclui for di luna pasa caba, manera Valero mes a anticipa.

 

BEIJING – China a spera ku 2008 lo bira un fiesta ku ta dura, un periodo pa disfrutá di e kandela olímpiko ku e Weganan Olímpiko ta representá. E aña di Djaka, sin embargo, no a produsí sino tragedianan natural i problemanan ku a pone e direkshon komunista di e pais na prueba.
E temblor di magnitut 7,9 ku a sakudí e provinsia di Sichuan djaluna, ta solamente un di e desasternan ei i e lidernan chines, ku a spera di konsentrá nan mes eksklusivamente den e evento olímpiko, ta enfrentando un ola di difikultatnan.
“E Weganan Olímpiko ta un importante símbolo di e esfuersonan chines pa pone su mes na nivel ku restu di mundu”, Roger Des Forges a bisa, historiadó spesialisá na China di e Universidat estatal di New York ku sede na Buffalo.
“Pero pa mayoria di e chinesnan, e ta un kos sekundario kompará ku e deseonan di logra un mihó kalidat di bida. Riba e desaster manera esaki, e hendenan ke mira kon e gobièrnu ta respondé”, el a agregá.
Gobièrnu a reakshoná rápidamente i poko ora despues di e temblor, e promé minister Wen Jiabao a biaha pa e provinsia di Sichuan pa opservá e trabounan di reskate i asistensia. Papiando for di e siudat di Dujiangyan, kaminda un skol a kai den otro i dera komo 900 studiante, Wen a rekonosé ku e pais ta enfrentá “un reto spesial”.
E problemanan a kuminsá poko promé ku e Aña Nobo Lunar di febrüari, ora e pió nevadanan den sinku dékada a kai den sentro i sur di e pais, dos region masha hopi poblá. Tabatin kantidat di morto, baimentu di koriente di siudatnan kompleto i algun shen mil hende a keda pegá den temporada di vakashon.

WILLEMSTAD - Movementu Grandinan Uní ta kompletamente solidario ku e shofùrnan di bus, ku ta den problema ku gobièrnu, pasobra nan ta ninga di oumentá e tarifa di bus. Ayera e shofùrnan di bus a kuminsá ku un akshon, pa protestá entre otro kontra dje hecho, ku nan no ta haña partisipashon den e desishonnan ku gobièrnu ta tuma, relashoná ku transporte públiko.
Oscar Semerel, presidente di Movementu Grandinan Uni, a bisa LA PRENSA, ku oumento di e tarifa ta un gastu enorme pa e hendenan grandi.
‘Ora ku kosto di bida subi, e grandinan no ta haña oumento di indexering. Gobièrnu a menshoná e asuntu di 5 florin riba e 100 florin, pero mester tene kuenta ku tin un diskrepansia, pasobra ku no ta tur hende a haña e shen florin’.
Segun Semerel, ta un hecho ku konvoi ta transportá hende grandi pa preis adaptá. Sinembargo segun e presidente di Movementu Grandinan Uni, no ta tur adaptashon pa transporte di bus chikí i konvoi ABV ta konkretisá.
‘Ta p’esei e servisio ku transporte públiko ta duna, no ta funshoná shen porshento’. Esun ku mas servisio ta duna na e pasahero, ta e shofùr di bus chikí. Semerel: ‘’Ta e shofùr aki ta baha pasahero te na kas. Ta p’esei no ta kumbiní nan ni e shofùrnan di bus chikí, ni tampoko e grandinan, pa oumentá e tarifa’’.
Segun e presidente di Movementu Grandinan Uni, loke ku gobièrnu mester hasi, ta regla supsidio di e shofùrnan di bus. ‘Ta pa hopi aña ta papia i ta hasi promesa, pero a bira tempu pa hasi nan realidat, pasobra transporte públiko, ta algu den kua ku gobièrnu mester ta metí, komo esun ku ta duna pèrmit.’ Asina Oscar Semerel a enfatisá.

