Henter pueblo por yuda vota pa nan clasifica

ORANJESTAD- Durante luna di mei 2008, henter pueblo di Aruba por yuda vota pa asina nos agrupacion local di Reggae ILA por clasifica den un festival internacional masha renombra na Europa.
E Reggae Contest aki di e renombra ROTOTOMSUNSPLASH Festival, lo tuma lugar na Italia Europa y Aruba ta partcipando cu e grupo musical ILA. Aruba ta forma parti di Reino Hulandes, pues debi na esaki ILA por particia y ta cai bao di e categoria di Benelux, pues Belgica, Hulanda y Luxemburgo. Con bo por yuda ILA? E clasificacion ta tuma lugar via votamento ariba Internet. E siguiente pasonan mester tuma pa bo voto por conta.
Subi arba Internet y bai na e address: www.rototomsunsplash.com
Despues bo ta bai na e seccion cu ta bisa: “Reggae Contest: We Hill star form scratch”
Despues bo ta clic na “Vote & Quote” cu ta scirbi den e mesun seccion of paragraaf menciona ariba.
Despues bo ta scroll bai abao y clic ariba e bandera di Netherlands & Belgium.
Despues bo ta scroll bai full abao na VOTE ONE BAND y bota click den e box chiquito banda di e number di ILA e lo bira un checkmark.
Despues bo ta yena bo e-mail address valido den e strepi geel y click ariba e boton scirbi VOTE.
E lo bisabo cu bo lo ricibi un e-mail y bo voto lo ser rgistra te ora cu bo habri bo e-mail y clic ariba e link indica den e e-mail. E e-mail bolo ricibi via e adress di anonymous@rototom.com
Paga tino si e e-mail a bin normal den bo box, den spam, den junk of den inbox.
E ta yega mesora manera cu bo click VOTE. Tin hende cu mester click e “enable link” pa por habri e link den e e-mail.

ORANJESTAD- Minister drs. Marisol Lopez-Tromp por medio di e comunicado aki ta extende un palabra di animo, forsa y exito na tur studiante cu ta den nan ultimo aña na school, sea EPB, EPI, MAVO, HAVO of VWO cu nan examennan.
Tambe studiantenan di IPA y Universidad di Aruba hopi exito cu tur proyecto y examen den cuadro di finalisacion di nan estudio.
Na MAVO esaki lo ta e prome grupo cu despues di un trayectoria completo di inovacion lo pasa examen e aña aki.
Pa tur esnan cu ta envolvi den trabaonan di inovacion di enseñansa teniendo na cuenta bienestar general di e alumno, e periodo aki mester ta hopi emocionante pasobra nos por evalua si berdaderamente nos ta riba e bon caminda of no.
E aña escolar aki a conoce algun contratiempo cu por a causa preocupacion bao e studiante y tambe nan mayornan den examen jaar, pero asina mes cu hopi animo y energia positivo y dedicacion na estudio lo sirbi como e arma principal pa logra bon resultado na final.
Aruba ta un pais cu hopi potencial y pa por optimalisa e potencial aki ta esencial pa nos yiunan di tera dedica nan mes na desaroyo propio.
Educacion ta e yabi pa exito den tur campo di bida. Cu educacion bo ta bay dilanti y bo ta hiba bo pais dilanti.
Ta hopi importante pa tene den mente cu naturalmente e mayornan, school, Gobierno y pueblo di Aruba kier pa e studiante saca bunita resultadonan pero en realidad e estudio ta algo cu nan tin cu haci nan mes.
Al final e estudio lo ta den nan propio beneficio y cu a base di esaki nan por escohe un carera profesional y desaroya nan mes mas den futuro.

ORANJESTAD - Pader Amado Römer lo tene durante tres dia un charla tocante enseñansa social di Iglesia Catolico. Diferente encicla di Papanan ta dedica atencion na e rol cu Iglesia Catolico tin den enseñansa social di un comunidad.
Por menciona entre otro Rerum Novarum y Populorum Progresio. Tur ta mustra riba e idealnan y balornan cristian den trabou, famia, economia, politica estatal y internacional y medio ambiente.
Ta haci un invitacion na tur persona cu tin un rol den educacion di nos comunidad pa asisti na e charlanan riba dianan 21, 22 y 23 di mei 2008 na Centro Pastoral Santa Cruz for di 7 or y mei te cu 9 or y mei di anochi.
Pues un invitacion ta bai pa miembronan di sindicato, lidernan politico, miembronan di parlamento, maestronan, prensa, religiosonan, cursistanan di Duc in Altum y tur persona cu ta envolvi den maneho di economia, salubridad, asunto social y medio ambiente pa asisti na e charlanan aki y comparti bo preocupacion tocante topiconan di interes general cu ta regarda e bida social di nos comunidad. Informacion suministra dor di Servicio Informativo di Gobierno.