WILLEMSTAD - E poseshon i distribushon di pornografia di mucha no ta wòrdu menshoná eksplísitamente komo un hecho kastigabel den e lei antiano. E ta kastigabel sí komo pornografia, pero no spesífikamente komo pornografia di mucha. E protekshon èkstra ku mester tin den e lei aki pa mucha, no ta konta pa Antia. Esei no ta pasobra ku ta konsiderá ku kompará ku Ulanda, e hecho aki na Antia ta wòrdu konsiderá ménos ménos serio. Pero simplemente, pasobra Antia no ta den posishon pa keda na tempu ku e desaroyo di lei. Asina Jan Reintjes, dosente universitario di lei penal na Universidat di Antia Ulandes, a splika.
Segun Reintjes, tin den preparashon un lei penal kompletamente nobo. E formulashon ta kla i ta di spera ku promé ku e restrukturashon di Reino, e lei ta wòrdu aseptá i introdusí pa e Antia aktual.
Reintjes a indiká, ku Ulanda a logra konvensé Antia pa laga mesun lei di buki penal vigente pa Kòrsou i Sint Maarten. Lo trata di dos wetboek ku mesun teksto. ‘Esei no ta e situashon di mas ideal’. Reintjes ta preferá pa den kuadro di e struktura nobo, kontinuá ku e aktual buki penal antiano, ku tin hopi paresido na esun di Ulanda.
Esei lo nifiká, ku e buki di lei Kòrsou i Sint Maarten, ta keda parse otro. ‘Den kaso ku obligá e paisnan pa mantené e bukinan igual, nada mas no ta kambia. Ta trata di un buki hopi bieu di loke ku ta deseabel pa awendia apliká den lei penal’.

WILLEMSTAD - Komishon di Bario di Wishi i Marchena ta hasi un apelashon na habitantenan di Marchena, pa koperá ku polis pa yuda solushoná e asesinato di djasabra último.
Ta trata dje asesinato di Melvin Kopra djasabra último, ku tabata un dia despues ku e víktima a sali for di prizòn.
Kenneth Valpoort, kordinadó general di e Komishon di Bario di Wishi i Marchena a splika LA PRENSA, ku entretantu polis a hasi un yamada na habitantenan di e bario ku a mira loke a tuma lugá. ‘Nan ta wòrdu supliká pa duna informashon na polis, pa di e forma ei yuda den detenshon di e kulpabel di e asesinato. E habitantenan mester yama e number anónimo di polis.’
Segun Valpoort, e Komishon ta lamentá e insidente masha hopi i no ta di akuerdo ku un hóben di bario ta wòrdu asesiná i tur hende ku sa algu, ta keda ketu.‘ E ta duna un imágen hopi robes, pasobra e ora ei por habri porta pa tur hende bin den bario i hasi manera nan ta haña ta bon. I tur hende ta keda ketu’. Ta p’esei, e komishon ta hasi un apelashon na tur hende ku a testiguá kiko a tuma lugá pa duna informashon na polis. ‘Nos ta na altura, ku no ta tur hende tabata gusta e víktima, pero e tabata un ser humano i komo tal e mester haña su honor, debí na e insidente trágiko ku a tuma lugá’. Segun Valpoort, esun ku ta kulpabel di e hecho aki su konsenshi mester traha kuné i pone ku e ta bai entregá pa haña su kastigu, no opstante e hecho ku tin indikashon ku un dia promé el a wòrdu maltratá.

ARIES: Bo ta enfrentá realidatnan nobo den bo bida amoroso. Spera riba un amor transendental di un ser humano di karni i wesu. 21,45,13.

TAURO: Hari hopi, selebrá ku bo ta bibu i ku Dios nunka a faltabu nada. E anochi skur ku bo a biba, awor ta sperabu un dia poderoso. 06,28,01.

GEMINIS: Libra bo mes di sentimentunan di kulpa. Eliminá outokrítiko di bo bida. No bira vèrdrit ku kosnan ku bo no por kontrolá. 11,35,29.

KANSER: Bo papel di ser semper e víktima i e sakrifikado a kaba. Bo ta realisá kambionan den bo bida. Bo potensial kreativo ta ilimitá. 43,29,05.

LEO: Tur loke bo realisá ku kurason, ta dunábu felisidat i alegria. Bo sa di atministrá mihó. Desaroyá mayor astusia, analisá pa logra éksitonan ekonómiko. 31,48,25.

VIRGO: Duna deskanso na bo mente. Redusí velosidat di bo pensamentunan meditando mas. Sabi ku nada no ta pasa ku no ta pa bo benefisio. 08,13,44.

LIBRA: Siña rekapitulá momentunan importante pa bo por konosé bo mes bon i orientá mihó. Papia ku bo kurason i klarifiká dudanan i mal entendimentunan. 12,37,40.