ORANJESTAD- Diamars anochi dia 13 di mei ultimo, Associacion di Controladornan di Trafico Aereo (ACTAA) a tene nan di dos Reunion General pa e aña aki.
E prome Reunion General, cual tambe ta wordo jama e Reunion General Anual, a wordo tení dia 5 di maart ultimo, na unda tur aña mester eligi un directiva nobo.
Un miembro di directiva mientrastanto a tuma su retiro y cual tambe tabata e motibo principal pa a tene un di dos Reunion General pa asina jena e vacatura.
E directiva awor ta consisti di: Presidente Sr. Willem Vrolijk, Vice-Presidente Sr. Nelson Tromp, Sectretaria Sra.Geraldine Lacle-Erasmus, Tesorera Sra. Adriana Ponson-Leong y Comisario Sr. Elwin Rincones. Sr. Elwin Rincones ta e miembro nobo cu a wordo eligí.
E reunion tabata uno bon bishita como cu e por a conta cu 95% di presencia di su miembronan.
Durante e Reunion General aki tambe diferente topiconan a bin padilanti y e miembonan presente por a constata cu tin bastante asuntonan pendiente y nobo pa traha ariba nan.
Como tal ACTAA kier a desea e directiva forza, sabidoria y tur clase di éxito den nan tareanan.

ORANJESTAD- E campaña “Queen for a Day” tabata un exito total y hopi ta esnan cu a participa pa purba e suerte di bira e “Queen for a Day” na momento cu nan a cumpra nan cellularnan y otro servicionan na SETAR. Henter e luna di April a bai den e ambiente di La Reina.
Sra. Jurima Bryson a bira e felis ganadora di e sorteo y asina ela bira un Reina pa un dia.
Diasabra cu a pasa,
Un limosine a busca Jurima na su cas mainta tempran pa hibe na un Spa. Jurima a haya henter un dia di tratamento y descanso na e Spa na Tierra del Sol. Entre otro ela ricibi un European Facial, Un Full Body Exfoliation, un Swedish massage, manicure, pedicure, laba y seca su cabei y a ricibi un make up di cara.
Alabes ela ricibi un tremendo lunch na e restaurant Ventanas del Mar. Atardi, despues di su dia cu a pamper su mes ela sali den su limosine rumbo pa Trash by Ronchi na unda cu despues di a pas varios shimis ela scohe su shimis pa e anochi.
Despues e limosine a hib’e su cas pa e por drecha pa e anochi di e cena na El Gaucho Restaurant na unda su dia a termina den compania di su prometido. Casualidad ta cu e tabata celebra su hacimento di aña tambe riba e mesun anochi aki.

BUENOS AIRES – Atlas di Mexico, danki na un gol di Jorge Torres den kabamentu, a empatá 2-2 djarason ku Boca Juniors di Argentina den e promé partido di kuart final di Kopa Libertadores.
Torres a empatá na di 88 minüt den un wega di diferente kambio. Atlas a kuminsá ta bai ariba ku gol di Omar Flores na di sinku i Boca a empatá na di 36 ku un gol kontra di Hugo Ayala, te ora ku un biaha mas e argentinonan a bai ariba ku un gol di Julio Cesar Cáceres na di 70.
E di dos wega lo ta aki un siman na Guadalajara.
Ku un liña di kuater defensa i un preshon konstante den mediokampo, Atlas tabata wanta e poko atakenan di Boca i inkluso a regla pa kousa miedu ariba ku Bruno Marioni i Ulises Mendivil.
I den e promé yegada di e wega, e Zoronan di Guadalajara a habri kuenta ku un kabesaso di Flores, despues di un kòrner krusá i probechando un otro tiru di kabes di e argentino Diego Colotto.
Nèt den un kuartu di ora, e kiper Jorge Bava a kita un bala malu ku moketa riba un pase sin peliger, e bala a bai pa Rodrigo Palacio i su tiru a ser apénas desviá.
For di e ora ei, a keda bisto ku Boca tabata dispuesto pa bende su kueru karu i el a bai den atake ku tur kos, buskando prinsipalmente Palermo, bon marká pa Flores.
Despues di mei ora ku Boca ta preshoná a bin e gol kontra di Ayala, kende a hinka den su mes gol den un akshon ku Palermo i despues di un pase di Rodrigo Palacio for di banda drechi.
Den di dos mitar Boca a hinka e di dos ora Palermo a pasa pa Caceres i ku un tiru di kabes el a anotá.

SAO PAULO – Ku un gol di Adriano, Sao Paulo a logra un viktoria duru 1-0 riba Fluminense den e promé wega di un seri entre ekiponan brasileño pa kuart final di Kopa Libertadores.
Adriano, e delantero di Inter fiá na Sao Paulo a anotá na di 19 minüt su di sinku gol di e torneo.
E hugada a bini despues di un akshon di Dagoberto, kende a avansá na banda drechi i a tira. E rechaso di kiper Fernando Henrique a manda e bala serka Adriano kende a tira ku pia drechi den gol bashí.
Sao Paulo a dominá ampliamente den su stadion Morumbí, pero e poko suerte den kaba kos i algun intervenshon di e portero di “Flu”, a pone ku e mester a konformá su mes ku un triunfo ku poko smak.
E revancha lo ta djarason awor den stadion Maracaná, sede di Fluminense di Rio de Janeiro. E ganadó lo enfrentá den e próksimo seri, e ganadó entre Atlas i Boca.
Adriano tabata e figura klave dje wega, moviendo tur kaminda i e tabata e yabi di un atake ku a mantené e defensa di Fluminense konstantemente alerta, ku a sinti falta di su lateral leshoná Thiago Silva.

HAMBURGO, Alemania – Rafael Nadal no tabatin niun regal di kumpli aña pa Andy Murray, ora el a derotá e ingles den dos sèt pa avansá huntu ku Roger Federer i Novak Djokovic pa kuart final di e Masters di Hamburgo.
Nadal a gana 6-3, 6-2 di Murray, kende a kumpli 21 aña djaweps.
Federer no tabatin problema pa pasa pa e siguiente rònt ora el a gana 6-3 i 6-2 di Robin Soderling, miéntras ku e argentino Juan Mónaco a keda eliminá.
Federer promé riba lista mundial, ta e kampion defensor na Hamburgo i ta buska su di sinku título na e siudat aleman aki. Su próksimo rival lo ta e spañó Fernando Verdasco kende a sorprendé su kompatriota David Ferrer.
Mónaco a kai kontra e italiano Andres Seppi.
Djokovic a avansá ora el a superá Ivo Karlovic 7-6, 6-3. E serbio, kende siman pasá a gana e Masters di Roma, lo por subi na di dos puesto despues di e torneo aki.
Federer a pèrdè den e kuart final di Roma, pero el a lusi kómodo den su promé dos weganan aki.
E torneo ta un importante warm up riba klei promé ku e Habri di Fransia ku ta start 25 di mei, e úniko Grand Slam ku Federer no a gana.
“Mi no tin niun problema ni doló, mi ta sintimi hopi bon, kla pa bataya”, Federer a bisa.
E suizo tin un título so e aña aki, den e habri di Estoril luna pasá. Su rekòrt e temporada aki ta 24-6.
Verdasco a yega kuart final pa di dos bia e aña aki.

 ROMA – Maria Sharapova a rekuperá di un desbentaha di kuater game den di dos sèt pa derotá Caroline Wozniacki i avansá pa kuart final di e Habri di Italia.
Sharapova a drecha su rekòrt e aña aki na 25-2, i djaluna lo e rekuperá e promé puesto mundial di WTA danki na e retiro di Justine Henin.
E kampion defensor Jelena Jankovic i e rumannan Serena i Venus Williams tambe a avansá. Jankovic a bati Maria Kirilenko 6-1, 6-1; Serena a vense Sara Errani 6-4, 6-3 i Venus a gana Vera Zvonareva 7-5, 6-2.
Serena lo topa Alize Cornet kende a eliminá Svetala Kuznetsova.
Tambe a avansá Patty Schnyder, Tsvetana Pironkova i Anna Chakvetadze.