SKORPION: Tur biahe ku bo realisá awor ta trese suerte. Bo filosofia di bida ta kambia. Nunka ántes bo tabata mihó orientá ku awor. 19,02,38.

SAGITARIO: Personanan di outoridat ta duna e ayudo ku bo pida i eventonan sorpresivo ta hibabu na éksitonan profeshonal. 38,25,11.

WILLEMSTAD – “Ami no tin preferensha pa ni grupo Cayco, ni tampoko Meta Corporation. Loke ami ta na fabor di dje ta pa nos impulsá e desaroyo asina nesesario den e área di Rif pa kaba. Anto laga ta bon kla: no tin diferensha di opinion entre partidonan di koalishon riba e asuntu aki”, diputado Anthony Godett a deklará durante e reunion públiko di Konseho Insular pa atendé e asuntu aki.
Ayera e reunion públiko ku a kuminsá algun siman pasá kontinuá i tabata turno di diputado Anthony Godett pa kontestá e promé buèlta di pregunta ku miembronan di Konseho Insular a hasi riba e tema aki.
No ta un sekreto ku tin pensamentunan diferente den komunidat riba desaroyo di e área di Rif.
Diputado Anthony Godett a bisa ku el a ser aserká pa grupo Cayco, un grupo di Venezuela pa haña e tereno na altura di Rif pa konstrukshon di un proyekto turístiko multi mionario.
A bin resultá despues, ku Meta Corporation, ku ta finalisando konstrukshon di hotèl Renaissance na Rif, tambe tin interes pa haña e mesun pida tereno.
Durante e reunion di ayera, diputado Godett a mustra ku na aña 2003 Bestuurscollege a aprobá un plan maestro pa e área di Rif.
Na ougùstùs 2006, Federashon di Otrobanda a presentá su Plan Mayó. Na novèmber 2006 e grupo Gold Investments a presentá su plannan pa área di Rif. Bestuurscollege di e tempu ei a palabrá ku lo traha un plan maestro nobo pa área di Rif ku mester ta kla promé ku fin di mei 2007, pero diputado di Infrastruktura di e tempu ei, Charles Cooper a disidí ku tanten no tin e plan maestro nobo, lo usa e plan ku tabat’ei kaba komo punto di salida.

WILLEMSTAD - Un pais ku ta bankrut, ku no tin moda di muri, no por bai hunga San Nikolas, oumentando sueldo mínimo i introdusí tur sorto di medida. Di e forma aki parlamentario Hero Brinkman di Partij voor de Vrijheid durante e “mondeling vragenuurtje” semanal di parlamentu ulandes ayera.
E aktitut di e parlamentario aki ayera asta a okashoná sierto iritashon serka su koleganan.
Gobièrnu di Kòrsou a anunsiá den fin di siman un pakete di medida ku mester suavisá e impakto di oumento di preis di energia pa esnan di ménos rekurso den komunidat. Ta proba ku e grupo aki lo sinti e efekto di oumento di preis di gasolin, disel, awa i koriente mas fuerte ku otronan.
Entre otro a anunsiá oumento di sueldo mínimo ku 5 porshento i tambe un adaptashon chikitu pa esnan ku ta kobra ònderstant.
Tin eksperto ku asta ta konsiderá e oumento ku a anunsiá komo muchu tiki. Entre otro e partidonan polítiko agrupá den Aliansa Patriótiko tambe ta bisa ku e medidanan aki no ta sufisiente.
Pa Hero Brinkman sinembargo, e kos aki ta dispidimentu di plaka.
“Kon por ta posibel ku na Antia ta oumento sueldo mínimo? No ta Ulanda finalmente lo bai paga e oumento aki? Antia ta stens ku Ulanda ta karga e kos aki, siendo ku polítikonan di e islanan ta bibando den un ambiente di korupshon,” Brinkman a bisa.
Brinkman a bisa ku e tin sigur ku Antia ta konta ku ta Ulanda ta bai karga tur esaki, atraves di e promesa ku Ulanda lo pone 2.2 bion euro disponibel pa kanselá debe nashonal di Antia. Ami ta kansa di e situashon aki i mi ke sa kiko sekretario di Estado Bijleveld ta pensa. “Ami lo a preferá pa nos a usa e plaka ku nos ta duna Antia na kuido di nos grandinan den e pais aki. T’asinaki ta sigui bai sigui mèst e islanan aki?” e parlamentario di VVD a puntra.