SANTIAGO DE CHILE – Presidente Michelle Bachelet a duna bonbiní djaweps na 117 refugiado palestino ku ke drecha nan bida na Chile i el a bisa nan ku e ta komprondé loke ta yega un pais straño komo un refugiado, refiriendo na su eksilio na e eks Repúblika Demokrátiko di Alemania.Den un akto den palasio di gobièrnu, Bachelet a indiká na nan ku “mi ke konta boso ku mi sa eksaktamente loke bo ta sinti ora bo yega un pais straño komo refugiado. Mi sa esei pasobra m’’a bib’é, mi tambe tabata un refugiado”.
“Bo ta yega un lugá ku un lenga deskonosí i den hopi kaso difísil pa komprondé. Bo ta yega un lugá ku kustumbernan i kultura diferente. Bo ta yega un lugá den kua nos mester rekonstruí bida kuminsando na sero”, e mandatario a bisa, kende su palabranan tabata ser tradusí na mes momento pa e refugiadonan.
Bachelet, yu di militansia sosialista, ta yu muhé di un general di forsa aéreo, Alberto Bachelet, kende a ser gará na dos okashon pa su kamaradanan di arma despues di e gòlpi militar di 1973. E di dos bia i produkto di e torturanan el a muri den prizòn na mart 1974, segun informenan ofisial.

WASHINGTON – E eks hefe di Autodefensas Unidas de Colombia, Salvatore Mancuso Gómez, i shete otro di e 14 paramilitarnan ekstraditá di Colombia a deklará nan mes inosente djaweps di akusashonnan di tráfiko di kokaina ora nan a ser presentá den un korte federal.
E eks paramilitarnan ekstraditá djamars a aparesé den paña oraño di prezu den sala di e wes Alan Kay, kende a ordená pa nan keda detené sin derecho di fiansa te nan próksimo oudiensia.
Tur a presentá sin bui na pòls i a aseptá pa ser representá pa abogadonan di fishi, ounke nan a bisa via un traduktor ku nan tin intenshon di kontratá abogadonan privá.
“Tur e kos aki a kue nos di sorpresa”, Sierra Ramirez a bisa. “Di manera ku mi ke tuma algun dia”.

WASHINGTON – Kámara di representantenan a rechasá un proposishon di 163.000 mion dòler pa finansiá e operashonnan militar na Irak i Afganistan te próksimo aña, pero sí a aprobá mas fondonan pa benefishinan di desempleo i un ampliashon pa edukashon di e sòldánan.
Den un seri di votashon rápido pa finansiamentu di guera i otro leinan anekso, e republikanonan a wanta nan voto den protesta pa e strategianan di Partido demokrat, ku kual nan a derotá e proposishon di lei riba Irak ku 149 na fabor ii 141 kontra.
E demokratnan sí a logra aprobashon di un plan sin karakter obligatorio pa bandoná Irak pa desèmber próksimo aña, den un votashon di 224-196 den kua e legisladornan a vota di akuerdo ku e liñanan di nan partido.
Finalmente un 32 republikano a djòin e demokratnan pa vota 256-166 na fabor di benefishinan edukativo pa e veteranonan di guera di Irak i Afganistan bou di e proposishon di lei pa e sòldánan, apesar di un impuesto di rekargo pa esnan riku i e empresarionan chikitu, i a vota pa amplia na 13 siman e benefishinan pa desempleo.

SAN JUAN – Michelle Obama a bisa djaweps ku si su esposo gana presidensia di Merka, lo e pone fondonan pa Puerto Rico kuminsá un proseso di outodeterminashon.
Den koinsidensia, Chelsea Clinton, tambe a bishitá e isla pa promové e kandidatura di su mama, e otro aspirante pa e kandidatura presidensial demokrat Hillary Clinton.
“Si otro kandidatonan ta bisa ku nan ta kere den e outodeterminashon, loke mi ta pensa ku lo bai ta diferente no ta e posishon, sino den e rekursonan ku e ta bai pone pa sigurá ku e atenshon di su gobièrnu lo ta enfoká riba e hende di Puerto Rico”, el a bisa den entrevista na radio ku WKA.
Obama a bisa, ku e i su esposo ta kere ku e mayoria di e siudadanonan na Puerto Rico mester disidí si nan ke keda ku e status aktual, pegá na Merka komo un estado o bira un pais independiente.
“E desishon di e status di Puerto Rico tin ku bini di e hendenan dje isla i lo e apoyá e desishon ei kompletamente”, el a señalá.