WILLEMSTAD - Un delegashon di Federashon di Otrobanda, ku presidente Marusca Manuel na kabes, no ta dispuesto pa aseptá e desaroyonan ku ta tumando lugá ku áreanan den Otrobanda.
Ayera un grupo a presentá na paña di rou den tribuna públiko di Konseho Insular pa sigui e reunion públiko ku tabata tumando lugá. “Nos a bin deliberadamente asin’aki, pa demostrá nos preokupashon, pa mustra ku nos ke pa tene kuenta tambe ku pensamentu di organisashonnan di Otrobanda”, asina Marusca Manuel, presidente dje federashon a indiká. E grupo tabata bistí na blanku ku sinta pretu, pa asina indiká nan sintimentu. Federashon di Otrobanda a bati bèl basta dia kaba riba e intentonan pa desaroyá e área di Rif.
Manera ta konosí pa tur hende, tin vários grupo ku a demostrá interes pa haña e tereno pa konstruí proyekto riba dje. Gobièrnu di Kòrsou no a tuma un desishon ainda, pero tur kos ta indiká ku un òf posiblemente un kombinashon di e gruponan lo haña lus bèrdè pa kuminsá ku ehekushon di nan proyekto.
Anto aki e federashon tin un problema: Federashon Otrobanda ke weta un desaroyo kaminda e yu di Kòrsou ta haña tur posibilidat pa kuminsá ku su proyekto. Ademas, e federashon ta kere mas tantu den proyektonan mediano (i chikitu) i no ta kere ku mester duna un solo desaroyadó e tereno pa e ehekutá su plan. Pa Federashon Otrobanda, gobièrnu ta bendiendo e área ku gruponan djafó, “meskos ku el a bin ta bende henter Kòrsou último añanan”, segun Manuel. A para bira ku apénas nos por bai nos mes playanan, el a agregá. Manuel a bisa ku su federashon a presentá e plan aki na gobièrnu no ménos ku 7 biaha kaba den pasado.

DELFT / WILLEMSTAD - Awe mainta 6’or, ora di Ulanda, brantwer a indiká, ku el a logra dominá e kandela ku ayera a kuminsá i ku a destruí Universidat Tékniko di Delft kompletamente.
E kandela a kuminsá den e fakultat Bouwkunde di e universidat i tabata okashoná ku tur probabilidat pa un korto sirkuito. E korto sirkuito aki a surgi, na momentu ku un pipa di awa a kibra i e awa a bai den un mashin eléktriko riba e departamentu.
E kandela a plama den un forma masha rápido den e edifisio.
E 200 pa 300 hendenan – inkluso un kantidat di studiante – ku tabata den e edifisio a logra bandoná esaki promé ku algu por a pasa nan.
E universidat aki ta bon konosí aki na Kòrsou. Hopi antiano den pasado a yega di haña nan formashon (tékniko) na e universidat aki i hopi indudablemente lo keda kòrda e universidat aki ku nostalgia.
E intenshon ta pa e mas o ménos 3 mil studiante di TU Delft sigui haña lès den tènt i otro edifisionan den serkania. Un parti grandi di e kolaboradornan di e universidat lo traha for di kas, hasiendo uso di laptop. Esei ta loke direktiva di e skol a informá e studiantenan ofisialmente awe mainta.
Vários doño di edifisio a ofresé lugá bashí na e universidat pa weta kon por akapará e studiantenan turesten.
Konsiderando e peliger ku e kandela tabata enserá, tabata nesesario pa evakuá un parti grandi di besindario pa asina garantisá siguridat di e habitantenan.