WILLEMSTAD - E oumento di kosto di bida ku nos pais ta eksperensiando, komo konsekuensia dje desaroyonan mundial, tin su efektonan tambe riba e negosiashonnan pa kontrato kolektivo pa trahadó di diferente empresa riba nos isla.
LA PRENSA a entrevistá Humphrey Mongen, sekretario general di e sindikato Horecaf, kende a konfirmá ku aktualmente e sindikato ta den deliberashon pa sera un kontrato kolektivo pa entre otro empleadonan di Hotel Trupial Inn. ‘Den e kuadro negosiashonnan ku ta tuma lugá, nos ta tene debidamente kuenta ku e subida di kosto di bida. I Horecaf ta bai purba tambe pa subi e salario di e trahadónan, tantu posibel.’ Asina e lider sindikal, a sigui splika.
Mas aleu Mongen a remarká: ’’Pero nos ta konsiente ku no por keda subi e salario, pasobra kada bes e preis di petroli ta oumentá. I no ta tur bia por keda subi e salario. ‘P’esei nos ta kere ku mester bin un ‘maneho’ muchu mas dirigí kon bo por hasi pa suavisá henter e sistema aki, unda ku preisnan di petroli ta subiendo’.
Pa loke ta trata e efekto ku esaki tin spesífikamente pa trahadónan di horeka, e oumento di kosto di bida, mester bisa ku den e sektor i horeka, por lo ménos 50 pa 70 porshento di e trahadónan ta gana rondó di e salario mínimo. Esaki ta pone ku e impakto riba nan, ta esun di mas pisá. P’esei mes Horecaf ta kere ku awor sí gobièrnu mester subi e salarionan mínimo ku por lo ménos 15 porshento i no sinku porshento. Di e manera aki ta bira posibel pa traha un tiki dam pa tur e oumentonan ku ta pendiente i tambe Horecaf ta opiná ku en bes di sigui bringa ku otro, tur hende na Kòrsou mester sinta trankil ku otro a yega na algu kaminda ku ta mira ku nos tin un tiki defensa.

WILLEMSTAD - E piskadónan i Marina Real, ayera tardi a yega na un palabrashon, relashoná ku e konflikto ku tin enkuanto ehersisionan di tiramentu riba laman. Na repetida okashon, e piskadónan di Banda Abou a duna di konosé, ku nan tin hopi problema ku e ehersisionan aki.
Pero e grupo ku a representá e piskadónan di Banda Abou ainda no ke divulgá resultado eksakto di e reunion. Den deklarashon ku Erwin Koense, bosero di e piskadónan a hasi, el a splika, ku ainda no a informá tur e piskadónan enkuanto desaroyo di e reunion. E proseso pa informá e piskadónan sinembargo a kuminsá for di ayera nochi i ta kontinuá awe den dia, te ora ku logra informá tur e piskadónan, segun Erwin Koense.
Di parti di Marina Real, bosero Joos Rozenburg a bisa, ku e reunion a bai den bon esfera unda ku e partidonan a papia habrí ku otro. ‘Defensa a hasi un proposishon na e piskadónan pa yega na un uso komun di e área di laman’. Asina Rozenburg a splika, indikando ku Erwin Koense a pidi Marina Real, pa wanta ku divulgashon públiko di e detayenan di e proposishon te despues ku e tabatin kontakto ku tur piskadó. Segun Rozenburg, ta trata di un proposishon realístiko di parti di Marina. ‘Den esaki a tene kuenta ku e nesesidatnan di komunidat’, segun e bosero di Defensa.
Enkuanto e desaroyo dje enkuentro mes, Koense a splika LA PRENSA, ku e reunion a bai den un situashon hopi ameno. Ámbos partido por a splika nan punto di bista. Marina Real a splika ta dikon nan mester hasi e ehersisionan di tiramentu i tambe pakiko nan méster tira. Di parti di e piskadónan a bin dilanti e opheshonnan fuerte i tambe e pregunta ta dikon Marina Real, mester sigui tira.

ARIES: Ekspresá sin miedu algun bo kualidatnan positivo. Permití ku nan ta konosébu a fondo. Pone bo mes den kontakto ku bo pareha. Kòmbersá, papia ku palabra simpel. 07,03.15.

TAURO; Horizonte nobo ta habri pa bo. Manehá inteligentemente bo tempu pa bo por probechá a lo máksimo. Planiá i prepará bon pa e lokual ku bo ke logra den bo bida. 28,08,29.

GEMINIS: Tin un lus ta lusa bo kaminda pa prosperidat den tur aspekto. Gosa di tur lokual ta proyektonan nobo ku ta laga ekselente ganashi ekonómiko. 04,41,33.

KANSER: Bo ta bai mira bida di un manera diferente i bo ta hasi kambionan masha nesesario. Pensa awe un poko mas den bo, den bo pas, bo salú, bo felisidat. 12,04,19.

LEO: Ser práktiko i realista den tur loke bo hasi. No laga bo mes wòrdu impreshoná pa palabranan di personanan ku no por realisá nada den bida i solamente ta biba di aparensia. 36.

VIRGO: Evitá tur relashonnan sentimental kompliká unda mas di un persona ta envolví. No sirbi un segunda mesa. Pone un bistaso na bo sentimentunan. 03,31,06.

LIBRA: Fortalesé bo mente i mira milagernan realisá dia pa dia. Envolví bo mes den aktividatnan unda bo por ta komo guia, direktor, maestro, hefe, ya ku bo ta den plan di dirigí. 11.

SKORPION: Midi bo palabranan i no bisa tur loke bo ta sinti ya ku bo por terminá den diskushonnan. Ta momentu di keda ketu, skucha i siña. 07,05,47.

Pa bende Refineria Isla, mester habrí kontrakt promé!

WILLEMSTAD – “Promé ku hasi kualke intento pa bende Refineria Isla, mester habri e kontrakt ku tin awor aki ku e refineria. Asina simpel e kos ta. Anto si mester kibra e kontrakt, nos pais mester paga entre 500 pa 700 na daño perhuisio na PdVSA”.
Di e forma aki diputado enkargá ku Refineria Isla Humphrey Davelaar a kontestá vários miembro di Konseho Insular, ku durante e reunion públiko a hasi e pregunta den e direkshon aki.
Kiko lo bira futuro di e refineria, tabata e pregunta ku a kore manera un liña kòrá durante e reunion. Miembronan tabata ke sa kiko ta bai pasa, si ta renegoshá e kontrakt, si ta bai hasi intento pa bende òf kiko ta bai hasi.
Diputado Davelaar, kende alabes ta diputado pa enkargá ku Asuntunan Sosial a konsiderá nesesario ayera a para algun minüt ketu na selebrashon di Dia Internashonal di Famia, un dia ku mundu kompleto a rekòrdá ayera.
“Sin famia, no tin nada”, tabata e mensahe di e mandatario.
“Refineria Isla tin un relashon komersial direkto ku PdVSA. Laga nos pone esei bon kla dilanti. Gobièrnu di Kòrsou mes no tin niun relashon ku esnan ku ta hür e refineria. Atraves di Refineria di Kòrsou gobièrnu tin sierto influensia. Pero t’asina ku mester apuntá ku e akshonnan di Refineria Kòrsou ta den man di StIP, ku ta e doño hurídiko di Refineria Isla. Gobièrnu di Kòrsou den e kaso aki ta akshonista ekonómiko.

WILLEMSTAD – “Presupuesto supletorio pa 2008 a keda aprobá den Bestuurscollege. Djaluna awor, durante un reunion di Komishon Sentral di Konseho Insular 9’or di mainta, lo trata e presupuesto supletorio pa 2008”.
Esei diputado di Finansa a konfirmá ayera durante un enkuentro ku prensa.
E presupuesto nobo pa 2008, adaptá despues di último desaroyonan awor tabata mustra un défisit di 103 mion florin, ku entretantu gobièrnu a logra baha te 67 mion. Pa kubri e défisit aki, lo mester introdusí di un banda medidanan pa redusí gastu i oumentá entrada, miéntras ku di otro banda lo mester weta kiko por hasi riba merkado finansiero lokal. Hecho ta, ku kada ken mester duna nan aporte, asina diputado di Finansa Mike Willem a enfatisá.
Konseho Insular, fin di aña pasá a trata i aprobá kaba presupuesto pa e aña koriente. E presupuesto ei tabata basa di un banda riba e promesa di Ulanda ku e ta karga un parti supstansial di e défisit di e aña aki – ku Kòrsou mes a kalkulá na 103 mion florin – miéntras ku a keda un défisit mas di 66 mion florin, ku teritorio insular di Kòrsou mes, mester a weta kon e ta finansiá esaki.
Den e kuadro ei diputado Mike Willem a anunsiá ku den e promé kuartal di aña 2008 e lo presentá un plan pa indiká kon ta bai kubri e défisit di 66 mion aki (e asina yamá “dekkingsplan”).