WILLEMSTAD - Abogado di Vespucci College na Kòrsou mr. Van Spigt ta konsiderá e desishon di sekretario di Estado, enkargá ku enseñansa Marja van Bijsterveldt komo un desishon inhustu i ku no ta kuadra tampoko ku regla.
Esei a bin dilanti ayera, durante tratamentu di e kaso aki den korte na Ulanda. E asuntu aki a bin komo sorpresa pa e skol. Algun parlamentario ulandes, entre nan John Leerdam a kai den e asuntu aki. Leerdam ta haña ku e desishon pa stòp e posibilidat pa pasa eksamen na Kòrsou komo algu inaseptabel.
Manera LA PRENSA a informá anteriormente kaba, mayornan di muchanan ku ta bayendo Vespucci College a tuma e desishon ku nan ta hiba gobièrnu ulandes, spesífikamente sekretario di Estado Van Bijsterveldt (di Enseñansa) korte. Meta di e kaso aki ta pa garantisá ku nan yunan ta sigui pasa eksamen final normal na Kòrsou i ku nan no mester bai te Ulanda pa hasi esaki.
Vespucci College, un skol orientá riba muchanan ulandes, ta duna enseñansa avansá. E tin mas o ménos 200 mucha.
E alumnonan aki ta por parte muchanan di mayornan ku ta temporalmente stashoná na Kòrsou manera por ehèmpel di hendenan di marina ulandes, por parte muchanan di hendenan lokal.
T’asina ku for di aña 2001 e muchanan aki ta pasa eksamen ulandes na nivel di VMBO, HAVO i VWO atraves di un konstrukshon spesial ku a traha.
E konstrukshon aki ta den koperashon ku Ministerio di Enseñansa ulandes. E muchanan, unabes nan kaba tin tambe un diploma ulandes. E konstrukshon ta den koperashon tambe ku Montessori College na Nijmegen, Ulanda,

HANWANGH – Helikòpternan militar chines a laga kargamentu di alimentu i remedi kai pa esnan ku a sobrebibí e temblor di e siman aki i ku ketu bai ta aisla komo konsekuensia di e avalancha ku a sera e kayanan.
E sifra ofisial di e víktimanan komo konsekuensia di e temblor di djaluna den sentro di China a subi yega te na 15 mil.
Miéntras ku ayudo ta yegando na e zonanan mas afektá, ainda ta logrando pa reskatá algun víktima ku ta pegá bou di edifisionan ku a kai den otro. E grandura di e devastashon kousá pa e temblor ta nifiká, ku tin un falta di rekurso, a traha algun stashon di ayudo i sentro di refugiado ku tin un tamaño di Bèlgika.
E agensia ofisial di notisia di China, a sita fuente lokal ku ta señalá ku e ekiponan di reskate ku a yega awe a bin topa ku un situashon pió di loke nan a spera. Den e suidat di Yingxiu ku tin 10 mil habitante, ta solamente 2300 a sobrebibí.
Tambe a konfirmá morto di 178 mucha na un skol ku a kai den otro pa motibu di e temblor potente aki.
E informe ta indiká, ku e studiantenan tabata sosegando na momentu ku e temblor a tuma lugá i e edifisio di tres piso a kai den otro. 123 Otro a logra Sali, miéntras ku 23 ainda ta pèrdí.
Miéntras tantu awe e kuerpo di reskate a topa un dama na estado ku ainda tabata na bida. E tabatin 50 ora pegá bou di un edifisio. E tabata ocho luna na estado.
Tin tur indikashon ku e sifra di morto lo sigui oumentá na momentu ku e reskatenan kontinuá.

WILLEMSTAD - Resientemente Gobièrnu Sentral a disidí ku fundashon NAAM ta risibí pa sostené su trabou un kolaborador sientífiko, o sea un arkeólogo. P’esei a nombra un arkeólogo, sra. Claudia Kraan. E vakatura a surgi debí na retiro di dr. J. Haviser aña pasá. Claudia Kraan, a studia arkeologia i historia kultural di Amérika indígena na Leiden, el a haña eksperensia di trabou entre otro na Grenada, Trinidad & Tobago i na diferente munisipionan na Ulanda, el a asistí tambe NAAM su trabou di ekskavashon na Punda, na aña 2006.
E lo ta enkargá ku investigashon arkeológiko sientífiko i lo e duna su kontribushon na desaroyá maneho, legislashon i reglamentashon riba tereno di arkeologia di Antia Ulandes. Un tarea importante tambe ta, ku lo e guia kandidatonan arkeólogo di Kòrsou mes i sinkronisá e trabou di kolektá informashon serka instansianan relevante i deliberá ku nan na Kòrsou, Boneiru St. Maarten, St. Eustatius i Saba. E señora arkeólogo ta drenta servisio temporal.

WILLEMSTAD - Resientemente sra. Crisma Henriquez di Agencia Funeraria El Señorial a haña un invitashon di NFDA kual e ta 20 aña afiliá na e organisashon aki pa e ta presente na e konferensha i Expo ku ta hiba e nòmber di “NFDA Asia Funeral Expo & Conference” na Beijing China. Na e konferensha aki, sra. Crisma por a sera konosí ku e estilo di dera Asiátiko bishitando e.o. agensianan funeraria i santananan ku kada unu ta mes òf mas grandi ku Kòrsou kompleto. Loke el a siña ta, pa na momentu ku e personanan di e paisnan aki fayesé sea nan ta turista o esnan ku ta biba aki i nan deseo ta pa bai wòrdu transportá pa nan pais di orígen por hasi esaki na e forma korekto i na nan kustumbernan. Agensia Funeraria El Señorial ta konosí kaba, ku mandamentu di defuntunan pa Macau i Hong Kong, pero bishitando Beijing, Jentzen River, Shang Hai i vários otro pais mas, por a mira personalmente e sistema di bida i kustumbernan di e paisnan aki. Tabatin direktornan di Agensianan Funeraria di 43 pais i di Kòrsou ta sra. Crisma so a asistí. E trep di 17 dia aki tabata konsistí di hopi tour rònt Beijing. Sra. Crisma tambe a siña apresiá aun mas nos dushi Korsou, mirando ku na vários parti higiena tabata laga hopi di deseá. Macau ta wòrdu propagandá komo Asia su destinashon mas nobo i eksitante. Tur partisipante a risibí un sertifikado di partisipashon di NFDA pa nan partisipashon na e Konferensha i Expo aki. NFDA ta para pa: National Funeral Directors Association.

WILLEMSTAD – E lesadónan di e korant di atardi Amigoe a haña un sorpresa ayera, na momentu ku a bira konosí ku Michael (Mike) Willemse a retirá for di Amigoe. Den último 11 añanan, Willemse tabata hefe di redakshon di e korant. Ayera tardi ainda Willemse no kier a bisa na radio kiko e ta bai hasi, pero ayera nochi el a partisipá ofisialmente ku e ta tuma e aktividatnan di ADCaribbean NV na su enkargo. E kompania ta produktor di e matutino Antilliaans Dagblad. Antilliaans Dagblad no a logra haña un posishon remarkabel den merkado di Kòrsou ainda, no opstante hopi esfuerso den último añanan. Bou di liderato di Willemse ku a gana atmirashon pa su trabou na Amigoe, e korant di mainta ta spera di por bira un protagonista di kalidat tur mainta. Willemse mes ta papia di un reto nobo. Den un komunikado distribuí ayera nochi, Willemse ta bisa, ku e kier duna ADCaribbean “un impulso kualitativo”.
“E korant por skor mas si e kontené mas notisia lokal i mas análisis di notisia. E anekso di wikènt – ADWikènt – ya kaba ta na bon kaminda. Mas opinion tambe ta nesesario: editorial, remitido di lesadó i kolumna. I tur esaki di un manera eksakto, imparsial i konfiabel. E kurason dje korant – ta mi opinion fuerte – por bati mas duru. E abonadonan i avisornan lo sigui di mes. Mi a siña na Amigoe ku kalidat ta paga su mes”, asina Willemse a bisa.
For di 1 di ougùstùs 1997 Willemse a kuminsá komo hefe di redakshon. Promé ku esei e tabata tres aña direktor/redaktor en hefe di Amigoe Aruba NV. Tur e añanan el a traha den estrecho koperashon ku èks direktor di Amigoe Ingrid de Maaijer-Hollander, ku a tum’é den servisio tantu na Aruba komo na Kòrsou. De Maaijer a retirá dia 1 di yanüari último. Willemse: “Nada malu tokante Amigoe; e ta den su añanan tòp. E korant ta pertenesé na e medionan di komunikashon mas lesá i poderoso di Antia i Aruba. Esaki, danki na bon hende i un redakshon briante, ku mi ta hopi orguyoso di a forma parti di esaki. Pero mi ke sigui. Mi ta den forsa di mi bida i mi tin e deseo pa hasi algu pa mi mes. Mi no a mira un futuro den un korant nobo. Ya kaba tin sufisiente korant, di kua dos ta na idioma ulandes. Amigoe no ta na benta i partisipashon di akshon no ta faktibel. Ademas, mi tata sabí semper a bisa mi, ku bo mester kita bai for di un fiesta na e momentu mas dushi.”