Dia di Bandera lo enfoká riba stimulashon patriotismo

WILLEMSTAD – “Dia di Bandera e aña aki, lo tin komo tema sentral “Patriotismo, amor den tur sentido di palabra”. Nos ta konsiderá, ku ta importante pa fomentá patriotismo”, asina diputado di Kultura Marilyn Alcalá-Wallé a partisipá.
Dia 2 di yüli benidero, lo ta Dia di Bandera. Manera kustumber, esaki lo ta kompañá ku e aktividat i seremonianan nesesario. E dia ta kuminsá ku un reunion solèm di Konseho Insular, despues di kua miembronan di Konseho Insular ta kana bai Plasa Brion kaminda e seremonia prinsipal ta tuma lugá.
Kontrali na otro añanan, e aña aki un grupo di hóben lo kana dilanti di miembronan di Konseho Insular ku e bandera grandi pa asina duna e akto di hisamentu di bandera mas realse.
“E aña aki nos lo enfoká riba dos aspekto: di un banda lo mustra riba e importansia di patriotismo, pero tambe lo enfoká riba identidat propio”, asina diputado Alcalá-Wallé a mustra.
El a bisa, ku mester bai traha muchu mas tantu riba “nation bulding”. “Esaki no mester bai solamente riba e aspekto di leinan di pais, pero mas tantu riba esfuersonan pa forha pais. Nos tur mester krese huntu den un solo direkshon”, e diputado a afirmá.
“E aña aki”, el a bisa, “lo tin vários inovashon den e programa. E aña aki lo tin mas atenshon pa e aspekto multi kultural. E aña aki lo dediká tambe mas atenshon na e aspekto di bario, na e aspekto di famia.

NPA no ta partisipá na reunion di koalishon mas!

WILLEMSTAD – “Partido Niun Paso Atras no ta bai niun reunion mas ku ta konvoká pa partidonan di koalishon. No tin sentido tampoko vota, si bo sa kaba ku ta mayoria ta disidí kiko ta pasa. Nos no ta dispuesto pa partisipá mas na e sirko aki”, esei ta loke lider di e partido Nelson Pierre a anunsiá durante e reunion di ayera pa diskutí futuro di Refineria Isla.
El a bisa, ku tur esnan ku ta sigui desaroyo mundial di e problema energétiko mester ta di akuerdo, ku ta trata aki di un problemátika hopi kompleho pa dil kuné.
Nelson Pierre a para ketu ekstensamente na un diskurso ku presidente di Venezuela Hugo Chávez Frias a tene e anochi promé relashoná ku e tenshon ku ta eksistí entre Venezuela i Colombia na e momentunan aki.
“Lagami bisa mesora ku e diskurso di presidente Chávez a kondusí mesora na un oumento di preis di krudo”, Pierre a anunsiá.
Pierre a bisa, ku ta trata di un diskurso di 5 ora i ku ta bon pa gobièrnu antiano i di Kòrsou buska un kopia pa tur hende sa kiko ta pasando.
“Tin un kantidat di desaroyo ta tumando lugá ku ta di transendental importansia pa nos. Ta di lamentá ku nos no ta dedikando atenshon na e kosnan aki”, el a bisa.
Pierre a bisa, ku ni maske kon bon prepará e yega pa diskutí kontenido di e tema ku ta tratando, ta reakshon superfisial tin semper.
“Ta kuestion di rekòrdá bo kiko b’a hasi den pasado, kuantu voto b’a haña, si bo tin derechi di ta den Konseho Insular i un kantidat di kos ku ta totalmente irelevante pa e diskushon. Ta kuestion di yega kamber di Konseho Insular, sende èrko, wak si telefon ta traha i pasa den korantnan lokal pa wak ken a kuestionabu, pa bo kuestion’é bèk na un nivel personal.